Category: Uncategorized

Bakoze iki gitaramo cy'uburyohe mu ijoro ryo kuri iki Cyumweru tariki 19 Weurwe 2023 muri Kigali Conference and Exhibition Village ahazwi nka Camp Kigali.

Iri torero rizwi cyane mu guteza imbere umuco. Ryifashishwa cyane mu bukwe no mu bindi birori n’ibitaramo bitsimbaza umuco w’u Rwanda.

Imyaka 25 ishize batangiye gukora, ni urugendo rurerure ariko kandi rwatumye baguka, yaba mu baririmbyi, ibyo bakora, kwiteza imbere n’ibindi.

Iki gitaramo bacyise ‘Urwejeje Imana’ mu gisobanuro cy’u Rwanda rwagutse, ruhorana itsinzi, iterambere n’Imana.

Umuyobozi Ushinzwe gukurikirana ibikorwa by’Itorero Inyamibwa, Rusagara Rodrigue, aherutse kubwira InyaRwanda ko bahisemo kucyita 'Urwejeje Imana' mu kumvikanisha imyaka 25 ishize y'urwibutso baherekejwe n'Imana.

Akomeza ati “Ni urugendo rurerure! Mu by’ukuri impamvu yo kucyita ‘Urwejeje Imana’ icya mbere ‘Urwejeje Imana’ ni u Rwanda rwejeje Imana. Bishatse kuvuga ngo ni u Rwanda ruhora rutsinda, ni u Rwanda ruhorana intsinzi, ni u Rwanda ruhorana iterambere, ni ya Mana irara ahandi, yirirwa ahandi ikarara i Rwanda.”

Iki gitaramo cyafunguwe ku mugaragaro n'itsinda ry'abana ryitwa 'Nyundo Kids Drummer' ahagana saa 19:11', binjiriye mu murishyo w'ingoma wanyuze benshi.

Ni igitaramo cyihariye kuri iri torero, kuko ryizihiza isabukuru y'imyaka 25 ishize babonye izuba.

Amateka agaragaza ko ryavutse mu 1998, rishinzwe n'abanyeshuri barokotse Jenoside yakorewe Abatutsi mu 1994 bigaga mu cyahoze ari Kaminuza Nkuru y'u Rwanda i Butare.

Umushyushyarugamba Mukiza Eric wo mu Itorero Inganzo Ngari wayoboye iki gitaramo, atangiza iki gitaramo yavuze ko Inyamibwa bizihiza 'Urugendo rutari rworoshye ariko babashije kugera ntego bari bihaye.'

Uburyohe budashira mu gitaramo 'Urwejeje Imana' cy'Itorero Inyamibwa

Umwe mu babyinnyi b'itorero Inyamibwa yatangije iki gitaramo avuga uburyo iri torero ryagutse kuva mu myaka 25 ishize.

Yavuze ko batangiye bakina ikinamico, nyuma baza no gutangira ibyo kubyina imbyino gakondo no gususurutsa abantu mu birori binyuranye.

Avuga ko uko ahagana mu 2012 batangiye bajya gutaramia muri Kenya, ibihugu bibatumira bikomeza kwiyongera kugeza ubwo bagiye n'ibwotamasimbi.

Uyu mukobwa yanavuze ko kuva icyo gihe itorero ryagutse, bunguka imiryango mishya, barashyingira, barashyingirwa n'ibindi byakomeje urugendo rwabo.

Imyaka 25 ishize bishimira ko ibikorwa byabo byarenze kuba baratangiriye muri Kaminuza, ahubwo bikaba byaragiye ku rwego rw’Isi.

Umwaka ushize (2022) iri torero ryaserukiye u Rwanda mu iserukiramuco rya mbere ku Isi ryitwa ‘Festival de Confolens’ ribera mu gihugu cy’u Bufaransa.

None ubu ni 'Urwejeje Imana'. Inyamibwa bigaragaje mu bihe bitandukanye-

Abasore n'inkumi baserutse mu myambaro ya Kinyarwanda, abandi bavuza ingoma ubundi batanga ibyishimo mu ndirimbo n'imbyino bateguye.

Abasore binjiriye mu ndirimbo igaruka ku gusingiza Intwari z'u Rwanda. Muri iyi ndirimbo bavuga ko intwari arizo zubakiyeho amateka meza y'u Rwanda. Ati 'Banyarwanda muze dusingizwe intwari.'

Bari bitwaje ibyapa byanditseho ibyiciro by'intwari z'u Rwanda 'Imanzi', 'Imena' n'ingenzi'. Nyuma banzitse mu ndirimbo ishishikariza abantu gukunda umuco w'u Rwanda. Bati 'Umuco w'u Rwanda tuwusakazeho hose.'

Iyi ndirimbo bayibyinnye abakobwa babyina bafite ingoma, bambaye imyambaro y'inshabure.

Bakinnye kandi umukino wumvikanisha ibigwi by'Inyamibwa. Bakomereza ku ndirimbo igaruka ku Nkotanyi bati 'Inkotanyi cyane yabyirutse itsinda.' Iyi ndirimbo yaririmbwe n'abahanzi bubakiye ku muco barimo Masamba Intore.

Iki gitaramo kitabiriwe n'abarimo Masamba Intore, Ruti Joel, Jules Sentore, Minisitiri w’Ubucuruzi n’Inganda, Dr Jean Chrysostome Ngabitsinze n'abandi banyuranye.

Muri iki gitaramo kandi, abakuru mu Inyamibwa basanganiye bagenzi babo bafatanya nabo gususurutsa abitabiriye iki gitaramo. Inyamibwa baherukaga gukora igitaramo mu mwaka wa 2018.

