Category: Uncategorized

Kuri uyu wa Gatanu tariki 10 Gicurasi ni bwo hamuritswe ubushakashatsi bwakozwe ku banyeshuri bo muri Kaminuza y’u Rwanda, ku bijyanye n’ubuzima bwabo bwo mu mutwe (Mental Health). 

Ubu bushakashatsi bwise ‘Analyizing Mental Health Needs And Strenghts At The University of Rwanda: From Assesment To Practical Solutions’. Ni ubushakashatsi bwakozwe ku bufatanye na Solid Minds hamwe na Master Foundation.

Mu kinyarwanda bisobanura ngo ”Gusesengura ubuzima bwo mu mutwe bukenewe n’imbaraga kuri Kaminuza y’u Rwanda: Bikava mu gusuzuma bigashyirwa mu bikorwa bishakirwa ibisubizo”. 

Ubu bushakashatsi ntabwo bwibandaga mu kureba umubare w’abanyeshuri bafite ibibazo by’ubuzima bwo mu mutwe, ahubwo hibanzwe mu kureba ibintu by’ingenzi bituma bagira ibi bibazo no kubishakira ibisubizo.

Dr. Uwihoreye Chaste umwarimu muri Kaminuza y’u Rwanda akaba anita ku buzima bwo mu mutwe, ni we wari ukuriye ubu bushakashatsi, yatangarije InyaRwanda impamvu nyamukuru hakozwe ubu bushakashatsi bugakorerwa ku banyeshuri.

Yagize ati: “Dukora ubu bushakashatsi twari dufite intego eshatu z’ingenzi, intego ya mbere kwari ukureba ibibazo by’ubuzima bwo mu mutwe haba mu banyeshuri ndetse no mu bakozi ba Kaminuza y’u Rwanda. 

Icya kabiri kwari ukureba gahunda ziriyo zo kwita ku buzima bwo mu mutwe bw’abanyeshuri, hanyuma icya gatatu kwari ukureba n’ibihe bikorwa n’ibikoresho byakwifashishwa kugira ngo abanyeshuri bagire ubuzima bwiza”.

Dr. Uwihoreye Chaste yasobanuye byimbitse ibyavuye muri ubu bushakashatsi

Yasobanuye ko ubu bushakashatsi bwagendeye ku mibare yatanzwe yagaragajwe n’ubushakashatsi bwakozwe na Minisiteri y’Ubuzima, bwerekanye ko mu Rwanda hari abantu 20% bafite ibibazo byo mu mutwe harimo n’urubyiruko, mu gihe hari 15% by’abarokotse Jenoside yakorewe Abatutsi mu 1994 babana n’ibibazo by’ubuzima bwo mu mutwe, naho 5% bafite ibi bibazo ari bo bashaka ubufasha.

Urubyiruko rwa Kaminuza y’u Rwanda rwitabiriye uyu muhango

Muri ubu bushakashatsi hagaragaye bimwe mu bibazo by’ingutu byibasira ubuzima bwo mu mutwe bw’abanyeshuri bo muri Kamunuza. Byashyizwe mu byiciro 3 ari byo; Ibibazo by’amarangamutima (kubabara, agahinda, kwigunga,ubwoba);

Icyiciro cya 2 cyijyanye n’imyitwarire idahwitse irimo abakoresha ibiyobyabwenge, kwishora mu nzoga n’izindi ngeso zishyira ubuzima bwabo mu kaga. Icyiciro 3 cyagaragaje ko imibanire hagati yabo ubwabo igoranye ndetse bamwe muri bo bagahitamo kuba bonyine (Loneliness).

Dr. Uwihoreye Chaste yavuze ko kandi muri ubu bushakashatsi hagaragaye ko muri Kaminuza hari ibikorwa byo kwifashisha harimo nk’amavuriro, abajyanama mu mitekerereze, gusa ikibazo ni uko abanyeshuri batajya babyifashisha, ariyo mpamvu babakanguriye kujya bitabira kugana aya mavuriro no kuganirizwa ku bijyanye n’ubuzima bwo mu mutwe kuko benshi muri bo batarabisobanukirwa neza.

Irumva Gad Anaclet umunyeshuri wa Kaminuza y’u Rwanda mu ishami rya Nyarugenge, wari yitabiriye imurikwa ry’ubu bushakashatsi, yagaragaje ko yishimiye ibyakozwe gusa agira icyo asaba. 

Aganira na InyaRwanda, yagize ati: “Ni byiza ko twatekerejweho, ariko turasaba amahugurwa ku buzima bwo mu mutwe, dukeneye inzobere zizajya zidusura zikatwigisha kuko duhura n’ibibazo byinshi birimo kugorwa n’imyigire yacu, ubuzima tubayemo bugoye n’ibindi”.

Umunyeshuri Gad Irumva yasabye ko bahabwa amahugurwa ku bijyanye n’ubuzima bwo mu mutwe

Ibi byenda gusa nk’ibyagaragajwe n’ubu bushakashatsi buvuga ko urubyiruko rwo muri Kaminuza rufite ibibazo bishobora kuba intandaro yo kwangiza ubuzima bwabo bwo mu mutwe, harimo nko kubaho ubuzima bukomeye, ibibazo mu miryango yabo, ibibazo by’amikoro macye n’ibindi.

Mukamwezi Justine uyobora ibitaro byita ku buzima bwo mu mutwe bya ‘Solid Minds’ byatangiye mu 2018 bikaba biri mu bafashishije gukora ubu bushakashatsi, yatangaje ko biteguye gufasha urubyiruko rwo muri Kaminuza rufite ibibazo by’ubuzima bwo mu mutwe kuko intego yabo byari ukumenya ibibazo bafite bakabona kubaha ubufasha bakeneye.

Dr. Iyamurenye Jean Damascene ushinzwe ubuvuzi bw’indwara zo mu mutwe mu Kigo cy’Igihugu cy’Ubuzima RBC, yashimye abakoze ubu bushakashatsi anakangurira abanyeshuri kutihererana ibibazo by’ubuzima bwo mu mutwe

Hafashwe ifoto y’urwibutso ku bitabiriye kumva ibyavuye mu bushakashatsi bw’ubuzima bwo mu mutwe ku banyeshuri ya Kaminuza y’u Rwanda

Ubwo Ingabo zari iza APR zatangiraga urugamba rwo kubohora igihugu ku wa 01 Ukwakira 1990 ku munsi wakurikiyeho Gen Rwigema wari uyoboye urugamba yarashwe n'umwanzi, igikuba kiracika mu ngabo bacika intege karahava.

Ingabo zakomeje kwihagararaho ariko biba iby'ubusa batangira gutsindwa uruhenu, biba ngombwa ko Perezida Kagame icyo gihe wari mu masomo muri Leta Zunze Ubumwe za Amerika aza kuyobora uru rugamba APR yagombaga gutsinda ku kiguzi cyose.

