Webrwanda Backend

Category: Uncategorized

  • Kigali: Hibutswe abarenga ibihumbi 20 bishwe n'umutingito na Tsunami mu Buyapani – #rwanda #RwOT

    Ambasade y'u Buyapani mu Rwanda, Ikigo Mpuzamahanga cy'Abayabapani (JICA) ndetse n'umuryango NPO TER (Think about Education in Rwanda) w'Abayapani, bibutse abashegeshwe n'ibiza byo kuwa 11 Werurwe 2011.

    Ni umuhango wabimburiwe n'igitambo cya Misa yo kwibuka no gusabira abagizweho ingaruka n'ibiza byabaye mu Buyapani muri 2011 birimo umutingito, Tsunami n'iturika ry'uruganda rw'ingufu za Nucléaire rwa Fukushima yabereye kuri Paruwasi Regina Pacis i Remera.

    Umuyobozi ushinzwe porogaramu mu muryango NPO TER (Think about Education in Rwanda) w'Abayapani, wita ku baturage bakeneye ubufasha by'umwihariko wibanda cyane ku burezi, Hirwa Ishimwe Flavien, yavuze ko kwifatanya n'u Buyapani ari ukuzirikana umubano bufitanye n'u Rwanda.

    Ati 'Birerekana ko NPO TER yubatse umubano ukomeye n'u Buyapani haba mu bihe byiza no mu bibi'.

    Uhagarariye JICA mu Rwanda, Shiotsuka Minako, yavuze ko imyaka 12 ishize ari myinshi ariko kwibuka inshuti n'abavandimwe bapfuye bazize ibiza bidashira.

    Ati 'Abantu barenga ibihumbi 20 barapfuye cyangwa baburirwa irengero muri uriya mutingito na Tsunami. N'ubungubu haracyari ibikomere kandi turi mu rugendo rwo kubyomora'.

    Ambasaderi w'u Buyapani mu Rwanda, Isao Fukushima, yavuze ko ibiza byagwiririye u Burasirazuba bw'igihugu cye bitabaheranye ahubwo habayeho urugendo rwo kongera kwiyubaka, hubakwa inzu n'ibikorwaremezo by'ubwikorezi.

    Uyu munsi 90% by'abari bakuwe mu byabo n'umutingito na Tsunami basubiyeyo.

    Amb. Isao Fukushima yavuze ko abahanga bagaragaje ko mu Buyapani hashobora kongera kuba umutingito nk'uwabaye mu 2011, asaba ubufatanye mu gukumira ingaruka ushobora kugira.

    Ati 'Gukumira kubura ubuzima n'imitungo binyuze mu kwirinda ibiza, bikwiye kwibandwaho cyane'.

    Ku itariki ya 11 Werurwe 2011 nibwo habaye umutingito ukomeye cyane uri ku kigereranyo cya 9.0 (magnitude) waje gukurikirwa n'undi wo mu Nyanja uzwi nka Tsunami, byatwaye ubuzima bw'abatari bake.

    Uyu mutingito ukomeye watumye habaho iyangirika ry'uruganda rwakorerwagamo ibisasu by'ubumara, ibintu byatumye abaturage bo mu gace ka Fukushima uru ruganda ruherereyemo bimurwa.

    Buri tariki 11 Werurwe hibukwa abahitanywe n’ibiza byo mu 2011 mu Buyapani

    Umuyobozi ushinzwe porogaramu mu muryango NPO TER, Hirwa Ishimwe Flavien yavuze ko ari iby’agaciro kwifatanya n’u Buyapani

    Uhagarariye JICA mu Rwanda, Shiotsuka Minako, yavuze ko kwibuka bihoraho

    Ambasaderi w’u Buyapani mu Rwanda, Isao Fukushima yavuze ko igihugu cye kigeze kure cyiyubaka

    Source : http://igihe.com/amakuru/u-rwanda/article/kigali-hibutswe-abarenga-ibihumbi-20-bishwe-n-umutingito-na-tsunami-mu-buyapani

  • Abantu 15 bari mu bitaro kubera ubushera banyoye mu bukwe #rwanda #RwOT

    Abaturage 15 bo mu Karere ka Kicukiro bahuye n'uruva gusenya nyuma yo kunywa ubushera mu bukwe bukabamerera nabi bigakekwa ko bwari bwahumanyijwe.

