Category: Uncategorized

Mu mwaka wa 2000 nibwo ikiyaga cya Cyohoha cyakamye burundu bituma ingano nini y'amafi ahatikirira ndetse n'abaturage batuye mu mirenge ya Mayange, Mareba na Ngeruka yari igikikije bahura n'ikibazo cy'ibura ry'amazi.

Nk'uko abaturage babitangarije The New Times, bavuga ko ubu bashobora kuroba ibiro nibura 56 by'amoko atandukanye y'amafi buri munsi.

Bati 'ubu ikiyaga kiba gifunguye iminsi ine mu cyumweru ubundi tukagifunga amezi abiri kugira ngo umusaruro wiyongere cyane'.

Abaturiye Cyohoha kandi bavuze ko uretse no kwiyongera k'umusaruro w'amafi, ubu bibafasha kongera umusaruro w'ubuhinzi bifashishije ikoranabuhanga rikoresha imirasire y'izuba mu kuhira imyaka.

Ibi biyaga kandi bikomeje gufasha abaturage babituriye kwikura mu bukene no kuzamura imibereho myiza, Ubu bakaba bafite koperative ifite abanyamuryango basaga 350.

Inzobere mu kigo cy'igihugu gishinzwe kurengera ibidukikike [REMA] yavuze ko havuguruwe Hegitare 654 z'zikiyaga cya Cyohoha na Hegitare 52 z'ibishanga bigikikije.

Yagize ati 'Umusaruro w'amafi wavuye ku biro 900 ugera ku biro 3,459 ku kwezi kandi koperative y'abarobyi biguriye imodoka banubaka inzu y'ubucuruai babikesheje uku kwiyongera k'umusaruro.'

Leta kandi yavuguruye ikiyaga cya Kibare gifite Hegitare 336 cyo mu karere ka Kayonza cyari cyarakamye bitewe n'ubuhinzi bw'abagituriye, ubucuruzi no kujugunyamo imyanda.

Ku bufatanye na REMA hakaba haratewe ibiti by'imigano ku buso bungana na Hegitare 80 bikikije iki kiyanga bigifasha kudahura n'ibibazo by'isuri yakirohamo ikangiza umusaruro wacyo, ndetse hanubakwa isoko ry'arenga miliyoni 103.

Akanyamuneza ni kose nyuma yo gutubuka k’umusaruro uva mu burobyi

Byabereye mu Mudugudu wa Kigabiro, Akagari ka Gisanze Umurenge wa Rubengera ahazwi nko ku Ryanyirakabano, ku wa 03 Kamena 2024.

Saa kumi n'ebyiri za mu gitondo, nibwo umwana wo muri aka gace yagiye kwahira ubwatsi abona uyu mukobwa wari ukunze kuba aryamye hafi y'umuhanda yishwe, ahita asubirayo ajya kubibwira umuyobozi w'umudugudu.

Ababonye umurambo wa nyakwigendera bavuga ko iruhande rwe bahasanze udukingiriro dufunguye, n'inkora y'amaraso, bagakeka ko abamwishe cyangwa uwamwishe yaba yabanje kumusambanya.

Umunyabanga Nshingwabikorwa w'Umurenge wa Rubengera, Nkusi Medard yabwiye IGIHE ko batabashije kumenya igihe uyu mukobwa yiciwe ko ahubwo amakuru bayamenye mu gitondo.

Ati 'Yishwe muri iri joro amasaha ntabwo twayamenye. Tubimenye muri iki gitondo. Tumaze kubimenyesha komanda wa Polisi, n'umugenzacyaha tugiye kugerayo RIB ikore iperereza'.

Umwirondoro wose wa Nyakwigendera nturamenyekana, gusa yakundaga kuvuga ko yitwa Olive, akaba yakomokaga mu murenge wa Gitesi mu karere ka Karongi.

