Umufana ukomeye wa Gasogi United, witwa Gatete yamaze kwerekeza mu ikipe ya Police FC.
Uyu mufana wari usanzwe agaragara ari inyuma ya Gasogi United y'umukire Kakooza Nkuliza Charles uzwi nka KNC, yaje ku kibuga yambaye imyambaro y'ikipe ya Police FC yakinnye na Gasogi United mu gikombe cy'Amahoro.
Muyoboke Alex yavuze ko ibyo Bruce Melodie yatangaje ko The Ben yamuhamagaye ngo bakorane indirimbo atari byo ahubwo ari we wamutumyeho.
Hamaze iminsi inkuru ku mbuga nkoranyambaga zijyanye no kutumvikana kwa hato na hato hagati ya Bruce Melodie na The Ben.
Byatangiye mu mpeza 2023 Producer Madebeats yavugaga ko Bruce Melodie yababajwe n’uko ko The Ben yanze ko bakorana indirimbo arimo akina play station.
The Ben yavuze ko atigeze amusuzugura ariko ko ibyabaye niba byarababaje Melodie amusabye imbabazi, gusa Melodie yaje guhita amubwira ako atakazanye imikino mu kazi.
Muyoboke Alex uzwi mu myidagaduro y’u Rwanda nk’umujyanama w’abahanzi, yavuze ko abantu bakwiye kureka guhanganisha abandi banashakira ikibazo aho kitari.
Muri iki kiganiro yahaye ikinyamakuru ISIMBI, yavuze ko bitumvikana ukuntu umuntu yasuzuguye undi 2017 ariko nyuma ya ho bagakomeza kuvugana, bagasangira kugeza 2021 bajya gukorana indi ndirimbo ariko ikibazo kikaba ari ibyabaye 2017.
Ati 'Nabonye bavuga ngo barapfa 'play station’, bose barazikina ntibazakubeshye ariko ibyo ni ibintu byabaye 2017, ako gasuzuguro ka 2017 abantu bagenda bakavuga ntabwo ari cyo kibazo kuko 2019 Melodie yagiye gukora indirimbo na Sheebah (Karungi) muri Uganda icyo gihe The Ben yari afiteyo igitaramo cya 'Black & White’.'
'Bamaze gufata amashusho Melodie yaje ari kumwe n’umuntu witwa Omarion wari umujyanama we icyo gihe, bari bari muri Governor Night Club, Ben yari kumwe na ba Pallaso n’abandi benshi, yabonye Melodie aramuhamagara araza baricarana, bararyohewe ku rwego rwo hejuru.'
Yakomeje avuga ko bitarangiriye aho kuko na 2021 Bruce Melodie yagiye kwa The Ben iwe mu rugo aho yari atuye barasangira, banafata umwanzuro wo kujya gukorana indirimbo.
Ati 'Reka mbivuge ku nshuro ya mbere ntabwo barimo gushaka kubivuga, nta kibazo gihari ahubwo abantu basesengure barebe neza. 2021 Melodie, Jado, Element na Kenny Sol bagiye kwa Ben ku i Rebero ni ho yabaga, bagiye bafite n’ibyo kunywa, bararyoherwa ku rwego rurenze urwo watekereza nk’abantu b’abahanzi.'
Yakomeje avuga ko kugeza icyo gihe nta kibazo bari bafite kuko banahavuye bajya muri Country Record gukora indirimbo, ahubwo ngo abantu bakwibaza impamvu iyo ndirimbo itasohotse kuko babivuga babica hejuru.
Muyoboke Alex ngo ntiyumva ukuntu ikibazo cyatangiye kuvugwa 2023 gishingiye ku ndirimbo ya 2017 kandi nyuma kugeza 2021 baravuganaga bakanabonana.
Muyoboke kandi yagarutse ku byo Bruce Melodie yigeze gutangaza avuga ko The Ben ari we wamuhamagaye ngo bakorane indirimbo yarangiza akamusuzugura, yavuze ko ari ikinyoma cyambaye ubusa.
Ati 'Umuntu witwa Omar muramuzi, ni inshuti ya bo bombi mwabonye ko yanambariye Ben mu bukwe bwe, yabwiye Ben ngo Melodie ashaka ko mukorana ikiganiro, Ben aramubwira ngo nta kibazo njyewe ndamufana, The Ben yafashe inzira ajya Monster Record ahamara amasaha ategereje Melodie, Melodie yaje asanga The Ben arimo akina iyo 'Play Station’.'
