Category: Uncategorized

Jude Bellingham wigaragaje cyane mu mikino y'Igikombe cy'Isi cyabereye muri Qatar, yakomeje kwifuzwa n'amakipe akomeye, ariko Real Madrid itera intambwe isumba iy'izindi imutangaza nk'umukinnyi wayo kuri uyu wa Gatatu, tariki ya 14 Kamena 2023.

Bellingham umaze imyaka itatu ari umukinnyi wo hagati muri Borussia Dortmund, nyuma yo kugurwa, Real Madrid yateguye ibirori byo kumwakira mu Mujyi wa Madrid biteganyijwe kuri uyu wa Kane.

Igurwa ry'uyu Mwongereza ryamugize umukinnyi wa mbere ukomoka muri iki gihugu uzaba uguzwe amafaranga menshi ukurikije ibizamutangwaho byose.

Mu itangazo ryatanzwe n'ikipe avuyemo ya Borussia Dortmund yashimye abagize uruhare mu iterambere ry'umupira mu gihe cyose yahamaze.

Yagize ati 'Mwarakoze cyane buri wese wambaye hafi muri Borussia Dortmund no ku bafana bayo bose, mwamfashije mu myaka itatu yose namaze hano.'

'Byari iby'agaciro kwambara uyu mwenda mu bihe byoroheje ndetse n'ibikomeye. Nubwo ngiye ahandi, ntabwo nzibagirwa urugendo twagiranye. Ndabifuriza ejo hazaza heza.'

Umuyobozi mukuru wa Dortmund, Hans-Joachim Watzke, na we yamushimiye, avuga ko atigeze ahemukira ikipe mu gihe yari imukeneye.

Ati “Warakoze Jude, mu gihe cyose tumaranye werekanye ko uri umunyempano, kubana na we byari akataraboneka. Turashimira kandi Real Madrid ku biganiro byiza twagiranye biciye mu mucyo.'

Muri Shampiyona ya Bundesliga, Bellingham yatsinze ibitego umunani mu mikino 31 yagaragaye mu kibuga. Imibare igaragaza ko kandi imipira atanga 83.06 zigera ku bo yifuje kuyiha neza.

Source : https://umuryango.rw/imyidagaduro/imikino/article/jude-bellingham-yamaze-gusinyira-real-madrid-nyuma-yo-kwifuzwa-n-amakipe

Umujyanama w'icyamamare rurangiranwa mu muziki n'ubucuruzi Diamond Platnumz, Babu Tale yavuze ku cyemezo bafashe bagamije gukumira ibibazo bikomeye mbere y'uko biba muri Wasafi birinda kugira undi muhanzi bayinjizamo.

Mu kiganiro uyu mugabo yagiranye na Milliard Ayo wubatse izina mu biganiro byo kuri Youtube, Babu Tale yasobanuye byose nta na kimwe asize inyuma ,ahereye ku mvano yibyo byose ko yabaye abahanzi bagiye bayivamo.'

Babu Tale ati'Twatangiye gutinya, twajyaga dusinyisha abahanzi twihuse ariko nyuma yo kugenda kwa Rayvanny, Harmonize na Rich Mavoko twahise dutangira kugira amakenga mu byo dukora.'

Avuga icyo umuhanzi ubarizwa muri Wasafi wifuza kuyivamo asabwa, Babu yatangaje ko bose babizi ,aba agomba kwishyura atari munsi ya miliyoni 13.8Frw ariko na none ntarenge miliyoni 238.2Frw.

Asobanura impamvu yabyo agira ati'Ni ibiba bigomba kuba. Kuko kubaka umuhanzi ni urugendo rurerure ahubwo ayo twishyuza ni make ugereranije n'ibyo dukorera umuhanzi ngo abashe kugira aho agera.'

Na none ariko asobanura ko abahanzi bose bavuye muri Wasafi atari ko bishyura, atanga urugero rwa Rich Mavoko avuga ko yagiye ariko ntagire icyo yishyura nta nakurikiranwe n'amategeko.

Kugeza ubu Wasafi igizwe n'abahanzi barimo Lavalava, Mbosso, Queen Darleen na Zuchu. Uretse ariko kuba ubu iyi nzu rurangiranwa mu muziki yarahagaritse ibikorwa byo kwinjiza abahanzi bashya bakomeje gukora iyo bwabaga ngo bateze imbere abo bafite.

