Category: Uncategorized

Muri rusange,abantu makumyabiri n'umunani bakekwaho kuba abagizi ba nabi batawe muri yombi na Polisi y'igihugu cya Kongo (PNC) mu ijoro ryo ku wa gatanu rishyira ku wa gatandatu tariki ya 18 Werurwe mu duce tune two mu makomine abiri yo mu mujyi wa Beni (Kivu y'Amajyaruguru).

Aba bafatanwe intwaro,ibikoresho bya gisirikare n'ibyo mu rugo byibwe.

Aba bantu bafashwe n'abapolisi bavanze n'ingabo, bari bibasiye uduce tune two mu mujyi wa Beni. Utwo duce ni Ngongolio, Byahutu, Tamende na Benengule muri komini ya Beu na Mulekera, aho abaturage bari bamenyesheje inzego z'umutekano ko aba bagizi ba nabi bahari.

Mu bantu makumyabiri n'umunani batawe muri yombi harimo abagore bane.

Abashinzwe umutekano bafashe ibintu birimo imbunda ebyiri za AK 47 na magazine zazo .Ibikoresho bya gisirikare.Ibikoresho byo mu rugo,inzoga zisindisha,n'ibindi.

Ubwo Meya wa Beni yagaragazaga ku mugaragaro aba bagizi ba nabi,yasabye abaturage kuba maso.

Source : https://umuryango.rw/amakuru/mu-mahanga/umutekano/article/rdc-abagizi-ba-nabi-24-bafatanwe-imbunda-n-ibikoresho-bakoreshaga-bica-abantu

Umwe mu bapolisi bari bari kuburinzi yivuganywe na Mugenzi we bapfuye ko ngo yari yatahuye ko amuca inyuma k'umukobwa yari amaze igihe atereta.

Uyu mupolisi wari uri mu kazi ke kaburi munsi biravugwa ko yaguwe gitumo n'uwo yacaga inyuma bikarangira amwivuganye.

Amafoto yacicikanye ku mbugankoranyambaga yagaragazaga ko nyakwigendera aryamanye n'imbunda ye mu kiziba cy'amaraso yamaze gushiramo umwuka.

Uyu mupolisi batashatse ko umwirondoro utangazwa , umurambo we wahise ujyanwa mu buruhukiro bw'ibitaro bikuru i Kinshasa, mu gihe iperereza rigikomeje.

Mu minsi yashize nabwo hagaragaye umusirikare wari wishwe ariko we yashinjwaga kwiba , ibintu byahuriranye n'amafoto y'abapolisi yafashwe bari kwiba Moto, bayiteruyeho nyirayo, abandi bakagaragara bateruye ihene nabo bayibye umuturage.

Ni ingeso isa n'iyokamye inzego z'umutekano za Congo kuko nk'uko bivugwa ngo bakunda gufata ibitari ibyabo cyane, bagakeka ko ari impamvu yo kudahembwa cyangwa bigakorwa nabi.

Source : https://umuryango.rw/amakuru/mu-mahanga/umutekano/article/umupolisi-yarashe-mugenzi-we-aramwica-bapfuye-umukobwa-yateretaga

Ikipe ya Real Madrid ikomeje gukurikiranira hafi rutahizamu wa Tottenham Hotspurs,Umwongereza Harry Kane w'imyaka 29, mu gihe amasezerano afitanye n'iyi kipe azarangira mu 2024.

Iyi kipe ikomeye ku isi irashaka guhangana na Manchester United na Bayern Munich ku kwegukana uyu rutahizamu Harry Kane.

Tottenham iracyafite icyizere cyo kongerera amasezerano uyu kapiteni w'Ubwongereza gusa bishobora kutazayorohera kuko nta bikombe itwara.

Kizigenza Kane arashaka gutwara ibikombe ndetse umutoza wa Spurs,Antonio Conte yemeje ko ahazaza h'uyu mukinnyi hatazwi.

Uyu mukinnyi w'imyaka 29,kizigenza wa Napoli, Victor Osimhen na rutahizamu wa Benfica, Goncalo Ramos bari ku rutonde rwa United gusa umwe muri bo niwe uzagurwa.

Ikinyamakuru Mail kivuga ko United na Bayern zishobora guhura n'imbogamizi mu gushaka Kane,igihe Madrid yaba yinjiye mu rugamba.

