Category: Uncategorized

Perezida wa Intare FC, Gatibito Byabuze, yavuze ko badateze gukina na Rayon Sports mu Gikombe cy'Amahoro kuko yavuyemo, ahubwo bari kwitegura guhura na Police FC muri 1/4.

Mu kiganiro yahaye Fine FM yavuze ko bari kwitegura Police FC kuko Rayon Sports batakina nayo kandi yarikuye mu irushanwa.

Ati 'N'iyo wazana itegeko cyangwa imbunda ukandasa, nzapfira ukuri kwanjye. Ikipe nari gukina na yo [Rayon Sports] yavuye mu Gikombe cy'Amahoro. Ibyo muri kunzanamo byose ni ukunsenya, mureke nitegure Police FC neza. Muri kunyobya.'

Ikipe y'Intare yandikiye FERWAFA kuri iki cyumweru iyibwira ko umukino wa Rayon Sports yazagenda ikawukina kuko batazawukina.

Kuri uyu wa Mbere tariki ya 27 Werurwe 2023,Perezida wa Rayon Sports, Uwayezu Jean Fidèle, yageze ku biro bya FERWAFA mu biganiro na Intare FC ariko yatashye nta muyobozi w'iyi kipe bazahangana uhageze.

Intare FC irashaka kungukira mu kuba Rayon Sports yari yivanye mu irushanwa kubera imitegurire ya FERWAFA itarayinyuze.

Rayon Sports yaje kwemera kugaruka mu irushanwa ariko byateje akavuyo kuko Intare FC idashaka gukina uyu mukino cyane ko n'ubundi amahirwe yayo yo gukomeza ari make kuko yatsinzwe ibitego 2-1 mu mukino ubanza yakiriye.

Source : https://umuryango.rw/imyidagaduro/imikino/article/perezida-w-intare-fc-yavuze-ko-batazigera-bakina-na-rayon-sports

Rutahizamu wa Napoli na Nigeria,Victor Osimhen yahishuye ko mu myaka ishize yari agiye kwerekeza mu ikipe ya Arsenal,ubwo yari afite imyaka 18 y'amavuko.

Uyu munya Nigerian w'imyaka 24,uri muri ba rutahizamu batatu bakomeye ku isi kugeza ubu ,arifuzwa n'amakipe akomeye mu Bwongereza arimo Manchester United,Chelsea na Arsenal.

Uyu rutahizamu amaze gutsinda ibitego 53 mu mikino 91 muri Napoli, birimo 25 mu mikino 29 amaze gutsinda muri uyu mwaka w'imikino.

Gutsinda ibitego ubudasiba nibyo byatumye ikipe ya Luciano Spalletti iri hafi kwegukana igikombe cya Serie A iheruka mu myaka 33 ishize,ibifashijwemo na kizigenza Maradona.

Napoli ubu irarusha ikipe iyikurikiye amanota 19 ndetse vuba aha iraba yegukany iki gikombe cya Serie A.

Uyu Osimhen yemeje ko umutoza Wenger wakoze amateka muri Arsenal yamuganirije ashaka kumugura ariko birangira agiye ahandi.

Yagize CentreGoals, ati: “Navuganye na Arsene Wenger kandi yashakaga ko njya muri Arsenal ariko ntabwo byari byiza icyo gihe.”

Wenger yagiye abura abakinnyi bakomeye mu myaka 22 yamaze atoza Arsenal.

Abakinnyi yarambagije bakamucika barimo Lionel Messi, Cristiano Ronaldo, Zlatan Ibrahimovic na Gareth Bale.

Source : https://umuryango.rw/imyidagaduro/imikino/article/rutahizamu-osimhen-yahishuye-ikipe-yari-agiye-kwerekezamo-mu-bwongereza

Nyuma yaho Televiziyo y'Abafaransa( France 24) ihaye ikiganoro Umuyobozi w'Umutwe wa Al Qaeda muri Maghreb (AQIM) , Guverinoma ya Burkina Faso yahise itanga itegeko ryo guhagarika ibikorwa by'iyi Televisiyo.

