Webrwanda Backend

Category: Uncategorized

  • U Rwanda rwahawe imifuka 1280 ya Sima yo kubakira abasenyewe n'ibiza – #rwanda #RwOT

    Umunyamabanga Uhoraho muri Minisiteri Ishinzwe Ibikorwa by'Ubutabazi, Habinshuti Philippe ari kumwe n'abandi bayobozi mu nzego zitandukanye ni we wakiriye iyi sima kuri iki Cyumweru tariki 14 Gicurasi 2023.

    Yatanzwe n'Ikigo Tanzania Portland Cement Company Ltd, kizwi ku izina rya Twiga Cement.

    MINEMA yaboneyeho umwanya wo guhamagarira Abanyarwanda bose bafite ubushobozi n'abikorera muri rusange gukomeza gutanga umusanzu wabo mu kugoboka abasenyewe n'ibiza.

    Habinshuti ati “Hari abantu benshi bari kudufasha baduha ibikoresho bitandukanye, ari abatanga inkunga y'amafaranga, ibikoresho by'ibanze dukeneye gukoresha uwo mwanya ariko ntabwo turi kureba iby'iminsi mike gusa, tugiye kureba n'iby'igihe kirambye.”

    “Tuzakenera kubaka inzu zo gutuzamo abasenyewe cyangwa ibikorwaremezo birimo imihanda, ibiraro n'ibindi byasenywe, ni yo mpamvu iyi sima twahawe na Twiga Cement izadufasha cyane.”

    Umukozi uhagarariye Twiga Cement, Bisalinkumi Mukama Augustin yavuze ko bakimara kubona ibiza byagwiririye Abanyarwanda bakozwe ku mutima n'ababuriyemo ababo ndetse n'ibyangijwe, bumva bagomba kugira icyo bakora.

    MINEMA itangaza ko mu buryo butandukanye bwashyizweho bwo gukusanya inkunga haba kuri nimero ya konti cyangwa kuri telefone, yashyizweho hamaze gukusanywa miliyoni 110 z'amafaranga y'u Rwanda.

    Ni amafaranga asanga ibikoresho bitandukanye birimo iby'isuku, ibiryamirwa n'ibindi bigenda bitangwa n'abantu ku giti cyabo, ibigo byigenga ndetse n'inshuti z'u Rwanda.

    Source : http://igihe.com/amakuru/u-rwanda/article/u-rwanda-rwahawe-imifuka-1280-ya-sima-yo-kubakira-abasenyewe-n-ibiza-by-i

  • Sonarwa yibutse abari abakozi bayo bazize Jenoside (Amafoto) – #rwanda #RwOT

    Umuhango wo kwibuka ku nshuro ya 29 abari abakozi ba Sonarwa bazize Jenoside wabaye kuri uyu wa Gatanu, tariki ya 12 Gicurasi 2023. Wabanjirijwe no gusura ibice bigize Urwibutso rwa Kigali ruherereye ku Gisozi.

    Abakozi basaga 100 ba Sonarwa bamaze gusobanurirwa amateka y'u Rwanda mu gihe cya Jenoside, bashyize indabo ku mva zishyinguyemo imibiri y'abazize Jenoside.

    Nyuma y'igikorwa cyo guha icyubahiro abavukijwe ubuzima bazira uko bavutse, bagiranye ikiganiro n'abakomoka ku miryango y'abakoraga muri iki kigo bishwe, bari baje kwifatanya na bo.

    Muri iki kiganiro, Uzanyinema Annonciatha, yasangije aba bakozi amateka ye ay'umugabo we wakoraga muri Sonarwa ndetse n'umubyeyi we bose bazize Jenoside.

    Mu buhamya bwe, yagarutse ku mateka ashaririye yanyuzemo ashimangira ko agomba kuyavuga nubwo bigoye.

    Yagize ati “Aya mateka tumaze kwerekwa hano, njye nayabayemo. Ni ibintu byabaga mu kazi, aho nakoraga byabagamo, umugabo wanjye yari muri Sonarwa. Agahinda kari kenshi ubwo abana bambazaga bati 'kuki twe ba papa bataza kudutwara ku ishuri?'. Nabuze icyo nkora.'

    “Nubwo bari bato ariko byari ngombwa kubibaza gusa aho bakuriye, ubigisha amateka ndetse ukabereka ko ibyabaye bitagomba kongera kubaho. Uyu ni wo mukoro wa buri wese.”

