Category: Uncategorized

Raporo y'Umugenzuzi Mukuru w'Imari ya Leta y'umwaka warangiye ku wa 30 Kamena 2022, yagaragaje ibibazo biganisha ku bihombo mu bigo bitandukanye, haramutse hatagize igikorwa.

Ni raporo Umugenzuzi Mukuru w'Imari ya Leta, Kamuhire Alexis, yamurikiwe Inteko Ishinga Amategeko ku wa 2 Gicurasi 2023.

Ubwato ku Nkombo

Mu Kigo cy'Igihugu gishinzwe iterambere ry'Ubwikorezi (RTDA) byagaragaye ko hari imishinga yatanzwemo amafaranga menshi, nyamara idindira ryayo rikaba rituma icyo yari yitezweho kitagerwaho.

Muri iyo harimo uwo kubaka ubwato ku Nkombo aho imirimo yagombaga kuba yararangiye muri Mata 2019.

Mu Ugushyingo 2022, Umugenzuzi w'Imari ya leta yasanze igeze kuri 56,8%, ni ukuvuga ko imaze kugira ubukererwe bw'imyaka itatu n'amezi atandatu.

Iyi raporo ivuga ko rwiyemezamirimo yari amaze kwishyurwa arenga miliyoni 1,5 z'amadolari angana na 59% by'agaciro k'isoko (miliyoni zisaga 2,6 z'amadolari).

Mu gihe igenzura ryakorwaga, rwiyemezamirimo yari akiri gukora imirimo yo mu cyiciro cya mbere muri bitanu biteganyijwe kugira ngo ubwato bube bwuzuye.

Abakurikiranira hafi iby'uyu mushinga bavuze ko ubukererwe bwatewe n'ibibazo by'ibura ry'ingengo y'imari.

Umugenzuzi w'Imari we yavuze ko bizatuma inyungu zari zitezwe muri uyu mushinga zitagerwaho nihatagira igikorwa mu maguru mashya.

Ibyambu bine ku Kiyaga cya Kivu

Ni umushinga watewe inkunga ya miliyoni zirenga 32,6 z'amadolari yatanzwe na Trade Mark East Africa (TMEA), Ikigo cy'Abaholandi na Guverinoma y'u Rwanda hagamijwe kubaka ibyambu bine byoroshya ubwikorezi mu Kiyaga cya Kivu mu Turere twa Rubavu, Rusizi, Karongi na Rutsiro.

Ku ikubitiro imirimo yagombaga kurangira mu myaka itanu uhereye mu 2018 kugeza mu 2023 nyamara Umugenzuzi w'Imari ya Leta yasanze harimo ibyuho byinshi.

Ibyambu bibiri byo mu Turere twa Rubavu na Rusizi byadindiye bigeze hagati ndetse byashowemo miliyoni zirenga 12 z'amadolari. Byagombaga kuzura muri Kamena 2021 ariko imirimo yahagaze igeze ku kigereranyo cya 26%.

Umugenzuzi w'Imari ya Leta yagaragaje ko guhagarika imirimo byakozwe mu rwego rwo gusubiramo inyigo nyuma y'aho bigaragaye ko iya mbere yakozwe hatitawe ku miterere y'ubutaka. Inyigo ivuguruye yagombaga kurangira muri Kanama 2021 ariko mu Ugushyingo 2022 yari itaremezwa.

Imirimo yo gutanga amasoko yo kubaka ibyambu bibiri bisigaye, icyo mu Karere ka Rutsiro na Karongi yarahagaze kubera ibura ry'ingengo y'imari.

Ku kiyaga cya Kivu hari gukorwa umushinga wo kubaka ibyambu bine

Umuhanda Ngoma-Ramiro

Umugenzuzi w'Imari ya leta ygaragaje ko icyiciro cya mbere cyo kubaka umuhanda wa Ngoma —Ramiro kiri kugenda gahoro. Ni umuhanda ureshya na kilometero 29,12 wagombaga gutwara miliyari 31,75 z'amafaranga y'u Rwanda.

Uyu muhanda wagombaga kuba warangiye mu myaka ibiri uhereye muri Nzeri 2021 ariko mu Ukwakira 2022 imirimo yari igeze ku gipimo cya 17% nyuma y'umwaka umwe itangiye ku buryo biteye impungenge ko izasozwa mu gihe cyagenwe.

