Category: Uncategorized

 

 

Mu gitondo cyo kuri uyu wa Mbere, tariki 20 Gicurasi 2024, nibwo hacicikanaga inkuru ivuga ko Perezida wa Iran Bwana Sayyid Ebrahim Raisolsadati, wakundaga ko bamwita Ebrahim Raisi gusa, iyi nkuru yabanjije gutangazwa n'ibitangazamakuru bya Leta ya Irani byemeje ko Perezida Rais n'abo bari kumwe muri Kajugujugu nta n'umwe warokotse. Aya makuru akaza avuguruza ayo Leta yari yatangaje mbere ko hakomeretse bake abandi bakaba ari bazima.

Mu makuru aheruka twari twababwiye inkuru ivugwa ko Nyakubahwa Raisi yakoze impanuka y'indege ariko Leta ya Iran ikaba yo itarashakaga kuvuga ukuri kuko Perezida wabo yari mu kangaratete byaje no kumukurizaho kwitaba Imana. Iyo mpanuka ya Kajugujugu yabereye mu mujyi wa Jolfa uherereye mu burasirazuba bw'igihugu hafi ya Azerbaijan, mu birometero 600 uvuye muri murwa mukuru Tehran.

Uyu mukambwe w'imyaka 63, agiye usize abana babiri gusa, akora impanuka yari kumwe na Ministiri w'ububanyi n'amahanga, Hossein Amirabdollahian.

Umuyobozi w'ikirenga wa Iran Ali Khamenei yasabye abaturage ba Irani gutuza ahubwo bakajya ku mavi bagasengera Perezida wabo agataha mu mahoro kuko hari bamwe batangiye kwijugunya mu mihanda mu myigaragambyo bitewe n'imyumvire yabo yo guhamya ko atari impanuka yabaye ahubwo ari urupfu rwateguwe.

Minisitiri w'Intebe w'Ubuhinde, Nerandra Modi yanditse kuri X (yahoze iri Twitter) ko yashenguwe bikomeye n'urupfu rwa Perezida Rais.

Mu gitondo cya kare cyo ku cyumweru, Perezida Raisi yari yagiye muri Azerbaijan mu muhango wo gutaha urugomero yari yatumiwemo na mugenzi we Perezida Ilham Aliyev ari nawe ushyirwa mu majwi ya benshi kuba yihishe inyuma y'ubugambanyi bavuga ko bwakorewe Perezida wabo akanakurizamo urupfu.

Uru rugomero rubaye urwa gatatu rwubatswe ku bufatanye bw'ibihugu byombi, ruherereye kandi ku mugezi wa Aras .

Uru ruzinduko rwabaye mu gihe umubano w'ibihugu byombi utifashe neza nyuma y'igitero cyagabwe kuri ambasade ya Azerbaijan i Tahran muri 2023.

Ebrahim Raisi w'imyaka 63 ni Perezida wa munani mu mateka ya Iran, umwanya yagiyeho mu 2021. Mbere yaho yari Perezida w'Urukiko rw'Ikirenga.

Source : https://kasukumedia.com/ni-iki-cyaba-cyateye-urupfu-rwa-perezida-wa-iran/

Ni impanuka yabaye ku Cyumweru ibera mu mujyi wa Jolfa uherereye mu Burasirazuba bw'igihugu hafi ya Azerbaijan, mu birometero 600 uvuye muri murwa mukuru, Tehran.

Iyi ndege yari iherekejwe n’izindi kajugujygu 2 yari mu rugendo rwerekeza i Azerbaijan aho yari agiye mu muhango wo gutaha urugomero yari yatumiwemo na mugenzi we Perezida Ilham Aliyev. Uru rugomero ruri ku mugezi wa Aras ni urwa gatatu rwubatswe ku bufatanye bw'ibihugu byombi.

Nyuma yo gukora impanuka, hahise hatangira igikorwa cyo kuyishaka none mu rukerera rwo kuri uyu wa Mbere yaje kuboneka abantu bari bayirimo bose barangajwe imbere n’uwari Perezida wa Iran, Ebrahim Raisi, basanga  bitabye Imana.

Mu bandi bayobozi ba Iran bahitanwe n’iyi mpanuka harimo nka Minisitiri w'Ububanyi n'Amahanga, Hossein Amirabdollahian, ndetse n'umuyobozi w'Umusigiti wa Tabriz, Seyyed Mohammad-Ali Al-Hashem.

Ebrahim Raisi yitabye Imana ku myaka 63  akaba yari yarabaye Perezida wa Irana muri 2021 mu gihe mbere yaho yari Perezida w'Urukiko rw'Ikirenga. 

Kajugujugu yari itwaye abarimo Perezida wa Iran yabonetse yacitsemo ibice

Perezida wa Iran, Ebrahim Raisi yitabye Imana ku myaka 63

Source : https://inyarwanda.com/inkuru/143111/perezida-wa-iran-yitabye-imana-azize-impanuka-yindege-143111.html

Impera z’icyumweru gishize, zasize Gor Mahia ya Emery Bayisenge na Sibomana Patrick Papy muri Kenya yegukanye igikombe cya shampiyona.

Muri iyi nkuru tugiye kurebera hamwe uko abakinnyi b’abanyarwanda bitwaye mu mpera z’icyumweru gishize.

