Webrwanda Backend

Category: Uncategorized

  • Kigali: Abaforomo n'ababyaza barasaba koroherezwa gukomeza amashuri no kuzamurirwa umushahara #rwanda #RwOT

    Aho ibihe bigeze, imibereho y'ubuzima yarahindutse bitewe n'izamuka ry'ibiciro ku bintu nkenerwa bitari bike haba mu Rwanda no ku isi. Bamwe mu baforomo n'ababyaza mu Rwanda, bahereye kuri izo mpinduka z'ubuzima buhenze, basaba ko umushahara bahembwa wajyanishwa n'igihe, bakabasha kwibeshaho bo n'imiryango yabo. Basaba kandi ko bafashwa gukomeza kwihugura no kongera ubumenya bakajya ku ishuri.

    Ibyo aba Baforomo n'Ababyaza basaba, yabigarutseho ubwo hizihizwaga umunsi ngarukamwaka uhuza abaforomo n'ababyaza ku wa 12 Gicurasi uyu mwaka wa 2023. Basaba ko bazamurirwa umushahara, bagafashwa gukomeza amashuri ndetse n'ibindi bihabwa abakozi ba Leta.

    Dusabe Joseline, umuforomo mu bitaro bya Masaka ashimira Leta ko igenda yongera umubare w'abaforomo kuko bigabanya amasaha menshi yajyaga akorwa n'abandi. Agira kandi ati' Turishimira umubare w'Abaforomo hano iwacu i Masaka. Usanga bigabanya amasaha y'inyongera kandi utazahemberwa. Gusa turacyafite ibibazo bitandukanye bikibangamiye imibereho nk'abakora uyu mwuga harimo kutabasha kwiyishyurira amashuri ndetse n'umushahara ukiri mucye'.

    Uhagarariye Abaforomo n'Ababyaza ku bitaro bya Masaka, Nyirambonyinka Marie Christine avuga ko nubwo umubare w'abaforomo n'ababyaza ukomeje kwiyongera, hakwiye gushakishwa uburyo bwakorohereza abaforomo n'ababyaza bakabasha gukomeza kuzamura ubumenyi, bakiga kuko bihenze kandi kwiyishyurira bikaba bigoye bitewe n'umushahara bagihabwa wa cyera ibintu bitarahinduka.

    Yagize Ati' Nibyo twamaze guhabwa abandi Baforomo bazaza kudufasha ariko dukeneye kongera urwego rw'imitangire ya Serivisi z'ubuvuzi. Ababyaza n'abaganga usanga batugana kubera ko baba bizeye ko tubaha serivisi nziza ariko umushahara duhembwa uracyari mucye cyane ku buryo utakwishyura ishuri ry'Umuforomo'.

    Umuyobozi ushinzwe Imari n'ubutegetsi mu bitaro bya Masaka, Mukapasika Denise avuga ko mu gihe bizihiza uyu munsi wahariwe abaforomo bishimira ko umurimo bakora, bawukora bawukunze. Yongeraho ati' Sinzi niba dusabye igihembo hari uwabasha kukiduha'. Akomeza yemeza ko ibibazo byose bigenda bigaragazwa n'abaforomo n'ababyaza bizwi kandi byashyikirijwe inzego bireba kugirango zibyigane ubushishozi bihabwe ibisubizo bihamye bituma abatanga serivisi bayitanga bishimye.

    Umunyamabanga Mukuru w'Urugaga ruhuza abaforomo n'ababyaza mu Rwanda(RNMU), Gerard Rurangwa nawe yijeje abaforomo n'ababyaza ko ibibazo bakunze kugaragaza birimo kuba batabasha kongera amashuri yabo ndetse n'umushahara bafata nk'intica ntikize ko ibi byose birimo gushakirwa umuti urambye ku bufatanye n'inzego z'ubuzima.

    Yongeyeho ko ibibazo byose byagaragajwe nabo bamaze kubigaragariza Minisiteri y'Ubuzima hagamijwe kuyereka ko uwo mushahara utakijyanye n'igihe. Avuga ko nk'urugaga rubahuza, bamaze kwemeza ko umunyamuryango uzajya asubira ku ishuri bazajya bamuha 20% ku mafaranga yishyura Ishuri kuko bishimira ko babona ubundi bumenyi bikaba byatuma babasha gutanga serivisi nziza kurushaho.

    Sheki yahawe ubitaro bya Masaka mu rwego rwo gufasha ababuze ubwishyu bw'ubwisungane mu kwivuza-Mituweli.

    Abaforomo n'ababyaza bashimiwe n'urugaga bahuriramo rwa RNMU, babwirwa ko bazirikana kandi bazi neza akazi kakozwe mu gihe cya COVID -19, ko ndetse bagerageje gukora inshingano zabo, ko nk'ubuyobozi buzagerageza kubafasha, ko kandi abanyamuryango bifuzwaho gukomeza kwiyemeza gutabara abarwayi bagana ibitaro bya Masaka bagatanga serivisi nziza.

    Akimana Jean de Dieu

    Source : https://www.intyoza.com/2023/05/15/kigali-abaforomo-nababyaza-barasaba-koroherezwa-gukomeza-amashuri-no-kuzamurirwa-umushahara/

  • Akajagari muri Stations za Lisansi kahagurukiwe: Ibyemezo bikarishye byatangiye gufatwa – #rwanda #RwOT

    Mu mpera za Mata 2023, IGIHE yanditse inkuru igaruka ku kajagari kari mu iyubakwa rya Stations za Lisansi hirya no hino mu gihugu, by'umwihariko muri Kigali. Ni inkuru yari ishingiye ku icukumbura ryakozwe igihe kinini kuri iki kibazo.