Muyoboke avuga ko iyo aba ari The Ben wamusabye ko bakorana indirimbo yari gusanga yateguye ibintu bye, yamaze kuririmba maze na Melodie akaza akararirimba ibye, ariko si ko bimeze ahubwo Melodie ni we wamusabye ko bakorana indirimbo n’ikimenyimenyi Bruce Melodie ni we waje ngo azanye na Producer Madebeat wari gukora iyo ndirimbo.
Uyu mujyanama w’abahanzi kandi yemeje ko yagerageje gushaka aho ikibazo kiri, yicaza The Ben aramubaza, anatuma Uncle Austin kwa Melodie kuko ari isnhuti ye ariko yaje gusanga nta kibazo gihari.
Bruce Melodie ngo yababajwe n’uko The Ben yamusuzuguye akanga ko bakorana indirimbo
The Ben yavuze ko atigeze asuzugura Bruce Melodie anamusaba imbabazi
Muyoboke Alex yavuze ko Melodie yabeshyeye The Ben
APR Handball Club yerekeje mu gihugu cya Algeria mu irushanwa rihuza amakipe yatwaye ibikombe by’igihugu iwayo “Cup Winners Cup”.
Iyi kipe y’Ingabo z’Igihugu yaharutse mu Rwanda mu rukerera rwo kuri uyu wa Gatatu tariki 17 Mata 2024 ni mu gihe irushanwa rizatangira ku wa Kane tariki 18 Mata 2024.
Ni imikino izabera mu nyubako ya Palais des sports Hamou-Boutlélis iherereye Oran muri Algeria.
Ikipe ya APR iri mu itsinda C HB CEB yo muri Algeria na JSK yo muri DR Congo. APR izakina umukino wa mbere na JSK “Jeunesse Sportive de Kinshasa” ku wa Kane 10h00′ zo muri Algeria.
Chérif Bayo, Umunya-Sénégal wakiniraga Kiyovu Sports yamaze kwandikira iyi kipe ayimenyesha ko yaseshe amasezerano kubera ko imaze amezi 2 itamuhemba.
Uyu mukinnyi wari wasinye imyaka 3 muri 2023, ejo hashize tariki ya 16 Mata 2024 yandkiye Kiyovu Sports inaha kopi FERWAFA iyimenyesha ko yamaze gusesa amasezerano.
Ati “Nshingiye ku kuba mutarubahirije ingingo ya 11 mu masezerano y’imyaka itatu nari nasinye, aho maze amezi abiri ntahembwa kandi nkaba mbayeho nabi i Kigali, ayo masezerano ararangira kuva igihe iyi baruwa ibagereraho ndetse ikagera no kuri FERWAFA.”
Chérif Bayo yasezeye Kiyovu Sports mu gihe habura imikino ine ngo umwaka w’imikino wa 2023/24 urangire. Bivuze ko atazakina umukino w’umunsi wa 27 na APR FC ku wa Gatandatu tariki ya 20 Mata 2024.
Bayo yamaze gusesa amasezerano yari afitanye na Kiyovu Sports
Abagande babiri, Ndahhiro Derrick na Moses Sseruyidde bakinira Police FC bashobora gutandukana n’iyi kipe kubera gusubira iwabo nta ruhushya basabye.
Aba bakinnyi bombi bivugwa ko batishimye muri Police FC bitewe n’uburyo bw’imikinishirize.
Moses Sseruyidde wageze muri iyi kipe avuye muri Kitara FC yo muri Uganda, we ngo yaba yarabwiye bamwe mu nshuti ze ko atazagaruka kubera ko atagumya kurya amafaranga ya Police FC adakina.
Ndahiro Derrick we akaba yarashwanye n’umutoza wa Police FC, Mashami Vincent kubera ko yamusimbuje ku mukino wa shampiyona w’umunsi wa 25 batsinzwemo na Gorilla FC 2-0.
Muri uyu mukino wabaye tariki ya 30 Werurwe 2024, Ndahiro Derrick yasimbujwe mu gice cya mbere hajyamo Rutanga Eric, ni nyuma yo kugaragara asa n’uwavunitse ariko akaba atarabyishimiye kuko yumvaga atababara cyane ku buryo yasimbuzwa.
