Category: Uncategorized

Ibi birori byubakiye ku muco byabaye mu ijoro ryo kuri uyu wa Gatanu tariki 24 Werurwe 2023, mu nyubako y'imyidagaduro y'ikigo cya Green Hills Academy, aho byahurije hamwe abanyeshuri, abarezi, ababyeyi babo ndetse n'abandi bo muri iki kigo.

Ni iserukiramuco rikomeye muri iki kigo, kuko rimaze kuba ku nshuro ya Gatatu. Ritegurwa mu rwego rwo gufasha abanyeshuri bo mu bindi bihugu biga muri iki kigo, kurushaho kwisanga mu muco w'u Rwanda no gufasha abakibyiruka kumenya indangagaciro z'Abanyarwanda.

Rirangwa n'ibikorwa bitandukanye birimo amasomo ku gihugu cy'u Rwanda, ibiganiro, imikino gakondo, imyambaro, igitaramo, imurikabikorwa… Bikitabirwa n'ibyiciro byose by'abagize umuryango wa GHA, baba abanyeshuri, ababyeyi, abarezi hamwe n'abashyitsi batandukanye.

Kuva mu marembo y'ahabereye iri serukiramuco wahuraga n'abakiri bato mu myaka, bagaragaza inyota yo kumenya umuco kugeza imbere mu gitaramo.

Mu ijambo rye, Umuyobozi Mukuru wa Green Hills Academy, Dr Daniel Hollinger yavuze ko bategura iri serukiramuco buri mwaka mu rwego rwo gufasha abanyeshuri biga muri iki kigo kumenya imico y'ibihugu bitandukanye by'umwihariko uw'u Rwanda.

Yashimye ababyeyi ndetse n'abandi bagira uruhare mu gutoza aba bana. Ati '…Turashimira abantu bose bagize uruhare mu gutegura iri serukiramuco.' Yashimye kandi abanyeshuri b'iki kigo babarizwa mu torero ry'umuco kuko 'baragaje ibirori byiza'.

Iri serukiramuco ryatangijwe n'umutagarag w'ingoma wavugijwe n'abanyeshuri bo mu ishuri y'incuke, bunganiwe n'abiga mu mashuri abanza.

Bakurikiwe n'abiga mu mashuri yisumbuye bakinnye umukino ugaragaza umuntu kuva avutse kugeza akuze; bagaragaza uburyo nko ku mukobwa igihe kigera akarambagizwa.

Ibi byakorwaga ari nako haririmbwa indirimbo zo guherekeza umugeni, bagaragaza impano ahabwa zihariye ahabwa iyo agiye kurushinga n'ibindi biherekeza umugeni. Byageze n'aho bazana ingobyi ya Kinyarwanda, bati 'Mutumwinka agiye iw'abandi'.

Uyu mukobwa bamuhetse mu ngobyi ya Kinyarwanda, mu gushushanya ukuntu iyo cyera umusore yarambagiza umukobwa yamugeragaho bamumuhekeye. N'aho ku musore agakurikira mu mirimo inyuranye imutegura.

Mu rwego rwo kwiga byinshi biri mu muco w'u Rwanda, aba banyeshuri banyuzagamo bagasakuza (gusakuza) na bagenzi babo no gukina ikinamico. Baririmbye kandi indirimbo zizwi cyane mu muco w'u Rwanda.

Mu 2022, aba banyeshuri bakinnye umukino bise 'Izuba ry'amahoro' werekanye amateka y'u Rwanda ku ngoma y'umwami Cyilima II Rujugira, wayoboye u Rwanda ahagana mu mwaka wa 1675-1708.

Akaba umwe mu bami b'u Rwanda bahanze ibintu byinshi byagendeweho mu mushinga wo kubaka u Rwanda kugeza aho rugeze ubu, harimo kwihesha agaciro, gutabarana, kwanga agasuzuguro, gukunda abaturage be n'ibindi.

Cyilima II Rujugira yashyizeho imirongo migari y'ubwirinzi bw'igihugu ubwo yashyiragaho urugerero.

Akarema ingerero ku nkiko z'u Rwanda, akarwana intambara atsinda ibihugu bine bikomeye (Gisaka, Ndorwa, u Bugesera n'u Burundi) byashakaga kwigarurira u Rwanda.  Hakaba ari na ho havuye imvugo igira iti 'U Rwanda ruratera ntiruterwa'.

Abanyeshuri ba Green Hills Academy, bunamiye Buravan Yvan witabye Imana

Mu rwego rwo guha icyubahiro Buravan, aba banyeshuri baririmbye basubiramo indirimbo 'Gusakaara' ya Buravan mu majwi no mu mudiho bya Kinyarwanda.