    Umuyobozi w'Agateganyo wa Sonarwa Life, Eric Kamanzi, yavuze ko kwibuka bivuze byinshi ku kigo kuko bigaragaza kutibagirwa uruhare bagize kugira ngo kigere aho kigeze.

    Yagize ati “Aya ni amateka buri wese agomba kuzirikana. Nk'ikigo cyacu twiyemeje kubana n'ababuze ababo. Nk'ikigo cy'imfura mu bwishingizi, tugomba kubaha agaciro bakwiye kuko umusingi turi gukoreraho ni bo bawutangije.”

    Yakomeje ati 'Ikindi nk'uko mubizi, insanganyamatsiko ni 'Ukwibuka twiyubaka', natwe rero nka Sonarwa twifuje ko twajya twifatanya n'abacitse ku icumu tukaremera abatishoboye, ndetse muri rusange tukaba hafi imiryango y'abari abakozi bacu.'

    Sonarwa yabuze abakozi benshi bayikoreraga, kugeza ubu abamaze kumenyekana amazina yabo ni 10 muri 13 bazwi.

    Aba barimo Mukobwankabandi Béatrice, Ntamati Liberatha, Mugorewigaju Clémentine, Musoni Charles, Karangwa Innocent, Nshunguyinka Désiré, Nyiraneza Henriette, Umutesi Jeannette, Kayirangwa Claudine na Mbandiwimfura Claude umenyekanye vuba.

    Sonarwa Life icuruza ubwishingizi bw'amashuri y'abana (Education endowment), ubwo kwizigamira (Pension), ubw'ubuzima (individual Life, Family protection and Group Life) n'ubwishingizi bw'inguzanyo (Loan Protection).

    Ni mu gihe Sonarwa General yo icuruza ubwishingizi bw'ibinyabiziga, ubw'inkongi z'umuriro, ubwo gutwara abantu n'ibintu, ubw'impanuka zituruka ku murimo, kwishingira amafaranga ari muri banki cyangwa ava muri banki imwe ajya mu yindi n'ibindi.

    Abayobozi n’abakozi ba Sonarwa bunamiye bagenzi babo bazize Jenoside yakorewe Abatutsi

    Eric Kamanzi yunamiye abazize Jenoside yakorewe Abatutsi

    Hacanwe urumuri mu rwego rwo kugaragaza icyizere cyabonetse nyuma y’amateka ashaririye u Rwanda rwanyuzemo

    Abakozi basaga 100 ba Sonarwa bitabiriye iki gikorwa.

    Nshunguyinka Dieudonne ni we uhagarariye imiryango y’ababuze ababo bakoraga muri Sonarwa.

    Col Cooper Mujuni yari ahagarariye Ingabo muri iki gikorwa.

    Umuyobozi Mukuru wa Sonarwa General, Rees Kinyangi yavuze ko ibyabaye bitagomba kugira ahandi biba ku Isi.

    Umuyobozi muri MINUBUMWE ushinzwe Kwibuka no Gukumira Jenoside, Dr Muhayisa Assumpta, yasobanuriye abakozi ba Sonarwa Kwibuka ari ngombwa.

    Umuyobozi w'Agateganyo wa Sonarwa Life, Eric Kamanzi, yavuze ko kwibuka abazize Jenoside bivuze byinshi kuri iki kigo.

    Source : http://igihe.com/amakuru/u-rwanda/article/sonarwa-yibutse-abari-abakozi-bayo-bazize-jenoside-amafoto

  • Ubugenge bwa Nyiranzubahimana wigisha abana 150 ku munsi bagatsinda ari benshi – #rwanda #RwOT

    Umwarimu wigisha na we aba afite intego yo gutuma abo yigisha bose bazavamo abantu bakomeye, bituma yemera kwiyuha akuya, agakora amasaha y'ikirenga ngo yuse ikivi yatangiye kandi abo aha ubumenyi babujyane bushyitse.

    Mu Rwunge rw'Amashyuri rwa Rwabutenge, mu Karere ka Kicukiro, umwarimu witwa Nyiranzubahimana Marie Ange ni we wigisha abanyeshuri benshi ku munsi.

    Mu ishuri ry'umwaka wa mbere w'amashuri abanza afite abanyeshuri 78 [muri A], naho nimugoroba hakiga abandi 76 [muri B], ni ukuvuga abanyeshuri 154 kandi abagira amanota 50% barenga 110 mu mashuri yombi.

