Category: Uncategorized

Abahanga mu bumenyi bw'ibirunga bavuze ko babonye urumuri ku gasongero k'ikirunga cya Nyamulagira mu burasirazuba bwa Repubulika ya Demokarasi ya Congo.

Amakuru mashya y'abo bahanga avuga ko urwo rumuri rwatewe no kugenda kw'amazuku cyangwa amahindure (lave) mu bujyakuzimu bugufi yerekeza ku munwa w'ibanze w'ikirunga Nyamulagira.

Mu kiganiro n'abanyamakuru mu ijoro ryo ku wa mbere, Minisitiri w'itangazamakuru akaba n'umuvugizi wa leta ya DR Congo, Patrick Muyaya, yavuze ko urwo rumuri rwatangiye kuboneka guhera saa kumi n'ebyiri z'umugoroba (18h).

Muyaya, asubiramo amakuru y'ikigo cya Goma cyiga ku birunga, yavuze ko mu gihe ikirunga Nyamulagira cyaba kirutse, amazuku yakwerekeza muri pariki y'igihugu ya Virunga.

Ariko yavuze ko hari nk'ibintu bimwe nk'ivu ry'ikirunga rishobora kugwa mu duce dutuwemo n'abantu bivuye ku birimo kubera ku munwa w'icyo kirunga.

Muyaya ati: “Tugiriye inama abaturage ba Goma gukomeza gutuza, gukora akazi mu bwisanzure, ikoresha rijyanye no koza imboga no kunywa amazi yo mu bigega rigomba gukurikizwa nta kujenjeka”.

Kuri ubu Goma ituwe n'abaturage bagera ku 670,000, nkuko bikubiye mu mibare y'igereranya y'umuryango w'abibumbye.

Muyaya yanavuze ko leta ya DR Congo isaba abatwara indege “kwita ku cyerekezo cy'umuyaga mu gihe banyuze mu kirere cy'akarere ka Virunga”.

Mu mwaka wa 2011 ni bwo ikirunga cya Nyamulagira (kinandikwa nka Nyamuragira) giheruka kuruka cyane, bwari bwo bwa mbere kirutse cyane mu myaka 100 yari ishize.

Ikirunga cya Nyamulagira, gifite ubutumburuke bwa metero 3,058, kiri muri pariki y'igihugu ya Virunga, iyi ikaba ibamo n'ingagi zo mu misozi miremire ziri mu byago byo gushiraho.

Mu kwezi kwa gatanu mu 2021, abantu babarirwa mu bihumbi za mirongo bahungishijwe bava mu mujyi wa Goma nyuma yuko ikirunga cya Nyiragongo kirutse.

BBC

Source : https://umuryango.rw/amakuru/mu-mahanga/umutekano/article/leta-ya-rdc-yavuze-ku-bijyenye-n-iruka-ry-ikirunga-cya-nyamuragira

1.Uruhu rwiza

Muri concombre harimo ibisohora imyanda mu mubiri ndetse na za vitamin naho amazi yo azwiho kurwanya umwuma no gusukura umubiri. Uruvange rwabyo rero rwirukana imyanda ishajisha uruhu, rukarwanya iminkanyari yaruzaho, ndetse rukanarwanya utubara tuza ku ruhu kubera gusaza

2.Kugabanya ibiro

Amazi arimo concombre atera igihagisha. Ndetse anarinda inyota dore ko hari igihe ugira inyota bikagendana no gusonza. Niba wifuza kugabanya ibiro, ifunguro ryawe rinini ribeho aya mazi kuko akurinda kuryagagura cyangwa kurya byinshi.

3.Umutima

Concombre ikungahaye kuri potasiyumu uyu ukaba umunyungugu mwiza ufasha abafite ikibazo cy'umutima. Ubwinshi bwayo mu mubiri bugabanya igipimo cya sodiyumu, iyi ikaba mbi kuko ubwinshi bwayo mu mubiri butera umuvuduko ukabije w'amaraso. Kunywa aya mazi rero birwanya indwara z'umuvuduko, stroke, n'izindi zifata umutima.

4.Uburemere bw'amagufa

Nubwo muri concombre hatabamo imyunyungugu myinshi ariko habamo silicium na manganese, imwe mu myunyungugu umubiri udakenera ari myinshi, ariko ikenerwa ngo amagufa agire ireme. Kunywa aya mazi rero birafasha kugira amagufa afite ireme bikakurinda za rubagimpande n'izindi ndwara zifata amagufa uko usaza.

