Category: Uncategorized

Intare yitwaga Bob Junior yari izwi nk'umwami wa Pariki ya Serengeti muri Tanzania, yishwe n'intare zindi z'inkeba.

Ku mbuga za internet, kompanyi zitwara abagenzi berekeza muri iyo pariki y'igihugu hamwe n'abayisura, bahaye icyubahiro iyo ntare izwi cyane, yari izwi no ku izina rya Snyggve.

Iyo ntare, ivugwa ko yaberwaga n'amafoto, yatinywaga n'izindi ntare zo muri Serengeti, ndetse yari imaze imyaka irindwi izitegeka ifashijwe n'intare y'ingabo bivukana yitwa Tryggve.

Intare z'inkeba ntoya mu myaka kuri izo ebyiri, byemezwa ko ari zo zazishe.

The post <strong>Tanzania: Intare yari umwami wa Pariki ya Serengeti yishwe n'intare z'inkeba</strong> appeared first on FLASH RADIO&TV.

Source : https://flash.rw/2023/03/15/tanzania-intare-yari-umwami-wa-pariki-ya-serengeti-yishwe-nintare-zinkeba/?utm_source=rss&utm_medium=rss&utm_campaign=tanzania-intare-yari-umwami-wa-pariki-ya-serengeti-yishwe-nintare-zinkeba

Aba bombi baheruka gukora ibirori byo kwitegura kwakira umwana wa bo w'imfura bizwi nka “Baby Shower”.

Amakuru ISIMBI yamenye ni uko iyi mfura ya bo izavuka mu kwezi gutaha kwa Mata 2023, azaba ari umuhungu.

Mu ijoro ryo ku wa Gatanu tariki ya 26 Kanama 2022 nibwo Axel na Masera Nicole Nirira bafashe rutemikirere berekeza muri Amerika guturayo aho n'ubundi uyu mugore yari asanzwe atuye.

Berekejeyo nyuma y'uko tariki 11 Kamena 2022 bakoze ubukwe, habaye umuhango wo gusaba no gukwa ndetse no gusezerana imbere y'Imana.

Hari nyuma y'uko tariki ya 18 Werurwe 2021 basezeranye imbere y'amategeko mu muhango wabereye mu Ntara y'Amagepfo mu karere ka Huye mu murenge wa Maraba aho bemeye kubana akaramata bakazatandukanywa n'urupfu.

Masera yambitswe impeta ya fiançailles tariki ya 14 Werurwe 2021 mu muhango wabereye ku nkengero z'ikiyaga cya Kivu mu karere ka Rubavu.

Horaho Axel yamenyekanye mu kiganiro Salus Sports cyo kuri Radio Salus aho yaje kuva muri 2019 ajya kuri Radio 10 yavuye yerekeza kuri Fine FM yakoreraga kugeza agiye muri Amerika.

Source : https://umuryango.rw/imyidagaduro/article/umunyamakuru-horaho-axel-n-umugore-we-baritegura-kwibaruka-imfura

Indege y'intambara y'Uburusiya yagonganye na drone ya Amerika,bituma iyi ndege itagira umupilote ya Amerika igwa mu Nyanja yirabura (Mer Noire/Black Sea), nk'uko bitangazwa n'igisirikare cya Amerika.

Ibi byerekana ko intambara hagati y'Uburusiya na Leta Zunze Ubumwe za Amerika ishoboka,kubera intambara yo muri Ukraine igenda ifata indi ntera.

Amerika ivuga ko iyo drone yari ku kazi kayo ka buri munsi mu kirere mpuzamahanga ubwo indege ebyiri z'intambara z'Uburusiya zageragezaga kuyitangira.

Uburusiya buvuga ko iyi drone yahanutse nyuma yo 'kugerageza gukwepa n'ubuhanga bwinshi', bugahakana ko izi ndege ebyiri zitigeze zikoranaho.

