Category: Uncategorized

Nta gihindutse uyu munsi Rayon Sports y’abagore irasinyisha umukinnyi w’Umudagekazi witwa Helan.

Uyu mukinnyi akaba yakoze imyitozo yo mu gitondo cyo kuri uyu wa Kane tariki ya 29 Gashyantare 2024.

Amakuru ISIMBI yamenye ni uko imyitozo yakoze kuri uyu wa Kane mu gitondo, ikipe yahise ifata umwanzuro wo kumusinyisha kuko basanze hari icyo yafasha.

Mu mafoto ISIMBI yabashije kubona (nubwo atagaragara neza), agaragaza uyu mukinnyi ari mu myitozo ya Rayon Sports WFC mu Nzove aho iyi kipe isanzwe ikorera.

Mu gihe yasinyira iyi kipe, akaba yayifasha mu mikino isigaye ya shampiyona ya 2023-24 aho bahura imikino 5 ngo irangire.

Kugeza ubu nyuma y’umunsi wa 17 wa shampiyona, Rayon Sports ni yo iyoboye urutonde n’amanota 46 irusha AS Kigali WFC ya kabiri amanota 2.

Umudagekazi mu myitozo ya Rayon Sports

Umukino w’ikirarane cy’umunsi wa 18 APR FC yagombaga kuzakiramo Etoile del’Est tariki ya 28 Werurwe 2024, wimuriwe ku wa Kabiri w’icyumweru gitaha.

Mu ibaruwa FERWAFA yandikiye APR FC na Etoile del’Est, yayimenyesheje ko bitakunda ko bakina tariki ya 28 Werurwe kuko tariki ya 29 Werurwe, Etoile del’Est izaba yasuye Gasogi United mu mukino w’umunsi wa 25 wa shampiyona y’icyiciro cya mbere umwaka w’imikino 2023-24.

Yamenyesheje aya makipe ko umukino uzaba ku wa Kabiri w’icyumweru gitaha tariki ya 5 Werurwe 2024 saa 18h00′ kuri Kigali Pele Stadium.

Amatariki y’Igikombe cy’Amahoro…

FERWAFA kandi ikaba yamaze gushyira hanze amatariki ya 1/2 cy’Igikombe cy’Amahoro cya 2024 aho iyi mikino izakinwa hagati y’itariki 16 na 23 Mata 2024.

Tariki ya 16 Mata, Police FC izakira Gasogi United ni mu gihe tariki ya 17 Mata, Rayon Sports izakira Bugesera FC.

Imikino yo kwishyura yose izakinwa tariki ya 23 Mata 2024 aho Bugesera FC izakira Rayon Sports, na Gasogi United ikakira Police FC.

Kuri uyu wa Gatatu tariki 28 Gashyantare 2024, nibwo Sandrine Umutoni yasuye abana n'urubyiruko babarizwa muri Sherrie Silver Foundation mu rwego rwo kureba uko bitabwaho mu rugendo rukerekejwe no gukuza impano z'abo bagaragaza mu bihe bitandukanye.

Sherrie Silver Foundation kuva yashingwa ifasha abana n'urubyiruko kugaragaza impano zabo no kubongerera ubumenyi n'ubushobozi mu buhanzi.

Ubwo aba bana bagirana ibiganiro na Sandrine Umutoni, bagaragaje ubuhanga budasanzwe mu kuririmba, gucuranga, kubyina no gushushanya.

Minisitiri Sandrine Umutoni yashimiye umubyinnyi Sherrie Silver ku bw'iki gikorwa yakoze kigamije guteza imbere ubuhanzi, asaba abana bo muri Sherrie Silver Foundation kurangwa n'ikinyabupfura kugira ngo ibyo bakora bizababyarire umusaruro.

Yanabijeje ubufasha bwa Minisiteri y'Urubyiruko n'iterambere ry'Ubuhanzi mu bikorwa byabo.

Mu butumwa bwo kuri X [Yahoze ari Twitter], Sandrine Umutoni yavuze ko ubwo yasuraga Sherrie Silver Foundation wari umwanya ushimishije kuri we, areba imbaraga uyu muryango washyizemo mu guhuriza hamwe abana n'urubyiruko bo mu miryango itandukanye cyane cyane itishoboye.

