Category: Uncategorized

Uyu muhanzi yashyize hanze iyi ndirimbo kuri uyu wa Mbere tariki 22 Gicurasi 2023, nyuma y’iminsi yari ishize ayirarikiye abafana be n’abakunzi b’umuziki.

Muri rusange, indirimbo yakubiyeho ziganjeho cyane izigaruka ku rukundo, ubuzima busanzwe no guhimbaza Imana. Aherutse kubwira InyaRwanda ko yahisemo kuyita iri zina 'Life Love&Light' kuberuka ko hariho indirimbo zitsa cyane ku buzima, urukundo n'Imana.

Ati 'Ni album yanjye ya gatatu, impamvu y'iri zina ni uko hakubiyemo ibigize album harimo n'indirimbo zivuga kuri buri gice cy'ubuzima; urukundo, ubuzima busanzwe ndetse n'Imana.'

Nel Ngabo avuga ko iyi album ye amaze igihe kingana n'umwaka n'igice ayitegura, kandi yayikoranyeho n'abantu banyuranye.

Kuri we, avuga ko ari umugisha yagize ku kuba yarabashije kurangiza iyi album. Ati 'Ni umugisha ndanishimye kuba iyi album irangiye neza.'

Indirimbo ziri kuri iyi album zumvikana mu rurimi rw’Ikinyarwanda, Icyongereza

n’Igifaransa. Ni album ya Gatatu, uyu munyamuziki ashyize hanze nyuma ya Album ye ya mbere ‘Ingabo’ yatuye Se wamushyigikiye cyane mu rugendo rwe rw’umuziki, ndetse na Album ye ya kabiri yise ”RNB 360

Iyi album iriho indirimbo nka ‘Reka nguteteshe’, ‘Arampagije’, ‘Woman’, ‘Babasore’ yakoranye na P Fla, ‘Ukiri uwanjye’, ‘Blessed’ yakoranye na Sintex, ‘My Heart’, ‘Ive’ yakoranye na Ruti Joel, ‘Reka hashye’, ‘Wine&Chill’, ‘Sina’, ‘Finall’ ndetse na ‘Narahindutse.

Album ya mbere yayise 'Ingabo'  iriho indirimbo nka 'Nyereka inzira' ihimbaza Imana, 'My Queen', 'Zoli', 'Low Key', 'Agacupa', 'Ndaku(Blocka)' yakoranye na Bull Dogg, 'Mukwakarindwi', 'Baby' n'izindi.

Album ya kabiri yise 'RNB 360' iriho indirimbo esheshatu yakoranye n'abandi bahanzi, n'izindi eshanu ze bwite. Indirimbo ze wenyine kuri iyi Album ni Want You Back, Waiting, Uzanyibuka, Henny na Perfect.

Indirimbo yakoranye n'abandi bahanzi ni Muzadukumbura yakoranye n'umuraperi Fireman, Bindimo yakoranye na Kevin Skaa na Fireman, Takalamo yakoranye na Platini P, Keza yakoranye na Yvan Buravan, Church Boy yakoranye na Angel Mutoni ndetse na Mutuale yakoranye na Bruce Melodie.

Nel Ngabo yasohoye album ye ya Gatatu yise 'Life Love&Light' iriho indirimbo 13 

Sintex yafashije Nel Ngabo mu ndirimbo ye bise ‘Blessed’ igaruka kugushima Imana ‘n’ubwo byose bitameze neza’ Bati “Iyo mbyutse buri gitondo nshima Imana’ 

P FLa yakoranye indirimbo na Nel Ngabo yitsa ku kwitaka, kuvuga ibikorwa n’ibindi byumvikanisha ibyo bamaze kugeraho. Bati “Turacyari babasore, babandi babyuka mukiryamye.” 

