Category: Uncategorized

Ubutumwa bwa  mama wa The Ben ,Mbabazi Esther mu muhango wo gushyingura umugabo we  yagize ati:'Warakoze mugabo mwiza gutuma mba umubyeyi w'abana beza twabyaranye. Ni iby'agaciro kandi ni umugisha. Nzahora nkwibuka iteka.' 

Yakomeje agira ati:'Ndashima Imana ko Papa Dan twahuriye mu rusengero tutahuriye mu kabari'.

Uyu mubyeyi mu kiniga kinshi yavuze ko hari abana yareze bamunyuze mu biganza abarera neza.Ati'Nari nzi ko ndi umukobwa ntazashaka ariko Papa Dan yarabikoze mba umubyeyi. Abana ni umugisha mbasabiye ko mwazagira iherezo ryiza. Mfite urukumbuzi ko tuzongera guhura'.

Mu marira menshi yateye indirimbo yitwa'Nkunda kumva amakuru noneho afatanya n'abandi bari bayizi kuyiririmba. Ni indirimbo igira iti:'….Nzinjira mu murwa…umunsi umwe nzawinjiramo nta marira…nta muruho ubayo n'intambara, nta n'indwara ishobora kubayo…'.

Ubutumwa bw'abana

Uyu mubyeyi avuzwe ibigwi  bw’ibyo yakoze akiri muri uyu mubiri ugaragara, abana be batanze ubutumwa bugira buti:'Papa Ntibyoroshye kubona icyo tukuvugaho muri iki gihe wadukuwemo n'iyaguhanze. Reka tugushimire urukundo, umurava n'ubwitange byakuranze mu gihe cyose. Ntiwari umubyeyi gusa ahubwo wari n'inshuti yacu ndetse n'umujyanama wacu muri byose. Tugusezeranyije ko abana bawe tuzasigarana umurage w'urukundo n'ubutwari, ubupfura n'ubugwaneza byakuranze. Ruhukira mu mahoro mubyeyi.'

Mbonimpa John yavutse kuri Subwanone Bernard na Ruzabera. Mu 1981 yashakanye na Mbabazi Esther babyarana abana 6, abahungu 4 n'abakobwa 2.

Se wa The Ben ,Mbonimpa John yabonye izuba ku itariki 10 Ukwakira mu 1960 atabaruka ku itariki 18 Kanama 2023 aguye mu bitaro bya Masaka nyuma y’iminsi aharwariye indwara y’umwijima.

Yavukiye muri Uganda. Yashakanye na Mbabazi Esther mu 1981 babyarana abana batandatu barimo babiri baje kuba abahanzi ndetse The Ben ahirwa n'umuziki arakundwa kuva i Kigali kugeza ahari umunyarwanda hose ku Isi.

John Mbonimpa yasezeweho mu cyubahiro kigomba umubyeyi wabyaye

Abavandimwe ba The Ben na mama we

Zizou Alpacino na Uncle Austin batabaye inshuti yabo, The Ben

Yabigarutseho kuri uyu wa Gatatu tariki 23 Kanama 2023 mu muhango wo kwizihiza imyaka 10 ishize gahunda ya Youth Connekt Rwanda igira uruhare mu guhindura ubuzima bw’urubyiruko.

Uyu muhango wabereye mu Intare Conference Arena, kandi witabiriwe na Perezida Paul Kagame, abayobozi mu nzego nkuru z’igihugu n’abandi.

Capt. Nsengiyumva Michael yavuze ko mu 2016 ari bwo yasoje amashuri ya Kaminuza aho yigaga mu mahanga, kandi icyo gihe babizezaga ibitangaza no kubaho neza mu buzima.

Avuga ariko ko kuva akiri muto yatojwe ko ‘ubwenge bwacu, ubumenyi bwacu, imbaraga zacu zigomba guteza imbere igihugu cyacu’.

Uyu musirikare yavuze ko ku Isi yose ‘buri gihugu gitezwa imbere n’amaboko y’abana bacyo’. Ibi ngo ni byo byatumye agaruka mu Rwanda ahita abona akazi ku isoko ry’imibare n’imigabane yakoze mu gihe cy’umwaka umwe.

Yavuze ko n’ubwo yari anyuzwe n’akazi yakoraga, ariko yumvaga ataragera ku ntego yihaye. Avuga ko muri we yabonaga ko akazi k’igenamari yakoraga ‘yagakora no mu kindi gihe cy’ubuzima bwe’.