Minisiteri y'ingabo y'Uburusiya ivuga kandi ko mu gihe iyi drone yo mu bwoko bwa MQ-9 Reaper yarimo kuguruka, ibyuma by'itumanaho bituma indege imenyekana aho igeze, bizwi nka transpondeurs/transponders, byari bizimije.

Indege zitagira abapilote zo mu bwoko bwa Reaper ni indege zo gucunga ikirere zifite uburebure bwa metero 20 kuva kw'ibaba kugera ku rindi.

Ibi byabaye nijoro ku wa kabiri,saa moya n'iminota itatu mu masaha y'Uburayi (06:03 GMT) bwo hagati, ni ukuvuga saa mbiri n'iminota itatu z'ijoro ku masaha ya Kigali, nk'uko igisirikare cya Amerika kibivuga.

Iri tangazo rigira riti: “Indege yacu ya MQ-9 yari mu bikorwa bya buri munsi mu kirere mpuzamahanga ubwo yatangirwaga ikagongwa n'indege y'Uburusiya, ibyatumye MQ-9 ihanuka ikaburirwa irengero'.

Incuro zitari nke mbere yo kugongana, indege z'intambara Su-27 zasutse igitoro kuri iyi drone 'nta bushishozi bukoreshejwe, mu konona ibidukikije kandi nta n'ubuhanga bugiyemo', niko iri tangazo rikomeza ribivuga.

Amerika yahise itumaho userukira Uburusiya i Washington, Anatoly Antonov, kugira yamagane iyi myitwarire.

Nyuma y'uwo mubonano, ibinyamakuru by'Uburusiya byasubiyemo Antonov avuga ko Moscow yafashe ibyabaye kuri iyi drone 'nk'agasuzuguro'.

Kuva Uburusiya bwigarurira akarere ka Crimée/Crimea mu 2014,umwuka mubi wagiye wiyongera hejuru y'Inyanja yirabura.

Kuva Uburusiya butangiye intambara muri Ukraine, Amerika n'Ubwongereza byongereye ibikorwa byo gucunga no kuneka,bikorerwa mu kirere mpuzamahanga.

Ikibazo nyamukuru gihari n'ukumenya niba ibyabaye nijoro ku wa kabiri Uburusiya bwarimo bugerageza kuyobya iyi drone ya Amerika n'ibikorwa byayo, cyangwa niba bwashatse kuyihanura ku bushake.

Nk'uko bivugwa na Amerika, hari 'urukurikirane rw'ibikorwa bibi bikorwa n'abapilote b'Uburusiya' mu kwiyenza ku ndege z'ibihugu by'uburengerazuba byishize hamwe muri ako karere.

Birakekwa ko ibi byakozwe na Kremlin kugira ngo irebe uko Amerika ibyifatamo.

BBC

Source : https://umuryango.rw/amakuru/mu-mahanga/umutekano/article/indege-y-intambara-y-uburusiya-yagonze-drone-ya-amerika-iyita-mu-mazi

Abantu 190 ni bo bamaze kwemezwa ko bapfuye muri Malawi inyuma y'aho umuhengeri witwa Freddy utereye mu majyepfo ya Afrika ku ncuro ya kabiri mu kwezi.

Amazi ateye ubwoba yisutse mu mago y'abaturage, asenya amazu menshi.

Umurwa mukuru w'ubucuruzi wa Malawi, Blantyre, wabaruye abapfuye bagera kuri 158, harimo 36 baguweho n'umusozi.

Leta yatangaje ibihe by'akaga mu ntara 10 ziri mu majyepfo zashegeshwe cyane n'uyu muhengeri.

Abashinzwe ibikorwa byo gutabara barengewe, bakaba barimo gukoresha ibitiyo mu kugerageza gushaka abagihumeka barengewe n'ibyondo.

Umuvugizi w'igipolisi Peter Kalaya yabwiye BBC ati: “Hari inzuzi zarenze ikombe, hari abantu batwawe n'amazi atemba, hari n'amazu yasenyutse.”

Ikigo cya leta gishinzwe gutabara abari mu kaga kivuga ko umubare w'abapfuye wavuye kuri 99 ugera ku 190 ku wa mbere, mu gihe abasaga 584 bakomeretse abandi 37 na bo bakaburirwa irengero.

