Category: Uncategorized

Nta kindi umugore w'uyu mugabo yifuzaga usibye gatanya, ndetse igaherekezwa na 50 ku ijana y'imitungo yose Hakimi afite. Gusa siko byaje kugenda kuko umushibuka waramushibukanye, ubwo yasangaga umugabo we nta mutungo n'umwe afite.

Nemeye Platini yamenyekanye cyane ku mazina ya Platini P, akaba umuhanzi w'umunyamurava, ugira ishyaka, urwanira ishyaka abandi ndetse akagira ubumuntu no kwihesha agaciro, ku bamuzi ibi mvuze nta nakimwe mbeshye.

Platini yamenyekanye cyane mu itsinda rya Dream Boys, rimwe mu matsinda yabayeho agashimisha abatagira ingano mu muziki nyarwanda. Uyu muhanzi imyaka yose nta kibi yari azwiho muri iyi myidagaduro, usibye gushaka no guhiga ifaranga binyuze mu muziki mwiza bakoraga.

Aba bahanzi bakoze amateka igihe kiragera baza gutandukana ndetse buri umwe aca inzira ye, ariko byose babikora nta rwango rurimo kuko kugeza ubu ntan'ikintu bapfuye cyigeze kigaragara usibye ko TMC yimutse akajya gutura no kwiga muri Amerika.

Platini nk'umunyeshyaka yaje kurwana intambara ku giti cye, kgeza ubwo yubatse izina rye mu bihe bigoranye, maze akora ingendo zitandukanye ajya kuririmba kugeza n'ubwo yaje gufatwa na Label yo muri Nigeria yitwa One Percent n'ubu niyo abarizwamo.

Igihe cyarageze maze Platini ashaka umugore kugira ngo ibyo yavunikiye babisangire cyane ko no muri Bibiliya ibisobanura neza, imihango yose y'ubukwe arayikora, kugeza ubwo atumiye inshuti n'abavandimwe abereka umugeni, nyuma yaje no kwera imbuto abyara umwana mwiza n'ibyishimo byinshi yerekana uko yamwakiriye.

Platini amaze kugera mu rugo ibintu byabaye bibi kugeza ubwo asanze umwana atari uwe, ndetse ubu imitungo yavunikiye inzira ishoboka akaba ari ukuyigabana n'umugore, cyane ko bari barasezeranye kubana.

Ntiharamenyekana icyo Platini yasezeranye n'umugore we niba ari ivangamutungo, cyangwa ivangamutungo muhahano, gusa bibaye ari ivangamutungo kuri bombi imitungo bayigabanya bakanganya.

Platini ubwo yazamuraga ikiganza asezerana na Olivia

Mu gushaka kumenya niba bagabana hagati nyuma y'ibyo umugore akoreye Platini, twegereye umunyamategeko Irene usanzwe aburanira abahanzi batandukanye, maze abitubwira muri aya magambo:

Yagize ati 'Umva icyaba cyose icyaba cyose bagasezerana, iyo habayeho Divorce muragabana batitaye icyateye Divorce, muragabana niko bimeze n'iyo yaba yakubeshye mugasezerana ivangamutungo, kuko umutungo muba mwawuvanze.'

Olivia yazamuye ukuboko ahamya isezerano rye

Yakomeje agira ati: 'Iyo mwabanye muba mwabanye, keretse mwarasezeranye ivanguramutungo cyanwa se mwarasezeranye ivangamutungo muhahano.

Hanze ahangaha usigaye ushakana n'umuntu kumbi hari icyo agushakaho, nyuma agahita agushakaho impamvu ituma mutandukana, icyo gihe rwose muragabana buri kantu.'’

Ku byerekeye uwaba ari mu makosa Maitre avuga ko n'ubwo yaba ariwe uri mu makosa icyaba cyose muragabana, gusa nta tegeko riraza ryerekana ko mushobora kugabana ibyo buri muntu yazanye, gusa kugeza ubu iyo Divorce itanzwe muragabana buri kimwe.

Ku bivugwa ko umugore yamutwaye ibintu byose munzu n'amafaranga;

Abagabo Bo kubihamya barimo na Clément

Maitre Irene yavuze ko aha Platini agomba kugaragaza ibyo umugore yamusahuye, noneho bakagabana bakuyemo ibyo yamutwaye ariko ngo nta kibuza kugabana nawe.

Umwana Platini yamwitayeho uko ashoboye

Platini yakundaga Olivia bikabera urugero abandi bahanzi

Muhoozi yabimubwiye ku mugoroba wo kuwa Mbere tariki 24 Mata 2023, ubwo yakirwaga na Perezida Kagame na Madamu mu kwizihiza isabukuru ye y'amavuko y'imyaka 49.

