Category: Uncategorized

Ni igitaramo cyateguwe mu rwego rwo kwizihiza imyaka 20 ishize umuryango wa Giants of Africa utangije ibikorwa mu bihugu bitandukanye byo ku Isi, cyane cyane ku mugabane wa Afurika mu murongo wo guteza imbere urubyiruko rufite impano mu mukino wa Basketball.

Ku rubuga rwa Giants of Africa, batangaje ko umugoroba w'igitaramo bise 'Dream Big Gala' batangije ugamije guhuriza hamwe abafatanyabikorwa, inshuti, imiryango, abagiraneza n'abandi mu murongo wo gukusanya inkunga yo gushyigikira urubyiruko rwa Afurika binyuze muri 'Dream Big' (Gutekereza byagutse).'

Bavuze ko mu rwego rwo kuzahuriza abantu muri uyu mugoroba wo guhindurira amateka urubyiruko rwa Afurika, wanahujwe n'igitaramo kizaririmbamo itsinda rya Boyz II Men ryamamaye ku Isi mu njyana ya R&B ndetse n'umuhanzikazi Töme umaze kwegukana ibikomeye bikomeye mu muziki.

Iki gitaramo kizaba ku Cyumweru tariki 3 Ukuboza 2023. Boyz II Men igiye kuririmba muri iki gitaramo nyuma yo gukorera amateka muri BK Arena, mu gitaramo bahuriyemo n'umuhanzi w'umunyarwanda, Andy Bumuntu.

Boyz II Men yamamaye mu ndirimbo z’ibihe byose nka ‘A song for Mama’, ‘End of the Road’, ‘Doin’ just Fine’ n’izindi. Iri tsinda ryarakunzwe karahava kuva mu myaka irenga 40 ishize. 

Amateka n’ibigwi byabo bihera mu Mujyi wa Philadelphia aho batangiriye bigizwemo uruhare na Nathan Morris ndetse na Marc Nelson batangiye baririmbana biga mu mashuri yisumbuye.

Mu 1991 iri tsinda ryasohoye album ya mbere bise “Cooleyhighharmony”, ni nyuma yo gushyira umukono ku masezerano n’inzu ya Michael Bivins.

Iyi album yisanzuye ku isoko iragurwa biturutse ku ndirimbo nka 'End of the Road’ yabubakiye izina. Iyi ndirimbo yamaze ibyumweru 13 iyoboye urutonde rwa Billboard Hot 100.

Muri iki gitaramo bazakorera muri Leta Zunze Ubumwe za Amerika kandi hazabaho kwakira abashyitsi, gusangira ibyo kurya no kunywa n'ibindi bizaranga uyu mugoroba w'amateka.

Michelle Oluwatomi [Töme] watumiwe muri iki gitaramo yavutse ku wa 17 Nzeri 1997, ni umuhanzikazi w'umunya-Nigeria ufite ubwenegihugu bwa Canada, kuko yavukiye i Montreal muri Quebec.

Mu 2021, uyu mukobwa yegukanye igikombe cya Juno Awards abicyesha indirimbo ye yise 'I Pray' yakoranye na Sean Kingston, kandi yahuriye ku rubyiniro n'abahanzi barimo nka Burna boy, Wizkid, Mr Eazi n'abandi. Amaze gukorana indirimbo n'abahanzi nka King Promise, Runtown, Zlatan, Wavy n'abandi.

Mu 2020 yasohoye Album yise 'Bigger Than Four Walls' mu 202 ashyira hanze Album yise 'Löv.' Ziriho indirimbo nka L’amour” (2019), “The Money” (2020), “Better Than That” (2020) n'izindi.

Muri rusange, Giants of Africa ivuga ko iki gikorwa kigamije guhindura ubuzima bw'urubyiruko rw'abanyafurika, kubafasha guteza imbere impano z'abo mu mukino wa Basketball, kubaka ibibuga by'umupira wa Basketball, hategurwa urubyiruko rw'ejo hazaza.

