Category: Uncategorized

Ikigo cy'Igihugu cy'Ubuzima, RBC, kuri uyu wa Kane , tariki ya 23 Werurwe 2023,cyatangaje ko u Rwanda rwafashe ingamba zigamije gukumira icyorezo cya Marburg ku mipaka aho abinjira mu gihugu bava muri Tanzania aho iki cyorezo cyiri, babanza gupimwa umuriro.

Mu itangazo,RBC, yavuze ko ' Minisiteri y'ubuzima, yasabye abanyarwanda gukaraba kenshi n'amazi n'isabune cyangwa umuti wabugenewe, kwirinda gukora ingendo zitari ngombwa ahari iki cyorezo, umuntu wese ufite ibimenyetso by'iki cyorezo agomba kwihutira kujya kwivuriza ku ivuriro rimwegereye, gutanga amakuru y'ahantu hari umuntu waturutse ahagaragaye iki cyorezo, akagaragaza ibimenyetso bya Marburg.'

RBC ivuga ko uwafashwe n'iki cyorezo agaragaza ibimenyetso birimo umuriro mwinshi, kurwara umutwe, kuribwa imikaya, gucika intege, kuruka cyane kandi kenshi, kuribwa mu nda, no kuva amaraso ahantu hose hari umwenge ku mubiri .Ibi bimenyetso bikagaragara hagati y'iminsi 2 na 21.

Ikigo cy'Igihugu cy'Ubuzima kivuga ko indwara ya Marburg yandurira mu matembabuzi nk'amacandwe, amaraso, ibirutsi n'amarira by'uyirwaye.

Uyirwaye ashobora kandi kwanduzwa no gukora ku nyamaswa zayirwaye cyangwa zapfuye ziyirwaye cyane cyane mu ducurama,inkende, n'iz'indi.

Umuntu ashobora kwandura mu gihe cyo gushyingura, mu gihe umuntu yakoze ku murambo ku wishwe nayo. Icyakora iyi ndwara ntabwo yandurira mu mwuka.

Iki cyorezo guheruka guhitana abantu batanu muri Tanzania ndetse abasaga 190 bashyizwe mu kato

Source : https://umuryango.rw/amakuru/mu-rwanda/ubuzima/article/u-rwanda-rwatangiye-ingamba-zo-gukumira-icyorezo-cya-marburg-cyabonetse

Imvura ivanze n'urubura rwinshi yaguye mu Karere ka Musanze mu ijoro ryo ku wa Gatatu tariki 22 Werurwe 2023, yangije inzu 228 n'ibikoni 80 n'imyaka yari ihinze mu mirima y'abaturage nk'uko ubuyobozi bubitangaza.

Bamwe mu bahinzi bo mu Mirenge ya Kinigi na Musanze mu Karere ka Musanze, baravuga ko baguye mu gihombo gikomeye bitewe n'urubura rwangije ibirayi byari mu mirima, ku buryo ntacyo bazasarura.

Iyi mvura yaguye mu Mirenge ya Nyange, Cyuve, Musanze, Kinigi na Kimonyi.

Akarere ka Musanze kavuga ko mu Murenge wa Nyange habarurwa inzu 197 amabati yatobotse kubera urubura, Kinigi ni 21 n'ibikoni 80, bangiritse amabati kubera urubura, Cyuve inzu ebyri(2) zangiritse ibisenge, Musanze amazu 8 yangijwe Icyakora Kimonyi ho ntabyabaruwe byangijwe nayo.

Muri aka Karere kandi imvura yangije ibisenge by' ibyumba by'ishuri bigera kuri bitandatu (6), na hegitare zigera 16,7 z'imyaka y'abaturage.

Ibikorwaremezo birimo umuhanda uva kuri Kaminuza ya INES Ruhengeri ujya mu Kinigi wangiritse.

