Category: Uncategorized

Zahabu y’Uwiteka yavuze ko iyi ndirimbo yaje mu buryo bw’isengesho ikaba n’inkuru mpamo dore ko yashibutse mu burwayi bukomeye bw’umwe mu bantu be ba hafi.

Ati ”Nari mfite umuntu wari urwaye umugongo kandi mbona arembye hanyuma Imana iramusura imwuzuza mwuka wera ahita akira.”

Yavuze ko nyuma y’uko uwo muntu akize ubu burwayi, hasigaye kwibaza ngo '’Ese umugati wo urava he ?”

Muri uko kwibaza iki kibazo niho iyi ndirimbo yamanutse mu isengesho akaba yarabwiraga Imana ati ”Twarakubonye bwa mbere, waritamuruye ukiza uriya murwayi nk’uko n’igihe cya Elia witamuruye umanuka mu muriro utwika igitambo bituma abahanuzi ba Baali baneshwa.”

Muri iri sengesho yabwiraga Imana ngo ihe uburyo bw’imibereho uyu muntu warumaze gukira uburwayi bukomeye bw’Umugongo.

Muri iyi ndirimbo Aline agira ati ”Kuguhamagara ntibisaba kwikebagura tukiguhamagara uratwitaba uwera ukiranuka niryo zina ryawe ongera wivuge turusheho kukwizera.
Ongera wivuge ko uri Imana ongera wivuge bitume turushaho kukwizera ongera wiyerekane data bitumen turushaho kukwizera.”

Aline Uwera ni Umwe mu bahanzi bazanye impinduka mu muziki wo kuramya no guhimbaza Imana. Uyu muramyi akaba asohoye indirimbo ya Kabiri doreko hasahize ibyumweru 2 gusa asohoye indirimbo ya 1 yise ”Wicogora”.

Aline Uwera ni umuramyi ubarizwa i Nyamata mu Karere ka Bugesera, mu Ntara y’Iburasirazuba, akaba asengera muri ADEPR Nyamata. Si mushya mu muziki kuko yaririmbye mu makorali arimo Faradja Choir ya ADEPR Kimihurura, gusa ni bwo bwa mbere ashyize hanze indirimbo ye bwite.

Zahabu yinjije abantu mu minsi mikuru neza

Ni indirimbo yakomoye ku nkuru mpamo y’uburwayi

Source : http://isimbi.rw/umuramyi-aline-uwera-uzwi-nka-zahabu-y-uwiteka-yasohoye-indirimbo-yakomoye-ku.html

Ykee Benda, yatangaje ku mugaragaro ko adafite aho ahuriye n’amagambo amaze iminsi amuvugwaho ku mbuga nkoranyambaga, amushinja gushyigikira iyicarubozo n’ihohoterwa rikorerwa abanyapolitiki batavuga rumwe n’ubutegetsi bwa Perezida Museveni.

Mu butumwa yashyize ku rukuta rwe rwo ku rubuga rwa X, Wycliffe Tugume uzwi cyane ku izina rya Ykee Benda yagaragaje impungenge n’agahinda yatewe no kubona hari ibitangazamakuru by’umwihariko ibikorera kuri murandasi byatangaje ibyo atigeze avuga, anibaza impamvu abantu bashobora kwandika inkuru batabanje gutohoza inkomoko yazo.

Yashimangiye ko we ubwe, cyangwa se undi wese mu bamufasha mu kazi ke, nta na rimwe bigeze bashyira hanze ayo magambo akomeje kuvugwa.

Itsinda rireberera inyungu ze naryo ryahise risohora itangazo risobanura neza uko ibintu byagenze.

Muri iryo tangazo, bwavuze ko hari ibinyamakuru birimo Pulse Uganda na Galaxy TV byasohoye amakuru atariyo, maze busaba imbabazi abaturage bose ku bw’icyo bwise icengezamatwara zateje urujijo rukomeye.

Ryagize riti 'Nk’abareberera inyungu za Ykee Benda, turi gukurikirana ikibazo kugira ngo tumenye uko ayo makuru atariyo yasohotse. Birumvikana ko ayo magambo atashoboraga na gato guturuka kuri Ykee Benda. Turasaba imbabazi ku ngaruka byateye.'

