Category: Uncategorized

Ikawa yatangiye guhingwa mu Rwanda kuva mu 1900, iba igihingwa ngengabukungu gihingwa n'abaturage benshi.

Iki gihingwa gikunzwe ku isoko mpuzamahanga kigira uruhare mu kwinjiza amadovize menshi ava mu byohererezwa mu mahanga.

Nk'urugero mu mwaka wa 2022/2023 ikawa yoherejwe mu mahanga yari toni 20.064,9 zinjije miliyoni 115,9$ ni ukuvuga arenga miliyari 149,5 Frw, mu gihe mu mwaka wari wabanje wa 2021/2022 hari hoherejwe hanze ibilo 15,184,566 byinjiza miliyoni 75,5$ ni ukuvuga arenga miliyari 97,5 Frw.

Muri uyu mwaka wa 2024 ikawa y'u Rwanda yabonye irindi soko rizoherezwaho toni 76.8 za kawa itonoye [green coffee] izinjiza ibihumbi 384$, ni ukuvuga hafi miliyoni 500 frw.

Iri soko ryakomotse ku imurikagurisha rya Seoul rya 2024 ryahuriyemo abamurika barenga 400 barimo Gorilla's Coffee, Mountain Coffee Ltd, Musasa Coffee Cooperative, Kivu Belt Coffee, 3N Farms Ltd yamurikaga ubuki bw'umwimerere na SOZO Honey.

Iri murikagurisha ryitabiriwe n'abarenga ibihumbi 60, ryasojwe ibicuruzwa byose byajyanywe n'u Rwanda byarashize, abakiriya bishimira ikawa y'u Rwanda.

Uhagarariye Mountain Coffee, Eric Rukwaya yagize ati 'twishimiye kubona abakiriya bashya hano muri Koreya.'

Umuyobozi Mukuru wa Musasa Coffee Cooperative, Ernest Nshimiyimana yatangaje ko mu imurikagurisha bahahurira n'abantu benshi barimo abahita bababera abakiriya bashya n'abo bari basanganywe bakababwira ahakwiye gushyirwa ingufu.

Ati 'Twahahuriye n'abaguzi benshi ku buryo bashobora kuba baguriraga u Rwanda ariko batari batuzi, tubasobanurira amakuru ajyanye n'ikawa yacu. Nk'ubu hari abo twatangiye kuganira badusabye impagararizi, tuzazohereza kandi dufite icyizere ko tuzakomeza gukorana.'

Amasoko y'igihe kirambye yakomotse kuri iri murikagurisha agaragaza ko nyuma ya 2024 muri Koreya y'Epfo hazoherezwa kontineri 20, ni ukuvuga toni 384 za kawa itonoye [green coffee] biteganyijwe ko izinjiza miliyoni 1.92$, ni ukuvuga hafi miliyoni 2.5 Frw, ariko hakazanoherezwayo ikawa y'ubwiza buhebuje.

Umuyobozi w'Ishami rishinzwe Ibihingwa Gakondo mu Kigo cy'Igihugu gishinzwe guteza imbere Iyoherezwa mu mahanga ry'Ibikomoka ku Buhinzi n'Ubworozi, NAEB, Alexis Nkurunziza yatangaje ko kujyana abacuruzi mu imurikagurisha mpuzamahanga bifasha kubona isoko ryiza kandi n'igihugu kikamenyekana.

Ati 'Bibafasha kubona isoko mpuzamahanga kandi ryiza, kandi bidahenze. Ni ihuriro rigari aho abacuruzi n'abaguzi bahurira hanyuma bakaganira ku buryo babona amasoko.'

Ambasaderi w'u Rwanda muri Koreya y'Epfo Nkubito Bakuramutsa yagaragaje ko kuba u Rwanda rwaratsindiye kuba igihugu gihanzwe amaso muri iri murikagurisha, byatumye ibicuruzwa byose bibona abaguzi.

