Category: Uncategorized

APR FC yasezereye Kiyovu Sports muri 1/2 cy’igikombe cy’Amahoro igera ku mukino wa nyuma iyitsinze 3-2 mu mikino yombi.

Ni nyuma y’uko umukino ubanza amakipe yombi yanganyije 1-1 umukino wo kwishyura wabereye kuri Kigali Pelé Stadium uyu munsi APR FC yawutsinze 2-1.

Ni umukino wagombaga gusiga hamenyekanye ikipe isanga Rayon Sports ku mukino wa nyuma, aho Kiyovu Sports yari yakiriye uyu mukino yasabwaga kunganya bitarimo igitego kugira ngo igere ku mukino wa nyuma, ni mu gihe APR FC yo yasabwaga gutsinda cyangwa kunganya hejuru y’igitego 1 kuko umukino ubanza banganyije 1-1.

Ni umukino watangiye amakipe yombi akina imipira miremire ubona bashaka igitego hakiri kare.

Kiyovu Sports yaje gufungura amazamu ku munota wa 10 kuri kufura yatsinzwe na Nordien maze umunyezamu Pierre ntiyamenya uko bigenze.

Ku munota wa 13 Kiyovu Sports yahushije ubundi buryo bukomeye nyuma y’uko ubwugarizi bwa APR FC butakaje umupira ariko Abedi yaha Nordien akananirwa gushyira mu rushundura.

Omborenga Fitina yahinduye umupira mwiza imbere y’izamu ku munota wa 29 ariko habura umukinnyi wa APR FC ushyira mu izamu.

Bizimana Yannick yagerageje umutwe ku mupira wari uhinduwe na Omborenga ariko Kimenyi Yves arawufata.

APR FC yari yashyize igitutu kuri Kiyovu Sports yaje kubona kufura ku munota wa 44 ku ikosa ryakorewe Nshuti Innocent yatewe na Yunusu maze Kimenyi Yves umupira awushyira muri koruneri.

Koruneri yatewe neza na Ishimwe Christian maze Nshuti Innocent ahita atsinda igitego n’umutwe. Igice cya mbere cyarangiye ari 1-1.

APR FC yatangiye igice cya kabiri ishyira igitutu kuri Kiyovu Sports ishaka igitego cya kabiri.

Yaje kukibona ku munota wa 55 gitsinzwe na Ishimwe Christian nyuma yo kwinjirana ubwugarizi bwa Kiyovu Sports agashyira umupira mu izamu.

Amakipe yombi yakoze impinduka ku munota wa 68, Bizimana Hamisi asimbura Nshimirimana Ismail ku ruhande rwa Kiyovu Sports ni mu gihe ku ruhande rwa APR FC, Itangishaka Blaise yasimbuye Bizimana Yannick.

Kuva kuri uyu munota APR FC yatangiye gusubira inyuma ubona ko Kiyovu Sports yayirushije imbaraga nubwo nta mahirwe afatika yaremye.

Ku munota wa 74, Blaise yahaye umupira Bacca ateye mu izamu, Kimenyi Yves arawufata.

APR FC yagiye irema andi mahirwe yakabaye yavuyemo ibindi bitego ariko biranga ni mu gihe na Kiyovu Sports yashatse igitego cyo kwishyura kikabura umukino ukarangira ari 2-1. APR FC yahise iyisezerera igera ku mukino wa nyuma ku giteranyo cy’ibitego 3-2.

Nyuma yo gusezerera Kiyovu Sports, APR FC izahura ku mukino wa nyuma na Rayon Sports yaraye isezereye Mukura VS. Umukino wa nyuma uzaba tariki ya 3 Kamena 2023 ubere kuri Stade Mpuzamahanga ya Huye.

11 Kiyovu Sports yabanje mu kibuga

11 APR FC yabanje mu kibuga

Ba kapiteni n’abasifuzi mbere y’umukino

Mu munota ya mbere Kiyovu Sports yari yarushije APR FC

APR FC yaje kuyigaranzura

Umutoza wa APR FC, Ben Moussa

Umutoza wa Kiyovu Sports atanga amabwiriza

Wari umukino utoroshye

Kiyovu Sports yishimira igitego cya Nordien

AMAFOTO: SHEMA Innocent

Ni igikorwa cyabaye mu Cyumweru cy'umujyanama, cyatangiye tariki 11 – 15 Gicurasi 2023. Abagize Inama Njyanama y'Akarere ka Rusizi bari gusura abaturage bo mu Mirenge igize Akarere, bagafatanya nabo mu bikorwa by'imiganda yo gufasha abatishoboye.