Iryo tangazo ryakomeje rishimangira ko uyu muhanzi w’icyamamare muri Uganda, atajya ashyigikira ihohoterwa iryo ari ryo ryose, kandi ko ibyamuvuzweho bidahagarariye indangagaciro ze nk’umuhanzi cyangwa we nk’umuntu ushyira mu kuri mu buzima busanzwe.

Muri Kamena 2025 ni bwo Perezida wa Uganda Yoweri Museveni yashyize umukono ku itegeko rivuguruye rizongera gutuma abasivile baburanishwa mu rukiko rwa gisirikare mu bihe bimwe na bimwe.

Ariko nyuma yaho, umukuru w’abatavuga rumwe n’ubutegetsi, Bobi Wine, yumvikanye yemeza ko iryo tegeko riri gukoreshwa mu kumukorera iyicarubozo hamwe na bagenzi be nk’uko yabibwiye ibiro ntaramakuru by’Abafaransa.

Ati “Twese abatavuga rumwe n’ubutegetsi, iri tegeko rigamije gutuma turashaho guhohoterwa.”

Yakomeje avuga ko inkiko za gisirikare zikoreshwa n’ubutegetsi mu gucecekesha abatavuga rumwe na bwo.

Ykee Benda yigaramye ibyo gushyigikira iyacurubozo yashinjwaga

Source : http://isimbi.rw/ykee-benda-yigaramye-ibyo-gushyigikira-iyacurubozo-yashinjwaga.html

Mu myaka 36 ishize, ku itariki nk'iyi, Alfredo Di Stéfano yanditse amateka adasanzwe mu mupira w'amaguru, aba umukinnyi wa mbere kandi kugeza ubu akaba ari we wenyine watsindiye Super Ballon d'Or. Iki gihembo cyihariye cyatanzwe na France Football mu 1989, kigamije guhemba umukinnyi wagaragaje urwego rudasanzwe mu myaka 30 yari ishize icyo gihe.

Super Ballon d'Or si Ballon d'Or isanzwe, ahubwo ni igihembo kidasanzwe gihabwa umukinnyi mwiza kurusha abandi bose mu bihe bitatu by'imyaka icumi (decades). Alfredo Di Stéfano yagihawe bitewe n'umusanzu we ukomeye mu mupira w'i Burayi, by'umwihariko muri Real Madrid, aho yafashije iyi kipe kwegukana ibikombe byinshi bya Champions League mu bihe bya mbere by'iri rushanwa.

Mu gihe havugwa ko ishobora kongera gutangwa mu mwaka wa 2029, igamije guhemba umukinnyi wahize abandi mu myaka 30 iri hagati ya 2000 na 2029, impaka zirakomeje. Abakunzi b'umupira w'amaguru bibaza uti: 'Ni nde wakwemererwa kuba umukinnyi w'ibihe byacu?'

Amazina nka Lionel Messi na Cristiano Ronaldo akunze kugarukwaho cyane. Messi azwiho impano idasanzwe, Ballon d'Or nyinshi, ibikombe bya Champions League n'Igikombe cy'Isi yatwaye mu 2022. Ku rundi ruhande, Cristiano Ronaldo yigaragaje nk'umukinnyi w'intangarugero mu makipe atandukanye no mu bihugu bitandukanye, anatsinda ibitego byinshi mu mateka.

Nubwo impaka zikomeza, zigaruka rya Super Ballon d'Or ryaba ari ikintu gikomeye mu mateka y'umupira w'amaguru, kikongera guha agaciro abakinnyi bagize ibihe byacu amateka adasubirwaho.

Source : https://kasukumedia.com/igihembo-super-ballon-dor-kigarutse-ninde-wakwegukana-iki-gihembo/

Tiamo Lounge ikomeje kwigaragaza nk'igicumbi cy'imyidagaduro i Kigali, aho ikurura imbaga y'abakunzi b'umuziki n'imbyino bifuza kwidagadura mu buryo buhanitse. Kuri uyu wa Gatanu tariki ya 26 Ukuboza 2026, ku munsi wa Boxing Day, iyi lounge iraba ihagaze neza yakira ibirori bikomeye byitezweho kuzana ibyishimo n'udushya twinshi.