Tumusiime Ally Tidjan ubu ukinira Musanze FC, akaba murumuna wa Manishimwe Djabel wakiniye amakipe akomeye mu Rwanda, avuga ko imvune yahuriye na zo muri Rayon Sports ari kimwe mu byatumye impano ye yagaragariraga benshi itajya ku itara atange ibyo afite.

Uyu mukinnyi wanyuze muri Rayon Sports ndetse benshi muba-Rayon bakaba bari bamutegerejeho byinshi harimo ndetse no kuzaba umwe mubazishakamo umucunguzi w’ikipe y’igihugu Amavubi mu myaka iri imbere.

Ally Tidjan uvukana na Manishimwe Djabel, ubu akinira Musanze FC, ni umusore w’imyaka 24 y’amavuko, avuka mu Karere ka Gatsibo mu Ntara y’Iburasirazuba, akaba avuka mumuryango w’abana batanu, barimo na Manishimwe Djabel.

Urugendo rwe nk’umukinnyi w’umwuga rwatangiye neza mu mwaka wa 2018 ubwo yerekezaga muri Rayon Sports.

Nyuma y’aho Shampiyona y’icyiciro cya mbere mu Rwanda umwaka w’imikino 2017-18 igice kibanza cya shampiyona kirangiye, Rayon Sports yatozwaga na Olivier Karekezi ndetse na Nyakwigendera Jeannot Witakenge wari umwungirije, ikaba yarasubukuye imyitozo iri kumwe n’abakinnyi bashya bari mu igeragezwa muri abo harimo murumuna wa Rutanga Eric, Habineza Olivier wari umaze gutandukana n’irerero rya APR FC na Tumusiime Ally Tidjan watangaga icyizere na we wanyuze mu bato ba APR FC.

Mu mpera z’umwaka wa 2017 Tumusiime Ally Tidjan wakuriye mu ngimbi za APR FC yaje gutangira imyitozo muri Rayon Sports yamaze amezi akabakaba atandatu atarabona ibyangombwa bimwemerera gukina (Licence) dore ko yaje shampiyona y’umwaka wa 2017/18 yaramaze gutangira ndetse uwo mwaka w’imikino urinda urangira atarabona ibyangombwa.

Mu mwaka w’imikino 2018/19 ku itariki ya 13 Mutarama 2019 ku mukino ikipe ya Rayon Sports yakiragaho Kirehe FC kuri Stade ya Kigali kuri ubu yitiriwe umunyabigwi Pelé, uyu musore wari ufite imyaka 18 y’amavuko yakandagiye mu kibuga asimbuye Manzi Thierry, mu mukino iyi kipe yatozwaga n’umunya Brazil Robertinho yaje kunyagira Kirehe FC ibitego 3-0. Wari wo mukino wa mbere Tumusiime Aly Tidjan yakinnye wa shampiyona mu mwambaro wa Rayon Sports, umukino w’amateka kuri we adateze kwibagirwa.

Ati “Umukino wanjye wa mbere muri Shampiyona ni umukino ntazibagirwa. Twari twakinnye na Kirehe, ku muntu wari ukinnye icyiciro cya mbere ku nshuro ya mbere, birumvikana ni umunsi uba udasanzwe udashobora kwibagirana by’umwihariko no gukinana n’abakinnyi bakomeye ni ibintu mu by’ukuri bijya mu mateka y’umuntu!”

Mu gihe cy’imyaka ibiri yamaze muri Rayon Sports nk’umukinnyi ufite ibyangombwa byuzuye, hari byinshi atazibagirwa birimo nk’uburwayi n’imvune byamuranze bikaba biri no mu byatumye atabona umwanya uahagije wo kwerekana ubushobozi bwe.

Ati: “Ikindi ntakibagirwa, ni imbogamizi nagiye mpura na zo harimo uburwayi, nakunze kugira urutugu rucomoka ku buryo hari igihe cyageraga mbura gato ngo nkine bikaza kwanga, kuko ndibuka ubwo narindi mu mwaka wa kabiri ndetse ntangiye kumenyera, hari umutoza wigeze kuza (Javier Martinez Espinoza) arankunda cyane, araza turi kumwe n’abakinnyi bakuru, ubwo nari ntangiye kugera ku rwego rwo kuba nakina.”