Ruti Joel na Nel Ngabo bakoranye indirimbo ‘Ivre’ yuzuye imitoma, ku musore wakunze umukobwa

KANDA HANO UBASHE KUMVA INDIRIMBO 13 ZIGIZE IYI ALBUM

“>

Source : https://inyarwanda.com/inkuru/129652/nel-ngabo-yasohoye-album-yahurijeho-abarimo-p-fla-na-sintex-129652.html

Iteka, impano zihora ari ingenzi cyane ku muntu ushaka kubaka umubano ukomeye kandi wuje urukundo. Muri rusange impano zigira akamaro kanini, ariko byose bikaganisha ku gukomeza umubano no gutuma urushaho kuramba. 

Nubwo imibanire y'abantu igiye yihariye, ariko nta muntu n'umwe ushobora guhakana ko impano zifite uruhare runini mu gushimangira uko abantu babanye. Iyo tuvuze ibijyanye n'imibanire, ntabwo bireba gusa abashakanye. Bishobora kuba imibanire n'abavandimwe bawe, ababyeyi, inshuti, abo mukorana, n'abandi. 

Izi ni zimwe mu mpamvu gutanga impano ari ingenzi mu mibereho y'abakundana:

1. Impano yo gushimira

Mu mibanire iyo ari yo yose, buri gihe, ni byiza kwibutsa umukunzi wawe ko umukunda cyane kandi ukanamushimira ko yaje mu buzima bwawe n'ibyo akora ku bwawe. Ushobora kumutegurira impano nziza kandi yoroheje niyo yaba shokora cyangwa ikindi kintu kidahenze, si ngombwa kubanza kubira icyuya! Ukayimuha, nk'ikimenyetso cyo gushimira kandi birahagije rwose kwerekana ibyiyumvo byawe. Impano yawe yo gushimira izahora ikumwibusa ubuziraherezo!

2. Impano yo kugaragaza urukundo

Iyi ni inzira nziza yo gushimangira umubano. Niba uri mu bucuti cyangwa ufitanye umubano udasanzwe n'undi muntu, ugomba guhora umwereka ko umwitayeho cyane. Si ngombwa buri gihe gutegereza kumuha impano nyinshi zidasanzwe. Impano ntoya izamwereka ibyiyumvo by'urukundo umufitiye kandi bimutere kwiyumva nk'udasanzwe!

3. Impano yo kwizihiza isabukuru

Isabukuru y'amavuko y'umuntu cyangwa indi sabukuru iyo ariyo yose ni intambwe ikomeye mu buzima bw'umuntu. Ni ingenzi cyane rero kuzirikana uwo munsi, maze ukifatanya n'umukunzi wawe kuwizihiza ariko ntiwibagirwe no kumugenera impano idasanzwe ijyanye n'uwo munsi. Hitamo impano ikwiye uwo ukunda kandi watekerejeho neza bizagufasha gutsindira umutima we byoroshye.

4. Impano yo gusaba imbabazi

Aho amagambo adahagije, impano zirahari kugirango zibigufashemo! Abantu bakunze kwisanga mu bihe bibagoye aho bashaka gusaba imbabazi abo bakunda ariko bakabura amagambo amagambo akwiye bakoresha. Mu bihe nk'ibi, impano ishobora kubikora neza cyane nkuko ikagufasha kwerekana ko usabye imbabazi ubikuye ku mutima. Impano yerekana ko ubabajwe rwose n'ibyo wakoze.

5. Impano yo kwishimira insinzi y'umukunzi wawe

Iyo ubonetse ukifatanya n'umukunzi wawe kwishimira insinzi runaka yagezeho biba byiza. Ariko biba akarusho, iyo umushakiye impano nziza yo kumwereka ko umwishimiye, bimugaragariza ko wishimiye byimazeyo ibyo yagezeho. Ibyagezweho ibyo aribyo byose, iteka iyo mpano izahora isobanuye byinshi kri we kandi ahore yishimiye cyane kumva ko hari umuntu ushishikazwa n'insinzi ye.

