Category: Uncategorized

Gusezerana bwa Kabiri hagati y’abashakanye bizwi nka ‘Vow’s Renewal’ mu Cyongereza, ni kimwe mu bimenyetso byerekana ko abashakanye basezeranye bushya, bagasiga inyuma ibyabateranyaga bagatangira bushya urugendo rw’urukundo.

Mu bihe bitandukanye hagiye hagaragara ‘Couples’ z’ibyamamare by’i mahanga byagiye bigirana ibibazo mu rushako ku buryo byavugwaga ko gatanya iri hafi, nyamara bakongera kwiyunga ndetse bakanasezerana bwa Kabiri nk’ikimenyetso cyo gutangira urugendo rw’urukundo rushya.

US Weekly yatangaje urutonde rwa ‘Couples’ 5 zizwi mu myidagaduro zasezeranye bwa Kabiri mu gihe byavugwaga ko bagiye gutandukana:

1. David Beckham na Victoria Beckham

Si ubwa mbere si ubwa kabiri mu rugo rwa David Beckham na Victoria Beckham havuzwemo ibibazo gusa bishingiye ku buhehesi bw’uyu mugabo wakanyujijeho muri Ruhago mu makipe nka Machster United, Paris Saint Germain n’izindi.

David Beckham aherutse kubikomozaho muri filime mbarankuru ku buzima bwe (Documentaire) yitwa ‘Beckham’ aho yiyemereye ko yagiye aca inyuma umugore we Victoria inshuro zitabarika ndetse ko mu 2016 yari yamusabye ko batandukana. Nubwo Victoria yifuzaga gatanya, Beckham yamusabye imbabazi bariyunga ndetse basezerana bwa kabiri muri Mutarama ya 2017.

2. Jay Z na Beyonce

Aba nibo bafatwa nka ‘Couples’ ya mbere mu muziki wa Amerika bitewe n’uko aribo batunze agatubutse kurusha ibindi byamamare, ndetse bombi bafatwa nk’ikingi za mwamba mu muziki. Ku bakurikirana imyidagaduro ntibazibagirwa umwaka wa 2016 ubwo Beyonce yasohoraga album yise ‘Lemonade’ yari igizwe n’indirimbo zivuga ko Jay z yamuciye inyuma.

Aya makuru yarasakaye hirya no hino ku buryo bamwe bavugaga ko ibyo Beyonce avuga atari ukuri ahubwo ko yabikoze kugirango acuruzze album ye. Nyamara nyirubwite Jay Z yahise yemera ko yamuciye inyuma nawe abicisha muri album yise ‘4:4’. Aba bombi kandi mu 2017 batangarije Vogue Magazine ko Jay Z yaciye inyuma Beyonce mu 2014, ndetse ko n’indirimbo yashyize kuri iyi album yazanditse muri uwo mwaka agifite agahinda.

Muri Nzeri ya 2018 Jay Z na Beyonce basezeranye bwa Kabiri barikumwe n’abana babo batatu. Nyuma yo gukora ubukwe bwa kabiri bahise basohora album bahuriyeho bise ‘Everything Is Love’, aho bagarutse ku kuba Beyonce yarahagaritse gatanya yendaga gusaba uyu muraperi wa mbere ukize ku Isi.

3. Justin Timberlake na Jessica Biel

Icyamamare mu njyana ya ‘Pop’, Justin Timberlake wahawe akazina ka ‘Prince of Pop’, ari mu bahanzi bamaze igihe  kirenga imyaka 30  mu muziki, Timberlake n’umugore we Jessica Biel usanzwe ukina filime, bari muri ‘Couples’ zikunze kugarukwaho i Hollywood. Gusa nabo bigeze kunyura mu bihe bitoroshye mu 2021 dore ko ibinyamakuru by’imyidagaduro byakunze kuvuga ko baba bagiye gutandukana. Ibi ariko siko byagenze kuko mu Kuboza kwa 2022, aba bombi basezeranye bundi bushya mu birori bakoreye mu Butaliyani.

4. Ellen DeGeneres na Portia De Rossi

Umunyarwenya akaba n’icyamamare kuri televiziyo Ellen DeGeneres, ni umwe mu byamamare byiyemererako biryamana n’abo bajuje igitsina (Lesbian). Mu rugo rwe n’umugore mugenzi we Portia De Rossi barushinze mu 2008 hakunze kuvugwamo umwuka utari mwiza.

Byumwihariko mu 2022 havuzwe ko De Rossi yasabye Ellen guhagarika akazi cyangwa bagahana gatanya. Ibi koko niko byagenze Ellen yasezereye ikiganiro cye kuri Televiziyo ya ABC yari amaze imyaka 25 akora atangaza ko agiye guha umwanya we umuryango we. Muri Gashyantare ya 2023 Ellen na De Rossi basezeranye bwa kabiri.

5. Justin Bieber na Hailey Baldwin

Kuva mu 2022 hakunze kuvugwa ko umuhanzi w’icyamamare Justin Bieber n’umunyamideli Hailey Baldwin batabanye neza. Ibi byarushijeho kugarukwaho ubwo Bieber mu 2023 yatangarizaga Rolling Stone ko yicuza kuba yarakoze ubukwe akiri muto. Ntibyatinze Sebukwe witwa Stephanie Baldwin nawe atangaza ko mu rugo rw’umukobwa we n’uyu muhanzi ko harimo ibibazo.

Byavugwaga ko mu byo Justin atumvikanaho n’umugore harimo nko kuba yaramusabaga ko atakongera gusubira mu muziki. Nyamara nubwo inkuru zitasibaga kuvuga ko aba bombi bari mu nzira ya gatanya dore ko Hailey yari yarakuyemo impeta yambitswe n’uyu muhanzi, baje gutungurana batangaza ko basezeranye bwa Kabiri ndetse ko bagiye kwibaruka imfura yabo. Ibi babitangaje ku wa Gatanu w’icyumweru gishize.