Ubwo Urwego rw'Ubwiteganyirize mu Rwanda, RSSB rwibukaga Abatutsi bahoze ari abakozi ba Caisse Sociale du Rwanda bishwe muri Jenoside, Col Mugisha yerekanye ko icyo gihe Perezida Kagame yaje nk'umucunguzi.

Uyu muyobozi wari mu myaka ya za 20 yavuze ko Perezida Kagame yaje bamwe barashwe n'umwanzi nta miti, mbese urugamba rwayoberanye “nibwo Nyakubahwa Umugaba w'Ikirenga yaje ibintu bisubira ku murongo.'

Ati “Bwari uburyo bugoranye cyane. Urumva gusanga abantu bacitse intege, bashonje, batsinzwe batagira abayobozi, guhera hejuru bose bari hasi […] abandi bakomeretse nta miti, nta byo kurya, nta buzima mufite.'

Uyu muyobozi avuga ko Perezida Kagame akihagera aho kubabwira gukomeza urugamba yabanje kwitonda, ntiyatinya no kuvuga ko intambara igomba kuba ihagaritswe, ingabo zose zitegekwa gusubira inyuma.

Yarabahumurije ababwira ko abarwayi bagomba kubanza kuvurwa, abarya bakarya, bakanaryama bagasinzira, ibintu batabashije kumva cyane ko bo bumvaga bazarwana kugeza ku mwuka wa nyuma.

Ati “Uzi umuntu ukubwira ngo nibabahe ibyo kurya murye muryame. Bagire bate? Babahe ibyo kurya murye muryame. Birashoboka se? twumvaga bitabaho kuko twumvaga ubuzima bwacu ari ukurwana mpaka dupfuye, ariko we ati muryame muruhuke iby'urugamba nzabibabwira nyuma.'

Nk'umusirikare wari warazahaye, Col Mugisha yavuze ko iryo jambo ry'ihumure atazaryibagirwa 'hari mu 1990 mu Ukwakira ntabwo iryo jambo rizamvamo.'

Umuyobozi mu Ngabo z'u Rwanda, RDF, ushinzwe guhuza abasivile n'abasirikare, Col Vincent Mugisha yerekanye uburyo ubuhanga bwa Perezida Kagame bwigaragaje akigera mu Ngabo za APR

Kuva ubwo ibintu byarahindutse, igisirikare kiravugururwa, 'abari abayobozi baba abayoborwa' Perezida Kagame yicarana n'abari ku ikotaniro bajya inama, iye iba iyo guhindura imirwanire kugira ngo intsinzi izaririmbirwe i Kigali bidatinze.

Ariko 'Wareba ukabona iyo ntsinzi ntuyibona. Aratubwira ngo izarangira kandi ni twe tuzayirangiza. Ibyo babyita kwiyemeza, [nawe rero] nutsindwa uyu munsi, ntuzacike intege ubuzima burakomeza, umushinga nupfa uzatekereze undi.'

Icyo gihe hari abantu bakiva muri Uganda bavaga kure kuko bamaze nk'ukwezi mu nzira baza ku ikotaniro, na cyane ko Abagande bababuzaga kujyayo, icyakora bakihagera Perezida Kagame yavuze ko ibyo kurwana bya mpangara nguhangare (Conventional warfare) biba bihagaritswe.

Ubu ni uburyo bwo kurwana igihugu gihanganye n'ikindi hamwe umwanzi azana indege na we ukazana indi, yazana igifaru na we ukacyitabaza.

Icyakora Perezida Kagame yavuze ko batahangana gutyo kuko bari bafite ibikoresho bike, yanzura ko barwana mu buryo bwa 'Guerrilla warfare.'

Ati 'Ni uburyo bwo mu matsinda. Ni uburyo tutatekerezaga. Yavuze ko turi abanyantege nke, yemeza ko bene uwo bubikira, ati nimwubikire, murebe ahantu hari intege nke [muhabyaze umusaruro]. Twarabikoze bitanga umusaruro.'

Ba basore b'inkorokoro bari bavuye muri Uganda bakihagera Perezida Kagame yabakozemo itsinda (bataillon) bajya kurasa bahereye ku Mupaka wa Gatuna, icyo gihe ngo Habyarimana yari yagiye kwishimira i Gabiro ko Inkotanyi yazitsinze.

Abahoze ari abakozi ba Caisse Sociale du Rwanda bishwe muri Jenoside yakorewe Abatutsi bibutswe

Ku wa 29 Werurwe 1991 mu gace ka Nsele i Kinshasa, hasinyiwe amasezerano ya mbere hagati ya FPR Inkotanyi n'iyari Guverinoma y'u Rwanda, agamije guhagarika imirwano.

Perezida w'icyahoze ari Zaïre (RDC y'ubu) Mobutu Sese Seko yasabye FPR-Inkotanyi kumvikana na Perezida Habyarimana, icyakora kuri iyi nshuro kuko bumvaga ko batsinze ibyari imishyikirano ubutegetsi bw'u Rwanda burabisesa.

Col Mugisha ati 'Baravuze ngo ntacyo bavugana natwe, ariko Inkotanyi ntabwo zipfa. Indege Mobutu yari yoherereje Inkotanyi ntiyongeye kuzitwara kuko bumvaga bazinesheje baziroshye Uganda.'

Inkotanyi zibonye byanze zakomeje umutsi, Col. Mugisha akavuga ko bahise barasa i Gatuna, za mbaraga zari i Nyagatare zoherezwa mu bice bya Byumba, Habyarimana akibitekerezaho na Ruhengeri iba irashweho, bitangira kumuyobera.

Ati 'Icyo gihe amayeri y'urugamba yarahindutse intege zisubizwa mu bugingo, kuko twari tubonye ibyo kurya.”

Icyo gihe barwaniraga mu kibuga burende itarazamuka imisozi, bikaba umuntu ku wundi, bagahangana nta bwoba.

Nk'amayeri y'urugamba Inkotanyi zacukuye imyobo, zihangana n'Inzirabwoba za Habyarimana rubura gica, aho babonye Inzirabwoba zimaze kuba nyinshi Inkotanyi zigakuramo akarenge, zikajya gutera ahandi.

Icyo gihe EX-FAR zabaga zirangariye hamwe zibeshyaga ko ari inyundo ziri kwicisha isazi, ko zije gutsinsura Inkotanyi ejo zikumva Ruhengeri bayigezemo, bigera aho gereza irafungurwa n'ibindi.

Ati 'Twari tumaze kubona imbaraga. Tukabambura imbunda, tukubikira, tugakubita tukaba tubatwaye n'amasasu. Umwanzi yabona Nyagatare tuhamereye nabi akava mu Ruhengeri akagaruka, natwe tukimuka. Twagendaga n'amaguru kuva Ruhengeri ugana Nyagatare ugendera ku mupaka ukahagenda iminsi ibiri. Twari tuzi icyo dushaka.'

'Ukarara mu misozi urara ugenda, mu bihuru. Kuva Gatuna ukajya mu rugano rwa Butaro ukavayo ukajya mu Kirunga hejuru, wavayo ukarasa mu Ruhengeri. Bwacya Umuyobozi ati 'abaruhutse bumanuka mugende ndabashaka mu Mutara.''

