Category: Uncategorized

Nyuma y’uko ashyize hanze EP y'indirimbo ikomeje kunyura abatari bacye yise 'The One' akaba yanatangiye no gushyira hanze amashusho yayo, Lilian Mbabazi nk'umwe mu bahanzikazi bafite izina rikomeye mu muziki wo mu Karere k'Ibiyagabigari, yatangaje byinshi ku muziki we n’ubuzima busanzwe.

Mu kiganiro kihariye yagiranye n'inyaRwanda.com kuri uyu wa 14 Werurwe 2023, yatangiye asobanura indirimbo 'The One' yanitiriye EP ye aheruka gusohora mu buryo bw’amashusho.

Ati:'Ni indirimbo y'urukundo yerekeye ku muntu witaho muhuje roho mbega wa muntu wa mbere utagereranya n’undi, ikaba ikubiyemo ubutumwa bugenewe umuntu wese uri mu rukundo cyangwa wifuza kuba mu rukundo.'

Agaruka ku cyo yiteze kuri izi ndirimbo aheruka gushyira hanze ati: 'Icyo ntekereza kuri iyi EP ni uko twakoze ibishoboka byose kandi twizeye ko izagera kure mu bihugu bitandukanye abantu bakayumva kandi bakanayikunda.'

Mbere gato ya EP, Lilian Mbabazi hari indirimbo yise 'This Love' yaherukaga gushyira hanze nayo yakomojeho agira ati:'Nayikoze ku bufatanye na Ambasade ya Amerika muri Uganda byari mu cyumweru cy'uburinganire no kurwanya ihohotera bansabye rero gukora indirimbo ijyanye niyo nsanganyamatsiko.'

Lilian yatangaje ko nyuma ya EP ateganya gushyira hanze Album. Aragira ati: 'Turateganya gushyira hanze Album no gukora ibitaramo muri Uganda byanashoboka no mu Rwanda.'

Nk’umwe mu nararibonye mu muziki, yavuze uko abona aho ibintu bigeze mu muziki, ati:'Buri kintu cyose kirahinduka, n'umuziki ni uko ndetse n’abawumva uburyo ukozemo kandi byose bijyana n'udushya abahanzi bagenda bazana mu muziki, ikirenze kuri ibyo Afurika kuri ubu namaze gushinga ibirindiro mu bice bitandukanye by'isi kikaba ari ikintu cyiza cyane.'

Avuga kandi ko atemeranya n'abavuga ko umubare w'abahanzikazi ari mucye ahubwo we avuga ko harimo ikibazo cy’uko badahabwa umwanya mu ruhando rw'umuziki nka basaza babo.

Mu magambo ye ati:'Sintekereza ko abahanzikazi ari bacye, ahubwo uko mbibona ntabwo bahabwa umwanya nk’uko abahanzi b'igitsinagabo biba bimeze. Rero bafite umuziki mwiza mu gihe baba bahawe umwanya bakora ibitangaza kandi ndabisengera nizera ko umunsi umwe bizaba.'

Agira kandi inama abakobwa bifuza kwinjira mu muziki agira ati: 'Menya icyo ushaka gukora, menya intego yawe kandi umenye uwo ushaka kuba we nk'umuhanzi usobanukirwe neza ibyo.'

Yongeraho ati: 'Kuko bitabaye ibyo ntabwo uzamenya icyo ushaka gukora n’uko ushaka kugikora, umenye kandi icyo ushaka guha isi unagire abantu hafi ya we b'umumaro kuko ukubwira wese ko agiye kugufasha si ko ari cyo aba agamije kandi ugire kwihangana no gukora cyane.'

Yagarutse kandi ku ndirimbo yavuga ko ari iz'ibihe byose kuri we birumvikana nk'umuntu uzi umuziki amaze imyaka irenga 25 akora yarebye iz’abahanga nyabo mu buryo bwawo.

Ati: 'Indirimbo z'ibihe byose kuri njye nubwo bigoye kuzihitamo ariko harimo 'I Will Always Love You' ya Whitney Houston, 'Body and Soul' ya Anita Baker, 'Can't Take My Eyes Off Of You' ya Lauryn Hill, 'African Queen' ya 2 Face n’indi ndirimbo yose ya Blu 3.'