“Yarankundaga cyane ndetse ku mukino twari tugiye guhuramo na Gasogi, anshyira ku rutonde rw’abakinnyi bagombaga kuzabanza mu kibuga ariko bigeze ku munsi wa nyuma turi bukine, ku myitozo ya nyuma nza gucomoka urutugu, amahirwe yo kubanzamo aba arabuze. kuva ubwo umutoza na we yatangiye kubona ko mfite icyo kibazo amahirwe yendaga kumpa aragabanuka, noneho nanakina ugasanga ndi gukina nsimbura iminota mike.'

Uyu musore wari muri Rayon Sports ubwo iyi kipe yegukanaga igikombe cya Shampiyona iheruka (ku nshuro yayo ya cyenda) ikayikura i Kirehe nyuma yo gusubira Kirehe ikayinyagira ibitego 4-0 (byiyongera kuri bya 3-0 mu mukino ubanza) yatwaranye n’iyi kipe igikombe cya Shampiyona ibintu bikomeye mu rugendo rwa ruhago ku mukinnyi uwo ari we wese ku Isi.

Tumusiime Ally Tidjan avuga ko kuba atarabonye umwanya wo gukina muri Rayon Sports ari ibintu bishobora kubaho mu rugendo rwa ruhago rwa buri mukinnyi wese ariko we kenshi byagiye biterwa n’ibibazo by’imvune, gusa yemera ko umukinnyi uwo ari we wese kubaho mu ikipe adakina ari igihombo gikomeye.

Ati “Kuba muri Rayon Sports ntakina, ni ibintu bibaho mu rugendo rwacu. Urumva nari muto ariko nabaye muri Rayon Sports ngira n’imvune zanabaye imwe mu mpamvu ikomeye yambujije gukina uko nabyifuzaga! Rero nk’umukinnyi muto kandi ukeneye kwemeza umutoza iyo ugize ikibazo nk’icyo birakugora cyane, ku bw’amahirwe nyuma nubwo nari narayivuyemo byaje gukunda ndakira ubu meze neza”

Yagarutse ku bihe byiza yagiriye muri iyi kipe birimo nko gutwara Shampiyona, igikombe kiruta ibindi ‘Super Cup’ n’ibindi bitandukanye n’akarusho akaba yari ahari ubwo iyi kipe yageraga mu matsinda ya CAF Confederations Cup ndetse ikanayarenga (nubwo yari atarabona ibyangombwa byuzuye) avuga ko bino bihe Rayon Sports yagize bishoboka ko byakongera kugaruka!

Ati “Ikipe yagiye mumatsinda umwihariko mperuka kuyibonana, bari abakinnyi bamenyeranye bari bamaze nk’imyaka 3 bakinana badahinduka cyane, urumva rero bari abakinnyi bakuriye mu maboko meza, abakinnyi bari bakiri bato icyo gihe.'

Ally Tidjan kandi abona Rayon Sports igenda yiyubaka neza umunsi ku munsi ndetse ikemura ibibazo birimo ndetse hakiyongeraho no kudahindura abakinnyi cyane ari bimwe mu bintu bizabafasha kongera kwitwara neza ku ruhando rwo mpuzamahanga.

Ally Tidjan yavuze ko muri Rayon Sports yahuye n’imvune nyinshi

All Tidjan unu akinira Musanze FC

NDAHAYO Aristide

Mu myaka ibiri ishize, uyu muhanzi yavuzwe cyane mu itangazamakuru nyuma y’uko agaragaje Jeanine Noach bari bacuditse icyo gihe, ariko ibyabo byaje kugera ku musozo. Hari abahuza ibihe yanyuzemo na Jeanine Noach n’imvano y’indirimbo ye yise ‘Isengesho’ aherutse gushyira hanze.