Mbere y'iminsi ibiri, ubwo ni ukuvuga ku wa Gatanu tariki 1 Ukuboza 2023, hazaba umukino uzahuza Toronto Raptors ndetse na New York Knicks mu gikorwa cyiswe 'Giants of Africa Night' uzabera mu nyubako y'imyidagaduro ya Scotiabank Arena.

Uyu mukino uzanarangwa n'ibindi bikorwa mu rwego rwo kwishimira imyaka 20 ishize Giants of Africa imaze ihindura ubuzima bw'urubyiruko rwa Afurika.

 

Boyz II Men na Töme bahurijwe mu murongo w'igitaramo hagamijwe gukusanya inkunga mu gushyigikira gahunda ya 'Dream Big' 

Boyz II Men iherutse gukorera igitaramo cy'amateka muri Leta Zunze Ubumwe za Amerika

Töme ari mu bahanzikazi bagezweho muri Canada ndetse n'iwabo muri Nigeria

Ku gicamunsi cyo kuri uyu wa Gatatu tariki 1 Ugushyingo 2023, ni bwo Ishyirahamwe ry’Umupira w’Amaguru mu Rwanda, FERWAFA, ryatangaje ko Umudage Torsten Spittler Frank w’imyaka 61, ari we mutoza mukuru w’ikipe y’igihugu Amavubi, akazungirizwa na Jimmy Mulisa ndetse na Rwasamanzi Yves.

N’ubwo uyu mutoza yari yatangiye guhwihwiswa mbere, ntabwo iyi nkuru FERWAFA ikiyitangaza nk’urwego rwa nyuma rwari rukeneweho amakuru, yakiriwe neza bitewe n’ibyo abanyarwanda bifuzaga.

Nyuma yaho Amavubi atandukaniye na Carlos Alós, abanyarwanda bakunda ruhago bumvaga baruhutse abatoza baza kubigiraho, ndetse bumvaga ko komite nshya ya FERWAFA ishobora kuzabaha umutoza mwiza ubafasha guhangana mu mikino yo gushaka itike y’igikombe cy’Isi Amavubi arimo kwitegura.

Komite nshya ya FERWAFA nayo ntabwo yujuje ibyo abanyarwanda bifuzaga kuko yabazaniye umutoza utaratoza ikipe n’imwe y’igihugu.

Torsten Spittler Frank wahawe Amavubi ni muntu ki?

Mu 1962 ni bwo Torsten Spittler Frank yabonye izuba, avukira mu gihugu cy’u Budage. Amateka ye mu gukina umupira w’amaguru ntabwo agaragara neza kuko yakuze awukunda ariko kuwukina ntabwo byari ibintu bye.

Torsten afite akazi gakomeye ko gusubiza Amavubi ku murongo ndetse no kwemeza Isi ko ari we mutoza u Rwanda rwari rutegereje

Mu kazi k’ubutoza Torsten yatangiye mu ikipe ya Bayern Munich ubwo yari umwe mu batoza b’abana b’iyi kipe ahagana mu 1980. Mu 1998, uyu mutoza yari umwungiriza mu ikipe y’igihugu y’u Budage, y’abatarengeje imyaka 16.

Mu 1999 yaje kuba umutoza mukuru w’igihugu cya Nepal, ari nayo kipe y’igihugu yatoje. Muri Nepal yahamaze umwaka umwe, ahita ajya mu ikipe ya Parak FA mu 2000. Kuva mu 2003 kugera mu 2005 uyu mutoza yari umuyobozi wa Siporo muri Yemen, ndetse muri 2005 kugera muri 2007 aba umuyobozi wa Siporo muri Sierra Leone.

Muri 2007 uyu mutoza yerekeje mu ikipe ya Okanagan Challenge yo muri Canada, ikaba ikipe y’abatarabigize umwuga. Mu 2009 kugera mu 2011 Torsten Spittler yerekeje muri Mozambique agirwa umuyobozi wa Siporo.

Mu 2016-17 uyu mugabo yari umutoza mukuru wa Bhutan yo muri Asia. Mu mwaka wa 2019 yerekeje mu gihugu cya Myanmar atoza ikipe yaho y’abatarengeje imyaka 15 ahava ajya mu ikipe ya Tus Holzkichen. Urugendo rwe ruragaraza ko nta bigwi afite mu butoza.