    Aba baturage nabo mu Mudugudu wa Kagese mu Kagari ka Rusheshe mu Murenge wa Masaka mu Karere ka Kicukiro bavuga ko nyuma yo kunywa ubushera aho bari batashye ubukwe mu Karere ka Rwamagana bwabaguye nabi bagatabarwa no kwa muganga.

    Bemeza ko kuba bamerewe nabi babitewe n'ubu bushera, ngo kuko abarwaye bose bafashwe nyuma yo kubunywa, bakaba kandi bose barafashwe kimwe: kuruka, guhitwa, kuribwa mu nda, kubabara umutwe ndetse no guhinda umuriro.

    Amakuru avuga ko kwa muganga babwiwe ko bigaragara ko bahumaniye mu byo banyoye byari birimo imyanda. Gusa ngo ubuzima bwabo bumeze neza boherejwe kurwarira mu rugo kandi bazakira.

    Nduwayezu Alfred, Umunyamabanga Nshingwabikorwa w'Umurenge wa Masaka, yabwiye itangazamakuru ko abo baturage bajyanywe kwa muganga nyuma yaho bose batangiye kurwara mu nda.

    Ati ' Bakoze ubukwe busanzwe barangije bataha iwacu kuko niho batuye bumva batameze neza bajya kwa muganga abaganga babaha ubutabazi ubu barimo kubitaho nk'ibisanzwe.'

    Inzego zibishinzwe mu Karere ka Rwamagana aho banyoye ubwo bushera zatangiye iperereza ngo hamenyekane icyari kiburimo cyateye abaturage kumererwa nabi.

    Source : https://umuryango.rw/amakuru/mu-rwanda/umutekano/article/abantu-15-bari-mu-bitaro-kubera-ubushera-banyoye-mu-bukwe

  • Angola yiyemeje kohereza abasirikare muri RDC #rwanda #RwOT

    Igihugu cya Angola cyatangaje ko kigiye kohereza umutwe w'abasirikare kabuhariwe muri Repubulika ya Demokarasi ya Congo nyuma yo kubona ko Ingabo za EAC zigenda biguru ntege mu guhosha intambara hagati ya M23 n'ingabo za Leta ya Congo.

    Intego nyamukuru y'uyu mutwe w'ingabo za Angola ugiye koherezwa muri RD Congo ngo ni ugushaka umutekano mu bice inyeshyamba za M23 zigaruriye.

    Uyu mutwe kandi ngo uzaba ufite inshingano zo kurinda abagize itsinda rishinzwe gukurikirana iyubahirizwa ryo guhagarika imirwano hagati y'impande zihanganye.

    Kohereza izi ngabo muri Congo ngo ni mu rwego rwo kubahiriza ibyemezo byafashwe n'inama zitandukanye ku bijyanye n'amahoro n'umutekano muri RD Congo, hakurikijwe inshingano z'ubuhuza mu masezerano ya Luanda.

    Izi ngabo zisanze izindi mbaraga ku butaka bwa RD Congo 21.000 ba MONUSCO, amagana y'Abagande, Abacanshuro b'Abarusiya, Abarundi, Abanyakenya na Sudani y'Amajyepfo binjiye mu gufasha Congo guhagarika umutwe wa M23.

    Abanyecongo basaba ubutegetsi bwabo kubaka igisirikare gihamye kuko umutekano wabo utazashingira ku bihugu by'amahanga bigira akaboko mu guhungabanya umutekano no gusahura imitungo ya Congo.

    Amakuru avuga ko Perezida Tshisekedi ahanze amaso ibihugu bya SADC nyuma yo gusanga EAC imusaba kuganira byimbitse n'umutwe wa M23 ibintu adakozwa na busa.

    Hategerejwe ko Inteko Ishingamategeko ya Angola yemeza kohereza izi ngabo muri Congo maze zikajya kwesurana byeruye n'umutwe wa M23.

    IVOMO: UMUSEKE

    Source : https://umuryango.rw/amakuru/mu-mahanga/umutekano/article/angola-yiyemeje-kohereza-abasirikare-muri-rdc

  • APR FC yakomereje ibirori kuri Marines FC itajya iyigora #rwanda #RwOT

    Shampiyona y' u Rwanda yakomeje hakinwa umunsi wa 23 aho APR FC yashimangiye umwanya wa mbere itsinda Marines FC 3-2.

