Webrwanda Backend

Category: Uncategorized

  • Rutahizamu wa APR FC FC yahigitse abarimo Luvumbu yegukana igihembo cy’umukinnyi w’ukwezi #rwanda #RwOT

    Rutahizamu wa APR FC, Victor Mboama yahigitse abakinnyi barimo Héritier Nzinga Luvumbu wa Rayon Sports yegukana igihembo cy’umukinnyi w’ukwezi.

    Ni ibihembo byatanzwe uyu munsi ku wa Kabiri tariki ya 16 Mutarama 2024 ubwo hahebwaga umukinnyi witwaye neza mu kwezi k’Ukuboza 2023.

    Igihembo cy’umukinnyi w’ukwezi cyari gihanganiwe na Victor Mbaoma wa APR FC, Héritier Nzinga Luvumbu wa Rayon Sports, Hakizimana Muhadjiri wa Police FC na Bigirimana Abedi wa Police FC.

    Cyaje kwegukanwa na rutahizamu wa APR FC, Victor Mboama akaba yahembwe miliyoni y’amafaranga y’u Rwanda.

    Hahembwe kandi igitego cy’ukwezi aho ibitego 4 ari byo byari bihanganye. Igitego cya mbere Hakizimana Muhadjiri yatsinze Musanze FC muri 3-0 bayitsinze tariki ya 12 Ukuboza, igitego Kategeya Elie wa Mukura VS (ubu yamaze kugurwa na APR FC) yatsinze Gasogi United mu mukino bayitsinze 4-2 tariki ya 9 Ukuboza 2023. Igitego umunya-Ghana ukinira Mukura VS, Samuel Pimpong yatsinze Kiyovu Sports tariki ya 6 Ukuboza 2023 mu mukino bayinyagiyemo 4-1 ndetse n’igitego Sharif Bayo wa Kiyovu Sports yatsinze Rayon Sports tariki ya 12 Ukuboza 2023 mu mukino banganyije 1-1. Kategeya Elie ni we waje kwegukana iki gihembo ahigitse bagenzi be.

    ‘Save’ y’ukwezi, iki gihembo cyari gihanganiwe n’umunyezamu wa Kiyovu Sports, Nzeyurwanda Jimmy Djihad iyo yakoze ku mukino wa Rayon Sports, Niyonkuru Pascal wa AS Kigali ku mukino wa Rayon Sports, Sebwato Nicholas wa Mukura VS ku mukino wa AS Kigali ndetse na Simon Tamale wa Rayon Sports ku mukino wa AS Kigali. Nzeyurwanda Djihad ni we waje kwegukana iki gihembo.

    Igihembo cy’umutoza w’ukwezi kikaba cyegukanywe na Mashami Vincent wa Police FC.

    Yari agihanganiye na Thierry Froger wa APR FC, Afahmia Lotfi wa Mukura VS ndetse na Habimana Sosthene wa Musanze FC.

    Kategeya igitego cye cyabaye icy’ukwezi

    Uwatsindiye ‘Save’ y’ukwezi

    Umutoza w’ukwezi

    Umukinnyi w’ukwezi

    Source : http://isimbi.rw/siporo/article/rutahizamu-wa-apr-fc-fc-yahigitse-abarimo-luvumbu-yegukana-igihembo-cy-umukinnyi-w-ukwezi

  • Abakinnyi ba Rayon Sports mu myitozo ya nyuma mu gihe habura iminota micye ngo bakine umukino wa mbere mu gukuramo mu gikombe cy’Amahoro (AMAFOTO na VIDEWO) – YEGOB #rwanda #RwOT

    Rayon Sports igiye gucakirana na Interforce FC mu mukino ubanza wa 1/8 cy'Igikombe cy'Amahoro.

    Ni umukino ugiye kubera kuri Kigali Pelé Stadium kuri uyu wa Kabiri tariki 16 Mutarama 2024. Abakinnyi Gikundiro igiye kubanze mu kibuga.