Umuyobozi wa Tottenham,Daniel Levy arashaka akayabo muri uyu rutahizamu ariyo mpamvu Man United ngo ishobora kugenda gake.

Ikindi kibazo kiri muri doyiye ya Kane nuko ashobora kwifuza umushahara mwinshi kandi United irashaka kugabanya akayabo yashoraga.

Spurs nayo ngo irashaka kongerera amasezerano Kane kugira ngo bakomezanye.

Icyakora Conte agowe nuko Tottenham izarangiza umwaka nabwo nta gikombe itwaye bityo Kane akaba atazemera kuyigumamo.

Tottenham irahura na Southampton muri Premier League kuri uyu wa Gatandatu mu gushaka umwaka wa kane.

Icyakora Real Madrid ishaka kongerera amasezerano Karim Benzema ndetse ngo iracyafite ijisho kuri Kylian Mbappe.

Harry Kane arifuzwa na Real Madrid

Source : https://umuryango.rw/imyidagaduro/imikino/article/real-madrid-igiye-kwinjira-mu-rugamba-rwo-gushaka-umukinnyi-ukomeye-mu

Abakinnyi 26 b'Ikipe y'Igihugu Amavubi bageze muri Ethiopia aho agomba gukina umukino wa gicuti mbere yo kwerekeza muri Bénin gushaka itike y'igikombe cya AFCON y'umwaka utaha.

Mu bakinnyi 30 bahamagawe n'umutoza w'Ikipe y'Igihugu Amavubi, Carlos Alós Ferrer yahagurukanye 26 batarimo umunyezamu wa mbere, Kwizera Olivier ukinira Al Kawkab muri Saudi Arabia ndetse n'abandi barimo Haruna Niyonzima,Ruboneka Jean Bosco,n'abandi bari bahagaze neza benshi.

Kwizera yagize ikibazo cy'imvune ku wa Gatanu, mu mukino wa Shampiyona ikipe ye yanganyijemo na Al Najmah FC 1-1.

Abandi batabonetse ku rutonde rwa nyuma rwagiye muri Ethiopia ni Nyarugabo Moise wa AS Kigali, Mugisha Didier wa Police FC na Iradukunda Simeon wa Gorilla FC.

Iyi kipe yageze i Addis Ababa muri Ethiopia mu rukerera rwo kuri uyu wa Gatandatu, tariki 18 Werurwe 2023 aho igomba gukomeza urugendo yerekeza Adama Nazret mu ntara ya Oromia.

Amakuru aravuga ko uyu mukino wa gicuti uzafasha u Rwanda kwitegura imikino ibiri ya Bénin.

Uyu mukino wa gicuti Ethiopia izakiramo u Rwanda uteganyijwe kuri iki Cyumweru, tariki 19 Werurwe 2023 saa kumi.

U Rwanda rugiye gukina imikino y'umunsi wa gatatu n'uwa kane rufitanye na Bénin mu gushaka itike y'Igikombe cya Afurika kizabera muri Côte d'Ivoire.

Umukino ubanza uteganyijwe tariki 22 Werurwe 2023 muri Bénin, nyuma y'icyumweru hakazakinwa uwo kwishyura tariki 27 Werurwe 2023 uzabera mu Karere ka Huye.

Aya makipe ari mu itsinda L, aho u Rwanda ruri ku mwanya wa gatatu n'inota rimwe, Bénin iri ku mwanya wa nyuma nta nota ifite. Ikipe iyoboye iri tsinda ni Sénégal ifite amanota atandatu na Mozambique ifite ane.

Abakinnyi 26 Amavubi yahagurukanye

Abanyezamu: Ntwali Fiacre (AS Kigali) na Ishimwe Pierre (APR FC)

Ba myugariro ni Mutsinzi Ange (FK Jerv), Omborenga Fitina (APR FC), Serumogo Ally (Kiyovu Sports), Imanishimwe Emmanuel (FAR Rabat), Ganijuru Elie (Rayon Sports), Ishimwe Christian (APR FC), Nsabimana Aimable (Kiyovu Sports), Rwatubyaye Abdul (Rayon Sports), Manzi Thierry (AS Kigali) na Niyigena Clement (APR FC)

Abakina hagati: Bizimana Djihad (KMSK Deinze), Muhire Kevin (Yarmouk) Niyonzima Ally (Bumamuru), Mugisha Bonheur (APR FC), Rubanguka Steve (FC Zimbru), Rafael York (Gefle), Hakim Sahabo (Lille U19) na Iraguha Hadji (Rayon Sports)