    Marines FC ni yo yari yakiriye umukino kuri Stade Umuganda i Rubavu, aho APR FC yatangiye umukino isatira cyane ariko Marines ikabyitwaramo neza.

    Marines FC ni yo yafunguye amazamu ku munota 12 ku ishoti Usabimana Olivier yatereye inyuma y'urubuga rw'amahina umupira ukaboneza mu rushundura.

    APR FC yakoze cyane ishaka kwishyura iki gitego ndetse iza kubigeraho ku munota wa 25 gitsinzwe na Niyibizi Ramadhan ku mupira yatereye mu rubuga rw'amahina.

    Ku mupira Nshuti Innocent yahawe na Manishimwe Djabel yatsindiye APR FC igitego cya 2 ku munota wa 26.

    Mwebaze Yunusu yatsindiye APR FC igitego cya 3 ku munota wa 42 ku mupira wari uvuye ku ikosa ryahanwe na Ishimwe Christian.

    Usabimana Olivier yatsindiye Marines FC igitego cya 2 ku munota wa 44. Amakipe yagiye kuruhuka ari 3-2.

    Mu gice cya kabiri Marines yashatse igitego cyo kwishyura na APR FC ishaka kongera umubare w'ibitego ariko biranga umukino urangira ari 3-2.

    Umukino wabereye i Huye ukaba wahagaritswe ugeze ku munota wa 77 kubera imvura nyinshi, Mukura VS yari imbere n'ibitego 2 kuri 1 cya Sunrise FC. Imvura yaje kugabanuka urakomeza maze urangira ari 2-1.

    Gahunda y'umunsi wa 23

    Ku wa Gatanu tariki ya 10 Werurwe 2023

    Gasogi United 2-2 Rwamagana City
    Rutsiro FC 4-0 Espoir FC

    Ku wa Gatandatu tariki ya 11 Werurwe 2023

    Bugesera FC 2-1 Police FC
    Mukura VS&L 2-1 Sunrise FC
    Marines FC 2-3 APR FC

    Ku Cyumweru tariki ya 12 Werurwe 2023

    AS Kigali vs Rayon Sports
    Musanze FC vs Gorilla FC
    Etincelles FC vs Kiyovu Sports

    Source : https://umuryango.rw/imyidagaduro/imikino/article/apr-fc-yakomereje-ibirori-kuri-marines-fc-itajya-iyigora

  • Rubavu: Umusirikare wa RDF yarashe Abanyekongo babiri bambutse umupaka bitemewe #rwanda #RwOT

    Ku wa Gatanu,tariki ya 10 Weurwe 2023,umusirikare wa RDF wari ku burinzi yarashe abaturage bagenda hataracya,bambuka umupaka mu buryo butemewe, hakomereka babiri.

    Amakuru UMUSEKE dukesha iyi nkuru wamenye nuko byabereye ku mupaka wa Kabuhanga, mu Murenge wa Busasamana, Akagari ka Rusura mu Mudugudu wa Kambonyi.

    Byamenyekanye ku mugoroba w'ejo hashize tariki, 10/03/2023, mu masaha ya saa 20h15.

    Amasasu abiri yarashe uwitwa Kabange Nepo w'imyaka 17, akaba ari umuturage wa Congo utuye, Nyiragongo-Buhumba-Cyegera, na Biryamunsi Valentin na we w'imyaka 17 utuye muri kariya gace.

    Mbere yo kubarasaho barenze m 5 z'umupaka, ngo abari ku burinzi babanje kubahagarika abanda barangay.

    Umwe isasu ryamufashe mu mugongo, undi akaboko.

    Kabange Nepo yahise ajyanwa kuvurirwa ku Bitaro bikuru bya Gisenyi, naho Biryamunsi Valentin ajyanwa ku Kigo Nderabuzima cya Bugeshi.

    Mayor w'Akarere ka Rubavu, Ildephonse Kambogo, yabwiye UMUSEKE ko ayo makuru yayumvuse, ariko ko akigerageza kumenya neza ibyabaye.

    Kambogo yadutangarije ko ku baturage bo mu Rwanda ubutumwa babuzi ko bitemewe kwambuka umupaka, banyuze mu nzira zitemewe.

    Ntabwo UMUSEKE wabashije kuvugana n'umuvugizi w'Igisirikare cy'u Rwanda kugeza ubu.