Babu Tale kuri ubu uri mu bagize Inteko Ishingamategeko ya Tanzania yavuze kandi ku cyerekezo cya Diamond cyo gufasha abahanzi avuga ko byatanze umusaruro ukomeye.

Babu Tale ati'Icyo kandi twavuga ni uko Diamond yahinduye uruganda rw'umuziki akaruha icyerekezo akerekana ko ari inzira nziza y'ubucuruzi akanabera umugisha abandi bahanzi.'

Diamond kugeza ubu ari mu bahanzi bakomeye muri Afurika, umuziki we ukaba ufite igikundiro mu nguni zitandukanye z'Isi.

Source : https://umuryango.rw/imyidagaduro/article/umujyanama-wa-diamond-yatangaje-impamvu-wasafi-idaheruka-gusinyisha-abahanzi

Ni nyuma y'amasaha make yarashize , itsinda rya RSF (the paramilitary Rapid Support Forces) rigeretsweho ubwicanyi na Khamis Abbakar, wari wavuze ko RSF n'imitwe bafatanije bari gukora Jenocide ku bwoko bwa Masalit muri Sudan

Mr Abbakar wiciwe muri El Geneina, yari yabanje gutabaza avuga ko ibitero byazamuye ubukana mu mugi ,asaba ubufasha bw'amahanga ngo barebe uko babarokora.

Kugeza ubu RSF ntacyo iratangaza kuri ubu bwicanyi irimo gushinjwa mu mpande zose.

Ubugizi bwa nabi bushinjwa RSF buri no gukorwa mu yindi migi ya Sudan irimo Nyala na Zalingei.

Umunyamabanga w'umuryango w'abibumbye ku isi,Antonio Guterres yavuze ko atewe impungenge ni irondamoko riri gututumba no guhohotera abaturage bikomeje mu ntara ya Darfur.

Iyi ntara yakunze kubamo urugomo rusa n'urwisubiramo kuva mu 2000, aho abaturage babarirwa muri za Miliyoni bataye ingo zabo, naho ababarirwa mu bihumbi amajana baricwa mu mirwano y'igisirikare cy'abarabu n'imitwe itari iya abarabu.

Amasezerano y'agahenge menshi yagiye arengwaho kuva iyi mirwano yakwaduka ku itariki ya 15 Mata (4) uyu mwaka.

Imirwano ishyamiranyije imitwe yo mu gisirikare cya Sudan ishyigikiye umutegetsi wayo wo muri iki gihe, Jenerali Abdel Fattah al-Burhan, n'umutwe witwara gisirikare wa RSF, utegekwa na Jenerali Mohamed Hamdan Dagalo, uyu unazwi cyane ku izina rya Hemedti.

Ihirikwa ry'ubutegetsi ryakozwe n'igisirikare ryo mu 2021 ryasoje igihe cy'imyaka irenga ibiri abasirikare n'abasivile bari bamaze basangiye ubutegetsi.

Ayo masezerano yo gusangira ubutegetsi yari yagezweho nyuma yuko uwari Perezida w'umunyagitugu Omar al-Bashir, wari umaze imyaka igera kuri 30 ku butegetsi, ahiritswe n'igisirikare nyuma y'imyigaragambyo ya rubanda.

Source : https://umuryango.rw/amakuru/mu-mahanga/umutekano/article/sudan-rsf-yageretsweho-urupfu-rwa-guverineri-w-intara-ya-darfur

Ikipe y'igihugu Amavubi izaba mu Karere ka Gisagara kubera Hoteli zidahagije ziri mu Karere ka Huye.

Ikipe y'igihugu Amavubi irerekeza mu Karere ka Gisagara mu mwiherero utegura umukino afitanye na Mozambique.

Kuri uyu wa Kane, nibwo Amavubi afata imodoka yerekeza mu Karere ka Gisagara, aho igomba gukorera umwiherero yitegura umukino wa Gatanu wo gushaka itike y'igikombe cy'Afurika kizabera muri Cote D'Ivoire umwaka utaha, aho kuri iki cyumweru igomba gucakirana na Mozambique kuri sitade y'Akarere ka Huye.