Abataha izamu ni Muhozi Fred (Kiyovu Sports), Mugisha Gilbert (APR FC), Meddie Kagere (Singida Big Stars), Mugenzi Bienvenue (Kiyovu Sports), Bizimana Yannick (APR FC) na Habimana Glen (Victoria Rosport)

Source : https://umuryango.rw/imyidagaduro/imikino/article/amavubi-yageze-muri-ethiopia-gukina-umukino-wa-gicuti-mbere-ya-benin

Uburusiya bwatangaje ko buzarasaindege izo ari zo zose Ukraine izahabwa n'incuti zayo,nyuma y'aho ibihugu bibiri byemeye kuzitanga.

Slovakia yabaye igihugu cya kabiri cya OTAN cyemereye Kyiv indege zo mu bwoko bwa MiG-29 ejo ku wa gatanu, umunsi umwe inyuma ya Pologne.

Ukraine isaba ibihugu by'uburengeraazuba kuyiha indege zikomeye vuba, ariko kubera ko bisaba ibiganiro by'igihe kirekire, bizafata umwanya munini.

Ibona ko mu gihe yahabwa izindi ndege byayifasha mu kwirinda ndetse ikanakora n'ibitero byo guhangana n'umwanzi, muri iyi ntambara imaze umwaka urenga itangijwe n'Uburusiya.

Ibindi bihugu bya OTAN biri gushaka uburyo byakoherereza Ukraine indege nk'izi za MiG-29 — ubwoko bw'indege bwo kuva mu gihe cy'ubutegetsi bw'Abasoviyeti — ubu abanya-Ukraine bakaba barimo barigishwa kuzikoresha.

Umuvugizi wa Kremlin, Dmitry Peskov, yamaganye iyi migambi,avuga ko izi ndege ntacyo zizahindura ku ntego ya Moscow y''igikorwa kidasanzwe cya gisirikare' nk'uko ikunze kwita iyi ntambara.

Avuga ko nta kindi zizamara atari ukongerera akaga Ukraine n'abaturage bayo.

Ati: “Ni byo, muri iki gikorwa kidasanzwe cya gisirikare, ibi bikoresho byose ni ngombwa bizaraswa'.

Izi ndege zemewe na Pologne hamwe na Slovakia ni inkuru nziza kuri Ukraine isanzwe ifite abapilote benshi baruta indege, ariko si ukuvuga ko zije gukora ibidasanzwe.

Abanya-Ukraine bavuga ko ibyo bakeneye cyane ari indege z'intambara za Amerika zo mu bwoko bwa F-16.

Yuri Sak, umujyanama mukuru wa Ukraine mu by'ingabo, avuga ko izi ndege z'ubu zifite ububasha budasanzwe.

Birasa nk'aho Ukraine itarazibona vuba kuko bizasaba igihe kitari gito cyo kwigisha abanya-Ukraine gutwara izi ndege z'Uburengerazuba.

Abategetsi ba gisirikare bo mu Burengerazuba baracyafite impungenge ku ndege z'ubu. Intego yabo nyamukuru ni ugufasha Ukraine gutsinda intambara yo ku butaka.

BBC

Source : https://umuryango.rw/amakuru/mu-mahanga/umutekano/article/uburusiya-bwemeje-ko-buzarasa-indege-zose-ibihugu-byemereye-ukraine

Myugariro Dani Alves ngo ari kwiyicisha inzara kubera umugore we wasabye gatanya nyuma yo kuvumbura ko yamuciye inyuma mu kabyiniro ari nabyo byamuviriyemo gufungwa.

Alves ufungiwe muri Espagne ashinjwa gufata ku ngufu umugire bari bahuye bwa mbere,ntiyishimiye ko umugore we basezeranye yasabye gatanya ariyo mpamvu adashaka kurya.

Uyu mugabo w'imyaka 39 ukomoka muri Brazil,yafunzwe kuwa 20 Mutarama uyu mwaka nyuma yo kuregwa n'uriya mugore wamushinje kumusambanya ku ngufu mu mpera z'umwaka ushize.

Muri Gashyantare, umugore wa Alves, Joana Sanz yamusuyemuri gereza mu gihe hari amakuru avuga ko uyu munyamideli yari yaramaze gusaba ubutane.