Umuhanda Kibugabuga-Shinga-Gasoro

Uyu ni undi muhanda wagaragayemo ubukererwe bumaze kugera ku mwaka umwe. Ufite uburebure bwa kilometero 66,55 ukaba ufite agaciro ka miliyari zirenga 40,7 z'amafaranga y'u Rwanda. Byari biteganyijwe ko uzaba warangiye mu Ukwakira 2022 ariko wakorewe igenzura mu mpera z'umwaka ushize imirimo igeze kuri 76,42%.

Muri iri genzura kandi byagaragaye ko RTDA yishyuye amafaranga y'ikirenga angana na miliyari 1,35 z'amafaranga y'u Rwanda kuri ba rwiyemezamirimo batanze amasezerano arimo ibikorwa cyangwa ibikoresho byisubiramo ku mihanda ya Huye-Kibeho-Munini ureshya na kilometero 66 n'uwa Nyagatare-Rukomo (73,3km).

Ubukererwe mu gutanga inkunga y'abatishoboye no kugaruza inguzanyo zatanzwe muri VUP

Muri gahunda yo gufasha abakene, leta yagennye miliyari 7,58 Frw zigenewe abatishoboye, abagore batwite bakennye n'abana ariko raporo igaragaza ko yatinze guhabwa abagenerwabikorwa ku buryo ubukererwe bwageze ku minsi 193 mu turere 15.

Utwo turere turimo Gisagara, Nyaruguru, Rusizi, Nyamasheke, Rutsiro, Nyabihu, Huye, Ngororero, Gakenke, Burera, Kayonza, Karongi, Bugesera, Nyamagabe na Rubavu.

Ikindi ni uko hari inguzanyo zatanzwe muri VUP zimaze igihe zitarishyurwa. Kuva mu 2019, LODA ibinyujije mu turere yatanze amafaranga agera kuri miliyari 24,68 Frw ku bagenerwabikorwa ba VUP bahabwa inguzanyo.

Inguzanyo zigera kuri miliyari 4,15 Frw ntabwo zigeza zishyurwa zirimo miliyari 1,80 Frw zatanzwe mu 2021.

Ibihombo mu bigo bishinzwe ingufu n'amazi

Ikigo gishinzwe gukwirakwiza umuriro w'amashanyarazi (EUCL) cyahombye miliyari 52,5 Frw mu mwaka w'ingengo y'imari warangiye ku wa 30 Kamena 2022 ugereranyije n'inyungu ya miliyari 2,02 Frw cyari cyabonye mu mwaka wabanje.

Iki kigo cyishyuye miliyari 38, 83 Frw inganda za nyiramugengeri ku giciro gihanitse. Ibyo ngo bizatuma ibihombo bikomeza kwiyongera nk'uko Umugenzuzi w'imari yabigaragaje, nib anta gikozwe.
Mu kigo gishinzwe gukwirakwiza amazi, isuku n'isukura (WASAC) byagaragaye ko amazi apfa ubusa yakomeje kwiyongera mu 2022.

Ku mazi yatunganyijwe, WASAC yabashije gucuruza 55% byayo ahwanye na metero kibe miliyoni 37,4 kuri miliyoni 68,1 yatunganyijwe mu mwaka warangiye ku wa 30 Kamena 2022.

Bivuze ko andi asigaye angana na 45% atacurujwe, ibyatumye ihomba miliyari 9,91 Frw ufatiye ku giciro cyo hasi (323 Frw kuri metero kibe imwe) na miliyari 27,45 Frw mu gihe yaba yagurishijwe kuri 895 Frw kuri metero kibe.

Ibikoresho byagombaga gukorwamo muvelo mu mashuri makuru y'imyuga

Mu Ukuboza 2020, Rwanda Polytechnic yaguze ibikoresho bifite agaciro ka miliyari 6,73 Frw byo gukoresha mu bigo by'amashuri bya IPRC hakorwa muvelo zo gutekamo.

Ibikoresho bya miliyari 1,14 Frw byari bibitse muri za koleji zitandukanye bidakoreshwa nyuma y'umwaka umwe bitanzwe.

Umugenzuzi w'imari yasanze hari n'ibikoresho bifite agaciro ka miliyoni 89 Frw byendaga guta agaciro ubwo igenzura ryakorwaga muri Gashyantare 2023.

Muri iyi raporo avuga ko atigeze agaragarizwa inyandiko zisobanura umubare wa muvelo zizakorwa n'ingano yazo, ibishobora gutuma bimwe mu bikoresho bita agaciro bigahombya leta amafaranga atari make.

Kwishyura imirimo itarakozwe cyangwa ikishyurwa inshuro ebyiri

Muri Nyakanga na Kanama 2021, Ikigo Gishinzwe guteza imbere ibikomoka ku buhinzi n'ubworozi (RAB) cyatanze amasoko yo gutunganya imishinga yo kuhira imyaka i Mahama icyiciro cya mbere n'icya kabiri afite agaciro ka miliyoni zirenga 26,7 na miliyoni 27,8 z'amadolari nk'uko bikurikirana.