Mu ndirimbo ze akunda cyane iyitwa 'Simple Girl' amaze imyaka igera kuri 7 ashyize hanze. 

Yagarutse kandi ku bintu yibuka kuri Mowzey Radio bafitanye abana 2 witabye Imana mu buryo bwashenguye benshi mu mwaka wa 2018.

Uyu muhanzikazi ati:' Hari byinshi nibuka kuri Mowzey ariko icyo dukumbura ni ukuba ahari akabona abana bakura kimwe n'umuziki yagizemo uruhare rukomeye kuba adahari ngo abone urwego ugezeho.'

Ku kuba yaba afite icyizere ko abana babo bazabakorera mu ngata mu muziki, yagize ati:'Mvugishije ukuri, sinahita mbimenya. Gusa nyine bakunda umuziki nk'abandi bantu bakunda kubyina dufite gutegereza tukareba, gusa niteguye kubafasha mu mahitamo y'ubuzima yose bagira.'

Agaruka kandi ku bahanzi nyarwanda bafite indirimbo ziri kumunyura ati:'Saa moya ya Bruce Melodie, Malaika ya Yvan Buravan, Kashe ya Element,..” Yavuze kandi ko anyurwa n’indirimbo za Bwiza na Kitoko.

Avuga ko ahora yifuza gukorera igitaramo mu Rwanda ati: 'Mu kuri, mpora nifuza kugira igitaramo mu Rwanda, reka turebe uko ibihe bibigena ariko igihe kimwe bizakunda kuko ni mu rugo.'

Agenera ubutumwa abari n'abategarugori ati:'Mu komeze kujya mbere bamikazi, mukomeze gukora ibyiza byose bishoboka, mureme udushya mugumane imbaraga kandi mukomeze kugerageza, isi ni iyacu.'

Ashimira abanyarwanda n'abandi muri rusange akababwira ko abakunda cyane kandi “ndabashimira kunkunda, gukunda indirimbo zanjye, kumfasha, murakoze cyane kandi Imana ibandindire. Ndashaka kandi gushimira buri umwe wamfashije.'

Asoza agira ati: 'Mfite EP nshya iri hanze, mugende muyirebe, muyumve, muyisangize n'abandi, iri ku mbuga zose zicururizwaho umuziki, igizwe ni indirimbo 7 twanamaze gushyira hanze amashusho y'indirimbo ya mbere yitwa 'The One' kandi tuzakomeza no gushyira andi hanze.'

Ubuzima n'ibigwi bya Lilian Mbabazi mu buzanzwe

Lilian ni umuhanzi w'umunyarwanda n'umunya-Uganda wavukiye mu gihugu cya Uganda ku babyeyi b'abanyarwanda. Akora umuziki wibanda ku njyana ya R&B na Soul. Yahoze ari umwe mu bagize itsinda ry'umuziki ryabiciye biracika muri Blu 3.

Mu mwaka wa 2014 ari mu bahanzi baririmbye muri Coke Studio Africa izwiho guhuza abahanzi bakomeye mu bihugu byabo.

Lilian yatangiye umuziki afite imyaka 13, ariko aza kuwinjiramo by'umwuga mu mwaka wa 2003 nyuma y'irushanwa rya Coca Cola Pop Star ryabaye imbarutso yo gutangira kwa Blu 3.

Iri tsinda ryaramamaye ryegukana ibihembo bitandukanye birimo icy'amashusho meza y'umwaka wa 2005 muri Kisima Music Awards no muri Pearl Africa Music Awards.

Bagiye banahatana no mu bindi kandi bikomeye nka Kora Awards, Tanzania Music Awards banegukanyemo muri 'Best East African Album' na Channel O Music Video Awards yo mu wa 2006 begukanye na 'Best East African Video'.

Banahatanye muri MTV Awards mu wa 2009 kimwe na 2010 muri Tanzania Music Awards.

Muri 2010 ni bwo yatangiye gukora umuziki wenyine ashyira hanze indirimbo yise 'Vitamin' yakoranye na Goodlyfe Crew kimwe n’izindi zirimo 'Kawa' na 'Danger'.