Ati 'Kuko ikawa nyinshi inyobwa muri Koreya y'Epfo iba yavuye hanze kandi bakaba bari gukunda ubwoko bushya bw'ikawa, abaguzi ba kawa muri iki gihugu bagaragaza amahirwe menshi. Aha muri Seoul twashyize imbaraga mu bufatanye ku buryo ikawa y'u Rwanda iba ihagaze neza kandi igera kuri benshi.'

Hari kandi ibigo by'ubucuruzi byo muri Korea byamaze kugaragaza ko bikeneye ubuki nyarwanda bw'umwimerere ngo bibukoreshe mu biribwa bigurishwa ku isiko rya Koreya y'Epfo, ibyoherezwa mu Buyapani, u Bushinwa n'u Burusiya.

Isoko rishya ry'ubuki biteganyijwe ko rizakenera toni 28 z'ubuki nyarwanda bw'umwimerere, bukazinjiza arenga miliyoni 420$, ni ukuvuga asaga miliyoni 546 Frw.

NAEB kandi igaragaza ko hari amasoko mashya y'ikawa n'ubuki aherutse kuboneka muri Qatar, bakaba bari mu nzira zo guhuza abaguzi n'abacuruzi.

Ubuyobozi buvuga ko buherekeza umuhinzi cyangwa uwohereza ikawa ku isoko mpuzamahanga kugira ngo adahendwa kandi agahuzwa na ambasade y'u Rwanda mu gace arimo ku buryo aramutse ahuye n'ikibazo yahita atabarwa.

Abanya-Koreya y’Epfo baryohewe n’ikawa y’u Rwanda

Ubuki na bwo bwahabonye isoko ryiza

Umunyamabanga Uhoraho muri MINEMA, Philippe Habinshuti yavuze ko bamwe bishwe n'inkangu abandi bicwa n'inkuba.

Abantu baheruka guhitanwa n'ibi biza ni abo mu karere ka Rutsiro bahitanywe n'inkangu nyuma y'imvura nyinshi yaguye mu ijoro rishyira ku wa Kabiri tariki 30 Mata 2024.

Ni mu gihe kandi no mu Karere ka Gasabo hari umugore n'umwana we bagwiriwe n'inzu bitewe n'imvura nyinshi yaguye mu mpera z'icyumweru gishize.

Iyi mvura kandi yangije ibikorwaremezo birimo inyubako, imihanda, ibihingwa n'ibindi bintu mu bice bitandukanye by'igihugu.

Habinshuti yavuze ko bakiri gusuzuma ngo hamenyekane ibintu bysoe byangijwe n'ibi biza.

Ikigo cy'Igihugu cy'Iteganyagihe, Meteo Rwanda, kimaze iminsi gitangaje ko mu minsi 10 ya mbere ya Gicurasi 2024, ibice byose by'u Rwanda bizagusha imvura nyinshi.

Hashize iminsi guverinoma y'u Rwanda ikangurira abantu batuye ahashyira ubuzima bwabo mu kaga kuhimuka.

Umuyobozi Mukuru ushinzwe gukurikirana ahashobora kwibasirwa n'ibiza muri MINEMA, Niyotwambaza Christine, yavuze hari abamaze kwimurwa mu bice bitandukanye.

Ati 'Tumaze kwimura imiryango 4768, twabonye imiryango igera mu 8300 iri ahashobora gushyira ubuzima bwayo mu kaga.''

Muri iyi minsi imvura nyinshi iri kugwa mu bice by'Amajyaruguru, Iburengerazuba, n'Amajyepfo. Bigaragaza ko ibice 326 bishobora kwibasirwa n'ibiza kubera imvura nyinshi.

Abantu 10 bishwe n’ibiza mu minsi mike ishize imvura nyinshi igwa

Umunyamakuru Niyitegeka Jules William [Chita], ari mu byishimo bikomeye we n’umugore we Batamuriza Yvette nyuma y’uko bibarutse umwana wa kabiri (ubuheta).

Mu gitondo cy’ejo hashize ku wa Kabiri tariki ya 30 Mata 2024 ni bwo uyu muryango wibarutse umwana w’umuhungu.