Umuyobozi Mukuru w’Ikigega RNIT Iterambere Fund, Bwana Jonathan Gatera, yakanguririye abantu umuco wo kwizigama. Yavuze ko abagize Inyamibwa batangiye kwizigamira uyu munsi, mu gihe cy'imyaka itanu iri imbere baba 'bafite inyibuko y'imyidagaduro yabo bwite' (Inyamibwa Cultural Exbihition).'

Aba babyinnyi kandi baserutse mu kindi gice cy'umubyino, aho bagiye bagaragaza amwe mu mafoto ashushanya ibikorwaremezo u Rwanda rwagezeho mu myaka ishize y'urugendo rw'iterambere, birimo nk'inyubako ya Kigali Convention Center, imishinga ihanzwe ijisho n'ibindi binyuranye.

Iri torero ryanatanze ibyishimo binyuze mu ndirimbo 'Komeza imihigo Rwanda'. Basoje kuririmba no kubyina iyi ndirimbo bakomewe amashyi y'urufaya, aherekejwe n'akaruru k'ibyishimo mu rwego rwo kubashimira uburyo babataramiye.

Iki gitaramo kitabiriwe na Minisitiri ndetse n'abadepite:

Umuhuzabikorwa wa AERG ku rwego rw’Isi, Udahemuka Audace, yavuze ko bishimira ko iyi myaka ishize 'tubasha gutaramira Abanyarwanda, tugasusuruka kandi tukaganira'.

Yavuze ko nyuma ya 1994, bitari byoroshye kubona abantu bongera gutarama, bagasakuza (gusakuza), bagaca imigani. Avuga ko aha ari naho havuye igitekerezo cyo gushinga iri torero kugira ngo rijye rifasha abantu kwegerana.

Yashimye ingabo zari iza RPA 'kuko bahagaritse Jenoside uyu munsi tukaba tuhagaza neza twishimye'. Yashimye kandi ababyeyi 'batubaye hafi muri bya bihe byari bigoye'.

Uyu muyobozi yashimye kandi abitabiriye iki gitaramo, Ati 'Kubona abantu bangana gutya ni ibyo kwishimira cyane.'

Yavuze amazina y'abantu barimo Fulgence, Raissa, ikipe tekinike ndetse n'abandi bose bagize uruhare mu gutegura iki gitaramo. Ati 'Aba bantu bakoze ibi bintu byiza tubahaye inka.'

Umukino ndetse n'ibindi byose Inyamibwa bagaragaje muri iki gitaramo byateguwe na Landry afatanyije na Mpinganzima Joselyne.

Udahemuka yavuze ko mu rwego rwo kubashimira uburyo bitwaye muri iki gitaramo n’imyaka 25 ishize mu rugendo “Tubahaye inka”. Yayihaye itorero ryose muri rusange'.

Ababyinnyi b'iri torero kandi basabye Min.Ngabitsinze kubasanga ku rubyiniro, ubundi abakora mu ntoki mu rwego rwo kubashimira uburyo bitwaye muri iki gitaramo. 

Umurishyo wa nyuma w'iki gitaramo, wavugijwe ahagana saa 22: 37'.

Minisitiri Ngabitsinze yatanze ibihembo ku bahize abandi mu kwizigamira mu kigega RNIT, anashimira Itorero Inyamibwa

Umuyobozi w’Itorero Intayoberana, Kayigemera Sangwa Aline n’umugabo we Ndayizeye Emmanuel [Nick Dimpoz] wamenyekanye cyane muri filime ‘City Maid’

Umukinnyi wa filime Yvan ukina muri filime Bamenya. Muri iki gihe ahatanye mu bihembo Rwanda International Movie Awards

Umuhanzi Jules Sentore uherutse mu bitaramo mu Burayi yashyigikiye Itorero Inyamibwa

Munyakazi Sadate wayoboye ikipe ya Rayon Sports ni umwe mu bitabiriye iki gitaramo “Urwejeje Imana” cy’Itorero Inyamibwa

Abakobwa b’Inyamibwa bishimiwe bikomeye muri iki gitaramo binyuze mu mbyino

Kamikazi Queen Loxanne witabiriye Miss Rwanda ya 2022 imbere y’abitabiriye ‘Urwejeje Imana’

Abasore b’Inyamibwa bifashishije indirimbo zirata Intwari z’u Rwanda, banyuze benshi

Minisitiri w’Ubucuruzi n’Inganda, Prof Ngabitsinze Jean Chrysostome mu bihumbi by'abantu bitabiriye igitaramo 'Urwejeje Imana' cy'Itorero Inyamibwa 

Angel na Pamella bazwi mu ndirimbo zirimo nka ‘Gwera’, ‘Rusengo’ n’izindi bitabiriye iki gitaramo

Hacanwe urumuri mu kwizihiza isabukuru y’imyaka 25 y’Inyamibwa

Inyamibwa bateye barikirizwa…… Mu mashyi no mu mudiho

Muri iki gitaramo bashimiye kandi barata Intwari z'u Rwanda, zasubije agaciro umunyarwanda

Hashimwe Polisi y'u Rwanda ku bw'umutekano watumye ibitaramo by'umuco n'ibindi bikorwa mu Rwanda bikomeza kuba

Itorero Inyamibwa ryatanze ibyishimo bisendereye mu gitaramo bizihirijemo isabukuru y'imyaka 25 bamaze 

Mukiza Eric wari umushyushyarugamba muri iki gitaramo cyubakiye ku muco

Inyamibwa batangiye urugendo rwo guteza imbere umuco w'u Rwanda, bahereye ku gukina ikinamico bagenda baguka, banataramira mu bihugu bitandukanye

Umuratwa Kate Anitha wambitswe ikamba rya Miss Supranational Rwanda 2021, ni we waririmbishije aha hantu binyuze muri sosiyete yashinze yashinze yise ‘Nitha Impressions’

Abakaraza b’itsinda ry’abana bo ku Nyundo ryafashishije benshi gususuruka binyuze mu murishyo w’ingoma

Abasore n’inkumi bari biteguye uyu munsi mu buryo budasanzwe!