Icyo kigo cyongeraho ko abarenga 20.000 bataye ibyabo.

Abana barenga 40 bageze ku bitaro bapfuye bageze ku bitaro.

Abategetsi bo ku bitaro bikuru bizwi cyane i Blantyre bavuze ko batagishoboye kwakira imirambo y'abapfuye bakomeje kwakira.

Bahamagariye imiryango y'ababuze ababo kuza kubafata kugira babashyingure mu gihe ibyo bitaro bitakigira irimbi ryo gushyiramo abapfuye.

Byitezwe ko umubare w'abapfuye uzakomeza kwiyongera mu gihe ibice bimwe na bimwe ntawe ushobora kubigeramo kuko biri kugwamo imvura idahagarara n'imiyaga myinshi.

Freddy ni wo muhengeri wa mbere ufite ingufu nyinshi kandi ushobora kumara igihe kirekire nk'uko bivugwa n'ikigo mpuzamahanga gishinzwe ikirere.

BBC

Source : https://umuryango.rw/amakuru/mu-mahanga/umutekano/article/malawi-abasaga-200-bamaze-guhitanwa-n-umuhengeri-witwa-freddy

Inama rusange y'ubutegetsi ya FIFA iteraniye i Kigali yasubijeho gahunda y'amakipe ane muri buri tsinda mu gikombe cy'isi cya 2026 kizaba kigizwe n'amakipe menshi kurushaho.

Iri rushanwa rizabera mu yo muri Amerika, Canada na Mexique byari biteganyijwe ko ribamo amatsinda 16 y'amakipe atatu kuko umubare w'amakipe ubu wakuwe kuri 32 akagirwa 48.

Ariko kugenda neza kw'amatsinda agizwe n'amakipe ane mu irushanwa riheruka muri Qatar mu 2022 byatumye ubutegetsi bwa FIFA bwongera gusuzuma uko bizagenda mu 2026.

Ibi byatumye iryo rushanwa ryari kuba rigizwe n'imikino 80 yongerwa ikaba 104, kuko ubu hongewemo ikiciro gishya cya kimwe cya 16 (1/16) kirimo amakipe 32.

I Kigali, FIFA yemeje ko amakipe abiri ya mbere mu itsinda azajya akomereza muri icyo cyiciro, hamwe n'amakipe umunani ya gatatu yitwaye neza kurusha andi.

FIFA ivuga ko ubu buryo bushya bwo gukina igikombe cy'isi 'buzatuma amakipe yose akina nibura imikino itatu, bukanatanga ikiruhuko gikwiye hagati y'amakipe ahanganye'.

Mu Ukuboza(12) gushize perezida wa FIFA Gianni Infantino nibwo yatangaje ko barimo kureba uko haba impinduka mu buryo bwo gukina igikombe cy'isi nyuma y'uko imikino y'amatsinda irangiye mu buryo bwanyuze benshi muri Qatar.

Uburyo bw'amatsinda y'amakipe ane, aho abiri akomeza mu kiciro cyo gukuranamo, nibwo bwakoreshwaga mu gikombe cy'isi kuva cyatangira gukinwa n'amakipe 32 mu 1998.

Ikiciro gishya cya 1/16 gisobanuye ko amakipe azagomba gukina imikino umunani kugira ngo atware iki gikombe, ugereranyije n'irindwi yo mu 2022 muri Qatar.

BBC

Source : https://umuryango.rw/imyidagaduro/imikino/article/fifa-yongereye-amakipe-mu-gikombe-cy-isi-cya-2026

Perezida Kagame n'Umwami wa Maroc, Mohamed VI bahawe igihembo cy'indashyikirwa n'Ishyiramwe ry'Umupira w'Amaguru muri Afurika, CAF, kubera umusanzu wabo mu iterambere rya ruhago yo kuri uyu mugabane.