    Uyu mwarimu yabwiye IGIHE ko amaze kubona ahawe kwigisha ishuri ririmo abana benshi gutya yabanje kwibaza icyo azakora kirabura, ndetse ngo kubera umunaniro yatahanaga byarangiraga mu ijoro asa n'uwaraye mu ishuri.

    Ati 'Mu by'ukuri kubigisha biragoye ariko umuntu ashyiramo umutima wa kimuntu, kuko udashyizemo umutima rwose wavuga uti n'akazi ndakaretse. Nka buriya iyo tugitangira igihembwe utarabimenyera bigera nijoro ukumva urusaku rw'abana rukugarutse mu mutwe kubera ukuntu basakuza n'ubwinshi bwabo kubacecekesha ntibiba byoroshye, rero bisaba ubwitange'

    Nyiranzubahimana avuga ko amaze kureba ubwinshi bwabo yasuzumye asanga niyigisha mu masaha yagenwe gusa ashobora kuzajya asanga abatsinda ari bake.

    Ati 'Mu buryo bwo gukurikirana imyigire yabo, ndazinduka kugira ngo nkurikirane ba bandi bari hasi cyane nkagera hano mbere y'amasaha. Ndabibamenyesha nimugoroba mu gitondo naza ngasanga bahageze, cyangwa hakaba n'abo umuntu asigaranye nimugoroba. Hari n'abo mbwira nti no mu mpera z'icyumweru ababishobora baze.'

    'Ikibazo abana benshi banagira, abenshi baza kwiga mu mwaka wa mbere batarigeze biga mu mashuri y'incuke, urumva aba ari uguhera kuri zeru. Utabikoze gutyo ishuri riba ririmo abana batarenze 20 bafite icyo bazi. Biba ngombwa ko umuntu avuga ngo ndigomwa uwo mwanya nakabaye ndi gukoramo ibindi nze mbafashe.'

    Mu ishuri rye umwana wazindutse agera ku ishuri saa moya n'igice za mu gitondo, bagatangira kwiga bose saa mbili, amasomo ya rusange agatangira saa mbili n'iminota 45 ari na bwo batangira amasomo mashya. Bivuze ko aba amaze iminota irenga 40 yigisha.

    Ati 'Umwana iyo apfiriye mu mwaka wa mbere biba birangiye. Ni ukuvuga ngo avuye muri iri shuri nta kintu afite n'aho mbohereje hejuru nta musaruro twazabona.'

    Nyiranzubahimana avuga ko abikora mu bwitange kuko aba bana usanga baturuka mu miryango ikennye ku buryo hajemo kubishyuza bataba bakitabiriye.

    Umwarimu muri Kaminuza y'u Rwanda Ishami ry'Ubumenyi n'Ikoranabuhanga (CST) Dr Ngenzi Alexandre yabwiye IGIHE ko kwigisha abanyeshuri benshi bituma hari abo isomo rirangira batamenye ibyo bagombaga kwiga, abandi bakabifata nk'ibidafite agaciro 'ku buryo usanga hari igihe isomo rishobora kuzarangira bimeze nk'aho ritizwe mu by'ukuri.'

    Dr Ngenzi avuga ko gukoresha amasaha y'ikirenga yo kwigisha ari byiza ariko byabamo imbogamizi nyinshi ku buryo igisubizo gikwiriye gushakirwa mu kongera ibyumba by'amashuri ku buryo umwarimu yigisha abanyeshuri bangana n'umubare wagenwe.

    GS Rwabutenge ifite abanyeshuri 1225 biga mu mashuri abanza, hari hakenewe ibyumba 26 by'amashuri ariko ikigo gifite 14 gusa. Amabwiriza ya UNESCO ateganya ko icyumba cy'ishuri gikwiye kwigirwamo n'abanyeshuri 46.

    Igenzura ryakozwe na Minisiteri y'Uburezi ryagaragaje ko hakenewe ibindi byumba by'amashuri bishya bigera ku 13 296.

    Ibyo ni ibikenewe mu kugabanya ikibazo cy'ubucucike ariko by'umwihariko ku kijyanye n'ingendo ho hakenewe ibyumba by'amashuri 3637.

