Category: Uncategorized

Uyu muhango wo gushyingura mu cyubahiro iyi mibiri 42 y'izi nzirakarengane zishwe muri jenoside wabaye ku Cyumweru tariki 12 Gicurasi 2024.

Ni umuhango wabaye ubwo Akarere ka Kamonyi kibukaga ku Nshuro ya 30 Jenoside yakorewe abatutsi mu 1994 aho witabiriwe n'abayobozi batandukanye barimo Minisitiri w'Uburezi Gaspard Twagirayezu na Guverineri w'Intara y'Amajyepfo Kayitesi Alice.

Iyi mibiri 42 ikaba yaragiye ikurwa mu Mirenge itandukanye y'aka Karere ka Kamonyi.

Abafite imibiri y'ababo yashyinguwe, bavuze ko bishimiye ko abavandimwe babo nabo bashyinguwe mu cyubahiro.

Uwari uhagarariye imiryango ifita imibiri yashyinguwe, Mugorewera Julienne yagize ati 'Twishimiye ko mwaje gufatanya natwe kandi tunazirikana ko mwakomeje kutuba hafi muri iyi minsi mu bikorwa bitandukanye byo gutunganya imibiri y'abacu bishwe nabi bazizwa uko baremwe.'

Minisitiri Twagirayezu Gaspard yasabye abaturage by'umwihariko bo mu Karere ka Kamonyi, gukomeza gutanga amakuru y'ahari imibiri y'abishwe muri jenoside yakorewe abatutsi mu 1994 kugira ngo ishyingurwe mu cyubahiro.

Ati ' Turasaba buri munyarwanda n'abaturage ba Kamonyi by'umwihariko gukomeza gutanga amakuru ku bagaragaweho ibitekerezo bihembera ingengabitekerezo ya jenoside ko ari ingenzi, turabakangurira kandi gukomeza gutanga amakuru y'ahari imibiri itaraboneka kugira ngo nayo ishyingurwe mu cyubahiro.”

Komisireri Ushinzwe Ubukungu mu muryango IBUKA ku rwego rw'Igihugu, Ndatsikira Evode, yagaragaje uburyo mu Karere ka Kamonyi by'umwihariko mu cyahoze ari perefegitura ya Gitarama, abari abakirisitu biyambuye uwo mwambaro bijandika mu bwicanyi banica bagenzi babo.

Yagaragaje ko muri aka gace Jenoside yakoranywe ubukana bukomeye bigizwemo uruhare n'Interahamwe.

Imibiri 42 yashyinguwe yabonetse mu bice bitandukanye bigize akarere ka Kamonyi

Abarokotse Jenoside bagaragaje ko baruhutse kuko ababo bashyinguwe mu cyubahiro

Hatanzwe ubuhamya bwagarutse ku bukana bwa Jenoside mu karere ka Kamonyi mu 1994

Umunya-Cameroun ukinira APR FC, Apam Assongwe Bemol yavuze ko umwaka we wa mbere muri APR FC wamugendekeye nabi cyane kubera imvune ariko yizeye umwaka utaha azitwara neza.

Apam ni umukinnyi ukina asatira anyuze ku mpande, yageze muri APR FC muri Nyakanga 2023 akaba yarasinyiye iyi kipe imyaka 2.

Umwaka we wa mbere ntabwo wamugendekeye neza kuko yagize imvune nyinshi n’igihe yari muzima nta musaruro yatanze kuko yabuze icyizere cy’umutoza.

Mu kiganiro yahaye ikinyamakuru ISIMBI, Apam yavuze ko mu mwaka ayimazemo yasanze APR FC ari ikipe nziza, ndetse akaba yishimiye kwegukana igikombe.

Ati “APR FC ni ikipe nziza, ifite intego ngari, yaduhaye buri byose kugira ngo twitware neza, ndishimye kuba twegukanye igikombe.”

Yakomeje avuga ko umwaka we wa mbere yagize imvune zamuzengereje ariko akaba yizeye ko umwaka utaha bizagenda neza.

Ati “Urabizi imvune ni cyo kintu kiba wakwifuriza umukinnyi kugira, ariko ni umupira w’amaguru iyo ugize imvune uba ugomba kubyakira, umwaka utaha nizeye ko nzakora ibirenze.”

Yijeje abakunzi b’iyi kipe ko bagiye gukora cyane ku buryo umwaka utaha w’imikino bazaba bameze neza kurushaho.

Ati “Abakunzi ba APR FC icyo nababwira ni uko tugiye gukora cyane kugira ngo tuzabe tumeze neza kurushaho umwaka utaha. Umwaka utaha ndacyahari rwose.”

Apam Assongwe Bemol w’imyaka 23 yageze muri APR FC avuye mu ikipe y’iwabo muri Cameroun ya Apejes FC.

Apam yavuze ko atagize umwaka mwiza kubera imvune

RIB ivuga ko tariki 11 Gicurasi 2024, yafunze Barikana nyuma yo kwegura mu Nteko Ishinga amategeko nk'Intumwa ya Rubanda (Umudepite).

Akurikiranyweho gutunga intwaro mu buryo bunyuranyije n'amategeko.Uyu mugabo ngo yabwiye abagenzacyaha ba RIB ko 'Intwaro yazitunze akibana n'abasirikare akibagirwa kuzisubiza.'

Amakuru avuga ko Barikana bamusanganye grenade imwe, na magazine imwe y'imbunda yo mu bwoko bwa AK 47 (SMG).

RIB ivuga ko afungiye kuri Sitasiyo ya Remera mu gihe iperereza rikomeje ngo hagaragazwe uburyo yabonyemo izo ntwaro n'impamvu yari azitunze atabyemerewe n'amategeko.

Umuvugizi w'Urwego rw'Ubugenzacyaha, Dr Murangira B. Thierry, avuga ko 'RIB yibutsa abaturarwanda ko gutunga intwaro bifite amategeko abigenga, ko unyuranyije na yo uwo ari we wese aba akoze icyaha, ndetse akurikiranwa nk'uko amategeko ahana mu Rwanda abiteganya.'