Iyi ndirimbo yaririmbwe izamura amarangamutima y'abenshuri bari muri iri serukiramuco, bongera gutekereza uburyo uyu munyamuziki yabataramiye muri Werurwe 202.

Binyuze ku mushyushyarugamba, Patrick Mahirwe, aba banyeshuri bavuze ko bazakomeza kuzirikana umurage wa Buravan, bashima umuryango w'uyu muhanzi wari uhagarariwe na Mukuru we Martial ndetse na Mushiki we Raissa.

'Gusakaara' iherutse gusubirwamo na Chorale de Kigali mu rwego rwo kuyongerera uburyohe nk'icyifuzo cya Yvan Buravan.

Ubwo, ku wa 19 Ukuboza 2022, Chorale de Kigali yasohoraga iyi ndirimbo yagize iti 'Buravan yari yarifuje ko Gusaakaara yazaririmbwa na Chorale de Kigali kubera uburyo ihimbitse kugira ngo ayihe ubundi buzima. Yari yizeye ko Chorale de Kigali yabikora neza kubera ubunararibonye ifite mu kuririmba indirimbo zuje ubuhanga.'

Buravan yagize izina rikomeye binyuze mu bihembo n'ibitaramo yaririmbyemo. Album ye yasize akoze yise 'Twaje' na n'ubu iracyatemba mu mitima ya benshi.

Cécile Kayirebwa yanyuzwe n'uburyo abanyeshuri ba Green Hills Academy babumbatiye umuco w'u Rwanda:

Muri iri serukiramuco, Kayirebwa yinjiriye mu ndirimbo ye yakunzwe mu buryo bukomeye yitwa 'Umunezero'. Aho mu bijyanye n'amajwi mu muririmbire yashishijwe na Angel&Pamella, Audia Intore, Munganyika Alouette ndetse na Bukuru Christiana.

Uyu mubyeyi amaze kuririmba iyi ndirimbo yagize ati 'Abana batunejeje, baturirimbiye, baduteye imbabazi…Nanezerewe cyane, nta kintu cyiza nko kubona abana bakina.'

Yanzitse mu nganzo akomereza ku ndirimbo 'Inyange Muhorakeye', 'Cyusa', 'Intago iterura babiri', 'Marebe' yigeze gusubirwamo na Cyusa Ibrahim, 'Akariba ku rutare', 'Rwagasana', 'Babyeyi', 'None twaza' yakunzwe cyane na 'Ngarara'.

Mu gitaramo hagati yahaye umwanya, Angel na Pamella baririmba indirimbo yabo bise 'Rusengo' ni mu gihe Audia Intore yaririmbye indirimbo ye 'Rwangabo'.

Kayirebwa yamenyekanishije ubwiza bw'umuziki gakondo w'u Rwanda mu mahanga kandi kugeza n'ubu ntawe uramuhiga, ariganwa ariko ntarashyikirwa.

Uyu mubyeyi azwi mu ndirimbo nka Rwanamiza, Tarihinda, Kana, Inkindi, Mundeke Mbaririmbire, Urusamaza, Rubyiruko, Umulisa, Ndare n'izindi.

Yitabiriye ibitaramo birimo nk'iserukiramuco rya 'Fespad' ya mbere i Kigali, 'Robben Island Event' I Cap yo muri Afurika y'Epfo n'ibindi bitandukanye.

Andy Bumuntu afite izina rikomeye muri Green Hills Academy:

Uyu munyamakuru wa Kiss Fm yinjiye muri iki gitaramo anyuze aho abafana binjiiriraga, yakirizwa akaruru k'ibyishimo, abanyeshuri bacana urumuri rwa telephone mu rwego rwo kumuha ikaze nyuma y'igihe kinini bamutegereje.

N'abari bamaze gusohoka bagarutse imbere mu nyubako yaberagamo iki gitaramo bafatanya na Andy Bumuntu kwizihiza uyu mugoroba wihariye ku muco.

Uyu muririmbyi yinjiye mu ndirimbo ye yise 'Mine' yakunzwe cyane, ifite amagambo yoroheye benshi kuyifata mu mutwe byanatumye abanyeshuri bamufasha.

Yakomereje ku ndirimbo 'Appreciate' asaba buri wese ufite icyo ashimira Imana kuyishimira, yungamo 'Yesu' ya Buravan mu rwego rwo kumwunamira.

Uyu muririmbyi yaririmbye aganiriza abanyeshuri ba Green Hills Academy, hari n'aho yagize ati 'Nishimiye kuba ndi hano muri uyu mugoroba. Ndanezerewe.'

Yaririmbye kand indirimbo ye 'Igitego' aherutse gushyira hanze, aho mu mashusho yayo hagaragaramo Nkusi Arthur n'umukunzi we Fiona, Ngarambe François-Xavier n’ umufasha we Yvonne Solange.