Itangazo ryashyizweho umukono n'Umuvugizi wa Guverinoma ya Burkina Faso, Jean-Emmanuel Ouedraogo, rivuga ko mu guha urubuga Umuyobozi Mukuru wa AQIM (Al Qaeda in the Islamic Maghreb), France 24 yahindutse umuyoboro w'itumanaho ry'abakora iterabwoba, inaha rugari iterabwoba n'imvugo z'urwango ziganisha ku ntego z'uyu mutwe muri Burkina Faso.

Itangazo rikomeza riti “Bityo, Guverinoma mu nshingano zayo no mu nyungu zikomeye z'igihugu, yafashe icyemezo cyo guhagarika gahunda z'ibiganiro za France 24 ku butaka bw'iki gihugu.”

Ibi bibazo byatangiye ubwo ku wa 6 Werurwe, France 24 yatangazaga ibisubizo byanditse bya Abu Obeida Youssef al-Annabi, umuyobozi wa AQIM, ku bibazo 15 byatanzwe n'umunyamakuru wayo, Wassim Nasr.

Mu ntangiriro za Ukuboza nabwo, ubuyobozi bwa Ouagadougou bwahagaritse Radio France Internationale (RFI), ishinjwa gukwirakwiza ubutumwa bukura umutima bw'umwe mu bayobozi b'imitwe y'iterabwoba.

RFI na France 24 kandi byahagaritswe muri Mali nayo iyoborwa n'ubutegetsi bwa gisirikare, bishinjwa gutambutsa ubutumwa bushyigikira iterabwoba.

Guverinoma ya Burkina Faso yaburiye inzego zose ko izakomeza kurengera inyungu z'igihugu, ikarinda abaturage abantu bose bazemera kuba “imizindaro yo kumenyekanisha ibikorwa by'iterabwoba, amagambo y'urwango n'amacakubiri bibibwa n'imitwe yitwaje intwaro.”

Kuva mu 2015, Burkina Faso ihanganye n'imitwe yitwaje intwaro ya Islamic State na al-Qaeda, imaze guhitana abantu basaga 1000 barimo abasivili n'abasirikare, ndetse abagera kuri miliyoni ebyiri bavanywe mu byabo.

Captain Ibrahim Traoré wagiye ku butegesi mu mezi atandatu ashize, avuga ko arajwe ishinga no kugarura amahoro muri iki gihugu.

Source : https://umuryango.rw/amakuru/mu-mahanga/article/bitunguranye-burkina-faso-yahagaritse-televiziyo-y-abafaransa

Lt. Gen. Muhoozi Kainerugaba, umujyanama wihariye akaba n'imfura ya Perezida Yoweri Kaguta Museveni wa Uganda ,yahishuye abahanzi bazitabira ikirori cyo kwizihiza isabukuru ye y'amavuko y'imayaka 49.

Mu birori Muhoozi Kainerugaba yise 'Rukundo Egumeho' yavuze ko Intore Massamba, Kenny Sol na Bwiza bari mu bahanzi bo mu Rwanda bazataramira abazitabira ibirori byo kwizihiza isabukuru y'amavuko ya 49.

Kizaba ku ya 19 Mata 2023 ku kibuga cy'umupira cy'ishuri rya Kigezi mu Karere ka Kabale mu Burengerazuba bwa Uganda.Kwinjira bizaba ari ubuntu.

Ni ku nshuro ya kabiri Massamba atumiwe muri iki gitaramo mu gihe umwaka ushize ubwo Muhoozi yizihizaga isabukuru y'imyaka 48 nabwo yari yatumiwe mu cyabereye i Kampala.

Abandi bahanzi bo muri Uganda batumiwe harimo Ray G, Vinka, Eddy Kenzo, Spice Diana n'abandi.

Source : https://umuryango.rw/imyidagaduro/article/gen-muhoozi-yahishuye-abahanzi-nyarwanda-bazitabira-ikirori-cy-isabukuru-ye

Imfura ya Perezida wa Uganda Yoweri Museveni yatangaje ko azasezera mu gisirikare cy'igihugu bitarenze uyu mwaka wa 2023.