Mu ijambo rye, Gen. Muhoozi yashimangiye ko Perezida Kagame ari inshuti ye. Avuga ko intangiriro yo gushimangira ubushuti ari 10 yamugabiye, kandi yishimira.

Avuga ati 'Nagira ngo nkubwire Nyakubahwa, za nka zimeze neza, zarabyaye, wampaye inka 10 none ubu zabaye 17 zivuye kuri zazindi wampaye.'

Mu ijambo rye, Perezida Kagame yashimye Gen. Muhoozi ku bwo kuba intangiriro y'imibanire myiza y'ibihugu byombi.

Umukuru w'Igihugu yavuze ko u Rwanda na Uganda ari inshuti kandi bafite amahoro. Ati 'Turabona amahoro hagati y'ibihugu byacu. Nibyo, mushobora kugira amahoro ariko hari igihe mutaba inshuti, ariko ubu ndatekereza ko ubu byombi tubifite. Turi inshuti ndetse dufite n'amahoro. Warakoze Gen. Muhoozi ku ruhare wagize muri ibi, kuba warabaye ikiraro gihuza impande zombi.'

Umwaka ushize Muhoozi yizihirije isabukuru muri Uganda. Icyo gihe yari yatumiye Perezida Paul Kagame.

Tariki 15 Werurwe 2022, nibwo Perezida Paul Kagame yakiriye mu rwuri rwe imfura ya Perezida Museveni, Gen. Muhoozi Kainerugaba, amugabira inka z’Inyambo.

Si ubwa mbere Perezida Kagame agabiye inka abo mu muryango wa Perezida Museveni. Tariki 31 Nyakanga 2011, Perezida Kagame yagabiye Perezida Yoweli Kaguta Museveni inka 10 z’Inyambo ubwo bari mu rwuri rwe, ruherereye mu nkengero z’ikiyaga cya Muhazi mu Karere ka Kayonza mu Ntara y’Iburasirazuba. 

Mu mpera za 2011 ubwo Perezida Kagame yari muri Uganda mu kiruhuko cya Noheli, nawe yagabiwe na Perezida Museveni inka 20 z’amashashi yo mu bwoko bwa Ankole.

 

 

Gen. Muhoozi yashimye Perezida Kagame wamugabiye inka 10 none zikaba zimaze kuba 17 

Ku wa 15 Werurwe 2022, nibwo Perezida Kagame yagabiye Muhoozi inka 10 

Ku mugoroba wo kuwa Mbere tariki 24 Mata 2023, nibwo Perezida Kagame na Madamu bakiriye Gen.Muhoozi mu kwizihiza isabukuru ye

Kugeza ubu uyu mukinnyi wo muri Norway amaze gutsinda ibitego 32 muri Premier League, ndetse ni nawe uyoboye abandi ba rutahizamu. Agitsinda ibi bitego yahise akuraho agahigo kari gafitwe na Mohammed Salah ko gutsinda ibitego byinshi mu mwaka umwe w’imikino wa shampiyona y’ikiciro cya mbere mu Bwongereza, kandi nta n'ubwo shampiyona iratangira ubwo bivuze ko uyu mubare uzakomeza kwiyongera.

Umwana wa Pep Guardiola mu bijyanye no gutoza, Mike Arteta mu kiganiro n’itangazamakuru gitegura umukino w'ejo yafashe umwanya avuga kuri Haaland, yavuze ko nta wundi rutahizamu wamugereranya nawe.

Uyu mutoza wa Arsenal yagize ati “Iyo urebye imibare ye, ntiwamugereranya n’undi muntu.” Ashoboye gutanga umusaruro kubera ko aba ahagaze mu buryo bukwiye kuri we, ndetse n'abari kumwe nawe bafite ubushobozi bwo gukina mu buryo butandukanye”.

Abajijwe uburyo azakoresha agafata Haaland, yavuze ko afite amayeri azakoresha ariko byaba byiza ayaretse, maze akomeza agira ati “Turimo gukora bikomeye ku mbaraga ze ndetse n’intege nke ze, tuzi uko bameze, Manchester City itangira gukina bahereye ku muzamu. Gusa turi kwibanda kuri twe cyane, tuzi icyo bashobora gukora ndetse bashobora gukora ibintu byinshi ku buryo ugomba kubyakira”.