    Nyiranzubahimana Marie Ange yahizemo kujya azinduka akigisha mbere y’abandi ndetse akanataha atinze ngo abashe gufasha aba banyeshuri gutsinda neza

    Source : http://igihe.com/amakuru/u-rwanda/article/ubugenge-bwa-nyiranzubahimana-wigisha-abana-150-ku-munsi-bagatsinda-ari-benshi

  • Musanze:Haravugwa umunyeshuri wapfiriye mu kigo yigagamo nyuma yo kwangirwa (…) – Umuryango.rw #rwanda #RwOT

    Amakuru avuga ko uyu mwana yarwaye, ariko uko asaba uruhushya rwo gutaha iwabo ngo yivuze ikigo kikarumwima agasabwa kwivuriza muri infirmerie y'ikigo

    Ngo uyu munyeshuri yaba yari amaze ibyumweru hafi bibiri arwariye mu kigo ari naho yaguye

    Amakuru ava muri iki kigo kandi akomeza avuga ko urupfu rwe rwaba rwaramenyekanye hashize hafi amasaha atatu apfuye.

    Byari biteganyijwe ko uyu munyeshuri witabye Imana ashyingurwa kuri iki cyumweru,gusa iyi gahunda ngoyaje gusubikwa ngo umurambo we ubanze upimwe hamenyekane neza icyamwishe

    Muri Ecole des Sciences de Musanze haravugwa urupfu rw’umunyeshuli w’umukobwa wigaga S1 wapfuye ejo kuwa gatandatu taliki 13/5/2023.

    Amakuru avuga ko uyu mwana wari ufite imyaka 12 yarwaye ariko uko asaba uruhushya rwo gutaha iwabo ngo yivuze ikigo kikarumwima agasabwa… pic.twitter.com/vJigbGrcG2

    — HAKUZWUMUREMYI Joseph (@HAKUZWUMUREMYI) May 14, 2023

    Source : https://umuryango.rw/amakuru/mu-rwanda/uburezi/article/musanze-haravugwa-umunyeshuri-wapfiriye-mu-kigo-yigagamo-nyuma-yo-kwangirwa

  • Mali ntiyemeranya na ONU ku cyegeranyo yakoze Gishinja Abasirikare Kwica (…) – Umuryango.rw #rwanda #RwOT

    Ubutegetsi bwa gisirikare bwasubizaga kuri icyo cyegeranyo cyasohotse ku wa gatanu nyuma y'amezi hakorwa ubushakashatsi n'iperereza ku byo abaharanira uburenganzira bwa muntu bise amahano y'agahomamunwa yabaye mu ntambara yamaze imyaka 10 hagati y'igisirikare cya leta n'abarwanyi ba kiyisilamu.

    Umuvugizi wa leta Abdoulaye Maiga yatangaje ko 'guverinoma y'inzibacyuho ihakanye ibikubiye muri icyo cyegeranyo'. Yavuze ko ibyo kivuga ari ibihimbano kandi kikaba kitujuje ibisabwa ku rwego mpuzamahanga.

    Icyo cyegeranyo kivuga ko ku italiki ya 27 z'ukwezi kwa gatatu umwaka ushize, abasirikare ba leta muri Mali bari kumwe n'abandi b'abanyamahanga bamanutse muri za kajugujugu ahitwa Moura, bakamisha urusasu ku baturage.

    Iki cyegeranyo gikomeza kivuga ko mu ifatwa ry'abaturage ryakurikiyeho, abandi. Babarirwa mu magana barashwe bakajugunywa mu mikingo.

    Maiga yavuze ko harimo gukorwa iperereza rigamije kureba ihungabanywa ry'uburenganzira bwa muntu rishobora kuba ryarabayeho ariko yongera gusubiramo ko abiswe ari abarwanyi ba kiyisilamu atari abasivili

    Source : https://umuryango.rw/amakuru/mu-mahanga/umutekano/article/mali-ntiyemeranya-na-onu-ku-cyegeranyo-yakoze-gishinja-abasirikare-kwica

  • Ubudage Bwahaye Ukraine Inkunga ya Miliyari 3 z'Amadolari y'Amerika – Umuryango.rw #rwanda #RwOT

    Perezida w'Ubudage Frank-Walter Steinmeier yakiriye Perezida Volodymyr Zelenskyy mu ngoro ye iri i Berlin mu murwa mukuru aho byari bitegenijwe ko abo bategetsi bombi bari bugirane ibiganiro bari kumwe n'abajyanama babo bane kuri buri ruhande.

    Chancellier w'Ubudage Olaf Scholz,we yakirije Perezida Zelenskyy akarasisi ka gisirikare mbere y'uko bagirana ibiganiro.