Aba bayobozi batega amatwi ibibazo bibangamiye imibereho y'abaturage, bagakorana inama z'ubukangurambaga nko mu isuku, kuboneza urubyaro, kurwanya imirire mibi mu bana, gukumira abana bata ishuri n'ibindi.

Ni ibikorwa bishamikiye muri gahunda bize 'Tujyanemo', aho umuturage agira uruhare mu bimukorerwa.

Muri gahunda yo kurwanya imirire mibi, abaturage basabwe gukora akarima k'igikoni kuko iyo bahinzemo imboga bakazivaga n'amafunguro bituma barya indyo yuzuye, bakabifatanya no korora amatungo magufi.

Kwegera abaturage bigamije kunga ubumwe bw'abaturage n'abayobozi, cyane ko raporo yakozwe n'Urwego rw'Imiyoborere mu Rwanda (RGB), yagaragaje ko abaturage bazi Inama Njyanama ku rwego rw'Uturere ku gipimo cyo hasi ugereranyije n'abazi Inama Njyanama zo ku rwego rw'Imirenge n'Utugari.

Bamwe mu baturage bo mirenge ya Nzahaha, Mururu na Rwimbogo bavuga ko mu byo bungukiye muri iyi gahunda harimo kurwanya imirire mibi bahinga imboga ndetse bakorora n'amatungo magufi.

Uzamushaka Odette utuye mu Murenge wa Nzahaha yagize ati “Icyo numvise ni nko korora inkoko ikajya itera amagi ngaha umwana akayarya ku buryo nanayagurisha nkaba nabona agasabune. Ni kimwe no guhinda akarima k'igikoni nzajya nsoromamo imboga nkavanga n'ibiryo by'umwana akamererwa neza, bityo bikadufasha kurwanya imibirire mibi”.

Sebakungu Joel wo Murenge wa Rwimbogo, avuga ko uturima tw'igikoni dufasha mu mirire y'abana ndetse n'abantu bakuru.

Yagize ati”Duhinga dodo tukazivanga n'ibyo tukarya, tugaha abana natwe tukaryaho mu mafunguro yacu ya buri munsi”.

Ntanyuranya na Nsabima Pierre wo mu Murenge wa Mururu, uvuga ko nyuma yo gusobanurirwa akamaro k'indyo yuzuye we n'umuryango we bagiye gukora karima k'igikoni, ndetse bakazagerageza no kuvanga n'ifungur ibikomoka ku matungo cyane ko begeranye n'ikiyaga cya Kivu.

Yagize ati “Twasobanuriwe akamaro ko kurya indyo yuzuye. Mu muryango wanjye ntako twagiraga ubu tugiye kugakora kandi mu mafungura yacu tuzajya dushiramo n'isambaza kuko tegereye iki Kiyaga cya Kivu”.

Visi Perezida w'Inama Njyamana ya Rusizi, Kwizera Giovani Fidele, yavuze ko guhinga imboga bifasha mu kurwanya imirire mibi, noneho korora amatungo magufi biaba byafasha mu kuzamura imibereho y'abaturage.

Yagize ati “Muri iki Cyumweru cy'umujyanama turi kuganira n'abaturage tubabwira ko hari ibyo Leta ibakorera ndetse nabo hari byo basabwa. Leta ifite uburyo butandukanye iteramo inkunga abari mu mirire mibi badafite ubushobozi, ariko n'abafite ubushobozi bakigishwa uburyo bwo gutegura indyo yuzuye, bakora akarima k'igikoni bagateramo imboga bavanga n'ibyo barya, ndetse n'abana babo, ibi bifasha mu kurwanya imirire mibi.'

Yasabye abaturage korora amatungo magufi arimo inkoko, inkwavu ndetse n'ihene, kuko uretse kubafasha byaba n'inzira yo kwiteza imbere mu buzima bwabo.

Kuriuyu wa 14 Gicurasi 2022, Abajyanama mu nama Njyanama y'Akarere bakoraze umwiherero wihariye ugamije kwisuzuma no kureba ibikeneye konozwa kurushaho kugira ngo imikorere n'imikoranire ikomeze ibe myiza muri rusange.

Isangamatsiko y'iki Cyumweru cy'umujyanama igira iti “Tujyanemo : Turwanye ibibazo bibangamiye imibereho myiza y'abaturage.”

Ni umuhango wabaye kuri uyu wa 12 Gicurasi 2023, witabirwa n'Umuyobozi Mukuru wa Jibu ku rwego rw'Isi, Galen Welsch; Umuyobozi wa Jibu mu Rwanda, Darlington Kabatende; Umuyobozi w'Imirimo rusange mu Karere ka Kicukiro, Murenzi Donatien, abakozi n'abafatanyabikorwa ba Jibu n'abandi batandukanye.

