Category: Uncategorized

Nsangiyenabo ucumbitse mu Murenge wa Gishari, mu karere ka Rwamagana, avuga ko abayeho mu buzima bubi kandi imitungo ye iri mu karere ka Nyagatare yarigabijwe n’abaturage barimo na koperative ihakorera ibikorwa by’ubuhinzi. 

Uyu musaza w’imyaka 67 avuga ko amaze imyaka 29 yose asembera kubera imitungo ye yigabijwe n’abantu 9 batari ba nyirayo na koperative ndetse akaba abayeho nabi.

Nsangiyenabo Augustin yabwiye InyaRwanda.com ko yambuwe isambu ntiyahabwa ingurane yari yemerewe n’Akarere ka Nyagatare kandi abaturage bagaragarije mu nteko rusange y’abaturage bo mu kagari ka Rukomo ya Kabiri mu Murenge wa Rukomo ko isambu ye iri muri ako gace ituyemo.

Avuga ko abaturage 8 bagurishijwe iyo sambu n’abambuye uwo musaza ubutaka bwe. Umunyamakuru wa inyaRwanda yagiye mu tugari twa twa Rukomo ya Kabiri ndetse na Rurenge ahari isambu ingana Hegitari 6 z’ubutaka bw’uyu musaza.

Abaturage batuye mu kagari Rukomo bitabiriye inteko rusange y’abaturage yemerejwemo ko Nsangiyenabo agomba guhabwa ingurane ingana n’ubutaka bwe, bavuga ko batunguwe no kuba Akarere ka Nyagatare katarashyize mu bikorwa ibyemerejwe mu nteko y’abaturage.

Umwe mu baturage wemeza ko abatuye mu masambu ya Nsangiyenabo Augustin bayaguze n’ayabayamuhuguje, ahakana ibyavuzwe n’ubuyobozi ko abatuyemo bahatujwe mu mudugudu akavuga ko bayaguze n’abantu bari bayagiyemo bahungutse.

Yagize ati: “Haje intumwa z’akarere mu nteko y’abaturage, mu nama hemejwe ko ubutaka bwe buhari ariko butuyemo abantu. Icyo gihe abayobozi bavuze ko azahabwa ingurane ingana n’ubutaka bwe n’inzu yarimo ariko dutunguwe nuko batamukemuriye ikibazo kandi bari babyemereye imbere y’abaturage.”

Uwo muturage yakomeje avuga ko nta mudugudu washyizwe mu masambu ya Nsangiyenabo Augustin nk’uko bivugwa. Agira ati “Nta mudugudu wigeze ushyirwa ahangaha kuko abarimo bose bariguriye .”

Umuturage waganiriye na InyaRwanda.com, yasabye ubuyobozi gukemura ikibazo cya Nsangiyenabo Augustin akava mu busembere.

Yagize ati: “Twari tuzi ko icyo kibazo cyarangiye ariko ubwo kigihari abayobozi bakwiye kugikemura nk’uko babyemereye kuko aho yari atuye harahari kandi bikaba bigaragara ko agiye gusaza nabi kandi imitungo ye irimo abandi bantu.”

Nsangiyenabo Augustin aganira InyaRwanda.com, yavuze ko ingurane yari yemerewe atayihawe nk’uko byari byemejwe n’abaturage mu nteko y’abaturage.

Yagize ati: “Isambu yanjye iri mu kagari ka Rukomo ya Kabiri ituyemo abantu umunani banayikoreramo ibikorwa byabo indi sambu ya kabiri iri mu kagari ka Rurenge mu mudugudu wa Biryogo ituyemo umusirikare ndetse harimo na koperative ikoreramo ubuhinzi.

Nkaba nsaba kurenganurwa nkasubizwa imitungo yanjye cyangwa nkahabwa ingurane ingana n’imitungo yanjye kuko ubutaka bwanjye bwose bungana na hetari esheshatu kandi burimo n’amazu ariko ubu njye ndimo gusembera mu karere ka Rwamagana.”

Nsangiyenabo Augustin yakomeje avuga ko Perezida wa Repubulika y’u Rwanda, Nyakubahwa Paul Kagame, ariwe wamwohereje mu karere ka Nyagatare nyuma y’ibaruwa yamwandikiye mu mwaka wa 2018.