6. Impano yo gutuma umukunzi wawe amwenyura

Ha uwo ukunda impano kuberako bizana kumwenyura ku maso ye. Byuzuza ibyishimo, amahoro n'ibindi byiyumvo byinshi by'urukundo. Hatitawe ku cyabaye, iyo umuntu yakiriye impano imutunguye, arasimbuka kubera umunezero. Rero, mu mibanire yose, ni ingenzi kuzuza ubuzima bw'umukunzi wawe impano z'ibyishimo zo gutuma bamenya akamaro kabo mu buzima bwawe.

Muri rusange, ibyo byose byerekana ko gutanga impano ari ingirakamaro. Shimangira imizi y'umubano wawe ugenera impano umukunzi wawe kandi kenshi gashoboka. Hanyuma ahorane inseko nziza, yuje urukundo bigizwemo uruhare nawe. Impano ni ingenzi cyane kuko ibasha kugaragariza uwo ukunda ibyiyumvo n'amarangamutima byawe ku buryo bworoshye.

Isooko: relationshipatlife.com

Umwanditsi: Brenda MIZERO

Source : https://inyarwanda.com/inkuru/129653/sobanukirwa-byinshi-ku-kamaro-kimpano-mu-mubano-wabakundana-129653.html

Ku nshuro ya mbere Umuryango Fondasiyo Ndayisaba Fabrice, wagejeje igikorwa cyo Kwibuka mu mashuri Abana n’ibibondo bazize Jenoside yakorewe Abatutsi hanze ya Kigali aho yahereye mu Karere ka Bugesera mu Burasirazuba bw’u Rwanda.

Kuri uyu wa Mbere tariki ya 22 Gicurasi 2023 nibwo hatangiye igikorwa ngaruka mwaka cyo Kwibuka mu mashuri Impinja n’Abana bazize Jenoside yakorewe Abatutsi muri Mata 1994.

Ni igikorwa cyari gisanzwe kibera mu mashuri y’Akarere ka Kicukiro ariko kuri iyi nshuro iki gikorwa cyaguwe kigera no mu mashuri yose yo mu Akarere ka Bugesera.

Umuyobozi wa NFF Rwanda itegura iki gikorwa, Ndayisaba Fabrice yabwiye ISIMBI ko bafite intego y’uko iki gikorwa kizagera mu mashuri yose yo mu gihugu.

Ati “ni igikorwa kimaze igihe kinini kibera mu mashuri y’Akarere ka Kicukiro muri Kigali, kuri iyi nshuro twashatse kwagura, twahereye mu mashuri y’Akarere ka Bugesera tuzagera n’ahandi, turifuza ko iki gikorwa kigera mashuri yose agize igihugu. “

Ni igikorwa kizakorwa mu gihe cy’ibyumweru 2 aho hazajya hatangwa ubutumwa bumwe mu mashuri yose, hakazifashishwa n’imikino mu Kwibuka mu rwego rwo kugaragaza ko abishwe hari uburenganzira bavukijwe.

Perezida wa Ibuka muri Bugesera, Bankundiye Chantal yashimiye Ndayisaba Fabrice Foundation ku gikorwa cyo gutangiza gahunda yo #kwibuka abana, impinja.

Yagaragaje ko muri Jenoside hishwe abana benshi. Yahumurije abana agira ati”Jenoside ntizongera kubaho ukundi, turimo turarera neza.”

Ni ku nshuro ya 13 NFF Rwanda yibuka abana n’ibibondo bazize Jenoside yakorewe Abatutsi muri Mata 1994, bikaba ku nshuro ya 9 itegura iki gikorwa mu bigo by’amashuri.