Ubwo rero amakipe yajyaga mu karuhuko kubera ko u Rwanda rwari rwinjiye mu cyumweru cyo Kwibuka ku nshuro ya 30 Jenoside yakorewe Abatutsi mu 1994, ibikorwa byose by’imikino byari byahagaze.
Aha ni bwo Ndahiro Derrick yahise ajya muri Uganda ngo agiye kwivuza ariko agenda nta ruhushya yasabye ubuyobozi bw’ikipe, igihe cyo gusubukura imyitozo kigera ataragaruka, yajyanye na Moses Sseruyidde bose bakaba bakiri muri Uganda.
Police FC ikaba yarabandikiye ibasaba ubusobanuro uburyo bagiye batavuze ndetse kugeza ubu bakaba bataragaruka. Gusa andi makuru ISIMBI yamenye ni uko iyi kipe yaba yafashe umwanzuro wo gutandukana n’aba bakinnyi.
Umutoza wa Police FC, Mashami Vincent ari mu bihe bitoshye aho asezerewe na Gasogi United mu gikombe cy’Amahoro yahita yirukanwa muri iyi kipe y’Abashinzwe Umutekano mu gihugu.
Uyu mutoza ni umwe mu batangiye shampiyona ahabwa amahirwe yo kwegukana igikombe cya shampiyona ndetse anitwara neza mu gice kibanza cya shampiyona ariko mu mikino yo kwishyura biba bibi cyane aho yatsinzwe umusubirizo aho mu mikino 11 yatsinzwemo imikino 7 anganya 2 atsinda 2.
Mashami yakabaye yarirukanywe ariko kuko yari akiri mu gikombe cy’Amahoro, ntaho ubuyobozi bwari guhera cyane ko n’amakuru avuga ko amasezerano ye avuga ko agomba gutwara 1 mu bikombe bikinirwa mu Rwanda.
Police Fc iri muri 1/2 cy’igikombe cy’Amahoro, amakuru avuga ko mbere y’uko iyi kipe ijya mu mwiherero witegura uyu mukino Gasogi United, ubuyobozi bwabwiye umutoza Mashami ko naramuka asezerewe na Gasogi United ko na we nashaka azahita asezera kuko bizagorana ko yatoza imikino ya shampiyona isigaye.
Byatangiye kuba bibi kuri uyu mutoza watoje ikipe y’igihugu Amavubi aho umukino ubanza yaraye atsinzwe 1-0 na Gasogi United, akaba asabwa gutsinda umukino wo kwishyura akagera ku mukino wa nyuma ndetse akanagitwara.
Masami Vincent yagizwe umutoza wa Police FC muri Nyakanga 2022, imikino ibanza ya shampiyona ya 2023-24 yayisoje ari ku mwanya wa 2 arushwa na APR FC amanota 2, ubu iyi kipe iri ku mwanya wa 5 n’amanota 39, APR FC ya mbere irayirusha amanota 21.
Masami Vincent yicariye ishyiga rishyushye muri Police FC
Biravugwa ko ubwo umwaka w’imikino wa 2023-24 uzaba urangiye mu ikipe ya APR FC izarekura umubare munini w’abakinnyi bitewe n’umusaruro utari mwiza batanze.
Nubwo iyi kipe y’Ingabo z’Igihugu imeze nk’iyamaze kwegukana igikombe cya shampiyona, ariko muri rusange ntabwo umwaka wa yo w’imikino wagenze neza kuko mu bikombe yahataniye bigera muri 5 isigaye kuri kimwe gusa.
Iyi kipe yari yagarutse kuri gahunda yo gukinisha abanyamahanga, ku ikubitiro yatangiye itakaza igikombe cya ‘Super Cup’ itsinzwe na Rayon Sports 3-0, yasezerewe muri CAF Champions League itarenze umutaru, isezererwa muri Mapinduzi Cup ndetse inatsindwa na Police FC ku mukino wa nyuma wa Heroes Cup na Police FC.
Amakuru avuga ko iyi kipe ubwo umwaka w’imikino uzaba urangiye izakora impinduka aho izahera ku mutoza Thierry Froger n’umwungiriza we Khouda Karim bazaba basoje amasezerano, nta mahirwe bafite yo kongererwa amasezerano.