Bizimana Djihad – Kryvbas FC

Bizimana Djihad na Kryvbas ku wa Gatandatu w’icyumweru gishize tariki ya 18 Gicurasi 2024, batsinzwe na Dynamo Kiev 3-1. Shampiyona ya Ukraine isigaje imikino 1, ikipe ya Djihad ni iya 3 n’amanota 54, Shakhtar Donetsk yamaze kwegukana igikombe ifite 71. Kryvbas ya Djihad ikaba yaramaze kubona itike yo kuzakina ijonjora rya Europa Conference 3.

Gitego Arthur – AFC Leopards

Gitego Arthur ejo yabanje mu kibuga mu mukino wa shampiyona ikipe ye ya AFC Leopards yatsinzwemo na Bidco United 1-0. Iyi kipe iri ku mwanya wa 6 n’amanota 47, Gor Mahia ya mbere ifite 67.

Sibomana Patrick Papy & Emery Bayisenge – Gor Mahia

Gor Mahia ya Emery Bayisenge na Sibomana Patrick Papy, nyuma y’uko ejo hashize ku Cyumweru tariki ya 19 Gicurasi 2024 batsinze Mohoroni 3-0 bahise begukana shampiyona y’icyiciro cya mbere muri Kenya. Papy ntibari muri 18, Emery Bayisenge ni we wari uriho.

Mugisha Bonheur Casemiro – AS Marsa

Ku wa Gatanu w’icyumweru gishize, muri Tunisia ikipe ya AS Marsa ya Mugisha Bonheur Casemiro yatsinze OC Kerkennah 2-0 muri 1/8 cy’igikombe cy’igihugu.

Rwatubyaye Abdul – FC Shkupi

Rwatubyaye Abdul yabanje mu kibuga mu mukino w’umunsi wa nyuma wa shampiyona y’icyiciro cya mbere muri Macedonia aho ku wa Gatandatu basoje batsinda Struga 2-1. Byashimangiye ko basoreje ku mwanya wa 3 n’amanota 62, Struga yegukanye igikombe n’amanota 64. Ikipe ya Rwatubyaye nta rushanwa ry’i Burayi izakina

Yannick Mukunzi & Byiringiro Lague- Sandvikens IF

Sandvikens IF ya Yannick Mukunzi na Byiringiro Lague ku Cyumweru yatsinze Varberg 3-1 mu mukino w’umunsi wa 8 wa shampiyona y’icyiciro cya kabiri muri Sweden. Yannick yinjiye mu kibuga ku munota wa 77, Lague ntiyakandagira mu kibuga. Ubu iyi kipe ni iya 9 n’amanota 11, Landskrona ya mbere ifite 18.

Rafael York – Gefle IF

Rafael York yakinnye iminota yose ku wa Gatanu w’icyumweru gishize ubwo ikipe ye ya Gefle IF yatsindaga GIF Sundsvall 1-0 mu mukino w’umunsi wa 8 wa shampiyona y’icyiciro cya kabiri muri Sweden. Ubu iyi kipe iri ku mwanya wa 11 n’amanota 10, Landskrona ya mbere ifite 18.

Mutsinzi Ange Jimmy – FK Jerv

Mutsinzi Ange Jimmy, myugariro mpuzamahanga w’umunyarwanda ku wa Kane w’icyumweru gishize, yabanje mu kibuga akina iminota yose mu mukino wa shampiyona banganyijemo na Arendal 3-3. FK Jerv ubu ni iya 3 n’amanota 12, Vikings ya mbere ifite 15.

Ntwari Fiacre – TS Galaxy

Ku w Gatandatu tariki ya 18 Gicurasi 2024, Ntwari Fiacre yari mu izamu rya TS Galaxy mu mukino w’umunsi wa 29 wa shampiyona y’icyiciro cya mbere muri Afurika y’Epfo aho batsinze Orlando Pirates 1-0. Iyi kipe iri ku mwanya wa 4 n’amanota 43, Mamelodi Sundowns ya mbere yanamaze gutwara igikombe ifite 72.

Nhuti Innocent – One Knoxville

Nshuti Innocent ku wa Gatandatu w’icyumweru gishize yinjiye mu kibuga ku munota wa 65, ni mu mukino wa shampiyona y’icyiciro cya 3 muri USA ikipe ye ya One Knoxville yatsinzemo Central Valley Fuego 2-0. Ubu iyi kipe ni iya 3 n’amanota 13, Greenville Triumph ya mbere ifite 16.

Hakim Sahabo – Standard de Liège

Hakim Sahabo yinjiye mu kibuga ku munota wa 81 ku wa Gatandatu w’icyumweru gishize mu mukino w’amakipe arimo ashaka itike ya Conference League mu Bubiligi aho banyagiwe na Gent 4-1.

Maxime Wenssens – Union Saint-Gilloise

Umunyezamu w’umunyarwanda ukinira Union Saint-Gilloise mu cyiciro cya mbere mu Bubiligi, Maxime Wenssens ntabwo yari muri 18 iyi kipe yaraye yifashishije ku mukino wa Cercle Brugge batsinze 2-1. Iyi kipe ni iya 2 n’amanota 46, Club Brugge ya mbere ifite 49.