Muri ibi birori byabereye i Kigali kuri uyu wa 14 Werurwe 2023,Perezida Kagame yavuze ko igihembo yahawe, ari kimwe mu bintu umuntu aba atiteze ko yabona.

Yavuze ko yacyakiriye n'amaboko yombi kubera agaciro kacyo, ashimira CAF ku bwo kukimushyikiriza.

Umukuru w'Igihugu yavuze ko umupira w'amaguru ufite amateka akomeye mu mateka y'u Rwanda ku buryo no mu gihe cy'urugamba rwo kubohora igihugu, benshi babaga bawutekerezaho.

Ati 'Twabashije gukura amasomo menshi mu mateka yacu. Kimwe mu bintu byadufashije kunyura mu bihe bigoye twari turimo, yari umupira w'amaguru.'

Perezida Kagame yavuze ko mbere y'amezi make ngo igihugu kigwirwe n'amahano ya Jenoside mu 1994, hari ivangura n'ibindi bikorwa bibi, umupira w'amaguru wahurije abantu hamwe.

Ati 'Ubwo twagiraga igihe cyo guhagarika imirwano, kimwe mu bintu byatekerejweho bwa mbere wari umupira w'amaguru.'

Perezida Kagame yavuze ko hari ibitaranoga ku iterambere rya ruhago mu Rwanda nubwo hashyirwamo imbaraga. Ni mu gihe kuko amakipe y'umupira w'amaguru yaba ay'igihugu ndetse n'andi, ataragera ku rwego rwo guhatana n'andi akomeye ku mugabane cyangwa se hanze yawo.

Gusa ngo ku bufasha bwa FIFA na CAF, u Rwanda rwiteguye gukomeza gukora ibyisumbuyeho.

Ati “Ntituragera aho tugomba kuba turi ariko kuba muri hano, imbaraga, amasezerano ya CAF, FIFA n'izindi nshuti zacu turizera ko bidatinze tuzaba turi aho tugomba kuba turi kandi turi kugendera mu ntambwe z'abamaze kugera ku rwego rwo hejuru ku Isi.''

Perezida Kagame yashimye Maroc yitwaye neza mu Gikombe cy'Isi giheruka kubera muri Qatar mu mpera za 2022. Yatsindiwe ku mukino w'umwanya wa gatatu na Croatia ibitego 2-1.

Yavuze ko abakinnyi bo muri Afurika badakwiriye kujya hanze kujya kuzamura urwego rwabo ahubwo abayobozi ba ruhago batuma ibyo bajya gushakayo babibonera mu rugo.

Ati “Afurika ifite impano nta gushidikanya kuri byo.Ariko abakinnyi bacu beza ntibakwiye buri gihe kujya hanze ngo bazamure urwego rwabo. Dukwiye guharanira ko igituma bajya hariya, bakigeraho bari hano. Ni yo mpamvu ibiri gukorwa na CAF na FIFA bishimishije.''

“Uko Maroc yitwaye mu Gikombe cy'Isi ni urugero rwiza rw'ibishoboka. Dukwiye guharanira kwigana urugero rwiza nka ruriya kandi bikaturemamo umuhate wo gukora ibyiza birenzeho, twe abakina ruhago n'abayikunda. Abaturage b'ibihugu byacu bari muri ibi kandi dukwiye guharanira ko bibashimisha.''

Perezida Kagame yahembwe nk'uwabaye indashyikirwa mu guteza imbere umupira w'amaguru mu gihe mu Mujyi wa Kigali hateraniye Inteko Rusange ya 73 ya FIFA. Ni na yo izemerezwamo Gianni Infantino nk'ugomba kuyobora iri Shyirahamwe rya Ruhago ku Isi ku wa 16 Werurwe 2023.

Source : https://umuryango.rw/imyidagaduro/imikino/article/perezida-kagame-yatanze-isezerano-ku-mupira-wo-mu-rwanda-anagira-inama

Mu mikino ya Basketball African League (BAL) iri kubera muri Senegal, ikipe ihagarariye u Rwanda ya Rwanda Energy Group Basketball Club yatsinze umukino wa kabiri, itsinze ikipe ya Abidjan Basketball Club amanota 80 kuri 73, kuri uyu wa Kabiri tariki 14 Werurwe 2023.