Avuga ko nta kintu gishimisha mu buzima nko kuba uri umuto, ufite imbaraga kuko ari ibintu bibaho rimwe mu buzima. Ibi iyo yabitekerezaga, yasanga ari impamvu ikomeye yo gutanga umusanzu we ku ‘gihugu cyanjye’. Ati “Ni uko natekereje kujya mu gisirikare.”

Impamvu ya kabiri yatumye ajya mu gisirikare ni uko yabonaga benshi bari baziranyi bakiri bato barabamaze kujya mu gisirikare, kandi akabona ni umwuga ubateye ishema.

Uyu musirikare yavuze ko ibi byose byashyigikiwe n’impamvu yo ‘gukunda igihugu kugeza aho wakitangira nk’umurage 'ukomeye twarazwe n’abasekuruza’. Ati “Ndetse ni igihango tutagomba gutatira nk’urubyiruko.”

Capt. Nsengiyumva Michael avuga ko igihe gishize ari mu gisirikare yahuye n’abantu benshi, yaba abo mu Rwanda no mu mahanga, yasanze bahuriye ku gukunda igihugu no kutingira

Yabwiye urubyiruko ko kurinda Igihugu ari inshingano zabo, cyane ko ibarura rigaragaza ko ari bo benshi mu gihugu, kuko barenga 65%.

Nsengiyumva yavuze ko u Rwanda rufite amahoro, kandi rugira uruhare mu kugarura amahoro mu bihugu bitandukanye byo muri Afurika.

Avuga ko urubyiruko rufite umukoro mu gutera ikirenge mu ‘cy’ababyeyi bacu’bunamuye u Rwanda, bagahagarika Jenoside yakorewe Abatutsi.

Yabwiye urubyiruko rushaka kwinjira muri RDF ko amarembo akinguye. Ati “Birashoboka ntimugire ubwoba. Ndetse, amarembo ni magari. Murakoze.'

Capt. Nsengiyumva Michael yavuze ko yinjiye muri RDF kubera ko yashakaga gukorera Igihugu cye 

Umukinnyi wa Basketball, Nshobozwabyosenumukiza Jean Jacques, ari mu bitabiriye Youth Connekt

Minisitiri w’Urubyiruko, Dr Utumatwishima Abdallah yashimye Perezida Kagame ku bwo gushyigikira Youth Connekt

Perezida Kagame yasabye urubyiruko kwiremamo icyizere no guharanira agaciro kabo buri munsi

Ibihumbi by'urubyiruko bahuriye muri Intare Conference Arena mu kwizihiza imyaka 10 ya Youth Connekt

Uhereye kuri Alex Dusabe wamenyekanye mu 2000 ku ndirimbo zirimo Umuyoboro ukagera kuri Israel Mbonyi uri kugenda yandika amateka twasanze hari abahanzi bakwiriye guhabwa umwanya ngo bagarukweho abazaza bazabigireho byinshi.

Ni abafashije abanyarwanda gukizwa no kwakira ko Imana ihari. Bararimba bakomora imitima ya benshi abandi bakakira agakiza ariko rero hari n'abagiye baba icyitegererezo ku baje mu muziki wo kuramya no guhimbaza Imana. Turebe abahanzi 10 b'ibihe byose.Ni abahanzi bashyize itafari ry’ifatizo mu kuzamura no kumenyekanisha igihugu binyuze mu ndirimbo zo kuramya no guhimbaza Imana, bakaba baranagize uruhare ku bantu cyane cyane ku kijyanye no kwakira agakiza. Harimo n’abibitseho ibihembo bitandukanye bagiye bahabwa mu bihe bitandukanye.

1. Alex Dusabe

Alex Dusabe afatanya ubuhanzi n’ubucuruzi

Alex Dusabe yamamaye muri za 2000. Benshi baririmba Gospel bamufatiraho urugero. Indirimbo ze zirimo Umuyoboro, Kuki Turira n'izindi zagiye zifasha abantu kwakira Agakiza. Yakoze mu kigo cy'ubwishingizi'Corar' imyaka 10 nyuma ahita atangira ubucuruzi bw'amafi n'inkoko. Afite imizingo irimo'Mfite Ibyiringiro' yamuritse mu 2004 ikaba yaratunganyijwe na Aron Niyitunga na Njyana I Gorogota ya kabiri yamuritse ku itariki 30 Kanama 2013 muri Kigali Serena Hotel.