Yagaragaje Sherrie Silver Foundation  nk'ahantu hihariye hatekanye mu kuzamura no kugaragaza impano z'aba bana mu buhanzi, ndetse 'bikabaha amahirwe yo guteza imbere imiryango y'abo mu buryo burambye'.

Sherrie Silver amaze iminsi atangiye urugendo rwo guhuza aba bana n'abahanzi bakuru bamaze igihe mu muziki mu rwego rwo kubagira inama no kubatinyura gukurikira inzozi zabo mu rugendo rw'abo rw'ubuzima.   

Ibikorwa by’aba bana abishyira ku mbuga zitandukanye cyane cyane urubuga rwa Youtube mu rwego rwo kugaragaza impano. Bamwe mu bahanzi bagiye basura aba bana, bagaragaje ko bafite ejo hazaza heza, bashimye ku buryo bataramanye.

Aba bana basuwe n’abahanzi barimo The Ben, Bruce Melodie, Chriss Eazy, Producer Element, Kevin Kade, Danny Nanone n’abandi. Baherutse kwishimirwa na benshi ubwo basubiragamo indirimbo ‘Niyo Ndirimo’ ya Adrien Misigaro na Meddy.

Aherutse kandi kubinjiza mu muziki aho batangiye gushyira hanze zimwe mu ndirimbo z’abo. Basohoye indirimbo ‘Welcome Africa’, banataramana na Kendrick Lamar mu gitaramo yakoreye muri Kigali, ndetse baririmbye mu birori byo gutanga ibihembo bya TIME Africa.

Sherrie Silver aherutse kubwira InyaRwanda, ko hejuru yo gufasha aba bana mu mibereho, batangiye ibikorwa bigamije kubigisha kubyina, kuririmba n'ibindi bizatuma babasha gukuza impano zabo.

Ati 'Tumaze igihe dutoza aba bana kuririmba, kubyina, gucuranga ibicurangisho bitandukanye by'umuziki mu rwego rwo kubafasha mu buzima bwabo bwa buri munsi.'

Sherrie Silver yatangiye gufasha abana arera kuririmba no kwiga ibicurangisho by'umuziki, nyuma y'uko mu 2017 atangije itsinda ryo kubyina yise 'Silver Beat World' ry'ababyinnyi babigize umwuga.

Iri tsinda ryanyuzemo Ishimwe Thierry wamamaye nka Titi Brown uherutse gufungurwa nyuma y'uko urukiko rumugize umwere ku byaha byose yari akurikiranyweho.

Umunyamabanga wa Leta muri Minisiteri y'Urubyiruko  n'Iterambere ry'Ubuhanzi, Sandrine Umutoni [Uri iburyo] yasuye kandi agirana ibiganiro n’abana bo muri Sherrie Silver Foundation

Sandrine Umutoni yashimye Sherrie Silver ku bwo kwita ku bana z’aba bana biganjemo abo mu miryango itishoboye

 Sandrine Umutoni yagaragaje ko aba bana bafite impano zikomeye zo gushyigikirwa, kandi bibafasha guteza imbere imiryango y’abo

Aba bana bamaze iminsi bagaragaza impano mu kuririmba, gushushanya n'ibindi

Aba bana baherutse gushyira hanze indirimbo yabo yatangije urugendo rwo kwikorera indirimbo z'abo

Abana bo muri Sherrie Silver Foundation bafashije Kendrick Lamar mu gitaramo yakoreye mu Rwanda mu Ukuboza 2023

The Ben aherutse gusura abana bo muri Sherrie Silver Foundation baramutaramira, baranaganira
 

KANDA HANO UREBE AMASHUSHO UBWO ABA BANA BASUBIRAGAMO INDIRIMBO YA THE BEN

 “>

KANDA HANO UREBE AMASHUSHO Y'INDIRIMBO UBWO ABA BANA BASUBIRAGAMO INDIRIMBO YA DANNY NANONE

 “>

Twabegeranirije muri rusange uko ukwezi kuzwi nk’ukw’abakundana kwagenze guhera kuri Okkama wakwinjijemo abantu mu buryo bwihariye, abanyamideli baserutse muri Amerika n'Uburayi, The Ben i Kampala, Bruce Melodie i Nairobi, Alliah Cool i Dar es Salaam.