Bamwe mu bahinzi bo muri iyi mirenge babwiye Flash FM& TV ko usibye kuba uru rubura rwangije byinshi ari ubwa mbere babonye urubura rungana gutya rugwa muri aka gace.

Umwe ati 'Njye mfite imyaka 45 y'amavuko, navukiye aha ariko nibwo nabona urubura rungana uku. Nari narateye ibipaki bitatu by'ibigori bya iburide kandi twagifata tukiguze 8.000Frw, ariko ubu nta kintu nshobora kuzasaruramo ntabyo kurya byarangiye.Amabati y'inzu yatobaguritse, abantu baraye hanze bahunze.'

Mugenzi we ati 'Rwari rwuzuye mu murima wagira ngo barumennyeme, ibi birayi (bihinze) byari biteye appétit (soma apeti). Nonehyo ugeze muri iyi nzu yanjye amabati yangiritse ntiwareba.'

Undi ati 'Ntagusarura.'

Aba bahinzi banshingiye kubyangiritse baravuga ko mu minsi iri imbere bashobora kuwibasirwa n'inzara, bagasaba inzego zibishinzwe kubagoboka.

Umwe ati 'Byo byarangiye ni amapfa ni ukwitegura n'ikilo cy'ibirayi kizagura na 2.000Frw. Twebwe icyo twasaba niba hari komisiyo ishinzwe Ibiza yakagombye kuza igakurikirana aha.'

Undi ati 'Inzara izatwica ibirayi n'ibigori byangiritse.'

Muri rusange ibyangijwe n'urubura muri iyi mirenge harimo ibirayi, ibigori n'amashaza n'inzu zatobotse amabati.

Source : https://umuryango.rw/amakuru/mu-rwanda/umutekano/article/musanze-imvura-yangije-ibikorwaremezo-n-imyaka-bitera-abahinzi-agahinda

Inzobere mu buzima bwo mu mutwe Profeseri Gillian Mezey ni we wumviswe uyu munsi mu iburanisha ku rubanza rwa Félicien Kabuga uregwa ibyaha bya jenoside yabaye mu Rwanda mu 1994.

Profeseri Mezey ni umwe mu nzobere eshatu zigenga zakoze raporo ku buzima bwa Kabuga yatangajwe muri uku kwezi kwa gatatu, irimo ko ubuzima bwe butatuma ashobora kugira uruhare bya nyabyo mu rubanza rwe.

Profeseri Mezey yabwiye urukiko ko Kabuga “nta bushobozi afite bwo gusubiza ku birego”.

Yabaye uwa kabiri muri izi nzobere ubajijwe kuri iyi raporo n'ubushinjacyaha, ubwunganizi bwa Kabuga hamwe n'inteko y'abacamanza.

Kabuga, wari ukurikiye iburanisha mu buryo bw'amashusho ari kuri gereza y'urukiko, nta jambo yahawe. Ariko mu gihe cyashize yahakanye ibyaha aregwa.

Profeseri Mezey yari ari mu rugereko rw'i La Haye mu Buholandi rwasigaye ruca imanza zasizwe n'urwari urukiko mpuzamahanga mpanabyaha rw'Arusha rwari rwarashyiriweho u Rwanda.

Itsinda ry'abanyamategeko bunganira Kabuga ryari riri mu rukiko, mu gihe abashinjacyaha bo bitabiriye iburanisha mu buryo bw'iyakure bw'amashusho bari i Arusha muri Tanzania.

Iburanisha ryashyizwe mu muhezo nibura inshuro imwe ku busabe bwa Maître Emmanuel Altit wunganira Kabuga, ubwo hari hatangiye kuvugwa ku makuru y'umwihariko ku buzima bwe.