Hon Barikana Eugene akurikiranyweho icyaha cyo gutunga Intwaro mu buryo bunyuranyije n'amategeko, aramutse agihamijwe n'Urukiko ashobora guhanishwa igifungo kuva ku mwaka umwe ariko kitarenze imyaka ibiri n'ihazabu y'amafaranga y'u Rwanda kuva kuri miliyoni imwe kugera kuri miliyoni ebyiri cyangwa kimwe gusa muri ibyo bihano.

Iyi ndirimbo yagiye hanze ku wa 3 Gicurasi 2024, nyuma y'igihe cyari gishize Gad ayiteguje abantu. N'iyo ndirimbo ya mbere yashyize hanze yahurijemo abahanzi, kuko azwi cyane mu gutunganya amashusho y'indirimbo z'abahanzi banyuranye.

Iri mu ndirimbo ziri kugaruka cyane kuri 'Playlists' z'abanyamuziki banyuranye ahanini bitewe n'umudiho. Gad avuga ko azifashisha iyi ndirimbo muri filime ari gutegura no gutunganya.

Kevin Kade ari mu bagombaga kuririmba muri iyi ndirimbo. Ubwo yari mu kiganiro na Radio Rwanda, yavuze ko yakuwemo kubera ko atabashije kuboneka igihe yari akenewe.

Ati ” Nayikuwemo? Oya ntabwo nayikuwemo, ahubwo nyine ntabwo ari ngombwa ko tubivugeho cyane ariko indirimbo ntabwo nayikuwemo. Kuko nyirayo (Director Gad) niwe wari wampamagaye ngo nze tuyikorane nyuma haza kubaho ko mpita njya mu ikorwa ry’umushinga w’indirimbo ‘Jugumila’ [Yakoranye na Chriss Eazy na Dj Phil Peter] biba ngombwa ko mbasaba ko bashaka undi muhanzi uyijyamo.”

Yavuze ko nubwo atagaragaye mu ndirimbo 'Molomita' yiteguye gukomeza gukorana na Director Gad igihe cyose azamukenera. Ati “Ni indirimbo nziza nakundaga, ariko kubera ko nari mfite izindi ‘Project nyinshi cyane cyane ko muri uyu mwaka nteganya ibindi bikorwa, indi ‘Project’ Gad azakora niteguye kumushyigikira, izakurikirana n’iyo nzagaragaramo, kuko ndacyari mu kumushyigikira.”

Uyu musore yavuze ko nubwo amaze igihe ateguje Album, ariko itagera ku musozo ku buryo yayimurikira abantu, kuko bishobora kumufata imyaka itatu kugirango ijye hanze. Avuga ko muri iki gihe, umuhanzi akora Album bitewe n'ibigo runaka bicuruza indirimbo byavuganye nawe bikamufasha kuzayisakaza.

Ni ubwa mbere Kenny Sol na Nel Ngabo bahuriye mu ndirimbo nyuma y'imyaka irenga itatu buri umwe ari mu kibuga cy'umuziki.

Kenny Sol abarizwa mu inzu ifasha abahanzi mu bya muzika ya 1:55 AM, ni mu gihe Nel Ngabo abarizwa mu inzu ifasha abahanzi mu bya muzika ya Kina Music.

Ni ubwa mbere izi 'Label' zombi zahuje imbaraga mu ikorwa ry'indirimbo, ibintu bigaragaza ubufatanye bukenewe mu rugendo rw'umuziki w'u Rwanda.

Director Gad aherutse kubwira InyaRwanda ko yagize igitekerezo cyo guhuriza mu ndirimbo aba bahanzi bombi, kubera ko ari abahanga, kandi yabonaga ko ubumwe bw'abo bwatanga umusaruro ushimishije mu rugendo rw'umuziki.

Ariko kandi yabitekerejeho mu rwego rwo kwagura amarembo y'umuziki wa Nel Ngabo. Ati 'Nel Ngabo ni umuhanzi wa Kina Music afite indirimbo nyinshi, izo ndirimbo zose yazikoreye kwa Clement, ubu rero twamujyanye kwa Element kugirango nabo bagerageze barebe ko hari icyo bageraho. Urumva, Nel Ngabo guhura na Element ni ibintu binini. Element nawe uramuzi iyo yakoze indirimbo iba igomba kuba ari nziza uko byagenda kose.'

Akomeza ati 'Kenny Sol ni umuhanga nk'ibisanzwe. Ikindi kirimo kidasanzwe ni uko ari bwo bwa mbere aba bahanzi bahuriye mu ndirimbo. Ikindi kidasanzwe ni uko nanjye ndimo nk'uko byagutunguye, byatunguye n'abandi rwose.'

Mu 2022, nibwo Gad yatangiye urugendo rwo gutunganya indirimbo z'abahanzi banyuranye mu buryo bw'amashusho. Ibi byatumye muri uriya mwaka yegukana igikombe cy'uwahize abandi mu bayobora amashusho y'indirimbo mu bihembo bya Isango na Muzika Awards 2022.

Ni igihembo akesha indirimbo yakoze zakunzwe nka 'Good Luck' ya Ariel Wayz, 'Akinyuma' ya Bruce Melodie, Terimometa ya Phil Peter na Kenny Sol, 'Suwejo' yitiriwe Album y'umuhanzi akaba n'umunyamakuru Yago n'izindi.

Ni nawe wakoze indirimbo 'Muzadukumbura' ya Nel Ngabo na Fireman, anakora indirimbo 'Mutuale' ya Bruce Melodie na Nel Ngabo, 'Tobora' ya Knowless n'izindi.

Kevin Kade yatangaje ko yakuwe mu ndirimbo 'Molomita' kubera ko atabonye umwanya igihe yari akenewe

Kenny Sol waririmbye muri iyi ndirimbo abarizwa muri Label ya 1:55 AM

Nel Ngabo ni umwe mu babarizwa muri Label ya Kina Music

Director Gad avuga ko iyi ndirimbo azayifashisha muri filime amaze igihe ari gutegura

KANDA HANO UREBE AMASHUSHO Y'INDIRIMBO 'MOLOMITA'

“> 

Ni igikorwa bakoze ku gicamunsi cyo kuri uyu wa Mbere tariki 13 Gicurasi 2024, aho bari kumwe na bamwe mu bakunzi/Abafana babo babarizwa mu bice bitandukanye by'Igihugu, mu rwego rwo kurushaho kumenya amateka y'u Rwanda.