Yagize ati “Ikibazo cyanjye nakigejeje kuri Nyakubahwa Perezida wa Repubulika mu ibaruwa namwandikiye ndetse aranansubiza kuko yampamagaye kuri telefoni ambwira ko ngomba kwandikira Akarere ka Nyagatare kakankemurira ikibazo.

Nahise nandikira Akarere ka Nyagatare ndetse bajya gushaka uko amakuru basanga ubutaka ari ubwanjye banemeza ko bazampa ingurane ikwiye. “

Nsangiyenabo Augustin akomeza asaba ubuyobozi kumurenganura agahabwa ingurane ikwiye y’ubutaka ndetse agahabwa inzu yo kubamo.

Agira ati: “Ndasaba ko ubuyobozi bw’Akarere ka Nyagatare ko bwasuzuma neza ikibazo cyanjye kuko ibyo nemerewe ntabwo nabihawe cyangwa ubuyobozi bukampesha imitungo yanjye yatwawe na koperative n’abaturage bayikoreramo kubera ko ubuzima bungoye.

Ndasaba kandi umubyeyi Nyakubahwa Perezida wa Repubulika kuntabara nk’uko arenganura abanyarwanda nanjye akandenganura kuko imitungo yanjye namusabye kundenganuraho kugeza ubu ntayo ndabona kuko abo yanyoherejeho ntibakemuye ikibazo cyanjye uko bikwiye.”

Mu mwaka wa 2018 Nsangiyenabo Augustin yandikiye Umukuru w’Igihugu amusaba kurenganurwa

Umunyamakuru wa InyaRwanda.com yagerageje kubaza iki kibazo mu buyobozi bw’Akarere ka Nyagatare, buvuga ko bugiye kugikurirana. 

Umuyobozi w’Akarere ka Nyagatare, Gasana Stephen, yagize ati: “Twakira ibibazo byinshi by’ubutaka ku buryo icya Nsangiyenabo ntakibuka mu mutwe ariko mu buryo bwo gukemura ibibazo nk’ibyo twashyizeho Itsinda ry’abakozi rishinzwe gukemura ibyo bibazo. Icyo cya Nsangiyenabo nawe ibyo avuga [abaye] ari ukuri yarenganurwa kuko nta muntu warengana kandi umutungo ariwe.”

Mu nyandiko InyaRwanda.com ifitiye kopi yanditswe n’Intara y’Iburasirazuba yagaragazaga ko ubutaka bwa Nsangiyenabo buri mu mudugudu wa Isangano mu kagari ka Rukomo ya Kabiri ndetse n’uburi mu mudugudu wa Biryogo mu kagari ka Rurenge ivuga ko yatujwemo imidugudu ntahabwe ingurane.

Nyamara amakuru avuga isambu imwe ikoreramo koperative, ikindi gice kikaba gituyemo umugabo bivugwa ko ari umusirikare. Ni mu gihe mu isambu ya Kabiri abayituyemo bemeza ko bahaguze n’uwaguze n’uwitwa Makuza na Rutungura.

Nsangiyenabo Augustin yandikiye Intara n’Akarere ka Nyagatare abamenyesha ko atahawe ingurane kuko iyo yahawe ntacyo yamumarira ndetse ko bari bumvikanye ko azahabwa ingurane ikwiye ndetse akanafashwa kubona inzu yo kubamo. 

Avuga ko ikibazo cye uwari Guverineri w’Intara y’Iburasirazuba CG (Rtd) Gasana Emmanuel yashatse kukimugezaho ariko ntabyemererwe ndetse ko uwari Guverineri yasimbuwe Mufulkye Fred yari yaramusabye ko bamuha hegitari eshatu akanabyemera ariko nazo ntazihabwe.

Ibarura Nsangiyenabo yandikiye ubuyobozi abusaba kumurenganura agahabwa ingurane ikwiye nk’uko bwabyemereje mu nteko y’abaturage 

Ishyirahamwe ry’umupira w’amaguru mu Rwanda ryatumijeho ikiganiro n’itangazamakuru gishobora gutangarizwamo umutoza mushya w’ikipe y’igihugu Amavubi.

Ni ikiganiro kizaba ku munsi w’ejo ku wa Gatanu tariki 26 Ukwakira 2023 saa 15h00′ kuri Grand Legacy Hotel.