Mbere yo kwinjira muri iki gitaramo, wabanzaga kwerekana ko waguze itike ikwemerera kwinjira

Kamikazi Queen Roxanne witabiriye Miss Rwanda 2022 ni umwe mu babyinnyi bagize Itorero Inyamibwa

Keza Melissa uri mu bakobwa bavuyemo Miss Rwanda 2022

Mu muhanda wo kuri Kigali Serena Hotel werekeza Camp Kigali aho iki gitaramo cyabereye

Aba babyinnyi bahagurukiye kuri Spor View Hotel Kicukiro berekeza Camp Kigali

Mu gitaramo nk’iki cy’imbonekarimwe ugerageza gufata amafoto cyangwa se amashusho bisiga urwibutso rudasa

Umuyobozi wa Uno Fashion, Kwizera Danny [Uri iburyo] ubwo yari ageze ahabereye iki gitaramo

INYAMIBWA BANDITSE AMATEKA AVUGURUYE MU GITARAMO CYABO NYUMA Y’IMYAKA INE

“>

INYAMIBWA NKURU ZASANGANIYE BAGENZI BABO MURI IKI GITARAMO BANYURA BENSHI

“>

RYARI IJORO RYA GAKONDO MURI IKI GITARAMO CYO KWIZIHIZA ISABUKURU Y’IMYAKA 25

“>

MBERE Y’IGITARAMO, ABAGIZE INYAMIBWA BAKOZE AKARASISI MU BYISHIMO

“>

Kanda hano urebe amafoto menshi yaranze iki gitaramo ‘Urwejeje Imana’

AMAFOTO: Sangwa Julien&Nathanael Ndayishimiye-INYARWANDA.COM

VIDEO: Rwigema Freddy&Nyetera Bachir-INYARWANDA.COM

Kuri iki Cyumweru ku kibuga cyo mu Nzove, habereye umukino wa gicuti wahuje ikipe ya Staff ya Rayon Sports yari yakiriye ikipe y’itangazamakuru rya sipiro ya AJSPOR FC. Uyu mukino wari ugamije gutsura umubano ku mpande zombi, warangiye AJSPOR FC itsinze Staff ya Rayon Sports ibitego 2-0, byose byabonetse mu gice cya kabiri. 

Butoyi na Fidele nibo bari ba kapiteni ku mpande zombi 

Uyu mukino wari witabiriwe n’abafana batari bake, watangiye ku isaha ya saa 16:00 aho waranzwe n’abakinnyi basanzwe bazwi mu buzima busanzwe nka Uwayezu Jean Fidele usanzwe ari Perezida wa Rayon Sports wari Kapiteni wa Staff ya Rayon Sports kuri uyu munsi, na Butoyi Jean wari Kapiteni w’ikipe y’itangazamakuru usanzwe ari na Perezida wayo.

Uko umukino wagenze

Umukino watangijwe n’ikipe ya staff ya Rayon Sports, nk’ikipe yari mu rugo ndetse ishyigikiwe. Ku munota wa 5 ikipe y’abanyamakuru yahushije igitego ku mupira watewe na Akira, ariko unyura hejuru y’izamu gato. Ku munota wa 7 ikipe y’abanyamakuru yongeye ibona amahirwe y’igitego ku mupira wazamukanwe na Rusine ariko umupira umubana muremure, umunyezamo wa Rayon Sports arawumutanga.

Abakinnyi 11 AJSPOR FC yabanje mu kibuga

22. Moussa (GK)

4. Hitimana J Claude

5. Kagame Patrick

3. Byiringiro Isaac 

12. Ndacyayisaba Hubert 

15. Benjamin Akila

9. Sammy Manishimwe 

17. Seminega Franck

16. Rusine Didier 

6. Ushindi David 

8. Butoyi Jean (CP)

Staff ya Rayon Sports yakomeje kuganzwa n’ikipe y’abanyamakuru ndetse yageze imbere y’izamu inshuro zigera 4 mu minota 20 ya mbere, mu gihe Rayon Sports yari imaze kugera imbere y’izamu inshuro imwe. Ku munota wa 20, ikipe y’abanyamakuru yabonye uburyo bw’igitego cyatsinzwe na Claude Hitimana, ariko umusifuzi avuga ko umupira yawukozeho yaraririye. Ku munota wa 25, Staff ya Rayon Sports yakoze impinduka Kapiteni w’ikipe Uwayezu Jean Fidele ava mu kibuga asimburwa na Nshimiyimana Emmanuel.

Uwayezu Jean Fidele usanzwe ari umuyobozi wa Rayon Sports ndetse akaba yari kapiteni kuri uyu munsi, yakinnye iminota 25 y’igice cya mbere atanga umwanya

Abakinnyi 11 Staff ya Rayon Sports yabanje mu kibuga

Nzeyimana Ramadan 

Uwayezu Jean fidele 

Niyonkuru Vladmir 

Rwaka Claude 

Nshimiyimana j Claude 

Nkubana Admen

Kayisire Jacques

Nonde Mohamed

Namenye Patrick 

Ngoga Roger 

Mujyanama Fidele

Ikipe y’abanyamakuru ya AJSPOR FC nayo yakoze impinduka, Butoyi Jean asohoka mu kibuga hinjira Joshua. Ku munota wa 37 Kayisire Jacques wari wagoye ikipe y’abanyamakuru yarekuye ishoti rikomeye ari mu kibuga hagati, umupira uca ku ruhande rw’izamu gato. Umukino kuva ku munota wa 30, amakipe yatangiye gukinana ishyaka riri hejuru, ndetse hatangira kuzamo no kuvunana kugeretseho n’amakarita.