Ni imirimo yakoze imyaka isaga 30. Ariko ngo agomba gufata umwanzuro wo kuyihagarika burundu nk'uko bikubiye mu butumwa yanyujije ku rukuta rwe rwa tweeter, aho akunze gutangira ibitekerezo.

Yagize ati' ndasezera mu gisirikare cya UPDF muri uyu mwaka'
Mu mwaka ushize, uyu mutegetsi mu gisirikare yatangaje ubutumwa nk'ubu ubwo yari umuyobozi w'igisirikare kirwanira ku butaka, gusa igisirikare gitangaza ko nta baruwa Kainerugaba yatanze mu buryo bwemewe n'amategeko.

Gen. Muhoozi yanditse ubutumwa bwo gusezera igisirikare nyuma y'iminsi mike asibye ubutumwa yari yanditse atangaza ko aziyamamariza kuyobora Uganda mu matora ya 2026.

Uyu Jenerali ukunda kwandika kuri Twitter ntiyigeze ahisha ko ashaka kuzasimbura se w'imyaka 78, umaze imyaka 37 ategeka Uganda.

Amategeko ya Uganda ntiyemerera abasirikare bakiri mu kazi kujya muri politiki.

BBC

Source : https://umuryango.rw/amakuru/mu-mahanga/politiki/article/uganda-gen-muhoozi-yavuze-ko-azasezera-mu-gisirikare-cya-updf-bishimangira

Ni igikorwa cyateguwe n'Ikigo Nyafurika gishinzwe guteza imbere Ubumenyi bushingiye ku Mibare (AIMS) ku bufatanye na Sosiyete y'Itumanaho, Airtel Rwanda.

Iki gikorwa kibaye ku nshuro ya gatatu cyageze ku barimu b'imibare bo mu turere 14 dusanzwe dukorana na AIMS n'abo mu tundi dutandukanye tw'igihugu bagaragaje ubudasa mu kwigisha imibare bigaragarira mu banyeshuri batsindisha.

Uyu muhango wabaye kuri iki Cyumweru, tariki ya 26 Werurwe 2023 aho aba barimu bahawe ibihembo bitandukanye birimo mudasobwa na iPad bigiye kubafasha gukataza mu ikoranabuhanga.

Umuyobozi wa AIMS mu Rwanda, Prof. Sam Yala, yavuze ko iki gikorwa gitegurwa kugira ngo hashimirwe abarimu babaye indashyikirwa mu kazi kabo.

Ati 'Iki ni igikorwa kigamije gushimira abarimu bigisha abana bacu bakora ibikorwa by'indashyikirwa. Twabonye ko ari ingenzi kubashimira umuhate bakorana.'

Umuyobozi wa Airtel Rwanda, Emmanuel Hamez, yavuze ko nk'ikigo gikora ibijyanye n'ikoranabuhanga kandi rishingiye ku mibare bishimira kugira umusanzu batanga ku barimu.

Ati 'Tunejejwe no kuba abaterankunga b'iki gikorwa cyo guhemba kuko imibare ni ikintu cy'ingenzi muri iyi minsi. Kuri ubu ibintu byinshi bisaba ikoranabuhanga nko mu itumanaho n'ikoranabuhanga.'

'Kuri ubu hari ubwenge bw'ubukorano bisaba imibare myinshi n'ibindi, ubu dukeneye abantu benshi mu kigo cyacu bakora ibijyanye n'imibare cyane abagore; ni yo mpamvu tubashishikariza kwitabira iki gice.'

Kuri uyu munsi kandi hatanzwe impamyabushobozi ku barimu 380 bamaze amezi abiri bahabwa amahugurwa yo gukoresha ikoranabuhanga bigisha imibare.

Iyi ni gahunda y'amasomo itegurwa na AIMS ifatanyije na Minisiteri y'Uburezi, Umuryango MasterCard Foundation mu gihe amasomo atangwa n'Ikigo cyigisha kikanatanga Impamyabushobozi mu masomo y'Ikoranabuhanga 'International Computer Driving Licence (ICDL).