Kugeza ubu Arsenal niyo iyoboye urutonde rwa shampiyona, irusha amanota 5 Manchester City gusa nayo ifite imikino 2 y’ibirarane. Mu minsi yashize Arsenal yari yicaye itekanye, ariko kunganya imikino 3 yikurikiranya nibyo bibashyiraho gutsinda umukino wo ku munsi w'ejo kugira ngo bizere kuguma ku mwanya wa mbere.

Mikel Arteta uvuga ko afite amayeri yo gufatisha Haaland

Ibiro by'Umukuru w'Igihugu w'u Rwanda, Village Urugwiro, byatangaje ko Perezida Kagame na Gen. Muhoozi Kainerugaba bagiranye ibiganiro ku gicamunsi cyo kuri uyu wa 25 Mata 2023.

Gen Muhoozi Kainerugaba ari mu Rwanda aho yaje kwizihiriza isabukuru ye y'amavuko nk'uko yari yarabiteguje abamukurikira ku mbuga nkoranyambaga.

Ibi biganiro byamuhuje na Perezida Kagame bije nyuma y'uku Umukuru w'Igihugu w'u Rwanda na Madamu Jeannette Kagame bamwakiriye ku meza, mu isangira ryo kumwifuriza isabukuru nziza y'amavuko ku mugoroba wo ku wa 24 Mata 2023.

Muri uyu mugoroba Perezida Kagame yashimye Gen Muhoozi Kainerugaba wakoze akazi katoroshye ko kongera kuzahura umubano hagati y'ibihugu byombi wari waraguyemo agatotsi.

Yagize ati 'Uyu munsi turi mu mahoro, turagushimira Gen. Muhoozi ku ruhare rwawe wabigizemo no kuba ikiraro dukoresha tuva ku ruhande rumwe tujya ku rundi.'

Gen Muhoozi Kainerugaba yagize uruhare rukomeye mu kongera kuzahuka k'umubano hagati y'ibihugu byombi kuko ingendo Muhoozi yagiriye mu Rwanda mu ntangiriro za 2022 zabaye intandaro y'ihagarara ry'ibikorwa byibasiraga Abanyarwanda muri Uganda, abari bafunzwe bazira amaherere barafungurwa bigera n'aho imipaka ifungurwa yongera kuba nyabagendwa.

Ku rundi ruhande Gen. Muhoozi Kainerugaba nawe Gen Muhoozi yashimye umubano we na Paul Kagame agaragaza ko warenze kuba umwe yari Perezida undi ari umusirikare, ahubwo bombi bahinduka 'inshuti'.

Ati 'Igishimangira ubwo bucuti ni inka yangabiye. Kandi ibyo mbifata nk'ikintu gikomeye. Nyakubahwa, ndashaka kukumenyesha ko inka zimeze neza, zarororotse. Wangabiye inka 10 none ubu zimaze kuba 17. Rero kubera ibyo, twahise tuba inshuti.'

Gen Muhoozi ari mu Rwanda hamwe na Minisitiri w'Ubutabera wa Uganda, Norbert Mao; Minisitiri w'Umutekano, Maj Gen (Rtd) Jim Muhwezi, Umuvugizi w'Ibikorwa bya Gen Muhoozi binyuzwa mu kizwi nka MK Movement, Andrew Mwenda n'abandi.

Muri Werurwe 2023 U Rwanda na Uganda byasinye amasezerano y'ubufatanye agamije gukomeza umubano w'ibihugu byombi urimo kuvugururwa.

Yari amasezerano yasinywe mu nzego zirimo ubutabera n'Itegeko Nshinga, ubufatanye mu by'amategeko, ibiganiro n'ubujyanama mu bya politiki ndetse n'amasezerano ku bibazo by'abinjira n'abasohoka.

Icyo gihe hagaragajwe ko hakiri ibibazo cyane cyane mu bijyanye n'ubuhahirane mu bucuruzi, aho bitarasubira ku rwego byahozeho mbere y'uko umwuka umera nabi.

Perezida Kagame yagiranye ibiganiro na Gen. Muhoozi Kainerugaba umuhungu wa Perezida Museveni uyobora Uganda

Bishimiye uko umubano w’u Rwanda na Uganda uri kugenda uba mwiza kurushaho

Hashize imyaka 29 Jenoside yakorewe Abatutsi ihagaritswe na RPF-Inkotanyi, hubakwa Leta ishyize imbere ubumwe n'ubwiyunge.

Gusa hari bamwe bagize uruhare muri Jenoside yakorewe Abatutsi bakomeje kwinangira ntibagaragaze aho Abatutsi bishwe bari ngo bashyingurwe mu cyubahiro.