N'ubwo Amavubi amaze iminsi akinira kuri sitade ya Huye, ariko ntabwo byari bisanzwe bibaho ko akorera umwiherero mu kandi Karere katari Huye mu gihe yabaga ariho iri bukinire.
N'ubwo Amavubi amaze iminsi akinira kuri sitade ya Huye, ariko ntabwo byari bisanzwe bibaho ko akorera umwiherero mu kandi Karere katari Huye mu gihe yabaga ariho iri bukinire.

Amavubi yafashe iki cyemezo, nyuma y'uko mu karere ka Huye habaye ikibazo cya Hoteli ndetse hakabura iri ku rwego rwo kuyakira.

I Huye, haherutse kuvugururwa Hoteli ebyiri ndetse zihabwa inyenyeri 4, arizo, Mater Boni Consilii ndetse na Hoteli Credo. Izi Hoteli zose zizakoresha n'abashyitsi, aho ikipe ya Mozambique izaba muri Hoteli Bono Consilii, naho Abasifuzi n'abakomiseri babe muri Hoteli Credo.

U Rwanda rwagerageje gushaka indi Hoteli yapfa kwakira Amavubi yo muri Huye, irabura kugera aho bafashe umwanzuro wo kujya kuri Hoteli Montana iherereye mu karere ka Gisagara gaturanye na Huye.

Hoteli ebyiri ziherutse kuvugururwa i Huye, zizakira abashyitsi gusa

Kuva Huye ugera Gisagara mu mujyi nibura biri hagati y'iminota 12 na 20

Amavubi yaraye akoreye imyitozo ya nyuma i Nyamirambo, indi myitozo isigaye akazajya ayikorera kuri Sitade ya Huye ariyo izaberaho n'umukino

Source : https://umuryango.rw/imyidagaduro/imikino/article/hamenyekanye-impamvu-amavubi-agiye-kwerecyeza-gisagara

Amakuru yihariye yagejejwe kuri BBC yerekana ko bagenda banga igitekerezo cyo gushyiraho leta ebyiri zibana mu mahoro mu gukemura amakimbirane hagati ya Isiraheli n'abanyapalesitina.

Uku ni ko Janna Tamimi, w'imyaka 17, yashubije abajijwe kuri iki kibazo: “Ibi bikunze kuvugwa ngo igisubizo gishingiye kuri leta ebyiri ni ibintu abo mu Burengerazuba bazanye batitaye ku kuntu ibintu mu by'ukuri bimeze. None se imipaka iri hehe?”

Janna avuga ko ari umwe mu banyamakuru bato bemewe ku isi. Ubwo yari afite imyaka irindwi, yatangiye gutira nyina terefone no gutara amakuru y'imyigaragambyo mu mujyi yavukiyemo wa Nabi Salah mu ntara ya Cisjordania Isiraheli yigaruriye.

Kuva Janna yavuka nta matora rusange cyangwa aya perezida yari yaba mu ntara z'abanyapalesitina. Aheruka yabaye muri 2006, bivuze ko umuntu wese uri munsi y'imyaka 34 atigeze agira amahirwe yo gutora.

Icyakurikiyeho ni ugutakarizwa icyizere ku buyobozi bwa politiki bw'abanyapalesitina ndetse n'igabanuka mu gushyigikira igisubizo cyuko habaho leta ebyiri; amahame ashyigikiwe n'amahanga ashaka ko habaho leta yigenga y'abanyapalesitina ibanye mu mahoro na Isiraheli.

Ubushakashatsi bugaragaza ko gushyigikira guhangana na Isiraheli hakoreshejwe intwaro byariyongereye mu batarengeje imyaka 30, aho abarenga 56% bashyigikiye gusubira mu ntambara ntagatifu ya Intifada, cyangwa bakivumbagatanya barwanya Isiraheli, nk'uko ibipimo by'amajwi byo mu kwezi kwa gatatu bibyerekana.

Mu mwaka ushize, havutse imitwe myinshi y'abarwanyi mu mijyi ya Nablus na Jenin yo mu ntara ya Cisijordania, itemera inzego z'umutekano z'ubuyobozi bw'abanyapalesitina.