Biteganyijwe ko muri iki kiganiro n’itangazamakuru FERWAFA izavuga byinshi ku masezerano iri shyirahamwe riheruka gusinyana n’Uruganda rwa Masita ruzajya rwambika Ikipe y’Igihugu.

Ikindi kitezwe ni uko ari bwo hazatangazwa umutoza mushya w’ikipe y’igihugu uzatangira urugendo rwe rwo gushaka itike y’igikombe cy’Isi cya 2026 mu kwezi gutaha bakina na Zimbabwe na Afurika y’Epfo.

Ni umutoza washatswe mu ibanga rikomeye ndetse kugeza uyu munsi nta muntu n’umwe wakwihandagaza avuge ko amuzi keretse abamushatse.

Amakuru avuga ko amaze iminsi mu Rwanda ndetse ashobora kuba ari Umudage, havuzwemo umutoza wa Mukura VS ukomoka muri Espagne, Lotfi, hari Didier Gomes da Rosa n’abandi, gusa ibyo byose ni ibivugwa nta makuru y’impamo ahari.

Amavubi y’u Rwanda nta mutoza afite kuva nyuma y’uko muri Kanama 2023 uwari umutoza mukuru, Carlos Alos yeguye maze hagashyirwaho umutoza w’agateganyo.

Hahise hashyirwaho Gerard Buschier usanzwe ari DTN wa FERWAFA nk’umutoza mukuru w’agateganyo yungirijwe na Jimmy Mulisa na Seninga Innocent bahabwa gutoza umukino umwe wasozaga itsinda L ryo gushaka itike y’Igikombe cy’Afurika cya 2023 aho banganyirije mu Rwanda 1-1.

Umutoza w’Amavubi azatangazwa ejo

Kuri uyu wa Gatatu tariki 25 Ukwakira, hakinwaga umunsi wa 3 wa Tour du Burundi, nawo wegukanwe n’abanyarwanda. Aka gace kahagurutse mu Ntara ya Kayanza gasorezwa mu ntara ya Ngozi, aho abakinnyi basiganwe intera ya Kirometero 49.5.

Abanyarwanda 5 bongeye kuza bayoboye isiganwa, aho Nzayisenga Valentine ariwe wabaye uwa mbere, Ingabire Diane aba uwa kabiri, Irakoze Neza Violette aza ku mwanya wa gatatu, Nirere Xaveline aza ku mwanya wa kane, naho Mukashema Josiane aza ku mwanya wa 5. Nk’uko biri kugenda Rukundo Emmanuella ukomoka mu Burundi niwe uri kuza ku mwanya wa gatandatu.

Abanyarwandakazi basa naho babuze abo bahangana kuri ubu bari gukina bahererekanya imyanya kuko nko kuri uyu wa gatatu Irakoze Neza Violette yaje muri batatu ba mbere, Nirere Xaveline asohokamo, ndetse Ingabire Diane wari wabaye uwa mbere mu gace ka kabiri, aba uwa kabiri mu gace ka gatatu. 

Kuri uyu wa Kane harakinwa agace ka kane, aho abakinnyi bahagurukira mu Ntara ya Ngozi berekeza mu ntara ya Gitega.

Urutonde rusange, Ingabire Diane ari ku mwanya wa mbere amaze gukoresha amasaha 5, iminota 22 n’amasegonda 8. Akurikirwa na Mukashema Josiane urushwa amasegonda 10, Nirere Xaveline akaza ku mwanya wa 3 arushwa umunota n’amasegonda 18.

Abakinnyi 3 ba mbere bo ku munsi wa 3 w’irushanwa 

Abakinnyi 3 ba mbere ku munsi wa 2 

Abakinnyi 3 ba mbere ku munsi wa 2

Urubanza rwa Kazungu Denis rwabereye mu Ngoro y’Ubutabera mu Rukiko rw’ibanze rwa Kicukiro ruri mu Kagarama. Mu rubanza, hari inteko iburanisha n’ubushinjacyaha ariko Kazungu Denis ntabwo yahageze, ahubwo yaburanye ari mu igororero rya Nyarugenge riri i Mageragere.

Ubushinjacyaha bwasabye ko hongerwa iminsi 30 y’agateganyo kugira ngo iperereza rikomeze ku byaha 8 akurikiranyweho. Kazungu Denis abajijwe icyo avuga ku byo Ubushinjacyaha busaba, yagize ati: “Ibyo Ubushinjacyaha buvuga nta cyo nongeraho”.