2. Aime Uwimana

Aime Uwimana afatwa nka ‘Bishop’ w’abahanzi ba gospel

Aime Uwimana ni umukristo umaze imyaka 31 yakiriye agakiza. Kuva atangiye kuririmba mu 1994 yaba ku giti cye ndetse no mu matsinda atandukanye amaze kwandika indirimbo nyinshi cyane. Indirimbo yanditse zageze hanze zigera hafi ku 100 ariko izo yanditse ubariyemo izitaratunganyijwe muri studio ndetse n’izindi zitigeze zijya hanze.

Mu myaka isaga 28 amaze mu murimo w'ivugabutumwa binyuze mu ndirimbo zo kuramya no guhimbaza Imana, Aime Uwimana yatangaje ko kugeza ubu Gospel yo mu Rwanda irimo gutera intambwe nziza kuko abantu bayirimo bagenda barushaho kumenya gukorana bakarushaho kumenya ko bose bakorera Imana bakishyira hamwe. Kuri we asanga nibabikomeza gutyo, n'ibindi byiza byinshi bazabigeraho.

Umuhanzi Aime Uwimana yakiriye agakiza mu 1993, atangirira umurimo w'Imana muri Eglise Vivante i Burundi mu mujyi wa Bujumbura ari naho yabaga. Nyuma yaje kuza mu Rwanda, akomeza gukora umurimo w'Imana, yifatanya n'amatsinda y'abantu batandukanye, mu matorero atandukanye ndetse afatanya na za Worship teams zitandukanye mu bijyanye no kuramya no guhimbaza Imana. Kuririmba ku giti cye yagiye abifatanya no kuririmba mu matsinda aramya akanahimbaza Imana.

Aime Uwimana amaze guhabwa ibihembo binyuranye mu muziki birimo na Groove Awards Rwanda yahawe nk’umwanditsi mwiza ndetse agahabwa ikindi gihembo nk’umuntu waharaniye impinduka mu muziki Gospel mu Rwanda. Aime Uwimana ni umugabo w'umugore umwe witwa Uwayezu Claire ndetse n'abana.

Uyu muhanzi nawe ni umunyabigwi kuko amaze kwandika indirimbo nyinshi zatumye yamamara harimo nka: Naba mpumirije, Ni wowe ndirimba, Muririmbire Uwiteka ndetse n'izindi nyinshi cyane zakunzwe. Abahanzi bakora Gospel bamufata nka Bishop wabo dore ko bamwubaha bigeretseho kumufatiraho ikitegererezo.

3. Aline Gahongayire

Aline Gahongayire abitse ibihembo birenga 17 mu kabati akaba abera urugero abinjira mu muziki wa Gospel. Niwe wafashije Serge Iyamuremye kwinjira mu muziki

Umuhanzikazi Aline Gahongayire yavutse ku ya 12 Ukuboza 1986 avukira mu karere ka Kamonyi mu Ntara y’Amajyepfo akaba ari umukobwa umwe mu bavukanyi be bane.

Gahongayire Aline ni umuhanzikazi wamenyekanye cyane mu ndirimbo zo guhimbaza no kuramya Imana. Yatangiye kuririmba no kubyina mu itorero ryabyinaga ikinyarwanda aho ryatozwaga na Nyirakuru ubyara mama we. Aho yaje gukomereza muri korali Asaph yo mu itorero rya Zion Temple .

Aline Gahongayire yatangiriye kuririmba mu itorero rya Zion Temple riherereye Kicukiro, Umurenge wa Gatenga aho bakunze kwita kwa Gitwaza. Icyo azwiho ndetse anakundirwa n'abantu batandukanye, ni uko aririmba indirimbo zifite amavuta n'imbaraga, indirimbo kandi umuntu wese uzumva ahamya ko yamufashije mu kwihangana mu buzima yacagamo hamwe n'ibigeragezo yanyuragamo.

Aline Gahongayire azwiho gufasha impano z'abahanzi batandukanye bakizamuka, urugero twavuga umuhanzi witwa Niyo Bosco banakoranye indirimbo bayita' Izindi mbaraga'.