Gor Mahia yegukanye shampiyona ya Kenya

Rwatubyaye Abdul na FC Shkupi basoje ku mwanya wa 3 muri Macedonia

Source : http://isimbi.rw/siporo/article/emery-na-papy-begukanye-igikombe-cya-shampiyona-rwatubyaye-asoza-shampiyona-nabi-benshi-babonye-intsinzi-uko-abanyarwanda-bakina-hanze-bitwaye

Ni ubutumwa bahawe ku wa 18 Gicurasi 2024, ubwo hasozwaga igiterane cy'abubatse ingo bo muri Paruwasi icyenda zigize ubucidikoni bwa EAR Shyogwe.

Iki giterane cyitabiriwe n'abagabo n'abagore, abapasiteri n'abandi bakozi mu nzego zitandukanye za EAR. Cyatekerejweho mu kugaragaza uruhare rw'umugabo n'umugore mu iterambere ry'umuryango n'itorero.

Uhagariye abateguye iki giterane, Acidikoni Joseph Sehorana, Umwanditsi akaba n'Umwarimu wungirije muri Kaminuza y'Abaprotesitanti mu Rwanda iri i Huye (PIASS) yashimiye abacyitabiriye bose, yibanda ku itsinda cyane cyane ku itsinda rya EAR Paruwasi Remera muri Diyosezi ya Kigali, ryatumiwe ndetse rigafasha mu gutanga ibiganiro.

Abubatse ingo bitabiriye iki giterane basangijwe amahame yabafasha mu ngo zabo mu gihe bayubahirije.

Umuyobozi wa Fathers' Union muri Diyosezi ya Kigali na Remera akaba Impuguke mu byo kubaka ingo zishingiye kuri Kristo n'iby'Iterambere, Kazubwenge James yakanguriye abagabo n'abagore kwimika Kristo no kubitoza abo mu ngo zabo kugira ngo abashoboze muri byose.

Ati “Imana yanga urunuka gucana inyuma kw'abashakanye, gatanya, ubusinzi, amakimbirane kuko bigira ingaruka mbi mu miryango harimo gukuraho ubusabane bw'abubatse ingo ndetse no hagati yabo n'Imana'.

Yabasabye gusoma Ijambo ry'Imana no kurigenderamo, gukoreshereza impano ubutunzi bwabo, kwirinda inshuti mbi no gusesagura umutungo w'urugo, kurangwa n'urukundo, kugendera mu mucyo, kubwizanya ukuri muri byose no gukura amaboko mu mifuka bagakora cyane bagatera imbere kugira ngo bizabe umurage mwiza bazasigira abazabakomoka no kuzasiga inkuru nziza i musozi.

Mbabazi Sylvie uyobora Mothers Union muri EAR Paruwasi Remera yavuze ko umuryango uri mu mugambi w'Imana nk'uko bigaragara mu Itangiriro 1:26-28.

Yabibukije ko umuryango ari wo shingiro n'imbaraga zubaka igihugu n'itorero bityo bakwiye kubiha agaciro gakomeye, bakabana bubahana, basengana, bakundana, bihanganirana, bahugurana, bajya inama, buzuzanya, bakiranuka kandi buri wese agaragaza uruhare rwe rufatika mu iterambere rusange.

Rev. Mukamwiza Charlotte yavuze ko urugo rwa Gikristo rukwiye kuguma mu masezerano, abashakanye bakabana akaramata, bakazatandukanywa n'urupfu cyangwa Yezu agarutse.

Abitabiriye igiterane babonye umwanya wo gusengera imiryango yavuye mu nshingano ngo igaruke ku rufatiro itekane kandi igere ku iterambere.

Nk'umwe mu bagore b'abapasiteri, Akimpaye Emilienne umaze imyaka 29 yubatse urugo, yashimiye abatanze ibiganiro, ubuhamya n'inama bahawe ko zubahirijwe zatuma ingo zabo zibabera Paradizo nshya.

Yagaragaje ko batewe ishyaka ryo gukora umurimo w'Imana n'aho bigaragara ko bidashoboka kandi ko ibyo bungutse bazabigeza no kuri bagenzi babo.

Ntambara Céléstin wo ku Ntenyo yashimye amasomo yatanzwe, avuga ko adakwiye kuba amasigaracyicaro.

Uyu mubyeyi w'imyaka 65 yizera ko amasomo bahawe azabafasha gutsindagiza ingo zabo mu rugendo rw'iterambere.

Iki giterane kizajya kiba buri mwaka, hagamijwe gukumira ibyaha mu miryango, gusoma Ijambo ry'Imana, gusengera hamwe buri munsi, kongera umwanya wo kuganira kw'abashakanye no gufatira imyanzuro hamwe, kutemera gutsindwa na rimwe na Satani ngo yinjire mu miryango, kwirinda ubunebwe bagakorera imiryango yabo n'itorero.

Abagabo n'abagore bo mu Itorero ry'Abangilikani mu Rwanda, EAR, basangijwe ibanga ry’iterambere ryabafasha kubaka umuryango Nyarwanda n'itorero

Acidikoni Joseph Sehorana uhagarariye abateguye iki giterane, yavuze ko intego nkuru yacyo ari ukwiga ku ruhare rw'umugabo n'umugore mu iterambere ry'umuryango n'itorero

James Kazubwenge yasabye abagabo n'abagore kubaka ingo zitarangwamo umwiryane

Sylvie Mbabazi yavuze ko umuryango ari wo shingiro ry'imbaraga zubaka igihugu n'itorero

Rev. Charlotte Mukamwiza yavuze ko abashakanye bakwiye kuguma mu isezerano ryo kubana mu mahoro n’ubwuzuzanye