Amakuru yaturutse kuri televiziyo yo muri Espagne Cuatro, avuga ko uyu mukinnyi ari mu myigaragambyo yo kwiyicisha inzara muri gereza afungiyemo.

Amakuru avuga ko Alves 'afite agahinda kenshi n'ubwoba bwinshi' nyuma y'uko Joana w'imyaka 29 amubwiye ko ashaka guhagarika umubano wabo kandi ngo hari iminsi atarya na gato.

Bije nyuma yo gusiba amafoto menshi ari kumwe n'uyu mukinnyi w'umupira w'amaguru kuri Instagram nyuma yuko bivuzwe ko yaryamanye nu'uyu mukobwa umuhagamye- yabanje guhakana ko amuzi.

Uyu mugore wavukiye muri Tenerife,yashakanye na Alves wahoze ari myugariro wa Barcelona muri 2017, kugeza ubu ntacyo aratangaza kuri ayo makuru.

Alves yirukanwe n'ikipe yo muri Mexico UNAM Pumas nyuma yo gufungwa n'umucamanza i Barcelona.

Uyu mukecuru w'imyaka 23 yavuze ko yatewe na Alves ahitwa Sutton muri uyu mujyi ku ya 30 Ukuboza, bituma atabwa muri yombi ku ya 20 Mutarama.

Umucamanza yemeje ko Alves agomba gufungwa, ubu ari muri gereza yo hanze y'umujyi.

Source : https://umuryango.rw/imyidagaduro/imikino/article/dani-alves-ari-kwiyicisha-inzara-muri-gereza-kubera-umugore-we-wamwanze

Abagabo babiri bateje akavuyo ku biro bikuru bya Polisi by'ahitwa Nakuru muri Kenya kuri uyu wa Gatanu tariki ya 17 Werurwe ubwo bazindukaga burira igiti kiri hafi aho bambaye ubusa

Aba ngo bageze mur iki giti bahise batangira kubwiriza ubutumwa.

Aba bagabo bageze kuri ibi biro bya polisi kuwa Kane nijoro bagerageza kurira iki giti ariko bamanirwa igitaraganya barirukanwa.

Icyakora bukeye,bahisemo kubishyira ku rundi rwego,baragaruka bambara ubusa barangije burira icyo giti

Polisi yagerageje kubambika ku ngufu no kubamanura muri iki giti ariko biba iby'ubusa.

Yahise ifata umwanzuro wo gufunga aka gace kugira ngo aba bagabo bamanurwe ku kabi n'akeza.

Ikinyamakuru The Citizen cyo muri Kenya dukesha iyi nkuru kivuga ko nyuma y'amasaha 11 ruri hasi hejuru hagati y'impande zombi,aba bagabo bemeye kumanuka hanyuma bajya mu nguni y'iyi sitasiyo baricara ntibongera kuvuga.

Source : https://umuryango.rw/ubuzima-115/udushya/article/abagabo-buriye-igiti-cyo-kuri-polisi-bigaragambya-bambaye-ubusa

Abafana b'abanyarusaku ba Paris Saint-Germain ulbatangaje ko bari gutegura imyigaragambyo yo kwamagana kizigenza Lionel Messi.

Messi yananiwe kugaruka mu bihe byiza yahozemo muri FC Barcelona kuva yakwerekeza muri PSG avuye i Catalonia muri 2021 nyuma y'imyaka isaga 20 akinira Nou Camp.

Uyu mugabo watwaye Ballon d'Or zirindwi ntabwo yabashije kugira PSG ikipe ikanganye nkuko yari abyitezweho nyuma yo gufasha Argentina gutwara igikombe cy'isi mu mpera z'umwaka ushize.

Ibintu byaruhijeho kuzamba ubwo umutoza Christophe Galtier n'abakinnyi be barimo uyu wa mbere ku isi basezererwaga bigayitse muri 1/16 cya Champions League na Bayern Munich.

Messi waje muri PSG ku isiri ryo gutwara Champions League nta kintu kidasanzwe yakoze ku mukino wa Bayern.

Abafana b'akadasohoka ba SPG bavuze ko barambiwe kumwitegaho ibitangaza ntabyo asigaranye bityo baraza kumwamagana ku mugaragaro ku mukino wa Ligue 1 wo kuri iki cyumweru iyi kipe ikina na Rennes kuri Parc des Princes.