Aya masomo ahabwa abarimu bo mu turere 14, abamaze kuyahabwa kuri ubu basaga 5000. Yatangijwe kugira ngo hongerwe umubare w'abanyeshuri by'umwihariko abakobwa biga Siyansi. Intego kwari ukugera ku banyeshuri 228.000 ariko kuri ubu imaze kugera kuri 276.323 muri bo 60% ni abakobwa.

Prof. Sam Yala yavuze ko impamvu bakomeje gushyira imbaraga muri iyi gahunda ari ukuzamura abanyeshuri biga aya masomo kuko byagaragaye ko agira uruhare mu iterambere.

Ati 'Intego ihari ni ukuzamura umubare w'abakobwa n'abahungu biga amasomo ya Siyansi n'Ikoranabuhanga kuko iki ni igice cy'agaciro mu bukungu bwa buri gihugu, kongera umubare w'abanyeshuri ni ukwihutisha iterambere ry'ubukungu.'

Ibi abihuje n'Umuyobozi Mukuru w'Urwego rw'Igihugu Rushinzwe Uburezi bw'Ibanze (REB), Dr. Nelson Mbarushimana, wavuze ko abanyeshuri benshi nibajya muri aya masomo bizagira uruhare mu iterambere ry'igihugu.

Ati 'Imibare na siyansi ni ingenzi cyane kuko ni yo soko y'ubumenyi. Ubu gahunda ya MINEDUC na REB ni ugukoresha uko dushoboye kugira ngo abanyeshuri barangiza amashuri yisumbuye babe bafite ubumenyi buhagije muri aya masomo kugira ngo bizabafashe kwihangira umurimo no gukomeza na kaminuza.'

Ku ruhande rw'abarimu bahawe ibihembo n'abahuguwe bashimiye ibigo bitandukanye byagize uruhare mu kubongerera ubumenyi.

Niyonizera Médiatrice wigisha muri GS Giharwa iherereye mu Karere ka Nyanza, amaze igihe yarahuguwe ndetse yashimiwe mu barimu b'indashyikirwa. Yavuze ko ubumenyi bahawe bwabafashije kwagura imyigishirize.

Ati 'Mbere najyaga nigisha imibare nkoresheje amagambo gusa ariko ubu nkoresha n'ingero z'ibifatika. Ibi byatanze umusaruro kuko buri mwaka mbona abanyeshuri batanu bafite 'inota' rya mbere mu mibare.'

Tuyishime Fidel wigisha muri GS. Kaburiro mu Karere ka Nyamasheke yavuze ko amahugurwa amaze iminsi ahabwa azamufasha kongera uburyo yigisha.

Ati 'Aya mahugurwa nakuyemo ubumenyi bwinshi. Namenye gukoresha ikoranabuhanga ku buryo narikoresha mu mibare mu buryo butandukanye. Ubumenyi nkuye hano buzamfasha kongera imitsindire y'abanyeshuri.'

AIMS yatangijwe mu 2003 ifite intego yo kuzamura ubumenyi bushingiye ku mibare. Mu Rwanda yatangiye kuhakorera mu 2017, ikorera mu bindi bihugu nka Afurika y'Epfo, Sénégal, Ghana na Cameroun.

MasterCard Foundation yahembye abarimu bitwaye neza

Umuyobozi Mukuru w'Urwego rw'Igihugu Rushinzwe Uburezi bw'Ibanze (REB), Dr. Nelson Mbarushimana, ashimira umwarimu wahize abandi

Abarimu basoje amasomo bahawe impamyabushobozi

Abarimu babaye indashyikirwa bahembwe mudasobwa

Abarimu bahuguwe bemeza ko byazamuye ireme ry’amasomo batanga

Byari ibyishimo ku barimu batandukanye bitabiriye iki gikorwa

Hari gushyirwa imbaraga mu cyazamura umubare w’abakobwa biga imibare

Iyi gahunda igera ku barimu bo mu turere 14 AIMS ikorana na two

Umuyobozi wa Airtel Rwanda, Emmanuel Hamez, yavuze ko nk'ikigo gikora ibijyanye n'ikoranabuhanga kandi rishingiye ku mibare bishimira kugira umusanzu batanga mu barimu batanga ubu bumenyi