Kwibuka Abana n’ibibondo byageze no mu mashuri y’Akarere ka Kicukiro

Source : http://isimbi.rw/andi-makuru/article/ndayisaba-fabrice-foundation-yaguye-igikorwa-cyo-kwibuka-impinja-n-abana-kigera-n-iburasirazuba

Bamwe mu Bamotari bakorera mu Mujyi wa Kigali, bavuga ko babangamiwe no kuba badafite aho bahagarara bategereje abagenzi hazwi nka 'Parking' mu nzimi z'amahanga, bigatuma bacibwa amande.

Iyo uganiriye n'abamotari bakorera hirya no hino mu mujyi wa Kigali, bakubwira ko bakomerewe n'ikibazo cy'uko batagira aho baparika bategereje abagenzi.

Aba bavuga ko iki kibazo kibagiraho ingaruka mu kazi kabo kuko bacibwa amande menshi kandi inshuro nyinshi ku munsi

Abaganiriye n'itangazamakuru ryacu, bavuga ko iki kibazo kibateza ubukene mu miryango,  kuko usanga bakorera bishyura amande gusa.

Ati ''Parking' yo ni ikibazo, umutekano twebwe tutabona ni uburyo batwandikira ariya mafaranga. Urugero nshobora kuvana umuntu Nyabugogo nagera mu mujyi bakanyandikira, navanayo undi muntu nagera Nyabugogo bakanyandikira, ikindi abantu batwandikira babikora mu buryo tutazi. Ubwose urumva ibyagatunze imiryango yacu Polisi itabyitwarira?'

Undi nawe ati 'Nibyo koko 'parking' ni nkey ,kandi hari ubwo ugera kuri 'parking' ugasanga huzuye, wakwihengeka gato ngo ukureho umugenzi bagahita bakwandikira. Urumva ko ari imbogamizi ikomeye.'

Aba bamotari bakomeza bavuga ko batumva ukuntu bacibwa amande kandi abubatse umuhanda batarigeze babashyiriraho aho guparika, akaba ariho bahera basaba inzego zibishinzwe kubarenganura.

Ati 'N'ubwo duhora tubisaba ntibyitabweho buri gihe duhora dusaba kurenganurwa no kudufata nk'abantu bafitiye umumaro igihugu, bakaduha 'parking' bakaduha umurongo mwiza ngenderwaho.'

Mugenzi we ati 'Ikintu nasaba ni uko badushakira 'parking'  nicyo cyaca n'aka kavuyo ko guparika neza.'

Undi nawe ati 'Baduhe 'parking' noneho niba ntwaye umugenzi nkamenya aho muparika nkamenya naho agenda n'amaguru.'

Umuvugizi wa Polisi y'u Rwanda CP John Bosco Kabera, avuga ko iki kibazo kirimo kuvugutirwa umuti kubufatanye n'umujyi wa Kigali

Ati 'Inzego zibishinzwe zigomba kubyitaho kugira ngo 'parking' iboneke. Ibyo rero ni umushinga gushaka aho abantu baparika,ni ikintu gikwiye gukorwa n'inzego zihuriweho nicyo kibazo n'umujyi wa Kigali, ibyo byaratangiye ariko n'ahahari hagomba kuba hakoreshwa.'

Kuba abamotari batagira ahantu bahagarara bategereje abagenzi hameze neza bibangamira akazi ka bo, rimwe na rimwe bishobora no guteza impanuka kuko hari ubwo usanga bamwe babyigana n'imodoka n'abantu batambuka mu muhanda kandi byitwa ko bari muri parikingi.

Eminente Umugwaneza

The post Kigali: Abamotari ntibafite  aho baparika bategereje abagenzi appeared first on FLASH RADIO&TV.

Source : https://flash.rw/2023/05/22/kigali-abamotari-ntibafite-aho-baparika-bategereje-abagenzi/?utm_source=rss&utm_medium=rss&utm_campaign=kigali-abamotari-ntibafite-aho-baparika-bategereje-abagenzi

Impuguke mu bukungu zasabye Guverinoma y'u Rwanda, gushyira ibiciro ntarengwa by'ubukode bw'inzu yaba iz'ubucuruzi cyangwa iz'ubukode, kuko ba nyirazo bakomeza kuzamura ibiciro uko biboneye. Ni ikibazo Abaturage bavuga ko nta gikozwe  cyatuma imibereho yabo imera nabi.