REG BBC iri mu gace ka Sahara Conference yakinaga umukino wa kabiri nawo wabereye muri Dakar Arena witabirwa n’abantu basaga 300.

Agace ka mbere ku mukino karangiye REG BBC ifite amanota 17 kuri 20 ya ABC, mu gihe agace ka kabiri nako karangiye REG BBC nabwo iri inyuma kuko ABC yari ifite amanota 24 kuri 20 ya REG BBC. 

Mu gace ka gatatu, REG BBC yaje kwigaranzura ABC iyitsinda amanota 26 kuri 18 naho agace ka kane karangira REG ifite amanota 17 kuri 11 ya ABC BBC, umukino urangira ari amanota 73 kuri 80 ya REG BBC.

Umukino wa mbere REG yatsinze ikipe ya Kwara Falcons amanota 64 kuri 48, ni mu gihe umukino wa gatatu bazawukina kuri uyu wa gatatu tariki 15 Werurwe 2023 bakira As Douanes.

REG BBC ikomeje koroshya inzira yo gusohoka muri iri tsinda iri imbere, kuburyo yahita ibona tike yo gukina imikino ya nyuma ya 1/4, izabera mu Rwanda

Source : https://inyarwanda.com/inkuru/127061/bal-2023-reg-bbc-yatsinze-umukino-wa-kabiri-ikomeza-koroshya-inzira-127061.html

Minisitiri w'Ububanyi n'Amahanga wa Kongo Kinshasa, Christophe Lutundura, yavuze ko nta mubano kugera ubu uri hagati y'u Rwada n'iki gihugu, cyane ko ntacyo waba ushingiyeho.

Leta ya Kinshasa ishinja Kigali gufasha umutwe wa M23, ibyo u Rwanda rwahakanye rwivuye inyuma, ahubwo rugashinja Kongo gufasha umutwe wa FDLR.

Ikinyamakuru Actualite, cyanditse ko uyu mutegetsi wa Kongo yavuze ko kuva bahamagara ambasaderi ubu wabaye umucamanza mu rukiko rw'ikirenga, uwasigariyeho ambasade ya Kinhsasa i Kigali nawe agahamagarwa, Lutundura avuga ko kuvuga ko ibi bihugu hari umubano ushingiye kuri diplomasi byaba ari ukubeshya Isi ku manywa y'ihangu. 

Leta ya Kongo umwaka ushize wa 2022, yanirukanye uwari uhagarariye  u Rwanda muri ikiriya gihugu, kandi ubu nta bimenyetso bigaragaza ko ibintu byazasubira mu buryo vuba.

The post Leta ya RDC yashimangiye ko nta mubano ifitanye n'u Rwanda appeared first on FLASH RADIO&TV.

Source : https://flash.rw/2023/03/15/leta-ya-rdc-yashimangiye-ko-nta-mubano-ifitanye-nu-rwanda/?utm_source=rss&utm_medium=rss&utm_campaign=leta-ya-rdc-yashimangiye-ko-nta-mubano-ifitanye-nu-rwanda

Erling Haaland yabaye umukinnyi wa mbere wa Manchester City uyitsindiye ibitego byinshi mu mwaka umwe w'imikino, nyuma yuko mu ijoro ryo ku wa kabiri yongeye guca imihigo.

Uyu Munya-Norvège yatsinze ibitego bitanu, birimo bitatu yatsinze mu gice cya mbere, ubwo City yigirizaga nkana kuri RB Leipzig ikayinyagira ibitego 7-0, ikagera muri kimwe cya kane cya Champions League.

Kuva yagera muri City ku mpeshyi yo mu mwaka ushize, Haaland amaze gutsinda ibitego 39 mu mikino 36.