Umuyobozi wa AIMS mu Rwanda, Prof. Sam Yala, yavuze ko iki gikorwa gitegurwa kugira ngo hashimirwe abarimu babaye indashyikirwa mu kazi kabo

Umuyobozi Mukuru w'Urwego rw'Igihugu Rushinzwe Uburezi bw'Ibanze (REB), Dr. Nelson Mbarushimana, yavuze ko abanyeshuri benshi ni bajya muri aya masomo bizagira uruhare mu iterambere ry'igihugu

Abahagarariye ibigo bitandukanye byashyize imbaraga mu guteza imbere imibare

Abarimu bahawe ibihembo bose hamwe

---

Source : http://igihe.com/amakuru/u-rwanda/article/abarimu-200-babaye-indashyikirwa-mu-kwigisha-imibare-bashimiwe

Mu gikorwa cy'Umuganda usoza ukwezi kwa Werurwe 2023 mu Murenge wa Kiyumba, Akarere ka Muhanga, Intore z'Itorero ry'Impeshakurama mu karere ka Muhanga, bahamirije abaturage n'abayobozi ko biyemeje gufatanyiriza hamwe n'inzego za Leta n'abafatanyabikorwa mu guhangana n'ibibazo bibangamiye imibereho myiza y'abaturage, kurandura imirire mibi n'igwingira mu bana, ari nako bakangurira abaturage kwipimisha indwara zandura n'izitandura.

Muri iki gikorwa cy'Umuganda, izi Ntore zagabiye Inka irero ryo mu kagari ka Remera kugira ngo izajye ikamirwa abana. Hanatanzwe kandi Amagi ku marerero atandukanye hagamijwe gufasha imiryango itabasha kuyabonera abana babo.

Nyiransabimana Marthe, Umuyobozi w'Ikigo cy'Amashuri Abanza cya Kanyanza B ari nacyo kireberera uru rugo mbonezamikurire, yashimiye aba bakora mu buvuzi( Impeshakurama) babageneye inka izakamirwa abana baziga muri uru rugo mbonezamikurire. Yagaragaje ko mu busanzwe amata bayabonaga rimwe na rimwe.

Yagize Ati'' Turashimira aba bibumbiye mu mutwe w'abakoze itorero ry'Impeshakurama baduhaye inka kuko nimara kubyara izajya ihora ikamirwa aba bana baziga hano kuko akenshi bajyaga bayabona gacye, rimwe na rimwe tukayavanga n'igikoma yavura bakakinywera aho. Kuva tubonye inka bizatuma azajya aboneka buri gihe bayanywe kandi bizafasha kubaho neza bagire imirire myiza. Tuzagira uruhare mu kurandura imirire mibi'.

Iradukunda Marie Jeanne, avuga ko umwana we yaguye mu mirire mibi aragwingira, ko kandi byatewe n'ubumenyi bucye yari afite. Ahamya ko ubu yamaze kwigishwa kandi ibyo yigishijwe byatangiye gutuma umwana ava mu mirire mibi. Ati' Ibyo kugaburira abana bacu turabifite ariko ubumenyi bucye nibwo butuma bagwa mu mirire mibi n'Igwingira ariko kuva batwigisha byarahindutse'.

Mukamanzi Dorothea avuga ko benshi mu babyeyi baba badafite ubumenyi bwuzuye bwo gutegura neza ifunguro ryuzuje ibisabwa kandi ritunganyije neza. Yemeza ko imirire mibi ikwiye kurwanywa biturutse mu muryango.

Umuyobozi w'Umutwe w'Itorero Impeshakurama mu karere ka Muhanga, Ezella Dusengimana yabwiye umunyamakuru wa intyoza.com ko mu itorero ryabo bihaye ingamba zo kwegera abaturage bakabigisha uburyo ubuzima buzima bukwiye kuba buteye ndetse no kugira uruhare mu guhangana n'ibibazo ahanini biterwa n'imirire mibi n'ibindi byavuka.

Biyemeje kandi kubashishikariza gutanga ubwisungane mu kwivuza, kugira uruhare mu kurandura burundu imirire mibi n'igwingira no kugana serivisi z'ubujyana zitangirwa ku bigo Nderabuzima n'ibitaro.