Umuyobozi wa RSSB, Rugemanshuro Regis yakeje uruhare rwa IBUKA mu guharanira inyungu z’abarokotse Jenoside yakorewe Abatutsi no gukomeza kubafasha mu kudaheranwa n’agahinda

Mu birunga indege ntizashoboraga kuza kubatera kuko bazirasaga urufaya bazireba, hari ibihuru byo kwihisha, bagasangamo n'ibijumba 'tukabyotsa mu gihe mukiri aho urugamba rugakomeza.'

Col Mugisha yerekana ko izo ngendo zose bazikoraga bari kumwe na Perezida Kagame, uyu muyobozi akavuga ko no mu buzima busanzwe, umuyobozi aba akwiriye kwicarana n'abo ayobora.

Ati “Uwo waba uri we wese uri umuyobozi w'abantu nturi uw'amazu n'ibiti ugomba kwicarana na bo ukabaha agaciro. Perezida Kagame impungure twaryaga ni zo yaryaga, abaho nk'uko tubayeho na twe tugatsinda umunsi ku wundi. Twari abantu batandukanye atugira umwe.'

Icyo gihe bari bageze mu 1992 batangira, kugira umuhate, ingabo zari zarihebye zirongera zigira icyizere bishyira ku guhagarika Jenoside yakorewe Abatutsi, u Rwanda rurabohoka, ivangura n'izindi politiki nkene zari zarimitswe zishyirwaho akadomo.

Nubwo igitekerezo cyo kubohora u Rwanda cyihutishijwe no guhiga Abanyarwanda k'uwari Perezida wa Uganda, Milton Obote, Col Mugisha avuga ko ku rundi ruhande abyishimira kuko byatumye FPR-Inkotanyi ikomera kubera kubabarizwa muri Uganda.

Umuyobozi wa RSSB, Rugemanshuro Regis, yerekanye ko iyo Inkotanyi zitahaba ubu amateka aba avuga ibindi, ashimira uruhare zagize mu kurokora Abatutsi

Mu kwibuka abahoze ari abakozi ba Caisse Sociale du Rwanda bishwe muri Jenoside yakorewe Abatutsi hacanywe urumuri rw’icyizere

Umuyobozi Mukuru wa RSSB, Rugemanshuro Regis ubwo yuhiraga igiti urwego ayoboye rwateye mu Busitani bwo Kwibuka buri mu Rwibutso rwa Jenoside rwa Nyanza ya Kicukiro

Umuyobozi Wungirije w’Inama y’Ubutegetsi ya RSSB, Mukeshimana Marcel yijeje ko uru rwego ruzakomeza kuba hafi abarokotse Jenoside yakorewe Abatutsi uko rushoboye

Umuyobozi wa RSSB, Rugemanshuro Regis ashyira indabo ku rukuta rwanditseho amazina y’abahoze ari abakozi ba Caisse Sociale du Rwanda

Amafoto: Niyonzima Moise

Mu migambi iri shyaka rifite ni ukongera guhatana ku myanya yose mu matora ateganyijwe mu mezi abiri ari imbere, haba ku mwanya w'Umukuru w'Igihugu no gushaka imyanya mu Nteko Ishinga Amategeko.

Iri shyaka riyobowe na Dr Frank Habineza ubu rifite abakandida 60 bazayihagarira barimo 30 b'abagore n'abandi nk'abo b'abagabo.

Mu kiganiro The Long Form na Sanny Ntayombya, Dr Habineza yagarutse ku rugendo rwe muri politiki, kuva kuri wa mwana wakuriye mu nka zo mu buhungiro muri Mityana, Uganda kugeza ku guhatanira kuyobora u Rwanda.

Habineza wa Mityana rwagati muri Uganda

Depite Habineza wavutse 1977 iyo agaruka kuri ubwo buzima, ni urugendo yerekana ko rwasabaga ibitambo byinshi.

Bwari ubuzima bushaririye. Nyina wari mu Nkambi ya Toro yahuye na se wari mu bice bya Namutamba byabagamo Abanyarwanda benshi, bamubyarira muri ubwo buzima ariko ntibyamubuza gukabya inzozi.

Ati 'Kwari ukubaho uyu munsi utizeye ko ejo buzira. Ni ubuzima twabagamo hamwe n'abandi Banyarwanda bose. Data yarahatanye agura ubutaka ndetse arubaka. Byibuze wenda njye navutse bafite aho kuba bitari muri burende.'

Dr Habineza yavutse ko icyo gihe Uganda yari mu ntambara, aho inyeshyamba za National Resistance Movement, NRM zarwanyaga ubutegetsi bwa Milton Obote.

Icyakomezaga ubuzima ni uko agace iwabo bari batuyemo ka Mityana kari kari ahitirirwaga Mpandeshatu ya Luweero,ni ko intambara yaberagamo, bagahora bahunga buri munota.

Icyo gihe ngo bakundaga kubona abasirikare bari ku rugamba bacaracara aho bagafata imitungo yabo nk'inka n'ibindi, ibintu bitari byiza ku baturage cyane cyane ku mwana ubyiruka.

NRM yafashe ubutegetsi Habineza ari mu mwaka usoza amashuri abanza. Nyuma gato FPR Inkotanyi yatangiye urugamba rwo kubohora u Rwanda, urugamba na bo bagombaga kugiramo uruhare mu buryo bumwe cyangwa ubundi kuko bari impunzi.

Ati 'Twitabiriye inama z'urubyiruko zitandukanye nk'abakiri bato. Ntubyumve nk'inama zibera ahantu hitaruye heza, ahubwo ni inama zaberaga mu bihuru, tukiga byinshi birimo no kubyina.'

Uretse Intambara muri Uganda, Dr Habineza agaragaza ko Umunyarwanda atari abayeho nk'uko abyifuza kuko bakubitwaga umunsi ku wundi.

Ati 'Kuba Umunyarwanda byari icyaha, nkanjye noneho witwaga Habineza kwihishira ntibyashobokaga. Rimwe numvaga narihindura kuko akenshi bampamagaraga Kanyarwanda, twaba twagiye kuvoma bakagukubita nyamara utazi icyo uzira.'

Ubuhunzi, intambara ya NRM, kuzira kuba Umunyarwanda byose byiyongeyeho no kubura nyina ubwo yari mu mwaka wa kane w'amashuri abanza.

Byabaye mbombwa ko Habineza w'icyo gihe wari waravukanye n'abakobwa babiri, afatwa n'umwe mu miryango ikomeye yo muri Uganda.

Uwo wari umuryango w'ababaye muri NRM no ku butegetsi bwa Museveni kuko bari bamwe mu bayobozi bakuru, ari naho yakuye intekerezo zo kujya muri politiki.