Mu bwiza, Miss Rwanda 2020, Nishimwe Naomie yatangaje igihe azakorera ubukwe, abandi berekana abakunzi barimo Igisonga cya Mbere cya Miss Rwanda 2022, n'ibindi.

Ibitaramo bitegerejwe muri Werurwe 2024

Ukwezi gushyizweho akadomo abantu bategerezanije amatsiko igitaramo rurangiranwa cya Platini P kizaba kuwa 30 Werurwe 2024 ubwo uyu mugabo azaba yizihiza imyaka 14 amaze mu muziki.

Iki gitaramo kizabera muri Camp Kigali, byitezwe ko azagifashwamo n'abahanzi barimo n’abakomeye mu Karere nka Eddy Kenzo na Big Fizzo, biranashoboka ko abantu bakongera kugira amahirwe yo kubona ataramana na Humble Jizzo na Safi Madiba.

Hari kandi igitaramo cya Tonzi cyo kumurika umuzingo we wa cyenda yise Respect. Ni igitaramo kizabera kuri Crown Conference Hall i Nyarutaramana aho azongera guhuriza ku rubyiniro The Sisters.

The Sisters imaze imyaka 10 itumvikana, igizwe na Aline Gahongayire, Gabby Kamanzi, Phanny Wibarara na Tonzi. Iki gitaramo bazahuriramo kizaba kuwa 31 Werurwe 2024. Aline Kabaganza na we azaririmba muri iki gitaramo mu gihe DJ Spin ari we uzaba avanga umuziki.

Inkuru ya 30 igitaramo gakondo cy'Inyamibwa kizaba kuwa 23 Werurwe 2023 muri BK Arena aho hazabarwa inkuru y'imyaka 30 u Rwanda rumaze rubohowe n'Inkotanyi zahagaritse Jenoside yakorewe Abatutsi. 

Indirimbo zagarutsweho cyane

Ukwezi kwa Gashyantare kwasohotsemo indirimbo nyinshi ariko iyitwa  Jugumila ya Phil Peter, Kevin Kade na Chriss Eazy zagarutsweho cyane kugera no kuri Minisitiri w'Urubyiruko n'Iterambere ry'Ubuhanzi, Dr Utumatwishima wibajije icyo izina ry'iyi ndirimbo rivuze.

Shemi na we yongeye gukora mu nganzo akora indirimbo igaragaramo mu mashusho Judy umukobwa umaze kugwiza igikundiro ku mbuga nkoranyambaga.

Ni indirimbo yasohokeye rimwe na “Peace Of Mind” isubiwemo. Izi zose zikaba zari zitezwemo Davis D, nyamara inkuru yaje ibusanye kuko haririmbyemo Juno Kizigenza.

Juno Kizigenza yagarutse mu nkuru bishingiye ku ndirimbo byavuzwe ko itari iye, Abahungu, ikoze mu njyana y'uruhurirane ya Afro Gako nayo hibazwa imvano yayo.

Gusa uyu muhanzi yashyize umucyo ku byavugwaga, avuga ko babikemuye n’uwamushinjaga kuyimwiba, bamwe bakaba barabibonagamo inzira yo kurushaho kuyicuruza.

Ariel Wayz wigeze gushyira hanze amafoto, benshi bakavuga ko afite amabere ameze nk'irya Bigogwe, yakoze indirimbo igaragaramo ababyeyi be ayikorera mu Bigogwe mu cyanya yavuzwemo.

Ibitaramo n'ibirori byabaye

Okkama yinjije abantu mu Kwezi kw'abakundana ashyira hanze indirimbo yise “Aba Baby” mu buryo bw'amajwi n'amashusho, anahita ashyira hanze indirimbo zose zigize EP yise Ahwii.