Akomeza ashimangira ko bazakomeza gukangurira abaturage kuza kwipimisha indwara zandura harimo umwijima wo mu bwoko bwa B na C ariko kandi no kwibuka ko hari n'izindi ndwara zitandura zikwiye kwirindwa hakiri kare kugirango bakore bisanzuye bateze imbere imiryango.

Umuyobozi w'Ibitaro bya Kabgayi, Dr Muvunyi Jean Baptiste avuga ko kuba umwana yagwa mu mirire mibi n'Igwingira akenshi biterwa n'uburangare bw'ababyeyi, aho usanga bihugiyeho ntibabashe gutegurira neza abana babo indyo yuzuye nyamara usanga ibyo bakwiye kubagaburira babifite aho batuye.

Yongeraho ko mu karere hose hari abana 54 barimo kwitabwaho hagamijwe kubavana mu mirire mibi n'Igwingira, ko kandi ibi bitakorwa n'umubyeyi gusa, ko ahubwo n'abafatanyabikorwa bagomba gufasha mu guhugura ababyeyi, bakibutswa ko ifunguro ryuzuye riba ririmo ibikungahaye kuri Poroteyini, Vitamini, Ibyubaka umubiri.

Impeshakurama ziherutse gutanga amafaranga asaga Miliyoni 5,6, harimo inka yahawe irerero rya Gifumba n'iyi yahawe irerero ryo ku kagali ka Remera muri Kiyumba. Hanatanzwe Miliyoni 3 zatangiwe abaturage basaga ibihumbi 2500 batari barasoje gutanga ubwisungane mu kwivuza, hatanzwe inkoko 54 ku miryango ifite abana 54 bafite imirire mibi n'Igwingira, hatangwa amagi 1,620 aho buri mwana yagenewe amagi 30 mu gihe cy'ukwezi. Bivuze ko buri munsi umwana agomba guhabwa igi rimwe.

Mu bihe bitandukanye bamwe mu babyeyi bagenda bavuga ko ubumenyi bucye no kwirengagiza inshingano kuri bamwe bituma abana bagwa mu mirire mibi. Mu cyerekezo cya Leta cy'Imyaka 7 kizageza 2024 U Rwanda rwihaye intego ko Imirire mibi n'igwingira bizaba biri ku kigero cya 19%, bivuye ku bana bafite imirire mibi n'Igwingira iri ku mpuzandengo ya 33% ku rwego rw'Igihugu.

Akimana Jean de Dieu

Source : https://www.intyoza.com/2023/03/27/muhanga-kiyumba-nyuma-yumuganda-impeshakurama-zagabiye-urugo-mbonezamikurire/

Guhera mu mezi atanu ashize, umuryango wa Rusesabagina wari waracecetse nta kintu uvuga, ku buryo n'umukobwa we Carine Kanimba wari umaze kuba ikirangirire mu itangazamakuru atari agikoma. Ni ibintu byacaga amarenga y'uburyo Amerika n'umuryango w'uyu mugabo bahinduye imyitwarire mu kibazo cye.

Ni ko byakomeje no kuva ku wa Gatanu ubwo uyu mugabo yafungurwaga. Usibye abayobozi ba Amerika banditse bashima, umuryango we nta kintu na kimwe wigeze utangaza.

IGIHE yabashije kubona amakuru y'uko hari umuntu wagenwe n'uyu muryango ngo abe ariwe uzajya avuga ku bijyanye n'ifungurwa rya Rusesabagina.

Uwo muntu ni Juleanna Glover usanzwe ari umujyanama w'ibigo bitandukanye. Yakoze ubujyanama mu bigo bikomeye ku Isi nka Uber, Tesla, Microsoft, Oracle, eBay, the Smithsonian, Snapchat, JP Morgan Chase, Netflix, Tata Sons, CVS Health, SpaceX, Chobani, AT&T, LVMH, PepsiCo, Google, Alibaba, n'ibindi.