Ubwo yashyiraga hanze iyi ndirimbo, yavuze ko yayanditse ashingiye ku bihe yanyuzemo mu myaka ibiri, aho yatewe imijugujugu, ariko ntiyerura ngo avuge neza icyabaye muri icyo gihe.

Uyu muhanzi ari kwitegura gukora igitaramo cye gikomeye yise 'Migabo Live Concert' kizaba ku wa Gatandatu tariki 8 Kamena 2024 muri Kigali Conference and Exhibition Village ahazwi nka Camp Kigali.

Ni cyo gitaramo cya mbere cye agiye gukora. Mu kiganiro na InyaRwanda, Cyusa Ibrahim yavuze ko yasohoye iyi ndirimbo ‘Isengesho’ muri iki gihe, kubera ko ari imwe mu zizaranga igitaramo cye.

Yavuze ko yayanditse bimeze nko kwiyegereza Imana yabanye nawe mu bihe yari akomerewe. Ati 'Imijuguju natewe ni myinshi. Hari igihe umuntu afata icyemezo rimwe na rimwe mu buzima, bamwe bakabifata ukundi, ariko umuntu agenda afata ibyemezo runaka, imijugujugu ntabwo ibura […]”

“Hari umwaka nagize umbera mubi, habaye ah’Imana kugirango mbisohokemo, buri wese agenda avuga ukwe, undi avuga ukwe, buri wese yavugaga Cyusa uko ashatse. Ngeze aho ndavuga nti ariko nagomeye iki Imana? Ahari ntiwasanga ari njye ushobora kuba mfite ikibazo n’uko rero nagize igitekerezo cy’indirimbo ‘Isengesho’.

Abajijwe niba iyi ndirimbo yarayikoze biturutse ku bihe yanyuramo na Jeanine Noach, yavuze ko atari cyo gihe muri rusange ariko ‘wenda nabyo birimo’.

Ati “Ariko mu by’ukuri ni umwaka utarangendekeye neza, ni umwaka ushize niba atari mu 2022, mu mpera za 2022 dutangira 2023, byari binkomereye, ibintu byose njyewe mbiha igihe, ubuse hari umuntu ukibuga, ibintu birashira.”

Yavuze ko biriya bihe byatumye adasohora indirimbo nk’uko byari bimeze, rimwe na rimwe agacika intege ariko yongeye kwishakamo ibisubizo, kandi atekereza ko igihe kizagera bikarangira.

Cyusa Ibrahim yavuze ko abamuvugaga muri kiriya gihe ‘hafi ya bose bahise baba abafana. Yavuze ko Jeanine Noach ari umwe mu bakunzi yagize ‘nk’uko n’abandi byagenze’. Ati “Ni ibihe byashize! Byararangiye, igihe cye cyararangiye nk’uko n’abandi nabo igihe nabo cyararangiye.”

Yavuze ko nyuma yo gutandukana na Jeanine Noach atongeye kugaragaza umukunzi, ariko kandi igihe nikigera abantu bazabimenya.

Uyu muhanzi wamamaye mu ndirimbo zirimo ‘Marebe’, avuga ko ubu yafashe umwanzuro wo kutongera kugaragaza umukunzi we, kuko azagaragaza ‘Fiance’' gusa igihe azaba yitegura kurushinga.

Ati “Ubu ntabwo nyishaka kuvugwa cyane mu rukundo, ngo Cyusa yagiye aha, ahubwo muzumva cyangwa muzabona, uwo muzabona ni uwo nzaba nambitse impeta gusa, ntabwo si ukumwambika impeta gusa, mbabwira ngo mu kwezi uku ni uku hari ubukwe.”

Akomeza ati “Nzagaragara 'Fiancé' ngiye no kubereka ubukwe, muzamubona uyu ng’uyu mu kwezi gutaha hari n’ubukwe.'