    Soma: None twaterwa tutiteguye? Ijisho kuri Stations za lisansi zubakwa i Kigali

    Inkuru ikimara kujya hanze, twakiriye ubuhamya bw'abaturage bagaragaza ibibabangamiye harimo n'abari baragejeje ikibazo cyabo ku buyobozi.

    IGIHE ifite ingero z'abaturage bo mu Karere ka Kicukiro no muri Gasabo ahazwi nko ku Gisozi bamaze iminsi batakamba bavuga ko Stations zubatswe hafi y'ingo zabo zibateye impungenge kuko bagenzuye bagasanga zitubahirije amabwiriza yashyizweho na RURA.

    Mu minsi ishize, abaturage bo mu Karere ka Kicukiro mu Murenge wa Niboye, mu Kagari ka Gatare mu Mudugudu wa Rugunga, bahuriye hamwe, biyemeza kumenyesha ubuyobozi ikibazo bafite cya Station iri kubakwa ariko ibabangamiye.

    Uvuye muri Rond Point ya Sonatube, ukazamuka umuhanda ugana Sonatube nyir'izina, ukarenga umuhanda ujya ahazwi nka Ziniya, ukagera ahari Station Meru, ugafata umuhanda w'ibumoso ukagera kuri Kiliziya ukambuka nk'ujya Kabeza; ugera ahantu hacuramye hari ibikorwa by'ababikira, hafi aho hari ikoni; imbere yaho niho ibyo bikorwa bya station byari biri.

    Mu icukumbura IGIHE yakoze, yasanze iyo station ijya gutangira kubakwa, abaturage babwiwe ko hari umushoramari witwa Emmanuel Mushinzimana ugiye kubaka apartments muri ako gace ndetse nawe ni ko yagendaga ababwira.

    Abaturiye ahari kubakwa iyo station, bari bazi ko hagiye kubakwa inzu zo guturamo, ariko iminsi uko yashiraga babonaga ko ikibanza kigiye gukorerwamo ibindi.

    Batangiye kugira impungenge, bageza ikibazo cyabo ku buyobozi bw'Akagari nabwo bubaza uwo mushoramari icyangombwa kigaragaza ibyo agiye kubaka cyane ko kuri icyo kibanza cye atari yarashyizeho icyapa kigaragaza ibigiye kubakwa.

    Umwe mu basobanukiwe uburyo stations zubakwa mu buriganya, yabwiye IGIHE ko akenshi kubera amakosa aba arimo, abazubaka batajya bamanika icyapa kigaragaza ibigiye gukorwa.

    Ati 'Ushiduka yuzuye utazi ibyabaye. Ni ko byagenze henshi, no ku i Rebero byarabaye.'

    Abaturage bo ku Kicukiro bakoze inama, baganira kuri iki kibazo kuko uyu mushoramari ngo yari 'yabihenuyeho' ababwira ko ibyo bakora byose, nta n'umwe uzigera ababuza kubaka.

    Bamenyesheje ubuyobozi babugaragariza impungenge z'uko aho Station iri kubakwa, ari ahantu hegereye inzu, umuriro w'amashanyarazi, ari rwagati mu ngo kandi itubahirije intera zigenwa n'itegeko.

    Uvuye kuri iyo station ukagera ku masangano y'umuhanda, hari metero 67 mu gihe itegeko rigena ko hagomba kuba harimo metero 100.

    Iyi station yari iri kubakwa ku muhanda muto wo muri quartier kandi bitemewe. Uwo muhanda ufite ubugari bwa metero esheshatu, ku buryo mu gihe hakatira amakamyo n'izindi modoka byazatuma kugenderanirana bigorana.

    Abaturage bavuga ko aho hantu haramutse hubatswe station ya lisansi, abandi bantu bashaka gukora imishinga yabo, batazabasha kubyemererwa kuko hari ibikorwa bitemerewe guturana na station ya lisansi.

    Umwe mu baganiriye na IGIHE yagize ati 'Nk'uwashaka kubaka apartement ntabwo yabyemererwa kuko ntabwo ziturana na station ya lisansi. Bivuze ngo icyo gihe haba harebwe inyungu z'umuntu ku giti cye hadatekerezwa abantu bose batuye aho kandi imbere y'amategeko abantu bose bagira uburenganzira bungana.'

    Ubusanzwe mu iyubakwa rya Stations za Lisansi, hatangwa inama ko zigomba gushyirwa ahantu hitaruye ku buryo abaturage bahaturiye babasha guhumeka umwuka mwiza, bitandukanye n'uko baba begereye ahantu hahora imodoka zisohora imyuka ihumanya.

    Undi ati 'Ahantu hari Stations ya lisansi, twasomye ko abantu bahaturiye badahumeka Oxygène ihagije kubera Dioxyde de Carbone iba ihari ari nyinshi.'

    Stations muri ako gace ni nk'Amata na Fanta bikonje

    Umuntu uri mu Kagari ka Gatare mu Mudugudu wa Rugunga, ushaka kunywesha kuri station, ashobora kubona izirenze 16 mu rugendo ruzenguruka ahantu hangana na kilometero kare zirenga gato eshanu.

    Byonyine kuva Sonatube ugera Kicukiro Centre, ushobora kuhabona Station zigeze kuri eshanu.

    Umwe mu bo IGIHE yaganiriye nabo yagize ati 'Ntabwo abantu babuze aho banywera lisansi, ni ubucuruzi bw'abantu budasobanutse, burenga ku nyungu rusange.'

    Umukozi w'Umujyi wa Kigali yarenze ku byo abatekinisiye bari bemeje

    Amakuru agera kuri IGIHE avuga ko umukozi w'Umujyi wa Kigali watanze uruhushya rwo kubaka iyo station, Zirimwabagabo Abdoul Karim, yanyuranyije n'ibyo abatekinisiye basesenguye uwo mushinga bari bemeje, bakanzura ko bidakwiriye ko hubakwa station.