Iki ni ikibazo mpuzamahanga kuko kiri kwibasira ibihugu bitari u Rwanda gusa. Mu bindi bihugu byibasiwe by'umwihariko harimo nka Tanzania, aho umuvuduko wa internet wagabanutse ku kigero cya 70%. Kenya, Uganda, Malawi, Madagascar, Sudan n'ibindi bihugu bitandukanye nabyo byahuye n'iki kibazo.

Urwego Ngenzuramikorere mu Rwanda, RURA, rwatangaje ko ikibazo kiri gukurikiranwa, gusa ruvuga ko gishobora gufata igihe kitari gito kugira ngo gikemuke.

Aha rero ikiri kwibazwa n'abantu benshi, ni ugusobanukirwa ikibazo cyabayeho nyirizina ndetse n'icyagiteye.

Muri rusange, ikibazo cyabaye ni ukwangirika k'umugozi, cyangwa se umuyoboro utwara amakuru aba ari gushakishwa n'abakoresha internet.

Uyu muyoboro cyangwa fibre optic, uba utwaye insiga nazo zitwaye ibimenyetso bisomwa na mudasobwa, yaba computer cyangwa se telefoni.

Muri make, ushatse wafata iyi miyoboro turi kuvuga nk'umuhuza wawe n'amakuru ushaka, kuko ari wo ukura amakuru muri 'servers' ukayakugezaho.

Servers yo ni nk'ububiko bw'ibintu byose biri kuri internet. Impamvu bavuga ko ikintu cyagiye kuri internet kidasibangana ni uko nyine kiba kibitswe muri izi servers.

Servers ni ububiko bw'ibintu byose biri kuri internet. Icyakora izi servers ntabwo ziba mu bihugu byose. Kenshi ukunze gusanga ziri mu bihugu bikomeye birimo ibyo muri Amerika ya Ruguru, u Burayi ndetse na Aziya.

Birumvikana ko kugira ngo ubone amakuru ushaka kuri internet, ari uko hagomba kubaho umuyoboro uhuza mudasobwa yawe na servers zibitse amakuru yose ari kuri internet.

Iyi miyoboro rero ikora urugendo rurerure ituruka aho uri hose ku Isi, igana kuri server runaka ibitse amakuru wifuza.

Umwe muri iyi miyoboro rero niwo wangiritse. Umuyoboro wangiritse witwa Eassy, ukaba uhuza ibihugu biva ku ihembe rya Afurika muri za Somalia, Sudan na Djibouti, ugana muri Afurika y'Epfo, ari nako uca mu bihugu biri muri iyo nzira birimo Kenya, Tanzania, Mozambique, Madagascar n'Ibirwa bya Comores.

Ibihugu nk'u Rwanda, Uganda na Malawi bidakora ku nyanja, bibona internet binyuze muri ibyo bihugu biyikoraho. Iyo byagize ikibazo, birumvikana ko n'ibihugu nk'u Rwanda bibigenderamo.

Muri rusange uyu muyoboro wangiritse ufite ibilometero birenga ibihumbi 10.

Igice cyangiritse giherereye mu bilometero 45 uvuye mu Mujyi wa Durban uri muri Afurika y'Epfo.

Afurika y'Epfo ni kimwe mu bihugu bike bya Afurika bifite servers nyinshi zikoreshwa ku rwego mpuzamahanga, ari nayo mpamvu umuyoboro wangiritse ari ho waganaga.

Gusa rimwe na rimwe, gucika kw'iyi miyoboro ntibituma internet ihagarara burundu, kereka iyo umuyoboro umwe ari wo ugana mu gice runaka, gusa bituma internet igenda gake, kuko amakuru yanyuzwaga muri uwo muyoboro ashobora gushaka indi nzira, akajya guca mu yindi miyoboro ya kure cyangwa se irimo gucamo andi makuru menshi, bityo amakuru ukayabona bigoranye, ari nabwo tuvuga ko internet iri kugenda gake.

Ku rwego rw'Isi, habarizwa iyi miyoboro igera muri 570, yose hamwe ifite ibilometero birenga miliyoni 1.4 izengutse Isi yose, igahuza imigabane yose ku Isi n'ububiko, cyangwa se servers zose ziri ku Isi ariko inyuze munsi y'Inyanja.

Nibura buri kwezi, hari ahantu habiri harangirika kuri iyi miyoboro. Kuyikosora ntabwo ari ikintu cyoroshye kuko bikorwa na robots, na cyane ko iyi miyoboro iba iri ku ndiba y'inyanja neza neza.

Impamvu ubu buryo ari bw'imiyoboro inyura munsi y'inyanja ari bwo bukoreshwa, ni uko ari bwo bukwirakwiza amakuru menshi, ku muvuduko mwinshi kandi mu gihe gito cyane kurusha uburyo bwa satellite butinda. Ku rwego rw'Isi, abakoresha internet bifashishije satellite ntibarenga 1% by'abayikoresha bose.

Nibura uyu muyoboro umwe uba ugenewe kumara imyaka 25 ukoreshwa, mu gihe nta kibazo kidasanzwe ugize.