    Bitegenyijwe ko Perezida Zelenskky ari bukomereze mu mujyi wa Aachen aho ahabwa igihembo cyitiriwe Charlemagne, kigenerwa abantu bagize uruhare rukomeye mu guharanira ubumwe bw'Ubulayi.

    Zelensky yshimiye Ubudage asinya no mu gitabo cyagenewe abashyitsi kiri mu ngoro y'umukuru w'igihugu

    Source : https://umuryango.rw/amakuru/mu-mahanga/politiki/article/ubudage-bwahaye-ukraine-inkunga-ya-miliyari-3-z-amadolari-y-amerika

  • Muri Sudani Intambara Hagati y'Ingabo za Leta n'Abayirwanya Ntiracogora – Umuryango.rw #rwanda #RwOT

    Abahanganye bararasanira mu mihanda ku buryo nta cyizere ko impande zombi zubahiriza amasezerano yo kurinda abasivili mbere y'uko ibiganiro bisubukurwa muri iki cyumweru muri Arabia Saoudite.

    Kuva ingabo za leta n'umutwe wa Rapid Support Forces wayigometseho bumvikanye ku byo bise 'itangazo ryerekeye amahame' rigena imyitwarire y'impande zombi muri iki kibazo, intambara ntiyahwemye mu umurwa mukuru Khartoum n'uduce tuwegereye, igera n'ahitwa Geneina mu gace ka Darfur.

    Abaturage bemeza ko mu minsi ibiri ishize intambara yarushijeho gukaza umurego kurusha mbere.

    Iyi ntambara imaze ukwezi, imaze guhitana ababarirwa mu magana. Abantu barenga ibihumbi 200 bahungiye mu bihugu bituranye na Sudani naho abarenga ibihumbi 700 bakuwe mu byabo, bari imbere mu gihugu.

    Uko iminsi ihita bigaragara ko ibindi bihugu bishobora kuzinjira muri iyi ntambara bikarushaho kuzambya akarere.

    Source : https://umuryango.rw/amakuru/mu-mahanga/umutekano/article/muri-sudani-intambara-hagati-y-ingabo-za-leta-n-abayirwanya-ntiracogora

  • RDC: Ubwicanyi bukabije bwatumye Intara ya Kwango shyiraho amasaha ya (…) – Umuryango.rw #rwanda #RwOT

    Ubuyobozi bwatangaje ko nibura abantu 11 ari bo hahitanywe n'ubugizi bwa nabi mu Burengerazuba bw'iki gihugu, bigizwemo uruhare n'imitwe y'itwaje intwaro y'abo mu bwoko bw'Aba-Yaka.

    Umuvugizi w'Intara ya Kwango ubu bugizi bwa nabi bwabereyemo, Adélard Nkis, yabwiye AFP ko ibyo bikorwa byabaye mu ijoro ryo ku wa 12 Gicurasi 2023, aho abagabo bo mu gace ka Mobondo bagabye ibitero ku ka Batshongo, maze abasirikare babiri, umupolisi n'abasivili babiri bahita bagwa muri ibyo bikorwa.

    Uyu muyobozi yongeyeho ko abo basirikare bari bacagaguwemo ibice hifashishijwe intwaro zirimo n'iza gakondo, agaragaza ko kuri uyu wa 13 abiciwe muri ibyo bitero bamaze kugera kuri 11.

    Ni amakimbirane ngo yahereye i Batshongo akomereza no mu gace ka Mongata, umudugudu uherereye mu birometero umunani uvuye mu Burengerazubwa bw'Umurwa Mukuru Kinshasa.

    Nkisi yavuze ko ubuyobozi bwahagaritse ibikorwa byose muri ibyo bice kugera mu gitondo cyo kuri kugira ngo hakemurwe ibyo bibazo.

    AFP kandi yavuze ko ibyo bikorwa byakomeje gupfukiranwa no kugirwa ibanga ku buryo bigoye kumenya umubare wa nyawo w'ababiguyemo.

    Umwe mu bayobozi ba sosiyete sivile muri iyo ntara, Symphorien Kwengo, yavuze ko abishwe bagera kuri 19 barimo umunani bo muri Batshongo na 11 bo muri Mongata.