Andy yavuze ko iyi ndirimbo yihariye kuri Album ye kuko ayikunda cyane. Yanaririmbye indirimbo itarasohoka yise 'Bahige', aho igaruka cyane ku mukobwa uhibikanira iterambere rye.

Ku rubyiniro yifashishije abakobwa b'ababyinnyi bo muri iki kigo, ndetse na Murayire usanzwe ari intore wamufashije kubyina Kinyarwanda indirimbo ze.

Andy Bumuntu aririmba agaruka ku buzima busanzwe abantu babamo buri munsi kuko aribwo buryo bwiza kuri we bwo gutanga ubutumwa.

Ni umuririmbyi w'umunyempano uririmba injyana ya Blues ivanzemo Gakondo ya Kinyarwanda. Mu mashuri yisumbuye na Kaminuza yize ibyerekeye amashanyarazi ariko akabifatanya n'umuziki. Umurishyo wa nyuma w'iki gitaramo wavuze ahagana saa yine zuzuye.      

Abanyeshuri ba Green Hills Academy batanze ibyishimo binyuze mu mukino ugaragaza umuntu kuva avutse kugeza akuze 

Abiga mu mashuri y’incuke bishimiwe mu buryo bukomeye muri iki gitaramo, bagaragaza ubuhanga mu kubyina 

Abana bakinnye umukino urimo gusimbuka urukiramende, barasakuza, guca imigani n’ibindi bitandukanye biri mu muco 

Ku nshuro ya mbere, abanyeshuri bakinnye umukino-shusho witwa 'Robwa nyiramateke' ni mu gihe ku nshuro ya kabiri bakinnye umukino-shusho witwa 'Izuba ry'amahoro'. 

Abanyeshuri ba Green Hills Academy bunamiye Buravan binyuze mu ndirimbo ye yise 'Gusakaara'

 

Umwaka ushize iri serukiramuco ryataramyeho umuhanzi Muyango Jean Marie ndetse na Nyakwigendera Yvan Buravan 

Cecile Kayirebwa yashimye uburyo abato batozwa umuco w'u Rwanda

Umuvugizi w’Urwego rw’Igihugu rw’Ubugenzacyaha (RIB), Dr Murangira Thierry yitabiriye iri serukiramuco ryabaga ku nshuro ya Gatatu

Muri iki gitaramo, Cecile Kayirebwa yifashishije Angel&Pamela, Munganyinka Alouette, Audia Intore ndetse Bukuru Christiana 

Angel&Pamella bazwi mu ndirimbo zirimo nka 'Rusengo' bafashije mu miririmbire 

Munganyika Alouette wakoranye igihe kinini na Cyusa Ibrahim 

Audia Intore yahawe umwanya aririmba indirimbo ye yise 'Rwangabo' 

Bukuru Christian wahatanye muri ArtRwanda-Ubuhanzi [Uwa kabiri ubanza iburyo] yafashije Kayirebwa muri iki gitaramo 

Andy Bumuntu yeretswe urukundo ubwo yaririmbaga muri iri serukiramuco ryabaye ku nshuro ya gatatu

 

Andy Bumuntu usigaye ukorera Kiss Fm yamenyekanye mu ndirimbo zirimo: ‘Ndashaje’, 'Mukadata', 'Mine' n'izindi 

Murayire, umusore w’umuhanga mu mu kubyina Andy Bumuntu yifashishije ku rubyiniro 

Muri iki gitaramo, Andy Bumuntu yunamiye Buravan binyuze mu ndirimbo ‘Ni Yesu’ 

Abanyeshuri bahaye telephone Andy Bumuntu afata ‘Selfie’ bagaragaramo 

Abanyeshuri ba Green Hills beretse Andy Bumuntu ko indirimbo ze bazizi 

Cecile Kayirebwa yaherukaga gutaramira abakunzi be mu bitaramo birimo Iwacu na Muzika Festival 

Abanyeshuri bo muri Green Hills Academy bategura iri serukiramuco mu rwego rwo guteza imbere umuco w'u Rwanda 

Aba banyeshuri baherutse gukina umukino witwa 'Rorobwa Nyiramateke' n'indi mikino yubakiye ku muco 

Umuhanzi wagwije ibigwi mu muziki w'u Rwanda, Masamba Intore ntiyacitswe n'iki gitaramo cyihariye ku muco 

Bagaragaje uburyo hambere, umukobwa yarambagizwaga kugeza ageze ku mukunzi we yihebeye

Umuyobozi w’Umujyi wa Kigali, Pudence Rubingisa ari mu bitabiriye iserukiramuco ‘Rwanda Festival

Ababyeyi n’abandi bafite abana biga muri iki kigo bitabiriye iki gitaramo cy’iserukiramuco 