U Rwanda muri uku kwezi ruzakira imikino 2 yo gushaka itike y’igikombe cy’Isi kizaba mu 2026

Urebye urugendo rw’uyu mutoza mu mitoreze, ubona ko ikipe y’igihugu “Amavubi” nk’ikipe ishaka kumanuka ku rutonde rwa FIFA igaruka mu myanya myiza, nk’ikipe ishaka kwiyunga n’abanyarwanda, ntabwo Torsten yari amahitamo meza, cyereka niba havutse ikibazo cy’amikoro.

Ni uko nta kipe yabaho idafite umutoza, Amavubi yari kwiberaho nta mutoza afite aho gutozwa na Torsten Spittle. Gusa uyu mugabo w’umudage afite icyangombwa cy’ubutoza cya UEFA Pro kimwemerera gutoza ku ruhando mpuzamahanga kandi rukomeye, ariko nta bigwi afite.

Tugendeye ku bigwi Torsten Spittler Frank afite, amahirwe menshi ni uko aka kazi gashobora kuzagorana ubihuje n’abakinnyi Amavubi aba afite. Gusa ku rundi ruhande ntabwo ari ubwa mbere tubonye umuntu uje ntaho aturutse, hakaba hari ibikorwa yakora by’ikirenga, ubwo igisigaye ni igihe gusa.

Guhatisha ishoka ibirayi

Iyi mvugo ikunze gukoreshwa mu gihe hari umuntu ushaka kugera ku ibintu bigoye gusa mu maso y’ababimusabye babizi ko atabibasha. Ishoka ni igikoresho gikunze gukoreshwa mu cyaro mu gusatura inkwi. Ishoka iba ifite ubujyi ndetse n’umubyimba wihutisha ubwo bujyi.

Ushatse guhatisha ishoka ibirayi rero wakwisanga nta kirayi na kimwe uramuye ndetse wanikomerekeje kuko ikirayi kigenewe guhatishwa icyuma kidafite uburemere bukabije, n’ubwo cyaba gifite ubujyi nk’ubwishoka.

Bumwe mu bitekerezo b’abakunzi n’umupira w’amaguru mu Rwanda banyujije kuri X

Umunyamakuru Niyitegeka Jules William [Chita] n’umugore we Yvette Batamuriza batangije umuyoboro wa YouTube bise ‘Queen of Chita’ bazajya banyuzaho ibiganiro bitandukanye birimo inkuru y’urukundo rwabo, ubuzima bwabo ndetse n’ibindi biganiro by’abandi bantu bakundana.

Mu kiganiro cya mbere cyatumbutse kuri iyi YouTube, Chita yavuze ko impamvu yashinzwe bitewe n’umugore we wagize igitekerezo cyo kuzajya atambitsaho ibiganiro, gusa na we ngo akenshi bazajya baba bari kumwe.

Ati “Mbere na mbere ni umuyoboro (chaine) wanjye n’umugore wanjye ariko ntabwo uruhare runini ari njyewe kuko ni uy’umugore kuko ni we uzajya utambutsa ibiganiro n’ibitekerezo bye ariko kugira ngo biryohe kurushaho, ngomba kuba mpari kenshi ndi kumwe na we kugira ngo bigende neza kuko tugirana ibihe byinshi turi kumwe.”

“Icya mbere ni inkuru y’urukundo yacu cyangwa ubuzima bwacu, tuzaganira n’abantu bakundana “Couples”, abantu bafite ubunararibonye bw’ubuzima ariko cyane cyane buganisha ku rugo ariko cyane cyane abagore kuri gahunda zo kurera no kubyara.”

Yakomeje avuga ko bazaganiriza abantu b’ingeri zose ndetse n’ibikorwa by’ubugira neza byo gufasha abatishoboye.

Muri iki gikaniro ni ho Batamuriza yahishuye ko yakundiye Chita ibintu 3 kandi by’ingenzi, byatumye yumva ubuzima bwe babumarana.