Chita akaba umuyobozi wa Chita Magic, abinyujije ku mbuga nkoranyambaga yagaragaje ibyishimo yatewe n’uyu mwana uje kumara irungu imfura ya bo, yashimiye umugore we amubwira ko amukunda cyane.

Bibarutse umwana wa kabiri nyuma y’uko muri Nyakanga 2021 bakoze ubukwe bahamya isezerano rya bo imbere y’Imana, biyemeza kuzatandukanywa n’urupfu.

Batamuriza Yvette afite umuyoboro wa YouTube witwa Queen of Chita akunda kunyuzaho ibiganiro ahanini birimo inama zigenewe abashakanye.

Umuryango wa Chita wibarutse ubuheta

Nisunze aya magambo akomoza ku bukwe n'umuryango mushya, nyuma y'uko Mutesi Aurore Kayibanda wabaye Nyampinga w'u Rwanda 2012, atangaje ko we n'umukunzi we Gatera Jacques, bazakorera ubukwe bw'abo i Kigali mu Rwanda, mu muhango uzaba tariki 15 Kanama 2024.

Yabitangaje ku mugoroba wo kuri uyu wa 30 Mata 2024, agaragaza ko we n'umukunzi we Gatera Jacques, bagiye guhuriza hamwe imiryango, inshuti n'abavandimwe mu birori by'imbonekarimwe mu gutangiza paji nshya mu mubano w'abo.

Jacques Gatera ugiye kurushinga na Kayibanda, asanzwe ari umwe mu bashoramari bakomeye mu Rwanda, kandi bafite ubumenyi mu mukino wa Golf.

Urukundo rw'abo rwitamuruye, ndetse ruvugwa cyane mu itangazamakuru, ubwo ku wa 19 Mutaram 2023, Gatera yambikaga impeta y'urukundo (Fiançailles) Kayibanda.

Uyu mugabo ari kumwe na Innocent Rutamu bafashije ikipe ya Kigali Golf Club kugera muri kimwe cya kabiri cy'imikino ya '2022 PMC Golf Championship'.

Mu 2000, nibwo yagiye gutura muri Leta Zunze Ubumwe za Amerika nyuma yo kuva muri Repubulika Iharanira Demokarasi ya Congo (RDC) n'umuryango we.

Kimwe mu binyamakuru byandikira muri San Francisco muri Leta California cyitwa SFGATE, gisobanura Jacques Gatera nk'' umwe mu bahanga bari bakiri bato mu mukino wa Golf bigaragaje muri Phoenix mu 2005'. Icyo gihe yari afite imyaka 18 y'amavuko.

Iki kinyamakuru gikomeza kivuga ko Gatera ari kumwe n'abavandimwe be Patrick Kisomanga ndetse na Serge Gashegu baje kwihuza na Tim Kloenne wabafashije kwisanga mu mikino ikomeye ya Golf yaberega muri Phoenix.

We n'abavandimwe be bavuka kuri Se Anaclet Munyurangabo ndetse na Nyina Therese Mbuya. Amakuru avuga ko Gatera Jacques, umugabo wa Miss Aurore yagaragaje ubuhanga cyane kurusha abavandimwe be mu mikino ya Golf, bituma aba Kapiteni w'ikipe mu mashuri yisumbuye.

Uretse kuba ari umuhanga mu gukina Golf, Jacques Gatera asanzwe afite n'ibikorwa by'ubushabitsi akorera mu Rwanda no muri Leta Zunze Ubumwe za Amerika.

Ku wa 5 Mutarama 2024, Miss Kayibanda yanditse amagambo yuzuye imitoma yifuriza umukunzi we isabukuru y'amavuko. Bari bamaze umwaka urenga mu munyenga w'urukundo, waherekejwe no kwambikwa impeta y'urukundo.