Abantu bahagurukaga bagakoma amashyi, abandi bakavuza akaruru k’ibyishimo kubera uburyo aba banyeshuri bateguye uyu mukino 

Umuyobozi wa Green Hills, Dr Daniel Hollinger yashimye uburyo aba banyeshuri bagaragaje umuco w’u Rwanda

Abagize uruhare mu guteguza no gutoza aba banyeshuri imbyino gakondo barimo Nahimana Serge bashimiwe

Patrick Mahirwe, umushyushyarugamba umaze igihe cyane cyane mu bitaramo by’umuco

Martial, Mukuru wa Buravan yari muri iki gitaramo….. Abanyeshuri bo muri Green Hills bunamiye kandi bashima uruhare rwa Buravan ku muziki w’u Rwanda  

Raissa, mushiki wa Yvan Buravan nawe yari muri iki gitaramo

AUDIA INTORE, ANGEL&PAMELA N’ABANDI BAFASHIJE KAYIREBWA GUSUSURUTSA  ABANYESHURI

“>

ANDY BUMUNTU YISHIMIWE MU BURYO BUKOMEYE MURI IKI GITARAMO
“>

Kanda hano urebe amafoto menshi yaranze ‘Rwanda Festival’

Ni umuhango ukomeye uzabera muri Kigali Conference and Exhibition Village (KCEV), ahamenyerewe nka Camp Kigali.

Ni igikorwa kigamije kongera imbaraga mu kwiga no kwigisha ibijyanye n'ubumenyi n'imibare.

Ni gahunda kandi igamije gushimira abarimu ba siyansi n'imibare ku murimo ukomeye n'ubwitange bagaragaza mu kurerera u Rwanda.

Umuyobozi Mukuru wa AIMS, Lydie Hakizimana, yavuze ko umuhate abarimu bagaragaza baba bakwiye kuwushimirwa.

Aragira ati 'Abarimu bagira uruhare rukomeye mu kugena ahazaza h'igihugu cyacu, iki gikorwa kikaba ari umwanya wo kubashimira no gutuma bose bagira uruhare mu guteza imbere imyigire n'imyigishirize y'imibare na siyansi.'

Ibi bihembo bitegurwa binyuze muri gahunda izwi nka AIMS Teacher Training Program (TTP), igamije guteza imbere imyigire y'imibare na siyansi mu mashuri yisumbuye.

Iyi gahunda ihugura abarimu bari mu kazi, igatanga ibikoresho byo mu mashuri n'ikoranabuhaga rifasha mu koroshya imyigire n'imyigishirize ya siyansi n'imibare, bikanongera umubare w'abiga amasomo ya Siyansi, ikoranabuhanga, Engineering n'Imibare (STEM) ku rwego rw'amashuri makuru na kaminuza.

Ni gahunda kandi igamije guca intege imyumvire yakumiraga abakobwa muri aya masomo ya siyansi n'imibare.

Abazahembwa bazatoranywa mu barimu n'abayobozi mu by'uburezi bo mu mashuri abarizwa mu turere 14 dukoreramo gahunda ya AIMS —TTP RWANDA, n'amashuri agira uruhare muri Pan African Mathematical Olympiads (PAMO).

Mu muhango wo guhemba aba barimu ku nshuro ya mbere wabaye mu 2020, hahembwe abarimu 85 ku musanzu wabo mu kwigisha siyansi n'imibare.

Ku nshuro ya kabiri mu 2021, iyi gahunda yaguriwe mu bintu bitatu, igera ku barimu bari mu zabukuru, hatangwa buruse zo gukomeza amasomo muri Corporate Scholarship Fund ndetse hatangwa ibihembo byagenewe abarimu.

Kugeza ubu hamaze gushimirwa abarimu n'abafatanyabikorwa b'uburezi 108, bahawe ibihembo bitandukaye birimo mudasobwa zigendanwa, za tablets na smartphones.

Muri iyi gahunda ya AIMS-TTP, abarimu n'abafatanyabikorwa basuye abarimu 33 bari mu kiruhuko bo mu turere icyenda, ndetse hatangwa impano zifite agaciro kagera muri 1,500,000 ku barimu bagiye mu kiruhuko, mu gihe abarimu 15 bahawe buruse zo gukomeza amasomo mu bigo bibiri bitandukanye.

Corporate Scholarship Fund ni gahunda yagiyeho ku bufatanye bwa AIMS-TTP, Urwego rw'Ubwiteganyirize mu Rwanda (RSSB) , Airtel Rwanda, KCB Bank Rwanda (ubu ni BPR Bank), Kibogora Polytechnique na Kaminuza y'Ikoranabuhanga n'Ubugeni ya Byumba (UTAB).

Muri rusange, miliyoni 27 Frw zimaze gutangwa ku barimu 43 nka buruse zo gukomeza amasomo mu mashuri makuru abiri atandukaye.