Kugendera ku biciro biri hejuru mu mushinga wa Mahama1 byatumye agera kuri miliyari 1,7 Frw ahomba naho kuri Mahama2 hahombye miliyari 1,12 Frw.

Mu Rwego Ngenzuramikorere (RURA) ho amafaranga yagombaga gukoreshwa mu kubaka Icyicaro gikuru yarenzeho agera kuri miliyari 2,62 Frw.

Ayo mafaranga yakomotse ku kwishyura hashakwa ingwate yo kurangiza imirimo arenga miliyoni 711, 5 Frw, ayishyuwe kabiri ku bikoresho byo kubaka, amazi, umuriro, umutekano n'ibindi byo kuri site kandi byari byarabazwe mu mirimo yagombaga gukorwa. Ibyo byatwaye miliyari 1,8 Frw byiyongeraho imirimo yishyuwe itarakozwe, ifite agaciro ka miliyoni 74 Frw.

Igenzura ryerekanye ubukererwe mu mushinga wa VUP

Umuhanzi Charles Njagua uzwi ku izina rya Jaguar, yitaye mu mazi abira nyuma yo gukorana indirimbo n’umwe mu bahanzi basinye amasezerano muri Label ya Wasafi, indirimboye yiswe “Unthikable”, amashusho yayo akaba yarakorewe mu gihugu cya Kenya.

Kuri 11 Gicurasi ni bwo iyi ndirimbo yageze ku rukuta rwe rwa Youtube, ariko igitangaje uwo bakoranye indirimbo Lava Lava we yakomeje arituriza bigaragara ko n’ubwo bakoranye indirimbo atigeze na rimwe yishimira Jaguar, kuko nta mbaraga yigeze ashyira mu kwamamaza iyi ndirimbo.

Ku makuru Jaguar yahaye ‘Content creator’, yavuze ko Diamondi nk’umuyobozi wa Wasafi atigeze yishimira uburyo bakoranyemo iyi ndirimbo ari nayo mpamvu igomba guhagarara. Ariko nanone Jaguar ku ruhande rwe avuga ko iyi ndirimbo “Unthinkable” ari igitekerezo cye kuko hashize imyaka 7 ayanditse, ikindi nawe yemera ko atigeze abanza kuvugana na Label ya Wasafi.

Jaguar avuga ko yivuganiye na Lava Lava kuwa 10 Gicurasi 2023, amusaba ko iyo ndirimbo baba bayihagaritse, amusubiza ko ategereje icyo Management iri bwemeze. 

Nubwo Jaguar yabazaga Lava Lava byinshi, nawe yaje kumenya ko impamvu byose bitari gukunda ari uko yari kubanza kwishyura amafaranga Wasafi ibintu bikabona kujya mu buryo. Mu magambo ye, ati: “Lava Lava twahuriye muri studio imyaka ibiri ishize, yumva indirimbo yanjye arayikunda, maze yandika igice cye kuko njye nari nararangije ibyanjye”.

Jaguar akimara kubona ko atabona icyo yakwireguza muri Wasafi, yahise yiyemeza kubareka indirimbo arabyihorera. Aragira ati: “Iracyafitwe na Wasafi ariko ndabyihoreye nabo byabatwaye igihe kinini, indirimbo ndayibarekeye ibyiza biri imbere”.

Wasafi kugeza n’ubu nta kintu iratangaza kuri iyi nkuru. Wasafi ni Lebal yashinzwe n’umwe mu bahanzi bakomeye muri Afrika, Diamond, ikaba igenda izamura impano zitandukanye, aho kuri ubu habarizwamo abahanzi Diamond, Mboso, Zuchu, Lava Lava n’abandi benshi.

Ikindi ni imwe muri studio zikomeye ku isi kuko abahanzi b’ibyamamare bakorera indirimbo zabo muri iyi Label, twavugamo, Rick Ross, Omarius, Neyo, Tiwa Savage Mr Flouver, Davido, Yemi Alade, Peace quare,n ‘abandi.

Indirimbo bakoranye bayise “Unthinkable”

Ni mu kiganiro Sports Room cyo kuri uyu wa Gatandatu, cyabaye nyuma y’umukino wahuje Rayon Sports yanganyijemo na Mukura Victory Sports igitego 1-1. 