Urukiko rwavuze ko umwanzuro w’urubanza uzasomwa ku itariki 27 Ukwakira 2023.

Kazungu akurikiranyweho ibyaha birimo Ubwicanyi buturutse ku bushake, Iyicarubozo, Gukoresha undi imibonano mpuzabitsina ku gahato, guhisha umurambo w’undi, Gukoresha ibikangisho gutwarwa n’ifungiranwa ry’umuntu. 

Akurikiranyweho kandi ubujura bukoresheje ikiboko, icyaha cyo konona inyubako utari nyirayo, inyandiko mpimbano, ndetse no kugera mu buryo butemewe ku makuru abitswe muri nudasobwa.

Kazungu Denis yemera ko yishe abantu 14 barimo ab’igitsinagore 13 n’umwe w’igitsinagabo. Urubanza ku ifungwa n'ifungurwa ry'agateganyo rwabaye ku itariki 21 Nzeri 2023.

Kazungu Denis yemeye ko yishe abantu 14

Urwego rw'Igihugu rw'Ubugenzacyaha, RIB, rwataye muri yombi CG (Rtd) Emmanuel Gasana, wari Guverineri w'Intara y'Iburasirazuba, akurikiranyweho icyaha cyo gukoresha ububasha ahabwa n'amategeko mu nyungu ze bwite.

Amakuru yatangajwe na RIB mu ijoro ryo kuri uyu wa Gatatu, avuga ko Gasana yatawe muri yombi nyuma y'uko akuwe ku mwanya we n'Umukuru w'Igihugu.

Shampiyona y’imikino y’abakozi ya 2023 iteganyijwe kuzagendwaho na miliyoni 100 z’amafaranga y’u Rwanda igeze aho rukomeye aho imikino igeze muri 1/4.

Mu kiganiro n’itangazamakuru cyabaye ejo hashize ku wa Gatatu, Ishyirahamwe ry’Imikino y’Abakozi mu Rwanda (ARPST), ryagaragaje ingengabihe y’iyi mikino ya 1/4 irimo imikino ikomeye.

Ni shampiyona yitabiriwe n’ibigo 55 ni mu gihe umwaka ushize yari 44, bivuze ko hiyongereyemo amakipe 15, ikaba yaratangiye muri Nyakanga uyu mwaka.

Umuyobozi w’Ishyirahamwe ry’Imikino y’Abakozi mu Rwanda, Mpamo Thierry Tigos, yasezeranyije abantu ko bazaryoherwa cyane n’imikino yo guhera muri 1/4 kugeza ku mikino ya nyuma.

Ari 'Imikino igeze muri 1/4. Amakipe wavuga akomeye yose yarahageze. Abazareba iyi mikino kugeza ku ya nyuma, bazaryoherwa cyane pe.'

Yakomeje kandi avuga ko bishimira uburyo ibigo bigenda byumva neza intego y’Ishyirahamwe.

Biteganyijwe ko tariki ya 3 na 17 Ugushyingo 2023 ari bwo hazakinwa imikino ibanza n’iyo kwishyura ya 1/4.

Nyuma y’iki cyiciro, hazahita hatangazwa amatariki y’imikino ya 1/2, cyane ko iyi shampiyona izasozwa mu Ukuboza uyu mwaka.

Amwe mu makipe akakaye yageze muri 1/4, harimo RBC, RBA, Rwandair, NISR, MOD, REG n’izindi.

Muri shampiyona y’Abakozi, hakinwa umupira w’amaguru, Basketball na Volleyball mu byiciro byombi. Mu irushanwa ry’Umunsi Mpuzamahanga ry’Umurimo, hakinwamo imikino yindi irimo Koga, Igisoro, Gusiganwa ku Maguru n’iyindi.

Mpamo Thierry Tigos yavuze ko abafana bazaryoherwa n’imikino ya 1/4

Isimbi Alliance uzwi nka Allaih Cool yamaze gusohora filime iheruka kurikoroza ku mbuga nkoranyambaga bitewe n’amashusho ayigaragaramo.

Ni filime yise 'Good book, Bad Cover’, ni filime y’urukundo ikaba ikinwe mu ndimi zirimo Icyongereza n’Igiswahili .