Izwi cyane muri iyo mitwe ni Lions' den na Jenin Brigades yagabye ibitero mu ntara ya Cisijordaniya ku ngabo za Isiraheli n'abanya Isiraheli bahatujwe.

BBC

Source : https://umuryango.rw/amakuru/mu-mahanga/politiki/article/palestina-urubyiruko-ntirwizera-ubuyobozi-bw-igihugu-kandi-ngo-ntanicyo

Wari uziko intambara yo muri Ukraine cyangwa ubucye bw'ibicuruzwa aribyo bitera kuzamuka kw'ibiciro? Ugomba kuba utazi 'akazi ka Beyoncé'.

Intangiriro z'ibitaramo bye muri Sweden mu kwezi gushize yateye kwiyongera kw'abakenera amafunguro n'amacumbi byo muri hoteli na za restaurant kwagaragaye mu ibarurishamibare ry'ubukungu bw'iki gihugu.

Suède yatangaje ko yagize izamuka ry'ibiciro rya 9.7% rirenze iryari ryitezwe muri Gicurasi (5).

Izamuka ry'ibiciro muri za hoteli na restaurants niryo ryateye uko gutungurana.

Michael Grahn, inzobere mu bukungu muri Banki ya Danske, avuga ko abona Beyoncé ariwe watumye haba uku kuzamuka.

Yongeraho kandi ko Beyoncé ari we ushobora kuba warateye kuzamuka gukomeye mu biciro by'ibicuruzwa mu bicuruzwa bindi bijyanye n'umuco n'imyidagaduro.

Mu butumwa Michael yandikiye BBC yagize ati: 'Simushinja [icyaha] Beyoncé izamuka ry'ibiciro rikomeye, ariko kwiyongera kw'isoko ry'abashakaga kuza kureba ibitaramo bye muri Sweden bisa n'aho byongereyeho kuri ibyo'.

Nta gushidikanya ko ibitaramo bya mbere mu myaka irindwi by'uyu muhanzi ari wenyine mu bihugu bitandukanye bifite ikintu kinini bivuze ku bukungu.

Nibura ikigereranyo kimwe kivuga ko ibi bitaramo bizaba byaragejeje ku miliyari 2£ muri rusange igihe bizaba birangiye muri Nzeri(9).

Gushaka amacumbi mu mijyi ibi bitaramo bizaberamo byahise bizamuka cyane bimaze gutangazwa, nk'uko bivugwa na Airbnb itangaza amakuru ku macumbi.

Amatike y'ibi bitaramo henshi yahise ashira mu minsi micye maze ibiciro byayo biratumbagira ku masoko y'abayaguze bongera bakayagurisha.

Mu Bwongereza, abantu 60,000 bagiye mu gitaramo cya Beyoncé cyabereye i Cardiff, harimo n'abafana bavuye muri Liban, Amerika na Australia.

Gukenerwa kw'ibyumba by'amahoteli i Londres kubera igitaramo yahakoze kwari gukomeye ku buryo hari imiryango itagira aho kuba yari icumbikiwe na hoteli imwe yishyurirwa n'ubutegetsi bw'umujyi, bivugwa ko yasohowe kugira ngo ibyo byumba bigurishwe abafana ba Beyoncé babishaka ku giciro cyo hejuru.

Ibitaramo by'i Stockholm umurwa mukuru wa Sweden, aho Beyoncé yataramiye imbaga y'abafana 46,000 mu majoro abiri, bivugwa ko byazanye abantu bavuye ahatandukanye ku isi — cyane cyane muri Amerika, aho idorari rikomeye kurusha krona (ifaranga ryaho) ryatumaga kuri bo tickets z'igitaramo muri icyo gihugu ari nk'ubusa.

Mu butumwa bandikiye Washington Post mu kwezi gushize, ikigo Visit Stockholm cyasobanuye kwiyongera gukomeye kw'abakerarugendo muri uwo mujyi nka “Beyoncé effect” .

Mu Ukuboza (12) gushize izamuka ry'ibiciro muri Suède ryaratumbagiye rigera kuri 12.3%. Mu gihe inzobere mu bukungu zari zateganyije ko muri Gicurasi (5) rizagera ku 9.4% ryabaye 9.7%.