 

Cyusa Ibrahim yatangaje ko yafashe icyemezo cyo kutazongera kugaragaza umukunzi we kugeza agiye gukora ubukwe

Cyusa Ibrahim yavuze ko mu myaka ibiri ishize yatewe imijugujugu n'abantu banyuranye, ahanini biturutse ku nkuru zarimo urukundo rwe Noach

Cyusa yavuze ko azagaragaza 'Fiance' kandi nabwo bitegura gukora ubukwe mu gihe kitarambiranye

KANDA HANO UREBE IKIGANIRO CYIHARIYETWAGIRANYE NA CYUSA IBRAHIM

KANDA HANO UREBE AMASHUSHO Y'INDIRIMBO'ISENGESHO' YA CYUSA IBRAHIM

“>

The Ben yabigarutseho mu kiganiro cyihariye yagiranye na InyaRwanda, nyuma yo kuririmba ku mukino wa nyuma wa BAL, wabaye ku wa Gatandatu tariki 1 Kamena 2024, mu nyubako y'imyidagaduro ya BK Arena iherereye i Remera.

Uyu muhanzi yaririmbye afashijwe n'ababyinnyi bo mu itsinda Ishami Talent bamufashije kubyina zimwe mu ndirimbo ze zirimo 'Why', 'Lose Control', 'Habibi' n'izindi yari yateguye. Cyari igitaramo kidasanzwe kuri we, kuko yataramiye ibihumbi by'abantu barimo Perezida Kagame na Madamu.

The Ben avuga ko yaririmbye muri iyi mikino ya BAL mu gihe ari kwitegura gushyira hanze indirimbo ebyiri yahuriyemo n'abandi bahanzi zizifashishwa mu kwamamaza Perezida Kagame mu gihe cy'amatora y'Umukuru w'Igihugu n'ay'Abadepite ateganyijwe muri Nyakanga uyu mwaka.

Ati 'Nibyo nubwo njya nkunda kubitunguza abantu bikaza. Nibyo, twakoze indirimbo ishyigikira Umukundinda wacu (Perezida Kagame) muri RPF. Ndi mu ndirimbo zigeze nko muri ebyiri, umukandinda wacu yego rwose, twamukoreye indirimbo kandi nziza.'

Uyu muhanzi uri kwitegura gushyira hanze indirimbo nshya nyuma ya 'Ni Forever', yavuze ko adafite gushidikanya muri we, ko Perezida Kagame azatsinda amatora. Ati 'Kandi tuzatsinda ijana ku ijana.'

The Ben atangaje ko ibi mu gihe umuhanzikazi Bwiza aherutse nawe guteguza indirimbo 'Ongera' yakoranye na Bruce Melodie igaruka kuri Perezida Kagame. Hari indirimbo kandi yahuriyemo abahanzi bane barimo King James na Ariel Wayz igaruka ku muryango RPF Inkotanyi.

Mu ndirimbo zizifashishwa kandi mu gihe cy'amatora, harimo n'indirimbo 'Ndandambara' Nsabimana Leonard yavuguruye ayikorana n'abahanzi barimo Muyango Jean Marie, Alyn Sano, Ish Kevin, Jules Sentore, Ariel Wayz ndetse na Mani Martin.

 

Amatora yo mu Rwanda afatwa nk’ubukwe, ahanini biturutse ku myiteguro ishyirwamo kuva atangajwe kugeza ageze ku musozo. Komisiyo y’Igihugu y’Amatora (NEC) iherutse gutangaza ko aya matora azakoreshwamo amafaranga y’u Rwanda angana na Miliyari 8.

Ni mu gihe bamwe bamaze gutanga Kandidatire ku mwanya wa Perezida, ndetse hari n’abatanze Kandidatire ku mwanya w’Abadepite.

Perezida Paul Kagame niwe wabimburiye abandi atanga Kandidatire ku mwanya wa Perezida wa Repubulika, Dr Frank Habineza wa Green Party nawe aherutse gutanga Kandidatire ku mwanya wa Perezida wa Repubulika.