Mu magambo ye ati 'Umunsi mwiza w'amavuko ku mugabo w'ubuzima bwanjye, Imana ihe umugisha imirimo y'amaboko yawe, intambwe zawe hejuru ya byose umutima wawe w'igikundiro n'ubugwaneza. Uzarambe kugira ngo uzabone ibyo wifuje kubona mu buzima bwawe bwose. Ndagukunda kandi mpora nishimira kubaho kwawe buri munsi.'

Mu Ukuboza 2023, yanditse kuri Instagram ye ashima Imana yamuhaye umugabo w'ubuzima bwe. Yavuze ati 'Umugisha wanjye, umuntu mwiza utandukanye n'abandi. Warakoze Mwami ku bwo kunkunda cyane ukampa kubana n'umugabo utangaje.'

Kuva mu 2012 yakwambikwa ikamba rya Miss Rwanda kugeza n'uyu munsi Mutesi Aurore Kayibanda aracyabona abamwandikira ku mbuga nkoranyambaga n'ahandi atanga ibiganiro bamubwira ko ari Nyampinga w'ibihe byose w'u Rwanda.

Kayibanda abitse mu kabati ke ikamba rya Miss Rwanda yegukanye tariki 2 Nzeri 2012, irya Miss Fespam Panafrica yegukanye mu 2013 muri Congo Brazzaville, ndetse yahagarariye u Rwanda muri Miss Supranational yo mu 2013 yabereye i Minsk mu Mujyi wa Belarus.

Yigeze kubwira InyaRwanda, ko aya makamba yose yegukanye ayakesha gusenga, ikinyabupfura no kwihugura agakurikiza ibyo amarushanwa yamusabaga.

Uyu mugore ubarizwa muri Leta Zunze Ubumwe za Amerika, avuga ko itariki yambikiweho ikamba rya Miss Rwanda 2012 yahinduye ubuzima bwe mu buryo butandukanye, ihindura amateka ye kugeza kuri ubu.

Akavuga ko ikamba rya Miss Rwanda ryafunguye amarembo y'ubuzima bwe, aho akomanze arakingurirwa rimuhesha akazi kugeza n'uyu munsi.

Yavuze ati 'Ikamba ryahinduye byinshi mu buzima bwanjye kuko hari utuzi twinshi nagiye mbona n'ubu nkibona kuko ryampaye urubuga.'

Gatera Jacques ugiye gukora ubukwe na Miss Aurore Kayibanda asanzwe ari umuhanga mu mukino wa Golf
Aba bombi basezeranye imbere y'amategeko ya  Amerika, ku wa 28 Gashyantare 2024, mu muhango wabereye Goodyear Phoenix mu Mujyi wa Arizona
Nyuma yo gusezerana mu mategeko, Kayibanda yanditse kuri konti ye ya Instagram, yabwiye umukunzi we bamaranye imyaka ibiri ko ibihe by'isezerano ry'abo bizakomeza 'kuba urwibutso rw'indi minsi imeze nk'iyi'
Gatera ni umwe mu bakinnyi beza bakina umukino wa Golf cyane ko ari mu cyiciro cya 3 handicap Golf; uru ni urwego rw'ubuhanga buhebuje mu mukino wa Golf

Urubuga rw’amakuru rufite icyicaro i San Francisco, muri California , SFGATE, rwamuvuze ko ari ‘Umwe mu bakinnyi ba Golf beza bakiri bato muri Phoenix'. Icyo gihe byari mu 2005 afite imyaka 18 gusa

Mu gitondo cyo kuri uyu wa Gatatu tariki ya 1 Gicurasi nibwo Igisirikare  cy’u Rwanda  (RDF) kibinyujije ku rubuga rwabo rwa a X rwahoze ari Twitter cyatangaje aya makuru.

RDF yavuze ko ubuyobozi bw’iki cyiciro gishinzwe ibijyanye n’Ubuzima, buyobowe na Major General Dr Ephrem Rurangwa. 

Ni mu gihe Col Dr John Nkuriyehe yazamuwe mu ntera ahabwa ipeti rya Brig General ahita anagirwa Umugaba Wungirije w’iki cyiciro naho ushinzwe ibikorwa bijyanye n’ubuvuzi akaba ari Brig Gen Dr.Jean Paul  Bitega.