Ibyo inzobere yavuze mu ncamake:

Ubuzima bwa Kabuga bwabaye nabi cyane kuva mu kwezi kwa 12 mu 2022

Kwibagirwa cyane kwe nta buryo byashobora guhagarikwa cyangwa ngo bivanweho

Si ngombwa kuzongera kumusuzuma mu mezi ari imbere

Byashoboka ko yajya aza mu rubanza nk'indorerezi gusa

Maître Altit yabajije Profeseri Mezey gusobanura ukuntu ubuzima bwa Kabuga bwabaye nabi cyane guhera mu kwezi kwa 12 mu mwaka wa 2022.

Yasubije atanga ingero, ko bitandukanye na mbere yaho, ubwo yasuzumaga Kabuga kuri iyi nshuro yabonye kuba maso kwe kwaragabunutse, ko yanyuzagamo agasinzira, ntamenye aho aherereye, ukwezi arimo, ndetse ko adashobora kwakira amakuru mashya y'urusobe ngo aze kongera kuyibuka.

Yavuze ko nubwo nk'uyu munsi biboneka ko yari akurikiye, uwaza kumubaza nyuma yaho ibyavuzwe atabyibuka.

Profeseri Mezey yavuze ko uburyo bwo kuba yaburanishwa mu nyandiko nta cyo bwahinduraho.

Yongeyeho ko kwibagirwa cyane kwa Kabuga nta buryo byashobora guhagarikwa cyangwa ngo bivanweho.

Umushinjacyaha Grace Harbour yabajije iyi nzobere niba Kabuga yongeye gusuzumwa nka nyuma y'amezi runaka hari icyo byagaragaza gishya ku buzima bwe.

Yasubije ko nta cyahinduka kuko Kabuga afite ibibazo bikomeye by'ubuzima kandi bya karande, ko n'iyo uburwayi bumwe yaba yarabukize, ubundi bwaba bukiriho. Ati: “Mfitiye icyizere ibyo twagezeho mu bushakashatsi”.

Harbour yanamubajije igisobanuro cy'ibiri muri raporo ko Kabuga nta kindi kintu kirenze ku birego ashobora gusobanukirwa.

Yasubije ko ibyo bijyanye n'amakuru y'urusobe acyenerwa mu rubanza, ko ubushobozi bwo kubika amakuru mu mutwe, kuri we “ntaburiho”.

Ibyo ni na byo Profeseri Mezey yasubije umucamanza Mustapha El Baaj, ubwo yari amubajije niba kudasobanukirwa ibirego kwa Kabuga kugikomeje.

Gusa iyi nzobere yongeyeho ko Kabuga azi icyo jenoside ari cyo, ko mu kumusuzuma yamubwiye ko ari “ugutsemba abantu”, ariko ko nta kirenzeho asobanura usibye kuvuga ko ibyo aregwa ari “ibinyoma”.

Ngo ugerageje gukomeza kubimubazaho, ashobora kureka kukuvugisha.

Umucamanza Iain Bonomy ukuriye iburanisha yabajije Profeseri Mezey niba abona ko Kabuga afunzwe mu buryo bwiza, asubiza “yego”.

Bonomy yamubajije niba umuntu ufatwa ko nta bushobozi afite bwo kuburana, ashobora kuba yagira ubwo bushobozi bitewe n'uburyo bw'aho ikoranabuhanga rigeze ubu.

Yasubije “oya”, ko nubwo hariho ikoranabuhanga ugereranyije no mu bihe byashize, bitavuze ko ryakora akazi neza kurushaho ku muntu udashoboye kuburana.

Yanamubajije ku kuba Kabuga yaburanishwa ku bimenyetso — uburyo buzwi nka 'trial of the facts' — asubiza ko Kabuga ari we wahitamo, kandi ko amahitamo ye ashobora kugenda ahindagurika.

Ubwo Maître Altit yari asubijwe ijambo, yabajije Profeseri Mezey ibyasabwa kugira ngo Kabuga abe ari mu rukiko igihe yaba abihisemo.

Arasubiza ati: “Kureba gusa ibirimo kuba. Bitandukanye no kubigiramo uruhare mu buryo bwuzuye kw'uregwa. Ibyo [byombi] bisaba ubushobozi butandukanye”.