Dr Frank Habineza yagaragaje uburyo yakuriye mu buzima bw’ubuhunzi muri Uganda ariko ntiyacika intege ubu akaba ari kugera ku ntego yihaye

Gutangiza ishyaka ritavuga rumwe n'ubutegetsi bwa Museveni

Umunyarwanda yabivuze neza ko umuntu icyo azaba bagendana, Dr Habineza we na bagenzi be iyo bari mu yisumbuye batekereje gutangiza umutwe wa politiki ndetse wagombaga kutavuga rumwe n'ubutegetsi bwa Museveni.

Ati 'Urumva nawe uko byari bimeze. Gutangiza ishyaka ritavuga rumwe n'ubutegetsi kandi warakuriye mu muryango wabushyigikiraga wanagize uruhare ngo ubutegetsi bujyeho, ndetse uwakureze ari n'umwe mu bayobozi bakuru muri bwo.'

Icyo gihe Dr Habineza wari umaze kuba ikimenyabose bijyanye no gukurira mu muryango uzwi, kujya mu matsinda atandukanye yatumaga amenyekana, yashatse abandi banganaga ishyaka rirashingwa.

Icyo gihe bari abana bo mu miryango ikomeye muri Uganda, ariko bafite ibitekerezo bishya, bamuha umukoro wo kujya gushaka inzira z'uko iryo shyaka ryakwandikwa mu yemewe.

Uyu mugabo yagiye ku mudepite wari ushinzwe kureberera agace yarimo witwaga Emmanuel Kirenga wari Umunyarwanda, ajya iwe, amubwira iby'ishyaka batangije.

Ati 'Icyakora byaramushenguye kuko yari azi umuryango wanjye n'aho nakuriye ariko aravuga ngo nta kibazo. Yari minisitiri ushinzwe ibijyanye n'Itegeko nshinga. Yatugiriye inama yo kujya mu gihugu gushaka imikono y'abaturage. Nari mfite imyaka nka 17.'

Kuko bari mu bihe by'ibizamini bisoza amashuri yisumbuye, bigiriye inama yo kubanza gusoza amasomo, ishyaka bakazarikomeza ubwo babaga bageze muri Kaminuza ya Makerere.

Icyakora ku bw'amahirwe make ntibyakunze kuko byabaye ngombwa ko agaruka mu rwamubyaye, abandi baratandukana.

Nubwo abari muri iryo tsinda bahiriwe mu yindi mirimo, Dr Frank Habineza ni we rukumbi wakomeje uyu mujyo atangiza ishyaka rya politiki ndetse ritavuga rumwe n'ubutegetsi nk'uko igitekerezo muri Uganda cyari kimeze.

Jenoside yakorewe Abatutsi imaze guhagarikwa nko mu mpera za Nzeri 1994, Dr Habineza yaje mu Rwanda, aho we na bagenzi be baje mu ikamyo nini, inyuze i Kagitumba, batura i Kayonza h'ubu ahazwi nka Nyamirama.

Muri Werurwe 1995 byabaye ngombwa ko asubira muri Uganda cyane ko amashuri atari yakongera gufungurwa, atekereza ko wenda atashobora kubona n'akazi kuko yari arangije icyiciro rusange gusa.

Ikindi yatekerezaga ko bashobora gushyirwa mu ngabo, agatekereza ko kwinjiramo atararangiza amashuri yisumbuye atagombaga gutanga umusaruro.

Yasubiye mu ishuri muri Uganda akomereza mu mwaka wa kane, amashuri yisumbuye ayashyiraho akadomo, agaruka mu Rwanda.

Yakomereje mu yari Kaminuza Nkuru y'u Rwanda yari iri i Butare.

Ageze i Butare Dr Habineza yakomeje bya bitekerezo bye ariko yiyemeza guha umwihariko ibijyanye n'Itangazamakuru no kwita ku bidukikije.

Mu itangazamakuru yandikiye The NewTimes, icyakora inkuru ze zose ntizasohoka, amaze kubona ko aho bitazakunda ahindurira mu binyakuru bya Rwanda Newsline, Umuseso n'ibindi.

Ni ibintu byamuhaye intekerezo z'uko u Rwanda rwaba rumeze ari nabyo byamuhaye igitekerezo cyo kuba yashinga ishyaka, icyo gihe byari mu 2002.

Yabonye amahirwe yo kujya mu Bwongereza umuryango wamwakiriye asanga ubarizwa mu Ishyaka riharanira kurengera ibidukikike ryitwaga Green Party, ahavana igitekerezo cy'izina y'ishyaka rye.

Yagarutse mu Rwanda ahuza abanyeshuri bigaga ibintu bitandukanye muri kaminuza, abagezaho igitekerezo cyo gushinga ishyaka, barishakira amazina atandukanye nyuma bahitamo Green Party.

Bakomereje mu nzira zitandukanye zisabwa gushinga ishyaka, barangije ibitekerezo byabo babishyira abayobozi ba Kaminuza.

Icyo gihe Dr Habineza yahuye n'uwari umuyobozi wa UNR we n'abandi bayobozi ararisobanurira barabyumva ariko bagiramo impungenge, bamugira inama z'uko byagenda.

Yarahindukiye ibyo yabwiwe abibwira na bagenzi be, biyemeza kuba baretse icyo gitekerezo, Dr Habineza akomereza muri muri FPR Inkotanyi, abandi bajya mu yandi mashyaka.

Mu 2003 harageze amatora y'Umukuru w'Igihugu araba bayagiramo uruhare ararangira mu mutuzo.

Mu 2005 yarangije kaminuza, anahabwa akazi muri Minisiteri y'Ibidukikije, akomereza mu bindi, mu 2007 afata umwanzuro.

Ati 'Wari uwo kubyutsa cya gitekerezo cy'ishyaka. Nari maze kubona ko maze kuba mukuru bihagije nshaka kuzana ikintu gishya. Navuye muri FPR Inkotanyi ku mugaragaro ari bwo natangije ishyaka ritavuga rumwe n'ubutegetsi rya Democratic Green Party of Rwanda.'

Dr Habineza abona umwe mu byo ishyaka rye ritandukaniyeho n'andi ari ukutijandika mu bugizi bwa nabi, aho andi aba ashaka gukora politiki ishingiye ku bushyamirane no kujya mu mashyamba.

Ati 'Ni politiki twizera ko twakora mu buryo butagamije gutera ubwoba no kutabangamira abandi kabone nubwo tutaba twemera zimwe muri politiki za leta, ntabwo bivuze ko najya kumena ibirahuri, imodoka n'ibindi. Twizera ko twaganira mu buryo bw'amahoro. Ubwo ni bwo buryo twizera.'

Nubwo bagikusanya imigabo n'imigambi bazaserukana mu matora, Dr Habineza agaragaza ko bashaka kugira u Rwanda igicumbi cy'ubuhinzi, ibyo kwishingikiriza ku mahanga bikagenda nka nyomberi.

Ni intego bashaka kuzageraho binyuze muri gahunda zitandukanye nko kureka gukoresha ifumbire mvaruganda hagakoreshwa imborera, kutishingikiriza ku bihingwa byahinduriwe uturemangingo, kubanza kwihaza mu biribwa masoko akaza nyuma n'ibindi.