Aba bavuga ko akayabo ahembwa buri kwezi katangana na busa nibwo atanga mu kibuga bityo baramwereka ko batanyuzwe.

Umwe mu bahagarariye aba bafana ba PSG yabwiye Mundo Deprtivo ati: 'Tuzavugiriza induru Messi kuri iki cyumweru.

Ahembwa umushahara mwinshi utangana nibyo atanga mu kibuga.”

Icyakora ngo iyi myigaragambyo ntabwo byitezwe ko ikwirakwira muri stade yose.

Amasezerano ya Messi azarangira mu mpeshyi ariko PSG ikunda amazina cyane irashaka kumwongeza andi mafaranga.

Abahanga mu gusesengura ruhago bavuga ko PSG ikwiye kureka ibyo gutunga abakinnyi bakuze badakora ikinyuranyo ikigana Real Madrid nayo ikubaka ikipe y'igihe kirekire igizwe n'abakiri bato ariko bafite ubuhanga.

Source : https://umuryango.rw/imyidagaduro/imikino/article/abafana-ba-psg-bateguye-imyigaragambyo-yo-kwamagana-messi

Biravugwa ko Leta ya Congo yakiriye itsinda rivuye mu bushinwa kugira ngo bumvikane uko bagura indege kabuhariwe CAC/PAC JF-17 Thunder zo Kuyifasha kurasa ingabo z'umutwe wa M23.

Ikipe ikomeye iturutse muri China National Aero-Technology Import & Export Corp (CATIC) yageze i Kinshasa mu cyumweru gishize,iri kumwe n'abayobozi ba People's Liberation Army (PLA),baje kugurisha indege zo mu bwoko bwa JF-17 Thunder igihugu cya DR Congo.

Ikinyamakuru Africa Intelligence cyemeje aya makuru ndetse kivuga ko hari indi kipe y'abantu bageze i Kinshasa baje kugurisha iki gihugu indege zakoze za Belarus zitwa Sukhoi Su-27 zakozwe mu mwaka wa 1980.

Iki kinyamakuru kiravuga ko DRC iri gushaka indege zikomeye ku kabi n'akeza kuko imaze kumenya ko ingabo zayo zo ku butaka nta kigenda kuko zikubitwa na M23 byazishobera zikiyirukira aho gushikama ngo zirwane.

M23 imaze gufata uduce twinshi two muri Kivu ya Ruguru ikubise inshuro FARDC n'inyeshyamba zose bafatanya ukongeraho n'abacancuro.

Iki gihugu cyakunze kumvikana cyikoma u Rwanda ngo nirwo rufasha inyeshyamba za M23 nyamara narwo rukabihakana, ahubwo rugashinja DRC gukorana na FDLR umutwe w'iterabwoba urwanya Leta y'u Rwanda.

Ibihamya byagaragaje ko FDLR ifasha leta ya DRC nubwo ntacyo byatanze kuko M23 yakomeje kubakubita inshuro bakiruka.

Indege za RDC ntizitsimbura M23 ahubwo hari amakuru avuga ko abazirashisha hari ubwo bibeshya bakarasa ingabo zabo aho kurasa iz'umwanzi.

Source : https://umuryango.rw/amakuru/mu-mahanga/umutekano/article/leta-ya-congo-mu-biganiro-byo-kugura-indege-zikanganye-z-abashinwa

Agakiriro ka Rubavu ni kamwe mu dukiriro tugaragaramo umubare muto w'abagore n'abakobwa bakora ububaji kuko gakoreramo abakobwa barindwi mu bagabo 300.

Niyikomeza Rebecca, umwe mu bakobwa barindwi bakorera mu gakiriro ka Rubavu gaherereye ahitwa mu Mbugangari, yabwiye IGIHE ko akirangiza Icyiciro Rusange yahise akomereza mu mwuga w'ububaji nubwo abantu benshi bamucaga intege bamubwira ko umwuga agiyemo atazawushobora.

Ati 'Narabishoboye, nzi gukora inzugi, ibitanda, utubati n'ibindi. Impamvu abakobwa benshi batitabira ububaji ni uko mbere twabonaga bikorwa n'abagabo gusa tukumva ko ari akazi k'abagabo'.