    Amakimbirane n'ubugizi bwa nabi bwo mu Burengerazuba bwa Congo yatangiye gututumba mu mwaka ushize, bihereye muri teritwari ya Kwamouth ho mu Ntara ya Mai-Ndombe, bishingiye ku kutumvikana kw'abo mu bwoko bw'Aba-Teke n'Aba-Yaka ku bijyanye n'itangwa ry'imisoro.

    Ni imisoro ngo yishyuzwa n'abashefu bo mu bwoko bw'Aba-Teke kuko bavuga ko ari bo ba kavukire muri ibyo bice, ibintu abo mu bwoko bw'Aba-Yaka n'andi moko badakozwa, bigatuma bahora bashyamiranye.

    Source : https://umuryango.rw/amakuru/mu-mahanga/umutekano/article/rdc-ubwicanyi-bukabije-bwatumye-intara-ya-kwango-shyiraho-amasaha-ya-guma-mu

  • Ku ncuro ya 29, Ikipe ya Yanga SC yegukanye igikombe cya shampiyona ya (…) – Umuryango.rw #rwanda #RwOT

    Ni igikombe cya kabiri iyi kipe yegukanye muri uyu mwaka w'imikino wa 2022/2023, nyuma ya Community Shield yatwaye itsinze Simba SC.

    Young Africans SC “Yanga” yatwaye iki Gikombe cya NBC Mainland Tanzania Premier League, nyuma yo kubona ibitego 4-2 ku mukino wabaye kuri uyu wa Gatandatu tariki ya 13 Gicurasi 2023, kuri Azam Complex Stadium i Dar es Salaam.

    Iyi kipe yahise igira amanota 74, irusha Simba SC amanota arindwi ku munsi wa 28 wa shampiyona ibura imikino ibiri ngo irangire. Iki gikombe igitwaye Simba, isubira ibyo yayikoreye tariki ya 13 Kanama 2022 ku mukino wa nyuma wa Community Shield.

    Imikino ya Shampiyona yo muri Tanzania irakomeza kuri iki Cyumweru hakinwa iy'amakipe aharanira kuguma ku myanya myiza. Umukino ukomeye urahuza Coastal Union ishaka amanota ayikura mu ikipe zirwanira kutamanuka na Ihefu FC.

    Coastal Union iri ku mwanya wa 11 n'amanota 30, mu gihe ihefu iri ku mwanya wa munani n'amanota 33. Polisi ya Tanzania iri ku mwanya wa 15 irasabwa gutsinda imikino itatu isigaje, nayo ikava mu murongo utukura.

    Undi mukino ukomeye urahuza Azam FC ishaka gushimangira umwanya wa gatatu, na Namungo FC iza kuba yifuza kujya ku mwanya wa gatanu.

    Source : https://umuryango.rw/imyidagaduro/imikino/article/ku-ncuro-ya-29-ikipe-ya-yanga-sc-yegukanye-igikombe-cya-shampiyona-ya-tanzania

  • Rayon Sports WFC yegukanye igikombe itsinze I… – #rwanda #RwOT

    Kuri iki cyumweru tariki 14 Gicurasi 2023, saa cyenda z’amanywa kuri sitade y’Akarere ka Bugesera habereye umukino wa nyuma wa shampiyona y’icyciro cya kabiri mu Bari n’abategarugori.

    Amakipe abiri yageze kuri uyu mukino wa nyuma ni Rayon Sports WFC ndetse na Indahangarwa WFC.

    Rayon Sports WFC yageze ku mukino wa nyuma, nyuma yo gusezerera Nasho WFC n’aho Indahangarwa WFC yo yahageze nyuma yo gusezerera APR WFC mu mikino ya 1/2.

    Abakinnyi 11 ba Rayon Sports WFC babanje mu kibuga ni: Niyonsaba Jeanne, Uwase Andersene, Uwanyirigira Sifa, Mukantaganira Joseline, Mukeshimana Dorothee, Mukeshimana Jeannette, Kalimba Alice, Uwamariya Dianne, Umuhoza Angelique, Judith Ochienge Atieno na Imanizabayo Florence.

    Abakinnyi 11 ba Indahangarwa WFC babanje mu kibuga ni: Muhimpundu Diane,Mushimiyimana Marie Claire, Uwimana Egide,Bampire Josiane,Mukaneza Jose,Uwase Benigne,Uwiduhaye,Tuyishinire Hariette,Izabayo Clemence,Izere Jovia na Nyiranziza Oliva.

    Abakinnyi ba Indahangarwa nibo batangije umukino ariko nta masegonda yamaranye umupira kuko abakinnyi ba Rayon Sports WFC bahise bawifatira batangira gusatira.