Dr Frank Habineza yavuze ko ishyaka yatangije rya Democratic Green Party ubu rigeze ku rugero rwiza ruha urubuga bose, baba abagore n’urubyiruko, akavuga ko kuvuga bitagira ibikorwa ntacyo biba bimaze mu ruhando rwa politiki

Gahunda y'u Rwanda y'ingufu ya nucléaire, umugambi kirimbuzi kuri Dr Habineza

Muri Nzeri 2023 Guverinoma y'u Rwanda yasinye amasezerano na Sosiyete Dual Fluid Energy Inc yanditswe mu Budage no muri Canada, kugira ngo ikore igerageza ku ikoranabuhanga ryaganisha ku kuba mu Rwanda hatangira gutunganyirizwa amashanyarazi akomoka ku ngufu za nucléaire.

Icyakora ni gahunda ishyaka Dr Habineza abereye umuyobozi ritigeze ryemeranya na yo kuko ryemera ko ingufu zisubira ari zo nziza cyane kurusha izindi zose abantu batekereza.

Ati 'Twizera ko dufite bene izo ngufu zisubira zihagije ndetse n'aho twazikura. Dufite imishinga myinshi ijyanye no kuzana izo ngufu, dufite amazi ahagije yaduha bene izo ngufu, gaz methane, iz'izuba n'ibindi kuko ntizirangira mu gihe iza nucleaire zirangira.'

Avuga ko ingufu za nucléaire zitari ngombwa mu Rwanda cyane ko zisaba ibindi binyabutabire bishobora no kugira ingaruka ku bidukikije n'ibindi bibazo abona ko ari byo byinshi kurusha ibyiza.

Ati 'Iyo urebye nko mu Buyapani i Fukushima bagize impanuka ku ngufu za nucleaire ubona ko byasabye za miliyari z'amadolari kugira ngo basane ibyangiritse. Twagarutse ku bibazo biri nko muri Ukraine aho ibyabaye byari bikomeye no ku bindi bihugu bya kure.'

Yerekanye ko abana bo muri ibyo bice bavutse bamwe nta ngingo nk'amaguru, amaboko n'ibindi bari bafite kubera uko guhumeka umwuka uturuka kuri izo ngufu, akavuga ko bibaye nko mu Rwanda byashyira ku ibibazo bikomeye.

Ati 'Niba ingaruka zigera mu birometero ibihumbi n'ibihumbi, mu Rwanda bibaye byagenda gute? Mumbwire ibyiza by'izo ngufu ariko munibuke ibibi byazo. Ikibazo kibaye ibyo byiza byose byayoyoka, ingaruka zikagera no mu myaka 50. Mu bindi bihugu bari gushaka uko izi ngufu bazireka none bashaka kuzana ibyo bibazo muri Afurika.'

Dr Frank Habineza ntiyemeranya na Guverinoma y'u Rwanda iherutse gusinyana amasezerano na Sosiyete Dual Fluid Energy Inc kugira ngo ikore igerageza ku ikoranabuhanga ryaganisha ku kuba mu Rwanda hatangira gutunganyirizwa amashanyarazi akomoka ku ngufu za nucléaire

Igisobanuro cyo kutavuga rumwe na leta mu mboni za Dr Habineza

Inshuro nyinshi iyo ibitangazamakuru byo mu Burengerazuba bw'Isi bigerageje kwandika ku Rwanda biba bigaragaza ibyo byita politiki mbi, itorohera abatavuga rumwe na rwo, kuniga ubwisanzure bwo kuvuga n'ibindi, akenshi ugasanga bari guha urwaho abashaka guhungabanya umutekano, ubumwe by'Abanyarwanda n'ibindi.

Akenshi iyo byandika bigaruka kuri Victoire Ingabire, abo muri RNC, Me Ntaganda Bernard n'abandi bihisha mu mutaka wo kutavuga rumwe na leta ariko muri rusange ugasanga ari uguheza inguni gusa nta cyiza bifuriza u Rwanda.

Abajijwe kuri iki kibazo, Dr Habineza wabaye mu bihugu bitandukanye cyane cyane ibyo mu Burengerazuba bw'Isi, agaragaza ko iyo abonye iyo myitwarire imubabaza ndetse akumva ko ari intekerezo nkene.

Yagaragaje ko muri ibyo bihugu iyo bavuga kutavuga rumwe na leta baba bavuga ishyaka ritari muri guverinoma.

Yatanze urugero ku wahoze ari Perezida wa Amerika, Donald Trump utavuga rumwe na Joe Biden uri ku butegetsi.

Ati 'Ubu Ishyaka ry'Aba-Républicain ni iritavuga rumwe n'ubutegetsi. Ni cyo bivuze. Mu Bwonegereza ni uko bimeze n'ahandi, ariko iyo bije muri Afurika baba bashaka ko bitandukana, ibintu bitari byo cyane.”

Yagaragaje ko bwa mbere bigeze kwihuza na Ingabire Victoire kuko batekerezaga ko batahiriza umugozi umwe mu guharanira impinduka nziza, ariko banzura kwitandukanya na we kubera impamvu zishingiye ku migambi y'uyu mugore n'ingengabitekerezo ze bihabanye n'ibyo ishyaka rye ryizeraga.

Ati “Twabonye ko ibyo atari byo twe twiyemeje, twemeza kuva muri ubwo bwihuze byihuse. Abantu babonye twivanyemo bavuga ko tubaye bamwe n'abo muri FPR Inkotanyi ariko si ko biri. “

Dr Habineza yavuze ko bene abo bantu iyo ubabwiye gukora politiki itagira uwo ihungabanya batabyumva neza, ahubwo bagahora bashyize ubushyamirane imbere.

Icyakora agaragaza ko muri Democratic Green Party of Rwanda bo bashaka politiki ituma baturage batekana ” bitari kwa kumena amadirishya ukagira ibintu akaduruvayo.”

Ati ” Ubu abaturage baratuje babona ko kujya mu ishyaka ryacu ntacyo bibatwaye. Bafite ibitekerezo by'iterambere ry'abaturage. Ni ibyo dushaka. Dutanga ibitekerezo bitandukanye, ariko ntitwishwe cyangwa ngo dufungwe ku bw'ibyo bitekerezo. “

Yagaragaje ko mu migabo n'imigambi baserukanye mu myaka irindwi ishize, imyinshi yatanze umusaruro kuko kugeza kuri 70% byayo yashyizwe mu bikora indi iri gukorwaho.

Ku bwe abona bene abo bantu badashakira amahoro u Rwanda, kuko niba ibyubakwa bishingira ku mateka rwanyuzemo, abandi ntibabyumve, nta kabuza baba bashaka ko igihugu gisubira aho cyavuye.

Kuri we abo bantu baba bafite ababagenzura ndetse banabandikira izo nkuru ” kuko iyo ubonye ibyanditswe n'umuntu bivugwa ko yabyanditse wareba uko umuzi ukabona ko atabishobora. Turabizi tuzi uko bikora. Kuko nanjye nigeze kugira iyo myumvire ariko nahisemo kugorera Abanyarwanda.”