Imiyoboro itwara insiga zinyuramo ibimenyetso bisomwa na mudasobwa mu kugeza amakuru ku bakoresha internet, iba iri hasi mu ndiba y’inyanja

Ibi babigaragaje kuri uyu wa Kabiri tariki ya 14 Gicurasi 2024 ubwo mu Murenge wa Rwimiyaga haberaga ubukangurambaga bwo kwirinda Virusi itera Sida. Ni ubukangurambaga bwateguwe n'Ikigo cy'Igihugu gishinzwe Ubuzima, RBC, ku bufatanye na Strive Foundation Rwanda itewe inkunga na Abbott.

Mugisha Eric utuye mu Kagari ka Rwimiyaga mu Murenge wa Rwimiyaga yagize ati 'Ku manywa usanga udukingirizo tugura 200 Frw, iyo bigeze nijoro hari n'aho usanga bari kutugurisha 500 Frw ugasanga biri kugorana kukagura, usanga rero abenshi bakorera aho kuko ayo mafaranga ntayo baba bafite, ntabwo yayabona kuko n'ayo kwishyura lodge ntabwo aba ayafite.'

Mugisha yakomeje avuga ko hari abahitamo gukorera aho kubera ihenda ry'udukingirizo bigatera ibibazo birimo inda z'imburagihe, benshi ngo bahakura Sida n'izindi ndwara zandurira mu mibonano mpuzabitsina.

Yavuze ko kugira ngo iki kibazo gikemuke Leta yashyiraho inzu nto zitangirwamo udukingirizo ku buntu hirya no hino ku mihanda.

Hakizimana Aimable we yavuze ko inzego z'ubuzima zikwiriye kuganiriza abacuruza udukingirizo bakareka kuduhenda mu masaha y'ijoro ngo kuko biri guteza abantu benshi Ibibazo.
Yavuze ko akenshi umucuruzi akakugurisha bitewe n'uko yakubonye. Iyo akubonanye n'umukobwa mu masaha y'ijoro cyane ahita aguhenda kuko aba abizi ko utari bugasige.

Dukuzeyezu Jean Baptiste we yavuze ko iyo umucuruzi ahenze agakingirizo bituma wa muntu w'amikoro make akorera aho imibonano mpuzabitsina bikaba byanakwirakwiza Virusi itera Sida mu buryo bworoshye. Yavuze ko kugira ngo iki kibazo gikemuke ari uko batwegerezwa hafi.

Bamwe mu bakobwa b'urubyiruko bo muri uyu Murenge bo basabye ko abacuruzi bahenda udukingirizo bafatirwa ibihano bikakaye kuko baba bari kwica ubuzima bw'abandi bantu, bavuze ko kandi Leta yamanura ku bajyanama b'ubuzima udukingirizo aho kudusanga ku bigo nderabuzima ngo kuko ibyinshi biri kure yabo.

Umwe yagize ati 'Iyo bahenze udukingirizo ntabwo tuba tugishoboye kwirinda Virusi itera Sida n'izindi ndwara, Leta nishyireho inzu nto twacururizwamo kuko utw'ubuntu kujya kutureba ku bigo nderabuzima usanga ari kure nta bantu bapfa kugerayo.'

Umuyobozi w'Akarere ka Nyagatare wungirije ushinzwe imibereho myiza y'abaturage, Murekatete Juliet, yavuze ko bafatanya n'abafatanyabikorwa mu kugeza udukingirizo hirya no hino, nko mu bigo nderabuzima 20 no mu bitaro, ashimangira ko aho hose hariyo udukingirizo abafatanyabikorwa bagenda babaha.

Umuyobozi w'ishami rishinzwe kurwanya Virusi itera Sida mu Kigo cy'Igihugu cy'Ubuzima, Dr Ikuzo Basile, yavuze ko ubusanzwe udukingirizo dutangirwa ubuntu ku bigo nderabuzima.

Yakomeje avuga ko inzu zitangirwamo udukingirizo zitari zagera hose mu gihugu.

Ati 'Nta muntu ukora imibonano mpuzabitsinda ari nk'impanuka niba yumva gahenze nijoro ushobora kugashaka ku manywa ukaba ugafite wenda wagera nijoro ukaba wakabona. Udashoboye kukagura yajya ku kigo nderabuzima bakakamuha byagera nijoro akaba agafite yahura no gushaka kubikora akaba yiteguye.'

Imibare itangwa n'Ikigo gishinzwe Ubuzima, RBC igaragaza ko abantu ibihumbi 219 aribo bafata imiti ya Virusi itera Sida mu Rwanda. Kuri ubu ubwandu buri kuri 3% mu gihe ubwandu bushya buri kuboneka ari abantu 8/1000. Mu rubyiruko niho haboneka umubare munini w'abarwayi bashya bangana na 35%, abakobwa akaba aribo benshi.

Umuyobozi w'Akarere ka Nyagatare wungirije ushinzwe imibereho myiza y'abaturage, Murekatete Juliet, yavuze ko ku bigo nderabuzima hatangirwa udukingirizo tw'ubuntu

Urubyiruko rwo mu Karere ka Nyagatare ruvuga ko hari abacuruzi bitwikira ijoro bagahenda udukingirizo

Urubyiruko rw'abakobwa rwasabye ko abagurisha udukingirizo baduhenze bahanwa

Depite Mukabalisa Donatille agaragaza ko mu gihe amaze mu Nteko nk'umuyobozi wayo ndetse n'umudepite muri rusange yishimara ibyo Guverinoma y'u Rwanda yabashije kugeraho bigizwemo uruhare na buri wese.

Mu kiganiro na IGIHE yagarutse ku ngingo zinyuranye zirimo uko abona inshingano z'Inteko mu guhagararira abaturage, imyiteguro y'amatora mu ishyaka PL abereye umuyobozi ndetse n'izindi ngingo zinyuranye.

IGIHE: Imyiteguro y'amatora ihagaze ite muri PL?