Uyu muhanzikazi azwiho kugira umutima mwiza, ufasha abatishoboye cyane ko we akunda kuvuga ko igihe cyose utanze, Imana igukubira inshuro zirenze 2.

Avuga kandi ko bitewe nuko atari we uba warabyihaye, nawe aba agomba guha n'abandi. Yashinze umuryango udaharanira inyungu “Ndineza Organization” mu rwego rwo gufasha abatishoboye barimo abana n’abagore. Mu ndirimbo yahimbye twavugamo: Ndanyuzwe, Ntabanga, Iyabivuze,Warampishe. kuri ubu aherutse gushyira hanze iyitwa’Zahabu’. Amaze imyaka 23 mu muziki akaba afite album 8. Abitse ibihembo birenga 17 mu kabati yagiye ahabwa mu bihe bitandukanye.

4. Ingabire Irene Kamanzi

Miss Gospel,agira uruhare mu ivugabutumwa mu Rwanda no hanze

Gaby Kamanzi yavutse mu 1981, avukira i Lubumbashi mu Ntara ya Katanga muri Repubulika iharanira Demokarasi ya Congo, mu muryango wabo akaba ari umwana wa karindwi.

Akaba yaratangiye kugaragaza impano yo kuririmba ubwo yigaga mu kigo cy’ishuri cya St Esprit giherereye mu Karere ka Nyanza mu 1997 muri Singiza Ministries nyuma yo kwakira agakiza.

Gaby yakuze abana na Mama we kuko papa we( se) yitabye Imana akiri muto cyane.

Gaby Kamanzi ufite izina rikomeye mu muziki wo kuramya no guhimbaza Imana mu Rwanda benshi bakunze kumwita Malayika wa Gospel. Muri 2021 akaba yarasohoye album(alubumu) yise Emmanuel. Inzu imutunganyiriza umuziki ikaba yitwa Moriah Entertainment ibarizwamo Aline Gahongayire.

Gaby Kamanzi yavukiye mu muryango w’abahanzi harimo Se umubyara, Nyina na murumuna we Pastor Lysette Karasira.Akaba yaramenyekanye mu Rwanda no mukarere k’Ibiyaga Bigari kubera ubuhanga bwe bw’ijwi no kuyobora abandi mu ndirimbo zo kuramya no guhimbaza Imana.Gaby Kamanzi akaba yaramenyekanye cyane mu ndirimbo yitwa Amahoro,Arankunda,Wowe n'izindi nyinshi zagiye zikundwa cyane.

Gaby akundwa n'abantu cyane bitewe n'ubwitonzi, uburanga n'imyitwarire itangaje agira y'umunyarwandakazi. Igihe kinini akimara hanze y'u Rwanda. Gaby afite ibihembo bitandukanye birimoSalax Awards ndetse n'ibindi bitari bike bya Groove Awards na Sifa Rewards.Yitabiriye kandi amarushanwa menshi atandukanye yo ku rwego mpuzamahanga. Yanakoranye n'abahanzi bakomeye barimo Esther Wehome.

5. Israel Mbonyi

Israel Mbonyi afasha benshi kwakira agakiza

Israel Mbonyi yahiriwe na Gospel. Aherutse kumurika album 2 icya rimwe mu gitaramo yishyuwemo Miliyoni 50 Frw kikinjiza Miliyoni zisaga 120 Frw. BK Arena yarimo abasaga ibihumbi 8 amatike yarashize. Israel Mbonyi yavutse ku itariki 20/5/1992, avukira muri RD Congo mu Ntara ya Kivu y'Amajyepfo.

Mbonyi yakuriye muri Korali ari umucuranzi ariko ntabone amahirwe yo gutera indirimbo ahubwo akajya yandika indirimbo akaziha abahanzi, nyuma nibwo arangije amashuri yisumbuye, yatangiye kwandika indirimbo akajya anaziririmbira yumva abantu bari kuzikunda cyane kugeza ubwo nawe byamutunguye ku rwego rwo hejuru.

Icyo gihe Mbonyi yigaga mu gihugu cy'uBuhinde. Yashyize hanze indirimbo nyinshi zitandukanye ariko zitari zifite amashusho, bityo abantu bakazikunda ariko bataramenya uwo ariwe. Izo ndirimbo Mbonyi niwe wazikoreraga na bagenzi be babanaga mu nzu mu buryo bwo kwirwanaho, gusa ntibyabujije izo ndirimbo gukundwa ku rwego rwo hejuru.