Lilian Mbabazi kandi yakoranye n'abandi bahanzi bakomeye barimo AY, P-Unit n'umunyarwanda Kitoko. Mu mwaka wa 2016 yegukanye igihembo cya mbere HiPipo Music Awards.

Yaje gutangira gukorera 91.3 Capital FM imwe mu ma radiyo akomeye muri Uganda, ariko ntiyayitinzeho kuko yahise arecyeraho, akomeza gushyira imbaraga mu muziki we.

Yakundanye na Mowzey Radio babyaranye abana 2 ari bo Asante Manzi na Izuba. Nubwo Lilian yakomeje gufatanya kurera abana na Radio ataritaba Imana, yanamubaye hafi mu bihe bye bya nyuma ariko bari baratandukanye mu mwaka wa 2015.

KANDA HANO UREBE UNUMVE INDIRIMBO ZIRI KURI EP YA LILIAN MBABAZI UHEREYE KURI ‘THE ONE’

“>

Lilian Mbabazi yashyize hanze amashusho y’indirimbo ya ‘The One’ iri kuri EP yayitiriyeAri mu bahanzikazi bamaze imyaka myinshi kandi bafite ibigwiKuri ubu yifashishwa mu bikorwa bitandukanye birimo n’amarushanwa y’umuziki Umuraperi Navio ni inshuti ya Lilian Mbabazi banakoranye indirimbo 

Itsinda rya Blu 3 kuva mu myaka ya 2003 baracyahabwa icyubahiro kugera n’ubu

Blu 3 yakoranye indirimbo nyinshi na Goodlyfe ya Weasel na RadioLilian Mbabazi yavuze ko yakifuje kuba Mowzey Radio ahari akareba uko abana babo bakura n’uburyo umuziki ukomeje gutera imbereLilian Mbabazi n’abana yabyaranye na Mowzey Radio Lilian yavuze ko yifuza gukorera umunsi umwe igitaramo mu Rwanda dore ko nubwo yavukiye muri Uganda arko avuka ku babyeyi b’abanyarwanda

Ni ubutumwa bwa Noel Kambanda, umwe mu bazwi ku rubuga rwa Twitter ukurikirwa n'abantu barenga ibihumbi 45, aho akunze kugaragaza no gutanga ibitekerezo ku rugendo rw'u Rwanda mbere n'ubu.

Ambasaderi w'u Rwanda mu Bwongereza, Busingye Johnston ukurikirwa n'abarenga ibihumbi 153 ku rubuga rwa Twitter, we yanditse avuga ati 'Uzaze urebe u Rwanda rw'Abanyarwanda ni ukuri kw'Imana weeee… ruragendwa.'

Yavuze ko uburyo itorero 'Urukerereza' ryasusurukije ibirori byabereye i Westminster Abbey mu Mujyi wa London mu Bwongereza imbere y'abarimo King Charles III, byari 'bishimishije kandi biteye amarangamutima ubwo twabirega'.

Ibi ni bimwe mu bitekerezo bikomeje kwisukiranya ku mashusho agaragaza Itorero Urukerereza ubwo ryasusurutsaga ibirori byo kwizihiza Umunsi wa Commonwealth i Westminster Abbey mu Bwongereza, kuri uyu wa Mbere tariki 13 Werurwe 2023.

Ni ibirori byitabiriwe n'abagize umuryango w’Ibwami n'abandi. Hari kandi Minisitiri w’Ububanyi n’Amahanga w'u Rwanda, Dr Vincent Biruta aho yagejeje ijambo ku bitabiriye kwizihiza umunsi wa Commonwealth.

Mu ijambo rye, Umwami w'u Bwongereza, Charles III yagarutse ku buzima bw'umubyeyi we Queen Elizabeth uherutse gutanga, amushimira uruhare rwe mu guteza imbere umuryango wa Commonwealth n'ubuzima bwitangira abandi yabayeho.

King Charles III yavuze ko umubyeyi we ari we rufatiro rw'ubuzima bwe, urugero rw'ibyo akwiye gukora, kandi yamenyanye na benshi bigizwemo uruhare nawe.

Ibi birori byabaye hizihizwa isakuru y'imyaka 10 ishize. King Charles III yavuze ko abanyamuryango bakwiye guhora bazirikana indangagaciro z'uyu muryango zirimo amahoro, ubutabera, kubabarira, kubaha, ubumwe no kwita kubidukikije.