    Bivugwa ko uwo mukozi yabirenzeho, atanga uruhushya rwo kubaka. Ikindi ni uko aho iyo station yari iri kubakwa, hatujuje intera isabwa, kuko metero 30 zigenwa n'itegeko uvuye mu mbago za station kugera ku rugo rw'abaturage zitari zubahirijwe.

    Icyemezo cyo kubaka iyo station bivugwa ko cyatanzwe tariki ya 23 Mutarama 2023.

    Bivugwa ko uwo mukozi yafatiwe ibihano, ndetse agakurwa mu nshingano zo kongera gutanga izo mpushya. Hari n'amakuru avuga ko RIB yaba yatangiye kumukoraho iperereza kuko ngo atari ubwa mbere yari agaragaye mu makosa nk'ayo.

    IGIHE ntiyabashije kubona ukuri kw'ibivugwa ko ari nawe watanze urundi ruhushya rwa Stations yahagaritswe ku i Rebero kuko nayo yari iri ahantu hadakwiriye.

    Hari andi makuru avuga ko hari inama imwe iherutse kuba hatangirwamo amakuru ko mu iyubakwa rya Stations harimo ruswa, ndetse havugirwamo ko itangwa igera no kuri miliyoni 50 Frw hamwe na hamwe.

    Gutanga impushya zo kubaka Stations, byakajijwe

    Umujyi wa Kigali usobanura ko wasesenguye ikibazo cy'aba baturage ugasanga gifite ishingiro, bityo ugafata umwanzuro wo guhagarika uruhushya rwari rwarahawe uwo mushoramari.

    Hari amakuru IGIHE yabonye ko uwo mushoramari atishimiye kuba urwo ruhushya rwe rwahagaritswe, bityo ko yahise atanga ikirego avuga ko yarenganyijwe.

    Twagerageje uburyo bwose ngo tubashe kuvugana n'uyu mushoramari, bityo twumve impamvu ashingiraho ataka akarengane ariko ntiyabasha kuboneka ku murongo we wa telefone kuva mu Cyumweru gishize ndetse ntiyanasubiza ubutumwa bugufi twamwandikiye.

    Umuyobozi w'Umujyi wa Kigali, Rubingisa Pudence, yabwiye IGIHE ko hari impushya ebyiri zo kubaka Stations za Lisansi zahagaritswe imwe ku i Rebero n'indi ku Kicukiro muri Niboye kandi ko igenzura rikomeje.

    Ati 'Zarahagaritswe kubera ko hari ibyo igenzura ryasanze bitarakurikijwe, zirahagarikwa.'

    Rubingisa yavuze ko igenzura ryakozwe, ryagaragaje ko hari stations zikora mu buryo budakwiriye, ku buryo hari nk'aho umucanga wifashishwa mu gihe cy'inkongi uba udahari n'ibindi. Izo zose zaciwe amande.

    Ati 'Hari n'izikiri mu gishanga zigomba kuvamo bitarenze ku wa 19 Kamena. N'iziri imusozi hari izagiye zisabwa ibyo gukora, hari na nyinshi twagiye duca amande kuko wasangaga hari ibyo zagiye zibura.'

    Kugeza ubu, hari impushya zo kubaka Stations 21 nshya mu mujyi wa Kigali zari zarasabwe, ariko hafashwe umwanzuro wo kuba hahagaritswe kuzitanga mu gihe hakigenzurwa uburyo byakorwa neza kurushaho.

    Muri gahunda ziri gukorwa, harimo kugenzura stations zose ziri mu Mujyi wa Kigali n'aho ziherereye, harebwa niba koko zidahagije ugereranyije n'abakenera ibikomoka kuri peteroli.

    Amakuru IGIHE ifite ni uko iryo genzura rishobora kuzasiga hafashwe gahunda y'uko mu gihe cy'imyaka runaka, hahagarikwa gutangwa impushya zo kubaka Stations za lisansi nshya, mu gihe n'izisanzwe zikora harimo izizasabwa gukosora byinshi.

    Ushinzwe Ishami rigenzura ibijyanye n'ingufu, amazi n'isukura muri RURA, Mutware Alex, aherutse gutangariza IGIHE ko stations zose zasabwe kongera gusaba impushya kugira ngo hagenzurwe niba zubahirije ibisabwa. Gusaba izo mpushya bizarangirana na Gicurasi.

    Umujyi wa Kigali wahagaritse uruhushya rwo kubaka iyi station hamwe n'indi yo ku i Rebero

    Uvuye ku masangano y'imihanda, harimo metero 67 mu gihe hateganywa metero 100

    Ubuyobozi bw'Umujyi wa Kigali butangaza ko hari abashoramari bari barasabye uruhushya rwo gutangira kubaka station 21 ariko ko kuzitanga byabaye bihagaritswe

    Igenzura ryagaragaje ko aho iyi station yari igiye kubakwa, ari ahantu hadakurikije amabwiriza kuko nta ntera ya metero 100 irimo uvuye ku masangano y’imihanda

    Bitangira, ngo havuzwe ko iki kibanza kigiye gushyirwamo inzu z’amacumbi ariko uko iminsi ishira birahinduka

    Aho iyi station yari igiye kubakwa, imirimo yarahagaze nyuma y’aho Ubuyobozi bw’Umujyi wa Kigali buhagaritse uruhushya rwo kubaka

    Source : http://igihe.com/amakuru/u-rwanda/article/akajagari-muri-stations-za-essence-kahagurikiye-ibyemezo-bikarishye-byatangiye

  • Amayobera ku rupfu rw'umunyeshuri w'imyaka 12 wo muri Ecole des Sciences de Musanze – #rwanda #RwOT

    Uwo munyeshuri wigaga mu wa mbere w'amashuri yisumbuye witwa Umuhire Ange Cécile, yapfuye mu mpera z'icyumweru gishize. Amakuru avuga ko yarwaye ariko yasaba uruhushya rwo gutaha kugira ngo ajye kwivuza, akarwimwa.