    Ku munota wa 2 gusa Judith Ochienge Atieno yahise abona buryo arekura ishoti akoresheje umutwe ariko umupira ujya hanze.

    Rayon Sports WFC yakomeje gusatira cyane ubona ishaka igitego hakirikare ari nako abakinnyi barimo Mukantaganira Joseline na Imanizabayo Florence bakomeza kubona uburyo . 

    Uwiduhaye wa Indahangarwa WFC niwe wenyine wari uri mu rubuga rwa Rayon Sports WFC bityo yabonaga imipira ariko ntagire icyo ayibyaza kuko bahitaga bayimwaka.

    Judith Ochienge Atieno yishimira igitego yatsinze

    Ku munota wa 12 myugariro wa Indahangarwa WFC Bampire Josiane yari atsinze igitego bitunguranye aho yarekuye ishoti ari mu kibuga hagati maze umupira uragenda ku bw’amahirwe macye unyura hejuru y’izamu gato cyane. 

    Ku munota wa 20 Rayon Sports WFC yafunguye amazamu ku gitego cyiza cyari gitsinzwe na Judith Ochienge Atieno ahawe umupira na Uwanyirigira Sifa. 

    Nyuma yo kubona igitego abakinnyi ba Rayon Sports WFC batangiye guhata amashoti mu izamu rya Indahangarwa WFC ariko imipira ikanyura ku ruhande.

    Umukino wakomeje gukinirwa mu kibuga hagati ariko abakinnyi ba Rayon Sports WFC bakomeza kugerageza gushaka igitego cya 2 ariko kukibona biranga bituma igice cya mbere kirangira bikiri igitego 1-0.

    Igice cya kabiri cyatangiye Indahangarwa WFC ibona kufura nziza ariko Izere Jovia ayirekuye Niyonsaba Jeanne ufatita Rayon Sports ahita ayifata neza. 

    Abakinnyi ba Indahangarwa WFC bakomeje gukina ubona bahinduye uburyo bw’imikinire gahunda ari ukwihagararaho babuza aba Rayon Sports gutsinda igitego cya 2. 

    Ku munota wa 57′ Izere Jovia yazamuye koroneri neza maze Tuyishimire Hariette agiye kurekura ishoti umupira awuburaho gato. 

    Ku munota wa 62′ Kapiteni Mushimiyimana Marie Claire yatsinze igitego cya 2 nyuma y’akavuyo kari kabaye mu rubuga rw’amahina rwa Rayon Sports WFC.

    Nyuma yo kwishyurwa byatumye abakinnyi ba Rayon Sport WFC bongera gusatira cyane ariko igitego cy’intsinzi kirabura iminota 90′ irangira amakipe yombi anganya 1-1. 

    Uku kunganya byatumye hitabazwa Penariti, birangira Rayon Sports WFC yegukanye igikombe itsinze penariti 4-3.

    Uko Penariti zatewe

    Abateye penariti za Indahangarwa WFC : Mukaneza Jose yayiteye umuzamu ayikuramo,Uwase Benigne yayitsinze, Izere Jovia yayitsinze,Izabayo Clemence yayitsinze, Muhimpundu Diane yayirase, Tuyishimire Hariette yayirase naho Bampire Josiane yayiteye ikubita ku giti cy’izamu ivamo 

    Abateye penariti za Rayon Sports: Uwanyirigira Sifa yayitsinze, Mukeshimana Dorothee yayitsinze, Imanizabayo Florence yayitsinze,Nyiransengiyumva Dalice yayirase, Mukeshimana Jeannette yayitsinze, Mukantaganira Joseline yayirase naho Mukeshimana Jeannette yayiteye ikubita ku giti cy’izamu ihita ijya mu nshundura neza.

    Undi mukino wari wabaye saa sita zuzuye wo gushaka umwanya wa gatatu, ikipe ya APR WFC niyo yawegukanye itsinze Nasho WFC ibitego 3-1.

    Abakinnyi ba Rayon Sports WFC bishimira igitego- Byabafashije kwegukana igikombe 

    Mu mwambaro w’uruganda rwa SKOL, Rayon Sports y’abagore yegukanye igikombe

    Source : https://inyarwanda.com/inkuru/129352/rayon-sports-wfc-yegukanye-igikombe-itsinze-indahangarwa-wfc-amafoto-129352.html