Yavuze ko “kureba gusa” ari cyo “kigero cyo hasi” yashobora.

Umucamanza Bonomy yavuze ko iburanisha rizakomeza ku wa gatatu w'icyumweru gitaha, urukiko rwumva inzobere ya gatatu ari na yo ya nyuma muri izi zakoze raporo ku buzima bwa Kabuga.

BBC

Source : https://umuryango.rw/amakuru/mu-mahanga/ubutabera/article/inzobere-yavuze-ko-kabuga-atashobora-gusubiza-ku-byo-aregwa

Umunyamerika w'icyamamare mu gukina filimi z'urukozasoni, Stormy Daniels yavuze ko “azabyinira mu muhanda” igihe uwahoze ari Perezida Donald Trump yajyanwa muri gereza kubera amafaranga yamwishyuye mu mwaka wa 2016 abinyujije k'uwahoze ari umunyamategeko we bwite.

Daniels yatanze iri sezerano asubiza umufana w'uyu wahoze ari perezida wanditse kuri twitter ubutumwa amutuka.

Guterana amagambo hagati yabo kwabaye ku munsi umwe Trump yahanuye ko azafungwa n'abacamanza bo mu mujyi wa New York.

Ukoresha Twitter witwa Intergalactic Gurl yanditse ati: “Indaya iteye ishozi yemera amafaranga kugira ngo isebye umuntu w'inzirakarengane!”.

Yakomeje ati: “Amahirwe masa uzajye mu mihanda nyuma yibi!.”

Daniels yahise amusubiza ati: “none … yaranyishyuye arisebya.”

Daniels yongeyeho ati: 'Urumva ko uri mubi kurusha we wabikoze nk'utazi gusoma no kwandika.

Kandi sinzagenda gusa , nzabyinira mu muhanda igihe 'azakatirwa' ngo ajye muri gereza.”

Uwahoze ari avoka wa Trump akaba n'umujyanama we,Michael Cohen yagiye muri gereza nkuru kubera ibyaha byo kwica amabwiriza yo kwiyamamaza arimo kwishyura uyu mugore amadorari 130.000 mbere gato y'amatora ya 2016.

Cohen yavuze ko ayo mafaranga yayishyuye Daniels kugira ngo aceceke ntazavuge ko yaryamanye na Trump muri 2006, nyuma y'amezi umugore we Melania yibarutse umuhungu wabo Barron.

Source : https://umuryango.rw/ubuzima-115/udushya/article/umukinnyi-wa-filimi-z-urukozasoni-wasambanye-na-trump-yiyemeje-kuzabyinira-mu

Uwitwa KIRENGA SAMSON M.Ian yasabye guhindura amazina mu buryo bwemewe n'amategeko akitwa KIRENGA IAN SAMSON MANZI mu bitabo by'irangamimerere.

Impamvu atanga zituma asaba guhindura amazina akaba ari uko ari amazina afite kuri Passport.

Source : https://umuryango.rw/amatangazo/article/itangazo-kirenga-samson-m-ian-yasabye-guhindura-amazina-akitwa-kirenga-ian

Uwitwa KANOBANA Nsigaye Cedric yasabye guhindura amazina mu buryo bwemewe n'amategeko akitwa KANOBANA ISHIMWE CEDRIC mu bitabo by'irangamimerere.

Impamvu atanga zituma asaba guhindura amazina akaba ari uko ari amazina afite kuri Passport.

Source : https://umuryango.rw/amatangazo/article/itangazo-kanobana-nsigaye-cedric-yasabye-guhindura-amazina-akitwa-kanobana

Miss Hanah Karema Tumukunde uherutse kwegukana ikamba rya nyampinga wa Uganda 2023 , yakuyeho impaka zimaze iminsi zivugwa ko ari umunyarwandakazi , avuga ko ari umugandekazi ufite umubyeyi umwe ukomoka mu Rwanda.