Imitoreze y’aba bagabo ntabwo ivigwaho rumwe, imikinishirize y’abakinnyi bafite nabyo bikaba biteza impaka aho hari n’abavuga ko bamwe mu bakinnyi urwego rwa bo rwamanutse.
Uretse abatoza n’abakinnyi bazarekurwa ari benshi bahereye ku banyamahanga bamwe na bamwe. Uri ku mwanya wa mbere ni umunya-Cameroun wasinye muri Mutarama 2024 akaba yarabuze umwanya wo gukina, Sanda Soulei akaba agomba kwerekwa umuryango.
Undi ni Umurundi Ndikumana Danny wayijemo mbere y’uko uyu mwaka w’imikino wa 2023-24 utangira. Uyu mukinnyi utarabonye umwanya wo gukina uhagije bivugwa ko APR FC izamutiza muri Marines FC akaba azajyana n’abandi bakinnyi b’abanyarwanda bagera muri 5.
Undi mukinnyi ushobora gusohoka muri APR FC ni umurundi ukina mu kibuga hagati, Nshimirimana Ismail Pitchou, amakuru avuga ko yifuza kuba yatandukana na APR FC ko afite andi makipe hanze y’u Rwanda amwifuza.
Uyu mugabo wapfuye ku myaka 82 y'amavuko, yamenyekanye cyane mu bucuruzi bw'itabi n'imitungo itimukanwa.
Yaherukaga mu Rwanda mu mwaka wa 2010, ubwo yaruvugamo nyuma bimenyekana ko yahungiye muri Afurika y'Epfo, igihugu yari asanzwe akoreramo ubucuruzi. Ni nyuma y'uko bitahuwe ko yanyerezaga imisoro ndetse agakorana n'abashaka guhungabanya umutekano w'u Rwanda, abatera inkunga.
Rujugiro wavukiye mu Rwanda ahagana mu 1941 yabaye mu Burundi igihe kinini nk'impunzi, ari naho yatangiriye ubucuruzi bw'itabi.
Akarere ka Kamonyi, Umurenge wa Rugalika, Akagari ka Sheri kuri uyu wa 16 Mata 2024 katangije ku mugaragaro Ubukangurambaga bw'umwaka wa Mituweli(ubwisungane mu kwivuza)2024-2025. Umwaka ushize wa 2023-2024 ibihembo bya mbere byegukanywe n'Umurenge wa Kayenzi mu gihe Akagari ka mbere ari aka Mukinga( bibaye imyaka 3 ntawe ugahiga) ko mu Murenge wa Nyamiyaga. Bahembwe Igikombe cy'Ubudashyikirwa n'icyemezo( Certificat) cy'Ubudashyikirwa. Ibanga ryo gutsinda babwiwe ko riri kwa'Mutwarasibo'.
Gutangira ibihembo mu Murenge wabaye uwanyuma mu kwishyura Ubwisungane mu kwivuza-Mituweri, byasobanuwe ko ari mu rwego rwo gutera ishyari ryiza abatsinzwe ariko kandi no kubavungurira ku ibanga abandi bakoresheje kugira ngo bibatere umwete. Umurenge n'Akagari byatsinze ni iby'igice cy'icyaro mu gihe Rugalika ya nyuma ari umwe mu mirenge itatu igize umugi w'Akarere ka Kamonyi.
Meya Dr Nahayo Sylvere, ni we washyikirije Umukozi w'Umurenge wa Kayenzi ibihembo by'Ubudashyikirwa nk'Umurenge wahize indi muri Mituweli.
Dr Nahayo Sylvere, Umuyobozi w'Akarere ka Kamonyi watangije ubu bukangurambaga yabwiye Abanyarugalika babaye abanyuma ko igikombe kibanyuze imbere kikagenda bareba gikwiye kubabera isomo ryo gukorana imbaraga no gushyira hamwe bakiha intego yo kuva ku mwanya wa nyuma, ko kandi babishatse nta cyabananira.