Yayimuritse mu buryo bwa Live mu birori byitabiriwe n'ibyamamare bitandukanye nka Shaddyboo, Rocky Kimomo, Coach Gael na Kenny. Yafashijwe na Umuriri Band.

Abahanzi barimo Kenny Sol na Ross Kana bamufashije gususurutsa abitabiriye mu gihe umukunzi wa Okkama, Trecy Teta, ari we wari uyoboye gahunda z’ibyaberaga hanze.

Habaye igitaramo cya Andersonne Experience cyaririmbyemo Andersonne ari na we nyiri birori, Ariel Wayz na Delah Dube. Iki gitaramo kiri mu byasusurukije abantu kuri Saint Valentin.

Mu Rwanda kandi ku nshuro ya mbere habereye iserukiramuco rya Kigali Trinnial ryabereye mu bice bitandukanye by'igihugu, rirangwa n'ibikorwa birimo iby'umuziki, ikinamico imideli.

Ibi bikorwa byashyizweho akadomo mu gitaramo cyaririmbyemo abarimo Mike Kayihura, Bushali, Kaya Byinshi, Michael Makembe, Impakanizi, Kevin Kade, Mistaek, Delah Dube, Symphony Band na Shauku Band.

Madamu Jeannette Kagame, Minisitiri muri Minisiteri y'Urubyiruko n'Iterambere ry'Ubuhanzi, Umutoni Sandrine, Meya w'Umujyi wa Kigali Dusengiyumva Samuel; bari mu bayobozi bitabiriye ibi bikorwa mu bihe bitandukanye.

Hari kandi ibitaramo byabereye mu bice bitandukanye by'igihugu byaherekeje Tour Du Rwanda, bigatanga ibyishimo bisendereye ndetse bigaha amahirwe abo muri utwo duce bakiyerekana.

Ibi bitaramo byabereye mu Karere ka Huye, Rubavu, Musanze na Kigali, byarushijeho kuzamura imigendekere myiza ya Tour Du Rwanda aho abantu babaga bari bukurikirane mu masaha y'amanywa ibikorwa by'amarushanwa y'amagare, bakanagira umwanya wo kwidagadura.

Abahanzi batoranijwe bagatanga ibyishimo muri Tour du Rwanda, barimo Mico The Best, Senderi Hit, Kenny Sol, Juno Kizigenza, Bwiza, Bushali na Afrique, bakaba ari abahanzi bigoranye ko bagutenguha.

Ni na ko byagenze ndetse bigeze i Musanze abakunzi b'umuziki nyarwanda basaba ko bakongererwa igihe kugira ngo babashe kumva neza ibihangano bya Juno Kizigenza.

Ku munsi w’abakundana, The Ben yataramiye muri Uganda yongera kwerekwa urukundo mu gihugu gifite amateka akomeye mu buzima bwe kuko ariho yavukiye hari ku munsi w'abakundana.

Kuwa 23 Gashyantare nabwo yatunguranye mu gitaramo “Melodies of Love” cya Rema Namakulah afatanya n'uyu muhanzikazi bafitanye indirimbo “This Is Love” gutaramira abitabiriye iki gitaramo.

Amakuru yihariye ku bahanzi n'abanyamuziki

Bruce Melodie witegura gushyira hanze umuzingo mushya, yerekeje muri Kenya mu bikorwa bifite aho bihuriye n'umuziki we, ariko icyatunguranye kurusha ibindi ni ukujyana na Prince Kiiiz asize Element.

Muri Kenya uyu muhanzi yagize umwanya wo gusura Bahati basanzwe bafitanye umubano wihariye banakoranye indirimbo “Diana”, anagira umwanya wo gutanga ibiganiro mu bitangazamakuru bitandukanye.

Inkuru yo kongera kwinjira muri 1:55AM kwa Kenny Sol bishingiye ku nkuru yatangajwe na Bruce Meloide, yemeza ko yamaze kuba umunyamuryango, yavugishije benshi.

Nubwo Kenny Sol ataragira icyo avuga kuri aya makuru, ariko ikibazo cyakomeje kwibazwa ni ‘ese koko igihe aho kigeze Kenny Sol yaba ari umuhanzi wari ukeneye kongera kugira abamureberera inyungu’?.