Ubwo muri Kanama 2023 yashyiraga hanze integuza y’iyi filime, abantu bayisamiye hejuru bitewe n’amashusho ayigaragaramo abantu basa n’abarimo gukora imibonano mpuzabitsina.

Mu kiganiro aheruka guha ikinyamakuru ISIMBI yavuze ko yahisemo gukora iyi filime mu ndimi z’amahanga kugira ngo filime igere kure kandi anagure isoko rya Sinema Nyarwanda.

Ni filime yakozwe abifashijwemo na Sosiyete yo muri Nigeria imufasha mu bya Sinema, yanditswe na Ajalaja Stanley ari na we wayitunganyije mu buryo bw’amashusho.

Iyi filime nshya ya Alliah Cool igiye hanze ikurikira iyo yise 'Alliah The Movie’ yasohotse mu mpera za 2021 ndetse ikazasohoka mu gihe hagitegerejwe indi yitwa 'Accidental Vacation’ yahuriyemo n’abakinnyi bakomeye by’umwihariko muri Nigeria.

Alliah Cool yasohoye filime nshya

Umusifuzi mpuzamahanga w’umunyarwanda, Twagirumukuzi Abdul Karim ni we wahawe kuzaca impaka ku mukino w’abakeba uhuza APR FC na Rayon Sports.

Ni umukino uzaba ku Cyumweru tariki ya 29 Ukwakira 2023 kuri Kigali Pelé Stadium, uzaba ari umukino w’umunsi wa 9 wa shampiyona y’icyiciro cya mbere mu Rwanda umwaka w’imikino 2023-24.

Ni umukino wahawe kuzasifurwa n’abasifuzi mpuzamahanga bane aho umusifuzi wo hagati ari Twagirumukiza Abdul Karim.

Umusifuzi wa mbere w’igitambaro ni Ishimwe Didier, uwa kabiri w’igitambaro ni Mugabo Eric ni mu gihe umusifuzi wa 4 ari Rulisa Patience.

Twagirumukiza Abdul Karim ni we uzasifura uyu mukino

Ku itariki 23 Nzeri 2023 ni bwo polisi ya Las Vegas yataye muri yombi Keffe D imushinja kwica umuraperi w'icyamamare Tupac '2Pac' Shakur nyuma yaho isatse urugo rwe igasangamo imbunda yarashe uyu muraperi mu 1996.

Kuva ubwo abantu benshi barimo n'ibyamamare nka Snoop Dogg, Jada Pinkett Smith, Viola Davis n'abandi bishimiye ko uyu mugabo atawe muri yombi ndetse ko hagiye kuboneka ibisubizo byibazwaga ku rupfu rwa Tupac Shakur umaze imyaka 27 yishwe.

Ese Keffe D watawe muri yombi akurikiranyweho kwica Tupac ni muntu ki?

Amazina ye nyakuri ni Duane Davis wamenyekanye ku izina rya Keffe D. Yavutse tariki 14 Kamena mu 1963, avukira mu gace ka Compton muri Calfornia kazwiho kuvukamo ibyamamare byinshi. Kuba yaravukiye muri aka gace kuzuyemo abahanzi bazwi, byanatumye akurana n'abamwe muri bo ndetse aba inshuti za hafi yabo.

Keffe D yakuze ari inshuti magara ya Eric Wright uzwi cyane ku izina rya 'Eazy E' umwe mubaraperi bari bagize itsinda rya 'N.W.A' ryabagamo Ice Cube, Dr. Dre, MC Ren hamwe na DJ Yella. Iri tsinda ryakunze kuba riri kumwe cyane na Keffe D ndetse yanagiye agaragara mu mashusho yabo.

Uretse kuba inshuti yaba baraperi bakomeye muri Amerika, Keffe D yari inshuti ya hafi ya Suge Knight biganye amashuri abanza. 

Uyi Suge Knigt nawe uri mu buroko yahoze ari umukire ukomeye muri California ndetse ni nawe washinze inzu ifasha abahanzi ya 'Death Row' yabagamo Tupac Shakur, Dr Dre na Snoop Dogg. Kuba hafi yaba bahanzi bose byatumye Keffe D yifuza kuba nkabo ngo ajye mu muziki nyamara ntibyamuhira.