Wabanjirijwe no gushyikiriza inkunga y'amafaranga miliyoni 4 Frw, Jibu yageneye abantu babiri bo mu Murenge wa Kicukiro barokotse Jenoside yakorewe Abatutsi, azifashishwa mu gusana inzu zabo ebyiri, bikorerwa mu gikorwa cyabereye ku Biro by'Umurenge wa Kicukiro.

Nyuma abawitabiriye bakomereje ku Rwibutso rwa Jenoside rwa Nyanza ya Kicukiro, basobanurirwa byimbitse amateka y'uru rwibutso, bashyira indabo ku mva, banunamira inzirakarengane zihashyinguwe.

Umukozi wa Ibuka, Ngombwa Christian, wasobanuye amateka y'uru rwibutso, yavuze uburyo uwari Umuyobozi wa Perefegitura y'Umujyi wa Kigali, Col. Renzaho Tharcisse, yategetse ko Abatutsi bari barahungiye kuri ETO Kicukiro bajya kwicirwa ku Musozi wa Nyanza, abanyantege nke bicirwa mu nzira.

Ati ''Yakoresheje amagambo avuga ati 'nimutware iyo myanda muyijyane ku yindi i Nyanza ya Kicukiro'.''

Iyi mvugo yakoreshejwe na Col. Renzaho yari iyo gutesha agaciro abo Batutsi, abagereranya n'imyanda yakusanywaga mu Mujyi wa Kigali ikajya kumenwa ku Musozi wa Nyanza ubu wubatsweho Urwibutso rwa Jenoside rwa Nyanza ya Kicukiro.

Umuyobozi uhagarariye Abacuruzi ba Jibu mu Rwanda, Uwamahoro Rehema, yavuze ko bamwe mu bacuruzi bari bariho muri Jenoside yakorewe Abatutsi mu 1994 amafaranga yabo bayashoye mu bikorwa byo gusenya igihugu, asaba bagenzi be gufatanyiriza hamwe mu kucyubaka.

Ati ''Twibukije cyane ko abacuruzi muri Jenoside bitwaye nabi, aho bagiye bakora amaradiyo amwe n'amwe, bagura imihoro, imodoka zabo zirirwa zitunda Interahamwe. Twabibukije cyane ko umucuruzi akwiriye gutanga umusoro we ku gihe kandi wuzuye kugira ngo dufashe mu iterambere ku byo tubonesha amaso byose.''

Umuyobozi Mukuru wa Jibu ku rwego rw'Isi, Galen Welsch, yavuze ko umuryango mugari w'iki kigo uzakomeza gufatanya n'u Rwanda mu kwiyubaka kwarwo, nyuma y'ibihe bya Jenoside yakorewe Abatutsi rwanyuzemo.

Ati ''Ni iby'agaciro gukorana namwe no gufatanyiriza hamwe, mu gushyigikira intego z'u Rwanda no guhamya uko rukomeje gutera imbere mu buryo budasanzwe.''

Welsch yakomeje abarokotse Jenoside yakorewe Abatutsi mu 1994, abasabira kugira amahoro nyuma yo kubura inshuti n'abo mu miryango yabo bishwe muri Jenoside yakorewe Abatutsi.

Umuyobozi w'Imirimo rusange mu Karere ka Kicukiro, Murenzi Donatien, yashimiye uruhare rwa Jibu mu iterambere ry'u Rwanda, cyane ko uru ruganda rukora n'ibindi bikorwa bitandukanye mu kuzamura imibereho myiza y'abaturarwanda.

Ati ''Iki gikorwa mwatekereje cyo kuza kunamira abacu bazize Jenoside no gukomeza abayirokotse n'inkunga mwatanze yatugezeho yo gusanira abacitse ku icumu bo mu Murenge wa Kicukiro, turabashimira cyane.''

Urwibutso rwa Jenoside rwa Nyanza ya Kicukiro rushinguwemo imibiri y'Abatutsi basaga 105.600, abarenga 3000 muri bo bakaba bariciwe ku Musozi wa Nyanza ya Kicukiro ku wa 11 Mata 1994, nyuma yo gutereranwa n'Ingabo za Loni zari zishinzwe kugarura Amahoro (MINUAR) kuri ETO Kicukiro.

Mu Batutsi basaga 3000 bari bahungiye kuri ETO Kicukiro bakajyanwa kwicirwa ku Musozi wa Nyanza, harokokeye abagera ku 100 gusa na bo bari bakomereketse bikabije.