Basuye ibice bitandukanye bigize uru rwibutso, berekwa uko Jenoside yateguwe, ukuri kw'ayo, uko yashyizwe mu bikorwa n'ingaruka yateje ndetse n'uko Ingabo zari iza RPA zabohoye Igihugu, zigasubiza u Rwanda n'Abanyarwanda ijambo.

Imibare igaragaza ko ¾ ari urubyiruko rutuye u Rwanda. Bituma, Guverinoma ishyira imbaraga mu kubashyira mu myanya kugirango batangire gufata inshingano.

Umuhanzi akaba n'umwanditsi w'indirimbo, Munyanshoza Dieudonne wamamaye nka Mibirizi, yabwiye InyaRwanda ko bakoze iki gikorwa kubera ko Kwibuka ari 'inshingano za buri wese' ari 'nayo mpamvu nkatwe nka Orcheste Impala n'abakunzi bacu hashize iminsi mike twishyize hamwe, tukaba rero twaragize igitekerezo cyo kuza hano kugirango twunamire abacu'.

Akomeza ati 'Nk'uko nabivuze kwibuka ni inshingano za buri muturarwanda wese. Natwe, twaje kugirango twunamire abacu bishwe muri Jenoside yakorewe Abatutsi, ariko noneho tugamije kugirango dutekereje kuri aya mateka y'urwangano n'ubugome twashowemo na Leta mbi n'ubutegetsi bwatumye Abanyarwanda bamarana, Abatutsi benshi baricwa, akaba ari nayo mpamvu twaje kugirango twibuke amateka mabi, ariko tunakumire, tunirinde icyo ari cyo cyose cyatuma dusubira muri aya mateka mabi.'

Munyanshoza yavuze ko mu myaka 30 ishize hari intambwe ninini imaze guterwa mu kwibuka no kwiyubaka, ari nayo mpamvu buri wese akwiye kugira uruhare mu kurinda ibimaze kugerwaho.

Uyu muhanzi wamamaye mu ndirimbo zijyanye no kwibuka, yavuze ko Impala ndetse n'abakunzi bayo, biyemeje gukumira ko Jenoside yakongera kubaho ukundi.

Yavuze ko hari abahanzi batije umurindi umugambi wo kurimbura abatutsi kandi 'mu by'ukuri bitakagombye'. Yavuze ko umuhanzi ari 'umuntu ukwiye gutanga ubutumwa bwiza kandi bwubaka'.

Munyanshoza yavuze ko nyuma ya Jenoside abahanzi bahanganye no kuziba icyuho, biyemeza guhanga ibihangano byubaka, kandi abona ko byatanze umusaruro wukaba.

Yashishikarije urubyiruko 'bakiri bato' kwishimira ko bavukiye mu gihugu cyiza. Ati 'Ibyiza bagomba kubisigasira, kuko ejo heza ni ahabo. Ni muri urwo rwego rero twibuka, ari tuniyibuka, ariko tunakangurira buri wese gukumira ko Jenoside yakongera kubaho ukundi.'

Munyanshoza yavuze ku rwibutso rwa Jenoside rwa Kigali, basuye ibice bitandukanye by'uru rwibutso, biyemeza 'kwirinda icyo ari cyo cyose, kwamagana uwo ari we wese, aho ari ho hose, wakongera gukwiza ingengabitekerezo ya Jenoside'.

Yashishikarije abahanzi gukoresha impano yabo bakora ibihangano byubaka. Ati 'Ni ukuvuga ngo ubutumwa bw'umuhanzi bugera kure henshi hashoboka, wabushyira mu ndirimbo, mu mivugo, mu nyandiko, wabushyira muri filime, ariko bigera henshi cyane, turabashishikariza guhanga ibihangano byubaka.'

Umuyobozi w'Abakunzi ba Orchestre Impala, Mutoni Evode yabwiye InyaRwanda ko basuye Urwibutso rwa Jenoside rwa Kigali mu rwego rwo kwiga amateka u Rwanda rwanyuzemo, kugeza ubwo Ingabo zari iza RPA zifashe iya mbere zihagarika Jenoside yakorewe Abatutsi.

Yavuze ko nka Orchestre Impala byabafashije kumenya birushijeho amateka y'u Rwanda. Ati '[…] Impamvu twibuka nk'Abanyarwanda ni ngombwa mu rwego rwo kuzirikana inzirakarengane zishwe muri Jenoside yakorewe Abatutsi yatwaye ubuzima bw'abarenga Miliyoni. Ni ngombwa rero guhora twibuka, tunagirango dukangurire abakiri bato gukomeza kumenya ingaruka z'ubuyobozi bubi bwaranze igihugu cyacu bugatuma Jenoside iba.'

Mutoni Evode yavuze ko muri iki gihe abahanzi bafite umukoro wo kwigisha Abanyarwanda ubumwe n'ubwiyunge, no kubiba amahoro n'urukundo mu bantu.

Yavuze ko abahanzi kandi bakwiye kwifashisha inganzo y'abo batanga inyigisho zigera ku banyarwanda bose hagamijwe ko 'ibyiza u Rwanda rumaze kugeraho byamenyekana'. Evode yavuze ko banazirikana inzirakarengane zabarizwaga muri Orchestre Impaka zishwe muri Jenoside yakorewe Abatutsi.

Urwibutso rwa Jenoside rwa Kigali, ruruhukiyemo imibiri y'abazize Jenoside yakorewe Abatutsi irenga ibihumbi magana biri na mirongo itanu (250,000).

Aha hakaba ari ku gicumbi cy' imiryango y'abarokotse Jenoside, abavandimwe n'inshuti bahurira bibuka ababo.