Impamvu ni uko yavuye mu Igitangaza akanatandukana na Yemba Voice, kandi imikorere ye bikagaragara ko ari bwo yihagazeho. Abandi bavuze ko ari umubare mwiza by'umwihariko muri iki gihe yinjiye mu cyiciro cy'abafite urugo.

Chriss Eazy yatigishije imbuga, yongera kwerekana ko yihebeye Umuhoza Pascaline, umwe mu bakobwa b'inkingi za mwamba muri Kigali Protocal by'umwihariko mu ishami ryayo ryo muri Poland. Pascaline uri umwe mu bahabwaga amahirwe yo kwegukana Miss Rwanda 2022.

Chriss Eazy yongeye kugaruka mu majwi havugwa ko yasusuzuye abanyamakuru b’i Huye aho yavuye agakurikirwa n'inkuru zivuga ko hari abafashe umwanzuro wo kutazongera gukina indirimbo ze, gusa yaje gusaba imbabazi agaragaza ko ibyabaye atari abigambiriye.

Ubwiza n'imideli muri Gashyantare 2024

Abanyamideli nyarwanda bongeye kwiyerekana mu ruhando mpuzamahanga barimo Christine Munezero, Ornella Umutoni na Anipha Umufite, batambutse mu birori by'imideli bya New York Fashion Week.

Ibi birori biza mu by'imbere byishyura neza abo bikoresha bikanabahesha amahirwe y'ibiraka bikomeye birimo gukorana n'inzu zireberera inyungu z'abanyamideli no kwamamaza kompanyi zikomeye.

Nyuma gato Umufite Anipha yitabiriye London Fashion Week avuga ko ari ikintu gikomeye gishimangira ko umwuga wo kumurika imideli mu Rwanda uri kwaguka.

Birumvikana kandi kuba uyu munsi umunyarwanda yamurika imideli muri Leta Zunze Ubumwe z'Amerika, mu Bwongereza no mu Bufaransa, ni intambwe ikomeye kandi itanga icyizere ko mu bihe biri imbere mu Rwanda hazatangira kujya habera ibirori bikomeye by'imideli.

Ku ruhande rw'ubwiza, Miss Naomie nyuma yuko yasoje Mutarama yambitswe impeta, Gashyantare nayo yayigiriyemo umugisha, bahuza imiryango n'umukunzi we Michael Tesfay mu muhango wo gufata irembo. Ubwo yaganiraga na RBA, Miss Naomie yatangaje ko mu Ukuboza ari bwo azakora ubukwe. 

U Rwanda rwungutse amaboko muri iki gisata aho Kenza Joannah Ameloot yegukanye ikamba rya Miss Belgium 2024. Uyu mukobwa akaba ari yaragaragaje ko yishimira kuba ari umunyarwanda.

Miss Kenza avuga ko akunda gusura u Rwanda akishimira ko abanyarwanda bahisemo kwigira. Umushinga w'uyu mukobwa ni ugufasha abana baba mu miryango ikennye mu Bubiligi.

Yavuze ko ateganya ko ibi bikorwa azanabigeza mu Rwanda, akaba yifuza kubona uburezi bufite ireme binyuze mu bukangurambaga no mu buryo bufatika.

Igisonga cya Mbere cya Miss Rwanda 2022, Keza Maolithia yiyongereye ku mubare w'abanyampinga berekanye abakunzi babo, hakaba hari ku munsi w'abakundana.

Imyidagaduro ishingiye kuri sinema

Alliah Cool uri mu bari n'abategarugori bamaze igihe kitari gito mu ruganda rw'imyidagaduro ishingiye kuri sinema, yagiye muri Tanzania mu rwego rwo kwagura ibikorwa bye.

Muri uko kwezi kandi ni bwo yatangaje ko nubwo abantu bamwe bibwira ko hari umubano agirana n'abagabo batandukanye wihariye, ibyo ari icyaha kuri we by'umwihariko muri iki gihe afite umugabo kandi bishimanye nubwo nta bukwe ateganya.