5.Kongera amavangingo

Amavangingo, amazi, amanyare nkuko byitwa mu mazina atandukanye byiyongera iyo umubiri woroshye kandi urimo amazi menshi. Kunywa amazi arimo concombre rero ni bumwe mu buryo bufasha abagore kongera aya mavangingo.

6.Kanseri

Muri concombre habamo cucurbitacin iki kikaba ikinyabutabire kiboneka muri yo gusa kikaba kizwiho gusohora imyanda mu mubiri by'umwihariko kunywa amazi arimo concombre bigafasha kurwanya kanseri ya porositate ku bagabo, n'izindi kanseri zinyuranye muri rusange.

7.Gusukura

Kunywa aya mazi bizatuma unyara kenshi bityo uko unyara ube uri gusohora imyanda n'uburozi mu mubiri. ibi bizakorwa vuba kandi birinde ko hari imyanda n'uburozi byakibika muri wowe.

8.Gukomeza imikaya

Muri concombre habonekamo silicium idakunze kuvugwaho cyane nyamara ikaba ari ingenzi mu gutuma ugira imikaya ikomeye kandi ikora neza.

Aya mazi ategurwa ate?

Gutegura aya mazi ntibigoye kandi ni ibintu nawe wakikorera. Icyo usabwa ni ukuba ufite amazi meza na concombre gusa.

 Sukura concombre uyikatemo uduce mu muzenguruko (ntuyihate). Niba ushaka amazi yuzuye ikirahure urakata udusate 4 gusa ariko ushaka litiro ukoresha concombre yose

 Suka amazi mu cyo uvangiramo hanyuma ushyiremo twa dusate twa concombre

 Niba wabona balafu yishyiremo kugirango twa dusate twa concombre tutareremba.

-Utayifite ukoreshe ibindi birusha uburemere concombre ku buryo zijya ku ndiba ntizirerembe

 Bireke gutyo iminota 15 mbere yo kunywa

 Nyuma yo kunywa ayo mazi ongera ushyiremo andi kuko ntabwo intungamubiri zirashiramo. Nihashira amasaha 24 za concombre uzijugunye ukate izindi

Akamaro k'amazi arimo concombre

Source : https://umuryango.rw/ubuzima-115/article/dore-ibyiza-byo-kunywa-amazi-arimo-concombre-ku-buzima-bwa-muntu

Mu kiganiro gito Rihanna na A$AP Rocky bagiranye na Vanity Fair ubwo bari basohotse mu birori bya Oscars Awards 2023, bagize icyo bavuga ku byiyumviro byabo nk'abantu bagiye kwibaruka ubuheta. Rihanna yagize ati: ''Ndacyazungurutsa umutwe ngo numve koko ibi niba biri kuba kuko sindabyemera! Bibaye byihuse kandi byaradutunguye''.

Rihanna w'imyaka 35 yakomeje agira ati: ''Kuririmba muri Oscars ni ibintu nifuzaga byanshimishije kuba nabikoze ariko nishimye kurushaho kuko naririmbye ntwite umwana wa kabiri. Ibi si amateka yanjye gusa ahubwo ni ayacu twembi''.

Umuraperi A$AP Rocky nawe utahwemaga kumwenyura ubwo yarebaga umukunzi we ku rubyiniro aririmbo indirimbo yise 'Lift Me Up' yagize ati: ''Turishimye ko turi kumwe nk'umuryango hano kandi ko tugiye no kuwagura. Mu myaka 3 ishize uwari kubwira ko ibi bishoboka sinari kubyemera. Ni byiza ko twembi turi hano mu bihe nk'ibi''.

Rihanna na Asap babajijwe niba bajya batekereza ku mushinga wo kuba bakorana indirimbo dore ko bose ari abahanzi, Rihanna yasubije aseka ati: ''Tubitekereza buri munsi gusa ntitwababwora igihe tuzasohora indirimbo yacu. Abafana bacu tuzabatungura''.

Source : https://umuryango.rw/imyidagaduro/article/akanyamuneza-ni-kose-kuri-rihanna-na-asap-rocky-bitegura-kwibaruka-umwana-wa

Ni ubwato bwa kompanyi y'ingendo z'ubwato buzatangira kogoga inyanja tariki 01 Ugushyingo 2023 butangiriye urugendo rwiswe MV Gemini muri Istanbul muri Turkia.