Nyuma y'iri jambo, King Charles III yakurikiranye imbyino n'indirimbo by'itorero Urukerereza:

Uyu muhango watambutse imbona nkubone kuri Televiziyo BBC y'Abongereza, ibinyamakuru byo muri iki gihugu biwusamira hejuru birandika harahava!

Iri torero ryahagurutse i Kigali, ku wa 10 Werurwe 2023, mu gitondo cyo kuri uyu wa Kabiri tariki 14 Werurwe 2023 nibwo bagarutse i Kigali.

Mu kiganiro cyihariye na InyaRwanda, Umutoza w'Itorero ry'Igihugu 'Urukerereza', Massamba Intore, yavuze ko ishema bahesheje u Rwanda mu bwami bw'u Bwongereza baricyesha iminsi 10 bamaze bitegura uyu muhango ukomeye ku Isi.

Ati “Ni ishema rikomeye cyane. Ni ibyiza twerekanye. Abo twajyanye bose bagarutse, abantu benshi bacyekaga y’uko bashobora kubura nta n’umwe bose bagarutse. Ni ishema rikomeye.'

Uyu muhanzi wagwije ibigwi mu Rwanda, yavuze ko bamaze iminsi itandatu bitoreza aho basanzwe bakorera imyitozo ku Kimisagara, hanyuma indi iminsi ine bayimaze mu mwiherero, aho bari bacumbitse kuri Hoteli iherereye i Kabuga.

Yavuze ko bageze mu Bwongereza bakoze imyitozo rusange ya nyuma basubiramo ibyo bitoje ubwo bari mu Rwanda, birimo imbyino ndetse n'indirimbo.

Massamba yavuze ko bari babanje kohereza ibisobanuro (Bio) kugira ngo buri wese wari muri uyu muhango abashe gusobanukirwa neza imbyino n'indirimbo bateye.

Nk'umutoza, avuga ko kubona abasore n'inkumi yatoje bari gususurutsa abarimo Umwami Charles III ari 'igitego gikomeye' yatsinze kandi 'ndishimye cyane'.

Amateka yongeye kwandikwa mu muryango w'Intore Sentore:

Massamba yabwiye InyaRwanda, ko Se Sentore mu 1958 yagiye ari umutoza mu Itorero ry'Igihugu ajyanye n'Umwami Rudahigwa mu imurikabikorwa Bruxelles mu Bubiligi 'atahana intsinzi'.

Akomeza ati 'Mu 2023 njyanye n'Itorero ry'Igihugu ndi umutoza kandi dutahana intsinzi, dutahana igitego. Urabyumva nawe amateka, urabyumva nawe ukuntu nishimye. Ndi mu byishimo udashobora kumva.'

Uyu muririmbyi witegura gushyira hanze album ye nshya, yashimye ababyinnyi bose kuko bakoze ibyo yari yabatoje. Kandi bubahirije igihe cy'iminota 3 n'amasegonda 20' bari bahawe muri ibi birori.

Yavuze ko abari muri iyi ngoro yabereyemo ibi birori bishimiye uburyo Urukerereza rwitwayemo, banyurwa n'umuco w'u Rwanda.

Massamba avuga ko Umwami Charles III atigeze akura ijisho ku Urukerereza. Ati 'Ndetse, umwami kuva twatangira …. yarebye twinjira arinda anarangiza akitureba. Barizihirwa, bakoma amashyi menshi cyane. Barishimye cyane! Abantu bose bari bafite ibinezaneza….'

Massamba avuga ko bashyize u Rwanda kuyindi ntera, kandi ibendera ry'u Rwanda rirazamurwa. Ati 'Icyubahiro ni cyose ku Isi yose.' 

Yavuze ko ashima cyane ‘Guverinoma y’u Rwanda yaduherekeje muri uru rugendo kugira ngo tugere kuri ibi byose’.

Commonwealth, ni ishyirahamwe cyangwa se umuryango w’ibihugu 56 byigenga bituwe n’abaturage miliyari 2.4.