Yaganiriye kandi na Ambasaderi wa Israel mu Rwanda by'umwihariko ku mushinga w'uyu mugore wo gufasha urubyiruko kurushaho kugira ubumenyi bufatika mu birebana na sinema.

Umunyarwenya, umukinnyi wa filime n'umunyamakuru, Rusine Patrick, nawe yerekanye ko ari mu munyenga w'urukundo na Iryn Uwase Nizra. Amakuru ahari ni uko aba bombi bageze kure umushinga wo kubana.

Gahunda zihariye

InyaRwanda yatangije gahunda yo gusura abahanzi baherereye hirya no mu bice by'igihugu aho kugeza ubu iyi gahunda imaze kubera mu Turere 2 ari two Musanze na Huye. Abahanzi n'abafite aho bahuriye n'ubuhanzi n'imyidagaduro muri utwo turere bagaragaje byinshi byihariye ku turere twabo.

Muri Musanze, bagaragaje ko kugeza ubu imyidagaduro yabo ishingiye ku birori bitegurirwa mu Tubari n'Utubyiniro, ariko ibitaramo binini bisigaye byarabaye bicye ugereranije na mbere.

Ibi bishingira ahanini ku kuba bigoye kubona aho ukorera kuko Stade idapfa gutangwa ndetse n'icyanya cyahariwe imyidaduro na siporo [Car Free Zone] na cyo ari uko.

Ku rundi ruhande ariko bagaragaza ko bishimira impano zitangaje bafite mu muziki, ubusizi no kubyina. Kugeza ubu mu nsisiro hose bashimangira ko indirimbo “Teta” ya QD ariyo bakunze na cyane ko ari iy'umuhanzi ukomoka muri aka Karere.

AKarere ka Huye kigeza kuba igicumbi cy'imyidagaduro, ubu byasubiye inyuma bishingiye ku kuba abanyeshuri baragabanutse muri uyu mujyi, abashoramari bakaba basigaye bagira ubwoba bwo gushora. Ikindi ibikorwa byo kwerekaniramo impano nabyo byaragabanutse.

Abatuye muri aka karere barasaba koroherezwa mu kubona aho gukorera ibitaramo bigari kuko hamwe mu hahari bigoye kuhabona. Hari n’aho batanze urugero ko hasigaye harabaye aho kubika amafumbire.

Iyi gahunda ya InyaRwanda: Ubuhanzi n'Imyidagaduro mu Turere, izakomereza no mu tundi Turere dutandukanye tw'igihugu.

Amakuru yo mu Karere

Ahanini amakuru menshi muri iki gihe mu myidagaduro mu Karere k'Ibiyagabigari usanga ashingiye ku gihugu cya Tanzania kuko cyamaze kugaragaza ubudasa cyane cyane mu njyana ya Bongo Flava no kuba abenshi bagituye bakoresha icyongereza n'igiswahili, indimi zifite umubare munini w’abazikoresha ku isi.

Harmonize yatangaje ko yitegura guhamagara Diamond bakaganira ku byerekeranye n'imikoranire mu gukomeza guteza imbere umuziki wa Tanzania.

Uyu muhanzi uri mu rukundo na Poshy Queen, amaze iminsi agaragaza ibyishimo bidasanzwe. Wavuga ko barambanye dore ko bamaranye amezi arenga abiri.

Ku ruhande rwa Diamond, yapfukamye imbere ya Zuchu amusaba imbabazi nyuma yuko uyu muhanzikazi bari mu rukundo rutavugwaho rumwe, yari yumvikanye amwita imbwa. Mbega yarikorongeje avuga ko Diamond atanyurwa mu rukundo ndetse ko batazongera gukundana.

No ku ruhande rwa Zari na Shakib Lutaaya, nabo ibintu ntabwo byifashe neza muri uku kwezi kwa Gashyantare, ndetse amakuru menshi avuga ko bamaze gutandukana.

Abakurikiranira hafi imyidagaduro yo mu Karere, bavuga ko iyi nkundura bayibonamo uburyo bwo gushaka kwamamaza igice gikurikira cya filime ya Young Famous & African kigiye kujya hanze.