    #Here2DefendThe🏆

    🔥🔥Ready to fight!!! 🔥🔥 pic.twitter.com/OGpKu1dEqQ

    — Rayon Sports Official (@rayon_sports) January 16, 2024

    Source : https://yegob.rw/abakinnyi-ba-rayon-sports-mu-myitozo-ya-nyuma-mu-gihe-habura-iminota-micye-ngo-bakine-umukino-wa-mbere-mu-gukuramo-mu-gikombe-cyamahoro-amafoto-na-videwo/

  • U Rwanda rwasoje imyitozo ya nyuma, rwiteguye gukora amateka (AMAFOTO) #rwanda #RwOT

    Ikipe y’igihugu ya Handball isoje imyitozo ya nyuma yitegura umukino wa mbere w’igikombe Cy’Afurika kizatangira ku munsi w’ejo rukina na Cape Verde muri.

    Ni imyitozo yabaye saa 14h00′ ibera muri Gymnase ya mbere ya Cairo Stadium yakira abantu ibihumbi 20 akaba ari na yo u Rwanda ruzakiniraho na Cape Verde ejo saa 14h00′.

    Abakinnyi bose uko ari 18 u Rwanda rwahagurukanye bakaba bameze neza, bariteguye nta n’umwe ufite ikibazo cy’imvune.

    Umutoza Bagirishya Anaclet, yavuze ko bameze neza kandi biteguye gukora amateka.

    Ati “imyitozo yose yageneze neza, turayisoje kugeza aka kanya nta mvune dufite abakinnyi bameze neza, biteguye ejo gutangira igikombe cy’Afurika kugira ngo banakore amateka mashya ku Rwanda kuko ari ubwa mbere tugiye gukina iki gikombe.”

    Yakomeje avuga ko nubwo Cape Verde ari ikipe nziza ariko na none itabateye ubwoba.

    Ati “ntabwo Cape Verde ifite amateka hambaye muri iri rushanwa, ni ku nshuro ya 3 igiye kwitabira ariko inshuro zose 2 yajemo zabanje, yaje itungurana ikora ibidasanzwe, natwe rero birashoboka ko dushobora gukora ibidasanzwe tukagira amateka twubaka.”

    Anaclet yavuze ko bagize amahirwe yo kureba imikino ya Cape Verde yaba amarushanwa ndetse n’imikino ya gicuti, bagerageje kwiga amayeri yabo akaba yizeye ko ejo abakinnyi biteguye kuyitsinda.

    Iki gikombe kigiye kuba ku nshuro ya 26 kizatangira tariki ya 17-27 Mutarama 2024, kizabera muri Gymnase 2 zose ziri muri Cairo Stadium

    U Rwanda ruri mu itsinda rimwe na Zambia, Cape Verde ndetse na Repubulika Iharanira Demokarasi ya Congo.

    Source : http://isimbi.rw/siporo/article/u-rwanda-rwasoje-imyitozo-ya-nyuma-rwiteguye-gukora-amateka-amafoto

  • Israel Mbonyi, The Ben na Bruce Melodie; Ni b… – #rwanda #RwOT

    Iriya gahunda irangwa n'ibikorwa binyuranye birimo no gusabana. Iyo uraranganyije amaso mu bahanzi baririmbye mu birori bya Rwanda Day; bigaragaza ko bagiye babahitamo bashingiye cyane ku bikorwa byabo byabaga bigezweho n'indirimbo zitsa cyane ku muco Nyarwanda, zinagaruka ku gihugu.

    Tariki 3 Ukwakira 2015, Rwanda Day yabereye mu Buholandi, icyo gihe ibirori byasururukijwe n'abahanzi barimo Teta Diana, King James, Masamba Intore, Muyango Jean Marie usanzwe ari umwe mu batoza b'itorero ry'Igihugu, Julienne Gashugi, umukirigitananga Sofia Nzayisenga, Meddy ubarizwa muri Amerika, Ben Kayiranga wamamaye mu ndirimbo 'Freedom', Thierry Haguma na Nyiratunga Alponsine.

    Ku wa 10 Kamena 2017, Rwanda Day yabereye mu Mujyi wa Bruxelles mu Bubiligi. Icyo gihe Teta Diana na King James bongeye kwisanga ku rutonde rw'abaririmbye muri ibi birori.