Ibi bihugu bigize uyu muryango birimo: Australia, Antigua and Barbuda, the Bahamas, Belize, Canada, Grenada, Jamaica, Papua New Guinea, St Christopher and Nevis, St Lucia, St Vincent and the Grenadines, New Zealand, Solomon Islands, Tuvalu…

 

 

 

 

 

Urukerereza rwataramiye mu Bwongereza, mu kwizihiza isabukuru ya Commonwealth 

Umwami Charles III asuhuza umwe mu babyinnyi b'Itorero Urukerereza nyuma y'uko bamunyuze

Mu ijambo rye, King Charles III yashimye umubyeyi we Queen Elizabeth ku bwo guteza imbere umuryango wa Commonwealth

Massamba yavuze ko yabanje kwibutsa ababyinnyi guharanira guhesha ishema u Rwanda no gukora neza ibyo bize ubwo bari mu myiteguro

Minisitiri Dr Vincent Biruta yagejeje ijambo kubitabiriye birori byo kwizihiza umunsi wa Commonwealth i Westminster Abbey mu Bwongereza

Kwizera Peace Ndaruhutse wabaye igisonga cya Mbere cya Miss Rwanda 2016 akegukana n'ikamba rya Miss Naiades, ni umwe mu bari batwaye ibendera ry'u Rwanda mu Bwongereza 

Ababyinnyi b'Itorero Urukerereza bamaze iminsi 10 bitoza mbere y'uko bataramira i London

REBA GUHERA KU MUNOTA WA 48′ UKO ITORERO URUKEREREZA RYASUSURUKIJE IBI BIRORI

“>

Ku nshuro ya mbere, u Rwanda rugiye kwakira inama ya FIFA yiga ku iterambere ry’umupira w’amaguru ndetse ikanareberahamwe ibimaze kugerwaho mu myuka itambutse, dore ko abayobozi bose baba bayitabiriye.

Tariki 23 Kamena 2022, ni bwo Akanama Nyobozi k’Ishyirahamwe ry’umupira w’amaguru ku Isi, FIFA, kemeje ko u Rwanda ari rwo ruzakira inama ya 73 ya FIFA izanaberamo amatora y’umuyobozi mushya w’ishyirahamwe ry’umupira w’amaguru ku Isi.  Yabaye inkuru idasanzwe ku Rwanda dore ko atari igihugu kibonetse cyose cyagirirwa icyizere cyo kwakira iyi nama.

Inama yageze!

Iyi nama izabera muri BK Arena kuri uyu wa Kane tariki 16 Werurwe. Abayobozi bose b’inzego z’umupira w’amaguru ku Isi baba bitabiriye iyi nama, haba ku rwego rw’Afurika, Uburayi, Amereka y’Epfo na Oseyaniya, n’ahandi.

Minisitiri wa Siporo mu Rwanda, Aurore Mimosa, aganira na Televiziyo Rwanda, mu makuru yo kuri uyu wa Mbere, yagarutse kuri iyi nama ndetse n’uko u Rwanda rwayakiriye. 

Yagize ati: “Iyi nama ni inama twishimiye kuko bigaragara ko turi kugera ku ntego yo kuba igihugu gifite ubukerarugendo bushingiye kuri siporo. Ikindi umuntu yavuga ni uko atari inama y’umunsi umwe, kuko ni inama izahera kuri 13 Werurwe kugera tariki 16.”

Minisitiri kandi yatangaje ko ari inama irimo ibikorwa byinshi “harimo n’izindi nama zizahuza abanyamuryango ba FIFA, ariko noneho hakaba n’inama ikomeye izaba tariki 16 ihuje abanyamuryango ba FIFA, ikaba ariyo nama bwa mbere izaba ibereye muri Afurika irimo n’amatora y'umuyobozi wa FIFA.”

Bamwe mu bayobozi bakomeye mu mupira w’amaguru ku Isi bamaze kugera mu Rwanda barimo; Aleksander Ceferin uyobora ishyirahamwe ry’umupira w’amaguru ku mugabane w’Iburayi, Gianni Infantino uyobora FIFA, Patrice Motsepe uyobora ishyirahamwe ry’umupira w’amaguru muri Afurika, na Arsene Wenger wahose atoza ikipe ya Arsenal ubu akaba ari umukozi wa FIFA.

U Rwanda ruzungukira iki muri iyi nama?