Mu butumwa yasubije IGIHE kuri email ubwo yabazwaga ku bijyanye n'ifungurwa rya Rusesabagina yagize ati “Umuryango wa Paul Rusesabagina unejejwe no kwakira inkuru ijyanye n'ifungurwa rye. Wizeye ko uzongera kumubona vuba.”

Ntabwo Juleanna yigeze asubiza ibibazo bindi byerekeye n'ifungurwa rya Rusesabagina, birimo igihe azagerera muri Amerika n'ibindi.

Bivugwa ko ubwo Rusesabagina azaba ageze muri Amerika, nta mihango yo kumwakira izabaho, ahubwo azabaho nk'umuturage usanzwe aho gukomeza kugaragazwa nk'intwari.

Amakuru avuga ko ari ibintu abayobozi ba Amerika bemeye ndetse nawe mu ibaruwa yandikiye Umukuru w'Igihugu asaba imbabazi, yavuze ko nagera muri Amerika azakoresha umwanya we mu 'kwitekerezaho' kandi ko nta hantu na hamwe azongera guhurira na politiki y'u Rwanda.

Ubwo Rusesabagina yafungurwaga mu ijoro ryo ku wa Gatanu ahagana Saa Yine z'Ijoro, yavuye i Mageragere aherekejwe n'abayobozi bo muri Ambasade ya Amerika, ajyanwa mu Rugo rwa Ambasaderi wa Qatar i Kigali.

Yagumye mu maboko ya Ambasade ya Qatar nk'uko byari mu myanzuro imufungura. Yagombaga gusaba uburenganzira bwo gusohoka igihugu, akabuhabwa na Minisitiri w'Ubutabera ubundi akabona kwerekeza i Doha aho azamara iminsi mike akabona kujya muri Amerika.

Umwe mu bantu babonanye na Rusesabagina ku wa Gatandatu, yabwiye IGIHE ko yasanze ameze neza nta kibazo na kimwe afite.

Amakuru avuga ko bishoboka ko kuri uyu wa Mbere aribwo ava mu Rwanda yerekeza i Doha. Ntabwo biramenyekana niba akiri mu gihugu cyangwa se yamaze kugisohokamo.

Hari n'andi makuru avuga ko atarabona ibyangombwa bimuvana mu Rwanda, ko bishobora gufata iminsi.

Ifungurwa rya Rusesabagina, ni intambwe ikomeye yatewe mu kuzahura umubano w'u Rwanda na Amerika wari umaze igihe kigera ku myaka itatu urimo agatotsi.

Leta Zunze Ubumwe za Amerika yashyize igitutu gikomeye ku Rwanda isaba ko uyu mugabo afungurwa, u Rwanda rwo ruvuga ko rudashobora guhatirwa kurekura umuntu wakoze ibyaha ndengakamere nk'ibye.

Byatume habaho ukugongana gukomeye kugeza n'aho Umunyamabanga wa Leta ya Amerika ushinzwe Ububanyi n'Amahanga, Antony Blinken, afata indege akajya i Kigali muri gahunda ze harimo gucyura Rusesabagina.

Umuvugizi muri Perezidansi y'u Rwanda, Stephanie Nyombayire, yanditse kuri Twitter ko guhabwa imbabazi kwa Rusesabagina bidakuraho igihano yahamijwe, ndetse ko gishobora gusubizwaho mu gihe yaba asubiriye ibyaha yakoze. Ati “Umubano mwiza hagati y'u Rwanda na Qatar, wabaye ingenzi cyane.”

Yakomeje avuga ko irekurwa rya Rusesabagina ari umusaruro “w'ubushake buhuriweho bwo kuzahura umubano w'u Rwanda na Leta Zunze Ubumwe za Amerika”.

Akirekurwa, Qatar yahamije ko yagize uruhare mu biganiro byaganishije ku kuba Rusesabagina yahawe imbabazi, “ndetse ko gahunda yo kumwohereza muri Qatar irimbanyije”.