Ishyaka Democratic Green Party rikataje mu kubaka inzego zitandukanye ariko zishigiye ku rubyiruko cyane ko ari rwo shingiro ry’ejo hazaza

Iyi gahunda yiswe 'Wavumbuzi Enterpreneurship Challenge' ni iy'amarushanwa ngarukamwaka amaze kuba ubugira kane, akaba yitabirwa n'abanyeshuri biga kuva mu mwaka wa mbere w'amashuri yisumbuye kugeza mu wa gatandatu.

Ni irushanwa ryashyizweho hagambiriwe kubakira ubushobozi aba banyeshuri bwo kwihangira imirimo bakiri bato no guhanga udushya. Habaho guhiganwa n'abandi mu gihe cy'ibyumweru bitandatu, hanyuma abahize abandi bagahembwa.

Abanyeshuri barushanwa binyuze kuri internet hifashishije mudasobwa cyangwa telefone, aho buri cyumweru bahabwa imikoro [challenge] inyuranye igendanye no gusobanukirwa ibibazo byugarije sosiyete yabo n'Isi muri rusange n'uburyo byashakirwa ibisubizo.

Ritegurwa n'Umuryango Allan and Gill Gray Phlanthropy. Rikaba ryaratangiriye muri Afurika y'Epfo mu 2019.

Kuri uyu wa Gatatu Tariki ya 08 Gicurasi 2024, ubwo habaga umuhango wo guhemba abitwaye neza mu cyiciro cya kane cy'irushanwa, Umuyobozi Ushinzwe iyamamazabikorwa n'itumanaho mu Muryango Allan & Gill Gray Philanthropies Rwanda [AGGPR], Sherry Uwase, yagaragaje ko mu myaka ishize hari umusanzu rimaze gutanga mu rwego rw'uburezi mu Rwanda.

Yagize ati 'Umumaro wayo wa mbere ni uko aya marushanwa ajyanye na gahunda yo kwigisha kwihangira imirimo kandi ikaba ijyanye n'igihe ndetse na gahunda z'ahazaza h'uburezi bufite ireme.'

'Intego n'uko amashuri menshi yakwitabira aya marushanwa kugira ngo tugaruke kuri ya mpamvu dushaka kugeraho ariyo yo gufasha abanyeshuri bose kugira ubumenyi bwo guhanga imirimo kandi bakiri bato no kubategura kwinjira ku isoko ry'umurimo.'

Muri uyu mwaka ryabaye hagati ya Tariki 22 Mutarama- 06 Werurwe 2024. Kuri iyi nshuro aba banyeshuri bagiye bahabwa imikoro yo mu nzego z'ubwubatsi, urw'imari, ubukerarugendo, ubucuruzi muri Afurika, ibikoresho bikoranye ikoranabuhanga ryo ku rwego rwo hejuru [mechatronics] ndetse n'ubwenge bukorano [AI].

Ryitabiriwe n'abanyeshuri babarirwa mu bihumbi baturutse mu mashuri 900 yo mu turere twose tw'igihugu, hamwe n'abarimu 2,200 bagiye babaherekeza bakanafasha aba banyeshuri gukurikirana iri rushanwa.

Uwiduhaye Olive, wiga muri G.S Kareba, niwe wegukanye igihembo nyamukuru cy'iri rushanwa, atsindira n'ibindi bihembo birimo gusura Pariki y'Akagera no guhabwa amahugurwa mu bijyanye no kwihangira umurimo.

Yagize ati 'Nishimiye amahugurwa nzahabwa kuko ni byinshi numva nzahabonera. Muri aya marushanwa umukoro nakunze cyane ni ujyanye n'ubwenge bukorano, bituma ngira n'inzozi zo kuzaba umugore ukomeye muri aka karere cyane mu Rwanda, ufite ubumenyi butandukanye. Ncaka no guteza imbere ubuhinzi bugezweho cyane iwacu muri Nyabihu.'

Umunyamabanga Uhoraho muri Minisiteri y'Urubyiruko n'iterambere ry'ubuhanzi, Busabizwa Parfait, yavuze ko gahunda nk'izi ari nziza ku rubyiruko kuko zibigisha umuco wo kwihangira imirimo bakazavamo ba rwiyemezamirimo b'ahazaza.

Ati 'Kubigisha bakiri ku ntebe y'ishuri bibafasha kuvumbura ubushobozi bifitemo no guhanga ibishya bitanga imirimo kuribo no kuri bagenzi babo hakiri kare bagakura babikunze kandi banarushaho kunononsora imishinga yabo.'

Leta y'u Rwanda n'abafatanyabikorwa bayo n'indi miryango itandukanye ntibahwema guharanira iterambere ry'urubyiruko mu Rwanda, aho hagenda hashyirwaho gahunda nyinshi ziharanira iterambere ryarwo.

Urugero rwa hafi ni amarushanwa ategurwa na Minisiteri y'Urubyiruko n'Iterambere ry'ubuhanzi yatangijwe mu 2013, ya ba rwiyemezamirimo bakiri bato, bahanga ibishya mu ngeri zitandukanye.

Nyuma y'imyaka 10 aya marushanwa atangijwe abarenga ibihumbi bibiri bamaze kuyitabira, aho bamaze guhanga imirimo ku rundi rubyiruko ibihumbi 36.

Ubwo hasozwaga irushanwa rya 'Wavumbuzi Entrepreneurship Challenge' icyiciro cya kane, abanyeshuri mu byiciro binyuranye, abarimu ndetse n'ibigo by'amashuri, bagiye bahabwa ibihembo bitandukanye birimo amafaranga n'ibikoresho by'ikoranabuhanga birimo mudasobwa.

Abarimu bashyigikira abanyeshuri nabo bahawe ibihembo

Abatsindiye ibihembo bari bafite akanyamuneza

Abanyeshuri barenga ibihumbi 55 bamaze kwitabira aya marushanwa

Aba banyeshuri bakoze neza imikoro yose bahawe

Norman Mugisha washinze Afri-Farmers Market yatanze ikiganiro kigaruka ku rugendo rwe akiri mu ishuri

Ibigo by’amashuri byitwaye neza byashimiwe

Byabaye kuri uyu wa Gatanu tariki ya 10 Gicurasi 2024 mu Mudugudu wa Kivugiza mu Kagari ka Kayonza mu Murenge wa Mukarange mu Karere ka Kayonza.

Umuvugizi wa Polisi y'u Rwanda mu Ntara y'Iburasirazuba, SP Twizeyimana Hamduni, yabwiye IGIHE ko uyu mugabo yagwiriwe n'ibitaka byaturutse ku gucukura umwobo ahantu horoshye bitewe n'ibihe by'imvura nyinshi imaze iminsi igwa.

Yagize ati 'Ni umuturage wari ufite icyobo gifata amazi, aha uwo mugabo ikiraka ngo agicukure acyongere, undi yaje aracukura ageze nko muri metero eshanu harariduka bya bitaka biramugwira aheramo atyo.'