Nk'ahantu ho kwibukira no gutanga inyigisho ku mateka yaranze u Rwanda, urwibutso rwa Jenoside rwa Kigali rushyira imbaraga mu kwigisha abantu ububi bwa Jenoside n'ubundi bwicanyi ndengakamere mu rwego rwo kurinda ko yakongera kubaho ukundi.

Mu gihe cy'iminsi ijana yo Kwibuka, abasura uru rwibutso basabwa gusiga ubutumwa bwo kwibuka mu gitabo cyagenewe abashyitsi, mu rwego rwo gukomeza kwibuka abazize Jenoside no gutera imbaraga abayirokotse.

Urwibutso rwa Jenoside rwa Kigali rugizwe n'ibice bitatu bisurwa, igice kinini ni ikivuga ku mateka ya Jenoside yakorewe Abatutsi mu 1994. Hari igice cyagenewe kwibuka abana bazize Jenoside n'igice kigaragaza amateka ya Jenoside yakozwe mu bindi bihugu kw'Isi.

Hari ibindi bice nkaho abantu bashobora kwigira amateka bakoresheje ikoranabuhanga, ubusitani ndetse n'imva rusange zishyinguwemo imibiri y'abazize Jenoside. Ibi bice byose bitanga inyigisho ku basura urwibutso.

Mu bihe bitandukanye, Orcheste Impala yacurangiye abanyarwanda indirimbo zabashimsihije cyane kandi ifasha Leta mu gukangurira abaturage amajyambere n'ibindi.

Umwihariko wayo ni uko ari ryo tsinda ryamaze igihe kirekire ritarasenyuka nk’uko byagendekeraga andi matsinda mu bihe bitandukanye mu Rwanda.

Ryanyuzemo abahanga mu muziki nka Soso Mado, Tubi Lando, Mimi La Rose, Maitre Lubangi, Pepe larose, Semu, n’abandi.

Bamamaye mu ndirimbo nka ‘Nyiramaliza’, ‘Anita Mukundwa’, ‘Abagiramenyo’, ‘J'ai bien choisi’, ‘Anonciata’, ‘Ese ko Ugiye’, ‘Aliya’, ‘Goretti’ n’izindi.

Orchestre Impala basuye Urwubutso rwa Jenoside rwa Kigali ruherereye ku Gisozi basobanuriwa amateka n'amahano yagwiririye u Rwanda

Basobanurirwa byimbitse amateka y'u Rwanda mu gihe cya Jenoside yakorewe Abatutsi, uko yahagaritswe n'aho u Rwanda rugeze rwiyubaka

Bunamiye kandi bashyira n'indabo ahashyinguye iyi mibiri mu rwego rwo kubaha icyubahiro

Umuhanzi akaba n'umwanditsi w'indirimbo, Munyanshoza yasabye abahanzi gukoresha inganzo bahamagararira amahoro n'urukundo

Umuyobozi w'abafana ba Orchestre Impala, Mutoni Evode yavuze ko basuye Urwibutso rwa Jenoside rwa Kigali mu rwego rwo kwiga amateka 

Mimi La Rose wamamaye muri Orchestre Impala

Kanda hano urebe amafoto menshi ubwo Orchestre Impala yasuraga Urwibutso rwa Jenoside rwaKigali

AMAFOTO: Ngabo Serge- InyaRwanda.com

Icyongereza nacyo ni ingenzi cyane mu burezi by'umwihariko mu Gihugu nk'u Rwanda kuko ari rwo rurimi rutegurwamo gahunda y'amasomo yigishirizwa mu Gihugu, kikaniyongera ku Kinyarwanda n'Igifaransa nk'indimi zimewe.

Icyakora ubu gukoresha ikoranabuhanga n'imikoreshereze y'ururimi rw'Icyongereza mu burezi ntibiragera ku rwego rushyitse ndetse akaba ari bimwe mu bikibangamiye ireme ryabwo nk'uko byagarutsweho n'Umuyobozi wa Koleji y'Uburezi muri Kaminuza y'u Rwanda [UR-CE], Prof Nsanganwimana Florien.

Ni ingingo yagarutsweho ku wa 13 Gicurasi 2024 ubwo UR-CE binyuze muri gahunda ya Leaders in Teaching [LIT] yatangizaga inama mpuzamahanga y'iminsi itatu ihuza abashakashatsi baturutse mu bice bitandukanye by'Isi.

Muri iyi nama hazarebwa ku ngingo nyinshi zigaruka ku mpinduka zikenewe mu burezi bugamije iterambere rirambye.

Prof Nsanganwimana, yagize ati 'Gutanga ubumenyi bugendanye n'Isi ishingiye ku ikoranabuhanga ni ikintu kigiteye impungenge nk'ubu ubwenge bukorano buri kwigarurira hafi inzego zose ugasanga mu byo abanyeshuri biga byose turakenera iryo koranabuhanga ariko nk'abarimu tuba dufite ntibize muri ibi bihe bikaba ngombwa ko nabo bongera kwiga kugira ngo bagire ubwo bushobozi bwo gufasha abanyeshuri.'

Yakomeje agira ati 'Turacyafite urubyiruko rukeneye kuza kwiga ariko ugasanga ubushobozi za kaminuza zifite butabasha kwakira umubare munini icyarimwe.'

Kubera impamvu nyinshi zagiye zigaragaza ko hakeneye amavugurura mu masomo atangirwa muri UR, Prof Nsanganwimana, yavuze ko by'umwihariko porogaramu nyinshi zo muri Koleji y'Uburezi muri Kaminuza y'u Rwanda zavuguruwe.

Nko ku bijyanye n'Icyongereza amasomo n'ibizami bitangwa byashyizwe ku rwego mpuzamahanga ndetse mu masomo yose umunyeshuri yaba yiga hashyirwamo ikoranabuhanga ku buryo amenyera gukoresha mudasobwa na porogaramu zinyuranye.

Ati 'Ku barimu bari mu kazi hari ibyo dukorana na Minisiteri y'uburezi n'abandi bafatanyabikorwa mu kubukabira ubushobozi kuko ubumenyi basabwa ni ibintu bigenda bihinduka kubera igihe bigasaba ko habaho amahugurwa ahoraho.'