Abakoze ubu bwato, bavuga ko abantu bafite amezi umunani yo kwitegura ku bifuza kuzakodesha muri ubu bwato, bashaka ibyangombwa byose nk'imapuro z'inzira (Passport) ndetse n'ibindi.

Ubu bwato buzamara imyaka itatu buri mu rugendo, buzagenda ibilometero ibihumbi 130, abifuza kubukodeshamo aho gutura mu gihe cy'umwaka, bazishyura ibihumbi 30 USD (Miliyoni 30 Frw) ku muntu umwe.

Ni ubwato bukozwe nka Hoteli zikomeye kuko burimo ibyumba byo kuraramo, uruganiriro, piscine ndetse n'ibindi bikorwa remezo byose bikenerwa n'abantu aho batuye.

Iyi kompanyi y'ubu bwato, ivuga ko buzagera ku byambu 375 ndetse bukagera mu Bihugu 135 byo ku Isi ku Migabane yose uko ari irindwi.

Hamwe mu hantu nyaburanga buzagera, harimo umujyi wa Rio de Janeiro, ku birango bya Pyramids bya Gisa ndetse n'ahazwi nka Great Wall mu Bushinwa.

Buzagera kandi mu Birwa 103, aho igihe buzaba bugeze muri ibyo bice buzajya buhagarara ababurimo bakabanza kujya gutembera mu rwego rwo kubashimisha.

Ubu bwato bufite ibyumba abantu bashobora kubamo bigera muri 400 ndetse n'ahandi hashobora kwakira abagenzi 1 074.

Source : https://umuryango.rw/imyidagaduro/article/hamenyekanye-akayabo-kazishyurwa-ku-muntu-uzifuza-gukodesha-mu-bwato-bumeze-nk

Uwitwa NOHERI yasabye guhindura amazina mu buryo bwemewe n'amategeko akitwa NDAHIMANA Emmanuel mu bitabo by'irangamimerere.

Impamvu atanga zituma asaba guhindura amazina akaba ari uko ari amazina yakoresheje mu ishuri.

Source : https://umuryango.rw/amatangazo/article/itangazo-noheri-yasabye-guhindura-amazina-akitwa-ndahimana-emmanuel

Kuri uyu wa Mbere, u Rwanda rwakiriye ibikoresho bizakoreshwa mu kubaka uruganda rw'inkingo n'imiti biturutse mu Budage.

Mu masaha y'igicamunsi ni bwo icyiciro cya mbere cy'imashini z'urwo ruganda zubakiye muri kontineri nini zizwi nka BionTainers cyageze Kibuga cy'Indege Mpuzamahanga cya Kigali.

Ni kontineri za rutura 6 zazanywe n'indege yo mu bwoko bwa Antonov iri mu nini zitwara imizigo ku Isi.

Minisitiri w'Ubuzima Dr. Sabin Nsanzimana avuga ko izi ari inzozi zigiye kuba impamo.

Ati “Tuzanye ibisubizo aho ikibazo kiri.Ubu,Afurika ifata 89% by'inkingo zakozwe…Rero tugomba kugira inkingo nyinshi n'imiti bikorewe hano.”

Minisitiri Nsanzimana ashimangira kandi ko n'inzego z'uburezi n'ubushakashatsi zizungukira kuri uru ruganda.

U Rwanda rubimburiye ibihugu birimo Senegal na Afurika y'Epfo na byo bifitanye amasezerano na BionTech yo kubaka inganda z'inkingo n'imiti muri ibyo bihugu.

Umuyobozi Mukuru ushinzwe ibikorwa muri BionTech Dr. Sierk Poetting avuga ko u Rwanda ari rwo rwatoranyijwe ngo rube icyitegererezo muri uyu mushinga mugari ugamije gufasha Afurika kwikorera inkingo n'imiti.

Uru ruganda ruzakorera mu cyanya cy'inganda i Masoro mu Mujyi wa Kigali, rukaba ruzaba rufite ubushobozi bwo gukora doze z'inkingo zisaga miliyoni 50 ku mwaka.

Ruzakora inkingo zirimo iza COVID19, iza kanseri n'iza malariya ndetse na SIDA zigeze ku musozo w'igerageza.