SP Twizeyimana yakomeje avuga ko abaturage bahise batabaza inzego z'ibanze ndetse na Polisi baza kumukuramo ariko basanga yamaze gushiramo umwuka. Yasabye buri wese kugirira amakenga ibi bihe by'imvura kuko bri gutuma ubutaka bworoha cyane

Ati 'Abantu bakwiriye kugirira amakenga ubutaka muri ibi bihe by'imvura yaba abubaka, abacukura imisarani, abakora mu birombe by'amabuye y'agaciro n'ahandi haba hari itaka ryoroshye muri iki gihe cy'imvura. Abantu nibumve ko ubuzima buruta ibyo byose bashobora kujyamo, bajye babanza bitonde barebe ko ubutaka bukomeye.'

Kuri ubu umurambo wa nyakwigendera wajyanywe ku kigo nderabuzima cya Mukarange kugira ngo ukorerwe isuzuma mbere y'uko ushyingurwa mu cyubahiro. Si ubwa mbere muri aka gace umuntu agwa mu mwobo kuko no mu ntangiriro z'iki cyumweru hari umwana waguye mu mwobo akaza kuwukurwamo.

Umugabo yaguye mu mwobo yitaba Imana

Umukinnyi wa Gasogi United, Kamis Hamis yavuze ko nta bushobozi afite bwo guhakanira Rayon Sports mu gihe yaba yamweretse ko imwifuza.

Uyu mukinnyi ukina inyuma ya ba rutahizamu abafasha gushaka ibitego, ni umwaka we wa mbere muri Gasogi United ariko yagaragaje ubuhanga bukomeye.

Ni nabwo hatangiye kuza inkuru z’uko Rayon Sports yamwegereye, ari mu bakinnyi yifuza ngo abe yayijyamo mu mwaka w’imikino utaha.

Kamis Hamis ubwo yari abajijwe niba koko hari ibiganiro yagiranye na Rayon Sports, yavuze ko ntabyabayeho.

Ati “ikintu navuga kuri ibyo ntabwo mbizi, ariko wenda wasanga hari bamwe babizi neza. Oya ntabwo nigeze nganira na yo.”

Abajijwe niba iramutse imwegereye yiteguye kuganira na yo, yagize ati “uko byagenda kose ntabwo wabyanga.”

Kamis Hamis ni umukinnyi wa Gasogi United wayigezemo mbere y’uko umwaka w’imikino wa 2023-24 utangira, yayisinyiye imyaka 3 ubu akaba asigajemo ibiri.

Kamis yavuze ko Rayon imwegereye yiteguye kuganira nayo

“Nifuzaga rwose kuba umwe mu bagize umushinga w’iyi kipe, imwe mu zifite intego zihambaye ku mugabane w’Iburayi”. Kylian Mbappé avuga impamvu yahisemo kwerekeza muri Paris Saint-Germain.

Uyu mukinnyi yatangajwe mu ikipe ya Paris Saint-Germain taliki 03 Kanama muri 2017 avuye muri Monaco yari amaze gufasha kwegukana igikombe cya shampiyona.

Yari atijwe ariko mu masezerano harimo ko azagurwa miliyoni 180 z’Amayero ndetse biza kurangira ariyo aguzwe aba ashyizeho agahigo ko kuba umukinnyi ukiri muto uguzwe amafaranga menshi ndetse aba ari nawe mukinnyi wa kabiri uguzwe amafaranga menshi ku Isi nyuma ya Neymar.

Kugira ngo Kylian Mbappé yemere kujya muri Paris Saint-Germain ni Unai Emery wayitozaga icyo gihe wabigizemo uruhare aho yamusanze iwabo aramuganiriza abona kwemera.

Akiyigeramo, yahawe kujya yambara nimero 29 maze taliki ya 8 Nzeri akina umukino we wa mbere batsindaga iyo bita Metz ibitego 5-1 ndetse anatsindamo igitego.

Nyuma y’iminsi 4 gusa yahise atsinda igitego cye cya mbere muri Champions League ubwo batsindaga Celtic bari kumwe mu itsinda ibitego 5-0.

Yongeye gutsinda muri Champions League ubwo batsindaga FC Bayern Munich ibitego 3-0 akaba ari we watsinze igitego cya 3. 

Taliki 06 Ukuboza Kylian Mbappé yatsinze igitego cye cya 20 muri iri rushanwa rya Champions League mu mukino batsindwagamo na FC Bayern Munich ibitego 3-1 bituma ahita aba umukinnyi muto ugejeje ibi bitego. Icyo gihe yari afite imyaka 18 n’amezi 11.

Igikombe cye cya mbere cya shampiyona y’icyiciro cya mbere mu Bufaransa yagitwaranye na Paris Saint-Germain taliki 8 Gicurasi muri 2018.

Mu kwezi kwa 7 muri 2018 uyu mukinnyi yaje guhabwa kuzajya yambara nimero 7 mu mugongo mu mwaka w’imikino wari ugiye gukurikiraho.

Mu magambo Mbappé yatangaje nyuma yo guhabwa nimero nshya yagize ati “Nkomeje kugerageza gutera imbere mu kibuga kandi ndatekereza ko ku bwanjye, cyari igihe gikwiye cyo guhindura nimero. 

Ni ikintu cyo kwemeza. Nimero 7 ni iy’icyamamare kandi yambawe n’ibihanganjye byinshi. Ndizera ko nzashobora guha ubutabera iyi nimero mu kibuga”.

Mu mukino we wa mbere yakinnye ayambaye yahise atsinda ibitego 2 mu minota 10 ubwo batsindaga Guingamp ibitego 3-1 muri shampiyona.

Ubwo Kylian Mbappé yasinyiraga Paris Saint-Germain 

Mu mwaka w’imikino wa 2018-2019 uyu mukinnyi yakoze ibidasanzwe atsinda ibitego ubutitsa birimo n’icyo yatsindiye Manchester United kuri Old Trafford muri Champions League bayitsinda ibitego 2-1 gusa biza kurangira ibasezereye.

Muri uyu mwaka w’imikino byarangiye Mbappé atsinze ibitego 33 muri shampiyona aba ari nawe mukinnyi ufite ibitego byinshi kurusha abandi anagirwa umukinnyi w’umwaka wa shampiyona y’icyiciro cya mbere mu Bufaransa.

Mu mwaka w’imikino wa 2019-2020 Kylian Mbappé yaje akomeza gukora akazi muri Paris Saint-Germain maze taliki ya 7 Kanama ayifasha kwegukana igikombe cya Super Cup atsinda igitego batsinda Rennes ibitego 2-1.

Mu mukino ufungura shampiyona nabwo yatangiye atsinda igitego mu mukino warangiye batsinze Nîmes ibitego 3-0 muri rusange.

Taliki ya 22 Ukwakira Mbappé yaje kwandika amateka mashya muri Champions League ubwo yavaga ku ntebe y’abasimbura ku mukino Paris Saint-Germain yari yakinnyemo na Brugge ahita atsinda ibitego 3 wenyine (hat-trick) maze aba abaye umukinnyi ukiri muto ugejehe ibitego 15 muri iri rushanwa rihuza amakipe yabaye aya mbere iwayo. Icyo gihe yari afite imyaka 20 n’iminsi 306.