Yagarutse ku kamaro k'Ubwisungane mu kwivuza, abibutsa ko nubwo kuba uwa mbere ukabona amashimwe ari byiza, ariko ko bakwiye kumenya ko Ubwisungane mu kwivuza bufasha Kwivuza bitagoranye, ko uwarwara nta bwisungane byagorana cyane bigasaba ko abaturanyi n'inshuti biyegeranya bagashaka ubushobozi ku muntu wagakwiye kuba yarabyikemuriye bitagombye ko ajya kubera abandi Umuzigo.
Dr Nahayo Sylvere, ashyikiriza SEDO w'Akagari ka Mukinga ko mu Murenge wa Nyamiyaga ibihembo by'Ubudashyikirwa. Kamaze imyaka itatu kaza ku isonga mu tugari 59 tugize Kamonyi.
Ahereye ku ibanga ry'Akagari ka Mukinga kabaye aka mbere imyaka itatu yikurikiranya, yabwiye Abanyarugalika ko Ubuyobozi n'Abaturage byoroshye guhera kwa Mutwarasibo akegera ingo ze nkeya afite bakabiganira, bakabigira ibyabo cyane ko ari Ubuzima bwabo bityo igikorwa bakagikura mu nzira nta n'umwe usigaye bakesa Umuhigo ku buryo n'umwe usigaye babona atishoboye bamuzamura ubwabo bakamufasha bityo bakaba bamufashije gusigasira amagara ye.
Anastase Dushiminana, SEDO w'Akagari ka Mukinga kamaze imyaka itatu kiharira umwanya wa mbere muri Mituweli, yavunguriye ku Banyarugalika ibanga ryo gutsinda. Ati'Icyambere twakoresheje ni uko Abaturage bacu baziko Mituweli ari Ishema ry'Umuryango. Ikindi, Mituweli twayubakiye ku Isibo. N'aha rero ni muyubakira mu Isibo Abayobozi bakabegera ndabizi ubutaha, wenda nti muzaba aba mbere ariko muzaba aba Kabiri nyuma ya Mukinga'.
Umukozi w'Umurenge wa Kayenzi, Emmanuel Ruganintwari yabwiye Abanyarugalika ko kuba Abanyakayenzi barafashe umwanya wa mbere bahigitse Umurenge wa Nyamiyaga byabasabye kwicara baraganira bashyira imbaraga hamwe kandi bumva ko byose bishoboka bafatanije n'Abaturage.
Avuga kandi ko igikorwa bagitangiye hakiri kare, batangirana ubushobozi bujyanye n'uko buri muturage abashije ariko biha intego y'igihe. Avuga kandi ko habaye ugushyira hamwe kugera kuri Mutwarasibo ndetse n'umuturage basangaga bakamuganiriza, bamwereka ko Mituweli ari ukwibungabungira ubuzima.
Umukozi w'Akarere ka Kamonyi ufite Mituweli mu nshingano ze aganiriza Abanyarugalika uko bakwiye gukemura bwangu ibijyanye na Mituweli.
Kabera Innocent, Umukozi w'Akarere ka Kamonyi ufite Mituweli mu nshingano ze yibukije Abanyarugalika ko ibanga ryambere mu gutangira ku gihe Mituweli riri no mu gutangira kwishyura hakiri kare, ko kandi utayafite yose rimwe yiha intego agashyiraho make make mu gihe yihaye. Yabashishikarije kandi kujya mu bimina kuko byagaragaye ko nabyo ari imwe mu nzira zifasha mu gukemura byihuse iki kibazo cya Mituweli. Yababwiye ko uwatangira ubu byageza mu kwezi kwa 7 yabisoje ndetse yemerewe kwivuriza kuri Mituweli nshyashya.
Umwaka wa Mituweli ushize wa 2023-2024, Umurenge wa Rugalika niwo waherutse iyindi uko ari 12 igize Akarere ka Kamonyi. Utugari twawo uko ari 5, Nyarubuye niyo ibanziriza akanyuma mu tugari 59, ikurikirwa na  Kigese ya 57, Bihembe iya 55, Sheli iya 53, mu gihe Masaka ari iya 50 aho ari nako Kagari rukumbi gafite amanota ari muri 80%.
SEDO wa Mukinga, Anastase acigatiye igikombe n'icyemezo by'ishimwe.Umukozi w'Umurenge wa Kayenzi amaze gushyikirizwa ibihembo.Abaturage.Nubwo babaye aba Nyuma, bacinye akadiho ariko bahigira kuza ku isonga muri Mituweli batangiye.