Keffe D ukurikiranyweho urupfu rw’umuraperi Tupac Shakur

Keffe D amaze kubona ko gukora umuziki atari ibintu bye dore ko ntanimpano yarabifitemo, yahise atangira kujya mu bikorwa bibi byo kumuhanda ndetse anaba umwe mu barara (Gangster) bari bazwi cyane muri California. Yahise ashinga itsinda ry'amabandi ryitwa 'South Side Compton Crips'.

Iri tsinda rizwiho kuba ryacuruzaga ibiyobyabwenge, imbuda zitemewe no gucuruza abakobwa. Rizwiho kandi kuba ryaragiye rirasana n'andi matsinda bari bahanganye kumugaragaro ndetse Keffe D ni kenshi yatawe muri yombi azira kurasa abantu no gutunga imbunda mu buryo butemewe. Icyo gihe ariko ntiyigeze akatirwa ngo afungwe bitewe n'imbaraga zifaranga no gutera ubwoba abapolisi.

Keffe D ahurirahe n'urupfu rwa Tupac Shakur?

Izina rya Keffe D rikunze kugarukwaho cyane iyo havuzwe urupfu rwa Tupac

Nyuma y'iminsi micye Tupac Shakur yitabye Imana nyuma yo kuraswa i Las Vegas, umupolisi  witwa Tim Brennan wari usanzwe ari mu iperereza ry'ibyaha Duane 'Keffe D' Davis yarakurikiranyweho, wabarizwaga muri polisi ya gace ka Compton, yahaye impapuro inkiko zivuga ko Keffe D yaba yaragize uruhare mu rupfu rwa Tupac kuko itsinda ry'amabandi ayoboye rya 'South Sice Compton Crips' ryari rimaze iminsi rihanganye n'inzu ya Death Row nyuma yahoo Keffe D na Suge Knight bashwaniye.

Icyo gihe ntakintu byatanze kuko ntabimenyetso bifatika uyu mupolisi yagaragazaga uretse kuba Keffe D nabo mu itsinda rye bari i Las Vegas ubwo Tupac Shakur yaraswaga. Mu 1998 nibwo byavuzweko uwarashe uyu muraperi ari Orlando Anderson uzwi nka 'Baby Lane',  akaba anafite icyo apfana na Keffe D dore ko ari Nyirarume we.

Mu 1998 nyuma y'urupfu rwa Orlando Anderson wapfuye arashwe n'abagenzi be bamushinjaga ko yabagambaniye muri polisi, nibwo Keffe D yavuze ko umwishywa we ariwe warashe Tupac Shakur. Kuvuga ibi ariko ntacyo byari gutanga kuko Orlando yaramaze kwitaba Imana.

Keffe D yakunze kwigamba ko azi byinshi ku rupfu rwa Tupac Shakur

Keffe D aherutse kwitaba urukiko ku nshuro ya mbere

Mu 2008 Keffe D ubwo yahamagarwa na polisi ya Compton ngo avuge ibyabaye mu ijoro Tupac yarasiweho, yavuze ko azi ukuri kubyabaye ndetse ko azi neza uwakuruye imbarutso ku mbunda yarashe uyu muraperi, gusa akavuga ko atamena ibanga ngo amushyire hanze kuko ngo yaba yishe igihango yagiranye nabo bakoranaga ku mihanda ya Compton. Ibi bizwi ku izina rya 'Street Code'.

Mu 2011 umupolisi wo muri Los Angeles wakoraga iperereza ku rupfu rwa Tupac Shakur, witwa Greg Kading ari nawe wakoraga iperereza ku rupfu rw'umuraperi The Notorious Biggie, yasohoye igitabo cyitwa 'Muder Rap' aho yanditse ko Keffe D yamwibwiriye ko ariwe wishe Tupac abisabwe n'undi muraperi Sean 'Diddy' Combs wamwishyuye amafaranga angana na miliyoni imwe y'amadolari.

Mu 2018 televiziyo mpuzamahanga y'imyidagaduro ya BET, yasohoye filime mbarankuru yitwa 'Death Row Chronicles' yarikubiyemo ubuhamya ku rupfu rwa Tupac n'ibyaha Suge Knight yakoreraga muri iyi nzu ya Death Row yafashaga abahanzi ari nayo Tupac Shakur yabagamo.