Yaciye umuhigo wa Tommy Johnson wari umaze imyaka 94, wari we mukinnyi wari waratsindiye City ibitego byinshi mu mwaka umwe w'imikino kugeza ubu.Kandi wumve ko tukiri mu kwezi kwa gatatu gusa.

Haaland yabwiye igitangazamakuru BT Sport ati: “Imbaraga zidasanzwe zanjye ni ugutsinda ibitego”.

“Nyinshi ziba ari ukwihuta mu mutwe wanjye no kugerageza kuwushyira [umupira] ahantu umunyezamu atari.

“Nari naniwe cyane nyuma yo kwishimira ibitego kwanjye”.

Ibitego bitanu yatsinze Leipzig byanganye n'umuhigo w'ibitego byinshi mu mukino wa Champions League ubu ahuriyeho na Lionel Messi, wabitsinze Bayer Leverkusen mu mwaka wa 2012 ubwo yakiniraga Barcelona, na Luiz Adriano, wabitsinze BATE Borisov mu mwaka wa 2014 ubwo yakiniraga Shakhtar Donetsk.

Ubu Haaland afite ibitego 33 mu mikino 25 ya Champions League, akaba abaye umukinnyi wa mbere ukiri muto mu myaka urengeje ibitego 30, ku myaka 22 n'iminsi 236, akaba abigezeho ari muto ho iminsi 116, ugereranyije n'umukinnyi wari usanganywe uwo muhigo, Kylian Mbappé.

Haaland ubu afite ibitego 10 kugeza ubu muri Champions League yo muri uyu mwaka, bikaba ari byo byinshi kurusha iby'umukinnyi wa City uwo ari wese yatsinze mu mwaka umwe w'imikino muri Champions League.

Uyu wahoze ari rutahizamu wa Red Bull Salzburg na Borussia Dortmund, amaze gutsinda ibitego byinshi muri iri rushanwa rya mbere mu mupira w'amaguru i Burayi kurusha Wayne Rooney, Kaka na Samuel Eto'o.

Haaland yafunguye izamu kuri penaliti ku munota wa 22, aboneza umupira mu nguni yo hasi y'iburyo, ku kibuga Etihad Stadium cya City cyari kirimo urusaku rwinshi rw'abafana.

Ibitego bine yatsinze nyuma yaho byose byavuye ku kuba yabaga ari ahantu heza ho gutsindira kandi akahaba mu gihe gikwiye, akohereza imipira mu izamu nyuma yuko yabaga igarutse. Yatsinze ibitego bitanu mu gihe cy'iminota 35, igice cya mbere cy'umukino n'icya kabiri ubibariye hamwe.

Haaland, waje gusimburwa ku munota wa 63, yanatsinze ibitego bitatu mu mukino umwe ku nshuro ya gatanu muri uyu mwaka w'imikino, ibyo bitatu akaba yabitsinze mu gice cya mbere yakinnye atyaye bikomeye.

Yagize ati: “Namubwiye [umutoza Pep Guardiola] ko nifuzaga gutsinda ibitego bitatu inshuro ebyiri ariko se nakora iki?”

Mu gihe muri uyu mwaka w'imikino City ishobora gukina imikino 19 kurushaho, nta wamenya indi mihigo azaca muri uyu mwaka w'imikino we w'intangiriro muri Manchester udasanzwe.

Mu wundi mukino wabaye kuri uyu wa Kabiri,Inter Milan yanganyije 0-0 na FC Porto ihita iyisezerera kuko mu mukino ubanza yari yayitsinze igitego 1-0.

BBC

Source : https://umuryango.rw/imyidagaduro/imikino/article/ucl-erling-haaland-yakoze-uduhigo-twinshi-mu-mukino-yatsindzemo-ibitego-bitanu

Madame Jeannette Kagame ku munsi w’ejo hashize ku wa Kabiri yasuye Umuri Foundation, irerero rya Jimmy Mulisa wakiniye ikipe y’igihugu Amavubi.

Ni igikorwa cyabereye kuri Canal Olympia, Rebero aho bifatanyije n’abanyabigwi bagacishijeho muri ruhago ku Isi bagera kuri 11.