Mu bakandida Depite, abavuzwe cyane batanze Kandidatire barimo umunyarwenya Samu wo muri Zuby Comedy, Umwarimu usanzwe wigisha mu Rwunge rw’Amashuri rwa Butete ruherereye mu Karere ka Burera mu Ntara y’Amajyaruguru, Nyiramahirwe Jeanne d’Arc n'abandi.

Amatora aherekezwa n’indirimo z’abahanzi ziba zivuga ku mukandida cyangwa se ibikorwa runaka Guverinoma yagejeje ku Banyarwanda.

Ubwo yari mu kiganiro na Isibo Tv, Umuvugizi Wungirije wa Guverinoma y’u Rwanda, Alain Mukuralinda yavuze ko bamaze kwakira indirimbo 80 zivuga ku matora ya Perezida wa Repubulika n’ay’Abapedite ateganyijwe.

Ati “Maze kwakira nk’indirimbo 80, hari izifashishwa mu matora, ari ku matora y’Umukuru w’Igihugu, amatora y’Abadepite, Komisiyo y’Amatora ikeneye indirimbo, barazizana rwose.”

Mukuralinda yavuze ko izi ndirimbo bazishyize ahantu hamwe, hanyuma bazohereza aho zigomba gutangwa. Yavuze ko bakira indirimbo zose, hatitawe ku ishyaka baririmbye.

Yavuze ko kuba hari abahanzi baririmbye ku matora, nyamara basanzwe bafite ibihangano bitavugwaho rumwe hanze aha, ntacyo bitwaye kuko buri wese afite amahitamo ye ahanini bitewe n’ubutumwa bukubiyemo.

Mukuralinda avuga ko mu guhitamo indirimbo zizafashishwa mu matora hashingirwa 'ku buryo zikoze neza', 'amagambo', injyana' 'n'uburyo zicuranze'.

  

The Ben yatangaje ko hari indirimbo ebyiri 'nziza' yagizemo uruhare zizifashishwa mu kwamamaza Perezida Kagame mu matora

The Ben yavuze ko adafite gushidikanya muri we ko Perezida Kagame azatsinda amatora

The Ben yavuze ko indirimbo yaririmbye muri BAL yazihisemo ashingiye ku kuntu zakiriwe n'abafana

The Ben yavuze ko yishimiye gutaramira imbere ya Perezida Kagame na Madamu mu gusoza imikino ya BAL 

KANDA HANO UREBE IKIGANIRO CYIHARIYE TWAGIRANYE NA THE BEN AGARUKA KU NDIRIMBO YAHIMBIYE PEREZIDA KAGAME

“>

AMAFOTO: TNT

Ikipe y’igihugu Amavubi yahagarukanye abakinnyi 25 yerekeza gukina imikino yo gushaka itike y’Igikombe cy’Isi cya 2026 azahuramo na Bénin ndetse na Lesotho.

Muri abo bakinnyi Amavubi yahagurukanye ntabwo harimo myugariro wa FC Shkupi muri Macedonia, Rwatubyaye Abdul wagize ikibazo cy’imvune y’itako yatumye atajyana n’abandi.

Frank Spittler Torsten akaba yahagurukanye abakinnyi 20 ni mu gihe abandi batanu barimo Mutsinzi Ange Jimmy, Jojea Kwizera, Rafael York, Mugisha Bonheur Casemiro na Imanishimwe Emmanuel Mangwende bahurira muri Cote d’Ivoire.

Iyi mikino y’umunsi wa 3 u Rwanda ruzakina na Benin muri Cote d’Ivoire tariki ya 6 Kamena na Lesotho muri Afurika y’Epfo tariki ya 11 Kamena.

Muri iri tsinda C ryo gushaka itike y’Igikombe cy’isi cya 2026, Amavubi ayoboye Itsinda C n’amanota 4, Afurika y’Epfo ifite 3, Nigeria na Zimbabwe zifite 2 mu gihe Benin ifite inota 1.

Abakinnyi yatwaye

Abanyezamu: Ntwali Fiacre, Hakizimana Adolphe na Wenseens Maxime.