Ibi bibaye nyuma y’uko Inteko Rusange y'umutwe w'abadepite tariki ya 14 Werurwe aribwo yari yemeje ishingiro ry'umushinga w'iri tegeko rigenga ingabo z'u Rwanda.

Nubwo Rayon Sports yegukanye igikombe cy’Amahoro ariko ntacyo yacyuye kuko cyari cyatangiye kubangirikira mu ntoki.

Ni nyuma y’uko yari yegukanye iki gikombe itsinze Indahangarwa ibitego 4-0 mu mukino wa nyuma w’igikombe cy’Amahoro wabaye ejo hashize ku wa Kabiri tariki ya 30 Mata 2024 kuri Kigali Pele Stadium.

Nk’ibisanzwe ikipe yashyikirijwe igikombe, batangira kukishimira, abakinnyi bakifotorezaho. Muri uku kukishimira ni bwo cyatangiye kwangirika, umukinnyi yagifata kigafobagana hafi kuroboka.

Amakuru ISIMBI yamenye ni uko abakinnyi n’abatoza bahise babyereka ubuyobozi bw’ikipe ya bo, bababwira ko bitewe n’uko kimeze byagorana ko banakigeza ku biro by’iyi kipe biri Kicukiro, bishobora kurangira buri umwe ugifashe asigarana ibice bice.

Aha ni ho Rayon Sports yahise ibyereka Ishyirahamwe ry’Umupira w’Amaguru mu Rwanda, FERWAFA, maze ribasaba gusubiza icyo gikombe bakazajya gufata igikombe gishya nyuma ya konji (kanji y’abakozi y’uyu munsi).

wari umunsi mubi kuri FERWAFA, Kaboy watsinze 'Hat-Trick' yasabwe gutega moto akajya gufata umupira 'Ballon' kuri FERWAFA

Si ibi gusa kuko FERWAFA yagaragaje ikindi kintu gisa n’agashya kuri uyu mukino wa nyuma aho umukinnyi watsinze ibitego 4 byose bya Rayon Sports, Mukandayisenga Jeannine [Kaboy] yimwe umupira (Ballon) nk’umukinnyi watsinze ibitego 3 mu mukino umwe 'Hat-trick'.

Nk’ibisanzwe birazwi ko umukinnyi watsinze ibitego 3 mu mukino umwe 'Hat-trick' ahabwa umupira akawutahana, gusa ejo si ko byagenze kuko Kaboy watsinze ibitego 4 byose Rayon Sports yatsinze Indahangarwa, yabwiwe ko bitateguwe.

Imipira yakinwe ni iya FERWAFA kuko igikombe cy’Amahoro ni yo igitegura, bivuze ko n’umupira Kaboy yagombaga guhabwa ari uwa FERWAFA, gusa yatunguwe no kuwubaza bakamubwira ko bitari muri gahunda.

Amakuru ISIMBI yamenye ni uko yabwiwe ko imipira yazanywe kuri Kigali Pele Stadium nta n’umwe ugomba kuvaho ahubwo ko yazajya ku biro bya FERWAFA gufata undi mupira, ngo hari imipira ya CAF ni yo bagomba kumuhamo.

Ibi yasanze atazabivamo, ni ko kuvugana n’ubuyobozi bw’ikipe ye ya Rayon Sports bamuha umupira w’ikipe ya Rayon Sports.

Iki gikombe byarangiye bagisubije kuko cyari cyatangiye kwangirika

Kaboy yahawe umupira wa Rayon Sports, FERWAFA yari yamusabye kuzajya gufata uwa CAF ku biro

Bamwe mu bafite ababo bashyinguwe, bavuze ko kuba babashije kubashyingura, byabaruhuye mu mitima.

Gahongayire Corneille, umwe mu babonye imibiri y'abo mu muryango we, yavuze ko kubashyingura mu cyubahiro, bizagabanya agahinda yari amaranye imyaka 30.