Emilienne Akimpaye yavuze ko inyigisho bahawe zigiye gutuma imiryango yabo iba nka paradizo nshya

Emilienne Akimpaye yavuze ko inyigisho bahawe zigiye gutuma imiryango yabo iba nka paradizo nshya

Ntambara Céléstin yashimye amasomo yahawe abubatse, avuga ko adakwiye kuba amasigaracyicaro, ahubwo ari ingenzi kuyabyaza umusaruro

Umuyobozi wa Fathers Union muri EAR Diyosezi Shyogwe, Corneille Kanyamanza n’abo bafatanyije biyemeje gukurikirana ishyirwa mu bikorwa ry’ingamba zafashwe mu kwita ku muryango

Abitabiriye igiterane biyemeje kuba umusemburo w'impinduka nziza mu miryango baturukamo

---

Source : http://igihe.com/amakuru/u-rwanda/article/muhanga-abashakanye-bibiwe-ibanga-ryo-kubakiraho-urugo-ruhamye

I Kinshasa muri Kongo, kuri iki cyumweru, tariki 19 Gicurasi 2024, hiriwe inkuru ngo y'umugambi wo guhirika ubutegetsi 'waburijwemo'.

Urusaku rw'imbunda ziremereye rwumvikanye mu gace ka Gombe, gatuwemo n'abategetsi bakomeye barimo na Perezida Tshisekedi, ndetse itangazamakuru rya leta ryemeza ko abo bantu bitwaje intwaro bibasiye urugo rwa Vital Kamerhe, inkoramutima ya Tshisekedi, unitegura kuba perezida w'inteko ishinga amategeko.

Nubwo igisirikari cya Kongo cyavuze ko 'cyaburijemo' umugambi wa kudeta( coup d'état), kikagaragaza ngo abafatiwe muri uwo mugambi ndetse n'umurambo ngo w'umwe muri bari bayoboye igitero, hari abasesenguzi batangiye gusobanukirwa ko iri ari ikinamico, rigamije kurangaza abaturage bahangayikishijwe n'ibibera mu burasirazuba bw'igihugu, kwikiza abo adashaka, no kwibasira uRwanda yamenyereye kwikoreza imizigo ye.

Mu ruturuturu inkuru ya kudeta igitamngira guhwihwiswa, Umufaransa Jean-Luc Melenchon wigize umuvugizi wa Tshisekedi kubera bya ruswa amutamika, yihutiye kwandika ku rubuga rwe rwa X, ko uyu ari 'umugambi ushyigikiwe n'abanyamahanga barimo u Rwanda'.

Icyakora nta gishya kuri Melenchon, kuko uyu musaza ufite uburwayi bwo mu mutwe, asanzwe yarasaze avuga uRwanda.

Uretse kuvuga ko hari abafatanywe ibyangombwa bya Canada n'Amerika, ndetse ngo igitero kikaba cyari kiyobowe n'Umukongomani Christian Malanga, wahise anicwa ngo atazanahishura iby'iryo kinamico,, nta rindi perereza riraba ngo ryerekane uwaba yari inyuma y'icyo gikorwa. Bwana Melenchon usanzwe ari umuzindaro wa Tshisekedi rero, yashyanutse, yihutira kuvuga ibyo shebuja atekereza, ariko agitegura uko azabirimanganyamo.

Abantu bizwi ko basanzwe bakorera icengezamatwara Perezida Tshisekedi, bihutiye gukwiza ku mbuga nkoranyambaga ko abagabye igitero baturutse hakurya i Brazzaville muri Repubulika ya Kongo, doreko uwo mujyi utandukanyijwe na Kinshaza n'uruzi gusa rwa' Fleuve Congo '. Abo bahezanguni barahuza icyo gitero n'ubucuti busanzwe hagati ya Congo-Brazzaville n'u Rwanda.

Mu gusegura ibinyoma byabo ariko birimo ubuswa bukabije, banakwirakwije ifoto mpimbano ngo 'abajenerali' bo muri Congo-Brazzaville baherutse kwifotozanya na Christian Malanga. Uretse ko batanavuze umwirondoro wabo, wanakwibaza niba abo 'bajenerali'ari abaswa bo kwifotozanya n'umuntu bashaka gufasha mu mugambi wo guhirika ubutegetsi bw'abaturanyi.

Agace karimo 'Palais de la Nation'( ingoro y'Umukuru w'Igihugu) kararinzwe bikomeye, ku buryo bigoye kumvikana ukuntu agatsiko k'abarakare bake kinjiranamo ibitwaro bya rutura, ndetse kakanamaramo umwanya munini, ungana nk'uwo amasasu yamaze yumvikana muri ako gace.

Wasobanura ute ko ako gatsiko kahengereye Perezida Tshisekedi ataharaye, bakabona kugaba igitero kuri 'Palais de la Nation'?Bisobanuye gusa ko barashe ku rugo bazi neza ko nta muntu bari buhungabanye.

Vital Kamerhe byavugwaga ko yahungabanye kubera igitero cyagabwe ku rugo rwe, ntibyamubujije kwigira, we n'umugore we, mu gitaramo cy'umuhanzi Moïse Mbiye, bigaragaza ko atuje, kuko nawe abizi ko nta muntu wigeze agambirira kumugirira nabi.

Ibi ni bimwe mu bimenyetso bigaragaza ko iri ryari ikinamico rya Perezida Tshisekedi n'abambari be, kandi ndahamya ko n'ibindi byerekana ko aka ari agakino, bizigaragaza uko iminsi izagenda yicuma.