Michael Grahn yabwiye BBC ko kugirango umuntu umwe w'icyamamare ateze impinduka nk'izi 'bibaho gacye cyane', yongeraho ko irushanwa rikomeye ry'umupira w'amaguru ari ryo rishobora guhindura ibintu gutya.

Grahn yanditse ku mbuga nkoranyambaga ko yiteze ko ibintu bizongera gusubira mu buryo busanzwe muri uku kwezi kwa Kamena.

Source : https://umuryango.rw/imyidagaduro/article/byatahuwe-ko-beyonce-ariwe-wateye-izamuka-ry-ibiciro-ritunguranye-muri-sweden

Paul Rusesabagina wafungiwe ibyaha by'iterabwoba mu Rwanda, yanyuranyine n'imbabazi yasabye, avuga ko yarekuwe kubera igitutu, bihabanye n'ibyo yanditse mu ibaruwa asaba imbabazi.

Rusesabagina washinze umutwe w'iterabwoba wa MRCD/FLN yarekuwe ku mbabazi za Perezida muri Werurwe uyu mwaka, nyuma y'imyaka isaga ibiri afungiye mu Rwanda ku byaha by'iterabwoba byahitanye ubuzima bw'abaturage.

Yari yarakatiwe gufungwa imyaka 25 ariko aza gufungurwa nyuma yo gutakambira umukuru w'igihugu, avuga kubera 'izabukuru n'uburwayi budakira' asaba gufungurwa kandi ko ntaho azongera guhurira n'ibikorwa bya politiki.

Muri iyo baruwa Rusesabagina yavuze ko yicuza ko atakoze 'ibishoboka byose ngo abanyamuryango bose b'Ihuriro MRCD bagendere ku mahame yo kudakoresha ubugizi bwa nabi.'

Ati 'Ndamutse mpawe imbabazi nkarekurwa, ndahamya ko nzamara igihe nsigaje cy'ubuzima bwanjye muri Leta Zunze Ubumwe za Amerika ntuje. Ndabizeza binyuze muri iyi baruwa ko nta zindi nyungu ntegereje zaba bwite cyangwa iza politiki. Ibibazo bijyanye na politiki y'u Rwanda nzabisiga inyuma yanjye'.

Nyuma y'amezi atagera kuri atatu arekuwe, Rusesabagina yanyuranyije n'ibaruwa yanditse asaba imbabazi, mu ijambo yagejeje ku bitabiriye inama izwi nka Oslo Freedom Forum.

Muri iyi nama yiga ku burenganzira bwa muntu, Rusesabagina yahawe ijambo mu majwi yafashwe mbere yayo , bigizwemo uruhare n'umukobwa wa Rusesabagina, Carine Kanimba.

Yumvikanishije ko gufungurwa kwe kwaturutse ku bagize Umuryango Human Rights Foundation utegura iyo nama, aho kuba imbabazi yasabye nk'uko yabyanditse ajya gufungurwa.

Ati 'Uyu munsi ndi umuntu widegembya kubera amajwi yanyu n'abandi nkamwe. Ni ibyishimo n'icyubahiro kuba ndi kuvugana namwe […] Mwese mwishyize hamwe, muharanira ko mfungurwa.'

Kuri Rusesabagina, gufungurwa kwe yabyise intsinzi. Ati 'Irekurwa ryanjye ryerekanye ko iyo uhagurutse ukarwanira icyo wemera, mugashyira hamwe murangajwe imbere n'amahame y'uburenganzira bwa muntu na demokarasi, mugera ku ntsinzi.'

Ibi bivugwa na Rusesabagina bisa nko gukina ku mubyimba imiryango y'abahitanywe n'ibitero bya MRCD/FLN yashinze no kumvikanisha ko azakomeza inzira yari yaratangiye mbere yo gufungwa.

Ubwo Rusesabagina yari amaze kurekurwa kubera imbabazi, Guverinoma y'u Rwanda yavuze ko guhabwa imbabazi kwe Rusesabagina bidakuraho igihano yahamijwe ndetse ko gishobora gusubizwaho mu gihe yaba asubiriye ibyaha yakoze.