Gahunda yo guhemba abarimu muri uyu mwaka yateguwe ku bufatanye na Mastercard Foundation, REB, Ikigo gishinzwe ibizamini n'ubugenzuzi bw'amashuri (NESA), (RSSB),
International Computer Driving Licence (ICDL) na Airtel Rwanda.

AIMS yateguye iki gikorwa yatangiye mu 2003, nk'ishuri ry'icyitegererezo ritanga ubumenyi bwisumbuye mu bijyanye n'imibare n'ubushakashatsi.

Rifite amashuri mu Rwanda, Afurika y'Epfo, Senegal, Ghana na Cameroon.

---

Abanyeshuri 800 bo mu mashuri atandukanye yo mu Karere ka Gicumbi, bamaze umwaka bahugurwa ku gukumira inda ziterwa abangavu, biyemeje kudahishira abahohotera abana babashukisha ibintu by'intica ntikize bakabangiriza ejo hazaza.

Basoje amahugurwa kuri uyu wa 24 Gashyantare 2023, kuri Paruwasi Katederali ya Byumba, bavuga ko byinshi bahungukiye biteguye kubishishikariza bagenzi babo ndetse n'ababyeyi babarera.

Aya mahugurwa yateguwe na Diyosezi Gatolika ya Byumba, abahungu bayahawe bitwa 'ingabo', naho abakobwa bakitwa ba 'Mutima', aho bose bibumbiye mu matsinda 20 (Club).

Bavuga ko biteguye gutanga umusanzu mu kurandura ikibazo cy'inda ziterwa abangavu kuko gituma abana batakaza, abatotezwa n'ababyeyi nyuma yo guhohoterwa.

Kamanzi Cyiza Devis ashimangira ko icya mbere biyemeje ari ukudahishira amakuru y'abantu batesha agaciro bashiki babo, ndetse no gushishikariza bashiki babo kudakomeza gushukishwa utuntu tw'intica ntikize bahabwa, bikabaviramo ingaruka zikomeye.

Uwitwa Nyiraneza nawe ashimangira ko abanyeshuri akenshi usanga bashukishwa utuntu duto kuko nta mafaranga bagira, amayeri yose bakaba barayigishijwe kandi biteguye kuyarwanya.

Ati 'Batwigishije umuco n'imyitwarire y'abana b'abakobwa, tugomba kugira umuco ndetse n'ibiranga umukirisitu, kandi ntabwo tuzashyigikira abo tuzabona bagamije kuyobya bagenzi bacu, aho tuzabibona ntabwo tuzajya tubihishira'.

Ashimira Diyosezi ya Byumba yabegereye ikabahumura ikabereka ko hari na bamwe mu bana b'abahungu bakoreshwa n'abantu bakuru ngo babashakire abakobwa beza kandi bakiri kwiga.

Ati 'Tuzaganiriza n'abayeyi bahishira abantu batera inda abana, twiteguye gufasha bagenzi bacu batari bagwa muri uyu mutego'.

Musenyeri wa Diyosezi ya Byumba, Musengamana Papias, yibukije ababyeyi, Abapadiri n'abahagarariye ibigo bifite imiryango mu nshingano kurushaho kwigisha abana kumenya indangagaciro, ndetse no kubigisha iyobokamana hagamijwe kugarura abana batari bahinduka intama zazimiye.

Ati 'Abashinzwe, imiryango turi kuganira ku kibazo cyo kurwanya ihohoterwa rishigiye ku gitsina rikorerwa abana b'abakobwa bakiri mu mashuri, cyane abari munsi y'imyaka 18, dukeneye umwana ushoboye kandi ushobotse'.

Yongeraho ko bahuguye abana biga mu bigo 20, aho mu gice cy'amajyaruguru bahuguye abiga mu bigo by'amashuri 10 ndetse no mu gice cy' iburasirazuba bagahugurayo abana biga mu bindi bigo icumi, gusa ngo ni urugendo ruzakomeza.

Padiri Nizeyimana Pascal, umuyobozi wa Komisiyo y' umuryango muri Diyosezi ya Byumba, asobanura ko umushinga basoje uyu munsi ari ukurwanya ihohoterwa rikorerwa abangavu, aho diyosezi ya Byumba ifite ibice bibiri.

Ati:' Twigishije abana kumenya indangagaciro z'umuco nyarwanda, ndetse n' iza Gikirisitu, ikibazo n' uko ubona hari abana bahohoterwa mu nzira no mu bihuru , kandi ukabona ababahohotera nta kintu bibabwiye, tugamije kubikumira, ndetse no kwigisha ababyeyi kudatoteza abana bahuye n' iki kibazo bakiri mu rugo'.