    Icyo gihe bahuriye ku rubyiniro na Inki, umuhungu wa Muyango Jean Marie bafatanya na Soul T, umuhanzi Mpuzamahanga w'umunyarwanda ubarizwa mu Bubiligi. Ni ku nshuro ya kabiri, ibi birori byari bibereye muri kiriya gihugu.

    Tariki 5 Ukwakira 2019, Rwanda Day yabereye i Bonn mu Budage. Icyo gihe Massamba Intore yongeye kwisanga ku rutonde rw'abasusurukije Abanyarwanda.

    Yahuriye ku rubyiniro na Kitoko Bibarwa wamamaye mu ndirimbo 'Thank you Kagame', itsinda rya Charly na Nina ryamamaye mu ndirimbo zirimo 'Agatege', Jules Sentore, Bruce Melodie waririmbye bwa mbere muri ibi birori ndetse na Igor Mabano.

    Mbere ya 2017, byasaga n'ibyari byaramenyerewe ko hari amazina y'abahanzi bakomeye atagomba kubura mu baririmba muri ibi birori bya Rwanda Day.

    Abahanzi biganzaga cyane muri ibi bitaramo barimo Alpha Rwirangira, Meddy, The Ben, King James, Teta Diana, Masamba n'itorero Urukerereza.

    Ibi byaje guhinduka muri 2019, ubwo abategura ibirori biherekeza Rwanda binjizagamo amasura mashya Bruce Melodie, Igor Mabano n'itsinda rya Charly&Nina.

    Rwanda Day yatangijwe muri 2011, itangirira mu Mujyi wa Paris mu Bufaransa. Yakomereje mu Mujyi wa Boston muri Leta Zunze Ubumwe za Amerika muri 2012.

    Muri 2013 yabereye i Toronto ho muri Canada, 2014 ibera i Atlanta n'i Dallas, muri 2015 yabereye mu Buholandi, muri 2016 ibera i San Francisco muri Leta Zunze Ubumwe za Amerika naho muri 2017 ibera i Brussels mu Bubiligi.

    Muri Rwanda Day yabereye mu Bubiligi muri Kamena 2017, Perezida Kagame yavuze ko aho u Rwanda rugeze byagizwemo uruhare n'abanyarwanda batuye mu mahanga.

    Yavuze ati 'U Rwanda rwacu ni mwe abari hano n'abari mu gihugu n'abari ahandi aho ari ho hose mumaze kurugira igihugu cy'agaciro, gifite agaciro bitari mu karere gusa ahubwo ku Isi hose.”

    Imibare ya Banki Nkuru y'u Rwanda yatangajwe mu 2019, yerekana ko amafaranga Abanyarwanda baba mu mahanga bohereza mu Rwanda yiyongereye ku gipimo cya 158%. Yavuye kuri Miliyoni 98.2 z'amadorali mu 2010 agera kuri Miliyoni 253 z'amadorali mu 2018.

    InyaRwanda igiye kugaruka kuri bamwe mu banyamuziki bashobora kuzaririmba no kuzacuranga mu birori bya Rwanda Day 2024. Hari abamaze kwemezwa, ndetse batangiye no gufashwa kubona ibyangombwa kugira ngo bazabashe kujya muri Amerika.

    Rwanda Day 2024 izaba tariki 02 n’iya 03 Gashyantare 2024, ibere muri Washington DC muri Leta Zunze Ubumwe za Amerika.

    1.Dj Toxxyk

    Ni umwe mu ba Dj bihagazeho mu Rwanda, kuva mu myaka itanu ishize. Kuko yakujije izina rye, ndetse anazamura igiciro usabwa kugira ngo umutumire.

    Uyu mugabo amaze kugaragara mu bitaramo binyuranye, hose atanga ibyishimo bisendereye. Ni we wacuranze mu gitaramo cya Kendrick Lamar, abantu bataha bamwirahira.

    Ni umwe mu bamaze kwemezwa ko azacuranga mu birori bya Rwanda Day bizabera i Washington.

    Muri Kamena 2023, uyu mugabo yataramiye muri Leta ya Arizona muri Amerika, nyuma akomereza urugendo rw'ibitaramo bye muri Canada.