    Binavugwa ko urupfu rwe rutahise rumenyekana ako kanya, ahubwo ko ubuyobozi bw'ikigo bwabimenye ko yashizemo umwuka hashize amasaha atatu bibaye.

    Umuyobozi wa Ecole des Science de Musanze, Padiri Nikwigize Florent, yabwiye IGIHE ko Umuhire yapfuye urupfu rutunguranye.

    Yavuze ko ku wa kane tariki ya 11 Gicurasi 2023, Umuhire yagiye ku ivuriro ryigenga riri mu mujyi wa Musanze ryitwa Prominibus yivuza ijisho ariko akaba yaravugaga ko ababara umutwe.

    Padiri Nikwigize atii ' mu masaha ya saa tanu yari yagarutse'.

    Yakomeje agira ati 'Kuwa Gatanu nijoro nka Saa 20:45, nagiye kumureba n'undi bari kumwe mu ivuriro ry'ikigo, mubaza uko ameze ambwira ko ijisho ryakize ariko umutwe ukimurya. Ni ibyo naherutse.'

    Nyuma yakiriye amakuru ko uyu mwana yitabye Imana kandi nabwo ngo yabibwiwe n'Umuforomo wo ku Bitaro bya Ruhengeri.

    Padiri Nikwigize yavuze ko andi makuru ajyanye n'urupfu rw'uyu munyeshuri, yayamenye nyuma y'uko yitabye Imana. Ngo yabwiwe ko ku wa Gatanu nijoro, Umuhire yararanye na mukuru we wiga mu mwaka wa Kane.

    Bigeze nijoro, ngo arakomerezwa, uwo muvandimwe we yitabaza Animatrice unashinzwe abarwayi, ahageze asanga ameze neza, abasaba kuryama. Bajya gutabaza animatrice, ngo ni uko Umuhire yari amaze kwitura hasi.

    Ngo uwo muyobozi ushinzwe imyitwarire mu gitondo cyo ku wa Gatandatu tariki ya 13 Gicurasi 2023, yahamagaye iwabo w'umunyeshuri ababaza niba asanzwe arwara ubwo burwayi bwo kwitura hasi.

    Padiri Nikwigize arakomeza ati ' Njye ubwo mu gitondo nari nagiye gusoma misa ariko nta makuru yo kwitura hasi nijoro nari mfite. Noneho umuryango we utuye hano hafi waje kumureba usanga ameze nabi bamushyira mu modoka bamujyana ku bitaro [bikuru bya Ruhengeri].'

    'Mvuye mu misa, umuforomo wo kuri ibyo bitaro ufite umwana hano yahise ampamagara ambwira ko umunyeshuri yitabye Imana ko bamugejeje ku bitaro yagagaye. Ni inkuru ibabaje haba ku muryango we ndetse n'ikigo ariko igoye gusobanura.'

    Padiri Nikwigize yavuze ko iperereza ry' abaganga ndetse n'inzego z'umutekano aribyo bizagaragaza icyishe uyu munyeshuri.

    Ababyeyi be bari batanze itangazo ko uwo munyeshuri ashyingurwa kuri uyu wa 15 Gicurasi 2023 ariko 'kimwe mu byatumye bihinduka ni uko bagomba kumupima bakamenya icyo yazize'.

    Umuvugizi w'Urwego rw'Ubugenzacyaha RIB, Dr Murangira B Thierry, yabwiye IGIHE ko kuri ubu RIB yatangiye iperereza ku cyaba cyateye urupfu rwa Umuhire.

    Yavuze ko Animatrice witwa Nyiramugisha Jeanne usanzwe ari umuforomo muri Ecole des Sciences de Musanze, yatawe muri yombi ndetse afungiye kuri sitasiyo ya RIB ya Muhoza mu Karere ka Musanze mu gihe iperereza rigikomeje.

    Urupfu rwa Umuhire Ange Cécile wari ufite imyaka 12 rukomeje guteza urujijo

    Amayobera ku rupfu rw’umunyeshuri wo muri Ecole des Sciences de Musanze

    Source : http://igihe.com/amakuru/u-rwanda/article/amayobera-ku-rupfu-rw-umunyeshuri-w-imyaka-12-wo-muri-ecole-des-sciences-de

  • Mukansanga ku rutonde rwa nyuma rw’abasifuzi bazasifura igikombe cy’Isi #rwanda #RwOT

    Umusifuzi mpuzamahanga w’umunyarwanda, Mukansanga Salima ari ku rutonde rwa nyuma rw’abasifuzi bazasifura igikombe cy’Isi cy’abagore 2023.

    Ni igikombe kizabera muri New Zealand na Australia kuva tariki ya 20 Nyakanga kugeza 20 Kanama 2023.

    Mukansanga w’imyaka 34 we n’abandi basifuzi 3 b’abagore bakomoka muri Afurika ari bo Vincentia Amedome wo muri Togo, Akhona Makalima wo muri Afurika y’Epfo na Bouchra Karboubi wo muri Morocco.

    Mukansanga akaba aheruka gushyirwa na CAF ku rutonde rw’abasifuzi beza b’abagore muri Afurika.

    Ni nyuma kandi yo kwandika amateka yo kuba umugore wa mbere usifuye igikombe cy’Isi cy’abagabo aho cyabereye muri Qatar 2022.