Mu karere ka Gicumbi habarurwa abana bagera kuri 566 bari hagati y'imyaka 14 na 19 batewe inda, imibare igaragazwa ikaba ihera muri Nyakanga umwaka ushize.

---

Uyu mugabo yatawe muri yombi kuri uyu wa Gatanu tariki ya 24 Werurwe 2023 mu Mudugudu w'Umucyo mu Kagari ka Rusera mu Murenge wa Kabarondo, icyaha akekwaho akaba ngo yaragikoze tariki ya 19 Werurwe 2023.

Amakuru avuga ko umugabo ukekwaho gusambanya uyu mwana yabaga muri uru rugo, afitanye isano n'umugabo waho. Bivugwa ko bajyaga banamusigira uyu mwana w'imyaka ibiri bakirirwana ari naho yaboneyeho akamusambanya ubundi akamubuza kubivuga kugeza ubwo nyina abibonye ari kumusiga amavuta nyuma yo kumwoza.

Umunyamabanga Nshingwabikorwa w'Umurenge wa Kabarondo, Kagabo Jean Paul, yabwiye IGIHE ko uyu mugabo yatawe muri yombi nyuma y'amakuru yavuye kwa muganga yagaragazaga ko uwo mwana w'imyaka ibiri imyanya ye y'ibanga yangiritse kubera gusambanywa.

Ati ' Uyu mwana yarasambanyijwe ntibyahita bimenyekana bimenyekana ari uko nyina ari kumusiga amavuta, amukozeho umwana arataka aramubaza ngo byagenze gute, umwana atangira kurira avuga ngo arankubita, uwo mugabo aba iwabo ni uwo mu miryango ni nawe wahise ukekwa kuko birirwanaga.'

Yakomeje avuga ko nyuma ya raporo ya muganga igaragaza ko uwo mwana yasambanyijwe inzego z'umutekano zagiye kumufata zisanga yagiye gusenga ziramutegereza aza gutabwa muri yombi aho kuri ubu afungiye kuri sitasiyo ya RIB ya Kabarondo.

Gitifu Kagabo yakomeje asaba ababyeyi kuba hafi y'abana babo bakirinda guhugira mu kazi ngo bumve ko abana bo mu miryango yabo babana aribo baharira kubarerera abana.

Ati ' Ababyeyi turabasaba kwita ku bana babo ntubabatererane ngo bumve ko kubasigira abantu bo mu miryango yabo babana bihagije, buri mwana wese yaba umuhungu yaba umukobwa yasambanywa, nibamenye uko bakurikirana abana babo umunsi ku munsi babavugishe bamenye imibereho yabo be guhugira mu kazi.'

Kuri ubu iperereza ngo rirakomeje kugira ngo hamenyekane amakuru ya nyayo niba koko uwo mugabo ariwe wasambanyije uwo mwana w'imyaka ibiri.

---

Ibiro by'Umukuru w'Igihugu muri Amerika, White House, byashyize hanze itangazo rito rigaragaza ibyishimo iki gihugu gifite byatewe n'umwanzuro wa Perezida Kagame wo gufungura Rusesabagina.

Iryo tangazo rigira riti 'Nakiriye neza umwanzuro wa Guverinoma y'u Rwanda ufungura Paul Rusesabagina. Umuryango wa Paul witeguye kumuha ikaze nanone muri Leta Zunze Ubumwe za Amerika, nsangiye nabo ibyo byishimo by'inkuru nziza ya none.'

Yakomeje agira ati 'Ndashimira Guverinoma y'u Rwanda ku bwo guharanira ko uku kongera guhura gushoboka, ndanashimira kandi Guverinoma ya Qatar ku musanzu wayo mu ifungurwa rya Paul no kugaruka muri Amerika. Ndongera gushimira kandi abantu bose muri Guverinoma ya Amerika bakoranye na Guverinoma y'u Rwanda kugira ngo tugere ku mwanzuro ushimishije uyu munsi.'

Amatangazo ya Amerika kuri iri fungurwa yashyizwe hanze n'inzego zitandukanye, gusa muri yose iry'Umunyamabanga wa Leta Zunze Ubumwe za Amerika ushinzwe Ububanyi n'Amahanga, Antony Blinken, rifite ubutumwa busa n'ubutandukanye n'ubw'abandi.

Muri Kanama umwaka ushize, uyu mugabo yagiriye uruzinduko mu Rwanda rwari rugamije kotsa igitutu ubuyobozi kugira ngo burekure Rusesabagina. Mu migambi ye, yari arimo ko nibiba na ngombwa, ashobora gusubira muri Amerika ajyanye na Rusesabagina mu ndege.

Itangazo yashyize hanze rica amarenga ko kuva na mbere, Amerika yari inyuma ya Rusesabagina muri gahunda ze za politiki no gushaka gukuraho ubuyobozi bw'u Rwanda.