Mbonyi yagarutse mu Rwanda asanga indirimbo ze zose zabaye isereri mu mitwe y'abantu zimurusha izina cyane, asanga abantu bazi indirimbo ze ariko batamuzi. Muri Mata mu mwaka 2021, byari byitezwe ko Israel Mbonyi agomba gukorera urugendo muri Israel muri gahunda bise 'Twende Jerusalem'. Uru rugendo ntirwabaye kubera ibibazo byatewe n'icyorezo cya Covid-19. ku wa 20 Mata 2022 Israel Mbonyi yakoze igitaramo cye cya kabiri, cya nyuma muri bibiri yagombaga gukorera muri Israel afatanyije na Avraham Tal.

Ni igitaramo cyabereye ahitwa Ariel Sharon Park mu Majyepfo y'Umujyi wa Tel Aviv, ahari hakoraniye imbaga y'abakunzi b'umuziki na cyane ko amatike yacyo yari amaze hafi icyumweru ashize ku isoko. Muri iki gitaramo, Israel Mbonyi yongeye gutungurana aririmba indirimbo yo mu gitabo ariko iri mu rurimi rw'Igiheburayo. Yayifatanyije na Avraham Tal. Uretse iyi ndirimbo ariko kandi Israel Mbonyi yanyujijemo aririmba n'indirimbo 'One love' ya Bob Marley iri mu zahagurukije abatari bake bamufasha kubyina. Uretse izi ariko uyu muhanzi yanaririmbye ize yafashwagamo n'abacuranzi ba Avraham Tal.

Kugeza kuri ubu Israel Mbonyini umwe mu bahanzi bamaze kwigarurira imitima ya benshi bitewe n'indirimbo zihimbaza Imana aririmba, ikindi kandi uyu muhanzi azwiho kuba indirimbo ze zikundwa n'ingeri zose y'aba urubyiruko, abasaza n'abandi.

Indirimbo za Mbonyi ari mu bahanzi bafite ibihembo byinshi. Afite album eshanu akaba anafite amazu ahantu hatandukanye yaba i Kigali, Nyamata n'ahandi. Ari mu bahanzi bigoye ko akorana indirimbo n'abandi 'Collabo'.

6. Papi Clever

Papi Clever n’umugore we bakorana umuziki wo kuramya no guhimbaza Imana

Papi Clever yavukiye i Rusizi ku wa 18 Nzeri 1992; avuka kuri Nzeyimana Elie na Mushonganono Jeanne. Se yaje kwitaba Imana muri Jenoside yakorewe Abatutsi ubwo yari afite imyaka ibiri gusa. Yasigaranye na nyina, amurerana n'abandi bavandimwe babiri; mukuru we na murumuna we.

Uyu muramyi nubwo yakuriye mu buzima bugoye n'umuryango we, yakuze akunda gusenga Imana cyane, byaje kuvamo kuririmba muri korali zitandukanye zo mu itorero rya ADEPR. Yatangiye kuririmba yiga mu wa Gatanu w'amashuri abanza muri korali y'abakuze baramurera akuriramo atyo.

7. Patience Bizimana

Patient Bizimana yagiye afasha benshi kwakira Agakiza

Patient Bizimana ni umwe mu bahanzi nyarwanda bakomeye mu muziki wo kuramya no guhimbaza Imana.

Patience Bizimana ni umwe mu bahanzi nyarwanda uri mu bakunzwe cyane mu muziki wo kuramya no guhimbaza Imana, akaba ari umuhanzi umaze imyaka igera kuri 15 mu muziki wa gospel, akaba yaratangiriye uru rugendo rwo kuririmba mu mu karere ka Rubavu akaza kuwukomereza i Kigali. Kuri ubu akaba amaze guhabwa ibihembo binyuranye mu muziki.

Patient Bizimana yizihiza isabukuru buri tariki 1 Gashyantare. Yavukiye muri Repubulika Iharanira Demokarasi ya Congo. Avuka mu muryango w’abana 10, abakobwa batanu n’abahungu batanu, we ni umwana wa 7. Abahungu bavukana, hasigaye batatu gusa.