Ati “Icyo namukundiye ni ibintu bitatu. Ikintu namukundiye bwa mbere, ni umunyakuri ntabwo yigeze ambeshya, ntabwo yigeze anyiyemeraho ngo ambwire bya bintu bidashoboka, dukundana yabaye we nyine, yabaye umunyakuri, kwa kundi ukundana n’umuhungu akakubeshya akagucurika ntabwo byigeze bimuranga, biri no mu bintu numvaga nifuza ku muhungu.”

“Icya kabiri biri mu kuntu ateye, kuba iruhande rwe nta rungu, mbega njyewe mpora nishimye. Icya gatatu akunda umurimo, arakora cyane.”

Chita Yvette bakoze bamaze imyaka irenga ibiri babana nk’umugore n’umugabo kuko bakoze ubukwe Kanama 2021, ubu bafitanye umwana umwe w’umuhungu.

Chita na Yvette batangije chaine bazajya banyuzaho ibiganiro birimo n’inkuru y’urukundo rwa bo

Rutahizamu wa Rayon Sports, Rudasingwa Prince yaraye afashe rutimikerere yerekeza ku Mugabane w’u Burayi muri Latvia gukora igeragezwa.

Uyu rutahizamu w’umunyarwanda akaba yarerekeje i Burayi nyuma yo kuva mu myitozo ya Rayon Sports atayisoje aho yasize bagenzi be mu kibuga.

Rudasingwa Prince akaba yari mu myitozo kimwe n’abandi bakinnyi ku gicamunsi cy’ejo hashize ku wa Gatatu tariki ya 1 Ugushyingo 2023 mu Nzove aho iyi kipe isanzwe ikorera imyitozo.

Ubwo imyitozo yaburaga nk’iminota 20 ngo irangire ni bwo uyu mukinnyi yavuye mu kibuga afata igikapu cye asohoka mu Nzove asize abandi mu kibuga ajya kwitegura urugendo.

Prince akaba yarahise yerekeza i Burayi gukora igeragezwa mu ikipe ya Riga FC ikina mu cyiciro cya mbere muri Latvia.

Rudasingwa Prince w’imyaka 20 yakuriye mu ishuri ryigisha umupira rya APR FC, yaje gutandukana naryo muri 2018 ari nabwo yajyaga kwiga muri LDK, niho umutoza Kayiranga Jean Baptiste yamubonye amutwara mu irerero rya Rayon Sports ari ho yavuye azamurwa mu ikipe nkuru muri 2020.

Rudasingwa Prince yerekeje i Burayi gukora igeragezwa

Kuri uyu wa Gatatu tariki 1 Ugushyingo, ni bwo Skol yatanze ubu bwisungane mu muhango wabereye ku kibuga giherereye mu Nzove aho uru ruganda ruherereye. Iyi gahunda isanzwe ari ngarukamwaka kuri uru ruganda aho ikora ibikorwa by’ubugiraneza ku muryango nyarwanda by’umwihariko abari mu gace uru rugande rukoreramo.

Abaturage bo mu kagari ka Nzore mu Karere ka Nyarungege ari naho SKOL ikorera, bahawe ubwisungane mu kwivuza mu cyiciro cya 2023-24 

Eric Gilson Umuyobozi wa SKOL Brewery Limited, aganira n’itangazamakuru, yavuze ko uruganda rwa SKOL ruba rurajwe ishinga n’imibereho myiza y’abaturage. Ati: “SKOL Brewery Limited ntabwo ireba ku nyungu gusa z’uruganda”. 

“Duterekeza cyane ko imibereho myiza y’abaturage ari ibuye ry’ifatizo ku iterambere n’izamuka ry’ubukungu bw’igihugu. Ibyo dukora byose nk’uruganda twifuza ko hari ibyajya bigaruka mu nyungu za rubanda”.