Blinken ati 'Leta Zunze Ubumwe za Amerika ziyumva mu Rwanda rutekanye kandi rutera imbere. Twongeye gushimangira ihame ry'uko impinduka muri politiki mu Rwanda n'ahandi ku Isi zikwiriye kuba binyuze mu mahoro. Nta mwanya wa politiki ishingiye ku bugizi bwa nabi.'

Umuvugizi w'Ibiro by'Umukuru w'Igihugu, Stephanie Nyombayire, yatangaje ko ifungurwa rya Rusesabagina rigamije kuzahura umubano w'ibihugu byombi wari warajemo agatotsi.

Ifungurwa rya Rusesabagina rije nyuma y'iminsi Guverinoma ya Amerika yarahinduye uburyo yitwara muri iki kibazo. Ku ikubitiro, iki gihugu cyotsaga u Rwanda igitutu gikomeye, kugeza n'aho bamwe mu bagize Inteko Ishinga Amategeko barusabiye ibihano.

Gusa kuva mu Ukwakira umwaka ushize, ibintu byatangiye guhindura isura, igitutu kiragabanuka ndetse n'umukobwa wa Rusesabagina Carine Kanimba ahagarika kongera kumvikana mu itangazamakuru.

Aha ni ho hatangiye ibiganiro, ku busabe bwa Amerika byo kureba uburyo uyu mugabo yarekurwa, inzigo yari itangiye kuza mu mubano w'ibihugu ikavamo.

Ni nyuma y'uko kandi Umukuru w'Igihugu, Paul Kagame, atangaje ko nta muntu washyiraho u Rwanda igitutu kugira ngo rurekure Rusesabagina.

---

Kwemeza aya mavugurura ni umwe mu myanzuro yafatiwe mu Nama y'Abaminisitiri yateranye ku wa Gatanu tariki 24 Werurwe mu 2023, ikayoborwa na Perezida Paul Kagame.

Ibi bivuze ko mu gihe aya mavugurura azaba arangiye amatora ya Perezida wa Repubulika n'ay'Abadepite mu Rwanda yahuzwa nk'uko bisanzwe bigenda henshi ku Isi.

Ubusanzwe mu Rwanda, amatora y'abadepite n'aya Perezida wa Repubulika yabaga mu myaka itandukanye cyane ko na manda zitanganaga. Manda ya Perezida yari imyaka irindwi, iy'abadepite ikaba imyaka itanu.

Muri Gashyantare mu 2023 nibwo Komisiyo y'Igihugu y'Amatora yatanze icyifuzo cy'uko aya matora yombi yahuzwa.

Mu kiganiro Perezida wa Komisiyo y'Igihugu y'Amatora, Oda Gasinzigwa yagiranye n'itangazamakuru yavuze ko imwe mu mpamvu yatumye bagira iki cyifuzo ari ijyanye n'amatora.

Ati 'Turabona ko ari ikintu cyaba cyiza, abantu bamaze kubiganiraho neza ko hahuzwa amatora y'Abadepite na Perezida wa Repubulika. Ibi bizadufasha cyane kuko mu bihugu byose, ingengo y'imari mu gihe cy'amatora iba ari ikibazo gikomeye cyane, atari ku gihugu gusa ahubwo n'amashyaka ya Politiki.”

“Muzi ko amashyaka ya politiki akoresha amafaranga menshi mu gihe cyo gutegura amatora. Ibi bihujwe cyane cyane dushyira no mu gaciro ko imigabo n'imigambi y'aya mashyaka iba iganirwa mu gihe cyo gushaka abadepite, kandi ni nako bigenda mu gihe cy'amatora ya Perezida, iyo migabo n'imigambi ni yo isubizwa mu baturage kugira ngo bayumve. Bihujwe, byatugabanyiriza cyane ibijyanye n'ingengo y'imari hamwe n'umwanya.”

Komisiyo y'Igihugu y'Amatora igaragaza ko nibura itora rya Perezida wa Repubulika n'iry'abadepite yose hamwe atwara arenga miliyari 14Frw. Bivuze ko iyo izi mpinduka zitabaho, u Rwanda rwari kuzakoresha miliyari 7Frw mu 2023 mu matora y'abadepite, rukazongera gukoresha izindi miliyari 7Frw mu itora rya Perezida wa Repubulika.

Iyi komisiyo igaragaza ko mu gihe aya matora azaba ahurijwe hamwe hazakoreshwa ingengo y'imari ya miliyari 8Frw.

Mu gihe iyi gahunda izatangira gushyirwa mu bikorwa bivuze ko ko manda y'abadepite bariho uyu munsi yakwiyongeraho umwaka umwe ikazarangira mu 2024.