Kuri ubu hari imishinga itatu iri gufasha abarimu bo ma mashuri abanza n'ayisumbuye ku kuzamurwa urwego rwabo irimo uwatangijwe muri 2019 na MINEDUC utangirwamo amahugurwa afasha abigisha amasomo y'imibare, na siyansi, Ikoranabuhanga n'Imibare [STEM] mu kwimakaza gukura mu magambo ibyo bigisha bakabishyira mu bikorwa.

Hari undi mushinga w'Umuryango w'Abongereza witwa British council, wo gufasha abigisha bo mu cyiciro kimwe cy'amashuri abanza n'ikindi cy'ayisumbuye mu kuzamura urwego rwabo rw'icyongereza, ukaba waratangijwe mu 2023.

Undi mushinga ni uwatangijwe mu 2023 wo gufasha abarimu bose mu gihugu kuzamura ubumenyi bwabo mu ikoreshwa ry'ikoranabuhanga ukaba ushyirwa mu bikorwa n'abafatanyabikorwa batandukanye.

Umuyobozi Mukuru wa Kaminuza y'u Rwanda, Prof. Kayihura Muganga Didas, yavuze ko inama nk'izi ziba kugira ngo habeho kwisuzuma no kumenya aho uhagaze mu cyerekezo wihaye.

Ati 'Uyu munsi ni ukwibanda ku kureba niba imyigishirize y'ubu ijyanye n'ikinyejana turimo. Natwe tugomba kwisuzuma nk'abarimu tuti ese tujyanye n'ikinyejana? Ese umunyeshuri wigira muri icyo kinyejana tuzamufasha iki? Nibyo dushaka kurebera hamwe uko imyigishirize igezweho imeze, abayitabiriye [inama] bakanatwereka ibyo bo bagezeho.'

Iyi nama mpuzamahanga ibaye ku nshuro ya kabiri, kuko yabaye bwa mbere mu 2023. Yakiriwe na Kaminuza y'u Rwanda, Koleji y'u Burezi ku bufatanye na Mastercard Foundation.

Umuyobozi Mukuru wa Kaminuza y'u Rwanda, Prof. Kayihura Muganga Didas, yagaragaje ko iyi nama ari ahantu heza ho gukorera isuzuma ku burezi buri gutangwa muri ibi bihe

Umuyobozi wa UR-CE, Prof Nsanganwimana Florien, yagaragaje ko hari imbaraga zigomba gushyirwamo ku kuzima icyuho cyimikoreshereje y’Icyongereza n’ikoranabuhanga mu burezi

Iyi nama mpuzamahanga ibaye ku nshuro ya kabiri, kuko yabaye bwa mbere mu 2023

Muri iyi nama hamuritswe bumwe mu bushakashatsi n’imishinga byakozwe mu byiciro binyuranye mu rwego rw’uburezi

Iyi nama mpuzamahanga yahurije hamwe abashakashatsi baturutse mu bice bitandukanye by'Isi, aho hazibandwa cyane ku mpinduka zikenewe mu burezi bugamije iterambere rirambye

Ku munsi wa mbere w’iyi nama habaye ikiganiro cyagarutse ku cyakorwa kugira ngo hatangwe uburezi bujyanye n’ikinyejana turimo

Prof. Wenceslas Nzabalirwa wigisha muri UR, yagaragaje ko umwarimu akomeje guhabwa agaciro n’ireme ry’uburezi ryarushaho gukomeza kwiyongera

Amafoto: Niyonzima Moïse

Muri ibyo biganiro u Rwanda rwari ruhagarariwe n'Umuyobozi Mukuru w'Urwego rushizwe guteza imbere amashuri ya Tekinike imyuga n'ubumenyingiro, Ing. Paul Umukunzi.

Ni ibiganiro byabanjirije isinywa ry'amasezerano y'imikoranire ateganyijwe hagati y'impande zombi aho u Bushinwa bwifuza gufasha u Rwanda mu guteza imbere amashuri ya Tekinike, imyuga n'ubumenyingiro.

Ing. Paul Umukunzi yagaragaje ko ibiganiro byibanze ku kugaragaza uko amashuri ya TVET mu Bushinwa yatejwe imbere n'icyo amaze gufasha igihugu cyabo ku ruhando mpuzamahanga ndetse n'uburyo biteguye gufasha u Rwanda.

Ati 'Bifuza kudufasha mu Rwanda duhereye kuri TVET uburyo twazamura ibyo dukora kugira ngo natwe tubashe guhangana ku ruhando mpuzamahanga. Turi hafi gusinyana amasezerano nabo azaturanga mu minsi iri imbere kugira ngo umwana w'umunyarwanda wigiye hano mu Rwanda yigire ku rwego rumeze nk'urwo mu Bushinwa.'

Yagaragaje ko u Bushinwa bwifuza kwagura ibikorwa byarwo muri Afurika bishingiye ku gukora ishuri rya TVET rikora nk'iryo mu Bushinwa muri Afurika ritangiriye mu Rwanda.

Ati 'Dushaka kureba uburyo duhereye kuri iri shuri ryatewe inkunga n'u Bushinwa ryakwaguka rikagera ku rwego rw'amashuri yo mu Bushinwa. Ubu rero bavuze bati ni gute ishuri nk'iryo twari dufite mu Bushinwa twarigeza muri Afurika. Twizeye ko mu gihe cy'umwaka utaha hazatangira kwagura iri shuri riri aha ngaha.'

Nirimara kwagurwa, hazaba hatangirwa amasomo y'ibyiciro bitandukanye harimo ay'igihe gito, amasomo y'amashuri yisumbuye ndetse n'ay'icyiciro cya Kaminuza.

Ati 'Ikizakurikiraho ni ukumenya uko bizagenda kuko ubutaka bwo barabufite ni hano duhagaze, hazakurikiraho uburyo bwo kuhagura no kubona ibyangombwa bitandukanye ngo babashe kuza kwigisha ibyo byiciro binyuranye.'

Yagaragaje ko mu masezerano y'imikoranire u Rwanda ruteganya kujya rubona abarimu baturutse mu Bushinwa bakigisha mu mashuri yo mu Rwanda mu birebana na TVET.