Abantu mu ngeri zinyuranye mu mujyi wa Kigali, barataka ko ibiciro by'ubukode bw'amazu yaba ayo guturamo bizamuka umunsi ku munsi.

Umwe ati 'Arahenze ariko ntabwo tuzi impamvu ibiciro biri kujya hejuru.'

Mugenzi we ati 'Kubera ko kubaka utujagari bitemewe, bituma amazu ahenda no kuba abantu bakomeza kuva mu byaro ari benshi.'

Undi nawe ati 'Nubwo ari mu biza no mu manegeka umuturage yabashaga gukorera amafaranga macyeya akabasha kubona ya nzu, ya mafaranga macyeya ahwanyije n'ubushobozi bwe.'

Aba baturage basanga hakwiye kujyaho uburyo bwo kubaka amazu y'ubukode  ahendutse, kandi hakaboneka ajyanye n'ibyiciro by'ubukungu abanyarwanda babarizwamo.

Usibye inzu zo guturamo, igiciro cy'ubukode bw'inzu z'ubucuruzi nacyo kizamuka umunsi ku munsi.

Abacururiza mu nyubako ya CHIC, bamwe muri bo baherutse kubwira ibitangazamakuru by'imbere mu gihugu ko kwishyura ubukode bw'umuryango umwe ku kwezi bihera ku mafaranga y'u Rwanda 500.000 cyangwa 600.000.

Ibisaba ko nk'abakora ubucuruzi buciriritse bihuza ari benshi, abagera nko ku icumi bagaterateranya ubushobozi kugira ngo babone ayo kwishyura umuryango wo gukoreramo [icyumba cy'ubucuruzi] buri kwezi.

 Ibi byose ngo bigira ingaruka ku muguzi wa nyuma, aho ahendwa biturutse ku guhenda kw'inzu yo gukodesha.

Impuguke mu bukungu zisanga ibiciro by'ubukode bw'inzu uko bikomeza kuzamuka  bikenesha abaturage, bityo zigasaba Leta gushyiraho ibiciro ntarengwa by'inzu z'ubukode ,yaba izo guturamo cyangwa iz'ubucuruzi.

 Dr Bihira Canisius ni impuguke mu bukungu.

Ati 'Ubundi kuva ushyizeho igiciro cy'ibikomoka kuri peterole, ugashyiraho igiciro cy'ibiribwa ugomba no gushyiraho igiciro cy'ubukode byanze bikunze ugendeye ku bikoresho inzu yubatsemo, kuko nibyo byerekana amafaranga wayitanzeho bakagira igiciro ntarengwa. Ushaka akajya munsi cyangwa akajya hejuru kimwe n'uko ubu bashyizeho ibiciro ntarengwa bya minerivale.'

Twashatse kuvugana nIkigo cyIgihugu gishznwe Imyubakire, ngo kigire icyo kivuga ku kibazo ibiciro by'ubukode bw'amazu bikomeza gutumbagira ntibyadukundiye, kuko n'ubutumwa bugufi twoherereje umuyobozi mukuru wacyo atabusubije.

Imibare y'ibarura ry'abaturage riheruka igaragaza ko Abanyarwanda bafite inzu zabo bwite ari 72%, mu gihe 22% bakodesha aho kuba.

 Abarebera ibintu hirengeye bagaragaza ko kuba Guverinoma iherutse kugabanya imisoro ku nzu, bikwiye  kugira ingaruka nziza ku bakodesha, igiciro cy'ubukode kikamanuka cyangwa ntigikomeze gutumbagira.

Daniel Hakizimana

The post Guverinoma yasabwe gushyiraho ibiciro ntarengwa by'ubukode bw'inzu appeared first on FLASH RADIO&TV.