Iyi niyo baruwa Rusesabagina yanditse asaba imbabazi, Yanditswe mu Cyongereza, hano yashyizwe mu Kinyarwanda

Nyakubahwa,

Mbandikiye mbasaba imbabazi nciye bugufi, kugira ngo mbashe gusanga umuryango wanjye muri Leta Zunze Ubumwe za Amerika. Hari impamvu nyinshi nshingiraho ubu busabe, ariko ikomeye kuruta izindi ni imyaka yanjye igeze mu zabukuru n'uburwayi budakira butandukanye, nzabana nabwo mu buzima bwose nsigaje.

Ndifuza kubagaragariza ukwicuza mfite ku ruhare ibikorwa byanjye muri MRCD byaba byaragize mu bugizi bwa nabi bwakozwe na FLN. Mbere na mbere, ntabwo nshyigikira ubugizi bwa nabi. Ubugizi bwa nabi nta na rimwe bwemewe, haba no mu kubukoresha ngo ugere ku ntego za politiki.

Kwifashisha ubugizi bwa nabi nk'igikoresho cya politiki ni bibi cyane, bikarushaho iyo bugiriwe abasivili.

Ndamagana ubugizi bwa nabi bwakorewe abasivile, bwaba ubwakozwe na FLN cyangwa indi mitwe, kandi nzakomeza kubikora. Gutakaza ubuzima n'iyo bwaba ubw'umuturage umwe, birababaza.

Nk'uwahoze ari Umuyobozi wa MRCD, ndicuza ko ntakoze ibishoboka byose ngo abanyamuryango bose b'Ihuriro MRCD bagendere ku mahame yo kudakoresha ubugizi bwa nabi nemera kandi ngenderaho. Nifatanyije n'abafite akababaro batewe n'ibikorwa bya FLN, ababiguyemo n'imiryango yabo.

Ndamutse mpawe imbabazi nkarekurwa, ndahamya ko nzamara igihe nsigaje cy'ubuzima bwanjye muri Leta Zunze Ubumwe za Amerika ntuje. Ndabizeza binyuze muri iyi baruwa ko nta zindi nyungu ntegereje zaba bwite cyangwa iza politiki. Ibibazo bijyanye na politiki y'u Rwanda nzabisiga inyuma yanjye.

Nkomeje, ndabizi ko muzita ku guharanira ahazaza hatekanye h'Abanyarwanda bose. Ndizera ko Abanyarwanda bose bashobora kubona uburyo buciye mu mahoro bwo kurenga ibyo batabona kimwe, bugahuriza hamwe abanyarwanda binyuze mu biganiro.

Nizeye kandi ko irekurwa ryanjye ryaba ikimenyeso gito cyo gukomeza uru rugendo. Bityo, Nyakubahwa, ndabasaba imbabazi ku mpamvu z'uburwayi, kugira ngo mbashe kuva hano, nsange umuryango wanjye mbashe kurangiza iminsi yanjye nk'umugabo, umubyeyi na sekuru w'abana, mu gihe mukomeje kubaka ahazaza heza h'abaturage b'u Rwanda.

Paul Rusesabagina

Source : https://umuryango.rw/amakuru/mu-mahanga/politiki/article/rusesabagina-yongeye-kwigamba-avuga-ko-ntambabazi-yasabye-u-rwanda

Umwongereza wanditse izina mu isinganwa ry’amamodoka by’umwihariko muri F1, Lewis Hamilton yishimiye Kalimpinya Queen, umunyarwandakazi umaze kuzamura izina muri uyu mukino w’amamodoka.

Yabinyujije ku ifoto ya Kalimpinya Queen yaraye asangije abamukurikira ku rubuga rwa Instagram.

Iyi foto yashyize ahajya ubutumwa bumara amasaha 24, yahise anakorera ‘Tag’ konti ya @femalesinsport.

Iyi konti ikunda kugaruka cyane ku bagore bari muri siporo, yahise ishyiraho ifoto ya Kalimpinya maze bagira bati “Kalimpinya Queen yabaye umugore wa mbere ukina Rally mu Rwanda. Queen yabaye co-pilote imyaka itatu. Mu mwaka ushize ni bwo yiyemeje gutwara ubwe, akora amateka yo kuba umugore wa mbere ukina Rally mu Rwanda. Mu cyumweru gishize, yabaye uwa gatatu ari kumwe na co-pilote we, Ngabo Oliver. Twishimiye cyane kumubona atera imbere'

Kalimpinya Queen yitabiriye Miss Rwanda 2017 aho yaje kuba igisonga cya 3. Nyuma y’aho ntabwo yakunze kongera kugaragara mu marushanwa y’ubwiza aho yahise ahubwo atangira kwigira mu masiganwa y’imodoka.