Uretse Madame Jeannette Kagame kandi hari hari na Leena Infantino, umugore wa perezida w’impuzamashyirahamwe y’umupira w’amaguru ku Isi (FIFA), Gianni Infantino.

Bateraniye mu Rwanda aho bazakora ibikorwa binyuranye bijyanye na ruhago ariko icy’ingenzi ni inteko rusange ya FIFA izaba ku nshuro ya 73 ku munsi w’ejo ku wa Kane tariki ya 16 Weruwe 2023 izanatorerwamo perezida wa FIFA.

Umuri Foundation yashinzwe na Jimmy Mulisa irimo abana b’ingeri zose abahungu n’abakobwa mu byiciro bitandukabye, ndetse n’abana bo ku muhanda ntibahezwa.

Nk’uko muri 2021 Jimmy Mulisa yigeze kubitangaza, yavuze ko umupira w’amaguru ari igikoresho gishobora guhindura ubuzima bw’umwana agatekereza birushijeho ndetse nk’abana bo ku muhanda bakabona ko bafite ejo hazaza heza.

Yagize ati “umupira w’amaguru ufite uruhare runini mu gukura aba bana ku muhanda. Nta gishimisha abana nko kubateranyiriza hamwe ahantu nk’aha bagakina. Tuboneraho no kuganira na bo uburyo batangira ubuzima bushya imiryango ya bo ikabasubiza mu ishuri, ni cyo dushaka.”

“Sinakwibagirwa ko urugendo rwanjye rwa ruhago rwatangiriye ku muhanda, numva byaba ari byiza kandi ari ingenzi nsubiyeyo ngafata akaboko impano ziriyo nkazifasha kuvamo abakinnyi beza.”

Umwe mu banyabigwi bari bahari ni Cafu, umunya-Brazil wegukanye igikombe cy’Isi inshuro 2, yavuze ko ntako bisa kuza kuganira n’abana nk’aba.

Ati “ni ingenzi kuza ukaganira n’abana ukamenya akazi Jimmy na Fondasiyo ye barimo gukora. Umupira w’amaguru ni igikoresho gifasha mu guhindura imibereho, urabona uburyo aba bana barimo bigishwa, bafata amasomo bazifashisha mu buzima bwa bo bwose.”

Uretse kuganiriza aba bana, bakinnye na bo umupira w’amaguru mu rwego rwo gusabana.

Abanyabigwi bari bitabiriye iki gikorwa harimo Khalilou Fadiga, Portia Modise, Lucas Radebe, Asamoah Gyan, Kwadwo Asamoah, Houssine Kharja, Perpetua Nkwocha, Pierre Webo, Maia Jackman, Wes Brown na Cafu.

UMURI Foundation ni umuryango w’ubugiraneza n’imibereho myiza washinzwe mu 2018 n’uwahoze ari umukinnyi mpuzamahanga w’umupira w’amaguru mu Rwanda Jimmy Mulisa. Mulisa amaze kubona ko abana mu Rwanda bifuza gukina umupira w’amaguru ariko bakazitirwa n’ubukene, ntibahabwe amahirwe angana, yashinze uyu muryango mu rwego rwo guha imbaraga Urubyiruko binyuze mu burezi na siporo.

Madame Jeannette Kagame yasuye irerero rya Jimmy Mulisa

Leena Infantino na Madame Jeannette Kagame muri uyu muhango

Madame Jeannette Kagame na we yaconze ruhago

Umunya-Maroc wakanyujijeho muri ruhago, Houssine Kharja yakinnye n’aba bana

Umunya-Brazil, Cafu yavuze ko akazi Jimmy Mulisa yakoze ari agatangaza

.

Jimmy Mulisa washinze Umuri Foundation

Bafashe ifoto y’Urwibutso

Source : http://isimbi.rw/siporo/article/madame-jeannette-kagame-ari-kumwe-n-abanyabigwi-ba-ruhago-11-basuye-irerero-rya-jimmy-mulisa-amafoto