Ibisa rero koko birasabirana. Tshisekedi na Evariste Ndayishimiye w'uBurundi ntibasangiye gusahura ibihugu byombi no kumena amaraso y'inzirakarengane gusa, ahubwo banahuriye ku makinamico y'ubuswa.

Muribuka ko mu byumweru 2 bishize inzego z'iperereza mu Burundi zateye ibisasu mu duce tunyuranye twa Bujumbura, ndetse bigahitana abantu abandi bagakomereka.
Abatari bake barafashwe bitwa ko bateye ibyo bisasu babitumwe n'uRwanda, kandi mu by'ukuri yari amayeri yo guhohotera abo bita'ibyitso', no kurangaza abaturage bugarijwe n'ubukene butigeze bubaho mu Burundi.

Ibi byose yaba Tshisekedi, yaba na Ndayishimiye, babikopeye kuri mukuru wabo Yuvenali Habyarimana. Kwiyegereza abajenosideri ba FDLR byabigishije amakinamico nk'iryo mu ijoro ryo kuwa 04 Ukwakira 1990, ubwo abasirikari ba Habyarimana bararaga barasa mu mujyi wa Kigali, babeshya ngo Inkotanyi zawuteye. Hakurikiyeho gufata Abatutsi n'abatarishimiraga imitegekere ya MRND, maze abo biswe'ibyitso by'Inkotanyi' bakorerwa iyicarubozo rya kinyamaswa. Ariko se byabujije Habyarimana n'Interahamwe ze gukubitwa iz'akabwana? Tshisekedi na Ndayishimiye namwe ni ikibazo cy'igihe gusa.

The post Ese icyiswe umugambi wo guhirika ubutegetsi bwa Tshisekedi, si ikinamico nka bya bitero byo mu Burundi? appeared first on RUSHYASHYA.

Source : https://rushyashya.net/ese-icyiswe-umugambi-wo-guhirika-ubutegetsi-bwa-tshisekedi-si-ikinamico-nka-bya-bitero-byo-mu-burundi/?utm_source=rss&utm_medium=rss&utm_campaign=ese-icyiswe-umugambi-wo-guhirika-ubutegetsi-bwa-tshisekedi-si-ikinamico-nka-bya-bitero-byo-mu-burundi

Ikigo kizobereye mu gufasha abashaka kwiga muri Kaminuza zo mu mahanga, Global Linked Education Service (GLES), cyatangaje ko gikataje mu gufasha abana b'u Rwanda kujya guhaha ubwenge hanze mu bihugu bitandukanye, bakagar

uka guteza imbere igihugu cyabo, aho ubu kimaze gufasha Abanyarwanda benshi cyane kandi muri serivise zitandukanye zikenerwa ku munyeshuri wese ukeneye kujya kwiga hanze y'igihugu.

Global Linked Education Service yabitangaje muri uku kwezi tariki 19 muri uyu mwaka wa 2024, ubwo yari mu gikorwa cyo gusobanurira abashaka kwiga muri kaminuza zo muri Amerika, China, Turkie, France, England, Pologne,

n'ahandi mu mashami n'ibyicaro bitandukanye.

Icyi kigo Global Linked Education Service (GLES) giherereye hano mu Mujyi wa Kigali, Nyamirambo, Maison Tresor, Floor 2-Room 2, gikomeza gitangaza ko usibye kuba bagufasha kujya kwiga mu mahanga banagufasha mu bijyanye no gushaka VISA n'ibindi byangombwa byose bikenerwa. Niba ukeneye kandi kugura ticket y'indege aho waba ugana hose wabasanga aho bakorera bakagufasha kuri aderesi twabahaye haruguru.

Gerageza amahirwe ubundi nawe winjire mu muryango mugari wifuriza Igihugu cyacu ibyiza mu bijyanye n'iterambere.

Source : https://kasukumedia.com/amahirwe-yo-kwiga-mu-mahanga-china-usa-turky-england-poland-france/

Nkuko mubizi bibiliya itubwira ko tugeze mu minsi ya nyuma ni nayo mpamvu tugomba gukora cyane ngo tugandukire uwiteka. Matayo 24:5-8 haduha ibimenyetso by'ingenzi byadufasha kumenya ko imperuka yegereje: 'kuko benshi bazaza biyita izina ryanjye bati 'Ni jye Kristo', bazayobya benshi. Muzumva iby'intambara n'impuha z'intambara, mwirinde mudahagarika imitima kuko bitazabura kubaho, ariko imperuka izaba itaraza. Ishyanga rizatera irindi shyanga, n'ubwami buzatera ubundi bwami, hazabaho inzara n'ibishyitsi hamwe na hamwe. Ariko ibyo byose bizaba ari itangiriro ryo kuramukwa'. Kwiyongera kw'abaziyita ba Mesiya, intambara zikajije umurego, inzara n'amapfa, ibizazane ' ibyo byose ni ibiteguza imperuka. Muri iki cyanditswe ariko dusabwa kwitonda: ntitugomba kwitiranya ibi bintu, kuko ari nk'ibise: imperuka izaba itaragera.

Kubwibyo rero ahitwa muri ARIZONA muri Leta Zunze Ubumwe z'America abanyarwanda bahatuye ndetse n'inshuti zabo bateguye igiterane cy'ububyutse kizafasha abahatuye kongera kwiyegereza Uwiteka.