Source : https://flash.rw/2023/05/22/guverinoma-yasabwe-gushyiraho-ibiciro-ntarengwa-byubukode-bwinzu/?utm_source=rss&utm_medium=rss&utm_campaign=guverinoma-yasabwe-gushyiraho-ibiciro-ntarengwa-byubukode-bwinzu

Uwishwe ni umusore uri mu kigero cy,imyaka 20 y'amavuko nk'uko Umunyamabanga nshingwa bikorwa w'umusigire w'umurenge wa Murambi FRED, yabwiye umunyamakuru w'umuryango.

Yakomeje avuga ko nyakwigendera akiri mu mugezi kuko birinze kumukoraho ngo bahamukure RIB na Police batarahagera, mu rwego rwo kwirinda gusibanganya ibimenyetso bizifashishwa hashakishwa uwamwishe.

Mukarere ka Karongi mu mpera z'icyumweru gishize abanyerondo b'umwuga bishe umukarani bamukubise inkoni nyinshi

Abaturage bo mu murenge wa Rubengera akagali ka kibirizi ntibatinya kuvuga ko urugomo nk'urwo rugeza no ku rupfu ruri gukomoka ku businzi bukabije buri muri ako gace.

Source : https://umuryango.rw/amakuru/mu-rwanda/umutekano/article/karongi-undi-muntu-bamwishe-bamuta-mu-mugezi-wa-mashyiga

Umugabo witwa Nteziryayo Callixte utuye mu Mudugudu wa Butare II, Akagari ka Nyamagana Umurenge wa Ruhango yatemwe mu mutwe na Sebukwe ubwo yajyaga gucyura umugore we wari warahukanye.

Ahageze ngo yabwiye ab'iwabo w'umugore ko bamumuhana n'ibyo yasahuye mu rugo rwe, bitaba ibyo akabatwikisha essence.Ubuyobozi bw'Umurenge wa Mwendo, aho uyu muryango wo kwa Sebukwe utuye, buvuga ko yahageze agashaka kurwanya Sebukwe, na we mu rwego rwo kwirwanaho afata umuhoro awutemesha umukwe we mu mutwe.

Umunyamabanga Nshingwabikorwa w'Umurenge wa Mwendo, Muhire Floribert ati 'Iyi mirwano yabaye nijoro (ku wa Gatandatu), twahageze dusanga Sebukwe amaze kumutema mu mutwe, tumujyana mu Kigo Nderabuzima cya Gishweru kugira ngo yitabweho.'

Muhire yavuze ko uyu Nteziryayo yaje avuga ko umugore we yahukanye atwaye ibiryo n'amafaranga byari biri mu rugo.
Ati 'Yari yitwaje akajerekani kuzuye essence. Yavugaga ko nibatamuha ibyo umugore yatwaye abatwika.'

Gitifu Muhire uyobora Umurenge wa Mwendo, yavuze ko Sebukwe wa Nteziryayo witwa Rwampungu Emmanuel w'imyaka 68 y'amavuko, utuye mu Mudugudu wa Nyabisindu, Akagari ka Mutara muri uyu Murenge wa Mwendo, akimara gutema umukwe we, yahise acika akaba agishakishwa.

Mu Mirenge itandukanye y'aka Karere ka Ruhango, hakunze kumvikana urugomo rwa hato na hato, rwa bamwe mu bagabo cyangwa abagore bica abo bashakanye, abandi bakiyahura hakaba n'abagizi ba nabi bitwaza intwaro gakondo bagatema abaturage.

Source : https://umuryango.rw/amakuru/mu-rwanda/umutekano/article/nawe-yarafite-umugambi-wo-kubatwika-ruhango-umugabo-yatemwe-na-sebukwe-agiye

Polisi y'igihugu yatangaje ko yafunze abantu 20 bigaragambya ku ruhande rw'abatavuga rumwe n'ubutegetsi barimo abateye ikicaro cyayo giherereye I Kianza.