Hamisa Mobetto yatangiye ukwezi asangiza abamukurikira ibihe byiza yagiriye muri Hollywood ho muri Leta Zunze Ubumwe z'Amerika, asoza yishimana n'abana be i Dubai ho muri Leta Zunze Ubumwe z'Abarabu.

 

Ni uruzinduko rwari rumaze hafi ibyumweru bibiri rutegerejwe, aho ishyirahamwe ry’umukino wa Tennis mu Rwanda ryari ryatumiye uyu munyabigwi nawe yemera ubutumire bwe atazuyaje. Akigera ku kibuga cy’indege, Yannick Noah yakiriwe n’umuyobozi w’ishyirahamwe ry’umukino wa Tennis mu Rwanda Karenzi Theoneste ndetse ahita agirana ikiganiro gito n’itangazamakuru.

Muri iki kiganiro Noah yatangaje ko yishimiye kuza mu Rwanda kuko yajyaga yumva baruvuga. Yagize Ati” “Ni ubwa mbere ngeze i Kigali ariko ndifuza kumenya byinshi kuri yo kuko umuhungu wanjye (Joakim Noah) yarahandatiye cyane'.

'Nje ku butumire bwa Perezida turi kumwe (Karenzi Théoneste uyobora Federasiyo ya Tennis), mu minsi mike ishize yambwiye ko nanjye naza nkaba umwe mu bazitabira ATP Challenger maze nanjye sinazuyaza kuko nta zindi gahunda nari mfite muri iyo minsi.'

Yannick Noah yabaye umukinnyi ukomeye wa Tennis aho yegukanye irushanwa rya Grand Slam iri mu marushanwa 4 akomeye muri Tennis, ibi akaba yarabizikoze mu 1983 yegukana Roland Garros ndetse yongera kuyegukana mu 1984 mu bakina ari babiri.

Ntabwo ari muri Tennis gusa kuko no mu muziki ntabwo yatanzwe, kuko hari n’abantu benshi bamuzi mu muziki gusa nko mu ndirimbo Les Lionnes na Mon El dorado. 

Akigera mu Rwanda Yannick Noah yahise agirana ikiganiro n’itangazamakuru

Ni ubwa mbere Yannick Noah yari akandagiye ku butaka bw’u Rwanda 

Yabaye umukinnyi ukomeye muri Tennis ku Isi 

Mu muziki naho ntabwo yatanzwe 

“>

Turamenyesha ko uwitwa NIYIGENA Josiane mwene Nzarora Emmanuel na Mukagashugi Collette, utuye mu Mudugudu wa Byimana III, Akagari ka Byimana, Umurenge wa Matimba, Akarere ka Nyagatare, mu Ntara y’Iburasirazuba wanditse asaba uburenganzira bwo guhinduza amazina asanganywe ariyo NIYIGENA Josiane, akitwa AGATESI Joyce mu gitabo cy’irangamimerere. Impamvu atanga yo guhinduza izina ni “Niyo mazina nakorsheje mu ishuri kuva ngitangira kwiga”.

Byemejwe na Musabyimana Jean Claude Minisitiri w’Ubutegetsi bw’Igihugu

Agaciro k’Icyangombwa: Cyatanzwe kuwa 2024-02-28

Ishyirahamwe ry’Umukino wa Handball mu Rwanda (FERWAHAND) ryakiriye inzobere muri uyu mukino iturutse mu Ishyirahamwe Mpuzamahanga rya Handabll (IHF), Paul Landuré ndetse na perezida w’Ishyirahamwe ry’Umukino wa Handball muri Afurika (CAHB), Dr Aremou Mansourou aho baje mu ruzikundo rw’akazi.

Aba bombi bakaba bageze mu Rwanda mu ijoro ry’ejo hashize ku wa Gatatu tariki ya 28 Gashyantare 2024 bakaba bakiriwe n’abayobozi b’Ishyirahamwe ry’Umukino wa Handball mu Rwanda barimo perezida, Twahirwa Alfred ndetse n’Umunyamabanga, Tuyisenge Pascal, umutoza w’ikipe y’igihugu, Bagirishya Anaclet ndetse na Team Manager, Joel Kagwegwe.