Ati 'Uyu munsi ndumva naruhutse kuko nabashije gushyingura imibiri y'abanjye tukayishyingura mu cyubahiro. Mbere habayeho gushakisha, twajyaga tuza hano i Ngoma, tugashakisha hariya za Kaminuza hose, ariko ntitubashe kumenya neza amakuru.''

Umuyobozi w'akarere ka Huye Sebutege Ange, yashimye ubutwari by'umwe mu bafundi wagize uruhare mu itangwa ry'amakuru ubwo yangaga ibihembo bamushukishaga, ngo ahishe amakuru y'imibiri ya mbere yabonetse ubwo bubakaga inzu.

Yagize ati 'Turashimira umukozi watanze amakuru wari wahawe akazi ko kubaka, akanga kumvira abagome akanga n'amafaranga bari bamuhaye ngo abiceceke, ahubwo akihutira kubimeyesha ubuyobozi bw'umudugudu, bikaba bigaragara ko byatanze umusaruro.''

Mu kiganiro cyagarutse ku mateka ya Jenoside yakorewe Abatutsi mu cyahoze ari Perefegitura ya Butare, Minisitiri w'Ubumwe bw'Abanyarwanda n' Inshingano mboneragihugu, Dr Bizimana Jean Damascène, yagaragaje ko kuba mu cyahoze ari Butare harimo abakinangira ntibatange amakuru y'ahajugunywe imibiri, bikomoka ku rwango bigishijwe igihe kirekire na bamwe mu banyapolitiki bo muri aka gace, aho ubugome bw'abakoze Jenoside bwageze no mu baganga.

Umunyamabanga wa Leta muri Minisiteri y'ubuzima, Dr Butera Yvan, yasabye Abanyarwanda kugendera mu murongo mwiza u Rwanda rwihaye wo guharanira ubumwe bw'Abanyarwanda kugira ngo ibyabaye bitazasubira.

Ati 'Turashima Leta yacu ku cyerekezo iduha cyo kuba umwe, kwirinda icyo ari cyo cyose cyakongera gutanya Abanyarwanda, ndetse no guha Abanyarwanda bose amahirwe angana mu kubaka igihugu cyacu''.

Yakomeje abasaba abaturage kwirinda no kurwanya ingengabitekerezo ya Jenoside, aboneraho no kubibutsa ko icyaha cya Jenoside n'ingengabitekerezo yayo bidasaza.

Mu mibiri 2073 yashyinguwe mu cyubahiro mu rwibutso rwa Ngoma, harimo imibiri 2060 yabonetse mu Murenge wa Ngoma, mu Kagari ka Ngoma, mu Mudugudu wa Ngoma V, naho indi mibiri 13 yabonetse mu bice bice bitandukanye by'Umurege wa Ngoma.

Urwibutso rwa Ngoma, rusanzwe ruhukiyemo indi mibiri isaga ibihumbi 52 y'Abatutsi bishwe muri Jenoside mu 1994 babonetse mu bice bitandukanye by'Umujyi wa Huye,mu gice cy'Umurenge wa Ngoma.

Muri uyu murenge kandi hari urundi rwibutso rwa Kaminuza y'u Rwanda, ishami rya Huye ruruhukiyemo imibiri isaga 500 ndetse n'imva iri mu ishuri ry'ubuhinzi n'ubworozi rya Kabutare iruhukiyemo abanyeshuri 60 bishwe muri Jenoside.

Inshuti n’abavandimwe b’abashyinguye ndetse n’abandi bose batuye i Huye bari bitabiriye uyu muhango

Hashyinguwe imibiri 2073

Bamwe mu bayobozi bakuru barimo n’abasenateri bitabiriye uyu muhango

Abayobozi bakuru barimo n’abaminisitiri bari bitafatanyije n’abaturage b’Umurenge wa Ngoma kwibuka no gushyingura

Benshi bashyize indabo ku mva zishyinguyemo abishwe muri Jenoside yakorewe Abatutsi

The Sun yatangaje ko uyu mugabo yoherejwe mu Rwanda hakoreshejwe indege isanzwe itwara abagenzi ndetse akaba afite inkomoko muri Afurika. Amakuru avuga ko uyu mugabo yaje mu Rwanda ku bushake bwe, akaba yarahawe ibihumbi 3 by'ama-pound, ajya kungana na miliyoni 4,8 Frw.