Butoyi wari kapiteni wa AJSPOR FC yakinnye iminota 25 atanga umwanya

Ku munota wa 40 Ikipe y’abanyamakuru yaje gukora impinduka, Mucyo Antha yinjira mu kibuga asimbura Ushindi David. Izindi mpinduka Rayon Sports yakoze, nimero 7 Ngoga Roger yasimbuwe na Nizeyimana Shaffy, naho Nkubana Adrien asimburwa na Mugisha Jean de Dieu. Igice cya mbere cyarangiye amakipe yombi anganya igitego ubusa ku busa, gusa imbaraga zari nyinshi uko umukino wiyongeraga.

Niyonkuru Vladmir usanzwe ari umutoza w’abanyezamu ba Rayon Sports, yagize igice cya mbere kiza aho yakinaga inyuma ku ruhande rw’ibumoso, akaba umukino watangiye afashe Kapiteni wa AJSPOR FC Butoyi Jean ndetse aza kuvamo asimburwa na Joshua nawe usanzwe ari umukinnyi ukomeye wa AJSPOR FC ariko bose yabafashe neza cyane. 

Niyonkuru Vladmir wari wagoye abanyamakuru cyane, yagize igice cya mbere kiza

Vladmir arimo akuraho umupira aciye ku butaka, ndetse akaba yagaragaje ubuhanga bukomeye mu kibuga n’ubwo abantu bari bamumenyereye mu izamu 

Igice cya kabiri ikipe y’abanyamakuru yatangiye yataka izamu rya Staff ya Rayon Sports, nk'uko yari yabitangiye mu gice cya mbere. Ku munota wa 50, Hitimana nanone yahushije igitego ku mupira wari uturutse muri Koroneri, ateretseho umutwe umupira ujya hanze gato. 

Ku munota wa 56 Rayon Sports yakoze izindi mpinduka, Kayisire Jacques yaje kuva mu kibuga byatumye staff ya Rayon Sports ihita igira ikibazo mu kibuga hagati. Ku munota wa 66 ikipe y’abanyamakuru ya AJSPOR FC yaje gutsinda igitego cya mbere ku ishoti rikomeye ryatewe na Josya wagiye mu kibuga asimbuye, umunyezamu wa Rayon Sports ayoberwa aho umupira unyuze.

Kayisire usanzwe ari perezida wungirije wa Rayon Sports yakinaga mu kibuga hagati, ndetse akaba yari yagoye abakinnyi ba AJSPOR FC. Gusa yaje kunanirwa bamusimbuje, bituma ikipe isubira inyuma

Ku munota wa 72, ikipe y’itangazamakuru yabonye igitego cya kabiri cyatsinzwe na Rusine Didier wari wagoye ba myugariro ba Staff ya Rayon Sports. Kuva Mucyo Antha yagera mu kibuga ndetse na Sadi Habimana, ikipe y’abanyamakuru yatangiye kurusha hagati ikipe ya Rayon Sports yari yakuyemo Kayisire ndetse byanavuyemo itsindwa rya Staff ya Rayon Sports.

Imbaraga zabanye nke ikipe ya Staff ya Rayon Sports, ndetse abakinnyi kugera imbere y’izamu rya AJSPOR FC bibabana inkuru. Staff ya Rayon Sports nayo yakoze impinduka Muhayimana ukuriye abafana ba Rayon Sports yinjira mu kibuga, ndetse na Nkurunziza Jean Paul nawe ahabwa umwanya.

Antha nyuma yo kwinjira mu kibuga, yahinduye umukino ndetse AJSPOR FC itangira gukina yihuta 

Ku ruhande rwa AJSPOR FC, Jado Max yinjiye mu kibuga ari kumwe na Kigeli Patrick. Ikipe y’abanyamakuru yakomeje gusatira cyane staff ya Rayon Sports ndetse ihusha ibitego bitandukanye, iminota 90 y’umukino irangira ikipe y’itangazamakuru itsinze Staff ya Rayon Sports ibitego 2-0 byabonetse mu gice cya kabiri.

Jado Max arimo kwishyushya yitegura gusimbura. Max asanzwe akina nka nimero 9 ushaka ibitego, arimo amaze iminsi atareba mu izamu 

Abafana bari bagerageje kuza bigendanye n’ingano ya sitade 

Kamoso ukina gatatu ya AJSPOR FC arimo agenzura umupira 

Jado Max yinjiye mu kibuga ku mbaraga nyinshi cyane aje gufasha ikipe y’abanyamakuru kutishyurwa ibitego, aho yanyuzagamo akanatindana umupira 

Muhawenimana Claude ukuriye abafana ba Rayon Sports, yabanje ku ntebe y’abasimbura 

Mucyo Antha ubanza ibumoso, Sadi Habimana, na Jado Max babanje ku ntebe 

Ngoga Roger ku mbaraga z’umubiri yatunguye benshi mu kibuga

Desile Hatungimana umutoza w’ikipe y’abanyamakuru, arimo asoma umukino 

Sembagare wakiniye Rayon Sports niwe wari umutoza mukuru wa Staff ya Rayon Sports

Rusine Didier watsinze igitego cya kabiri cya AJSPOR FC, arimo abwira umusifuzi ko atarimo kubabanira 

Bigirimana Guss usanzwe ari umutoza wungirije wa AJSPOR FC akazi kamwakanye yitabaza amazi 

Ingeri zose z’abafana zari zabukereye zaje kwihera ijisho uko umukino uhagaze 

Keza Cedrick usanzwe usanzwe akorera Radio 10, niwe watowe nk’umufana mukuru wa AJSPOR FC, gusa yafanaga anogeza uyu mupira live 

Keza Cedrick yafanaga agasomeza n’akazi ko kogeza umupira w’abanyamakuru na staff ya Rayon Sports 