    Imipaka ihuza u Rwanda na Congo irarinzwe cyane, mu gihe ibihugu byombi bitabanye neza muri iki gihe. Hari hashize igihe gito umusirikare wa Congo winjiye ku butaka bw'u Rwanda yasinze, arashwe n'abasirikare b'u Rwanda arapfa.

    Source : https://umuryango.rw/amakuru/mu-mahanga/umutekano/article/rubavu-umusirikare-wa-rdf-yarashe-abanyekongo-babiri-bambutse-umupaka-bitemewe

  • Umuraperi B Trey yakoze ubukwe #rwanda #RwOT

    Umuraperi Muheto Bertrand wamamaye nka B.Threy yakoze ubukwe na Keza Nailla bamaze igihe bakundana.

    Uyu munsi ku wa Gatandatu tariki ya 11 Werurwe hakaba habaye umuhango wo gusaba no gukwa.

    Ni ubukwe bwabereye mu Mujyi wa Kigali ahitwa 248 Events muri Gikondo aho umuhanzi w’injyana Gakondo, Cyusa Ibrahim ari we wasusurukije ababwitabiriye.

    Aba bombi bari bamaze igihe bakundana ariko bakaba barabyeruye ko bakundana umwaka ushize wa 2022.

    B Threy biteganyijwe ko tariki ya 16 Werurwe azakora igitaramo cyo kumurika EP yise ‘For Life’ aho bivugwa ko hariho n’indirimbo izaba irimo amashusho yafashwe mu bukwe bwa bo.

    B Threy yakoze ubukwe na Keza

    Source : http://isimbi.rw/imyidagaduro/article/umuraperi-b-trey-yakoze-ubukwe

  • APR FC yatsinze Marines, imvura ihagarika umukino wa Mukura na Sunrise FC #rwanda #RwOT

    Shampiyona yari yakomeje hakinwa umunsi wa 23 aho APR FC yashimangiye umwanya wa mbere itsinda Marines FC 3-2.

    Marines FC ni yo yari yakiriye umukino kuri Stade Umuganda i Rubavu, aho APR FC yatangiye umukino isatira cyane ariko Marines ikabyitwaramo neza.

    Marines FC ni yo yafunguye amazamu ku munota 12 ku ishoti Usabimana Olivier yatereye inyuma y’urubuga rw’amahina umupira ukaboneza mu rushundura.

    APR FC yakoze cyane ishaka kwishyura iki gitego ndetse iza kubigeraho ku munota wa 25 gitsinzwe na Niyibizi Ramadhan ku mupira yatereye mu rubuga rw’amahina.

    Ku mupira Nshuti Innocent yahawe na Manishimwe Djabel yatsindiye APR FC igitego cya 2 ku munota wa 26.

    Mwebaze Yunusu yatsindiye APR FC igitego cya 3 ku munota wa 42 ku mupira wari uvuye ku ikosa ryahanwe na Ishimwe Christian.

    Usabimana Olivier yatsindiye Marines FC igitego cya 2 ku munota wa 44. Amakipe yagiye kuruhuka ari 3-2.

    Mu gice cya kabiri Marines yashatse igitego cyo kwishyura na APR FC ishaka kongera umubare w’ibitego ariko biranga umukino urangira ari 3-2.

    Umukino wabereye i Huye ukaba wahagaritswe ugeze ku munota wa 77 kubera imvura nyinshi, Mukura VS yari imbere n’ibitego 2 kuri 1 cya Sunrise FC. Imvura yaje kugabanuka urakomeza maze urangira ari 2-1.

    Gahunda y’umunsi wa 23

    Ku wa Gatanu tariki ya 10 Werurwe 2023

    Gasogi United 2-2 Rwamagana City
    Rutsiro FC 4-0 Espoir FC

    Ku wa Gatandatu tariki ya 11 Werurwe 2023

    Bugesera FC 2-1 Police FC
    Mukura VS&L 2-1 Sunrise FC
    Marines FC 2-3 APR FC

    Ku Cyumweru tariki ya 12 Werurwe 2023

    AS Kigali vs Rayon Sports
    Musanze FC vs Gorilla FC
    Etincelles FC vs Kiyovu Sports

    APR FC yatsinze Marines

    Source : http://isimbi.rw/siporo/article/apr-fc-yatsinze-marines-imvura-ihagarika-umukino-wa-mukura-na-sunrise-fc

  • Umugore wa Fireman yamaze kubagwa #rwanda #RwOT

    Kabera Charlotte akaba umugore w’umuraperi Uwimana Francis [Fireman] yamaze kubagwa nyuma yo kugira ikibazo cy’aho urutirigongo rutangirira (Spinal Cord) biturutse ku mpanuka yakoze.