    2.Massamba Intore

    Umuhanzi wagwije ibigwi mu muziki w'u Rwanda, Massamba Intore yakunze kuza imbere mu bahanzi baririmbye muri Rwanda Day mu bihe bitandukanye.

    Yaba ari wenyine, cyangwa se yajyanye n'itorero ry'Igihugu ‘Urukerereza’ asanzwe abereye umutoza.

    Muri iki gihe ari kwitegura kujya kuririmba mu birori bizafasha Abanyarwanda batuye muri Amerika kwizihiza umwaka mushya wa 2024, bizaba tariki 20 Mutarama 2024.

    Ibi biramuhesha amahirwe yo kuzagaruka cyane ku rutonde rw'abahanzi bazaririmba muri Rwanda Day.


    3.Ruti Joel

    Ni umwe mu bahanzi bakiri bato mu myaka, ariko wagutse cyane mu njyana gakondo. InyaRwanda ifite amakuru avuga ko ari mu bahanzi batangiye ibiganiro biganisha ku kuba yataramira muri Rwanda Day.

    Uyu muhanzi muri Mutarama 2023, yasohoye Album 'Musomandera' yatuye umubyeyi we. Iriho indirimbo nka 'Cunda', 'Amaliza' n'izindi zakomeje izina rye.

    Aherutse kuvuga ko yakozwe ku mutima n'uburyo bakiriye Album, byanatumye yiyemeza gukora igitaramo cyo kuyimurika cyabaye tariki 26 Ukuboza 2023 mu Intare Conference Arena.

    Ruti Joel wamamaye mu ndirimbo zirimo 'Igikobwa' bizaba ari ubwa mbere aririmbye muri Rwanda Day.

    4. The Ben

    Amakuru avuga ko The Ben azaririmba muri Rwanda Day yatangiye gucaracara nyuma y'ubukwe bwe na Uwicyeza Pamella bwabereye muri Kigali Convention Center, ku mugoroba wo ku wa 23 Ukuboza 2023.

    The Ben amaze iminsi mu kwezi kwa buki n'umugore we Pamella mu Mujyi wa Cairo ndetse no mu Mujyi wa Mombassa muri Kenya.

    Bagiye muri kiriya gihugu nyuma yo kugirana amasezerano yo kwamamaza na sosiyete ya Airtel ikorera mu Rwanda.

    Amakuru avuga ko The Ben yitegura kugaruka mu Rwanda, mu gihe ari mu myiteguro yo kwerekeza muri Leta Zunze Ubumwe za Amerika muri Rwanda Day.

    5.Dj Sonia

    Ni umwe mu bakobwa bigaragaje cyane mu 2022 ndetse na 2023; asanzwe ari Dj wihariye w'Ikigo cy'Igihugu cy'Itangazamakuru (RBA), yaba kuri Magic Fm no kuri Radio Rwanda.

    Ibi byamuhesheje kujya gukorera ibitaramo muri bimwe mu bihugu bitandukanye byo mu Karere k'Afurika y'Iburasirazuba (EAC). Uyu mukobwa amaze gucaranga mu bitaramo n'ibirori bikomeye birimo n'ibyitabiriwe na Perezida Paul Kagame.

    6.King James

    Uyu muhanzi wamamaye mu ndirimbo zirimo 'Ganyobwe' ntiyasibye ku rutonde rw'abanyamuziki baririmbye muri Rwanda Day aho yagiye ibera mu bihugu bitandukanye.

    Indirimbo ze n'imyitwarire ye yagiye ituma agirirwa icyizere n'abahitamo abahanzi baririmba muri Rwanda Day, akisanga ku rutonde buri gihe.

    Bitewe n'ibihugu amaze kuririmbamo, no kuba amaze igihe ajya muri Leta Zunze Ubumwe za Amerika mu bihe bitandukanye, bimuha amahirwe menshi, cyane cyane mu bijyanye no kubona 'Visa' yamufasha kujya muri kiriya gihugu.

    7.Bruce Melodie

    Bruce Melodie aherutse gukabya inzozi ze ataramira muri Leta Zunze Ubumwe za Amerika ku nshuro ye ya mbere, binyuze mu bitaramo yahuriyemo na Shaggy.