Eric Gilson umuyobozi mushya wa SKOL yemeza ko ikibaraje ishinga ari ugukorera mu muryango ufite ubuzima buzira umuze kuko ariyo mbarutso y’iterambere 

Musabyimana Oliver umwe mu baturage bahawe ubwisungane mu kwivuza, avuga ko ibyo SKOL ibakorera ntacyo babinganya. Yagize ati: “Ndi umubyeyi w’abana 7 n’umugabo umwe, iyi gahunda yo kuduha ubwisungane tuyakira neza. SKOL ni umubyeyi kuko aratugoboka cyane. Uyu mwaka uruganda rwa SKOL runyishyuriye ubwishingizi ubaye uwa 5, bivuze ko imaze kumfasha ikintu kinini ntazi niba nari kuzabishobora iyo itahaba.'

Uwakiriyimfura Emmanuel nawe ari mu bahawe ubwisungane mu kwivuza, avuga ko “kuba SKOL ikorera mu kagari kacu ka Nzove, ni iby’agaciro gakomeye kuko itwitaho. Ndi umupapa w’abana 3 n’umugore, urumva ko rero ubwisungane bw’abantu batanu umuntu abashije kubuguha, ntacyo aba atagukoreye.”

Uruganda rwa SKOL rusanzwe rugaragara mu bikorwa bitandukanye byo gufasha umuryango nyarwanda, harimo  kwifatanya nabo mu muganda rusange, guha Leta ubufasha bw’ibanze ku bahuye n’ibiza, ndetse n’ibindi. 

Abaturage babanje kubicira icyaka ndetse bataha banezerewe 

Abaturage bahawe ubufasha batashye birahira uruganda rwa SKOL 

AMAFOTO: Jean Nshimiyimana – InyaRwanda

Umuhanzi Ikubor Divine ukomoka mu gihugu cya Nigeria umaze kubaka izina mu muziki cyane aho yahiriwe n’indirimbo “Calm down” yatangaje ko n’ubwo afite imyaka 23 gusa akaba amaze imyaka 4 atangiye gukora umuziki, aramutse ahagaritse burundu gukora imiziki yazajya yibukwa nk’umuhanzi ukomeye Nigeria yagize.

Mu bwishongozi bwinshi bw’ibyo amaze kugeraho akaba ari mu myiteguro yo gukorana n’umuhanzikazi Spice ukomoka muri Amerika, yavuze ko injyana ya Afrobeats bakora ibaye ari Bibiliya we yaba ari isezerano rishya. 

Yashakaga kwishongora agaragaza buryo ki ariwe ugezweho bikagaragarira kuba ariwe muhanzi uherutse gutarama mu itangwa ry’ibihembo bya Ballon d’or byabereye mu Bufaransa akaba ariwe wa mbere ukomoka muri Afurika ubiririmbyemo.

Ubwo Rema yari mu kiganiro na i-D Magazine, yavuze ko aramutse avuye mu muziki yazibukwa ibihe byose anahishura ko yubakiye ku kizere gicye yahabwaga bituma agera kuri byinshi amaze kugeraho aka kanya.

Rema yagize ati “Ntabwo nshaka kuvuga ko ngiye guhagarika umuziki ariko mbaye nywuhagaritse nazandikwa muri Bibiliya ya Afrobeats. Habaye hariho Bibiliya ya Afrobeats nazandikwa mu isererano rishya kuri paji ya mbere.”

Rema akomeza agira ati “Buri kintu cyose abantu barakinenga. Buri kintu basekaga njyewe nacyubakiragaho. Banyitaga umuhinde nyuma nza kujyayo ni njyewe muhanzi wa mbere wujuje sitade ijyamo abantu 5,000 mu Buhinde. Ubu nta muntu wakwirengagiza intebe Afrobeats iriho ku rwego rw’isi.”

Rema yatangaje ibi nyuma yo gusohora Extended playlist yise “Ravage” igizwe n’indirimbo eshanu mu gihe kandi afite izindi ndirimbo z’abahanzi mpuzamahanga benshi bakomoka muri Amerika batari bashyira hanze.

Rema yatangaje ko ariwe sezerano rishya muri Bibiliya ya Afrobeats.

Rema yatangaje ko ibyo abantu bamusekaga bamusebya aribyo yuririyeho aba icyamamare.

Perezida w'Ubudage yavuze ko atewe 'isoni' n'ibikorwa by'ubugome bukabije igihugu cye cyakoreye Abanya-Tanzania mu gihe cy'ubukoloni.