Guhera saa kumi n'ebyiri z'umugoroba (6:00 PM), Tiamo Lounge iraba yuzuye, imbyino zidasanzwe n'umwuka w'ibirori utajya wibagirana kuri bo dore ko na serivisi ari ibintu byabo. Abahanzi n'abavanga imiziki (DJs) barasusurutsa abaraba biitabiriye ni Chelina Doll, umunyabigwi ku rwego mpuzamahanga uzwiho guhuza Afro House n'imiziki ya Electronic nk'umu-hoster, afatanyije na DJ Caspi, umwe mu bakunzwe mu gihugu cy'u Rwanda ndetse no hanze yarwo kubera uburyo ashyushya abantu ku rubyiniro mu buryo bwo kuvanga imiziki.

Si ibyo gusa, kuko Lou na Inno na bo baraba bahari bongera umwihariko muri iri joro, bashyira abitabiriye mu mwuka wo kwizihiza Boxing Day mu buryo bwihariye. Ibi birori bitegerejwe n'abantu b'ingeri zose, yaba abakunzi b'umuziki mu buryo bwo kubyina, abakunda gusohokana n'inshuti, ndetse n'abashaka gusoza iminsi mikuru bishimye.

Tiamo Lounge yiyemeje gutanga serivisi yo ku rwego rwo hejuru, harimo ibinyobwa byiza, n'ibyo kurya by'amoko atandukanye, no kuba bafite ahantu heza ho kwidagadurira. Ku munsi wa Boxing Day, nta handi wakwifuza kuba uri uretse 'Tiamo Lounge', aho umuziki, imbyino n'ibyishimo biraza guhurira bikabyara ijoro ritazibagirana.

Source : https://kasukumedia.com/tiamo-lounge-irahinduka-isibaniro-rikomeye-kuri-uyu-munsi-wa-boxing-day/

Mu gihe mu myaka yashize umunsi mukuru wa Noheri warangwaga n'ibyishimo byinshi, gusangira no guhuriza hamwe imiryango n'inshuti, kuri ubu hari abaturage batandukanye bavuga ko Noheri y'uyu mwaka itizihijwe nk'uko byari bisanzwe abantu bari basanzwe bamenyereye.

Ku wa Kane, Abakirisitu hirya no hino ku Isi bizihije umunsi mukuru wa Noheri wizihizwa nk'umunsi w'ivuka rya Yesu Kirisitu, umucunguzi w'Isi. Ubusanzwe, uyu munsi uba ari amahirwe yo kongera gukomeza umubano w'imiryango, gusangira no kwifurizanya amahoro n'imigisha mu gihe cyo gusoza umwaka.

Icyakora, bamwe mu baturage bagaragaza ko uyu mwaka ibintu byahindutse, aho bavuga ko ubukungu bwifashe nabi ku buryo byatumye Noheri ibabera nk'umunsi usanzwe. Mu bice bimwe by'igihugu, cyane cyane mu Majyepfo, abaturage bavuga ko icyorezo cy'amapfa cyagize ingaruka zikomeye ku musaruro wabo, bituma babura ibiribwa bihagije ndetse n'amafaranga yo kwizihiza uyu munsi mukuru.

Mu Karere ka Rubavu, bamwe mu baturage baganiriye na Kasuku Media bavuga ko nta bidasanzwe babonye kuri iyi Noheri. Bavuga ko n'ubusanzwe ibikorwa by'ubucuruzi bitigeze bigenda neza, aho amafaranga yabaye make bigatuma abaturage badashobora kugura ibyo kwishimana nk'uko byari bisanzwe mu yindi myaka.

Aba baturage bavuga ko icyifuzo cyabo ari uko ubukungu bwazahuka, ubuhinzi bugatera imbere, bityo mu minsi iri imbere iminsi mikuru ikazongera kwizihizwa mu byishimo no mu buryo bwari busanzwe.