Kuri uyu wa 25 Mata 2023, abagabo batanu batawe muyi yombi mu karere ka Kamonyi, mu Murenge wa Mugina mu kagari ka Jenda mu mudugudu wa Munini, hakekwaho ibyaha bifitanye isano na Jenoside yakorewe Abatutsi mu 1994.

Umuyobozi w'Akarere ka Kamonyi, Dr Nahayo Sylvère yabwiye RBA ko aba bagabo bari batuye ahantu habonetse imibiri y'abantu babiri bishwe muri Jenoside yakorewe Abatutsi muri Mata 1994, ndetse iperereza ngo rihamya ko amakuru y'urupfu rw'abo bantu barufitemo uruhare.

Yagize ati 'Bagerageje kuzimiza no gutesha agaciro ibimenyetso ndetse no kudatanga amakuru. Nk'uko bigaragara aba ni abaturage batuye aho hantu habonetse imibiri ibiri, ndetse n'ubwo iperereza rigikomeje byagaragaye ko amakuru bari bayazi ndetse n'abishe abo bantu aba bagabo na bo bari bari mu gitero cyaje kubica.'

Amakuru ahari ni uko aba bagabo uko ari batanu nta wari warakatiwe n'urukiko kubera ibi byaha.

Aba bagabo batawe muri yombi nyuma y'iminsi ine na none mu Murenge wa Nyamiyaga na ho mu karere ka Kamonyi hatawe muri yombi abandi bagabo batanu na bo bakekwaho ibyaha nk'ibi.

Dr Nahayo ati 'Muri Nyamiyaga ku itariki 21 na ho habonetse abagabo bagera kuri batanu na bo bakurikiranweho icyaha nk'iki, na bo bagerageje guhisha amakuru, mu mirima yabo na ho habonetse imibiri, ariko abangaba bo bamwe bari baranafunzwe bakatirwa n'inkiko barafungurwa, ariko na bo bakoze ibishoboka byose kugira ngo bagende bahisha amakuru kugeza igihe twabimenyeye rero ubu na bo bari gukurikiranwa.'

Uyu muyobozi asaba abaturage ba Kamonyi bafite amakuru y'ahari imibiri y'Abazize Jenoside yakorewe Abatutsi kuyatanga kugira ngo bashyingurwe mu cyubahiro.

Kuwa 11 Mata 2023, mu muhango wo kwibuka Abatutsi biciwe i Nyanza ya Kicukiro ubwo Interahamwe n'abasirikare ba Leta ya Habyarimana bari bari babavanye muri ETO Kicukiro nyuma yo gutereranwa n'Ingabo za MINUAR Minisitiri w'Ubumwe bw'Abanyarwanda n'Inshingano Mboneragihugu, Dr Bizimama Jean Damascène, yatangaje ko mu gihe hari abakomeje kwinangira ku gutanga amakuru y'ahajugunywe imibiri y'Abatutsi bishwe muri Jenoside ngo ishyingurwe mu cyubahiro, ntawe ukwiye gukomeza kubinginga.

Ibi yabivuze kuko imibiri y'Abatutsi bishwe muri Jenoside iboneka mu bice bitandukanye by'igihugu itaboneka ku bushake bw'abatanga amakuru ahubwo haba habanje gutangwa amakuru avuye ahandi.

Umuryango Uharanira Inyungu z'Abarokotse Jenoside yakorewe Abatutsi [IBUKA-Rwanda] ugaragaza ko kuba hari abagifite amakuru ku hajugunywe imibiri y'abishwe muri Jenoside bakaba banga kuyatanga bidindiza inzira y'ubumwe n'ubwiyunge.

Abagabo batanu batawe muri yombi bakurikiranweho ibyaha bya Jenoside yakorewe Abatutsi

Ikipe ya APR FC yasezereye Marines igera muri 1/2 cy’igikombe cy’Amahoro iyitsinze ibitego 6-3 mu mikino yombi.

Nyuma y’umukino ubanza wa 1/4 cy’igikombe cy’Amahoro wabereye mu Bugesera warangiye APR FC itsinze 2-1, uyu munsi habaye umukino kwishyura.

Ni umukino wabereye i Rubavu kuri Stade Umuganda maze APR FC iwutsinda ibitego 4-2.

APR FC yafunguye amazamu hakiri kare ku munota wa 4 gitsinzwe na Mugisha Gilbert, cyaje kwishyurwa na Usabimana Olivier ku munota wa 14.