Perezida Fidele asohotse mu kibuga yagiye kwiyicarira ku ntebe y’abasimbura 

Abanyamakuru batakinnye bari babucyereye bari gufana cyane 

Intero yari imwe mu bafana n’ikipe y’itangazamakuru 

Nkusi Denis usanzwe ari Team Manager wa AJSPOR FC, ni umwe mu bamaze igihe mu mwuga w’itangazamakuru

Mihigo Saddam ushinzwe itangazamakuru muri AJSPOR FC yahoze ari umukinnyi wayo, ariko aza kugira ikibazo cy’imvune yatumye amara umwaka hanze y’ikibuga 

Namenye Patrick usanzwe ari SG wa Rayon Sports, abafana bari ku kibuga bavugaga ko umupira we udakaze cyane 

Burya ngo intambara ni nk’indi, umukino waje kuzamo imvururu ariko umusifuzi ahita azihosha 

Nkurunziza Jean Paul wagiye gukina bitavugwaho rumwe aha yarimo yishyushya yitegura kujya mu kibuga 

Rwaka Claude yagaragaje urwego rwo hejuru rwo kurinda izamu 

Rwaka usanzwe ari umutoza wungirije muri Rayon Sports, hano yari afashe umwanzuro wo gutereka hasi Ndacyayisaba Hubert ariko abanje umupira 

Rwaka washoje umukino ari kapiteni wa staff ya Rayon Sports, aha yari amaze kugeza ku butaka Ndacyayisenga 

Kigeli Patrick ukorera B+ TV, arimo atanga ibitekezo by’uko abona umukino uri kugenda

Djamila yinjiye mu kibuga asimbuye, agaragaza ubuhanga bukomeye cyane ku mupira w’amaguru akaba n’umwe mu bagore bagize uruhare rukomeye muri uyu mukino 

Abafana baturutse mu bice bitandukanye by’Isi, bari bitabiriye uyu mukino 

Moussa Camara ari mu bakinnyi ba Rayon Sports barebye uyu mukino 

Moussa umunyezamu wa AJSPOR FC, yagoye ba rutahizamu ba staff Rayon Sports 

Uwimana Jeanine wari Team Manager wa staff ya Rayon Sports, asanzwe ari SG wa Rayon Sports y’abagore 

Kagabo Canisius usanzwe ukorera Isimbi.com, arimo kwigana uko abasifuzi bandika nimero z’abakinnyi bagiye kujya mu kibuga n’abagiye kuvamo 

Umukino warangiye AJSPOR FC ibonye amanota 3 ya mbere nyuma y’imikino 3 idatsinda

Umutoza w’ikipe y’igihugu Amavubi, Carlos Alós Ferrer nyuma yo gutsindwa na Ethiopia yavuze ko ntawakwishima kubera ko yatsinzwe ariko ko na none ngo icyo yashakaga yakibonye.

Ejo hashize ku Cyumweru tariki ya 19 Werurwe 2023, Amavubi yakinaga na Ethiopia muri Ethiopia mu kwitegura umukino wa Benin mu gushaka itike y’igikombe cy’Afurika cya 2023 kizabera muri Côte d’Ivoire.

Umukino warangiye Ethiopia itsinze Amavubi igitego kimwe ku busa cyobonetse mu minota ya nyuma y’umukino.

Umutoza Carlos yavuze ko atakwishimira gutsindwa ariko na none icyo yashakaga yakibonye.

Ati “Ntabwo wakwishima, muri ruhago watsinzwe ntabwo wakwishima, ntabwo navuga ko nishimye ariko icyo nashakaga nakibonye.”

Yakomeje avuga ko wari umukino wo kugerageza abakinnyi mbere y’umukino wa Benin gusa ngo mu gice cya mbere bakinnye neza ariko mu gice cya kabiri ntabwo yanyuzwe.

Ati “Nashakaga kugerageza abakinnyi, twakoze impinduka abakinnyi bose, twakoze impinduka 11, twafashe umwanzuro, kuri njye ibyabaye mu gice cya mbere n’icya kabiri biratandukanye.”

“Igice cya mbere nishimiye uko bitwaye igice cya kabiri byari bitandukanye kuko habayemo impinduka nyinshi, ariko muri rusange twabonye umusaruro mwiza n’umubi nko kuba twatsinzwe.”

Nyuma yo gukina na Ethiopia, uyu munsi Amavubi arahuguruka muri Ethiopia yerekeza muri Benin aho bazakina n’iki gihugu ku wa Gatatu tariki ya 22 Werurwe 2023.

Chiffa Marty wari umukunzi w’umuhanzi Yvan Buravan uheruka kwitaba Imana, yavuze ko azasubira mu rukundo ari uko Buravan amwoherereje uwo bazakundana.

Tariki ya 17 Kanama 2022 ni bwo icuraburundi ryatashye mu muryango mugari w’imyidagaduro mu Rwanda kuko ni bwo umuhanzi Yvan Buravan yitabye Imana azize uburwayi bw’umwijima.

Mu gihe hashize amezi 7 yitabye Imana, Chiffa Marty wari umukunzi we ubwo yari yatanze umwanya ngo bumaze, yabajijwe niba azongera gukunda.

Yasubije ko azasubira mu rukundo kuko Yvan Buravan azamwoherereza uwo bakundana.

Ati “Yego, Van azamunyoherereza.” Van ni izina yitaga umukunzi we Yvan Buravan.

Mu minsi ishize yavuze ko ububabare bwo kumubura nta kintu yabigereranya na cyo.

Ati 'Ububabare bwo kukubura ntabwo bugereranywa. Nzi ko inyenyeri irabagirana cyane mu gicu ari wowe.'