Abasirikare b'Ubudage bishe abantu hafi 300,000 mu gihe cy'ubwigomeke bw'umutwe wa Maji Maji mu ntangiriro y'imyaka ya 1900, bwabaye zimwe mu mvururu zo kurwanya ubukoloni ziciwemo abantu benshi cyane.

Perezida w'Ubudage Frank-Walter Steinmeier yabivuze ku wa gatatu ari mu nzu ndangamurage y'i Songea, mu majyepfo ashyira uburengerazuba bwa Tanzania, aho izo mvururu zabereye.

Yagize ati: 'Ndifuza gusaba imbabazi kubera ibyo Abadage bakoreye abakurambere banyu hano.

'Ibyabereye hano ni amateka dusangiye, amateka y'abakurambere banyu n'amateka y'abakurambere bacu mu Budage.'

Amakipe abiri ahagarariye u Rwanda mu ijonjora ryo gushaka itike ya itike ya “FIBA Africa Women’s Basketball League 2023”, APR WBBC na REG WBBC yageze muri 1/4 cy’iri jonjora ririmo kubera mu Rwanda.

Ejo hashize ku wa Gatatu tariki ya 1 Ugushyingo ni bwo habaye imikino ya nyuma y’amatsinda aho yasize hamenyekanye amakipe yageze muri 1/4.

Ntabwo APR byagiyendekeye neza kuko yasoje itsindwa na Equity Bank yo muri Kenya amanota 63-56.

Nyamara niyo yari yatangiye neza itsinda agace ka mbere ku manota 14 ku 9 agace ka kabiri Equity Bank yagerageje kugabanya ikinyuranyo maze itsinda 16-15. Amakipe yagiye kuruhuka APR ifte 29 kuri 25.

Iyi kipe y’Ingabo z’Igihugu ibintu byayigoye mu gace ka gatatu aho bayitsinze 22-13 bakanayisubira mu gace ka nyuma 16-14 umukino urangira ari 56-63 ya Equity Bank.

Equity Bank niyo yazamutse iyoboye itsinda A n’amanota 6, APR ifite 5 ni mu gihe Gradiators y’i Burundi yazamukanye 4 na Vijana Queens ya Tanzania izamukana 3.

REG WBBC nta kosa yakoze kuko yatsinze JKL Lady Dolphins yo muri Uganda amanota 66-65 mu mukino usoza itsinda B.

REG WBBC yatangiye neza agace ka igatsinda amanota 13-9, aya makipe yaje kunganya amanota 20-20 mu gace ka kabiri bajya kuruhuka 33 ya REG kuri 29 ya JKL Lady Dolphins.

REG yaje gutakaza agace ka gatatu ku manota 22-11 gusa nayo yaje gutsinda agace ka nyuma ku manota 22-14 umukino urangira yegukanye intsinzi ku manota 66-65.

KPA yo muri Kenya niyo yazamutse iyoboye itsinda B n’amanota 8, REG ya kabiri ifite 7, JKL Lady yazamutse ifite amanota 6, Nile Legends yazamukanye 5 ni mu gihe JKT Stars yo muri Tanzania ya nyuma muri iri tsinda yahise isezererwa.

Imikino ya 1/4 irakinwa uyu munsi saa 12h00′ Nile Legends ikina Equity Bank, saa 14h30′ Vijana Queens irakina na Kenya Port Authority.

Saa17h00′ JK Lady yo muri Uganda iracakirana na APR WBBC ni mu gihe saa 19h00′ Gratiators y’i Burundi iri bukina na REG WBBC.

Uruganda rwenga ibinyobwa bisembuye n’ibidasembuye, Skol Brewery Ltd (SBL), rusanzwe rumenyerewe muri Siporo nk’umuterankunga wa Rayon Sports, rwatanze ubwisungane mu kwivuza 'Mutuelle de Santé' bw’umwaka wa 2023/24 ku bantu 842 batishoboye.

Iki gikorwa cyabereye ku cyicaro cya yo kiri mu Nzove ejo hashize ku wa Gatatu, tariki ya 1 Ugushyingo 2023.