Ba myugariro: Omborenga Fitina, Byiringiro Gilbert, Niyomugabo Claude, Imanishimwe Emmanuel, Mutsinzi Ange, Manzi Thierry, Niyigena Clement, Nshimiyimana Yunusu na Maes Dylan.

Mu Kibuga Hagati: Bizimana Djihad, Ruboneka Jean Bosco, Mugisha Bonheur, Rubanguka Steve, Sibomana Patrick, Mugisha Gilbert, Rafael York na Hakim Sahabu.

Ba Rutahizamu: Muhire Kevin, Gitego Arthur, Guelette Samuel Leopold, Nshuti Innocent na Kwizera Jojea.

Kubera imvune Rwatubyaye ntabwo yajyanye n’abandi

Ikipe y’umukino wo Koga ya Mako Sharks SC yegukanye irushanwa yateguye rya ‘Mako Sharks Summer Invitation Swimming Championship’ ryabaga ku nshuro ya kabiri ryatumiwemo amakipe yo muri Uganda.

Ni irushanwa ryabaye mu mpera z’icyumweru gishize ku wa Gatandatu no ku Cyumweru muri Green Hills Academy, ryateguwe ku bufatanye na Davis and Shirtliff.

Iri rushanwa ryari ryatumiwemo amakipe 4 yo muri Uganda arimo; Silverfin Academy, Hertz Swim Club, Aquatic Academy Kampala na Whales Swim Acadeny Entebbe.

Ayo mu Rwanda ni Mako Sharks yariteguye, Cercle Sportif Karongi ndetse na Kigali Sporting Club.

Rikaba ryarahurije hamwe abakinnyi bagera 170 bavuye kuri 98 bari bitabiriye irushanwa ry’umwaka ushize.

Mako Sharks ikaba ari yo yaje kwegukana iri rushanwa aho yagize amanota 3597, Aquatic Academy yo muri Uganda ni yo yabaye iya kabiri n’amanota 3590.5, Silverfin Academy yo muri Uganda iba iya 3 n’amanota 1658, Cercle Sportif de Karongi yabaye iya 4 n’amanota 1127, Hertz Swim Club yo muri Uganda iba iya 5 n’amanota 929, Kigali Sporting Club yabaye iya 6 n’amanota 492 ni mu gihe Whales Swim Academy Entebbe yabaye iya 7 n’amanota 210.

Bazatsinda James, umuyobozi wa Mako Sharks SC yishimiye uko irushanwa ry’uyu mwaka uko ryagenze bakaba bizeye ko umwaka utaha rizagenda neza kurushaho, ku buryo n’amakipe yo hanze y’u Rwanda aziyongera.

Ati “Intego yacu ya mbere yari ukuzamura impano z’abakinnyi ndetse n’abakinnyi bakiri bato, mwabonye ko abana benshi twari kumwe nabo bafite imyaka munsi ya 14, ni abakinnyi bakiri bato bafite ejo hazaza, ikintu twifuzaga cyo kuzamura impano zabo cyagezweho kuko ibihe byabo byagiye bigabanuka ugereranyije n’andi marushanwa bagiye bakina.”

“Umwaka utaha twifuza ko n’amakipe yaziyongera kuko nk’ubu hari nk’ikipe yo muri Ghana yagombaga kuza ariko ubushobozi buba buke ariko batwemereye ko umwaka utaha tuzaba turi kumwe.”

Bazatsinda James yavuze ko iri rushanwa nk’iri ari inzira nziza y’amakipe yo kuba yashora imari no kugaragaza ibikorwa bya bo, iyi mikno ngo iba ari umwanya mwiza wo kugaragaza ibyo bakora binyuze mu mikino.

Irushanwa ryabaga ku nshuro ya gatatu

Mako Sharks yitwaye ni yo yegukanye irushanwa

Aquataic yabaye iya kabiri

James umuyobozi wa Davis and Shirtliff wateye inkunga irushanwa yishimiye urwego ririho

Bazatsinda James yavuze ko umwaka utaha iri rushanwa bizeye ko rizitabirwa n’amakipe menshi

Perezida Kagame yageze muri Koreya y'Epfo ku wa 02 Kamena 2024, aho yitabiriye Inama ya mbere iki gihugu cyo mu Burasirazuba bwa Aziya, kigiye kugirana n'abayobozi b'ibihugu bya Afurika yiswe Korea-Africa Summit.