Usibye aba 20 bivugwa ko bafunzwe, hari n'abapolisi batatu batawe muri yombi bashinjwa gukoresha ubugome bukabije mu gutatanya abigaragambya no gukubita umwana muto mu isura isa n'iya kinyamaswa

Polisi yavuze ko byibuze abashinzwe umutekano 27 bakomeretse, batatu muri bo bakaba bari bamerewe nabi.

Ni imyigaragambyo yakubitiwe mo n'umunyamakuru bikomeye nyuma yo gusagarirwa n'agatsiko k'insore sore zigaragambya zamagana ubutegetsi bwa Perezida Tshisekedi nk'uko igitangazamakuru cyandikira I Kinshasa , Actualite CD cyabyanditse.

Raporo iheruka kuri iyo myigaragambyo iravuga ko byibura abapolisi 23 n'abaturage 14 bakomerekeye bikabije muri iyo myigaragambyo.

Iyi myigaragambyo yateguwe n'amashyaka ane atavuga rumwe n'ubutegetsi mu rwego rwo kwamagana ubuzima buhenze, umutekano muke mu burasirazuba bw'igihugu ndetse no kudashyira umucyo mu myiteguro y'amatora ateganijwe mu Kuboza uyu mwaka.

Hagati aho, Denis Mukwege, watsindiye igihembo cy'amahoro cyitiriwe Nobel, yasabye ko abapolisi amashusho yagaragaje basa nk'abahohotera abigaragambya, ndetse n'umwana wari uri hafi aho, bakurikiranwa kandi bagahanwa.

Ati: “Dushishikarije abategetsi gutuma habaho iyubahirizwa ry'uburenganzira bw'ibanze bw'abaturage bwo guterana, kuvuga icyo batekereza no kwigaragambya mu mahoro, bw'ingenzi cyane muri sosiyete igendera kuri demokarasi”.

BBC

Source : https://umuryango.rw/amakuru/mu-mahanga/umutekano/article/rdc-inzego-za-polisi-na-fardc-zafunze-20-bigaragambya-bamagana-ubutegetsi

Kugira ngo umubano wanyu urusheho kuba mwiza no kuzaba mwiza hari interuro n' ingingo mudakwiye kubwira umugore wawe cyangwa umukobwa mukundana.

8 Wakundanye n' abagabo bangahe ?

Iki kibazo si ngombwa kukibaza umukobwa mukundana cyangwa umugore wawe, kuko nta mubare w' abagabo wagenwe umukobwa cyangwa umugore agomba gukundana nawo, ngo wenda ube wabimubaza kugira ngo umenye ko yagejeje kuri uwo mubare. Iki kibazo abagore baracyanga kandi nta n' icyo cyongera mu mibanire y' abakundana.

7. Urashaka kunsura.

Akenshi umusore wasohokanye n' umukobwa aba ashaka ko uwo mukobwa anamusura. Ni byiza kwirinda kumubaza iki kibazo ahubwo ukabimubwira mu buryo butari ikibazo kandi buha umukunzi wawe amahitamo. Uti 'Si byiza ko ijoro turikesha turi hano'. Niba nanone ushaka kumuha gahunda y' ubutaha mwari kumwe cyangwa mwavugana sibyiza ko urashaka kunsura kuko ahita akeka ko ushaka ko muryamana. Ikiza umubaza aho yifuza ko ubutaha muzahurira.

6. Urashaka guhura n' umuryango wanjye ?

Kujyana umukunzi wawe mu rugo iwanyu ni ikintu cy' ingeni mu rukundo. Gishobora no kugira icyo cyangiza mu rukundo rwanyu igihe umuryango wawe utari witeguye. Kubaza umukobwa niba ashaka ko uzajya kumwereka umuryango wawe byumvikana nko kubimuhatiriza. Aho kubimubaza wabimumenyesha ukamusaba ko azakubwira igihe azaba yiteguye.