    Igikombe cy’Isi cy’abagore kizaba kiba ku nshuro ya 9 aho kizahuza ibihugu 32. Leta Zunze Ubumwe za Amerika niyo ifite igikombe giheruka aho yatsinze ku mukino wa nyuma France 2-0.

    Mukansanga Salima azasifura igikombe cy’Isi cy’abagore

    Source : http://isimbi.rw/siporo/article/mukansanga-ku-rutonde-rwa-nyuma-rw-abasifuzi-bazasifura-igikombe-cy-isi

  • Karasira Aimable yagerageje kwigaragambya ku rukiko i Nyanza #rwanda #RwOT

    Aimable Karasira Uzaramba waburaniye mu rugereko rwihariye rushinzwe kuburanisha ibyaha mpuzamahanga n'ibyamburanya imbibi ruri i Nyanza mu Majyepfo y'u Rwanda yavuye mu rukiko iburanisha ry'umunsi ritarangiye ari ku mapingu ajya hanze

    Aimable Karasira hari raporo y'umuganga Dr. Muremangingo Arthur aherutse kugaragaza ko uyu mugabo afite uburwayi butandukanye burimo ubwo mu mutwe.

    Aimable Karasira waje ku rukiko afite bibiriya ntagatifu na bibiliya yera n'impapuro mu ntoki yatangiye umwunganira mu mategeko Me Evode Kayitana agaragaza ko raporo yatanzwe na muganga Arthur ko Karasira afite ikibazo cyo mu mutwe ndetse anarwaye indwara zitandukanye.

    Me Kayitana yavugaga ko Arthur bamaranye icyumweru amwitaho nyuma haje abandi baganga babiri nkuko urukiko rwari rwategetse batatu Karasira yabyanze asaba ko yasubira muri gereza

    Me Kayitana ati'Raporo ya muganga Arthur niyo kuko nabo bandi bari baje ngo bafanye bamwemereye kuyikora ndetse ni nawe ubakuriye ikwiriye guhabwa agaciro'

    Me Kayitana yavuze ko raporo urukiko rwashakaga rwayihawe yisunze ingingo z'amategeko yavuze ko umukiliya we akwiye kuba umwere kuko umukiliya we abaganga barimo n'undi muganga witwa Chantal babonye umukiliya we Aimable Uzaramba Karasira afite uburwayi bwo mu mutwe.

    Aimable Karasira yavuze ko aho yarari mu bitaro bya Caraes Ndera yaracunzwe n'umucungagereza ufite imbunda kandi kuva 1994 atinya imbunda agira ubwoba

    Ati'Ni njye wisabiye kuva mu bitaro kuko numvaga uburwayi bwanjye buri kwiyongera kandi ibyo ndegwa nibyo ndwaye ni bimwe'

    Bwana Karasira yavuze ko uburwayi bwe burimo no guhangayika bihoraho

    Ati'Umuntu uhangayitse bihoraho ntashobora gutekereza neza'

    Bwana Karasira Uzaramba ahagurutse yabwiye urukiko ati'Ibi mubimbwirire abanyarwanda harimo na Perezida wa Repubulika ibyo mvuga nibyo nkara nanjye sinjye ndarwaye'

    Karasira kandi yabwiye abacamanza n'ubushinjacyaha ko uwo bakorera ari umwe ikibatandukanya ari imyenda bambaye.

    Umucamanza yagendaga amubwira ko ibyo ari kuvuga hari aho ari gutandukira

    Ubushinjacyaha buvuga ko kuba Karasira Aimable yaranze itsinda ry'abaganga akagenda yabikoze nkana kandi yabigambiriye bityo ubushinjacyaha bukaba butemera iyo raporo yakozwe na Dr.Muremangingo Rukundo Arthur kuko itujuje ubuziranenge.

    Ubushinjacyaha burabishingira ko Karasira atasuzumwe n'abaganga batatu nkuko urukiko rwari rwabitegetse

    Ubushinjacyaha buti'Iyo raporo yakozwe n'umuganga umwe birakwiye ko Karasira asuzumwa n'abaganga batatu batandukanye banaturutse mu bitaro bitandukanye birimo CHUK, CHUB na Caraes Ndera gusa Caraes Ndera izabe ariyo ikora iyo raporo'

    Ubushinjacyaha buri kuvuga Karasira yakoze ibisa nk'imyigaragambyo

    Karasira yabanje guhaguruka atabiherewe uburenganzira n'urukiko umucamanza amubaza impamvu ahagurutse

    Karasira ati'Ngiye kwihagarika'

    Umucamanza ati'Icara siko mu rukiko bitwara'

    Karasira ati'None Nyakubahwa mucamanza nihagarike aha?'

    Umucamanza ati'Icara'

    Uyoboye inteko iburanisha Antoine Muhima yahise ategeka ko iburanisha riba risubiswe Karasira akikiranura n'umubiri.

    Nta munota washize Bwana Karasira Uzaramba Aimable argaruka mu rukiko.

    Umucamanza akomeza iburanisha aha ijambo ubushinjacyaha bukomeza kuvuga maze Karasira ahita ahaguruka agira ati'Nyakubahwa mucamanza ibiri kuvugirwa hano ndumva bishobora gutuma nkora ibyaha ndigendeye'

    Umucamanza yavuze ko adashaka gukomeza iburanisha yakwigendera maze iburanisha rirakomeza ariko mu mwanya wa Karasira Uzaramba havuga umunyamategeko we

    Karasira hanze y'urukiko

    Aimable Karasira Uzaramba hanze y'urukiko yavugaga amagambo akakaye (tutifuje gutambutsa)arimo ay'urukuzasoni icyarimwe n'ubututsi.

    Bwana Aimable Karasira wicajwe hasi n'abacungagereza bakamwambika amapingu ntiyabikanzwe nabo ubwabo yabatukaga yamaze iminota irenga 30 avuga ndetse anatukana.