Biteganyijwe ko icyiciro cy'ibindi bikoresho bigize uruganda birimo izindi BionTainers 6 bizagera mu Rwanda mu mezi make ari imbere ku buryo inkingo za mbere zizakorwa n'uru ruganda zizajya ku isoko mbere y'uko uyu mwaka urangira.

Ni umushinga munini wa miliyari zibarirwa mu 100 z'amafaranga y'u Rwanda.

Kugeza ubu Abanyarwanda 9 ni bo bazakora muri uru ruganda ariko muri 2024 bakazagera ku 100 nyuma yo kwigira ku nzobere zo muri BionTech.

Source : https://umuryango.rw/amakuru/mu-rwanda/ubukungu/article/minisante-yahishuye-inyungu-zizava-mu-kugira-uruganda-rukora-inkingo

Abategetsi b'Amerika, Ubwongereza na Australia batangaje andi makuru mashya kuri gahunda yabo yo gukora amato (ubwato) y'intambara agendera munsi y'inyanja yo ku rundi rwego rugezweho akoreshwa n'ingufu za nikleyeri.

Bijyanye n'iyi gahunda y'amasezerano azwi nka AUKUS (impine ya Australia, UK na US), Australia izabona mbere na mbere amato nibura atatu agendera munsi y'inyanja akoreshwa n'ingufu za nikleyeri, iyahawe n'Amerika.

Ibi bihugu by'inshuti bizanakorana mu kubaka amato mashya akoresha ikoranabuhanga rigezweho, ririmo nk'ibikoresho bitanga ingufu (ama 'reactors') bikorwa n'uruganda rukora imodoka rwa Rolls-Royce rwo mu Bwongereza.

Aya masezerano agamije guhangana n'ijambo Ubushinwa bufite mu karere k'inyanja y'Ubuhinde n'inyanja ya Pasifika.

Ubwo yavugaga ari kumwe n'abategetsi bagenzi be mu mujyi wa San Diego muri leta ya California, Perezida w'Amerika Joe Biden yashimangiye ko ayo mato atazaba afite intwaro za kirimbuzi kandi ko atazabangamira ibyo Australia yiyemeje byo kuba igihugu kitarangwamo intwaro kirimbuzi.

Mu masezerano mashya yatangajwe ku mugaragaro ku wa mbere, abagize igisirikare cya Australia kirwanira mu mazi (Royal Australian Navy, RAN) bazashyirwa mu bigo bya gisirikare by'Amerika n'Ubwongereza by'amato y'intambara agendera munsi y'inyanja guhera muri uyu mwaka, kugira ngo bagire ubumenyi bwa ngombwa bwo gushobora gukoresha amato y'intambara agendera munsi y'inyanja.

Guhera mu mwaka wa 2027, Amerika n'Ubwongereza bizashyira umubare muto w'ayo mato akoreshwa n'ingufu za nikleyeri mu kigo cya Australia cy'ingabo zirwanira mu mazi (RAN) kiri i Perth, mu burengerazuba bwa Australia, mbere yuko Australia igura amato atatu nk'ayo muri Amerika yo mu cyiciro cya Virginia (Virginia-class submarines), aho hazaba ari mu myaka ibanza yo mu 2030. Australia izaba ifite n'amahitamo yo kuba yagura andi mato abiri nk'ayo.

Nyuma y'ibyo, gahunda ihari ni iyo gukora iforoma ndetse no kubaka amato mashya y'intambara agendera munsi y'inyanja akorewe igisirikare kirwanira mu mazi cy'Ubwongereza n'icya Australia, yitwa SSN-AUKUS.

Ubu bwato njya rugamba buzubakirwa mu Bwongereza no muri Australia hisunzwe iforoma (imbata) y'Ubwongereza, ariko bwubakwe hagendewe ku ikoranabuhanga ryo muri ibyo bihugu byose uko ari bitatu.

Aya mato y'inzibacyuho ndetse n'ayo mu gihe kizaza azatuma Australia igira amato y'intambara agendera munsi y'inyanja ashobora kugenda intera ndende cyane kandi yihuta cyane kurusha amato isanganywe, anafite ibisasu bya misile bishobora kurasa ku butaka no mu nyanja.

Perezida Biden yavuze ko ibyo bihugu byose uko ari bitatu byiyemeje gutuma ako karere gakomeza kugira ubwisanzure no kuba gafunguye. Yari akikijwe na Minisitiri w'intebe wa Australia Anthony Albanese na Minisitiri w'intebe w'Ubwongereza Rishi Sunak.