Guss Bigirimana ukorera Rayon Sports, yatangaje ko Mukura bigendanye n’uko yatangiye umwaka w’imikino ntako itagize, ahubwo abafana bayo bakwiye kwishimira uko ikipe yitwaye.

Guss yakomeje avuga ko ikipe ya APR FC mu gihe yaramuka idakuyemo Kiyovu Sports, yaba igana mu bihe bibi byo kudasohokera igihugu.

Lorenzo nawe yunze mu rya Guss avuga ko APR FC iramutse idasohokeye u Rwanda yaba ibonye isomo rituma isubira ku bakinnyi b’abanyamahanga. 

Muri iki kiganiro Rujugiro ufana APR FC yaje gusanga aba banyamakuru mu kiganiro ndetse yemeza ko Kiyovu Sports uyu mwaka nta gikombe izegukana.

KANDA HANO UREBE IKIGANIRO CYOSE

Guss Bigiramana ni umwe mu banyamakuru bagiranye ikiganiro na InyaRwanda 

Lorenzo Musangamfura nawe yari umwe mu banyamakuru baganiriye na InyaRwanda

Ni umukino wabaye kuri uyu wa Gatandatu ubera muri BK ARENA. Ikipe ya REG BBC niyo byarangiye itsinze APR BBC amanota 93-73. 

REG BBC niyo yateguye uyu mukino wa gishuti mu rwego rwo kwitegura imikino ya nyuma ya Basketball Africa League (BAL) aho izaba ihagarariye u Rwanda. Iyi mikino  izabera mu Rwanda muri BK Arena kuva tariki ya 21 kugeza 27 Gicurasi 2023.

Uyu mukino kandi warebwe na Madamu Jeannette Kagame ari kumwe n’umwuzukuru we, aho bari bagiye gushyigikira Ian Kagame usanzwe ukina mu ikipe ya APR BBC. 

Nk’uko mu mafoto bigagara, hari aho Ian Kagame yari ari mu karuhuko maze ajya kuganiriza Anaya Ndengeyingoma, ubona bishimishije.

Lt. Ian Kagame aganira na Anaya 

Madamu Jeannette Kagame yari yishimiye kureba umukino

Ni umukino wari uryoheye ijisho

Ni igikorwa cyabaye ku wa 12 Gicurasi 2023 mu Karere ka Huye cyahereye ku biro by'iki kigo ahakorera Ishamindetse ry'Ubushakashatsi n'Iterambere no Kurwibutso rwa Jenoside rwa Kaminuza y'u Rwanda ruruhukiyemo imibiri y' abahoze ari abakozi ba IRST ubu yahindutse NIRDA.

Umuyobozi Mukuru wa NIRDA, Dr. Christian Sekomo Birame yihanganishije imiryango yabuze ababo batwawe ubuzima na Jenoside yakorewe Abatutsi yahitanye ubuzima b'inzirakarengane zirenga miliyoni.

Dr. Christian Sekomo Birame yahamagariye abasigaye gukomera kandi bagahora barwanya ingengabitekerezo ya Jenoside ndetse batibagiwe guhangana n'abayipfobya bose yaba abari mu Rwanda no hanze yarwo.

Yashimye ingabo za RPA batanze ubuzima bwabo kugira ngo bahagarike Jenoside yakorewe Abatutsi mu 1994 ndetse na Leta iha Abanyarwanda bose uburenganzira bungana n'amahirwe yo kubaho neza bitandukanye na guverinoma yayibanjirije yaranzwe n'imvugo z' urwango zitegura Jenoside yakorewe Abatutsi mu 1994.

Claire Mukeshimana Umuyobozi Mukuru muri Minisiteri y'Ubucuruzi n'Inganda (MINICOM) ushinzwe Imirimo Rusange yavuze ko kuba hari abarokotse Jenoside yakorewe Abatutsi ari ikimenyetso n'ibyiringiro by'ubuzima yongeraho ko Guverinoma ihora ishyira ingufu mu gufasha imiryango y'abarokotse mu gukomeza kubaka ejo hazaza heza.

Ati: “Tuzakomeza gukora ubuvugizi kugira ngo hakorwe ubushakashatsi buhagije kugira ngo amateka ya Jenoside yakorewe Abatutsi yandikwe neza kugira ngo Isi yose imenye akaga igihugu cyacu cyanyuzemo mu 1994.'

Mukeshimana yasabye abakozi muri rusange gukora ibishoboka byose bakarwanya imvugo z'urwango ndetse no kwirinda ko Jenoside yakongera kubaho mu Rwanda cyangwa ahandi ku Isi.

Yasabye abakozi kunga ubumwe ndetse no gukomeza guha icyubahiro abazize Jenoside yakorewe Abatutsi bakibuka biyubaka.