Ku myaka ye 12 ni bwo yatangiye gusengera muri Restoration Church, gusa ababyeyi be kugeza n’uyu munsi ni abakristo Gatorika. Patient Bizimana ntabwo yize amashuri y’incuke. Amashuri abanza yayize muri Ecole Primaire Umubano, ayisumbuye ayigira muri Saint Fidele (Ikigo cya ULK), kaminuza ayiga muri ULK. Segonderi ngo yayize ku bigo bitatu kubera kwirukanwa.

Mu byukuri Patient akiri umwana yakuze yifuza kuzaba umukinnyi w'umupira w'amaguru cyane ko yakuze akunda ikipe ya Kiyovu. Avuga ko yageze mu rusengero, akabona ukuntu ari heza, buri uko avuye ku ishuri, akanyura mu rusengero, kugira ngo arebe ko nibura yasanga hari umuntu wavuye kuri piano ngo ayijyeho, ibi byatumye iby'umupira abishyira hasi, atangira inzira yo kuririmba.

Mu mwaka wa 2001 mu kwezi kwa 11 ni bwo Patient Bizimana yakiriye agakiza yiyegurira Yesu. Mbere yaho ariko ngo yabanje kubaho umusilamu nk’ukwezi kumwe bitewe n'agakungu bagiraga aho bari batuye.

Mu mwaka wa 2008 ni bwo Patient Bizimana yasohoye indirimbo ye ya mbere. Indirimbo ye bwite yahereyeho yitwa ‘Andyohera’. Mu mwaka wa 2010 ni bwo Patient Bizimana yageze muri Kigali ahakomeza umuziki ari nako awufatanya n’ishuri. Avuga ko impamvu yatumye aza kuwukorera i Kigali ari uko bahoraga bamutumira kuza kuririmba Kigali ibyo bikaba byaramugoraga cyane ahitamo kuza kuhaba.Mu myaka 15 Patient Bizimana amaze mu muziki, yavuze ko amaze gusaruramo ibintu byinshi cyane.Avuga ko kandi umuziki ari wo wamwishyuriye amashuri ye kuva mu mwaka wa Gatatu w’amashuri yisumbuye kugeza Kaminuza.

8. Theo Uwiringiyimana ' Bosebabireba'

Theo Bosebabireba yakundishije abanyarwanda Gospel. Indirimbo ze no mu tubari iyo baziteye buri wese arikiriza. Yigeze kwiharira umuziki wa Gospel kubera amaganya yabaga arimo ahuye n’ubuzima bubi yanyuzemo

Ni umwe mu bahanzi bahirimbaniye umuziki wa Gospel awukundisha abizera Imana n’abandi yafashije kwakira agakiza. Afite abafana mu Rwanda no mu Karere dore ko iyo agiye mu Burundu ubuzima buhagarara.

9. Richard Nick Ngendahayo

Kuva mu 2005 uyu mugabo yagiye yamamara mu ndirimbo zo kuramya no guhimbaza Imana. Yaje kwerekeza muri Amerika asa nk’aho acogoye ariko indirimbo ze ziri mu zahembuye abanyarwanda aho bari ku Isi hose.

10. Tonzi

Tonzi yanditse amateka atazibagirana mu muziki wo kuramya no guhimbaza Imana. Indirimbo ze zafashije benshi kwakira Agakiza

Yakuze afite ijwi ridasanzwe. Yiga mu mashuri abanza mu 1992 nibwo yashyize hanze indirimbo ya mbere. Tonzi abahanzi baje mu muziki ahari baramwubaha bakamufatiraho icyitegererezo. Yagiye abera umugisha benshi bamunyuzeho ndetse yagiye atwara ibihembo bitandukanye. Afite umuryango ufasha ‘Birashoboka Dufatanyije’ wita ku bana bafite ubumuga kandi batishoboye.

 Yawushinze mu 2012 nyuma yo gupfusha imfura ye. Mu 2003 Leta y’u Rwanda yaramwifashishije asohokera u Rwanda aho we n’abandi bahanzi bagiye gukora ibihangano bishishikariza abanyarwanda gutaha. Agarutse yasanze itorero rye ryarabikarje  ahita akora umuziki ku giti cye. Afite Album umunani. Iheruka yitwa’Amakuru’. Tonzi arubatse kandi ari mu bahanzi nyarwanda bubashywe kubera ibigwi n’amateka afite mu muziki wo kuramya no guhimbaza Imana.