Donatille Mukabalisa: Nk'uko mubizi muri Nyakanga 2024 hazaba amatora ya Perezida wa Repubulika n'ay'Abadepite natwe muri PL twiteguye neza. Igihe cyose iyo hari amatora, umutwe wa Politiki ikintu cya mbere utekerezaho, ni ukuvuga ngo ese ko ngiye gusaba amajwi Abanyarwanda nzagenda mbagaragariza iki?

Ikintu utegura ni gahunda ya Politiki ikubiyemo ibyo uteganya kuzabagezaho.

Natwe twateguye neza gahunda yacu, imigabo n'imigambi ya PL n'ibyo duteganya kugeza ku Banyarwanda kuva mu 2024-2029 muri iyo manda y'imyaka itanu. Bishingiye ku nkingi y'ubukungu, imibereho myiza y'abaturage ndetse n'imiyoborere myiza.

Umutwe wa Politiki wose uba ufite inshingano yo kugeza Abanyarwanda ku iterambere rirambye kugira ngo bagire imibereho myiza, batekanye, bari mu gihugu cyiza gifite iterambere ryihuse kandi rirambye.

Ibyo byose bishingira ku cyerekezo twihaye twese nk'Abanyarwanda waba uri mu mutwe wa Politiki cyangwa utawurimo, icyerekezo twagizemo uruhare ni icya 2050, ariko hari n'izindi gahunda z'iterambere rirambye tugomba kugeraho nk'igihugu ndetse no ku rwego rw'Isi hari icyerekezo 2063 ibyo byose rero nibyo twashingiyeho.

Ni byo tuzereka abanyarwanda kugira ngo bazaduhundagazeho amajwi badutore tubashe kugira uruhare mu kugira ngo tuzagere ku ntego twihaye nk'abanyarwanda bose.

Twabonye mwarahisemo kuzashyigikira Paul Kagame. PL nk'ishyaka riri mu akomeye mu Rwanda mubona mudakwiriye gutanga umukandadida wanyu, aho gushyigikira uw'irindi shyaka?

Kuba umutwe wa Politiki washyigikira undi mukandida watanzwe n'undi mutwe ntabwo ari mu Rwanda honyine bibaho.

Ishyaka PL twahaye uburenganzira abayoboke bwo kwihitiramo, twarababwiye duti murabona twatanga umukandida, Ese yaba ari inde mu ishyaka PL? Ariko bo bagira amahitamo kandi turayubahiriza. Bahisemo gushyigikira umukandida watanzwe n'Umuryango wa FPR Inkotanyi ari we Paul Kagame.

Mu bafashe ijambo bari bafite byinshi bashingiyeho buri wese wafataga ijambo yagaragazaga impamvu yumva tugomba gushyigikira umukandida wa FPR Inkotanyi natwe akaba uwacu bashingiye ku byiza yagejeje ku gihugu n'icyerekezo cyiza dufite.

Iyo ujya kureba Umukuru w'Igihugu uravuga ngo Abanyarwanda bakeneye iki? Ariko hari n'ubundi busesenguzi ugomba gukora mu rwego rugari. Ese Abanyarwanda bakeneye iki? Igihugu cy'u Rwanda gikeneye iki? Ukareba ibyo byose bikenewe ukibaza uwaba arusha abandi ubushobozi kugira ngo kizabashe kubigeraho. Nyiri amaso yerekwa bike ibindi akirebera, nta muntu utishimira aho tugeze nk'igihugu ukurikije aho twavuye.

Iyo urebye ibibazo by'inzitane twari dufite nyuma y'aho Perezida Paul Kagame ahagarikiye Jenoside akabohora igihugu cyacu cyari cyarokamwe n'ibibi byose bishoboka, urebye muri izo nkingi zose navuze n'icyerekezo dufite ukavuga uti nta mpamvu yo guhindura ikipe itsinda.

Aho yatuvanye niho habi hashoboka hashobora kuba harabayeho, aho tugeze uyu munsi ni heza kandi uretse natwe n'amahanga arabitangarira, yibaza ukuntu urebesheje amaso avuga ko ari igihugu cyari cyarapfuye ariko kikazuka abantu bakongera kwiyubaka, bakagaragaza kwihangana gukomeye no kwirenga byose tubikesha ubuyobozi bwiza.

Ubwo buyobozi bwiza rero twumvaga dukeneye ko akomeza akatuyobora kugira ngo tugere aho twifuza ndetse tunarenge, tugire urufatiro rukomeye cyane n'inkingi zikomeye ariko tunafatanya na we muri byose.

Mu 2010 mwari muhagarariwe mu matora y'Umukuru w'Igihugu, Ese umusaruro udashimishije mwagize ni wo watumye mufata umurongo wo gushyigikira Paul Kagame?

Uko igihugu gihagaze, akarere, n'Isi muri rusange nabyo ugomba kubireba kuko ubu Isi yabaye nk'umudugudu. Ni ukuvuga ngo ugomba kureba inyungu z'igihugu n'inyungu z'Abanyarwanda.

Ibyo byose twarabirebye tubona umukandida ukwiye ari ugushyigikira Paul Kagame ariko bitabujije ko natwe turi gutekereza kuvuga ngo twiteguye dute kugira ngo natwe ubutaha tuzatange umukandida.

Mubona umusimbura wa Perezida Kagame ashobora kuva muri PL?

Ibyo ni ibintu tuzareba kuko ni ibintu tugomba kwitegura bihagije ubwo igihe nikigera muzabimenya.

Mbere ya Jenoside yakorewe Abatutsi, Ishyaka PL ryarakoraga cyane, ariko ubu hari benshi bibaza uyu munsi icyo mukora cyatuma umuntu udafite umutwe wa Politiki yifuza kwinjira muri PL, aba bantu mwabasubiza iki?