Urujeni Assumpta, umwe mu barokotse Jenoside wahoze ari Umukozi wa NIRDA yagarutse ku ngorane abarokotse Jenoside banyuzemo by'umwihariko abakoraga muri IRST.
Yavuze ko abazize Jenoside bishwe n'abo babanaga kandi bakoranaga umunsi ku wundi.

Avuga ko atariyumvisha ukuntu abantu b'abahanga n'abashakashatsi bananiwe kurinda abakozi ahubwo bamwe muri bo bakishora mu bwicanyi bw'abo bakoreshega.

Muri uyu muhango wo Kwibuka bwabanjirijwe n'iroro ryo kwibuka, wanaranzwe n'igikorwa cyo kuremera abatishoboye aho abakozi ba NIRDA bishyuriye Ubwisungane mu kwibaza abantu 150 bo mu Karere ka Huye.

Ibi babigaragaje kuri uyu wa Gatandatu tariki ya 13 Gicurasi 2023 ubwo Ikigo gikora ubushakashatsi bugamije ubusabane n'amahoro ( IRDP) cyahurizaga hamwe urubyiruko rugera kuri 27 barimo abiga mu mashuri, abatiga ndetse n'abahanzi hagamijwe kubaka ubushobozi bw'urubyiruko no kuganira ku buzima bw'igihugu hakoreshejwe ubuhanzi.

Muri ibi biganiro urubyiruko rwagaragaje zimwe mu mbogamizi babonye iwabo zibangamiye demokarasi n'uburenganzira bwa muntu. Ibi bibazo babibonye binyuze mu kugaragaza ibibazo byinshi bigaragara aho baba bagenda babyegeranya bakuramo ibikomeye bikwiriye kwitabwaho.

Mukashema Patience wiga mu mashuri yisumbuye yavuze ko mu bibazo by'ibanze babonye bibangamiye demokarasi ari uko ngo hari imihigo imwe n'imwe usanga abaturage batagishwa inama mbere yo kuyikora, bagasanga ari kimwe mu bibangamiye demokarasi kandi bikwiriye kwitabwaho muri Rwamagana.

At ' Ku burenganzira bwa muntu twabonye ko umutekano muke ari wo uza ku isonga, buri wese yagiye areba ikibazo kibangamiye abatuye mu gace atuyemo turabyegeranya dukuramo bitatu bya bibazo bitatu twaratoye dusanga icya mbere ni umutekano muke ukunze guterwa n'abajura.'

Biruta Yassin yavuze ko kuri ubu bagiye kwifashisha ibihangano mu kwerekana ibi bibazo bagiye babona, aho bamwe bazagenda babikinamo ikinamico, abahanzi bahange indirimbo zigaragaza bya bibazo abandi bakoreshe n'ibindi bihangano ku buryo inzego zibimenya zikagira n'icyo zibikoraho.

Umuyobozi wa IRDP, Prof. Nzahabwanayo Sylvestre, yavuze ko imbogamizi uru rubyiruko rwagaragaje, bazigeza ku nzego bireba kugira ngo zizishakire umuti urambye.

Ati ' Ubuyobozi bw'Akarere hano bwari buhagarariwe, inzego z'umutekano nazo zari zihagarariwe, twanzuye ko tugiye guhuza iri tsinda na bariya bayobozi kugira ngo bakomeze kuganira kuri ibi bibazo hagamijwe gukurikirana ibibazo biri muri demokarasi n'uburenganzira bwa muntu kugira ngo hashakwe umuti wabyo.'

IRDP ari nayo iri gufasha uru rubyiruko, ni Ikigo gikora ubushakashatsi bugamije ubusabane n'amahoro gikorera mu turere turindwi ari two Rwamagana, Bugesera, Kicukiro, Gicumbi, Rubavu, Huye na Gisagara.

Kuri ubu bafite urubyiruko 189 rwo muri utu turere rwagiye rukora ubushakashatsi ku bibazo bibangamiye demokarasi n'uburenganzira bwa muntu aho rutuye bakaba bari kurufasha kubigaragariza ubuyobozi.

Biruta Yassin yavuze ko bazifashisha ibihangano mu kugaragaza ibibangamiye demokarasi n'uburenganzira bwa muntu

Mukashema Patience yasabye ubuyobozi kurushaho gusobanurira imihigo abaturage

Bifashishije imikino inyuranye

Nzahabwanayo uhagarariye IRDP yavuze ko bazakomeza gufasha urubyiruko

Bagaragaje ibibangamiye demokarasi mu ndirimbo