    Uyu mugore akaba yarabazwe ku munsi w’ejo hashize ku wa Gatanu tariki ya 10 Werurwe 2023, yabagiwe ku Bitaro byitiriwe Umwami Faisal (King Faisal Hospital).

    Nyuma yo kugira iki kibazo cya “Spinal Cord” aho yari yavuye mu mwanya (dislocation) byatumye aba paralyze.

    Fireman akaba yabwiye ISIMBI ko kubagwa byegenze neza ndetse nyuma yo kubagwa ubu umugore we ameze neza.

    Hari icyo wifuza gufasha Fireman wanyura kuri iyi nimero 0787708366 (Uwamina Francis).

    Ni ikibazo Kabera Charlotte yakuye mu mpanuka yakoze ari kumwe n’umugabo we Fireman tariki ya 8 Gashyantare 2023 .

    Yahise ajyanwa mu bitaro bya Gisirikare i Kanombe maze abwirwa ko umugore we atabazwe bishobora kumuviramo n’ubumuga bwa burundu.

    Tariki ya 5 Werurwe 2023 ni bwo umugore we yagejejwe mu bitaro byitiriwe Umwami Faisal ari n’aho yabagiwe.

    Fireman na Kabera Charlotte basezeranye imbere y’amategeko tariki ya 4 Mutarama 2022 mu Ntara y’Iburasirazuba, Akarere ka Rwamagana, mu Murenge wa Mwurire.

    Fireman yakunzwe mu itsinda rya Tuff Gang yari ahuriyemo na bagenzi be Bull Dogg, Jay Polly (witabye Imana), Green P na P Fla waje gukurwamo. Yaririmbye indirimbo nka 'Ca Inkoni Izamba’, 'Urwikekwe’, 'Umuhungu wa muzika’ n’izindi.

    Umugore wa Fireman yamaze kubagwa

    Source : http://isimbi.rw/imyidagaduro/article/umugore-wa-fireman-yamaze-kubagwa

  • Abandi bakobwa bo muri Afghanistan bakiriwe mu Rwanda – #rwanda #RwOT

    Aba-Taliban mu mpera z'umwaka ushize bafashe umwanzuro ubuza abakobwa n'abagore kwiga muri Kaminuza no mu mashuri yisumbuye, ibintu byamaganwe ku Isi hose ariko bigafata ubusa.

    Icyo gihe ubwo uwo mwanzuro watangazwaga, Minisitiri w'Amashuri makuru yavuze ko ugomba guhita ushyirwa mu bikorwa. Ni umwanzuro wari uje nyuma y'aho n'ubundi abakobwa bemererwaga kujya mu ishuri ariko bakigishwa n'abarimu b'abagore gusa cyangwa se abagabo bakuze.

    Ntabwo impamvu Leta y'Aba-Taliban yashingiyeho ikumira abagore n'abakobwa mu ishuri isobanutse, gusa ivuga ko bishingiye ku iyubahirizwa ry'amategeko agenga idini ya Islam.

    Umuryango Mpuzamahanga ufasha impunzi n'abashaka ubuhungiro, IOM, uri gufasha aba bakobwa bo muri Afghanistan kuba bakwimukira mu Rwanda kugira ngo bakomeze amasomo yabo.

    Aba bakobwa baherutse kugera mu Rwanda, bakirwa n'Ishuri ryigisha Imiyoborere ryo muri Afghanistan, SOLA.

    Ni ishuri ry'abakobwa gusa ryo muri Afghanistan mu Mujyi wa Kabul ariko ubwo Aba-Taliban basubiraga ku butegetsi ryimukiye mu Rwanda kuko ritari ryemerewe gukora.

    Ni ryo shuri rifite imikorere nk'iyo muri Afghanistan, aho riha abakobwa uburezi bwo mu mashuri yisumbuye, rikabubakamo ubushobozi bubagira abayobozi beza b'ejo hazaza.

    Umuyobozi Mukuru wa IOM, António Vitorino, yavuze ko iki gitekerezo cyo gufasha aba bakobwa gukomeza kwiga, kinejeje, ashimira umuhate w'abagore n'abakobwa bo muri Afghanistan.