Ishyaka PL ryatangiye ku itariki ya 14 Nyakanga 1991, ngira ngo muri uku kwezi kwa Karindwi tuzaba twujuje imyaka 33. Yatangiye mu bihe bitoroshye byari bikomeye bya Politiki ndetse ifite n'imbaraga nyinshi rwose ifite n'intego nziza.

Yaharaniraga ukwishyira ukizana kwa buri muntu kutari guhari mu Banyarwanda, iharanira ubutabera bwari nta nabwo n'amajyambere.

Iyo uri mu gihugu kibuza abantu uburenganzira bwabo, ntibabone ubutabera, ntibabone uko bakora icyo bumva kibanogeye gishobora kubateza imbere.

Mu gihugu hari ihezwa rikomeye, guhonyora uburenganzira bw'Abanyarwanda bamwe ntabwo ushobora kuvuga ngo icyo gihugu cyacitsemo ibice ngo cyatera imbere.

Ku biharanira muri icyo gihe kitari cyoroshye nk'icyo ntabwo byari byoroshye, twarakomeje ariko ubutegetsi bwa Habyarimana bwabonye imbaraga Ishyaka PL ryari rifite buricamo kabiri havuka igice kimwe cya PL Power gishingiye ku moko ariko abandi turakomezanya n'imbaraga twari twatangiranye.

Birumvikana Jenoside yakorewe Abatutsi yahitanye benshi cyane bari mu Ishyaka PL, ariko ababashije kurokoka twongeye kwivomamo izindi mbaraga biri mu buryo bwa Politiki bwashyiraga hamwe Abanyarwanda, bwarwaniraga ko twongera tukunga ubumwe bwari bwarasenyutse.

Urumva ko twari dufite uburyo n'aho dukorera hatuma noneho za mbaraga zacu dukomeza kuzizamura kugira ngo tubashe gufatanya n'abandi Banyarwanda kongera kubaka igihugu cyari cyasenyutse, kongera kugiteza imbere, kubaka Umunyarwanda ariko tugakomeza no mu cyiciro gikurikiyeho cyo guharanira iterambere rirambye tukaba twishimira ko ibyo twagezeho twabigizemo uruhare.

Mu maze imyaka 11 muyoboye Inteko, iyo musubije amaso inyuma ni iki mwishimira Inteko yakoze cyahinduye ubuzima bw'abaturage?

Iyo tuvuga mu Nteko ntabwo umuntu aba yireba wenyine, ngo uvuge nk'umuyobozi cyangwa se urebe nk'Inteko ishinga amategeko kuko umuntu aba afite abo bakorana.

Inteko Ishinga Amategeko ifite inzego zitandukanye hari hari Inteko Rusange nk'urwego rukuru, Inama y'Abaperezida, imirimo ibera muri za komisiyo zitandukanye rero dukora dufatanyije twese.

Ku birebana n'inshingano zayo zo gushyiraho amategeko no kugenzura ibikorwa bya guverinoma ibyo byose turabikorana.

Ibyo twagezeho rero nk'igihugu byose turabyishimira kuko twebwe twakoze inshingano zacu nk'Inteko Ishinga Amategeko ariko dufatanya n'izindi nzego.

Niba tuvuga ngo turashyiraho amategeko burya ashyirwaho mu rwego rwo kugira ngo za Politiki ziba zarashyizweho zibashe gushyirwa mu bikorwa, amategeko ajyaho hari ibibazo agomba gukemura.

Iyo ugenzura ibikorwa bya Guverinoma, ni ukuvuga ngo hari gahunda nk'iy'imyaka irindwi ishize, icyerekezo cya 2050, ibyo byose abagize Inteko baba bagomba guhora bagenzura kugira ngo barebe ko ibyo Abanyarwanda bagomba kugeraho byagezweho bikwiriye kandi hakagira impinduka zigaragara mu mibereho y'umunyarwanda.

Niho ubona duhamagara abo bireba. Niyo ubahamagaye ukabagaragariza ibikwiye gukorwa n'ubundi dufatanyije twese ngo tubikore ntabwo dushobora kugera ku byo twishimira ko uyu munsi twagezeho.

Navuga ko ibyo twagezeho twishimira ko twabigizemo uruhare mu nshingano zacu nk'inteko ishinga Amategeko kandi mu nzego zose. Ntabwo twavuga ngo ni twebwe gusa ahubwo twese twarafatanyije.

Tujya tubona hari amategeko ashyirwaho nyuma y'igihe gito akongera akavugururwa, bigenda bite ngo ntihatorwe amategeko ashobora kuramba?

Turi igihugu kiri gutera imbere, iyo ushyizeho amategeko, twebwe buriya ntabwo tugarukira aho ho kuyashyiraho, nyuma y'igihe runaka dusubira inyuma tukagenda tukareba muri ya nshingano yacu yo kugenzura ibikorwa bya Guverinoma tukareba niba amategeko twashyizeho ari gukemura ibibazo byatumye ashyirwaho.

Tureba uburyo ashyirwa mu bikorwa kandi akenshi ni nyuma y'imyaka nk'itatu. Iyo tugiye kugenzura uburyo ashyirwa mu bikorwa, hari ibyo dusanga wenda bidashyirwa mu bikorwa uko bikwiye cyangwa bidakemura ikibazo cyatumye ayo mategeko ashyirwaho rimwe na rimwe bikaba ngombwa ko avugururwa.

Turi igihugu gishaka kwihuta, buriya igihe cyose n'iyo wubatse inzu hari aho ugera ukavuga ngo hariya hari ikintu kandi barayishushanyije ureba ariko hakaba aho ugera ukagaragaza ko hari ibyo ushobora kunoza kugira ngo irusheho kuba nziza.

