Webrwanda Backend

Category: Uncategorized

  • Ubwongereza-u Rwanda: HCR irimo kugerageza kwitambika umugambi wo kohereza abasaba ubuhungiro #rwanda #RwOT

    Ishami ry'Umuryango w'Abibumbye ryita ku mpunzi (UNHCR) ryaburiye abacamanza ko rishobora kuba rifite ibimenyetso bishya byo muri uyu mwaka wa 2024 bigaragaza ko u Rwanda rwashyize mu kaga abasaba ubuhungiro, nubwo inteko ishingamategeko y'Ubwongereza yemeje itegeko ritangaza ko u Rwanda ari igihugu gitekanye.

    Mu gikorwa gifite icyo gisobanuye gikomeye mu rugamba rukomeje mu nkiko kuri iyo gahunda, kuri uyu wa mbere HCR yabwiye urukiko rukuru rw'Ubwongereza ko irimo gukora iperereza ku birego bishya by'ihohotera.

    Ibyo birego birimo ko abantu bashobora kuba baroherejwe mu bihugu aho bashobora gukorerwa iyicarubozo, nubwo Minisitiri w'intebe w'Ubwongereza Rishi Sunak yavuze ko, muri icyo gihe, u Rwanda ari umufatanyabikorwa utekanye w'Ubwongereza.

    Umucamanza yahaye uruhushya HCR rwo gutegura inyandiko y'ibyo bimenyetso mbere yuko indege itwaye abasaba ubuhungiro iva mu Bwongereza.

    Icyo cyemezo cy'urukiko ni imbogamizi kuri Leta y'Ubwongereza kuko igikorwa cya HCR cyabaye ingingo yafatiweho umwanzuro mu rukiko rw'ikirenga rw'Ubwongereza, ubwo rwanzuraga mu Gushyingo (11) mu 2023 ko gahunda ya mbere yo kohereza mu Rwanda abasaba ubuhungiro inyuranyije n'amategeko.

    Abanyamategeko ba Minisitiri w'ubutegetsi bw'igihugu w'Ubwongereza James Cleverly babwiye urukiko ko nta muntu n'umwe uzoherezwa mu Rwanda mbere yo ku itariki ya 24 Nyakanga (7) uyu mwaka.

    Ishyaka rya Labour, rya mbere rikomeye mu mashyaka atavuga rumwe n'ubutegetsi mu Bwongereza, ryasezeranyije gukuraho iyo gahunda niriramuka ritsinze amatora rusange yo ku itariki ya 4 Nyakanga uyu mwaka.

    Nubwo hari urujijo kuri ejo hazaza h'iyi gahunda nkuko BBC dukesha iyi nkuru ibivuga, ibirego bikomeye nibura birenga icumi ubu biri mu nkiko, byinshi muri byo ni iby'abantu ku giti cyabo basaba ubuhungiro bashaka kumenya ejo hazaza habo.

    Mu rubanza rwa mbere kuri iyi gahunda yo kohereza mu Rwanda abasaba ubuhungiro bavuye mu Bwongereza, rwabaye hagati y'umwaka wa 2022 na 2023, ibimenyetso bya ONU byabaye ingenzi cyane mu gufata icyemezo niba u Rwanda rushobora gufatwa nk'ahantu hatekanye kandi hashyize mu gaciro ho kohereza abasaba ubuhungiro.

    ONU yeretse inkiko z'Ubwongereza ibimenyetso by'uko u Rwanda rukorera impunzi ikizwi nka 'refoulement', ni ukuvuga uburyo bunyuranyije n'amategeko bwo gusubiza umuntu usaba ubuhungiro mu gihugu yahunze, kandi rubizi ko ashobora kuhakorerwa ) iyicarubozo.

    Mu iburanisha ryo ku wa mbere, abanyamategeko ba HCR bavuze ko ishaka igihe cyo gutegura no gutanga ibimenyetso bishya ku byabaye kuva yakusanya ibimenyetso bya mbere mu mwaka wa 2022.

    Lawrence Bottinick, umutegetsi wo muri HCR, yabwiye urukiko, mu itangazo rikubiyemo ubuhamya, ko HCR nta ntambwe n'imwe yabonye yatewe ku bibazo yari yagaragaje.