Biden yagize ati: “Mu gushyiraho ubu bufatanye bushya, turimo kongera kugaragaza ukuntu za demokarasi zishobora gutanga umutekano n'uburumbuke byacu bwite… atari kuri twebwe gusa ahubwo no ku isi yose”.

Minisitiri w'intebe wa Australia Albanese yavuze ko iyi gahunda y'amato y'intambara agendera munsi y'inyanja izahanga imirimo mishya ibarirwa mu bihumbi ndetse ko iyi gahunda ari yo “shoramari rya mbere rinini rikozwe mu bushobozi bwa gisirikare bwa Australia mu mateka yabwo yose”.

Minisitiri w'intebe w'Ubwongereza Sunak yavuze ko mu mezi 18 ashize kuva aya masezerano yamurikwa, ingorane ku ituze ry'isi nta kindi zakoze kitari ukwiyongera.

Yagize ati: “Igitero cy'Uburusiya kinyuranyije n'amategeko kuri Ukraine, ubwiyemezi bukomeje kwiyongera bw'Ubushinwa, imyitwarire ihungabanya umutekano ya Iran na Koreya ya Ruguru – ibi byose biteje inkeke yuko habaho isi irangwa n'ibyago, akaduruvayo no gucikamo ibice”.

Ubushinwa buvuga ko 'abangamiye amahoro n'ituze'

Mu cyumweru gishize, Mao Ning, umuvugizi wa minisiteri y'ububanyi n'amahanga y'Ubushinwa, yashimangiye aho Ubushinwa buhagaze, avuga ko aya masezerano ateje ibyago byuko ibihugu birushanwa mu kwigwizaho intwaro kandi ko “abangamiye amahoro n'ituze mu karere k'Aziya na Pasifika”.

Yagize ati: “Dushishikarije Leta Zunze Ubumwe [z'Amerika], Ubwongereza na Australia kureka imitekerereze yo mu ntambara y'ubutita ndetse n'umukino wo kunguka wenyine, bikubahiriza neza inshingano byemeye ku rwego mpuzamahanga no gukora ibiruseho mu gutanga umusanzu ku mahoro n'ituze by'akarere”.

Akomoza ku mpungenge z'Ubushinwa ku kuba uburengerazuba (Amerika n'Uburayi) burimo kongerera imbaraga ibikorwa bya gisirikare byabwo mu karere k'inyanja y'Ubuhinde n'inyanja ya Pasifika, Jake Sullivan, umujyanama w'Amerika ku mutekano w'igihugu yashimangiye ko Amerika nta bushake ifite bwo gushyiraho umuryango mushya umeze nk'uw'ubwirinzi bwa gisirikare isanzwe ihuriyemo n'Uburayi wa OTAN (NATO).

Nubwo abategetsi b'ibi bihugu uko ari bitatu bashimangiye ko aya masezerano agamije kongerera imbaraga ubufatanye ibi bihugu bifitanye no gutanga umusanzu ku ituze ry'isi, yateje ikibazo muri politiki.

Mu 2021, Australia yasheshe amasezerano afite agaciro ka za miliyari z'amadolari yari ifitanye n'Ubufaransa, y'umushinga wo kuyubakira amato y'intambara agendera munsi y'inyanja, ahubwo ijya muri aya masezerano ihuriyemo n'Amerika n'Ubwongereza – bituma haba umwuka mubi mu mubano wayo n'Ubufaransa.

Ubushinwa ni bwo bukorana ubucuruzi bwinshi na Australia, none hari kwibazwa niba Australia ishobora kongerera imbaraga umubano wayo wa gisirikare n'Amerika, mu gihe inateza imbere umubano wayo ushingiye ku bucuruzi ifitanye n'Ubushinwa.

Mu gihe cy'imyaka 30 iri imbere, leta ya Australia ivuga ko amasezerano ya AUKUS azayitwara miliyari 368 z'amadolari ya Australia.

BBC

Source : https://umuryango.rw/amakuru/mu-mahanga/umutekano/article/us-n-ibindi-bihugu-bikomeye-byemeye-gukorana-umushinga-w-amato-y-intambara-ya

Ni ubutumwa Ayoo Rash yanyujije ku mbugankoranyambagaza atangariza abakunzi be ko we n'umufasha we bibarutse imfura kuri uyu wa 13 Werurwe 2023 aho yagize Yagize ati 'Urakaza neza mwami!'