    Abacungagereza bafashe umwanzuro wo kumwinjiza mu modoka aranga ngo niyinjira mu modoka adasinye ku rubanza rwe ngo bataba bakomeje kumukorera icyo yise ikinamico babanza kubihariraho nawe ariko birangira asubijwe mu rukiko ajyanwa gusinya kuri dosiye ye.

    Aimable Karasira Uzaramba wamenyekanye cyane ku mbugankoranyambaga no kuri YouTube ndetse no mu buhanzi bwe yahoze ari umwarimu muri Kaminuza y'u Rwanda aregwa ibyaha bitandukanye birimo guhakana no gupfobya jenoside guha ishingiro jenoside no gukurura amacakubiri no gutangaza amakuru y'ibihuha.

    Yunganirwa na Me Gatera Gashabana utaruhari kuko yagiye hanze y'igihugu mu butumwa bw'akazi ndetse na Me Evode Kayitana warunamwunganiye none avuga ko ibyo Aimable Karasira Uzaramba alias Prof.Nigga akora atariwe ubyikoresha.

    Biteganyijwe ko Aimable Karasira Uzaramba azafatirwa icyemezo taliki ya 17/05/2023.

    Theogene Nshimiyimana FLASH FV mu karere ka Nyanza.

    The post Karasira Aimable yagerageje kwigaragambya ku rukiko i Nyanza appeared first on FLASH RADIO&TV.

    Source : https://flash.rw/2023/05/15/karasira-aimable-yagerageje-kwigaragambya-ku-rukiko-i-nyanza/?utm_source=rss&utm_medium=rss&utm_campaign=karasira-aimable-yagerageje-kwigaragambya-ku-rukiko-i-nyanza

  • Oprah wabyaranye Katauti yasangije Umuhungu we uburyo yashenguwe n'urupfu (…) – Umuryango.rw #rwanda #RwOT

    Irene Pancras Uwoya yamenyekanye mu Rwanda nyuma yo kurushingana n'uwahoze ari kapiteni w'ikipe y'igihugu Ndikumana Hamad Katauti witabye Imana muri 2017, yasangije umuhungu we agahinda yatewe no kubura se ,umubyara amuhamiriza ko Imana imuhaye amahirwe yo kuzura umuntu umwe ku Isi yazura uwahoze ari umugabo we.

    Oprah yabigarutseho mu kiganiro yagiranye n'umuhungu we Ndikumana Krish yabyaranye na Ndikumana Hamad Katauti.

    Muri iki kiganiro cyiswe 'The Sentence', Ndikumana Krish yumvikanye abaza nyina ibibazo bitandukanye by'umwihariko ibijyanye n'umubano yari afitanye na se witabye Imana mu 2017.

    Kimwe mu bibazo uyu muhungu abaza nyina ni ikijyanye n'uburyo yamenyanye na se. Mu gusubiza, Irene Uwoya yavuze ko yamenyanye na Katauti nyuma yo kumubona muri filime yakinnyemo yitwa Oprah.

    Ati 'Njye na papa wawe mu by'ukuri yambonye muri filime ya Oprah nyuma aza kunshaka binyuze muri Raymond Kigosi, arambona ubundi dutangira kuganira. Ibyabaye byose byasaga n'ubufindo, byari byiza.'

    Uyu mugore yakomeje avuga ko iyo arebye umuhungu we amwibutsa Se Katauti.
    Ati 'Iyo nkurebye, mbona nyakwigendera Hamad (Katauti) muri wowe, mbona uri ikintu cy'ingenzi yansigiye. Mbona ko yansigiye umugisha n'ikintu cy'agaciro, nsanga yarampaye ibyishimo n'impamvu yo gukomeza kubaho.'
    Irene Uwoya yavuze ko mu gihe yabanye na Katauti yakunze ko uyu mugabo yamushyigikiye mu kazi ke ko gukina filime, ndetse nawe akagerageza kumuba hafi mu gihe yakinaga umupira w'amaguru muri Chypre.
    Ndikumana Krish yakomeje abaza nyina umuntu umwe ashobora kuzura mu bapfuye mu gihe yaba ahawe ubwo bushobozi n'Imana.
    Mu gusubizwa, Irene Uwoya ati 'Nahitamo papa wawe kandi twakongera kuba umuryango. N'ubu ndacyafite uburibwe kandi ndamukumbura.'

    Irene Uwoya yavuze ko nubwo hashize igihe Katauti apfuye ataramwibagirwa ariko yatangiye n'urugendo rwo gukomeza kubaho ubuzima bwe atamufite.

    Hamad Katauti wakanyujijeho mu Rwanda nk'umukinnyi w'Umupira w'Amaguru ndetse n'umutoza wungurije wa Rayon Sports yatabarutse mu ijoro ryo ku itariki ya 14 Ugushyingo mu 2017 azize urupfu rutunguranye.

    Nubwo Irene Uwoya yatangaje ibi, mbere y'urupfu rwe, Katauti yari amaze iminsi atangarije IGIHE ko ko iby'urugo rwe na Irene Uwoya byamaze kurangira gusa yanze kuvuga byeruye icyateje ubwumvikane buke hagati yabo.

    Irene Pancras Uwoya na Hamad Ndikumana 'Katauti', ubukwe bwabo bwatashye kuwa 11 Nyakanga 2009 , ibirori byabereye kuri Hoteli ya Giraffe View, iherereye Mbezi Kawe, mu Mujyi wa Dar es Salaam.

    Ni ubukwe bwakoze amateka akomeye kuko bwanditswe mu binyamakuru bitandukanye ko ari bwo buhenze kurusha ubw'ibyamamare byose bwabayeho muri Tanzania muri icyo gihe. Ubu bukwe bwatwaye 80,000,000 z'amashilingi ya Tanzania.