Ibi yabitangaje mukiganiro yagiranye n'umunyamakuru MC Kats uri mu bafite izina rikomeye mu myidagaduro yo muri Uganda , aho yamubajije ku bivugwa ko yegukanye iri kamba kandi atari Umugande.

Miss Hanah Karema asubiza MC Kats yagize ati' Njye ndi Umunya-Uganda wavukiye muri Uganda ariko uvuka ku mubyeyi umwe w'umunyarwandakazi n'undi ukomoka muri Ankole ho muri Uganda'.

Uyu mukobwa avuga neza Icyongereza,Ikinyankole ,ikigande ndetse yanahishuye ko azi no kuvuga ikinyarwanda .

Miss Tumukunde wavutse mu 1998 ,akavukira ahitwa Kasasi ho muri Uganda ari naho yakuriye byitezwe ko ari we uzahagararira Uganda mu irushanwa rya Miss World riteganyijwe kubera Dubai.

Source : https://umuryango.rw/imyidagaduro/article/miss-hanah-tumukunde-wegukanye-ikamba-rya-miss-uganda-2023-yakuyeho-urujijo

Abantu babiri bakundanye bakiri mu bugimbi bakoze ubukwe, nyuma y'imyaka mirongo itandatu ababyeyi babo bahagaritse gusezerana kwabo.

N'ubwo banyuze mu rugendo rutoroshye mbere yo gushyingirwa, Len Allbrighton w'imyaka 79 na Jeanette Steer w'imyaka 78, bavuga ko ubu bishimye kuruta uko byahoze.

Aba bombi bahuye bwa mbere mu 1963 ubwo Len yari afite imyaka 19 na Jeanette afite imyaka 18.

Aba bombi bahuye bwa mbere bari kwimenyereza igiforomo mu bitaro byitwa St Mary's Hospital ahitwa Newport mu Bwongereza bahita bakundana bakibonana.

Hashize amezi make bakundanye,Len yasabye umukunzi we Jeanette ko yazamubera umugore undi arabyemera.

Uyu Len yahise ajya muri Australia,kugura ubutaka bwo kubakamo inzu bazabanamo igihe bazaba barushinze.

Icyakora imyaka yabo ntiyabemereraga kurushinga kuko imyaka yemewe n'amategeko icyo gihe yari 21, Jeanette yaburaga itatu.

Nyina na se bahagaritse ubukwe bwabo ndetse uyu Len ari mu mahanga yakiriye ibaruwa y'umukunzi we imusaba kwibagirwa iby'ubukwe bwabo.

Uyu Len yahise ashyingiranwa n'umugore wo muri Australia nyuma y'aho, babyarana abana batatu,nyuma baza gutandukana ari nabwo yasubiye iwabo ahitwa Stevenage mu Bwongereza gukora nk'umuforomo w'akarere.

Ku rundi ruhande,Jeanette,yagumye mu Bwongereza nawe aza kuba umuforomokazi hanyuma aza gushyingiranwa n'undi mugabo babyarana abana babiri.

Uyu yaje kujya mu kiruhuko cy'izabukuru akomeza kubana n'umugabo we ariko kera kabaye Len yaje kumwibuka yiyemeza kujya kumushaka aho yari atuye ahitwa Newport.

Uyu ngo yamenye aho atuye abifashijwemo na lisiti y'abagombaga gutora yari imanitse mu gace.

Len yagize ati “Nari mfite amatsiko yo kureba uko ari bwitware nambona.

'Nagendeye ku mahirwe. Ntabwo hari ahantu horoshye kubona ariko narabikoze.

'Nari nizeye ko ameze neza – Nta kindi nari niteze.'

Len yahagaze ku gipanku cy'inzu maze areba mu nzu ye. Jeanette – ntiyahise amumenya kuko hari hashize imyaka myinshi ahubwo yamubajije uwo ari we.