Inzobere ya IHF, Paul Landuré ari mu Rwanda mu ruzinduko rw’iminsi 3 ni mu ihe perezida wa CAHB, Dr Aremou Mansourou we ari uruzinduko rw’iminsi 2. Ni uruzinduko rujyanye n’imyiteguro y’igikombe cy’Afurika cya Handball cya 2026 u Rwanda ruzakira.

Biteganyijwe ko mu ruzinduko rwe rw’akazi rw’iminsi 2 mu Rwanda, Dr Aremou Mansourou azahura n’abagize inzego za Siporo mu Rwanda ndetse n’abayobozi ba FERWAHAND baganira ku myiteguro y’Igikombe cy’Afurika cya 2026 cy’Abagabo u Rwanda ruzakira.

Tariki ya 27 Gashyantare 2024, ubwo habaga umukino wa nyuma w’igikombe cy’Afurika cy’Abagabo cya 2024 cyegukanywe na Misiri itsinze Tunisia, aho u Rwanda rwasoje ku mwanya wa 14, ni bwo rwahawe ibendera nk’igihugu kizakira igikombe cy’Afurika gikurikiyeho.

Today, the Rwanda Handball Federation received @ihf_info Expert Paul Landuré, who is in Rwanda for a three-day visit, for the preparations of the Men’s Handball Africa Cup of Nations, which will be held in Rwanda in 2026.#Rwanda2026#Kigali2026#RwandaHandball pic.twitter.com/JFYz7pu81n

— Rwanda Handball Federation (@FerwahandRwanda) February 28, 2024

During his stay in Rwanda, he will meet the members of the Rwanda Sports Sector and Rwanda Handball Federation ahead of the preparations for the 2026 Men’s Handball Africa Cup of Nations that will take place in Rwanda. pic.twitter.com/xLIYcZEvoa

— Rwanda Handball Federation (@FerwahandRwanda) February 28, 2024

SG Pascal yakira Paul Landure

Umutoza Anaclet na SG Pascal baganira n’inzobere ya IHF, Paul Landure

Anaclet na Paul Landure

Yakiriwe n’abayobozi ba FERWAHAND

Perezida wa CAHB, Dr Aremou Mansourou (ufite indabo) yakiriwe n’abarimo perezida wa FERWAFA, Twahirwa Alfred (wa kabiri uturutse iburyo)

Abasifuzi mpuzamahanga b’Abanyarwanda bayobowe na Uwikunda Samuel bagombaga gusifura umukino wa Pyramids FC na Nouadhibou FC bakuweho kubera ko babuze visa ijya mu Misiri.

Tariki ya 2 Werurwe 2024, Pyramids FC yo mu Misiri izakira Nouadhibou FC yo muri Mauritania kuri 30 Juin Stadium mu mukino w’itsinda A rya CAF Champions League.

Ni umukino wagombaga gusifurwa n’abasifuzi barimo Abanyarwanda, Uwikunda Samuel, Ishimwe Claude ‘Cucuri’ na Mutuyimana Dieudonné ‘Dodos’.

Aba basifuzi bakaba bagombaga guhaguruka mu Rwanda kuri uyu wa Kane tariki ya 29 Gashyantare 2024 ariko visa za bo ntizabonekera igihe kandi bari batanze ibisabwa byose nk’uko byari bisanzwe.

Nyuma yo kutabona visa, aba basifuzi bakaba basimbujwe abasifuzi bo muri Afurika y’Epfo.

Nubwo bo babuze visa, Karangwa Jules, Umujyanama wa FERWAFA mu by’Amategeko akaba n’Umuyobozi w’Amarushanwa, arerekeza mu Misiri uyu munsi aho azaba ari umuhuzabikorwa ku mukino uzabera i Cairo hagati ya Al Ahly na Young Africans yo muri Tanzania ku wa Gatanu, tariki ya 1 Werurwe 2024.

Uwikunda Samuel ni we wagombaga kuba ari umusifuzi wo hagati muri uyu mukino

Ishimwe Claude Cucuri yagombaga kuzaba ari umusifuzi wa 4

Mutuyimana Dieudonne ari mu babuze visa