Source : https://kasukumedia.com/noheri-yabaye-nkiminsi-isanzwe-abatuye-rubavu-bavuga-ko-itizihijwe-nkuko-byari-bisanzwe/

Umuhanzi Ngabo Medard Jobert, uzwi cyane ku izina rya Meddy, ari mu bahanzi b'Abanyarwanda bakomeje kugirana umubano udasanzwe n'abakunzi babo, by'umwihariko binyuze mu ndirimbo.

Mu gihe Isi yose yari iri mu byishimo byo kwizihiza Noheri, ku wa Kane tariki ya 25 Ukuboza 2025, Meddy na we ntiyibagiwe gusangiza abakunzi be ibyishimo bye, abinyujije ku mbuga nkoranyambaga, cyane cyane kuri Instagram.

Uyu muhanzi yasangije abamukurikira amafoto ari kumwe n'umuryango we, ayaherekeza ubutumwa bwo gutuma buri wese yitekerezaho, abaza abakunzi be icyo bashimira Imana cyane muri iyi minsi mikuru. Yagize ati: 'Ndashaka kubumva ni iki ushimira Imana cyane kuri iyi Noheri?'

Mu magambo yagaragazaga urukundo n'icyubahiro afitiye abafana be, Meddy yashimiye abakomeje kumuba hafi mu rugendo rwe rwa muzika n'ubuzima muri rusange, avuga ko yumva abafitiye ideni rikomeye ry'urukundo n'ubwitange bagiye bamugaragariza.

Yagize ati: 'Ndabashimira cyane mwese twabanye hano. Mbafitiye ideni rikomeye, kandi mu mwaka utaha nzaryishyura birenze uko mwabitekerezaga, harimo n'inyungu.'

Aya magambo ya Meddy yakiriwe neza n'abakunzi be, benshi bayafata nk'isezerano ry'ibikorwa byiza n'imishinga mishya azabagezaho mu mwaka wa 2026, by'umwihariko mu muziki wo kuramya no guhimbaza Imana amaze kwinjiramo byimazeyo.

Source : https://kasukumedia.com/meddy-yasezeranyije-abakunzi-be-ko-agiye-kubishyura-ideni-yarabafitiye/

Bamwe mu bacuruzi b'amakara bo mu Karere ka Nyamasheke baravuga ko babangamiwe n'icyemezo cyafashwe n'ubuyobozi bw'ako Karere kababuza kongera gutwara amakara mu bwato banyuze mu Kiyaga cya Kivu. Ibi byemezo byatumye bamwe muri bo bagira igihombo gikomeye, bavuga ko ubucuruzi bwabo bwahungabanye kuko amakara yabo atakibona uko agera ku masoko nk'uko byari bisanzwe.

Aba bacuruzi bavuga ko gutwara amakara banyuze mu kiyaga byari uburyo bworoshye kandi buhendutse ugereranyije no kuyanyuza mu muhanda, cyane cyane ku baturuka mu bice by'icyaro biri kure y'imihanda minini. Bamwe muri bo bavuga ko bari basanzwe bacuruza mu Rwanda imbere, cyane cyane mu turere two mu Burengerazuba, bityo bakabona ko icyemezo cyafashwe kitabahaye umwanya uhagije wo kwisobanura.

Ku rundi ruhande, ubuyobozi bw'Akarere ka Nyamasheke bwatangarije Kasuku Media ko iki cyemezo cyafashwe hagamijwe kurwanya magendu. Bwavuze ko hari amakuru yizewe agaragaza ko bamwe mu bacuruzi bakoreshaga ubwato banyuze mu Kiyaga cya Kivu, aho kujyana amakara yabo ku masoko yo mu Rwanda, bakayohereza mu gihugu cya Repubulika Iharanira Demokarasi ya Congo (RDC) mu buryo bunyuranyije n'amategeko.