Iyo wubaka igihugu rero hari aho ugera ukagenzura ukavuga uti ibyo turimo birakemura ibibazo byatumye ayo mategeko ashyirwaho? Aho niho tuvugurura. Nta kintu kibi kiri mu kuvugurura, ikibi ni uko wareka ikintu ubona kitagenda neza ukacyihorera ngo kubera ko utavugurura.

Aba baraperi bamaze igihe bateguza igaruka rya Tuff Gang nshya, kandi bumvikanisha ko hari ibihangano binyuranye bari gukoraho birimo na Album yabo. Ubuzima bagiye baririmba mu ndirimbo bwatumye umubare munini ubakunda kurushaho.

Kevin Montana yinjiye mu muziki ahereye ku guhuriza hamwe mu ndirimbo aba baraperi, ndetse bayihuriramo n'umunyamakuru Bac-T wabaye umuraperi ukomeye ndetse na Khalfan wamenyekanye mu ndirimbo zinyuranye.

Kevin yabwiye InyaRwanda ko yinjiye mu muziki kubera ko awukunda  cyane kandi yakoranye n'abahanzi banyuranye byatumye yisanga mu muziki.

Ati 'Icya mbere impamvu ninjiye mu muziki, nkunda umuziki muri rusange, icya kabiri, nakuze nkunda umuziki, nkorana n'abahanzi batandukanye mu gihugu cy'u Rwanda, mbashyigikira mu buryo bugiye butandukanye, hanyuma noneho abenshi muri rusange, hanyuma nza kugira igitekerezo cyo kuba nanjye naririmba, nanjye nkagira indirimbo ijya hanze, ni uko byaje.'

Kevin yavuze ko ajya kwinjira mu muziki yaganiriye n'abantu banyuranye barimo Mugisha Benjamin wamamaye nka The Ben. Yabwiye uyu muhanzi ko yibaza ku hazaza he igihe azaba atakiri mu mwuka w'abazima, bituma atekereza ku gihangano yasiga kizajya gituma abantu bamwibuka.

Ati 'Mu by'ukuri The Ben niwe watumye nkora umuziki, kuko yanteye imbaraga. Naramubwiye nti ariko se ubu ndamutse nitabye Imana abantu bazanyibukira kuki? Ko mwebwe mufite ibihangano, njyewe bazanyibukira kuki? Arambwira ati ese ubundi wakoze indirimbo izakomeza kuba ikirango cyawe no mu gihe waba utakiriho.'

Uyu mugabo avuga ko gukorana n'abahanzi banyuranye, abanyamakuru n'abandi bafite uruhare rukomeye mu guteza imbere uruganda rw'umuziki mu Rwanda, byamufashije guhuriza aba baraperi mu ndirimbo imwe bise 'Twendeleye.'

Kevin Montana avuga ko The Ben yamugiriye inama yo gukora Hip Hop bituma atekereza ku nshuti ze Green P, Bull Dogg ndetse na P-Fla bibumbiye muri Tuff Gang.

Ati 'Impamvu nahisemo gukorana na Tuff Gang ni uko ari inshuti zanjye; icya kabiri ni uko The Ben yambwiye ati 'injyana wowe ushobora kuririmbamo ni Hip Hop, rero ambwiye uko ndavuga nti reka mpuze bariya basore cyane ko ari inshuti zanjye, kandi ari abahanga mu kuririmba Hip Hop, kandi bamaze gutera imbere.'

Akomeza ati 'Ben yumvise uburyo ndirimbamo, yumva injyana yanjye ari Hip Hop, niwe wangiriye inama yo kwinjira mu muziki, ni nawe wangiriye inama yo gukorana na bariya basore cyane ko harimo na Murumuna we, akaba ari n'inshuti zanjye, rero urebye twese turi umuryango.'

Yavuze ko yari yatekereje kwifashisha muri iyi ndirimbo Bushali na Riderman ariko ntibyakunda bitewe n'urugendo yari afite mu gihugu cya Kenya muri iki gihe.

Uyu mugabo avuga ko nubwo bariya baraperi batagaragaye muri iyi ndirimbo ye ya mbere, ariko ari gutekereza kuzabifashisha mu zindi ndirimbo ari gutegura.

Avuga ko ashaka gukora indirimbo 10 ubundi agahita ahagarika urugendo rwe rw'umuziki cyangwa se 'nkakomeza nk'uko Dj Khaled abikora aho ahuriza mu ndirimbo zinyuranye abahanzi benshi kandi bigatanga umusaruro'.

Kevin Montana avuga ko impano y'umuziki atayisangije mu muryango we, kuko hari abandi barimo nka Dj Manzi wacuranze mu birori byaherekeje Rwanda Day i Washington muri Leta Zunze Ubumwe za Amerika n'abandi bakora umuziki w'indirimbo zihimbaza Imana.

Uyu mugabo asanzwe akora akazi ko gutembereza ba mukerarugendo amazemo imyaka 20. Niwe wafashije Shawn Mendes gusura ibice nyaburanga by'u Rwanda, ku wa 18 Ukwakira 2023, ubwo yakoreraga urugendo rwe rwa mbere, aho yanahuye na The Ben.

Kevin Montana ni nawe wafashije The Ben n'umugore we Uwicyeza Pamella gukorera urugendo rwihariye muri Pariki y'Akagera.