Yavuze:Nari mpfuye nkimenya ko ari we uhagaze ku gipangu cyanjye.

'Nishimiye ko yanshatse. Icyo gihe naramutekerezaga cyane. '

Amaze kuvugana na we, yumvise ikibatsi kimuzamutsemo maze abwira umugabo we ubwo yamubazaga uwo ariwe ko ari umuntu wabazaga icyerekezo.

Nyuma y'imyaka ibiri, umugabo wa Jeanette yapfuye azize kanseri, nuko uyu yiyemeza kujya kureba Len akoresheje aderesi yari yashyize ku ikarita ya Noheri yari yamwoherereje umwaka washize.

Muri 2018, yemeye kwerekeza muri Stevenage kugira ngo babane, hanyuma umwaka ushize Len yongera gupfukama amusaba ko babana.

Ubukwe bwabo bwabaye ku ya 11 Gashyantare 2023 bambikana impeta nshya zisa imbere y'abana babo, abuzukuru n'abuzukuruza babo.

Jeanette yagize ati: 'Ubuzima bw'urukundo ni bwiza cyane.

'Nibyiza kugira umuntu unyubaha. Nkunda gukora ikintu cyose hamwe na Len. '

Umugabo we mushya yagize ati: 'Twongeye gukundana.

'Twasomeye imivugo hamwe kandi twambikana impeta – Nagize amarangamutima nsomye uwanjye.

'Nari narenzwe n'urukundo namukundaga.”

Source : https://umuryango.rw/ubuzima-115/udushya/article/basubukuye-ubukwe-bwasubitswe-n-ababyeyi-babo-mu-myaka-60-ishize

Umunyamideli ufite “umusaya munini ku Isi” yashyize ahagaragara andi mafoto agaragaza uko yongeye kwibagisha akagira amatama bikabije nubwo yari asanzwe yibitseho adasanzwe.

Anastasia Pokreshchuk yerekanye iyi sura ye nshya yifashishije imbugankoranyambaga nyuma yo kuvuga ko yongeye kwibagisha kugira ngo ayongere.

Uyu mukobwa w'imyaka 33 ukomoka i Kyiv, muri Ukraine, yahoze afite isura isanzwe kandi afite imisatsi yirabura afite imyaka 20 mbere yuko akoresha akayabo k'amapawundi 1.500 mu kwihindura

Kandi kubera inshinge zitabarika yatewe,byamusigiye amatama manini cyane

Ariko, mu rwego rwo kugumana agahigo ko kugira amatama manini ku isi, uyu munyamideli yahisemo kujya kwiteza izindi nshinge ziyagira manini ku rundi rwego nkuko yabibweiye abamukurikira kuri Instagram.

Video yerekanaga uyu mugore bamuteye iyo miti ituma imisaya ye iba minini ari kurwana n'ububabare.

Uyu munyamideli yasobanuye uburyo yatangiye gushaka ubwiza binyuze mu kwibagisha yaba mu maso no ku mubiri afite imyaka 26.

Src:New York Post

Source : https://umuryango.rw/imyidagaduro/article/umunya-ukraine-ufatwa-nk-uwambere-ufite-amatama-manini-ku-isi-akomeje-gutangaza

Iri serukiramuco rimaze imyaka ine rikaba rigiye kuba ku nshuro ya 5, rizaba iminsi ibiri kuwa Gatanu no kuwa Gatandatu tariki 19 na 20 Gicurasi, 2023.

Mu kiganiro na Nshimiyimana Glesard Paggar, Umuyobozi wa A. T. Events ibarizwa mu Bufaransa ari nayo iri gutegura iri serukiramuco, yadutangarije ko bariteguye kugira ngo bakomeze gusigasira umuco.

Aganira na InyaRwanda, Paggar yagize ati: 'Muri make, Africa Fest twayiteguye kugira dukomeze dusigasire umuco wacu nk'abanyafrika, tumurika ubukorikori, ubugeni n'ubuhanzi bwacu inaha i Burayi'.