Bivugwa ko uyu mugabo yoherejwe mu Rwanda ku wa Mbere nimugoraba, nyuma y'uko mu mpera za 2023 yabuze ibyangombwa bimwemerera gukomeza gutura mu Bwongereza.

Ishyaka rya Labour Party ridashyigikiye iyi gahunda ryamaze gutangaza ko Leta yihutiye gushyira mu bikorwa iyi gahunda mbere y'amatora mu nzego z'ibanze ategerejwe kuri uyu wa Kane mu Bwongereza, icyakora Leta ikemeza ko kuba Umwimukira wa mbere yuriye indege imuganisha i Kigali, ari ikigaragaza ko iyi gahunda ishoboka kandi izatanga umusaruro.

BBC ivuga ko nibura gahunda yo kohereza abimukira mu Rwanda izatangirana n'abantu 5700 bamaze kwemerwa na Leta y'u Rwanda, aho abarenga gato 2000 bashobora guhita bategurwa vuba ndetse bakoherezwa mu Rwanda. Ni gahunda ishobora kuzatangira muri Nyakanga uyu mwaka.

Umuvugizi wa Leta Wungirije, Allain Mukuralinda, aherutse gutangaza ko u Rwanda rutaramenya neza umubare w'abimukira ruzakira, gusa avuga ko mu gihe cyose baramuka bazanywe mu gihugu, imyiteguro yo kubakira yarangiye ku buryo nta kibazo na kimwe bashobora kugira, hakurikijwe ibiri mu masezerano hagati y'u Bwongereza n'u Rwanda.

Mu mwaka ushize, n'ubundi abimukira binjiye mu Bwongereza mu buryo butemewe n'amategeko bagera ku bihumbi 19, bavanywe muri icyo gihugu ku bushake.

Muri rusange, abimukira bari mu cyiciro cy'abazoherezwa mu Rwanda, nk'uko The Japan Times yabitangaje, ni abanjiye mu Bwongereza mu buryo butemewe n'amategeko kuva nibura ku itariki ya 1 Mutarama 2022.

Kuva icyo gihe, abarenga ibihumbi 50 binjiye mu Bwongereza mu buryo butemewe n'amategeko.

Umwimukira wa mbere yoherejwe mu Rwanda ku bushake

Byabaye mu ijoro ryo ku wa 29 Mata 2024 rishyira ku wa 30 Mata.

Imvura imaze iminsi igwa muri aka Karere yasomeje ubutaka, bituma iyaguye ku wa 29 Mata iteza inkangu yakubise inzu ebyiri zihitana abana babiri bo mu miryango itandukanye.

Umuyobozi w'Akarere ka Rutsiro, Kayitesi Dative yabwiye IGIHE ko kugwa nk'izi nzu byaturutse ku mvura imaze iminsi igwa muri aka karere.

Ati “Ni imikingo yahubutse yikubita ku nzu zigwira abana babiri bo mu miryango itandukanye. Uw'imyaka 12 n'imyaka 16. Wabonaga ari amazu atari adakaganye ku buryo yagwa”

Meya Kayitesi yavuze ko bazindukiye aho iyi mpanuka yabereye bahumuriza ababuze ababo, banabafasha kubona ubushobozi bwo gushyingura.

Ati “Abaturage turabasaba kuba maso no kuva ahabashyira mu kaga, batitaye ku bintu bihari, burya ubuzima nibwo bwa mbere ibintu ni ibishakwa”.

Uretse aba bana babiri bahitanywe n'inkangu hari undi muntu umwe wo Murenge wa Boneza wakubiswe n'inkuba arapfa.

Ubuyobozi bw’akarere ka Rutsiro bwatabaye abahuye n’ibiza bubaha ubufasha bwo gushyingura