    Uyu muhanzi wo muri Jamaica bakoranye indirimbo 'When she's around' yakunzwe mu buryo bukomeye, kugeza ubwo banafatanyije kuyiririmba mu bitaramo bya 'Jangle Bell'.

    Ibi bitaramo byabereye mu Mujyi irimo New York byafashije Bruce Melodie kubona 'Visa' mu buryo bworoshye yo kwinjira muri Leta Zunze Ubumwe za Amerika.

    Hari amahirwe menshi yo kwisanga ku rutonde rw'abazaririmba muri Rwanda Day hashingiwe ku bikorwa bye n'ibindi.

    8. Jules Sentore

    Yifashishije indirimbo ‘Inkuru y’abahungu’, mu ijoro ryo kuri uyu wa Mbere tariki 15 Mutarama 2024, umuhanzi mu njyana gakondo, Jules Sentore yagaragaje ko yiteguye kongera gutarama muri Rwanda Day.

    Uyu muhanzi wamamaye mu ndirimbo zirimo ‘Icyeza’ yavuze ko Rwanda Day ari umunsi mwiza, uhuza abayobozi b’igihugu ndetse n’abanyarwanda batuye mu mahanga, bagasabana kandi bakaganira.

    Yavuze ati “Muze duhurireyo, maze dutarame! Dutaramane n’abayobozi bacu maze dukomeze kwesa imihigo.”

    Jules Sentore yashishikarije abantu gukomeza kwiyandikisha kwitabira Rwanda Day, avuga ko bizaba ari umunsi wo kwishimira ibyo u Rwanda rugezeho, gusabana n’ibindi.

    Si ubwa mbere Jules Sentore, azaba aririmbye muri Rwanda Day kuko muri 2019 yatanze ibyishimo mu yabereye mu Budage.

    9.Israel Mbonyi

    Ni umwe mu bahanzi bafite imbuga nkoranyambaga zikurikirwa cyane n'ibihangano byumvwa ku kigero cyo hejuru, ku buryo hari abavuga ko ari we nimero ya mbere mu Rwanda muri iki gihe.

    Indirimbo ye 'Nina Siri' iri guca uduhigo muri iki gihe, ahanini biturutse ku kuba iri mu rurimi rw'igiswahili ruvugwa n'abantu barenga Miliyoni 600 ku Isi.

    Aherutse kwandika andi mateka avuguruye mu muziki w'indirimbo zihimbaza Imana, nyuma yo gukora ku nshuro ya kabiri igitaramo cya Noheli cyujuje BK Arena.

    Aramutse ashyizwe ku rutonde rw'abazaririmba muri Rwanda Day, ntibwaba ari ubwa mbere ataramiye muri Leta Zunze Ubumwe za Amerika, kuko yahageze mu bihe bitandukanye.

    10.Shaffy

    Indirimbo ye yise 'Bana' yakoranye na Chriss Eazy ukorera umuziki mu Rwanda, yatumye abantu bongera kumuha ijisho, ku buryo izamuka uko bucyeye n'uko bwije mu bijyanye n'imibare y'abantu bayireba ku rubuga rwa Youtube.

    Nawe agaragaza ko yatunguwe n'uburyo abantu bayiyumvisemo. Ariko kandi yakozwe bigizwemo uruhare na Producer Element, Christopher, Junior Giti n'abandi bagize uruhare mu myandikire y'ayo.

    Shaffy kuba asanzwe atuye muri Amerika, biramuhesha amahirwe menshi yo kuzaririmba muri iki gikorwa kizabera muri Leta ya Washington.

    Guverinoma ivuga ko Rwanda Day izaba tariki 2-3 Gashyantare 2024 mu Mujyi wa Washington ho muri Leta Zunze Ubumwe za Amerika.

    Rwanda Day isobanurwa nk’igikorwa gihuza abanyarwanda batuye mu mahanga n’ababa mu Rwanda. Abitabira iri huriro, babona amahirwe yo kuganira na Perezida wa Repubulika ku ngingo zitandukanye z’iterambere ry’Igihugu n’ibindi.