Ayoo Rash n'umugore we bise imfura yabo Abriel Rash Leyenda.

Ayoo Rash na Shiphrah bibarutse imfura yabo nyuma y'uko bakoze ubukwe ku wa 10 Ugushyingo 2022. Aba bombi basezeraniye imbere y'amategeko ku biro by'Umurenge wa Kimihurura.

Ayoo Rash amaze gukora indirimbo nyinshi zakunzwe zirimo 'Away' ya Ariel Ways na Juno Kizigenza, 'La Vida Loca' ya Ariel Wayz, 'Please Me' ya Juno Kizigenza, ndetse n'izindi nyinshi.

Source : https://umuryango.rw/imyidagaduro/article/producer-ayoo-rash-n-umugore-we-bari-mu-byishimo-byo-kwibaruka-imfura

Ikirunga cya Nyamuragira giherereye muri Kivu ya Ruguru, muri Repubulika ya Dekokarasi ya Congo ku mugoroba wo kuri wa mbere tariki ya 13 Werurwe 2023, cyerekanye ibimenyetso byo kuruka.

Ikigo Gishinzwe kugenzura ibirunga giherereye i Goma, kigenzura ibijyanye n'iruka ry'ibirunga, cyatangaje saa kumi n'ebyiri zo kuri uyu wa mbere, ku gasongero ka Nyamuragira hagaragaye ibimenyetso byo kuruka kwa cyo.

Iki kigo gitangaza ko' Ibipimo bihari by'iruka bivuga haba hari ibikoma byoroshye biri kuva ku ndiba kugera hejuru y'ikirunga cya Nyamuragira.'

Impuguke zo muri icyo Kigo zivuga ko ibikoma byacyo mu gihe cyaruka byashokera muri Pariki y'Igihugu ya Virunga.

OVG yasabye abatuye Goma kuba maso , bakihangana kandi bagakomeza imirimo nkuko bisanzwe.

Yasabye kandi ko ibikorwa byo koza imboga no gukoresha amazi ava mu isoko bigomba kwitonderwa.

Abakora ingendo zo mu kirere basabwe gukurikiza ibyerekezo birinda kunyura hajuru ya Pariki y'Igihugu ya Virunga.

Guverineri wa Gisirikare w'Intara ya Kivu ya Ruguru Lt Gen Contsant Ndima Kongba, nawe yasabye abaturage gutuza bagategereza ibitangazwa.

Muri Gicurasi 2021, nabwo byari byatangajwe ko iki kirunga cyarutse ariko haza amakuru avuguruza avuga ko habayeho kwikanga.

Source : https://umuryango.rw/amakuru/mu-mahanga/umutekano/article/ikirunga-cya-nyamuragira-cyatanze-ibimenyetso-by-uko-gishobora-kuruka

“Kwambarira ubucocero aho wambariye inkindi”, ni imvugo ikoreshwa ku muntu bashaka kugaragaza ko ashobora gusebera aho yakoreye ibikorwa by’indashyikirwa, ibi ni byo bishobora kuba ku mutoza Seninga Innocent wa Sunrise FC aho ashobora kwisanga yamanuye iyi kipe mu cyiciro cya kabiri ari we wari wayizamuye.

Muri Sunrise FC, ishyamba si ryeru na gato, haratutumba umuriro isaha n’isaha wakwaka, baravuga ngo ntawuhisha inzu ngo ahishe umwotsi, bagerageje kuwupfukirana ariko wishakira inzira ugaragara.

Iyi kipe iheruka intsinzi muri shampiyona tariki ya 21 Ukuboza 2022 ubwo batsindaga AS Kigali 2-1. Imikino yirenze ari 8 itazi ikitwa intsinzi, yanganyije 2 itsindwa 6.

Amakuru ISIMBI yamenye ni uko umubano w’abakinnyi n’umutoza mukuru Seninga Innocent wajemo igihu ndetse abakinnyi bamwumva batarenze 3 cyangwa 4.

Uwahaye amakuru ISIMBI yagize ati “sinakubeshya kandi byigaragaza, ikibazo cyo kirahari, umutoza abakinnyi bameze neza mu myitozo si bo akinisha, icya mbere yashwanye n’abakinnyi bakuru mu ikipe urebye ubu nta muntu ukimuriho, yego ntawabura abe nk’ababiri cyangwa 3 ariko rwose urwambariro rwe rwarapfuye.”