“Ku buryo bw’imibare, mu 2021, ubukerarugendo bushingiye ku mikino, bwagize uruhare cyane mu kuzahura ubukungu bushingiye ku nama, imikino ikaba yarinjije asaga gato miliyoni $6” - Minisitiri w’intebe Dr Ngirente Edouard ageza ku Nteko Ishinga Amategeko, Imitwe yombi, ikiganiro ku bikorwa bya Guverinoma byo mu rwego rw’ubucuruzi tariki 2 Ukuboza 2022.

Muri rusange u Rwanda rwihaye kuba igicumbi cy’imikino itandukanye muri Afurika ndetse no ku rwego rw’Isi, ari byo bituma ubukerarugendo bushingiye ku mikino bwaratangiye kwagura amafaranga igihigu cyinjiza kuko twabibonye haruguru.

Iyi nama igiye kubera mu Rwanda ni umushinga utari uwa vuba aha bigendanye n’ibikorwa bimaze kubakwa kugira ngo iyi nama ibashe kubera ku butaka bw’u Rwanda, ibintu utapfa kubona by’umwihariko mu karere u Rwanda ruherereyemo.

'Icyo twavuga ni inama yateguwe na FIFA ubwayo n’abanyamuryango ba FIFA, twe nk’abanyarwanda tuzakira inama tuzabaha aho bakorera” – Minisitiri wa siporo Aurore Mimosa aracyakomeza.

“Kwakira iyi nama bisobanuye ibintu byinshi, harimo kuba u Rwanda rwaragiriwe icyizere cyo kwakira inama ingana gutyo, inama izaba irimo abantu barenze 1,700, nk’igihugu gifite umutekano rero niyo mpamvu inama nk’iyi ngiyi ibera mu Rwanda.”

Mu 2019, ubucuruzi bwa serivisi n'amahanga bwarengaga gato Miliyari imwe y'amadolari. Mu 2020 bwasubiye inyuma ku kigero cya 49% bugera kuri miliyoni $521.4. 

Mu 2021, ubucuruzi bwa serivisi n'amahanga bwarazahutse buzamuka ku kigero cya 11%, bugera kuri miliyoni $579. Iri zahuka ryatewe ahanini n'ingamba Guverinoma yafashe zirimo guteza imbere ubukerarugendo no kwakira inama n'imikino mpuzamahanga (MICE). 

Umuturage wo hasi ahuriye he n’iyi nama ya FIFA?

Ubwo ikiganiro Minisitiri Mimosa yagiranaga na Televiziyo Rwanda, yashimangiye ko buri munyarwanda wese iyi nama imureba, ndetse yemeza ko bagomba no kwakira abashyitsi neza kuko basanzwe babigenza.   

“Turasaba abanyarwanda gukomeza umuco wo kugira isuku, no kwakira neza abashyitsi, kugira ngo bazatahe bishimye. Ibintu byose bizakorwa, u Rwanda ruzabyungukiramo cyane cyane amahoteri;

Kuko abantu bazitabira inama bagomba gukenera aho barara, imodoka zo kugendamo, amafunguro, bivuze ko buri munyarwanda wese iyi nama izamugirira akamaro yewe kugera kuri wa muturage uri mu cyaro uhinga kuko nibakenera icyo kurya ari bo bazabitanga”.

Ijoro ry’amatora y’umupira w’Isi mu Rwanda

Uyu mupira mukunda, mwishimira, ubababaza, ubinjiriza amafaranga, ubatwarira amafaranga, umuyobozi wawo muri manda izava mu 2023 ikagera mu 2027, agiye gutorerwa mu Rwanda, aya akaba ari amateka atazibagirana mu rwa Gasabo.

Tariki 16 Ugushyingo 2022, ni bwo yari itariki ya nyuma yo gutanga ubusabe ku bayobozi bashaka kwiyamamariza kuyobora ishyirahamwe ry’umupira w’amaguru ku Isi FIFA. 

Iyi tariki yageze Gianni Infantino ari we watanze ubu busabe, bivuze ko azaba ari umukandida rukumbi muri aya matora, byitezwe ko azongera kuyobora iri shyirahamwe nk’uko na manda irangiye ari we wari Umuyobozi Mukuru.