Isiganwa rya mbere yitabiriye ni Rwanda Mountain Gorilla Rally 2022. Nyuma y’igihe ari Co-pilote, Huye Rally 2023 yayikinnye ari umushoferi ndetse asoza ku mwanya wa 3.

Aheruka muri Nyirangarama Rally, ryabaye ku wa 11 Kamena 2023, Kalimpinya wakinanaga na Ngabo Olivier, yasoreje ku mwanya wa kabiri inyuma y’Umurundi Faida Philbert wabaye uwa mbere.

Kalimpinya Queen umugore wa mbere w’umunyarwanda usiganwa mu madoka

Lewis Hamilton yishimiye Kalimpinya Queen

Source : http://isimbi.rw/siporo/article/lewis-hamilton-yishimiye-kalimpinya-queen

Urukiko rw'Ibanze rwa Nyamabuye ruhererereye mu karere ka Muhanga rwatangiye kuburanisha mu mizi urubanza rw'imiryango 218 iregera gusubizwa uburenganzira ku irangamimerere babuze mu gihe cy'Ibitero by'abacengezi mu 1998.

Hashize igihe aba bantu babuze irangamimerere bitewe n'uko abacengezi batwitse ibitabo mu gihe cy'ibitero byo mu mwaka w'1998. Bavuga ko kutagira irangamimerere byabagizeho ingaruka kuko batakaje ububasha kugira ibyo bakora ku mitungo yabo nko; Kugurisha akarima bashaka kwikenura, Kugana banki, Guha abana babyaye umunani, n'abateye intambwe yo kubaha nti bashobore kubibandikaho.

Mu ntangiriro z'Ukwezi kwa Mutarama 2023, nibwo Urwego rw'Igihugu rw'Ubugenzacyaha (RIB) rufatanyije n'Akarere rwatangiye kumva aba baturage ndetse n'abahamya ko bazi neza ibyakozwe ku baturage basabirwa guhabwa irangamimerere.

Umunyamategeko w'Ikigo cy'Uburenganzira bwa Muntu n'Iterambere mu biyaga bigari (GLIHD) akaba yunganira akarere katanze ikirego, Me Umulisa Vestine avuga ko iki kirego cyatanzwe kugirango abaturage basubizwe irangamimerere babuze ubwo ibitero by'Abacengezi byatwikaga icyahoze ari Komini ya Buringa, aho yatwitswe inshuro ebyiri mu mwaka w'1998.

Akomeza yemeza ko kugirango ibi bigerweho habaye ubufatanye bw'inzego z'iperereza ndetse RIB ikora iperereza, abaturage bazana ibyerekana ko bigeze gusezerana imbere y'Amategeko. Mu byo basabwaga kwerekana harimo; Amafoto, Udupapuro tw'Inkwano, Inyandiko ziva mu nteko mu tugali bakomokamo cyangwa se bakazana abatangabuhamya ba bazi.

Perezida w'Iburanisha yabajije Uhagarariye akarere Me Umulisa ibitabo basaba ko byasubizwaho amusubiza ko ari ibitabo byose by'abasezeranye mbere y'Ibitero by'Abacengezi mu mwaka w'1998.

Mu kumusubiza, yamubwiye ko icyemezo kizafatwa n'urukiko aricyo kizasubiza uburenganzira imiryango imaze imyaka 25 yambuwe uburenganzira bw'irangamimerere n'ibitero by'abacengezi.

Umuturage witwa Mureramfura Alphonse avuga ko kutagira irangamimerere ari ikibazo kuri we n'abo bagihuje. Ati' Kubaho tutagira irangamimerere byatubujije ibintu byinshi birimo; Kutagira icyo dukoresha imitungo yacu kuko ntabwo twari kuyiyandikishaho ngo bishoboke n'abo twashakanye mu buryo bw'amategeko. Byashoboka mu gihe bamaze kuduha uburenganzira kuko ababuraniwe mbere byarashobotse, baramwenyura kuko babarwaga nk'abakiri ingaragu'.