    Uwoya n'umugabo we Katauti bagiye bagirana ibibazo bikomeye birimo no gutandukana bakongera bagasubirana, gucana inyuma, kurwana , intonganya za hato na hato n'ibindi.

    Source : https://umuryango.rw/imyidagaduro/article/oprah-wabyaranye-katauti-yasangije-umuhungu-we-uburyo-yashenguwe-n-urupfu-rwa

  • Kenya: Intare icumi zagaritswe n'abaturage mu cyumweru kimwe (…) – Umuryango.rw #rwanda #RwOT

    Aya makuru aje nyuma y'iminsi mike icyo kigo gitangaje ko intare yari ikuze cyane muri Afurika yitwa Loonkiito nayo yishwe n'abahigi mu cyumweru gishize, ifite imyaka 19.

    Iyo ntare yishwe ubwo yatorokaga pariki kubera inzara, ikajya mu nzuri z'abaturage guhiga amatungo ba nyiri amatungo bakayihitana.

    Hashize igihe umubano w'abantu n'inyamaswa zo mu Gasozi muri Kenya wifashe nabi kubera amapfa agiye kumara imyaka 40 mu bice bimwe na bimwe by'icyo gihugu.

    Bituma inyamaswa zo muri pariki zibura ibyo zirya zigasohoka zijya gushakisha mu baturage, zigasanga nabo baryamiye amajanja kuko bavuga ko zimaze kubamarira amatungo menshi.

    Nko kuri uyu wa Gatandatu hishwe intare esheshatu nyuma yo kwica ihene 11 n'imbwa imwe.

    Hatangiye ibiganiro hagati y'abayobozi b'inzego z'ibanze, abaturage n'abashinzwe kubungabunga inyamaswa, ngo barebere hamwe icyakorwa kugira ngo kwica inyamaswa zo mu gasozi bihagarare, nkuko CNN yabitangaje.

    Source : https://umuryango.rw/amakuru/mu-mahanga/ubukungu/article/kenya-intare-icumi-zagaritswe-n-abaturage-mu-cyumweru-kimwe-gusa

  • Ibwa ikuze ku Isi yakorewe ibirori byagatangaza [Ifoto] – Umuryango.rw #rwanda #RwOT

    Imbwa ikomoka muri Portugal inafatwa nk'aho ariyo ikuze ku Isi yujuje imyaka 31, ikomeza guca aka gahigo yagezeho bwa mbere muri Gashyantare mu 2023.

    Bobi ni nyarubwana ubundi yabarirwaga icyizere cyo kuramba cyo hagati y'imyaka 12 na 14.

    Indi mbwa yaciye umuhigo w'ishaje kurusha izindi ni Bluey yo muri Australia, yapfuye mu 1939 ifite imyaka 29 n'amezi atanu.

    Ku wa Gatandatu tariki 13 Gicurasi hateguwe igikorwa cyo kwizihiza isabukuru y'iyi mbwa, mu birori byabereye ahazwi nka Conqueiros mu Majyepfo ya Portugal.

    Leonel Costa utunze iyi mbwa yavuze ko ibirori byo kwizihiza isabukuru yayo byitabiriwe n'abarenga 100, birangwa n'imihango n'ibirori bya gakondo byo muri aka gace.

    Uyu mugabo yakomeje ashimangira ko kuva Bobi yaca agahigo ko kuba ariyo mbwa ikuze ku Isi, ikomeje gusurwa n'umubare munini w'abantu biganjemo abanyamakuru.

    Nubwo iyi mbwa itakibasha kugenda no kureba neza, Leonel Costa yemeza ko nta kindi kibazo cy'ubuzima ifite, ari naho ahera yizera ko izabasha kumara indi myaka myinshi.

    Source : https://umuryango.rw/ubuzima-115/udushya/article/ibwa-ikuze-ku-isi-yakorewe-ibirori-byagatangaza-ifoto

  • Umubyeyi yavuze icyo atekereza ku rupfu rw'umwana we wigaga muri E.S (…) – Umuryango.rw #rwanda #RwOT

    Amakuru Umuryango wahawe n' umubyeyi wa nyakwigendera avuga ko bahamagawe babwirwa ko baza ku ishuri ry'umwana bakamucyura kuko arembye, gusa bakubise igihwereye bahawe umwana warangije gushiramo umwuka.

    Papa w'uyu mwana witwa Maitre Maniraguha Sylvaistre yadutangarije ko bahamagawe kuri Telephone, bageze kwishuri bafatanya n'ikigo kujyana umwana kwa muganga, gusa ku bw'ibyago muganga yemeza ko umwana yamaze kwitaba Imana.

    Byagenze bite ngo Umunyeshuri arware kugera apfuye Ubuyobozi bw'ikigo butabizi?
    Maitre Maniraguha yavuze ko kuri we abona harabaye uburangare bukabije, kuba umwana yarwara ku ishuri ntakurikiranywe byimbitse kugera habayeho ibyago by'urupfu nyamara hari ushinzwe gukurikirana ubuzima bw'abana.

    Ati' Inshingano n'iz'umuntu ku giti cye si iza rusange. Rero mbona uyu muganga yaragize uburangare n'ubwo ntazi neza icyabimuteye? Gusa n'ikigo cyose harimo amakosa yo kudakurikirana, kuko sinzi uburyo umwana arwara ntihagire umuherekeza'

    Yongeye ho ko umwana we ntabundi burwayi budasanzwe yari atuwe afite, kuko yamwohereje ku ishuri ari muzima nta kindi kibazo cy'uburwayi ubwo aribwo bwose afite.

    Hakurikiyeho iki?