Ubuyobozi bwakomeje buvuga ko iki cyemezo kigamije kurinda umutungo kamere w'igihugu no gukumira ubucuruzi butemewe bwambukiranya imipaka. Bwanasobanuye ko hari gushakwa ubundi buryo bwatuma ubucuruzi bukorwa mu buryo bwubahiriza amategeko, ariko budahungabanya imibereho y'abacuruzi b'amakara. Aba bacuruzi bo barasaba ko habaho ibiganiro byimbitse kugira ngo haboneke igisubizo gihuriweho n'abacuruzi b'amakara.

Source : https://kasukumedia.com/abacuruzi-bamakara-barasaba-ibisobanuro-ku-cyemezo-cyo-kubuzwa-kuyatwara-mu-kiyaga-cya-kivu/

Umuhanzi w’irindirimbo zo kuramya no guhimbaza Imana, Israel Mbonyi yongeye gukora amateka yuzuza Kigali Arena ku nshuro ya kane yikurikiranya.

Mu ijoro rya Noheli tariki ya 25 Ukuboza 2025, Israel Mbonyi yakoraga igitaramo ‘Icyambu 4’, aho abantu bakubise bakuzura.

Nk’uko byagenze mu bitaramo bitatu byabanje (yatangiye gutegura ibi bitaramo muri 2022), no kuri iyi nshuro yongeye kuzuza Kigali Arena muri iki gitaramo cy’amateka.

Israel Mbonyi umwe mu bahanzi bakunzwe cyane yakoze iki gitaramo nyuma y’uko 5 Ukwakira 2025 yamuritse album ye ya gatanu yise 'Hobe’ igizwe n’indirimbo 14 ziri mu ndimi eshatu zirimo Ikinyarwanda, Icyongereza n’Igiswahili mu gitaramo cyabereye muri Intare Conference Arena.

Imiryango yafunguwe saa 16h mu gihe igitaramo cyari giteganyijwe gutangira saa 18h, saa 19h46′ ni bwo Israel Mbonyi yinjiye ku rubyiniro.

Uyu muhanzi yahereye ku ndirimbo ye Uri Yaaa yakiranywe urugwiro rwinshi, abantu ntibaba bongeye kwicara kubera kuryoherwa n’igitaramo.

Yakurikijeho indirimbo ‘Yaratwimanye’ abantu bari muri Kigali Arena, barasimbuka ibintu bihindurira isura.

Yakurikijeho ‘Ku Migezi’, ‘Ku Marembo Y’Ijuru’, “Ndakubabariye”, 'Unkebuke’, ‘Ndakubabariye’, “Ndashima”, ‘Urwo Rutare’, ‘Nzibyo Nibwira’.

Israel Mbonyi yafashe akaruhuko agaruka ku rubyiniro saa 22:06′, ni nyuma y’iminota hafi 35 Pasiteri Ruhimbya Aaron yigisha ijambo ry’Imana.

Yaririmbye indirimbo 'Hobe’ yitiriye Album ye ya gatanu yamuritse mu Ukwakira uyu mwaka.

Yaririmbye kandi 'Ibihe', 'Karame', “Sitamuaca”, “Sinzibagirwa”, ‘Nina Siri’ yahinduye ibintu muri Arena.

Yahise akurikizaho indirimbo “Baho” mbere yo kuririmba “Number One” yitiriye Album ye ya mbere yamuritse mu 2014.

Yaririmbye indirimbo ‘Icyambu’ yitiriye iki gitaramo ni mu gihe iki gitaramo kitabiriwe n’ibyamamare bitandukanye birimo Mutesi Scovia, Intore Massamba, Muyoboke Alex, Kevin Kade n’abandi yagisoje saa 00:07′ zo ku wa 26 Ukuboza 2025, yagisoroje ku ndirimbo “Hari Ubuzima”.

Yakoze igitaramo cy’amateka

Arena yari yuzuye…

Muyoboke Alex na Massamba Intore bari bahari

Mutesi Scovia yacinye akadiho biratinda

Bafashijwe

Bamporiki Edouard na we yitabiriye iki gitaramo

Source : http://isimbi.rw/israel-mbonyi-yongeye-kuzuza-arena-ku-nshuro-ya-4-reba-uko-ibyamamare.html

Polisi y'u Rwanda irashishikariza abagenzi bafite ingendo zerekeza mu ntara muri ibi bihe by'iminsi mikuru kwitwararika no gutegura ingendo zabo hakiri kare, birinda gutinda no guhurira mu muvundo ugaragara cyane mu mpera z'umwaka. Ibi ni mu gihe umubare w'abagenda wiyongera, cyane cyane abava mu Mujyi wa Kigali berekeza mu ntara zitandukanye z'Igihugu.