Iyi nama Perezida Kagame yitabiriye biteganyijwe ko izahuza abayobozi bo mu nzego zitandukanye za Afurika, ndetse n'imiryango mpuzamahanga ifite icyo iri gukora ngo Afurika itere imbere, ikazaba guhera ku wa 04 — 05 Kamena 2024.

Biteganyijwe ko Perezida Kagame azatanga ikiganiro ubwo iyi nama izaba ifungurwa, hakaba hari n'ibiganiro bizatangwa n'abandi bakuru b'ibihugu na za guverinoma bazaba bitabiriye.

Ubwo iyi nama izaba iri kuba, biteganyijwe ko kandi Perezida Kagame azanasura Kaminuza ya Yonsei yo muri iki gihugu, aho azahabwa Impamyabumenyi y'Ikirenga (PhD) y'icyubahiro mu Ishami rya 'Public policy and Management'.

Yonsei University ni kaminuza ikomeye cyane kuko ari imwe muri eshatu zikomeye muri iki gihugu kimaze gutera imbere mu bukungu bushingiye ku bumenyi.

Ni kaminuza yashinzwe mu 1885, ikaba imaze gushinga ibigo by'ubushakashatsi bigera ku 178 mu nzego zitandukanye.

Repubulika ya Koreya ni kimwe mu bihugu by'abafatanyabikorwa b'imbere mu Rwanda nyuma ya Jenoside yakorewe Abatutsi.
Muri Nzeri uyu mwaka, u Rwanda na Repubulika ya Koreya byasinye amasezerano ajyanye no kurinda abantu gusora kabiri (Double Taxation Avoidance Agreement).

Amasezerano nk'aya yorohereza ubufatanye mu bukungu no kugabanya inzitizi zishingiye ku misoro, ashishikariza ishoramari n'ubucuruzi hagati y'ibihugu byombi.

Muri Kanama 2023, nabwo ibi bihugu byashyize umukono ku masezerano arimo yerekeye “Inama za politiki,” agamije guteza imbere ibiganiro bya politiki n'ubufatanye hagati y'ibihugu byombi n'ibindi.

Korea-Afric Summit ije ikurikira iyabaye muri Nzeri 2023, ariko iri ku rwego rwa za minisiteri. Ni inama iba igamije guteza imbere ubufatanye mu by'ubukungu izwi nka Korea-Africa Economic Cooperation (KOAFEC).

KOAFEC yari ibaye ku nshuro ya karindwi, aha Banki Nyafurika Itsura Amajyambere, BAD yasinyanye amasezerano abiri na Repubulika ya Koreya, afite agaciro ka miliyoni 28.6$ (arenga miliyari 37 Frw).

Ni amafaranga biteganyijwe ko azafasha mu guteza imbere ingufu zitangiza, guteza imbere ubuhinzi bugezweho, no gubakira ubushobozi mu bijyanye n'ubumenyi ku baturage bo mu bihugu bya Afurika.

Ni amasezerano yari abayeho akurikiye andi ya miliyoni 600$ (arenga 778 Frw) ikigo cyita ku ishoramari rikorwa mu guteza imbere ingufu na Repubulika ya Koreya na none mu gufasha ibihugu by'uyu mugabane kubakirwa ubushobozi mu bijyanye n'ingufu.

Perezida Kagame yagiranye ibiganiro na mugenzi we Yoon Suk Yeol wa Koreya y’Epfo

Ni ibiganiro byagarutse ku gushimangira umubano mwiza usanzweho hagati y’ibihugu byombi

Perezida Kagame ari muri Koreya y’Epfo aho yitabiriye inama ya Korea-Africa Summit.