Umunyamabanga Nshingwabikorwa w'Umurenge wa Mushishiro, Mukayibanda Prisca avuga ko abaturage nibamara guhabwa irangamimerere bazagira uburenganzira ku mitungo yabo ndetse bagire n'uburenganzira bwo kuyikoresha mu buryo bwemewe nka bene yo, babashe kugana Banki bake inguzanyo. Avuga kandi ko hari abarimo kwishimira ko bamaze guhabwa uburenganzira mu manza zabanje zagizwe itegeko.

Yagize Ati' Abagize imiryango y'abatari bafite irangamimerere, nta burenganzira bagiraga ku mitungo yabo kuko ntabwo amategeko yagenaga uko bayikoresha n'abo bashakanye. Ni bamara guhabwa ubu burenganzira, urubanza rubaye itegeko abazaba babuhawe bazabasha no gusaba inguzanyo muri banki cyangwa banakoreshe imitungo yabo uko bashaka'.

Umuyobozi w'Akarere ka Muhanga, Kayitare Jacqueline avuga ko mu mwaka wa 2021-2022 nibura imiryango 866 yasabaga gusubizwa irangamimerere, ariko imiryango 547 ikaba ari yo yabashije kubona ibimenyetso bigaragaza ko basezeranye, isigaye itumwa kubishaka.

Meya Kayitare, avuga kandi ko mu mwaka 2022-2023 imiryango 38 yo mu murenge wa Kiyumba yatsinze urubanza isubizwa uburenganzira yatswe n'ibitero by'abacengezi. Akomeza yizeza abaturage ko hari icyizere ko urubanza rw' iyi miryango 218 ruzarangira neza nabo bagahabwa ubutabera kuko ibyo basabwe babyerekanye.

Yongeyeho ko umuturage wese utuye mu gace abacengezu bagezemo mu mwaka w'1998 akaba yarabuze irangamimerere ye akwiye kubigaragaza basanga yujuje ibisabwa abagahabwa uburenganzira bwe.

Kugeza ubu imiryango 572, urukiko rw'ibanza rwa Kiyumba rwamaze kwemeza ko basubizwa uburenganzira bwabo bwo kongera gusubizwa mu bitabo by'Irangamimerere byatwitswe n'Ibitero by'Abacengezi. Mu ntangiriro, imiryango 1284 ni yo itari ifite uburenganzira ku irangamimerere bitewe n'Abacengezi.

Iyi miryango yatangiye kuburana uyu munsi, mu gihe cy'ibitero by'Abacengezi yari ituye mu bice byahoze ari ibyo muri Komini ya Buringa, ubu ni mu mirenge ya Mushishiro, Nyarusange na Muhanga. Hiyongera mo abo mu mirenge ya Rugendabari, Kabacuzi nabo badafite ubu burenganzira.

Akimana Jean de Dieu

Source : https://www.intyoza.com/2023/06/15/muhanga-urubanza-rwabambuwe-uburenganzira-ku-irangamimerere-nabacengezi-rwatangiye/

Umugabo yahawe igihano kitari icy'ubumuntu nyuma yo kwica umunyeshuri amuziza kwanga kumubera umugore

Mu gihugu cya Misiri (Egypt) umusore yahawe igihano gikomeye cyane nyuma yo guhamwa n'icyaha cyo kwica umuntu amuziza ko yanze kumubera umugore.

Uyu musore yahawe igihano cy'urupfu nkuko amategeko yo muri Misiri avuga ko umuntu uhamwa n'icyaha cyo kwica aba agomba kunyongwa. Ubusanzwe Misiri iri mu bihugu bike bicyemera ko habaho igihano cy'urupfu.

Ndetse uyu mukobwa wishwe yari asanzwe ari umunyeshuri wigaga muri kaminuza yigana n'uyu musore, ariko nyuma yo kwanga kumubera umugore yahise yicwa.

 

 

 

 

Source : https://yegob.rw/umugabo-yahawe-igihano-kitari-icyubumuntu-nyuma-yo-kwica-umunyeshuri-amuziza-kwanga-kumubera-umugore/