    Ni umunsi kandi urangwa n’ibikorwa byo kwidagadura, abanyarwanda n’abandi bagasabana bijyanye n’umuco Nyarwanda.

    Imibare igaragaza ko kuva Rwanda Day yatangira mu 2011, yagiye yitabirwa n’abari hagati ya 2000 na 3000. Intego ya Rwanda Day ni uguteza imbere ubumwe, ibiganiro n’ubufatanye bw’Abanyarwanda aho batuye hose ku Isi.

     

    Kitoko Bibarwa, umuhanzi w'umunyarwanda utuye mu Bwongereza ku wa 5 Ukwakira 2019 yaririmbye muri Rwanda Day mu Budage

    Itsinda rya Charly na Nina ubwo ryaririmbaga muri Rwanda Day mu 2019

    Ubwo mu 2019, Bruce Melodie yaririmbaga bwa mbere muri Rwanda Day

    Ubwo umuhanzi Igor Mabano yaririmbaga muri Rwanda Day mu 2019 


    Ubwo abarimo Igor Mabano, King James, Jules Sentore, Charly&Nina, Bruce Melodie berekezaga muri Rwanda Day mu 2019 

    Muri 2011, Rwanda Day yabereye mu Mujyi wa Chicago. Icyo gihe Alpha rwirangira afatanyije n'umucuranzi Mihigo Chouchou basusurukije abitabiriye 

    Miss Jojo na Massamba muri 2011 muri Rwanda Day yabereye muri Chicago

     

    Kitoko muri 2011 ataramira mu Mujyi wa Paris 

    Umukinnyi wa filime Malaika Uwamahoro [Uri hagati] ubwo yasusurutsaga abitabiriye Rwanda Day i Dallas mu 2014



    Source : https://inyarwanda.com/inkuru/138647/israel-mbonyi-the-ben-na-bruce-melodie-ni-bande-bashobora-kuririmba-muri-rwanda-day-138647.html

  • Umukinnyi wa Police FC yari yivuganye abashinzwe umutekano – YEGOB #rwanda #RwOT

    Nyuma y'umukino w'umunsi wa 16 wa shampiyona y'Icyiciro cya mbere y'umupira w'amaguru, wahuje Sunrise FC na Police FC wabereye kuri sitade uzwi nka Gologota, myugariro w'ikipe y'Abashinzwe umutekano yari yivuganye abasifuzi.

    Nyuma y'uyu mukino wabereye kuri sitade izwi nka Gologota iherereye mu karere ka Nyagatare, ukirangira ntabwo bamwe mu bakinnyi ba Police FC bishimiye bimwe mu byemezo by'abasifuzi.

    Umwe mu bagaragaje uburakari bwinshi, ni myugariro Ndizeye Samuel wasagariye abasifuzi basifuye uyu mukino ndetse bikaba bivugwa ko yaba yarakubise uwari ushinzwe umutekano ku kibuga.

    Haracyategerejwe umwanzuro wa komisiyo Ishinzwe imyitwarire mu Ishyirahamwe ry'umupira w'amaguru mu Rwanda, Ferwafa, nyuma y'isesengura rizaba ryakozwe.

    Source : https://yegob.rw/umukinnyi-wa-police-fc-yari-yivuganye-abashinzwe-umutekano/

  • Ngororero : Umugabo yafatanywe udupfunyika tw’urumogi ibihumbi bitanu ahita amanika amaboko #rwanda #RwOT

    Uyu mugabo w’imyaka 38 yafatwe utu dupfunyika ku Cyumweru tariki 14 Mutarama 2024 nyuma y’uko Polisi y’u Rwanda ihawe amakuru n’abaturage bo mu Karere ka Rubavu, bavuze ko hari moto iturutseyo kandi ko bakeka ko itwaye ibiyobyabwenge.

    Umuvugizi wa Polisi mu Ntara y’Iburengerazuba, Superintendent of Police (SP) Bonaventure Twizere Karekezi, yavuze ko ari abaturage bo mu Murenge wa Busasamana mu karere ka Rubavu, bahamagaye Polisi bavuga ko hari umugabo uhetswe kuri moto bicyekwa ko agemuye urumogi kandi ko agiye kunyura mu Karere ka Ngororero.