Ing. Paul Umukunzi yagaragaje ko mu masezerano hashobora kubamo kuba abarimu b'Abanyarwanda bajya guhugurirwa mu Bushinwa cyangwa inzobere zo mu Bushinwa zikaza gutanga ubumenyi mu Rwanda.

Hari kandi gukorana mu bijyanye no kunoza imitegurire y'integanyanyigisho n'ibindi bitandukanye mu gihe cy'imyaka itanu iri imbere.

Umuyobozi w'Ikigo cy'Igihugu gishinzwe Ingufu mu Bushinwa, Dr.Yang Kun, yagaragaje ko nk'igihugu cyateye imbere mu bijyanye n'ubumenyi bushya mu ikoranabuhanga ryo gutunganya amashanyarazi hari byinshi u Rwanda ruzungukira muri iyo mikoranire.

Yagaragaje ko u Rwanda baruhisemo nk'igihugu kimakaje ikoranabuhanga kandi gifite intumbero ikomeye mu bijyanye no kugira ubukungu bubungabunga ibidukikije.

Yakomeje ati 'Nk'uko mu bizi u Bushinwa buza ku mwanya wa mbere mu gutanga umuriro w'amashanyarazi ukomoka ku mirasire y'izuba n'ukomoka ku muyaga. Twifuza gusangira ubwo bunararibonye ku Rwanda.'

Yagagaragaje ko bifuza gutanga ubwo bumenyi ku bakiri bato ku buryo bushobora gutanga umusaruro kandi bifuza guhera ku banyarwanda nyuma bikazagera no ku banyafurika muri rusange.

Umuyobozi Mukuru wa Beijing Forever Technology Co. ltd, Chen Xianlong, yashimangiye ko bishimira umusaruro mwiza wa Forever TVET School basanzwe batera inkunga ndetse rikaba rigiye kwagura, ashimangira ko u Rwanda ari umufatanyabikorwa wo kwizerwa.

Itsinda ry’Abashinwa biyemeje guteza imbere TVET mu Rwanda

Muri ibi biganiro itsinda ryo mu Bushinwa ryagaragaje aho igihugu kigeze kubera guteza imbere TVET

Ibiganiro byibanze ku guteza imbere imikoranire myiza ku mpande zombi

Bemeje ko hagiye kubakwa Kaminuza ya Sino Africa Polytechnic

Mu mezi 11 ashize ubwo iyi ndirimbo yari imaze gusohoka nibwo Niyo Bosco yanyarukiye ku rubuga rwa Instagram ashimira cyane Ross Kana ku ntambwe yari akomeje gutera mu muziki ariko mu gusoza ubutumwa bwe, avuga ko agiye gusengera ba nyiri indirimbo kugira ngo bajye bamenya gushima buri wese wagize uruhare mu gikorwa cyabo.

Si ibyo gusa kuko no mu kiganiro Niyo Bosco yagiranye na MIE Empire muri icyo gihe nabwo yivugiye ko ibyo bamukoze kuri iyi ndirimbo abifata nka coup d'état.

Icyo gihe yagize ati 'Noneho kubera uburyo Fou de toi iba yarambabaje ntaho byari bitaniye na coup d'état, Fou de toi bankoreye coup d'état.'

Producer Element uvuga ko iyi ndirimbo ari iye yasubije Niyo Bosco amubwira ko umuhanzi wese ugeze aho akorera indirimbo (Studio) akumva ibyo ari gukora atamushyira ku rutonde rw'abakoze kuri iyo ndirimbo.

Mu kiganiro Element yagiranye na 1:55AM Media yemera ko Niyo Bosco n'abandi bahanzi barimo Okkama na Christopher baje bamugana baje gukora indirimbo zabo ariko basanga ari kumva Fou de toi bakagira ibitekerezo bishya bamuha.

Ati 'Niyo Bosco nabonye ari kuvuga ngo ntabwo twamugaragaje mu bantu bagize uruhare ku ndirimbo 'Fou de toi' ntabyo namuha kuko umwanditsi wayo ni Rumaga ariko ntabwo nanone natesha agaciro ibyo yakoze.'

'Ushobora kuza muri studio ndigukora indirimbo ugatanga igitekerezo cyawe ibyo byonyine biba bifite agaciro kabyo ariko ntabwo bivuze ngo abantu bose banyuze muri studio ndigukora indirimbo ngo ndayibandikaho, gusa nubaha ibyo yayikozeho.'

Element avuga ko atangira gucura injyana ya 'Fou deToi' yari agiye kuyikorera Ross Kana ndetse bafatanya kwandika amwe mu magambo ayigize.

Basangiye ibitekerezo ndetse rimwe na rimwe bakiyambaza n'abandi bahanzi batandukanye yagiye ayumvisha mu bihe bitandukanye.

Indirimbo yatangiye kubaryohana biyambaza umusizi Junior Rumaga abafasha kuyandika neza ndetse bongeramo Bruce Melodie waririmbye inyikirizo yayo.

Kuri ubu iyi ndirimbo ni imwe mu ndirimbo nyarwanda zikunzwe hanze y'u Rwanda imaze gucurangwa inshuro zirenga miliyoni 14 ku rubuga rwa Youtube mu mwaka umwe imaze isohotse.

Producer Element asubiza Niyo Bosco yamubwiye ko buri muhanzi wese uje muri studio ari gukora indirimbo ataringobwa ko amwandika mubayigizemo uruhare

Ni igikorwa cyabaye kuri uyu wa 10 Gicurasi 2024 kibera ku Rwibutso rwa Jenoside rwa Kagasa ruri mu Murenge wa Gahanga mu Karere ka Kicukiro, rushyinguyemo imibiri isaga 16500 harimo na bamwe mu bakoreraga ibyo bigo.

Hibutswe abahoze ari abakozi babyo bagera kuri 29 bamaze kumenyekana amazina bahitanywe na Jenoside yakorewe Abatutsi. Abashyinguye muri uru rwibutso bunamiwe ndetse hanashyirwa indabo ku mva mu rwego rwo kubasubiza icyubabahiro bambuwe.