Iki gitaramo cyateguwe na Pastor Danny NKOTANYI na bagenzi be.
Ku makuru yandi biravugwa ko n'umuhanzi MEDDY ashobora kuzacyitabira akazaba ari naho ariririmba bwa mbere nk'umuhanzi wa Gospel nyuma yo kwiyemeza kureka kuririmba indirimbo z'isi akagandukira Imana arinabwo yafataga umwanzuro wo kuririmba indirimbo zihimbaza Imana abenshi bakunze kwita Gospel Songs mu ndimi z'amahanga.

Mwese mwese muratumiwe.

Kwiyandikisha ca kuri uyu muyoboro (link): https://gsf.church/Arizona_one_worship_concert_on_15

Source : https://kasukumedia.com/igiterane-muri-arizona-hateguwe-igiterane-cyivugabutumwa-cyakataraboneka/

Bishoboka ko byaterwa n'umuco ndetse n'uburere butandukanye hari ibintu bifatwa nk'ibyoroheje nyamara biri mu bigize ibyaha kandi bigahanwa n'amategeko y'igihihugu runaka cyangwa akarere runaka, ariko twe reka twivugire ku birebana n'u Rwanda.

1. Gusindira mu ruhame ni icyaha gihanwa n'amategeko:

Abantu benshi banywa inzoga usanga bayisoma bagahembuka, bakizihirwa ariko hari n'abanywa bagasinda no kwitahana iwabo mu rugo ugasanga bidashoboka kubera ubusinzi. Ntawatinya no kuvuga ko hari n'abasinda bakibagirwa naho bataha ugasanga inzoga zabagaraguye nyamara ntibamenye ko ibyo byose bihanwa n'amategeko y'u Rwanda.

Ingingo ya 268 mu itegeko riteganya ibyaha n'ibihano muri rusange, ivuga ko umuntu wese usinda ku mugaragaro, mu muhanda, mu kibuga, mu nzira, mu kabari, mu nzu y'imikino cyangwa ahandi hose hateranira abantu, aba akoze icyaha.

Iyo abihamijwe n'urukiko, ahanishwa igifungo kitari munsi y'iminsi umunani (8 days) ariko kitarenze amezi abiri (2 months) n'ihazabu y'amafaranga y'u Rwanda atari munsi y'ibihumbi makumyabiri (20,000 Rwf) ariko atarenze ibihumbi ijana (100,000 Rwf) cyangwa kimwe gusa muri ibyo bihano.

2. Kugaragaza imyanya y'ibanga, kwambara ubusa muri za Videwo z'indirimbo, Gukorera imibonano mpuzabitsina ahantu hatemewe:

Ibi byaha mu mategeko mpanabyaha bavuga ko uwabikoze aba yakoze ibiterasoni mu ruhame arahanwa. Mwigeze kumva mu minsi yashize umukobwa wigeze kugaragara yambaye ubusa mu kirori agafungwa kandi akamaramo igihe acumbikiwe n'inzego zibifitiye ububasha, abenshi nibwo bari bumfise ibyo bintu bibaye; gusa usibye kuba bitakabaye muri sosiyete nyaRwanda n'umuco wacu ntidukwiye kwigana ibyo tubonana abantu bo mu mahanga! Usibye ibyo, iki n'icyaha gihanirwa mu Rwanda.

Iyo umuntu yakoze ibiteye isoni mu ruhame ahanwa n'ingingo ya 135 y'Itegeko riteganya ibyaha n'ibihano, havuga hati 'Iyo icyaha cy'urukozasoni cyakorewe mu ruhame, uwakoze icyaha ahanishwa igifungo kitari munsi y'imyaka ibiri (2), ariko kitarenze imyaka 3 n'ihazabu y'Amafaranga y'u Rwanda atari munsi y'ibihumbi maganatanu (500,000 Rwf) ariko kitarenze miliyoni imwe (1,000,000 Rwf).

Iyo bavuga ko ubundi ibintu ari ibiterasoni akenshi bashingira ku muco. Ariko ukurikije umuco wa buri gihugu, hari ibyo abagituyemo baba bafata nk'ibiteye isoni.

Impamvu hashyirwaho amategeko biba ari uburyo bwo gufasha abantu bamwe muri sosiyete, kubaho badateza ibibazo muri rubanda.

Kugeza ubu ikibazo ni uko hari ibintu byinshi mu muco abantu batemeranywaho, ariko nko mu Rwanda gukorera ibiterasoni mu ruhame birahanwa.

Muri ibyo biterasoni harimo kwirinda kugaragaza imyanya y'ibanga, kwambara ubusa muri za Videwo z'indirimbo, Gukorera imibonano mpuzabitsina ahantu hatemewe.

3. Gutukana mu ruhame bihanwa n'amategeko:

Akenshi gutukana biva ku burere umuntu aba yaratojwe agakura ntacyo aziririza ariko akenshi usanga umuntu ashobora no gutukana abitewe n'uburakari bigatuma yakora iryo kosa.

Gutukana mu ruhame ni icyaha gihanishwa igifungo kitari munsi y'iminsi cumi n'itanu ariko kitarenze amezi abiri, ihazabu y'amafaranga atari munsi y'ibihumbi ijana (100,000 Rwf) ariko atarenze ibihumbi magana abiri (200,000 Rwf), imirimo y'inyungu rusange mu gihe kitarenze iminsi cumi n'itanu cyangwa kimwe gusa muri ibyo bihano.