Yongeye gufasha Paris Saint-Germain kwegukana igikombe cya shampiyona ndetse aba ari nawe usoza ayoboye abandi bakinnyi mu gutsinda ibitego byinshi muri shampiyona y’u Bufaransa izwi nka Ligue 1.

Umwaka w’imikino wa 2020-21 uyu mukinnyi ntabwo yawutangiye neza kubera ko yari arwaye COVID-19 ndetse bituma atagaragara mu mikino 3 ibanza gusa aza kugaruka taliki ya 20 Nzeri muri 2020 bakina na Nice anatsinda igitego kuri penariti.

Taliki ya 28 Ukwakira Mbappé yatanze imipira 2 yavuyemo ibitego kuri Moise Kean mu mukino batsindagamo ibitego 2-0 İstanbul Başakşehir muri Chamoions League bituma ahita aba umukinnyi utanze imipira myinshi yavuyemo ibitego guhera muri muri 2017 muri iri rushanwa.

Taliki 05 Ukuboza ubwo bakinaga na Montpellier yatsinze igitego cye cy’i  100 ahita aba umukinnyi wa 5 ubigezeho mu mateka ye Paris Saint-Germain.

Uyu mwaka w’imikino waje kurangira abaye umukinnyi watsinze ibitego byinshi muri Ligue 1 ndetse aba ari nawe uba umukinnyi w’umwaka witwaye neza kurusha abandi.

Kylian Mbappé yakomeje kuba umukinnyi udasanzwe mu ikipe ya Paris Saint-Germain maze mu mwaka wakuriyeho wa 2021-2022 yongera kuba umukinnyi w’umwaka muri shampiyona anongera amasezerano nyuma yuko yifuzwaga na Real Madrid ariko birangira bidakunze.

Mu mwaka w’imikino wa 2022-2023 Kylian Mbappé yabaye umukinnyi utsindiye ibitego byinshi Paris Saint-Germain mu mateka yayo nyuma yuko yari yatsinze igitego cye cya 200 bakina na Marseille aba akaba abinganyije na Edinson Cavani ariko ku mukino wakurikiyeho bakina na Nantes ahita atsinda igitego cye cya 201.

Muri uyu mwaka w’imikino kandi uyu Mufaransa yongeye kuba umukinnyi watsinze ibitego byinshi muri shampiyona biba inshuro ya 6 abikoze yikurikiranya afasha Paris Saint-Germain gutwara igikombe cya 11 cya shampiyona, ahabwa igihembo cy’umukinnyi mwiza kurusha abandi muri shampiyona, kiba icya 4 ahawe yikurikiranya ndetse ajya no mu ikipe y’umwaka.

Mu mwaka w’imikino wa 2023-2024 ari nawo wa nyuma yawutangiye bitameze neza bitewe nuko yari yaranze kongera amasezerano ariko biza kurangira bikunze ashyirwa mu bandi bakinnyi, anahabwa umwanya arakina afasha PSG kugera muri 1/2 cya UEFA Champions League ndetse no gutwara igikombe cya shampiyona.

Muri rusange uyu mukinnyi yakiniye Paris Saint-Germain imikino 306, ayitsindira ibitego 255 ,atanga imipira 95 yavuyemo ibitego, atwarana nayo ibikombe 15, aba umukinnyi watsinze ibitego byinshi muri shampiyona inshuro 5 ndetse aba umukinnyi w’umwaka muri shampiyona inshuro 4.

Kuwa Gatanu tariki 10 Gicurasi 2024, abinyujije ku mbuga nkoranyambaga ze ni bwo Kylian Mbappé yatangaje ko atazongera amasezerano muri Paris Saint-Germain ko agiye kugerageza ubuzima bushya.

Kylian Mbappé yatwaranye ibikombe bitandukanye na Paris Saint-Germain 

Kylian Mbappé yamaze gutangaza ko atazakomezanya na Paris Saint-Germain 

Ni ibiganiro byabaye kuri uyu wa Gatanu tariki 10 Gicurasi 2024, aho Minisitiri Utumatwishima na Sandrine Umutoni baganiriye n'abahanzi Nessa ndetse na Beat Killer, baganiriye kandi n'ababyinnyi Titi Brown ndetse na Jojo Breezy.

Banaganiriye n'abazwi cyane ku rubuga rwa TikTok, Judy ndetse na Kimenyi Tito. Ibiganiro bagiranye byibanze ku bufatanye na Minisiteri, imbogamizi zitandukanye zikigaragara mu buhanzi.

Aba bahanzi bagaragaje uburyo bishimiye gusura Minisiteri y’Urubyiruko ndetse n’Iterambere ry’Ubuhanzi (Moya), banerekana uburyo ibyo bakora bibabyarira umusaruro n’aho bifuza gushyira imbaraga kugirango ibihangano byabo bigere kure

Minisitiri Utumatwishima Jean Nepo Abdallah yabasabye gushyira hamwe no gushyigikira mu byo bakora byose. Sandrine Umutoni yagaragarije aba bahanzi ibyo Minisiteri imaze kugeraho kugira ngo ibyo bakora bibabyarire inyungu kurushaho.

Umubyinnyi Titi Brown uri mu baganiriye na Ministiri Utumatwishima ndetse na Sandrine Umutoni, yashimye bikomeye ibiganiro yagiranye n'aba bayobozi bombi. Yavuze ati 'Ndashimira byimazeyo Minisiteri Utumatwishima ndetse na Sandrine Umutoni, impanuro mwaduhaye n'impamba ikomeye.'

Yumvikanishije ko ibiganiro yagiranye n'aba bayobozi byamusigiye umukoro wo kumva ko nk'urubyiruko bafite inshingano zo kubaka u Rwanda. Ati 'Rubyiruko dufite umukoro n'inshingabno zo gukorera u Rwanda.'

Mu ijambo yavuze mu gutangiza ihuriro ry'urubyiruko rw'Abakorerabushake bizihiza imyaka 10, Minisitiri Utumatwishima yisunze indirimbo ya Nessa na Beat Killer mu kugaragaza uburyo Perezida Kagame yabaye hafi Urubyiruko rw'Abakorerabushake.

Ati 'Hari abaririmbyi babiri b'urubyiruko baherutse guhanga indirimbo bavuga bati: Umusaza niwe Papa w'urubyiruko, nibyo koko: Muri Covid-19, abayobozi benshi mu bihugu byo hanze barihishaga ngo batandura kandi birumvikana.'

Akomeza ati 'Perezida wacu we, tariki ya 12-04-2020, ibyumweru 3 gusa Covid-19 yadutse, yasuye abakoraga muri 'command post' ya Covid-19, aho 90% by'abakoragamo bari urubyiruko rutandukanye. Urubyiruko b'inzego z'umutekano, abize ubuvuzi, abastagiaires, abanyamakuru, aba Youth volunteers benshi ….'