    Yagize ati 'Abaturage bamaze kuduha amakuru yizewe y’aho iyo moto igiye kunyura, abapolisi bahise bajya mu muhanda bayitegerereza mu kagari ka Rususa ko mu murenge wa Ngororero, ari naho baje kuyifatira mu gihe cya saa kumi n’ebyiri z’umugoroba (18h00).'

    Yakomeje ati : 'Bakimara kubahagarika bagatangira gusaka igikapu cyarimo uru rumogi, nibwo uwari utwaye moto yahise ayikubita ikibatsi aracika, mugenzi we w’imyaka 38 y’amavuko, bamusangana udupfunyika 5,000 yahise yiyemerera ko ari urwe, kandi ko asanzwe akorana n’uriya mumotari bahurira mu karere ka Rubavu, akamufasha kurushyira abakiriya be mu Karere ka Muhanga no mu Mujyi wa Kigali.'

    SP Karekezi yashimiye uruhare rw’abaturage mu gufatanya na Polisi gukumira ibyaha batanga amakuru.

    Yagize ati : 'Duhora tugira inama abanywa, abacuruza, abatunda n’undi wese wivanga mu ikwirakwizwa ry’ibiyobyabwenge ko usibye kuba bigira ingaruka k’ubifatiwemo, binagira ingaruka ku muryango nyarwanda muri rusange, ari nayo mpamvu dushima abaturage batanze amakuru kuko barengeye abantu benshi bari kuzanywa turiya dupfunyika 5000 tw’urumogi rukabagiraho ingaruka ndetse zikagera no ku bandi badafite aho bahuriye narwo.'

    SP Karekezi yagaragaje ko uyu mugabo afashwe hatarashira ukwezi mu karere ka Rusizi hafatiwe ibilo 108 n’udupfunyika 500 tw’urumogi ndetse n’urundi rungana n’udupfunyika 9,000 rwafatiwe mbere yaho gato mu Karere ka Rubavu.

    Source : http://www.ukwezi.rw/Mu-rwanda/article/Ngororero-Umugabo-yafatanywe-udupfunyika-tw-urumogi-ibihumbi-bitanu-ahita-amanika-amaboko

  • Rulindo : Umwana wafatiwe n’uburwayi budasobanutse ku ishuri yitabye Imana bitunguranye #rwanda #RwOT

    Uyu mukobwa witwa Niyomufasha Marie, yitabye Imana kuri uyu wa Mbere tariki 15 Mutarama 2024 ku isaaha ya saa saba z’amanywa.

    Amakuru avuga ko yafashwe akubita umunwa ku ntebe, agahita ajyanwa kwa muganga igitaraganya kuko yari yaguye muri Coma, ariko agejewe ku Ivuriro ahita yitaba Imana.

    Umurambo wa nyakwigendera wahise ujyanya ku Bitaro bya Kacyiru ngo ukorerwe isuzuma mbere yo gushyingurwa.

    Ni amakuru yemejwe n’Umuyobozi wa G.S Binaga, Murebwayire Alphonsine wavuze ko ari inshuro ya mbere bari babonye nyakwigendera afatwa n’ubwo burwayi.

    UKWEZI.RW

    Source : http://www.ukwezi.rw/Mu-rwanda/article/Rulindo-Umwana-wafatiwe-n-uburwayi-budasobanutse-ku-ishuri-yitabye-Imana-bitunguranye

  • RDF yemeje ko abasirikare 3 ba FARDC binjiye mu Rwanda umwe akicwa arashwe #rwanda #RwOT

    Ibi byemejwe n’Ingabo z’u Rwanda RDF mu itangazo zashyize hanze kuri uyu wa Kabiri tariki 16 Mutarama 2024.

    Iri tangazo rivuga ko abo basirikare batatu binjiye mu Rwanda banyuze mu Mudugudu wa Isangano mu Kagari ka Rukoko mu Murenge wa Rubavu mu Karere ka Rubavu ku isaha ya saa saba n’iminota icumi z’ijoro.