Giovanni Vincenzo Gianni Infantinno yayoboye FIFA bwa mbere mu 2016, 2019 atorerwa manda ya kabiri, nta gihindutse muri iyi nama azahabwa manda ya gatatu 

Ni inshuro ya kane iyi nama igiye kubera muri Afurika, ariko ikaba inshuro ya mbere iyi nama izaba ibereye muri Afurika ariko igomba no kuberamo amatora y’umuyobozi w’ishyirahamwe ry’umupira w’amaguru ku Isi, FIFA. 

Byitezwe ko n’umuturage w’umuhinzi n’umworozi nawe azagirira inyungu muri iyi nama 

Umuntu wese witabiriye iyi nama ahabwa ibihumbi 250 by’amanyarwanda ku munsi kugera kuri Miliyoni imwe 

Sitade ya Kigali yamaze kuvugururwa, ikazaberaho n’umukino uzahurwa abagize ishyirahamwe ry’umupira w’amaguru mu Rwanda, ndetse n’abandi bashyitsi basigaye, uyu mukino uzaba kuwa Gatatu

Nyuma y'uko rusubitswe, urubanza rwa Titi Brown rwasubukuwe uyu munsi tariki 14 Werurwe 2023 aho umuburanyi agiye kuburana atari mu rukiko, ahubwo akaburana hifashishijwe ikoranabuhanga rya Skype.

Kugeza ubu urubanza rwagombaga gutangira saa mbiri neza ku masaha ya Kigali hano ku rukiko rwisumbuye rwa Nyarugenge, ariko habanje kuburanishwa izindi manza kuko ku rukuta rumanikwaho imanza hariho imanza zirenze 10.

Umunyamakuru wa Isibo TV, Peacemaker uherereye ku Rukiko muri aka kanya yabwiye inyaRwanda.com ko Ishimwe Thierry cyangwa se Titi Brown nawe yagombaga kuburana n'abo bari kumwe bahageze bavuye muri Gereza ya Mageragere, ariko iburana rya mbere ryarangiye abacamanza bagiye kuruhuka.

Umunyamategeko wa Titi Brown witwa Mbonyima Elias we arahari yahageze, ariko Ishimwe Thierry we ntahari araza kuburana kuri Skype.

Peacemaker yavuze ko ubu bategereje ko abacamanza baza hanyuma urubanza rugatangira, ari naho Titi Brown ari butangire kuburana muri salle y'iburanisha akaba ari Salle ya Gatatu.

Ishimwe Thierry ni umubyinnyi w'umwuga wamenyekanye nka Titi Brown. Urubanza rwe rwari gusomwa kuwa 22 Gashyantare 2023, aburana mu bujurire ku ifungwa ry'iminsi 30 y'agateganyo.

Uru rubanza rwaherukaga gusubikwa ku wa 8 Gashyantare 2023, bitewe n'uko umucamanza yari yaragiye kwiga.

Mu Ukuboza 2021 nibwo urukiko rw'Ibanze rwa Kicukiro rwategetse ko Tity Brown afungwa iminsi 30 y'agateganyo, ahita ajurira.

Uyu musore akurikiranyweho n'ubushinjacyaha icyaha cyo gusambanya umwana w'imyaka 17, bivugwa ko yakoze ku wa 14 Kanama 2021.

Umubyeyi w'uyu mwana bivugwa ko Titi Brown yaba yarateye inda, avuga ko yohereje umwana we gusura nyirarume mu biruhuko, atashye avuga ko yarwaye igifu.

Titi Brown agiye kuburanishwa adahari ahubwo binyuze ku ikoranabuhanga rya Skype

Umwana bagiye kumuvuza mu bitaro bya Kibagabaga nyuma isuzuma ryakozwe n'abaganga, ryagaragaje ko uyu mukobwa atwite.

Umwana abajijwe uwamuteye inda, yavuze ko yagiye gusura Titi Brown mu Karere ka Kicukiro, Umurenge wa Kigarama bikarangira amusambanyije.

Ku busabe bw'umwana, iyi nda yakuwemo hafatwa ibizamini nyuma yo kuyikuramo bihuzwa n'ibya Tity Brown, Ubushinjacyaha bukaba bwaragaragarije Urukiko ko hari raporo ya muganga igaragaza ko basanze ari uyu mubyinnyi wamuteye inda.