    Ati 'Iki gikorwa gituma ngira icyizere, kijyanye na gahunda yacu yo gukomeza gukora ubuvugizi hamwe n'abagore n'abakobwa bo mu gihugu, kugira ngo habeho Afghanistan yemera kandi iteza imbere ndetse yubakiye ku ruhare rw'abagore bayikomokamo, kandi ishora imari mu bakobwa.'

    Aba bakobwa bageze mu Rwanda nyuma y'amasezerano IOM yagiranye na SOLA yo kubafasha mu by'ingendo no kwimurira abanyeshuri bayo hanze ya Afghanistan, bakimukira mu kigo iri shuri risigaye rikoreramo mu Rwanda.

    Abo banyeshuri bagejejwe mu Rwanda baherekejwe n'abakozi ba IOM babageza aho SOLA isigaye ikorera mu Mujyi wa Kigali.

    Umwe mu bakozi ba IOM waherekeje aba banyeshuri yavuze bari bishimiye kujya aho ishuri ryabo ryimukiye.

    Ati 'Mu rugendo mu ndege, umukobwa muto yahawe ingofero n'amadarubindi y'abapilote. Yari yishimye. Yambaye ingofero ye mu rugendo rwose, yambwiye ko ashaka kuzaba umupilote nakura.'

    Shabana Basij-Rasikh washinze SOLA, yavuze ko ubu hashize umwaka Aba-Taliban bakumiriye abakobwa mu mashuri, bimwa uburenganzira bwo kwiga.

    Ati 'Bifite igisobanuro gikomeye kuri njye kuko ubu bageze mu Rwanda kugira ngo bakomeze amasomo yabo, nejejwe na IOM ku bufasha bwayo ku buryo bakoze urugendo amahoro bakaba bageze mu ishuri ryacu aho bazakurira bakazavamo abayobozi beza bazasana Afghanistan umunsi umwe.'

    Aba banyeshuri bashya basanze bagenzi babo biga muri SOLA bageze mu Rwanda muri Kanama 2021. IOM isobanura ko izakomeza gufasha mu kwimura abandi bakobwa bo muri Afghanistan bakagezwa aho SOLA ikorera.

    Byari ibyishimo ubwo aba bakobwa bakirwaga mu Rwanda

    IOM ni yo yafashije aba bakobwa bimurirwa mu Rwanda

    Bagenzi babo basanzwe mu Rwanda bari bagiye kubakira

    Source : http://igihe.com/amakuru/u-rwanda/article/abandi-bakobwa-bo-muri-afghanistan-bakiriwe-mu-rwanda

  • M23 yarekuye ibice birindwi yari yarafashe #rwanda #RwOT

    Mu itangazo ryashyizwe hanze n'ubuyobozi bw'umutwe wa M23 kuri uyu wa Gatandatu tariki 11 Werurwe 2023 rivuga ko uyu mutwe ukomeje gushyira mu bikorwa imyanzuro yafashwe n'abakuru b'Ibihugu mu Karere.

    Uyu mutwe wibutsa ko tariki 07 Werurwe 2023 uyu mutwe watangaje ku mugaragaro ko uhagaritse imirwano nubwo FARDC n'abambari bayo batahwemye kuwushotora.

    Iri tangazo ryashyizweho umukono n'Umuvugizi wa M23 mu bya politiki, Lawrence Kanyuka, rikomeza rigira riti 'M23 inejejwe no gutumira komanda w'igisirikare cy'akarere ka Afurika y'Iburasirazuba ndetse na Komanda w'itsinda rihuriweho rigenzura ibikorwa bya gisirikare kuza bagashyikirizwa ibirindiro tugiye kuvamo ari byo: Karuba, Muremure, Nyamitima, Nkingo, Kagano, Kihuli (iminara itatu) ndetse n'ibice bibikikije.'

    Uyu mutwe wa M23 usoza ushimira imbaraga zikomeje kugaragazwa n'abakuru b'Ibihugu byo mu karere mu nzira zo gushaka amahoro mu burasirazuba bwa Congo.

    Icyakora nanone wasoje umenyesha ko ufite uburenganzira bwo kwirwano mu gihe cyose wagabwaho ibitero ndetse no kurinda abasivile bari mu bice uyu mutwe usigaranye.

    Source : https://umuryango.rw/amakuru/mu-mahanga/umutekano/article/m23-yarekuye-ibice-bitandatu-yari-yarafashe