Ku munota wa 24 Bizimana Yannick yatsinze igitego cya kabiri, Kwitonda Alain Bacca yaje gutsinda igitego cya 3 ku munota wa 35 yaje no kongeramo ikindi ku munota wa 67 maze Nahimana Amimu atsindira Marines FC igitego cya kabiri ku munota wa 87 umukino urangira ari 4-2.

Indi mikino yo kwishyura ya 1/4 mu gikombe cy’Amahoro izaba ejo

Musanze FC vs Mukura VS
Kiyovu Sports vs Rwamagana City
Police FC vs Rayon Sports (uzaba ari umukino ubanza uwo kwishyura uzaba tariki ya 3 Gicurasi 2023)

APR FC yageze muri 1/2 isezereye Marines FC

Ni ibyagaragajwe ubwo Inteko Rusange y'Umutwe w'Abadepite yagezwagaho raporo ku isesengura rya raporo y'ibikorwa by'Urwego rw'Umuvunyi bya 2021/22 na gahunda y'ibikorwa byarwo bya 2022/23.

Ni ibikorwa bikubye mu nshingano z'Urwego rw'Umuvunyi birimo gukumira akarengane na ruswa, kurwanya akarengane na ruswa, kwakira no kugenzura inyandiko z'imenyekanishamutungo, kwakira inyandiko zigaragaza imitungo y'imitwe ya politiki, gukurikirana iyubahirizwa ry'itegeko rigena imyitwarire y'abayobozi n'ibindi.

Urwego rw'Umuvunyi rugaragaza ko mu bikorwa rwakoze mu mwaka ushize birimo amahugurwa n'ubukangurambaga mu gukumira no kurwanya akarengane na ruswa. Hakozwe kandi ibikorwa by'amahuriro y'urubyiruko agamije gukumira akarengane na ruswa.

Raporo igaragaza ko kugeza mu mpera za Kamena 2022, uru rwego rwasuzumye ibibazo 1.603 bikubiyemo ibyaje mu nyandiko n'ibyakiriwe muri gahunda yo gukumira no kurwanya akarengane mu turere.

Muri byo hakemutse 1.205, mu gihe 365 bigikurikiranwa n'inzego byashyikirijwe naho 33 bikaba bigikurikiranwa n'Urwego rw'Umuvunyi kugira ngo bifatirwe umwanzuro.

Perezida wa Komisiyo ya Politiki, Uburinganire n'Ubwuzuzanye bw'Abagabo n'Abagore mu Iterambere ry'Igihugu, Rubagumya Emma Furaha, yavuze ko ibibazo byiganje mubyo Umuvunyi yakiriye ari iby'ubutaka.

Ati 'Ibyinshi mu bibazo byakiriwe birebana n'ubutaka bingana na 31,2%. Ni ibibazo byagaragaye mu manza zishingiye ku butaka n'iziba zaraburanywe ariko akenshi abaturage usanga batishimira uko zakijijwe.'

Muri rusange ibyo bibazo birimo amakimbirane akomoka ku mbibi, kutumvikana mu kuzungura no gushaka uburenganzira ku butaka bukomoka ku bugure cyangwa andi masezerano, kutishimira imanza ziciwe zirebana n'ubutaka akenshi Kutumvikana mu gihe cy'irangiza ry'imanza zirebana n'ubutaka.

Hari kandi ibibazo by'abaturage bangirijwe imitungo ntibahabwe amafaranga y'ingurane hakorwa imihanda cyangwa imiyoboro y'amashanyarazi ni iy'amazi. Bigize 15,8% ku bibazo byose byakiriwe n'Urwego rw'Umuvunyi.

Ibindi byagaragajwe nk'ibibazo abaturage bageza ku Rwego rw'Umuvunyi ni ibishingiye ihererekanya ry'uburenganzira ku butaka.

Byagaragaye ko mu bidindiza ihererekanya ry'uburenganzira ku butaka n'itangwa ry'ibyangombwa by'ubutaka harimo ubwinshi bw'abasaba serivisi butajyanye n'umubare w'abakozi bazitanga, kutubahiriza igihe cyagenwe cyo gutanga serivisi z'ubutaka, iminsi mike yagenewe serivisi z'ubutaka.

Hari kandi kuba ikoranabuhanga ryifashishwa ridakora neza (LAIS, GIS, Irembo), kutabona amakuru ku cyo ubutaka bwagenewe gukoreshwa, ihindagurika ry'icyo ubutaka bwagenewe gukoreshwa.

Abaturage bakunze kugeza ku Rwego rw’Umuvunyi ibibazo bishingiye ku butaka