Ubushinjacyaha kandi bweretse Urukiko icyemezo cy'amavuko cyemeza ko uwo mwana w'umukobwa yavutse tariki 1 Mutarama 2004, bityo akaba yarasambanyijwe afite imyaka 17.

Mu iburana, Titi Brown yahakanye iki cyaha icyakora yemera ko uyu mukobwa bahuye n'ubwo atigeze yinjira mu nzu iwe.

Uyu mubyinnyi yabwiye Urukiko ko umukobwa yamubwiye ko aje kumureba ndetse anagera iwe, ariko ahamya ko atigeze yinjira mu nzu.

Uyu musore avuga ko atigeze atanga ibizamini by'amaraso nk'uko Ubushinjacyaha bubivuga.

Titi Brown ubwo aheruka mu rukiko

Muri Gicurasi 2024, abakinnyi bakanyujijeho muri ruhago baturutse ku migabane itandukanye bazaba bari mu Rwanda ahazabera Igikombe cy’Isi [Veteran Clubs World Championship-VCWC].

Ni igikombe kizakinwa n’amakipe 8 kizahuza abahoze bakina ruhago 420 bazaba bateraniye i Kigali.

Uko abakinnyi bazatoranywa ntabwo buri umwe azakinira ikipe y’igihugu cye, bazivanga ubundi abakapiteni batoranye abakinnyi batitaye ku bihugu bavukamo.

Ku wa Gatanu w’iki Cyumweru ni bwo hazaba umuhango wo kwerekana aba bakapiteni kumugaragaro bazaba bayoboye bagenzi ba bo.

Abakinnyi 10 bahoze bakanyuzaho muri ruhago ku wa Gatanu bazaba bari mu Rwanda gutoranya abakapiteni bazayobora amakipe.

Ahaboze bakanyuzaho muri ruhago 10 bazitabira umuhango wo gutoranya abakapiteni

Umunyakanadakazi, Charmaine Elizabeth Hooper w’imyaka 55 wakiniye amakipe atandukanye nka FK Donn, Lazio, Chicago Carbas, Atlanta Beat n’andi menshi azaba ahari.

Undi ni umugabo w’umunya-Misiri, Wael Kamel Gomaa El Hawty w’imyaka 47 yakiniye amakipe nka Ghazl El Mahalla na Al Ahly z’iwabo mu Misiri. Yakiniye ikipe y’igihugu ya Misiri kuva 2001 kugeza 2013.

Rutahizamu wakiniye ikipe y’igihugu ya Nigeria kuva 1996-2006 aho mu mikino 74 yayitsindiye ibitego 14, Jay Jay Okocha wakiniye amakipe arimo Fenerbache na Paris Saint Germain na we ari mu Rwanda.

Undi uzaba uhabaye ni Maicon Douglas Sisenando, wahoze ari myugariro wa Brazil wakiniye amakipe nka Monaco, Inter Milan, Manchester City…

Patrick M’Boma wahoze ari rutahizamu wa Cameroun wayikiniye imikino 57 akayitsindira ibitego 33, akinira amakipe arimo PSG, Cagliari, Parma n’andi na we azaba ari muri uyu muhango.

Khalilou Fadiga umunya-Senegal wakinaga nka rutahizamu mu makipe nka Gent, Auxerre, Club Brugge. Senegal yayikiniye imikino 37 ayitsindira ibitego 4.

Robert Emmanuel Pires wamamaye muri Arsenal, Aston Villa, Villareal, Marseille akaba yaratakiraga n’ikipe y’igihugu y’u Bufaransa kuva 1996-2004 mu mikino 79 yatsinzemo ibitego 14.

Anthony Baffoe, umunya-Ghana wakanyujijeho mu makipe nka Metz na Nice na we azaba ari mu Rwanda.

Undi munyabigwi witezwe muri uyu muhango ni umunya-Espagne wakinaga mu kibuga hagati muri Barcelona, Valencia ndetse na Lazio ari we Gaizka Mendieta.

Umunyabigwi wa 10 ni Geremi Njitap, umunya-Cameroun wahoze akinira amakipe akomeye nka Chelsea, Newscastle na Real Madrid.