    Iri tangazo rya RDF rigira riti 'Abasirikare babiri ari bo Sgt Asman Mupenda Termite w’umyaka 30 na Cpl Anyasaka Nkoi Lucien w’imyaka 28, batawe muri yombi n’uburinzi bwa RDF, bufatanyije n’irondo.'

    RDF kandi yavuze ko aba basirikare bari bitwaje imbunda imwe yo mu bwoko bwa AK-47 ndetse na magazine enye zarimo amasasu 105.

    Ubuyobozi bw’Ingabo z’u Rwanda buvuga ko undi musirikare umwe, we yishwe arashwe ubwo na we yarasaga mu bari bacunze umutekano.

    UKWEZI.RW

    Source : http://www.ukwezi.rw/Mu-rwanda/article/RDF-yemeje-ko-abasirikare-3-ba-FARDC-binjiye-mu-Rwanda-umwe-akicwa-arashwe

  • Rwanda : Nyuma y’icyumweru kimwe umuntu wa kabiri yishwe n’impanuka n’urukuta rwaguye #rwanda #RwOT

    Iyi mpanuka y’urukuta rw’inzu yariho yubakwa, yabereye mu Kagari ka Kanazi mu Murenge wa Ruharambuga mu Karere ka Nyamasheke.

    Amakuru aturuka muri aka gace, avuga ko uru rukuta rwagwiriye abantu bane bari mu bikorwa byo kubaka ahagiye kujya sitasiyo y’ibikomoka kuri Peteroli.

    Ubwo iyi mpanuka yari imaze kuba, abaturage benshi bahuruye baza gutabara, aho bageragezaga gukura amatafari n’ibitaka byari byagwiriye abantu.

    Iyi mpanuka ibaye nyuma y’icyumweru kimwe, mu Murenge wa Kimironko mu Karere ka Gasabo habereye indi nkayo y’umukingo wagwiriye nabwo abantu bane, umwe akahasiga ubuzima.

    Iyi mpanuka yabereye mu Murenge wa Kimironko mu Karere ka Gasabo ku wa Mbere w’icyumweru gishize tariki 08 Mutarama 2024.

    UKWEZI.RW

    Source : http://www.ukwezi.rw/Mu-rwanda/article/Rwanda-Nyuma-y-icyumweru-kimwe-umuntu-wa-kabiri-yishwe-n-impanuka-n-urukuta-rwaguye

  • Babiri turabafite turi kubakoraho iperereza- Umuvugizi wa RDF yasobanuye iby’abasirikare ba FARDC #rwanda #RwOT

    Itangazo rya RDF ryagiye hanze kuri uyu wa Kabiri, rivuga ko abo basirikare batatu binjiye mu Rwanda banyuze mu Mudugudu wa Isangano mu Kagari ka Rukoko mu Murenge wa Rubavu mu Karere ka Rubavu.

    RDF yavuze kandi ko baje bafite imbunda yo mu bwoko AK-47 ndetse n’amasasu 105, ndetse umwe muri bo akagerageza kurasa abasirikare b’u Rwanda, na bo bagahita bamusubiza, akahasiga ubuzima.

    Umuvugizi wa RDF, Brig Gen Ronald Rwivanga yagize ati 'Babiri muri bo bafashwe n’abasirikare bacu, ariko umwe muri bo yagerageje kurasa tuza kumurasa, ariko abandi babiri turabafite.'

    Yavuze ko abafashwe bari kubazwa ibibazo mu rwego rw’iperereza. Ati 'Ibya ngombwa ni uko twafashe abo basirikare, kandi turimo kubakoraho iperereza, ibindi turaza kubibagezaho.'

    Brig Gen Ronald Rwivanga yaboneyeho gusaba abantu kudaha agaciro andi makuru akomeje kuvugwa ku by’aba basirikare, kuko ubuyobozi bwa RDF buza gutanga ibirambuye kuri bo nyuma y’iperereza riri gukorwa.

    UKWEZI.RW

    Source : http://www.ukwezi.rw/Mu-rwanda/article/Babiri-turabafite-turi-kubakoraho-iperereza-Umuvugizi-wa-RDF-yasobanuye-iby-abasirikare-ba-FARDC