4. Konesha no kwangiza imyaka y'umuntu:

Ingingo ya 187 ihana ibyaha nshinjabyaha, ivuga ko umuntu wese ku bw'inabi wangiza cyangwa wonona ibiti, imyaka, ibikoresho by'ubuhinzi n'ubworozi by'undi cyangwa bye, ariko bifite ingaruka ku bandi aba akoze icyaha.

Iyo abihamijwe n'urukiko ahanishwa igihano cy'igifungo kiri hejuru y'umwaka umwe ariko kitarenze imyaka ibiri, n'ihazabu y'amafaranga ari hejuru ya Miliyoni imwe ariko zitarenga ebyiri, cyangwa kimwe muri ibyo bihano.

5. Kujugunya imyanda ahabonetse hose:

Ingingo ya 32 y'itegeko ngenga ivuga ko, nta muntu wemerewe gushyira imyanda ahantu hatabigenewe, uretse aho bayishongesha, cyangwa se mu ruganda itunganyirizwamo kandi byemejwe n'ubuyobozi bubifitiye ububasha.'

Ingingo ya 107 ivuga ko; bahanishwa ihazabu nda kugeza ku bihumbi ijana (100.000) by'amafaranga y'u Rwanda abantu bose bashyira, basiga, bajugunya umwanda, ibikoresho, cyangwa bamena amazi yakoreshejwe mu ngo ahantu rusange cyangwa hiherereye keretse iyo aho ahantu hateganijwe n'ubuyobozi bubifitiye ububasha.

Irongera ikavuga ko, bahanishwa ihazabu y'ibihumbi cumi by'amafaranga y'u Rwanda (10.000 Frw) cyangwa bagategekwa gusukura ahantu abantu banduje umutungo rusange cyangwa uw'abantu ku giti cyabo, bakoresheje umwanda ukomoka ku bantu no mu ngo, keretse iyo aho hantu hateganijwe n'ubuyobozi bubifitiye ububasha.

Hari n'amabwiriza agenda ashyirwaho n'uturere hagashyirwaho n'ibihano kugira ngo abantu badakora ayo makosa bikanakorwa mu rwego rwo kuyakumira.

6. Kunywera itabi mu ruhame nabyo bihanwa n'amategeko:

Ibwirizwa ryashyizweho na Njyanama y'akarere ka Huye rivuga ko umuntu ufashwe anywera itabi mu ruhame ahanishwa igihano cyo gucibwa amande angana ni 10.000frw.

Ibi byakozwe hakurikijwe ibwiriza rya Minisiteri y'Ubuzima ivuga ko itabiri ryangiza urinywa ndetse n'utarinywa.

7. Kwihagarika no Kwituma ahatemewe:

Mu rwego rwo gukomeza kubungabunga ibidukikije no kwirinda indwara ziterwa n'umwanda hashyizweho igihano ku muntu wafatwa yituma anihagarika ahatemewe. Umuntu ufatiwe muri iri kosa acibwa amande angana n'ibihumbi bitanu y'u Rwanda (5,000 Rwf).

Ukimara kumenya byinshi kuri ibi bintu wacyekaga ko ari amakosa asanzwe ariko ukaba usanze ari ibyaha bihanwa n'amategeko y'u Rwanda, ufashe uwuhe mwanzuro? Koresha ahagenewe ubutumwa utubwire uko ubyumva, unakande share ubisangize bagenzi bawe batazagwa mu byaha babyitaga amakosa asanzwe.

Source : https://kasukumedia.com/biragoye-kwizera-ko-ibi-byaha-wabihanirwa-namategeko/

Inzego z'iperereza zo mu gihugu cy'abaturanyi cya Tanzania zakomeje gutangaza ko Joseph Bundala wari Musenyeri mu itorero ry'aba-Méthodiste yiyahuye akoresheje umugozi wa telefone yo mu biro, aho bikekwa ko ari icyemezo yafashe kubera imyenda yari imuremereye.

Amakuru y'urupfu rwa Musenyeri Joseph Bundala yamenyekanye ku wa Gatandatu tariki 18 Gicurasi mu 2024, gusa bivugwa ko yiyahuye ku wa Kane tariki 16 Gicurasi.

Umuyobozi wa Polisi ya Tanzania mu Mujyi wa Dodoma, Bwana Alchelaus Mutalemwa, yavuze ko Joseph Bundala yiyahuriye mu biro bye akoresheje umugozi wa telefone.

Mu iperereza ry'ibanze ryakorewe aho icyaha cyabereye hatahuwe inyandiko igaragaza iyo myenda no kutumvikana na bagenzi be ku micungire y'amashuli y'iri dini aribyo byatumye uyu mugabo yiyahura.

Kugeza ubu ntiharamenyekana ingano y'imyenda yatumye uyu Musenyeri yiyahura, niba yarayifashe ku giti cye cyangwa ari mu izina ry'akazi.

Ngayo nguko! Gusa mbibutsa The Citizen dukesha iyi nkuru ntibigeze bagaragaza ko yahise yitaba Imana! Niba byanabaye rero Imana imwakire mu bayo!