Muri iyi filime niho Keffe D yavugiyemo ko agiye kuvuga ukuri kose ku rupfu rwa Tupac. Yavuze ko bitewe n'uko arwaye indwara ya kanseri ntagihe kinini asigaranye ariyo mpamvu agomba kuvugisha ukuri mbere y'uko apfa. 

Yagize ati: 'Kanseri yanyica isaha iyariyo yose, sinshaka gupfa nkagenda ntasubije ikibazo benshi bibaza ku rupfu rwa Tupac. Yego ninjye wabikoze. Ni njye wamurashe ndi kumwe na bagenzi banjye. Nabikoze maze kwishyurwa na P.Diddy wansabye kwica abagize Death Row''.

Uyu mugabo yakunze kwigamba kenshi ko azi byinshi ku rupfu rwa Tupac

Icyo gihe iyi filime imaze kujya hanze ntabwo ibyo yavuze abantu babyizeye dore ko bavugaga ko ari ikinyoma yavuze kugirango yishyurwe na BET basohore iyi filime. Abandi kandi bavugaga ko ibyo avuga abiterwa n'uko ashaka kwamamara.

Muri uyu mwaka kandi ni na bwo Netflix yasohoye indi filime ku rupfu rwa Tupac yitwa 'Unsolved', yavuze ko yararari mu modoka ya Cadillac yarashe Tupac wari wicaye mu modoka ya BMW mu ijoro ryo kuwa 13 Nzeri 1996 ari naryo uyu muraperi yapfiriyeho. Keffe D yavuze ko umwishywa we Anderson atariwe wakuruye imbunda yishe Tupac. 

Ibi byatumye benshi bibaza aho ukuri guherereye kuko uyu mugabo yakomezaga kuvuga ubuhamya butandukanye aho rimwe avuga ko ariwe warashe, ubundi akavuga ko ari mwishywa we naho ubundi akavuga ko atariwe ari nabyo byatumye ibyo yavugaga bitizerwaga.

Ni kensi Keffe D yatunze agatoki Diddy avuga ko ariwe wamwishyuye ngo ahitane Tupac

Ntibyatinze Keffe D mu 2019 asohora igitabo yise 'Compton Street Legend', aho yanditseko umuraperi w'umuherwe Diddy ariwe wamwishyuye ngo yivugane Tupac Shakur. Yavuze ko yahoze ari inshuti ya hafi ya Diddy ndetse ko ari nawe wamuhaye imodoka yo mu bwoko bwa '1964 Chevy' yakoresheje mu mashusho y'indirimbo yitwa 'Can U Get Wit It' yakoranye n'umuhanzi Usher.

Muri iki gitabo Keffe D avuga ko Diddy yangaga cyane Tupac n'abagenzi be bo muri Death Row nyuma yaho Tupac yasohoye indirimbo yise 'Hit Em Up' aho yibasiye bikomeye Biggie na Diddy ari naho yabashinjije ko bashatse kumwicisha ntibabigeraho.

Keffe D ariko nubwo yavuze byinshi ku rupfu rwa Tupac muri iki gitabo, nabwo abantu bavuze ko ibyo yanditse ari ibinyoma agamije kubona amafaranga.  Mu biganiro bitandukanye Keffe D yagiye aha itangazamakuru yakunze kwigamba ko ariwe muntu wenyine ku isi uzi ukuri ku rupfu rwa Tupac Shakur ndetse ko bimubabaza kuba ntawumwizera iyo abivuze.

Magingo aya Keffe D yatawe muri yombi nyuma y’imyaka 27 Tupac apfuye

Nyuma y'igihe kirekire Keffe D yigamba urupfu rwa Tupac, ku itariki 23 Nzeri 2023 nibwo polisi ya Las Vegas yamutaye muri yombi imushinja kwivugana uyu muraperi ufatwa nk'umwami w'injyana ya Rap/Hip Hop.

Kugeza ubu Keffe D uri mu maboko y'ubutabera, akomeje gutuma Diddy yibasirwa nyuma yahoo yongeye kuvuga ko ariwe wamwishyuye ngo yice Tupac Shakur. Ku mbuga nkoranyambaga kandi hamaze iminsi intambara y'amagambo iyobowe na 50 Cent uvuga ko Diddy ariwe wicishije Tupac kandi ko nawe akwiriye gukurikiranwa hatitawe kumbaraga n'amafaranga afite.