    Yagize ati: 'By'umwihariko, UNHCR irabizi ko hakomeje kubaho ibikorwa bya 'refoulement' byo gukurwa mu Rwanda no kwima uburyo bwo gusaba ubuhungiro ku basaba ubuhungiro mu Rwanda nyuma y'itariki y'ibyo natangaje mbere'.

    Yongeyeho ati: 'Ibi byabaye mu buryo butandukanye ndetse byarakomeje kugeza mu 2024'.

    Bottinick yavuze ko ibyo byabaye byakomeje gutesha agaciro 'ubudakemwa, ukwizerwa no guhama' kwa gahunda y'u Rwanda yo gusuzuma ibijyanye n'impunzi, ariko ko itsinda rya ONU ricyeneye ikindi gihe cyo gukusanya no kugenzura ibyabaye mbere yuko bigezwa mu rukiko.

    Abanyamategeko ba HCR banabwiye urukiko ko abakozi bayo bahuye n'abategetsi b'Ubwongereza i Kigali ku itariki ya 7 Ukuboza (12) mu mwaka ushize, bababwira ko bazi nibura inshuro zirindwi za 'refoulement' zabayeho mu 2023.

    Kuri uwo munsi, Minisitiri w'intebe Sunak yatangaje gahunda ye nshya ijyanye n'u Rwanda, ibuza abacamanza gusuzuma niba u Rwanda rudatekanye.

    Abanyamategeko ba Minisitiri Cleverly babwiye urukiko rukuru rw'Ubwongereza ko nta mpamvu ihari mu rwego rw'amategeko yatuma ikibazo na kimwe mu bishobora kuba birimo kuzamurwa na HCR gikwiye kubuza indege kujyana mu Rwanda abasaba ubuhungiro ku itariki ya 24 Nyakanga.

    Umucamanza Martin Chamberlain yanzuye ko ibimenyetso bya HCR bishobora kuba ingenzi, ayiha uruhushya rwo gukusanya ibimenyetso byinshi bishoboka byo kugaragariza urukiko bitarenze ku itariki ya 28 y'uku kwezi kwa Kamena (6).

    Umucamanza, yahaye Minisitiri w'ubutegetsi bw'igihugu igihe cyo kugeza ku munsi uzakurikira amatora rusange ngo abe yabwiye urukiko icyo atekereza kuri ibyo bimenyetso bya ONU.

    intyoza

    Source : https://www.intyoza.com/2024/06/12/ubwongereza-u-rwanda-hcr-irimo-kugerageza-kwitambika-umugambi-wo-kohereza-abasaba-ubuhungiro/

  • Urubyiruko ruterwa isoni no kugura udukingirizo rwatekerejweho: Imishinga itandatu yahawe miliyoni 10 Frw muri iAccelerator6 – #rwanda #RwOT

    Umuhango wo guhemba iyi mishinga wabaye kuri uyu wa Kabiri, tariki ya 11 Kamena 2024. Imishinga itandatu yatsinze ni iyatoranyijwe muri 15 yageze mu cyiciro cya nyuma.

    Buri mushinga watsinze wagenewe ibihumbi 10$ [Asaga miliyoni 13 Frw] na ba nyirawo bahabwe ubujyanama buzabafasha kuyinoza neza.

    Umushinga wabaye uwa mbere ni uwa Sonia Umwali, w'isomero ahuriyeho na bagenzi be bise 'Rango Library' rizajya rifasha urubyiruko kubona amakuru arimo n'ay'ubuzima bw'imyororokere.

    Uwabaye uwa kabiri ni uwa Mutoni Reine, Iradukunda Kevin Jonathan, na Iradukunda Jean Claude, bafite umushinga wa butike y'ikoranabuhanga izajya igurisha udukingirizo bidasabye ko haba harimo umucuruzi. Iyi butike yiswe 'Mushuti Wanjye Kiosk' izafasha urubyiruko ruterwa isoni no kugura udukingirizo.

    Umushinga wa Hakizayezu Fabrice na mugenzi we wo gukwirakwiza inyandiko n'ibitabo birimo amakuru ajyanye n'ubuzima bw'imyororokere wiswe 'Nyigisha' ukaba witezweho gufasha mu gutanga amakuru agamije kwirinda inda ziterwa abangavu, ndetse no gutanga amakuru ajyanye no kurushaho kwirinda virusi itera Sida mu rubyiruko.