Abakozi, inshuti n'abagize imiryango y'abakozi bishwe muri Jenoside bahawe ibiganiro bitandukanye, bigaruka ku mateka yaranze u Rwanda akarugeza kuri Jenoside n'icyerekezo igihugu cyafashe cyo kwiyubaka bundi bushya.

Ubuyobozi bw'inzego z'ibanze muri Kicukiro nabwo bwifatanyije n'ibi bigo byombi mu gikorwa cyo kwibuka.

Umuyobozi Mukuru wa Rwanda Foam na AMEGERWA, Makuza Robert yavuze ko nk'ibigo byabuze ababikoreraga muri Jenoside ari inshingano yabyo kwifatanya n'Abanyarwanda kwibuka ndetse no kwirinda ko ibyabaye byazongera kwisubiramo haba mu bakozi babyo no mu bandi.

Yakomeje ati 'Ndasaba abakozi bacu muri rusange kurushaho kubumbatira ubumwe kuko ni byo bizatuma iyi Jenoside turimo kwibuka itazongera kuba ukundi'.

Depite Mukayijora Susanna, yavuze ko amateka Igihugu cyanyuzemo yatanze amasomo bihagije ku buryo ubu buri Munyarwanda adakwiye kwemerera uwo ari we wese washaka kuyatoba uko yishakiye.

Yahaye kandi urubyiruko umukoro wo kurinda u Rwanda mu buryo bwose kuko rufite ubushobozi igihugu cyaruhaye bwo kubikora.

Ati 'Rubyiruko, mufite umukoro ukomeye wo kurinda Igihugu. Urugamba rw'amasasu rwararangiye nta bicwa bahari mu gihugu dufite umutekano ariko dufite urugamba rukomeye rwo guhangana n'abahakana bakanapfobya Jenoside, kandi bikorerwa ku mbuga nkoranyambaga'.

Yakomeje ati 'Mwarize kuko Igihugu cyabahaye amahirwe yo kwiga. Nimuhangane n'urwo rugamba muzarutsida kuko iyo mwaje hano mumenya ukuri kandi kuratsinda. Abapfobya ni benshi ariko na mwe murahari kandi umubare munini w'abatuye u Rwanda ni urubyuruko. Muhaguruke rero mugaragaze ukuri kw'ibyabaye'.

Uru Rwibutso rwa Kagasa rwubatswe na Rwanda Foam ifatanyije n'inzego z'ibanze kandi bakomeza gufatanya kurwitaho.

Rwanda Foam na AMEGERWA kandi bakora ibikorwa bitandukanye byo kwita ku barokotse Jenoside mu Murenge wa Gahanga. Izi nganda kandi zifasha mu buryo bunyuranye abarokotse Jeoside n'ababakomokaho mu Murenge wa Gahanga harimo kubatera inkunga mu burezi ndetse no guha akazi bamwe muri bo.

Abakozi ba Rwanda Foam na AMEGERWA bashyira indabo ku mva ziruruhukiyemo Abatutsi bishwe muri Jenoside

Urubyiruko rwasabwe guhangana n’abahakana n’abapfobya Jenoside Yakorewe Abatutsi

Depite Mukayijore Suzanne, yavuze ko amateka Igihugu cyanyuzemo yatanze amasomo bihagije ku buryo ubu buri Munyarwanda adakwiye kwemerera uwo ari we wese washaka kuyatoba uko yishakiye.

Umuyobozi Mukuru wa Rwanda Foam na AMEGERWA, Makuza Robert ashyira indabo ku mva ziruhukiyemo abazize Jenoside Yakorewe Abatutsi

Umuyobozi Mukuru wa Rwanda Foam na AMEGERWA, Makuza Robert yavuze ko nk'ibigo byabuze ababikoreraga muri Jenoside ari inshingano yabyo kwifatanya n'Abanyarwanda kwibuka

Urwibutso rwa Kagasa rwubatswe ku bufatanye na Rwanda Foam

Bacanye urumuri rw’icyizere

Diwarnify, ni umushinga wubatswe n'itsinda ry'abanyeshuri bo muri Kaminuza y'u Rwanda hashyizwe imbere ikoreshwa rya internet mu bindi bikoresho [Internet of Things- IoT]. Intego y'iri koranabuhanga ni ugutanga amakuru n'umuburo ku myuzure ishobora kwibasira ahantu igateza inkangu n'ibindi byago.

Iri koranabuhanga rishyirwa mu gikoresho runaka nacyo gifite utwuma tuzwi nka 'sensors' ku buryo gitanga amakuru mbere y'igihe ku buryo abari aho hafi bashobora kumenya uko bitwara, ibishobora gutanga umusanzu mu kugabanya ingano y'ibyangirika bitewe n'inkangu zitunguranye.

PharmaNet wo ni umushinga wibanda cyane ku muti w'ikibazo cy'isiragizwa ry'abarwayi mu gihe bashaka imiti rimwe na rimwe iba idahari. Ni porogaramu na yo iri kubakwa n'abanyeshuri bo muri UR izajya ihurirwaho n'abaganga ndetse n'abakorera muri za pharmacy ku buryo aba baganga bazajya batumanaho n'abacuruza imiti bigatuma bamenya iyo bagenera abarwayi bakaba banababwira aho bayisanga.

Hari kandi umushinga wiswe SoilBolt, wo kwifashisha ikoranabuhanga rya IoT mu gusuzuma ubuziranenge bw'ubutaka buhingwa n'indwara zibasira ibihingwa, hakaba uwiswe 'Mobile Refrigerated Van' witezweho kugabanya amata yangirika kubera ubwikorezi bwayo budateye imbere, n'indi mishinga myinshi.

Iyi mishinga yose yashibukiye muri gahunda y'amahugurwa mu by'ikoranabuhanga mu mushinga 'Kobe-Kigali ICT Business Initiative Project' yabereye muri Kaminuza y'u Rwanda, mu Kigo Nyafurika cy'Ikitegererezo cyigisha ibijyanye n'ikoreshwa rya murandasi mu bindi bikoresho (African Centre of Excellence in Internet of Things, [ACEIoT]) ku bufatanye n'ishuri ritanga ubumenyi mu ikoranabuhanga ryo mu Buyapani, Kobe Institute of Computing [KIC].