Chiffa Marty akaba yarasibye amafoto yose yari ku rukuta rwe rwa Instagram aho yasigajeho ifoto imwe ya Yvan Buravan.

Urukundo rwa Yvan Buravan na Chaffi Marty ntabwo rwigeze rumenyekana cyane mu itangazamakuru aho bari barahisemo kurugira ibanga rikomeye.

Abakunzi b’ikiganiro cy’imikino Urukiko rw’Ubujurire gitambuka kuri Fine FM, basuye abarwayi batishoboye bari mu bitaro bya Masaka.

Ni igikorwa cyabaye ku munsi w’ejo hashize ku Cyumweru tariki ya 19 Werurwe 2023.

Ni igikorwa cyateguwe n’itsinda ry’abakunzi b’iki kiganiro riyobowe na Ntakirutimana Blandine ku bufatanye n’iyi radio by’umwihariko abanyamakuru bakora muri iki kiganiro.

Iki gikorwa cyo gusura abarwayi bari mu bitaro bya Masaka ntabwo bagiye imbokoboko gusa ahubwo bari bitwaje ibyo gufasha aba barwayi birimo amata, ibikoresho by’isuku bitandukanye bifasha aba barwayi batishoboye.

Dukuzimana Jean de Dieu [Jado Dukuze], ni we munyamakuru wari waje ahagarariye bagenzi be ari we wari uyoboye iki gikorwa yavuze ko iki gikorwa kitarangiriye Masaka kuko abakunzi b’iki kiganiro bazakomeza gukora ibikorwa byo gufasha abababaye.

Ati “Ni igikorwa cyiza bakoze kandi ni igikorwa kitarangiriye aha kuko hari n’ibindi bikorwa by’urukundo bizakomeza kuranga abakunzi b’Urukiko rw’Ubujurire mu rwego rwo gukomeza kuba hafi no gufasha abababaye.”

Ikiganiro Urukiko rw’Ubujurire gitambuka kuri Fine FM kuva ku wa Mbere kugeza ku wa Gatanu saa 10h-13h, ni ikiganiro gikunzwe na benshi. Gikorwa n’abanyamakuru Sam Karenzi akaba umuyobozi w’iyi radio, Jado Dukuze, Niyibizi Aime na Muramira François Regis.

Mu 2021 nibwo u Rwanda n'u Bushinwa byizihije imyaka 50 ishize ibihugu byombi byinjiye mu mubano ushingiye ku bufatanye, ubwubahane no gushyigikirana, washibutsemo iterambere ku babituye.

Mbere ya COVID-19 yagaragaye mu Bushinwa mu mpera za 2019, abanyeshuri b'Abanyarwanda bagera ku 1600 bigaga muri iki gihugu. Kuva mu 1976, u Bushinwa bwatangaga buruse ku Banyarwanda, ndetse mu myaka ishize, abagera ku 100 babyungukiyemo.

Mu buzima, nibura kuva mu 1982, u Bushinwa bwohereje mu Rwanda abaganga 258 bahageze mu matsinda 21, bavura abaturage 700.000 barimo 37.500 babazwe.

Iki gihugu kandi kirateganya kuvugurura Ibitaro bya Masaka cyagize uruhare mu kubaka, ndetse n'ibya Kibungo byaguwe ku nkunga y'u Bushinwa mu 1992.

Mu kiganiro na IGIHE, Ambasaderi w'u Rwanda mu Bushinwa, James Kimonyo yagarutse ku bikorwa bikomeje kuranga umubano w'ibihugu byombi ndetse n'icyerekezo cyawo.

Ni ikiganiro kibaye mu gihe hashize iminsi mike Perezida Xi Jinping atsindiye manda ya gatatu ndetse hashyizweho Guverinoma nshya irangajwe imbere na Minisitiri w'Intebe, Li Qiang.

IGIHE: Hashize iminsi Perezida Xi Jinping atorewe manda ya gatatu. Intsinzi ye u Rwanda rwayakiriye gute?

Ambasaderi Kimonyo: Twe gahunda tugenderaho iwacu ni uko abaturage bafite uburenganzira bwo guhitamo uwo bashaka kandi kuba Abashinwa baratoye perezida wabo mu buryo bumvikanyeho ni uburenganzira bwabo kandi bibafitiye akamaro.

Uko ubuyobozi bwa hano busimburana, bwose bwerekana ibyo bwamaze kugeza ku gihugu cyabo. Kuba Xi Jiping yaratowe ntekereza ko ari byiza ku Bushinwa kuko hazakomerezwa ku byari bimaze kugerwaho.

Abashinwa babyitwayemo neza, batora neza kandi benshi bashingiye ku gushikama no gukomereza ku bo igihugu cyabo cyagezeho. U Bushimwa ni kimwe n'u Rwanda bose bibanda ku bumwe bw'abaturage kandi ubona ko ari ikintu gikora neza.

Kuba baramutoye ni ukubera icyizere bamufitiye ndetse banafitiye CCP nk'ishyaka kubera ko buri mwaka cyangwa itanu irangiye berekana icyo bakoze.

U Bushinwa buheruka gushyiraho Guverinoma nshya, ese isanze umubano w'u Rwanda n'u Bushinwa uhagaze gute?

Umubano w'u Rwanda n'u Bushinwa uhagaze neza cyane mu buryo bwose bw'imikoranire, ubufatanye hagati y'ibihugu byacu mu nzego zitandukanye. Mu 2021 twizihizaga imyaka 50 u Rwanda n'u Bushinwa bitangije umubano mu bya dipolomasi kuva mu 1971.

Ubu imaze kuba 52, iyo urebye ibyabaye cyane cyane nyuma ya Jenoside yakorewe Abatutsi mu 1994 nibwo ubona koko harabayeho ubufatanye bukomeye hagati ya CCP na RPF.