Kevin Montana yinjiye mu muziki nyuma y'igihe afasha abahanzi banyuranye

Kevin Montana yavuze ko afite gahunda yo gukora indirimbo 10 zizaririmbamo abahanzi banyuranye

The Ben yagiriye inam Kevin Montana yo kwinjira mu muziki akora Hip Hop 

Kevin yashimye bikomeye The Ben wamugiriye inama yo gukorana na Tuff Gang

 

Umuraperi P-Fla yongeye kumvikana mu ndirimbo yahuriyemo na bagenzi be

 

Umuraperi Green P yaririmbye muri iyi ndirimbo ya Kevin Montana

 

Umuraperi Bull Dogg yagize uruhare muri iyi ndirimbo yakozwe mu gihe cy'umunsi umwe 

KANDA HANO UBASHE KUMVA INDIRIMBO 'TWENDELEYE'YA KEVIN MONTANA

“>

Ibi byaganiriweho mu nama yahuje abo bacuruzi n'ubuyobozi bwa CEEAC yabaye kuri uyu wa 14 Gicurasi 2024. Ni inama yari igamije kungurana ibitekerezo biganisha ku isinywa ry'amasezerano ashyiraho isoko rusange ku bihugu bigize uyu muryango bidahahirana uko bikwiye harimo n'u Rwanda.

Kanani Espèrance wohereza hanze ibicuzwa bijyanye n'ibyo kurya avuga ko bimwe mu bihugu bigeze CEEAC nta nyoroshyo bishyiraho ku bacuruzi bo mu bindi bihugu binyamuryango ku buryo hamwe kuhacururiza bidashoboka nyamara umuryango ugamije koroshya ubuhahirane.

Yagize ati 'Ubwa mbere tujya gucuruza muri Gabon baduciye imisoro ya 52% kandi ntago byari gukunda. Byari nko kuvuga ngo nitureke ubucuruzi muri icyo gihugu kuko ibindi bihugu byo mu Burengerazuba bwa Afurika ari byo byazanagamo ibicuruzwa. Nk'abacuruzi kuguca ayo mafaranga ni ikintu gikomeye cyane kuko nta nyungu ya 52% wabona ku gicuruzwa'.

Kanani yavuze ko inzego bireba ziramutse zibashije gushyiraho iri soko rusange ku bihugu binyamuryango byose byaba ari amahirwe akomeye kuko isoko rihari ikibazo kikiri izo mbogamizi zijyanye no gucururiza mu bihugu binyamuryango bya CEEAC.

Ati 'Nk'abohereza ibicuruzwa hanze twabigiramo inyungu nyinshi cyane tugize amahirwe ibihugu byose bikoroshya ubuhahirane. Imbogamizi ntiziri kuri twebwe abacuruzi kuko twe turiteguye kujyayo n'ibicuruzwa byacu barabikunze'.

Komiseri muri CEEAC, François Kanimba akanaba ukuriye delegation yashyizweho ngo isuzume idindira ry'isoko rusange muri uyu muryango, yavuze ko washinzwe ugamije ubutwererane mu bihugu binyamuryango ariko ko nta bintu bifatika wabashije kugeraho.

Ibyo ngo byatumye hafatwa umwanzuro wo kuganiriza buri gihugu muri birindwi bigifte imbogamizi ku isoko rusange rya ECCAS harimo n'u Rwanda ndetse ko n'abacuruzi bari mu bagomba kuganirizwa.

Kanimba avuga ko izo mbogamizi kuri ibyo bihugu nizimara kuganirwaho hazabaho gusinya amasezerano y'isoko rusange ry'uyu muryango.

Akomoza kuri zimwe mu nzitizi zihari yagize ati 'Icya mbere [cyemeranyijweho] ni ukwemera guhahirana ku bicuruzwa bikorerwa muri ibyo bihugu [binyamuryango] nta misoro bitanze. Ariko usanga ibihugu bitabyitabira kimwe kandi byaratowe n'Abakuru b'Ibihugu mu 2004'.

Yakomeje ati 'Ikindi ni ukumvikana ku mategeko duheraho kugira ngo twemeze ko igicuruzwa iki n'iki kiva mu gihugu iki n'iki gishobora kwinjira mu bucuruzi mu bindi bihugu nta misoro cyishyuye. Kuko ntago iryo soko rusange ryaberaho kugira ngo abacuruzi bajye bajya kurangura mu Bushinwa cyangwa mu Buhinde banyuze ibicuruzwa hano hanyuma bajye kubigurisha mu bihugu duturanye babeshya ko byakorewe mu Rwanda'.

Kanimba yavuze ko ayo mategeko baheraho bemeza ko ibicuruzwa byavuye mu gihugu runaka na yo ari mu yo batangiye kuganiraho no kuyasobanurira abacuruzi bo mu Rwanda bahereweho kugira ngo ibyo bihugu bizayahurirereho mbere yo gusinya ayo masezerano y'isoko rusange.

Umuryango wa CEEAC washinzwe mu 1983 u Rwanda ruwinjiramo mu 2016. Ugizwe n'ibihugu 11 ari byo u Rwanda, Angola, u Burundi, Cameroun, Santarafurika, Tchad, Congo Brazzaville, RDC, Guinee Equatorial, Gabon na Sao Tome & Principe.

Mu mwaka wa 2023 wabarirwaga abaturage miliyoni 210; abo bakaba babasha kungukira mu koroherwa n'ubuhahirane mu gihe iryo soko rusange ryaba rigezweho.

Mu guteza imbere ubukungu bushingiye ku bumenyi kandi u Rwanda rushaka kubushingira ku ikoranabuhanga ku buryo abaturarwanda mu nzego zinyuranye bazajya babona amakuru bakeneye mu buryo bw'ikoranabuhanga rigezweho.