Indi nkuru bifitanye isano: https://igihe.com/amakuru/u-rwanda/article/komisiyo-y-amatora-yatanze-icyifuzo-cyo-guhuza-amatora-y-abadepite-n-aya

---

Ubusanzwe ishyamba rya kimeza rya Ibanda-Makera riherereye mu Murenge wa Mpanga mu Kagari ka Nasho aho rikora ku midugudu itatu, rifite ubuso bungana na hegitari 169.

Ni ishyamba ribarizwamo inyamaswa zirimo inkima, inkende, isatura, ingwe habarizwamo kandi amoko y'inyoni zitandukanye, amoko y'inzoka zitandukanye ndetse n'amoko 124 y'ibiti birimo n'ibivura indwara.

Mu myaka mike ishize REMA ifatanyije n'abafatanyabikorwa batandukanye batangiye umushinga wa miliyoni 400 Frw wo kugarura bimwe mu biti kimeza byari byarahacitse ndetse no kuriteramo ibiti byinshi mu rwego rwo kugarura umwimerere waryo.

Kuri uyu wa Gatanu ubuyobozi bw'Akarere ka Kirehe, abaturage ndetse n'umuryango wita ku bidukikije n'amajyambere y'icyaro, REDO, batangiye gutera imigano mu nkengero y'iri shyamba kugira ngo babungabunge amasoko n'igishanga biryegereye.

Umuyobozi w'ishami ry'ubuhinzi, ubworozi n'umutungo kamere mu Karere ka Kirehe, Nsengimana Janvier, yavuze ishyamba rya Ibanda-Makera kuri ubu bari kugenda bongeramo ubwoko butandukanye bw'ibiti ndetse no kurizitira kugira ngo mu minsi iri imbere bazarisabire uburengazira rikorerwemo ubukerarugendo nka bimwe mu byiza nyaburanga aka Karere gafite.

Nsengimana yasabye abaturage kurifata neza bakirinda ibyaryangiza.

Ati ' Abaturage turabasaba kuribungabunga turabasaba ko izi zisigaye zirigize bazibungabunga birinde kurijyamo kwica udukoko turirimo, birinde kuriragiramo kugira ngo bya biti bya gakondo bikure hahinduke ishyamba ryiza ritangiritse.'

Mu rwego rwo gufasha abaturage barituriye kugira ngo badakomeza kuryangiza Leta yabashakiye abafatanyabikorwa babaha amashyiga arondereza ibicanwa abandi bahabwa akazi mu kuriteramo ibiti, abandi bahurizwa mu makoperative atandukanye baterwa inkunga.

Ishimwe Clementine yavuze ko kera buri wese yarijyagamo gushaka inkwi ariko ngo ubu babonye umushinga ubungabunga ibidukikije wabahaye imbabura n'ibicanwa ku buryo batakinjiramo.

Niyikiza Cedric usanzwe ari umuvumvu we avuga ko mu myaka ishize hari ibiti byinshi byari birimo inzuki zataragaho, ibindi bakabikuramo imbaho ariko ngo aho abantu batangiriye kubyangiza byanatumye umusaruro w'ubuki babonaga ugabanuka.

Ati ' Ubu rero aho Leta n'abafatanyabikorwa batangiriye kongera guteramo ibiti, ubu buri munyamuryango wacu wese afite inshingano zo kurireberera tukareba ababa bashaka gutwikamo ibiti byaho amakara n'abandi baba bashaka kuriragiramo.'

Umuyobozi wita ku bidukikije n'amajyambere y'icyaro, REDO, Gashumba Damascene, yavuze ko bafite gahunda ndende y'imyaka 30 yo kwita kuri iri shyamba rya Ibanda Makera, aho bazariteramo ibiti byinshi gakondo, baribungabunge ku buryo ngo rizahinduka iry'ubukerarugendo rikaba ryaninjiriza amafaranga aka Karere.

Ati ' Imigano twariteyemo igamije kubungabunga iki gishanga kirikikije kuko niyo soko y'amazi yose aryinjiramo, twayiteyemo rero kugira ngo ikomeze ihafate inafate ubutaka bwe kwangirika.'

Gashumba yavuze ko kuri ubu bari kuganira na RDB kugira ngo babemerere habe haza abakerarugendo kuhasura ndetse anavuga ko batangiye ibikorwa byo kureba ahakubakwa ibyafasha abakerarugendo baba bahasuye birimo inzu n'inzira zakwifashishwa.

Umukozi mu kigo cy'Igihugu gishinzwe amashyamba, Mutabazi Jean Claude, yijeje abaturage ko gahunda ya Leta kuri ubu ari ugufasha abaturage baturiye amashyamba ya kimeza kugira ngo bayabyaze umusaruro, abizeza ko koperative nyinshi bagiye babahurizamo bazajya babashakira abaterankunga kugira ngo babafashe kwita kuri aya mashyamba abashe kubagirira umumaro.

---