Navuga ko umubano ugaragazwa n'ibintu byinshi; nko mu migenderanire Perezida Xi Jinping yasuye u Rwanda mu 2018, na Perezida wacu aza hano, abayobozi bakuru ku rwego rwa za minisiteri baje mu Rwanda nubwo Covid-19 yivanze. Ibyo bigaragaza umubano mwiza dufitanye.

Ikindi ni uburyo dushyigikirana ku rwego mpuzamahanga ku bibazo bitandukanye haba mu mu Muryango w'Abibumbye n'ahandi, bigaragaza ko umubano dufitanye ari mwiza. Navuga ko tubanye neza n'u Bushinwa.

Uyu munsi mu bijyanye n'ubutwererane ni izihe nzego u Rwanda rufatanyamo n'u Bushinwa cyane?

U Bushinwa bufatanya n'u Rwanda mu nzego zitandukanye bitewe n'aho u Bushinwa bufite imbaraga cyane. Birumvikana bufite imbaraga mu bintu byinshi ariko urebye cyane nk'ibijyanye n'ibikorwaremezo, imihanda, ingomero z'amashanyarazi, ni ukuvuga ngo Minisiteri y'Ibikorwaremezo n'ibigo byayo bikorana n'ibyo mu Bushinwa, birimo n'ibyubaka imihanda.

Twavuga nk'imihanda yo mu Mujyi wa Kigali mwabonye, uwa Huye, uriya wa Prince House ugiye kubakwa, uwa Bugesera, Urugomero rwa Nyabarongo II n'ibindi byinshi. Usanga ubufatanye mu rwego rw'ibikorwaremezo rukomeye.

Ahandi ni mu burezi , uretse kohereza Abanyarwanda baza kwiga mu Bushinwa hari n'ibindi dukorana.

Nk'urugero hari nka sosiyete yabo ya Huawei ikorana na Minisiteri y'Uburezi ndetse n'iy'ikoranabuhanga kugira ngo begereze internet yihuse ku mashuri agera ku 1500 kugira ngo bazajye biga hifashishijwe ikoranabuhanga.

Mu buzima ho ubufatanye bumaze igihe kirekire kuko u Bushinwa bwohereza abaganga buri gihe kugira ngo bafashe inzego z'ubuzima cyane ko ari abanganga bafite ubuhanga buhanitse.

Bubatse ibitaro bya Kibungo ndetse boherezayo n'abaganga buri gihe. Ubu barimo bagura ibitaro bya Masaka bigiye kuba ibitaro bikuru mu gihugu, no mu bihe bya Covid-19 mwabonye ko bari mu bambere badutabaye bohereza ibikoresho.

Hari n'urwego ruri gukura rujyanye n'ubucuruzi bukorerwa kuri internet (e-commerce) u Bushinwa bufatanya na Minisiteri y'Ubucuruzi n'Urwego rw'Igihugu rw'Iterambere, RDB ku buryo turi kuzamuka.

Musanga Abanyarwanda babyaza umusaruro amahirwe yo kuba bafite isoko rinini nk'u Bushinwa?

Ibisohoka mu Bushinwa biracyari byinshi kurusha ibyo twe twinjizayo ariko turi gukora ibishiboka kugira ngo tuzamure natwe ibisohoka mu gihugu cyacu kugira ngo tuzamure ibyo ducururiza ku isoko ry'u Bushinwa.

Ayo ni amahirwe kuba dufite isoko ringana rityo kandi ritworohereza cyane. Niba mwarabikurikiye muri Nzeri 2022 u Rwanda rwatangajwe nka kimwe mu bihugu bya mbere byavaniweho amahooro yose ku bicuruzwa ruzana mu Bushinwa.

Bikajyana no kuba baratwemereye ko tuzana igihingwa cya stevia ariko ntiturakibona ku buryo buhagije. Urumva ko hari uburyo bwo korohereza ibihugu bitandukanye birimo n'u Rwanda ku bijyanye no kuba byazana ibicuruzwa bitandukanye.

Noneho ubwo bafunguye ku mugaragaro n'ibikorerwa mu Rwanda byose bishobora kuzanwa kandi abantu ba hano baragura.

Ubundi umuntu iyo afite ibyo acuruza abyuka yibaza ngo arabicuruza he? Kuba ufite isoko ukabura ibyo ucuruza ni ikibazo. Niyo mpamvu ubona na leta yacu ishyira imbaraga nyinshi nko mu buhinzi bigamije kongera umusaruro.

Niba umuntu abona toni ebyiri kuri hegitari yakagombye kubona eshanu urumva icyo cyuho kiracyari ikibazo. Niyo mpamvu mvuga ko isoko rirahari ariko ntituribyaza umusaruro uko bisabwa.

Dukeneye gukora tukazamura umusaruro ku buryo buhagije.

Nko muri Kamena 2023 hari imurikagurisha rigenewe Abanyafurika gusa ndetse no mu Rwanda baduhaye umwanya mwiza kubera ko dukorana nabo neza ku buryo dushobora kuzana ibigo nka 12 bishobora kuza kugaragaza ibyo bikora.

Mu Ugushyingo 2023 na none hari irindi murikagurisha rizabera i Shanghai ryo rizaba ari rinini kurusha.

Iyo ufite ingano ihagije y'ibyo ucururuza banatumiza ibindi bikaboneka biba ari byiza. Isoko rirahari igikenewe ni uko dukora kugira ngo twongere umusaruro tuzana hano mu Bushinwa.

Tuvuze ku burezi, uyu munsi Abanyarwanda baza kwiga hano bangana bate? Iyo basubiye mu gihugu ni uwuhe musaruro batanga?

Kuri ubu 99% by'Abanyarwanda baba hano ni abanyeshuri. Bari mu byiciro bitandukanye, haba abari gushaka impamyabumenyi y'ikirenga, PHD, iy'icyiciro cya gatatu , Master's ndetse n'abo mu cyiciro cya kabiri cya kaminuza.