N'ubwo imyaka igihari ari myinshi, ariko inzira zigana kuri izi ntego ziracyarimo inzitizi zigomba gukurwaho.

Umuyobozi w'Urugaga Nyarwanda rw'Abikorera, mu Rwego rw'Ikoranabuhanga [ICT Chamber], Alex Ntale, yagaragaje imbogamizi zigihari zituma ishoramari mu ikoranabuhanga rigenda biguru ntege, anagaragaza icyakorwa.

Ibi yabigarutseho ku wa Kabiri tariki ya 14 Gicurasi 2024, mu nama nyungurabaitekerezo yari igamije gusuzuma politiki n'imirongo ngenderwaho byafasha kuzamura no kureshya ishoramari mu ikoranabuhanga mu Rwanda cyane iry'abikorera. Yahurije hamwe abo nzego z'abikorera, iza leta, abashoramari, abo mu burezi n'abandi.

Ntale yagize ati 'Bimwe mu bikunze kugaragara ni ikibazo cy'imyumvire mu baturage ikiri hasi hakaba hakenewe ingamba nyinshi zo kubazamurira ubumenyi.'

Yavuze ko ikindi kibazo kibangamye ari igiciro kigihanitse cya internet ku bigo, bikagonga abashaka gushora imari mu Rwanda kuko usanga cyikubye inshuro 10 ugereranyije n'ahandi.

Ntale, yavuze ko kubona inguzanyo ku bari mu rwego rw'imari bikiri ingorabahizi, no kuba basabwa umusoro wa PAYE ngo kandi utuma igishoro cyabo kigomba kuba kiri hejuru cyane.

Icyakora yasabye ko abikorera mu zindi nzego zitari iz'ikoranabuhanga ariko barikoresha mu bikorwa byabo nabo bakwiye gutanga umusanzu mu iterambere ry'uru rwego.

Umuyobozi ushinzwe iterambere ry'isoko ry'ikoranabuhanga mu Muryango w'ubufatanye mu by'ikoranabuhanga [Digital Cooperation Organization, DCO], Manel Bondi, muri iyi nama yagaragaje ko bimwe mu bigomba kwitabwaho ku ruhande rwa Guverinoma y'u Rwanda, ari ukongera ibikorwaremezo by'ikoranabuhanga n'uruhare rw'imiyoborere y'inzego mu gushyiraho uburyo buboneye bworohereza abashoramari kubenguka u Rwanda mu rwego rw'ikoranabuhanga.

Ati 'Nyuma y'iyi nama hazagaragazwa n'amahirwe ahari mu ishoramari mu Rwanda, ndetse habeho no guhamagarira abanyamuryango bacu mu nzego z'abikorera n'iza leta kugana mu Rwanda kuko hari amahirwe menshi yabashyiriweho.'

Inyigo yakozwe na DCO, igaragaza ko mu bashoramari 104 bashoye imari yabo mu Rwanda mu rwego rw'ikoranabuhanga, igice cy'abantu 83% muri bo bagaragaje ko bakuruwe n'isoko riri kwaguka vuba, ikindi cy'abangana na 38% bagaragaza ko gutera imbere k'ubushobozi buri mu gihugu byatumye bahashora imari.

Ibi bigaragaza ubushake bwa Guverinoma y'u Rwanda mu kuzamura ubukungu, cyane cyane ubushingiye ku rwego rw'ikoranabuhanga binyuze mu gukurura abashoramari.

Umuyobozi Mukuru ushinzwe ishami ryo guhanga udushya n'ikoranabuhanga muri MINICT, Esther Kunda, yavuze ko icyo bifuza ari ukongera uruhare rw'ikoranabuhanga mu musaruro mbumbe w'igihugu.

Ati 'Turi kureba uko twashyiraho ingamba zifasha abagitangira imishinga yabo muri uru rwego, ariko hakanashyirwaho uburyo abafite amafaranga yabo bisanga bikanaborohera gushora mu Rwanda.'

Yakomeje avuga ko u Rwanda rufite ubushobozi bwo guhaza abo bashoramari kuko hari abavamo abakozi bari ku rwego rushyitse.

Ati 'Aho tugeze harashimishije, iyo murebye ibigo byagiye bishyirwaho nka Rwanda Coding Academy, AIMS, Ibi bigo by'Icyitegererezo mu Burezi Nyafurika muri Kaminuza y'u Rwanda n'izindi mpuzamahanga aho hose ni ahantu twizeye hava urubyiruko rufite imbaraga kandi bazi neza iby'ikoranabuhanga.'

Kunda yavuze ko hakwiye gukomeza gushyirwamo imbaraga mu guteza imbere urwego rw'ikoranabuhanga mu rwego rwo gushimangira u Rwanda nk'igicumbi cyaryo mu karere no ku Isi yose.

Umuyobozi Mukuru ushinzwe ishami ryo guhanga udushya n’ikoranabuhanga muri MINICT, Esther Kunda, yavuze ko icyo bifuza ari ukongera uruhare rw'ikoranabuhanga mu musaruro mbumbe w'igihugu

Umuyobozi mu Muryango w'ubufatanye mu by'ikoranabuhanga [Digital Cooperation Organization, DCO], Manel Bondi [iburyo], yavuze ko hazakurikira guhamagarira abanyamuryango gushora imari zabo mu Rwanda

Habaye inama nyungurabaitekerezo yari igamije gusuzuma politiki n'imirongo ngenderwaho byafasha kuzamura no kureshya ishoramari mu ikoranabuhanga mu Rwanda cyane iry'abikorera

Iyi nama yaranzwe n’ibiganiro binyuranye byareberaga hamwe inzitizi zikiri mu gushora imari mu Rwanda mu ikoranabuhanga n’uko zakurwaho