Nyiransabimana Claudine, ni we mukobwa wenyine ukorera ububaji mu gakiriro ka Nyaruguru, kuko bagenzi be biganye uyu mwuga bawuvuyemo bajya gukora ibindi.

Ati 'Twize ububaji turi abakobwa 5 kubera kwitinya bose babivuyemo ninjye ubisigayemo. Ngitangira nabonaga igitanda nkibwira ko ari ibintu bikomeye ariko ubu nanjye nzi kubyikorera'.

Nyiransabimana asaba abagore n'abakobwa kwitinyuka bakitabira umwuga w'ububaji kuko uruhare rwabo ari ingenzi mu kunonosora ibikoresho by'ububaji.

Ati 'Uruhare rw'abakobwa n'abagore rurakenewe kugira ngo uyu mwuga utere imbere kuko abakobwa dukora neza ibikoresho. Igikoresho cyasenwe n'umukobwa w'umubaji kiba gisa neza kurusha icyasenwe n'umugabo cyangwa umusore'.

Twizerimana Souvenir Grace, uri kwimenyereza umwuga w'ububaji mu gakiriro ka Karongi yabwiye IGIHE ko bamwe mu bakoresha bagifite imyumvire y'uko ububaji ari akazi gasaba imbaraga.

Ati 'Imbogamizi ni uko iyo turangije akenshi bataduha akazi bakagaha abahungu, kubera ko bagifite imyumvire y'uko ububaji busaba imbaraga ariko natwe turabishoboye'.

Uwanyirigira Valentine, umaze imyaka ine afite ikigo gikora ububaji mu karere ka Gasabo mu mujyi wa Kigali, ahamya ko abakobwa n'abagore bakora neza umwuga wo kubaza agasaba abafite ibigo bikora ububaji kubagirira icyizere bakabaha akazi.

Ati 'Abagore n'abakobwa dupanga neza akazi kacu kandi tugakora ibintu bifite isuku. Abagabo benshi iyo ubahaye komande y'igikoresho ntabwo abasha kugitangira ku gihe ariko twebwe abagore tugerageza kubahiriza amasezerano twahanye n'umukiliya'.

Mu karere ka Karongi mu Murenge wa Rubengera hari ishuri ry'ububaji rimaze imyaka 10 ritangiye. Abenshi mu bize muri iri shuri ni abahungu, ndetse n'uyu munsi mu banyeshuri 60 baryigamo harimo abakobwa 9 gusa.

Umuyobozi w'iri shuri Soeur Emmilienne Muhawenimana yavuze ko bagiye gushyiraho ihuriro ry'abagore n'abakobwa bakora umwuga w'ububaji mu Rwanda mu rwego rwo gutinyura ab'igitsina gore batinya uyu mwuga.

Ati 'Mu bumenyi tubaha tubona ko bashoboye kandi babikora neza ariko hakabaho imbogamizi yo kwitinya. Turashaka kubatinyura kugira ngo umubare wabo wiyongere muri uyu mwuga w'ububaji'.

U Rwanda ni kimwe mu bihugu birajwe ishinga no kurandura ubusumbane hagati y'abagabo n'abagore, niyo mpamvu abagore badakwiye gusigara inyuma mu kwiga imyuga. Intego ya Guverinoma y'u Rwanda ni ukongera abanyeshuri biga amasomo y'imyuga n'ubumenyingiro bakagera kuri 60% bitarenze 2024.

Uwanyirigira Valentine ufite ikigo gikora ububaji asaba abafite ibigo bikora ububaji kugirira icyizere abakobwa bize ububaji bakabaha akazi kuko bashoboye

Twizerimana Souvenir Grace asaba abakoresha guha akazi abakobwa bize ububaji

Nyiransabimana Claudine niwe mukobwa wenyine ukorera ububaji mu gakiriro ka Nyaruguru

Niyonizera Rebecca yize ububaji bamuca intege ko atazabishobora ariko ubu biramutunze

Soeur Muhawenimana uyobora ishuri ryigisha ububaji avuga ko umubare w’abakobwa mu mashuri yigisha ububaji ukiri muto

Hatangijwe ihuriro ry’abagore n’abakobwa bakora ububaji mu Rwanda rigamije gutinyura ab’igitsina gore bacyitinya

---

Source : http://igihe.com/amakuru/u-rwanda/article/imvano-y-ubuke-bw-abagore-n-abakobwa-mu-bubaji