Umuryango wa Rusesabagina watangaje ko witeguye guhurira na we muri Leta Zunze Ubumwe za Amerika

---

Source : http://igihe.com/amakuru/u-rwanda/article/umuryango-wa-rusesabagina-wagize-icyo-uvuga-ku-ifungurwa-rye

U Rwanda nk'Igihugu gikunze kwibasirwa n'ibiza, rwagaragarije amahanga ingamba rwafashe mu kugabanya ingaruka ziterwa nabyo, zirimo kubaka ubudahangarwa bw'abaturage batuzwa ahadashyira ubuzima bwabo mu kaga.

Ibi byagarutsweho kuri uyu wa 27 Werurwe 2023, mu biganiro byahuje u Rwanda n'Abafatanyabikorwa barwo bigira hamwe uko hashyirwaho ingamba zihuriweho, mu guhangana n'ibiza no kugabanya ingaruka ziterwa nabyo.

Imiterere y'u Rwanda nko kuba ari urw'imisozi bituma rukunda kwibasirwa n'ibiza bitandukanye ahanini biterwa n'imvura.

Bibarwa ko byibura ko buri mwaka imiryango ibihumbi 10 mu Rwanda, igerwaho n'ingaruka ziterwa n'ibiza.

Mu nama yiga ku ngamba zo guhangana n'ibiza no kugabanya ingaruka ziterwa nabyo yahuje Leta y'u Rwanda n'abafatanyabikorwa bayo, bagaragaje ko guhangana n'ibibazo bisaba ubufatanye bw'inzego zitandukanye, kandi abaturage bagahabwa umwanya munini mu ngamba zose zifatwa.

 Luca Rossi ni umuyobozi wungirije muri Afurika by'ishami rya Loni ryita ku guhangana n'ingaruka ziterwa n'ibiza, naho Ozonnia Ojielo  ni umuhuzabikorwa w'amashami y'Umuryango w'Abibumbye akorera mu Rwanda.

Luca ati 'Ushobora kugira ubushobozi mubya tekinike, muby'amafaranga, rimwe na rimwe ufite ubushobozi bwo kubishyira mu bikorwa ariko abaturage batarumva neza ibyo ubakorera  ngo babigire ibyabo ubereke n'inshingano zabo, ibyo ukora byose byaba imfabusa.'

Ozonia ati 'Mu bari hano, buri wese arabizi ko guhangana n'ingaruka ziterwa n'ibiza bisaba uburyo buhamye buhuriweho n'abakora mu nzego zinyuranye, zirimo iza Leta ndetse n'abaturage bo hasi.'

Ibiza bikunze kwibasira u Rwanda bikunze kuzahaza bikomeye abaturage b'amikoro macye, bitewe n'uko akenshi baba batuye ahashyira ubuzima bwabo mu kaga.

Minisitiri w'Ibikorwa by'Ibutabazi, Kayisire Marie Solange, avuga ko zimwe mu ngamba zo guhangana n'ingaruka ziterwa n'ibiza ari ukubaka ubudahangwa bw'abaturage, bafashwa gutura heza hadashyira ubuzimwa bwabo mu kaga.

Ati 'Ni ukureba impamvu zakwibandwaho kugira ngo zigabanye ibyo byatera Ibiza, yaba ubukene bw'abaturage no gukomeza kubazamurira ubushobozi. Hanyuma ariko no kubigisha gukora ibintu bihangana n'ibiza harimo kubaka amazu adashobora gutwarwa n'imvura no gutwarwa n'umuyaga uwari wo wose no gutura ahantu habugenewe.' 

Imibare itangwa na Minisiteri y'Ibikorwa by'Ubutabazi, igaragaza ko buri mwaka igihugu gihomba Miliyoni 300 z'amadorari kubera ingaruka z'Ibiza.

Daniel Hakizimana

The post <strong>Rwanda: Hagaragajwe ingamba zo guhangana n'ingaruka ziterwa n'ibiza</strong> appeared first on FLASH RADIO&TV.

Source : https://flash.rw/2023/03/27/rwanda-hagaragajwe-ingamba-zo-guhangana-ningaruka-ziterwa-nibiza/?utm_source=rss&utm_medium=rss&utm_campaign=rwanda-hagaragajwe-ingamba-zo-guhangana-ningaruka-ziterwa-nibiza