Abayobozi muri Polisi bavuga ko kimwe mu bibazo bigaragara muri ibi bihe ari uko bamwe mu bagenzi batinda kugera aho bategera imodoka, bigatuma bahura n'ingorane zo kubona izibajyana aho bagana. Bagaragaza ko ari ngombwa ko umugenzi amenya neza aho ategera imodoka ijyanye n'icyerekezo cye, kuko buri terminal cyangwa parikingi iba ifite aho imodoka zijya mu ntara runaka zihagarara.

Polisi y'Igihugu cy'u Rwanda yakomeje gusaba abagenzi kuzinduka kare, bakihanganira gahunda zo kugenzura umutekano, kandi bakirinda kugenda bihutira kwinjira mu modoka zitujuje ibisabwa. Abatwara abagenzi nabo basabwa kubahiriza amategeko y'umuhanda, birinda gutwara birenze umubare wemewe, umuvuduko ukabije n'imyitwarire ishobora gushyira ubuzima bw'abantu mu kaga.

Abaturage barasabwa kandi kwirinda gutwarwa n'abantu batemewe cyangwa imodoka zitanditse, ndetse bagatanga amakuru ku gihe mu gihe babonye ikintu cyahungabanya umutekano. Polisi y'u Rwanda yizeza abagenzi ko umutekano usesuye wateguwe mu gihugu hose, hagamijwe ko iminsi mikuru yizihizwa neza, ingendo zikaba amahoro, kandi nta mpanuka cyangwa akajagari gakomeye kagaragara mu mihanda.

Source : https://kasukumedia.com/polisi-yu-rwanda-yagiriye-inama-abagenzi-bakora-ingendo-muri-iyi-minsi-mikuru/

Muri iri joro ryo kuri uyu wa Gatatu tariki 25 Ukuboza 2025, Tiamo Lounge hahindutse isoko y'ibyishimo n'imyidagaduro, ubwo bimwe mu byamamare bikomeye mu muziki nyarwanda byahuriraga aho biri kwizihiza umunsi mukuru w'ivuka rya Yesu Kristu, uzwi nka Noheli.

Abahanzi b'indirimbo, barimo Alyn Sano, Deejay Pius, Bushali n'abandi batandukanye bamenyekanye cyane mu ruganda rw'imyidagaduro barimo General Benda, Dj Caspi n'abandi, bagaragaye muri iyi Lounge bishimira umunsi mukuru w'ivuka rya Yesu mu buryo budasanzwe. Tiamo Lounge hitezwe ko haraba hari umunezero, indirimbo nziza n'ubusabane nk'ibisanzwe.

Tiamo Lounge yiteguye iki gikorwa mu buryo bujyanye n'igihe, aho abayigannye bakomeje guhabwa serivisi zitandukanye zirimo ibinyobwa byujuje ubuziranenge, umuziki uvangwa n'abahanga mu kuvanga imiziki (DJs), ndetse n'ahantu hameze neza hahuriza abantu hamwe mu ituze n'ibyishimo. Ibi ni bimwe mu bikomeje gutuma Tiamo lounge hahitwamo nk'ahantu heza ho kumarana ibihe byiza n'abawe iminsi mikuru nka Noheli.

Kuba ibyamamare byahisemo kwizihiriza uyu munsi mukuru muri iyi Lounge bikomeje gushimangira izina rya Tiamo Lounge nk'ahantu h'icyitegererezo mu myidagaduro yo muri uyu Mujyi wa Kigali, by'umwihariko ku minsi mikuru n'ibirori byihariye.

Source : https://kasukumedia.com/kuri-ubu-abahanzi-barimo-alyn-sano-bushali-deejay-pius-bagiye-gutaramira-i-tiamo-lounge/