Abanyarwanda bize hano iyo batashye mu Rwanda batanga umusaruro. Abashinwa bigisha neza bikiyongera ku kintu baha aba bana cyo gu cyane.

Mbere y'uko Covid-19 iza imibare yabo yahoraga irenga 2000. Twashakaga kongera, iyo ndwara irabihagarika ku buryo hari n'abatarashoboye kuza dusigarana nk'igihumbi.

Turifuza kubongera kuko hari za buruse zitangwa ndetse hari n'abiyishyurira kuko hano amafaranga aba ari make kandi bagatanga uburezi bufite ireme.

Hari n'abakorera mu mijyi ya Guangzhou, Beijing na za Shanghai. Abenshi ni abanyeshuri ariko icyo nabonye cyane ni uko aba bakorera impamyabumenyi z'ikirenga iyo bakora ubushakashatsi baba bibanda ku byagirira u Rwanda akamaro cyane nko mu ikoranabuhanga.

Twifuza kubahuza n'ibigo byakorana nabo kuri ubwo bushakashatsi. Nk'uko wabibonye ejo bundi aha muri Hangzhou hari abatweretse ibijyanye n'ikoranabuhanga.

Ejo bundi Minisitiri w'Intebe w'u Bushinwa mushya yavuze ko hari gahunda yo korohereza cyangwa gusonera inguzanyo ibihugu bya Afurika bifitiye iki gihugu. Ese hari ibiganiro nk'ibyo u Rwanda rwagiranye n'u Bushinwa? Ese u Rwanda rubufitiye inguzanyo ingana gute?

Mu Ugushyingo kwa 2021 mu nama yabereye i Dakar u Rwanda narwo rwari rwitabiriye, mu byo Perezida Xi Jinping yatangaje harimo no gusonera ibihugu biri mu nzira y'amajyambere ibyo bita 'interest free loans'.

U Rwanda narwo ruri ku rutonde. Inguzanyo zigomba gusonerwa ziri mu ngeri zitandukanye ariko zikaba zaratangiye kwishyurwa. Ubu tumenye izatangiye kwishyurwa twabona umubare w'izizasonerwa.

Ariko byaratangiye, Minisiteri y'Imari n'Igenamigambi yatangiye gukorana n'inzego z'ubuyobozi hano mu Bushinwa, basuzuma umwenda ku wundi kugira ngo tube twakungukira muri iyo gahunda.

U Rwanda rutekereza iki ku bavuga ko inguzanyo u Bushinwa buha Afurika ari umutego

Iyo mbona abantu bavuga ngo u Bushinwa bushaka gushyira Afurika mu mutego w'amadeni mbona ari ibintu bidafite aho bihuriye n'ukuri.

Twe impamvu dukomeza kwegera u Bushinwa ni uko inguzanyo zabwo ziba zifite inyungu nke ndetse tuba twabiganiriyeho. Ikindi Abashinwa nta muntu bategeka umushinga ahubwo baraza bakabubwira bo mwakorana bakakubaza icyo ushyize imbere haba mu burezi, ubuzima n'ibindi.

Iyo ubagaragairije umushinga ufite nta kindi bongeraho ahubwo muraganira mugafata umwanzuro bishingiye ku byo mwebwe muharanira.

Urebye kandi ibyatangajwe mu 2021 ubona ko biotanga icyizere. Icya mbere ni uko Perezida Xi Jinping yagaragaje ko igihugu cye gishaka gufasha Afurika kongera ibyo byohereza mu Bushinwa bikagera kuri miliyari 300.

Njya numva byasakuje hirya no hino ngo inguzanyo u Bushinwa buha Afurika n'umutego ariko twe turiyizi tuzi ubukungu bwacu, tuzi n'uburyo tugurizwa. Kuko nk'umuntu uwo ari we wese kujya gufata umwenda ukurusha imbaraga ushobora kugutera ibibazo.

Twe amafaranga tugurizwa ava mu Bushinwa n'ahandi aba agiye mu mishinga iri buzamure ubukungu ku buryo n'umuntu aba ashobora kwishura. Urebye ku rutonde rw'abaguriza u Rwanda, u Bushinwa nta n'ubwo bugeza 9%.

Guverinoma nshya y'u Bushinwa muyitezeho iki ?

Icyiza cya hano ni uko habaho uburyo bwo gukomereza ku byakozwe. Perezida atowe kuri manda ya gatatu n'ubwo yashyizemo abandi bayobozi bashya, uko inzego zubatse nta byinshi bizahinduka.

Ahubwo ni ahacu kwagura ibikorwa nka bimwe nababwiye haba ari ibikorwaremezo, kongera ibyo twohereza ku isoko rya hano, guteza imbere ikoranabuhanga. Turajwe ishinga no gushaka abafatanyabikorwa mu bigo bitandukanye.

Ikindi turashaka gukorana n'u Bushinwa ku buvuzi bwifashishijwe iya kure (télémédecine), ubu hari n'ibitaro twatangiye gukorana aho tuzabihuza n'Ibitaro bya Kaminuza bya Kigali, CHUK kugira ngo babe bagira ibyemezo bafata ku murwayi bafatanyije.

Ubu turabegera bakadufasha mu bijyanye n'ubuhinzi cyane mu kongera ikoranabuhanga muri urwo rwego haba mu kuhira n'ibindi kugira ngo hongerwe umusaruro uhagije.

Ibyo bikajyana no kuduha za nguzanyo umuntu yishyurwa ku nyungu nke kuko uyiguha aba afite ubushake bwo gufasha. Hari imishinga itandukanye twabagejejeho ndetse duteganya gukomezanya nabo.

---