Nshimiyimana Glesard Paggar, Umuyobozi wa A. T. Events itegura Africa Fest

Yongeraho ko kubera ubwiza bw'ibiba birimo, n'abazungu baryitabira. Ati: 'Umwihariko dufite ni uko ihuriramo n'abanyafrika batandukanye bafite inkomoko mu bihugu bitandukanye, ariko ukanasangamo n'abazungu bakunda Afrika banakora imideri, ndetse bakanakora n'ubugeni bugaragaza urukundo bakunda Afrika'.

'Africa Fest hazamo abantu b'ingeri zose, abanyafrika birumvikana nibo benshi ariko hazamo n'abazungu baje kumurika ibyo bakora, ariko byose bifite aho bihurira n’Afrika'.

Ni iserukiramuco riba rigizwe n'imyambaro, ubugeni, imbyino, indirimbo n'ibindi bifite aho bihuriye na Afurika. Yabivuzeho agira ati: 'Ibizaba birimo byose ni byinshi, twavuga nk’imyambaro, inkweto z'abamasayi, amaherena akozwe muri za wax, ibikapu, amavuta n'ibinyobwa bikozwe mu bimera, ibishushanyo, imitako nyarwanda n'imitako nyafrika muri rusange. Hakazaba harimo imideri, n'umuziki birumvikana n'ibindi byinshi'.

Iri serukiramuco ryatangiye mu mwaka wa 2018, gusa mu mwaka wa '2020 ntabwo yabaye kubera icyorezo cya Covid-19 cyari cyahagaritse ubuzima'.

Intego y'ibanze y'iri serukiramuco kwari uguhuza abanyafurika. Ati: 'Intego ya mbere twari dufite yari ivuga ko nk'abanyafrika dutuye mu Bufaransa twagira aho duhura tukungurana ibitekerezo ari nako tunagira n'aho dushobora kumurikira ibikorwa byacu, ikindi tukanazamura impano twifitemo zaba mu muziki, ubugeni n'ibindi. Byose turagenda tubigeraho, ariko haracyari byinshi byo gukora. Twifuza ko umwaka umwe Africa Fest izajya ibera inaha muri Europe umwaka ukurikiyeho ikabera muri Afrika.'

 

Paggar ari kumwe n'umufaransa Stomy Bugsy, umuhanzi w'umuraperi akaba n'umukinnyi w'amafilime

Uhereye ibumoso ni Pascal RWEMA umuhuzabikorwa w'iri serukiramuco Africa Fest, ari kumwe na Paggar Glesard Nshimiyimana waritangije
 Paggar hano ari kumwe na Sindanu KASONGO, ushinzwe porogaramu muri BET, televiziyo y'abanyamerika bafite inkomoko ku mugabane wa Afurika

Aha Paggar ari kumwe n'ushinzwe ibikorwa byo kwamamaza Marketing muri NOFI (Noir et Fier). Ni société iharanira ukwishyira ukizana kw’abirabura muri France
Haba hari imitako, imyambaro n'ubugeni bwo muri Afurika

Abazungu bakunda imyambaro n'imitako y'abanyafurika baza kwihera ijisho, abandi nabo bagakora ibifitanye isano na Afurika

Ibiranga Afurika biba bihari ku bwinshi

Igisabo, inkongoro, igicuma, uduseke, imitako ni bimwe mu biranga Umuco nyarwanda bimurikwa muri iri serukiramuco

Amavuta n'ibindi birango by'ubwiza biba byarakozwe n'abanyafurika nabyo biramurikwa 

Ni iserukiramuco ryitabirwa n'abanyafurika baba i Burayi ku bwinshi 

Haba harimo ibintu by'ingeri zose byerekana Umuco nyafurika 

Source : https://inyarwanda.com/inkuru/127380/abanyarwanda-baba-mu-bufaransa-bateguye-iserukiramuco-nyafurika-127380.html