Source : https://kasukumedia.com/musenyeri-yiyahuye-nyuma-yo-kwisanga-mu-myenda-yamurenze/

Mu nteko rusange y'Urugaga rw'Urubyiruko rushamikiye ku muryango FPR-INKOTANYI yabaye kuri uyu wa 19 Gicurasi 2024 mu Murenge wa Rugalika, hakiriwe Urubyiruko rw'Abanyamuryango 195 barahiriye gutera intambwe idasubira inyuma mu gukorera Umuryango. Basabwe kurushaho kugira urukundo rw'Umuryango, gutanga imbaraga zabo mu gukorera Igihugu no gusigasira ibyiza Umuryango umaze kugeraho ari nabyo byiza by'Igihugu basabwa gusigasira.

Gilbert Umugiraneza, Perezida w'Urugaga rw'Urubyiruko rushamikiye ku muryango FPR-INKOTANYI mu Karere ka Kamonyi, mu butumwa yageneye urubyiruko rusaga 1200 rwari ruteraniye hamwe mu mbuga y'Igihango cy'Urungano, by'umwihariko aba 195 bashya barahiriye kwinjira mu muryango FPR-INKOTANYI, ariko akanasaba abasanzwe kumviraho, yagize ati' Ni dukomeze gukorera Igihugu, dusigasira ibyiza byagezweho, ibyiza Umuryango wacu umaze kutugezaho'.

Yakomeje ashishikariza buri wese muri uru rubyiruko kwitegura neza Amatora y'Umukuru w'Igihugu ndetse n'Intumwa za rubanda ateganijwe muri Nyakanga uyu mwaka. Asaba ko buri wese yihutira kwiyegereza ibisabwa utora, aho icyambere ari 'Indangamuntu'.

Yagize ati' Urubyiruko rwose narushishikariza kwitabira Amatora, rukazatora neza ariko nk'Abanyamuryango ba FPR-INKOTANYI ni ugutora Umukandida wacu, Nyakubahwa 'Chairman' wacu akaba na Perezida wa Repubulika, Paul Kagame ndetse no kuzatora FPR-INKOTANYI mu matora y'abagize inteko Ishinga Amategeko'. Yakomeje abasaba kwitegura neza no kuzitwara neza haba mbere na nyuma y'Amatora.

Agira kandi ati' Nyuma yo gutora neza rero nta kindi, tuzaba twiteganyirije neza!, Twiteganyirije noneho indi myaka myinshi myiza y'iterambere hamwe na FPR-INKOTANYI'. Yabwiye aya maraso mashya y'Urubyiruko rusanze urundi ko baje mu maboko meza y'Umuryango FPR-INKOTANYI, ko bitezweho imbaraga ziyongera ku zindi mu gukunda no guteza imbere Igihugu mu buryo bwose nk'Imbaraga zacyo.

Muyizere Josiane, atuye mu Mudugudu wa Samuduha, Akagari ka Nyarubuye. Avuga ko gufata icyemezo cyo kurahirira kwinjira muri FPR-INKOTANYI byatewe n'ubushake bwe bwo kumva agomba gusanga urubyiruko rugenzi rwe bagahuza amaboko mu kubaka Igihugu.

Ati' Impamvu yanjye, ishingiye ku gushaka gufatanya no gukomezanya na bagenzi banjye gufasha Igihugu, kukirwanirira no kudashyigikira abantu bakoze Jenoside yakorewe Abatutsi n'abakirangwa n'Amacakuburi n'Ingengabitekerezo ya Jenoside'.

Habimana Didase, atuye mu Kagari ka Sheli akaba umwe mu barahiye. Avuga ko gufata icyemezo cyo kwinjira muri FPR-INKOTANYI atari ibije bimugwiririye. Ati' Impamvu yanteye gutera intambwe njya mu Muryango RPF ni uko nakomeje kumva no kubona ibyiza byayo bityo nkumva umutima umpatira kujyayo'.

Akomeza ati' FPR-INKOTANYI nk'Umuryango wabohoye u Rwanda ugahagarika Jenoside, bafite ibikorwa by'Indashyikirwa, ni cyo cyankuruye. Ninjiye n'imbaraga zanjye ngo dufatanye kubaka u Rwanda no kubaka ubufatanye'.

Baba uru rubyiruko rushya rwarahiriye kwinjira mu muryango FPR-INKOTANYI, baba abo basanze bagenzi babo ndetse n'abakuze baje kubashyigikira, bibukijwe ko Urubyiruko ari imbaraga z'Igihugu zubaka kandi vuba. Basabwe kumenya no kuzirikana ko Umuryango FPR-INKOTANYI ushyize imbere cyane Urubyiruko kuko arizo mbaraga z'Igihugu bakaba n'imbaraga z'ahazaza h'u Rwanda rwifuzwa.

Urubyiruko, rwasabwe gukoresha Amahirwe yose Igihugu kibaha bakirinda ko abacika, ahubwo bagaharanira kuyabyaza umusaruro mu nguni zose. Bibukijwe ko nk'urubyiruko rwa FPR-INKOTANYI bakwiye kuba 'Nkore neza bandebereho', ariko kandi by'umwihariko bagaharanira kutagira imbaraga bapfusha ubusa kuko zose ni izo kubaka Igihugu.

Amwe mu mafoto y'uyu munsi;

Munyaneza Théogène

Source : https://www.intyoza.com/2024/05/19/kamonyi-rugalika-rpf-inkotanyi-urubyiruko-rusaga-190-rwarahiye-ruhabwa-impanuro-abandi-bumviraho/