    Mu muryango wa nyakwigendera, ubu barimo gutegura nk'umuryango uburyo bwo kuzaherekeza umwana wabo Ange Cecile witabye Imana, icyakora ngo nti baremererwa mu buryo bweruye ku mushyingura.

    Kuri iki Maitre Maniraguha yagize ati'Turimo kwitegura uburyo tugomba gushyingura no guherekeza umwana wacu, ariko umwanzuro tuzawuhabwa n'ubugenzacyaha'

    Ku bijajyanye n'icyo bateganya nko gushaka ubutabera, Maitre Maniraguha Sylvaistre yabwiye Umuryango ko ntacyo batangaza ubu, usibye gutegereza ibyo inzego z'iperereza zizatangaho umwanzuro.

    Umuhire Ange Cecile witabye Imana yigaga mu mwaka wa mbere muri Ecole des Sciences de Musanze ,aho yari amaze ibyumweru bibiri arwariye .yarapfuye ku wa 13 Gicurasi 2023.

    Umuhire Ange Cecile assize abavandimwe be batatu, kuko avuka mu muryango w'abana 4 ari nawe wari bucura muri uyu muryango ubu ubarizwa mu murenge wa Kimonyi , akagari ka Kivumu mu mudugudu wa Musezero.

    Kugeza ubu RIB yatangaje ko yataye muri yombi uwari ushinzwe ubuzima ku cyaba cyarateye urupfu rw'umwana w'umunyeshuli uherutse kwitaba Imana mu mpera z'iki cyumweru twaraye dusoje bivugwa ko yarangaranywe.

    Uwitwa Nyiramugisha Jeanne, umuforomokazi wari ushinzwe kwita ku bana muri icyo kigo cy'ishuli cya Ecole des Sciences de Musanze , niwe ubu wafashwe akaba afungiye kuri Station ya RIB ya Muhoza/Musanze.

    Amakuru avuga ko uyu mwana yarwaye, ariko uko asaba uruhushya rwo gutaha iwabo ngo yivuze ikigo kikarumwima agasabwa kwivuriza muri infirmerie y'ikigo

    Ngo uyu munyeshuri yaba yari amaze ibyumweru hafi bibiri arwariye mu kigo ari naho yaguye

    Amakuru ava muri iki kigo kandi akomeza avuga ko urupfu rwe rwaba rwaramenyekanye hashize hafi amasaha atatu apfuye.

    Source : https://umuryango.rw/amakuru/mu-rwanda/ubuzima/article/rib-yataye-muri-yombi-uwari-ushiznww-ubuzima-muri-ecole-des-sciences-de-musanze

  • Nyuma yo gutsindwa umutoza wa Arsenal yaciye bugufi imbere y'abafana – Umuryango.rw #rwanda #RwOT

    Nyuma y'umukino ikipe ya Arsenal yatsinzwemo ibitego 3 n'ikipe ya Brighton&Hove Albion ku busa , Umutoza Mikel Arteta yiseguye kubafana b'iyi kipe iri kugabanyirizwa amahirwe ku gikombe cya Premier League.

    Ku mugoroba wo kuri iki cyumwe tariki 14 Gicurasi 2023, nibwo Arsenal yatsinzwe n'ikipe ya Brighton&Hove Albion ibitego 3-0 ,ibi bishatse kuvuga ko mu gihe Arsenal yatakaza undi mukino Manchester City yahita itwara igikombe, ndetse kugira ngo Arsenal itware igikombe byasaba ko Manchester City itsindwa imikino itatu isigaje yose.

    Mikel Arteta utoza Arsenal watewe ipfunwe n'umukino wabaye kuri uyu mugoroba w'iki cyumweru wasigiye intimba abafana b'iyi kipe nawe yagize icyo abitangazaho.

    Agira ati' Nanga ibyiyumvo byo gutenguha abantu mu gihe hari icyo bari biteze. Ni ibintu bibabaje cyane ndetse ndabisabira imbabazi.

    “Umwanya wa kabiri wo turawufite kandi ntakiza kubihindura ariko ibyavuye muri uyu mukino biraza kuntwara iminsi mike ngo mbyikuremo.

    “Akazi kange ni kubyaza umusaruro buri mukinnyi uko bishoboka ariko uko bigaragara uyu munsi sinabikoze, ni inshingano zange.

    “Uko iyi kipe yitwaye mu mezi icumi aheruka bitandukanye n'uko buri wese yari abyiteze ndetse tugomba kumenya uko twitwara kuri ibyo byari byitezwe.”

    Ibitego bitatu byatsinzwe na Julio Encizo, Deniz Undav na Pervis Estupinan byatumye ikipe ya Brighton&Hove Albion ifata umwanya wa gatandatu ku rutonde rw'agateganyo rwa shampiyona.

    Deniz Undav watsinze igitego cya kabiri yatangaje ko umutoza wabo Roberto de Zerbi yaberetse amashusho ya Michael Jordan mu kubatera imbaraga.

    Uku gutsindwa kwatumye amahirwe yayo yo kwegukana Igikombe cya Shampiyona y'u Bwongereza ayoyoka ku kigero cyo hejuru, kuko ubu Manchester City ya mbere iyirusha amanota ane igifite n'umukino w'ikirarane, mu gihe habura imikino ibiri ngo Premier League igere ku musozo.

    Nubwo bimeze bityo, mu mibare biracyashoboka ko iyi kipe yakwegukana iki gikombe, mu gihe yatsinda imikino ibiri isigaje ya Nottingham Forest na Wolverhampton Wanderers ariko icyo gihe Manchester City ikaba yatakaje imikino itatu yose isigaje.

    Source : https://umuryango.rw/imyidagaduro/imikino/article/nyuma-yo-gutsindwa-umutoza-wa-arsenal-yaciye-bugufi-imbere-y-abafana