5. Byari bimeze bite ?

Kuko muba mukundana ntabwo umukobwa atinyuka kukubwira ko bitagenze neza kuko aba adashaka kukubabaza, ikiza ni uko utegereza akazabikugaragariza.

• 4. Iyo myenda ntabwo ikubereye

Uru ni urugero rw' interuro ubwira umukobwa mukundana cyangwa umugore wawe ikamubabaza. Ikiza wamubwira ko iyo myenda yambaye utayikunze ukamuha ibisobanuro ariko iyo umubwiye ko imyenda yambaye itamubereye yiyumvamo ko unenze imiterere ye.

3 Warabyibushye ?

Niba warabyibushye nawe aba abizi, nta mpamvu yo kubimwibutsa, ahubwo wamufasha gukora siporo no kurya neza.

2. Sinkunda inshuti zawe

Aho kugira ngo ubwire umugore wawe cyangwa umukunzi wawe ko afite inshuti mbi , ahubwo umufasha kubona no guhitamo inshuti nziza akareka inshuti za kera.

1. Umukunzi wanjye wa mbere yankoreraga ibi mu gitanda nawe bikore

Igihe ukeneye ko umugore wawe cyangwa umukunzi wawe mushya agukorera ibyo umukunzi wawe mwatandukanye yagukoreraga ni bibi kubimubwira ahubwo ikiza ni uko ubimwigisha ukamubwira ko ubikunda, icyo gihe nawe arabigukorera ariko iyo umubwiye umukunzi wawe wa kera yumva ko urimo kwicuza kuba mwaratandukanye ku buryo bishobora kurakaza umugore wawe akakubwira ati 'uzamusange, wamusize utamureba'.

Source : https://umuryango.rw/ubuzima-115/article/menya-ibintu-8-udakwiye-kubwira-umugore-wawe-kuko-bishobora-kubishya-urukundo

Mu nama y'abaminisitiri yabaye kuwa Gatanu, Minisitiri w'Intebe, Jean-Michel Sama Lukonde, yasobanuriye bagenzi be ibyo yaganiriye kuwa Kane tariki 18 Gicurasi 2023 n'ubuyobozi bwa Monusco.

Yavuze ko bumvikanye ku buryo bwo gushyiraho gahunda ihuriweho izagaragaza uburyo ingabo za Monusco zigomba kuva mu Burasirazuba bwa Congo nyuma y'imyaka isaga 20 ziriyo nyamara agace zirimo karushijeho kwibasirwa n'ibibazo by'umutekano muke.

Umuvugizi wa Guverinoma ya RDC, Patrick Muyaya, yavuze ko mu gihe hakirebwa ku buryo Monusco yava muri icyo gihugu, izakomeza imirimo yayo.

Monusco igizwe n'ingabo zisaga ibihumbi 16 zimaze imyaka isaga 20 mu Burasirazuba bwa Congo, nyamara yagiye kenshi ishinjwa kuba ntacyo yakoze ngo ako gace kagire amahoro.

Monusco yasanze harimo imitwe yitwaje intwaro mike cyane ariko kuri ubu imaze kurenga 200 nkuko imibare ya Guverinoma ya Congo iherutse kubigaragaza.

Ni mu gihe izi ngabo ziri mu zikoresha amafaranga menshi kuko ku mwaka zibarirwa arenga miliyari imwe y'amadolari.

Manda ya Monusco yagombaga kurangirana na 2022 ariko akanama k'umutekano ka Loni kayongereye igihe kugeza mu 2024, nubwo benshi mu banye-Congo bakomeje kugaragaza ko batakiyikeneye.

Source : https://umuryango.rw/amakuru/mu-mahanga/umutekano/article/rdc-yatangiye-ibiganiro-bigamije-gusezerera-monusco-ihamaze-imyaka-irenga-20