Seninga Innocent yarahagaritswe biba iby’ubusa

Nyuma yo kumara imikino 3 yikurikiranya atsindwa (Gasogi United 3-0, APR FC 1-0 na Marines 2-1), tariki ya 14 Gashyantare 2023, Seninga Innocent n’umwungiriza we bahagaritswe iminsi 15.

Muri iyo minsi 15 Sunrise FC yanganyije na AS Kigali 2-2 itsindwa na Police FC imikino 2 muri shampiyona n’igikombe cy’Amahoro 2-1 buri mukino.

Iminsi 15 irangiye ubuyobozi bwa Sunrise FC bwafashe umwanzuro wo kumwongera indi minsi 15 ariko mu buryo butunguranye tariki ya 3 Werurwe yagaruwe mu kazi maze tariki 4 Werurwe atoza umukino wa Rwamagana City yahise ibatsinda 2-0, baje gutsinda Police FC 1-0 mu gikombe cy’Amahoro ariko barasezererwa kuko Police FC yari yarabatsinze 2-1 mu mukino ubanza.

Umukino uheruka wa shampiyona, Mukura VS yabatsindiye i Huye 2-1.

Nyuma y’uyu mukino Seninga Innocent yavuze ko ikibazo gishobora kuba gifitwe n’ubuyobozi n’abakinnyi.

Ati “dutangira imikino yo kwishyura twanganyije umukino umwe wa Bugesera FC, dutakaza imikino 3 yikurikiranya habaho guhagarikwa kwanjye, nagiye mfite inota rimwe n’abayisigaranye bagize inota rimwe, turacyibaza ikibazo gihari, ntabwo kiri mu batoza niba abakinnyi basigarana n’umutoza wundi ntatsinde n’uwagiye ntatsinde ikibazo gishobora kuba kiri mu buyobozi cyangwa mu bakinnyi hagati ya bo.”

Ntabwo Sunrise FC ifite ubushobozi bwo kwirukana Seninga Innocent

Uyu mutoza avuga ko ubuyobozi bw’iyi kipe budafite ubushobozi bwo kumwirukana kuko ngo afite abantu bakomeye bamushyigikiye ndetse banamuzanye.

Uwahaye amakuru ISIMBI yagize ati “none se niba na we ubwe avuga ko ntawabasha kumwirukana, ngo afite abantu bakomeye bamushyigikiye.”

Kugarurwa mu kazi byateje uruntu runtu muri Sunrise FC

Bivugwa ko ubuyobozi bwa Sunrise FC burangajwe imbere na Hadari Hillary usanzwe ari visi perezida ari we wafashe iya mbere mu kongerera ibihano Seninga.

Amakuru avuga ko yaje guhamagarwa na Meya w’Akarere ka Nyagatare ndetse na Guverineri w’Intara y’Iburasirazuba akabwirwa ko agomba kugarura Seninga mu kazi, undi arabyanga avuga ko nta we agarura, niba babishaka bamwigarurira, yaje kugarurwa mu kazi mu buryo bumeze nk’agahato.

Ati “urumva Hodari ni umugabo uhagarara ku ijambo rye, yanze kumugarura bisa n’aho agarutse ku gahato, na we twahise tumubura, kuva icyo gihe ntabwo turongera kumuca iryera, Seninga yaje na we agenda.”

Nta gikozwe mu maguru mashya, Sunrise FC ishobora gusubira mu cyiciro cya kabiri kuko mu gihe habura imikino 7 gusa iri ku mwanya wa 12 n’amanota 24, irarusha Rwamagana City inota rimwe, ikarusha Rutsiro FC 3, Marines ifite 16 n’aho Espoir FC ya nyuma ikagira 14.

Umukino uheruka Sunrise FC yatsinzwe na Mukura VS 2-1

Umubano wa Seninga Innocent n’abakinnyi wajemo igihu

Seninga Innocent ashobora gusubiza Sunrise FC mu cyiciro cya kabiri

Source : http://isimbi.rw/siporo/ishyamba-si-ryeru-muri-sunrise-seninga-uvuga-ko-ntawabasha-kumwirukana-ashobora-kwambarira-ubucocero-aho-yambariye-inkindi