Muri iyi gahunda abanyeshuri bahabwa ubumenyi mu mashami atandukanye arimo imiyoborere ariko hakibandwa ku ikoranabuhanga cyane irya IoT n'iry'ubwenge bukorano 'AI'.

Iyo bakurikirana aya masomo basabwa kureba ibibazo bihari mu nzego z'ubuzima, ubuhinzi, ubwikorezi, ubumenyi bw'ikirere, uburezi, kurinda amakuru kuri murandasi n'izindi hanyuma bakanasabwa kwifashisha ikoranabuhanga, bagakora imishinga ikubiyemo ibisubizo by'ibibazo bagaragaje.

Itsinda ry'abanyeshuri bubatse iyi minshinga ni iry'icyiciro cya gatatu cy'iyi gahunda kuko ibindi byatambutse mu myaka yabanje. Iki cyiciro cyitabiriwe n'abanyeshuri 16 bo mu Rwanda, umwe wo muri Kenya, uwo muri Tanzania, uwa Malawi n'undi ukomoka muri RDC.

50% by'aba banyeshuri bari ab'igitsina gabo, n'abandi 50% ari ab'igitsina gore, bose barimo abiga mu cyiciro cya kabiri n'icya gatatu bya Kaminuza.

Kuri uyu wa 10 Gicurasi 2024, ubwo hasozwaga icyiciro cya gatatu cy'iyi gahunda, Alice Mugengano, wafatanyije n'itsinda rye mu kubaka PharmaNet, yabwiye IGIHE ko 'Nubwo amahugurwa arangiye, ariko turakomeza twubake porogaramu yacu, icya mbere tugomba gukora ni ukugana inzego zinyuranye zikadufasha.' 'Izafasha abarwayi mu kubona imiti vuba, igabanye igihe bataga mu gushaka imiti hirya no hino kandi itume imiti iboneka muri za pharmacy zose.'

Ineza Kalisimbi, watanze umusanzu mu kubaka 'Diwarnify' yavuze ko 'Mu kuwushyira mu bikorwa tuzakenera ibikoresho binyuranye bizatuma ukora neza. Izindi gahunda nyuma y'aha turi gutegura guhura n'inzego zinyuranye ziteguye kudushyigikira.'

Kuva mu 2019, iyi gahunda ya 'Kobe-Kigali ICT Business Initiative Project' imaze kunyuramo abanyeshuri 56 mu byiciro bitatu byagiye biba mu myaka itandukanye. Muri buri cyiciro itsinda ry'abanyeshuri ryahurizaga hamwe ubumenyi mu kubaka umushinga runaka watanga igisubizo cy'ikibazo gihari.

Umwarimu akaba n'umushakashatsi muri koleji y'ubumenyi n'ikoranabuhanga mu ishami rya computer science muri UR, Dr. Twahirwa Evariste, yavuze ko iyi gahunda imaze gutanga umusaruro.

Ati 'Icyo twishimira n'uko imishinga yabo iri ku rundi rwego, ubu turishimira ko tugiye kubaherekeza tukabahuza n'abikorera ku buryo ibi bitekerezo bafite n'aho bageze bashyira mu bikorwa imishinga yabo, tukabafasha kugira ngo bayibyaze umusaruro kuko ikigambiriwe ni ugukemura ibibazo.'

Bitewe n'imyaka yari yarateganyijwe, iyi gahunda yarangiranye n'iki cyiciro cya gatatu. Dr. Twahirwa, yavuze ko no muri Kaminuza y'u Rwanda hari izindi gahunda zitera inkunga imishinga nk'iyi bityo nta mpungenge zihari.

Umuyobozi wa JICA, Ikigega cy'u Buyapani gishinzwe Ubutwererane Mpuzamahanga ishami ry'u Rwanda, akaba ari nacyo cyateraga inkunga iyi gahunda, Minako Shiotsuka, yavuze ko intego ari ukubakira abanyeshuri ubushobozi, nabo bakabukoresho mu gutanga ibisubizo.

Ati 'Gahunda irarangiye ariko ariko tuzabakurikirana, ariko uko mbizi hari abanyeshuri batangiye imishinga yabo ubu babaye ba rwiyemezarimo ubu bari no kuba abafatanyabikorwa ba JICA.'

Aya mahugurwa y'amezi atandatu yatanzwe n'abanyeshuri barangije muri Kobe Institute of Computing(KIC) ndetse n'abarimu bigisha muri iki Kigo akaba yatangirwaga mu Kigo Nyafurika cy'Ikitegererezo cyigisha ibijyanye n'ikoreshwa rya murandasi mu bindi bikoresho (African Centre of Excellence in Internet of Things, [ACEIoT]) gikorera muri Kaminuza y'u Rwanda.

Aba banyeshuri bahawe impamyabumenyi zigaragaza ko basoje amahugurwa ajyanye n’ikoranabuhanga

Buri wese witabiriye iyi gahunda yabishimiwe

Abanyuze muri uyu mushinga mbere batanze ubuhamya bw’uko wabafashije

Aba banyeshuri berekanye imishinga itandukanye y’ikoranabuhanga

Alice Mugengano, wafatanyije n'itsinda rye mu kubaka PharmaNet, yavuze ko aya mahugurwa yabagiriye umumaro

Dr. Josephine Malonza, ni umwe mu bashimiye iyi gahunda agaragaza ko hari umusanzu yatanze

SoilBolt, ni umushinga wubatse hagamijwe kumenyekanisha ubuziranenge bw’ubutaka buhingwa n’indwara zibasira ibihingwa

Ubwo hasizwaga icyiciro cya gatatu abanyeshuri bacyitabiriye bahawe impamyabumenyi

Umwarimu akaba n'umushakashatsi muri koleji y'ubumenyi n'ikoranabuhanga mu ishami rya computer science muri UR, DR Twahirwa Evariste, yagaragaje ko hari gahunda nyinshi zihari muri UR zafasha aba banyeshuri