Kuri iyi nshuro uru ruganda rwongereye umubare w’abaturage rwishyuriye Ubwisungane mu kwivuza aho rwishyuriye abaturage 842 bo mu miryango 185 bavuye ku bantu 596 bo mu miryango 123 uru ruganda rwari rwishyuriye umwaka ushize.

Abahawe ubu bwisungane ni abaturiye aho SKOL ifite ibikorwa byayo mu Kagari ka Nzove, Umurenge wa Kanyinya, mu Karere ka Nyarugenge kari muri dutatu tugize Umujyi wa Kigali.

Buri mwaka, kuva mu myaka itanu ishize, SKOL itanga ubwishingizi mu kwivuza kuri imwe mu miryango itishoboye, ndetse kuri ubu imaze gufasha abagera ku 3350.

Abaturage bahawe ubu bwisungane, bashimiye uru ruganda uburyo rubazirikana, na bo bemeza ko ahasigaye ari ahabo mu kugira uruhare mu iterambere ry’Igihugu kuko ubuzima bwabo bushinganye.

Umunyamabanga Nshingwabikorwa w’Akagari ka Nzove, Kabasha Ignace, yavuze ko kuba abaturage bahabwa ubu bwisungane mu kwivuza n’uruganda rwa SKOL ari amahirwe bagize.

Ati 'Ni amahirwe abaturage b’aka Kagari ka Nzove ndetse n’abaturiye uru ruganda rwa SKOL bafite, kugira uruganda nk’uru rwenga inzoga ariko rukanatekereza ku mibereho n’ubuzima bw’abaturage cyane cyane abatishoboye. Ntako bisa'

Eric Gilson uyobora Uruganda rwa SKOL, yavuze ko ubuzima bwiza bw’abaturage ari inking ya mwamba mu iterambere ry’igihugu ari nayo mpamvu bazakomeza kubafasha uko bashoboye.

Ati 'Tuzi neza ko sosiyete ifite ubuzima bwiza ari ibuye ry’ifatizo ku bukungu, gufasha abantu gutunga imiryango yabo no kugira uruhare mu iterambere ry’igihugu. Ibyo twiyemeje by’igihe kirekire bigaraaza ubushake bwacu mu kuzamura u Rwanda.'

Uretse gutanga ubwisungane mu kwivuza, uru ruganda rwagiye rugira kandi uruhare mu bindi bikorwa bizamura Abanyarwanda birimo kugurira impuzankano abana biga ku Ishuri ribanza rya Nzove no gutanga ibiribwa [umuceri] ku baturage bamwe ubwo icyorezo cya COVID-19 cyari cyarakajije umurego. Hari kandi guha akazi abatuye hafi y’uru ruganda bangana na 60% by’abakozi bayo [bagera muri 300].

Mu bindi bikorwa harimo kuba uru ruganda rwarahaye Guverinoma y’u Rwanda inkunga y’udupfukamunwa n’amafaranga mu guhangana n’icyorezo cya COVID-19, umushinga wa SKOL FXB Village wamaze imyaka ine ufasha imiryango 60 (abantu 434) mu kwikura mu bukene;

Gahunda yo kwimenyereza umwuga mu gihe cy’amezi atandatu ku banyeshuri beza basoje Icyiciro cya Kabiri cya Kaminuza, gutanga 'bourse’ ku bana b’abakozi ba SKOL, gushyigikira Umuryango utari uwa Leta wa Gira Impuhwe ufasha abatishoboye n’imiryango ifite abarwayi b’agakoko gatera SIDA, kugira uruhare mu iyubakwa ry’ibibuga n’amarushanwa muri Kaminuza ya UTAB, n’ibindi.

Abaturage bari baje ari benshi

Umuyobozi w’Akagari ka Nzove n’Umuyobozi wa Skol, Eric Gilson

Eric Gilson yavuze ko bazakomeza gukora ibishoboka byose ngo bafashe abaturage

Karim ushinzwe itumanaho n’itangazamakuru muri Skol n’umuyobozi w’uru ruganda mu Rwanda, Eric Gilson