    Umugwaneza Audrey na bagenzi be babiri nabo bafite umushinga wabaye uwa kane w'ibiganiro bise 'Matter Mind' bigamije gusobanura neza ibijyanye n'ubuzima bwo mu mutwe.

    Shimwa Axel wiga ubuvuzi muri University of Global Health Equity na Abdul bafite umushinga wa 'application' ya telefone bise 'Emotion' uzajya ufasha urubyiruko rufite ibibazo by'ubuzima bwo mu mutwe kubona ubufasha. Wabaye uwa gatanu.

    Umushinga 'Mindora' wa Kwizera Rulinda na bagenzi be, ukoresha ikoranabuhanga rya 'application' ishyirwa muri telefone, igafasha uyikoresha kubona amakuru ajyanye n'ubuzima bwo mu mutwe no kuganira n'inzobere, niwo wabaye uwa gatandatu.

    Muri ibi birori byahujwe n'igikorwa 'cy'Ihuriro ry'urubyiruko', Therese Karugwiza wari uhagarariye UNFPA Rwanda, yavuze ko aya marushanwa amaze kuba inshuro esheshatu amaze kugira umumaro cyane ndetse akaba yaratanze umusanzu mu kubaka ubushobozi aho imishinga ariyo ikurura abaterankunga aho kugira ngo ba nyirayo bajye gushaka izo nkunga.

    Imishinga yahatanye uyu mwaka yibanze ku 'Guhanga udushya dutanga ibisubizo birambye mu gukumira akato gahabwa abafite ibibazo by'ubuzima bwo mu mutwe' n'indi yo 'Kunoza uburyo bwo gutanga serivisi n'amakuru nyayo y'ubuzima bw'imyororokere ku rubyiruko'.

    Mu 2024, hakiriwe imishinga 749, yavuyemo 40 na yo yatoranyijwemo 15 yahize indi imbere y'akanama nkemurampaka, yaje gutoranywamo indi itandatu myiza kurusha iyindi.

    Umuyobozi Mukuru wa Imbuto Foundation, Elodie Shami, yavuze ko hari imishinga itatoranyijwe kuko ari mibi, ashimira umuhate wa ba nyirayo.

    Ati 'Intambwe yose mutera ibongerera ubunararibonye bw'umuhate n'ubuhanga bwanyu kandi ni ntagereranywa. Mukomeze muhatane, mukomeze muhange udushya kandi mumenye ko imbaraga zanyu zigira uruhare mu gutegura ejo hazaza h'igihugu cyacu.'

    Ubwo iyi gahunda yatangizwaga mu 2016, byari nk'uburyo bwo guha urubyiruko urubuga rurufasha gutanga umusanzu warwo mu gushaka ibisubizo birambye ku bibazo bihari.

    Umunyamabanga wa Leta muri Minisiteri y'Urubyiruko, Umutoni Sandrine, yibukije aba bahawe ibihembo ko imishinga yabo yitezweho gutanga ibisubizo ku muryango Nyarwanda by'umwihariko urubyiruko.

    Ati 'Mu gukemura ibyo bibazo ni uguteganyiriza abo mu bisekuru by'ahazaza ku buryo byabafasha gukuraho inzitizi z'ubukene.'

    Binyuze muri iyi gahunda ba rwiyemezamirimo bato babona amafaranga n'amahugurwa yo guteza imbere ubumenyi bwabo ngo batange umuti w'ibikibangamiye sosiyete.

    Binyuze muri iyi gahunda ba rwiyemezamirimo bato babona amafaranga n'amahugurwa yo guteza imbere ubumenyi bwabo ngo batange umuti w'ibikibangamiye sosiyete

    Hanahembwe umushinga wa butike y'ikoranabuhanga izajya igurisha udukingirizo bidasabye ko haba harimo umucuruzi

    Shimwa Axel wiga ubuvuzi muri UGHE na Abdul bafite umushinga wa 'application' ya telefone bise 'Emotion' uzajya ufasha urubyiruko rufite ibibazo by'ubuzima bwo mu mutwe kubona ubufasha

    Mu 2024, hakiriwe imishinga 749, yavuyemo 40 na yo yatoranyijwemo 15 yahize indi imbere y'akanama nkemurampaka, yaje gutoranywamo indi itandatu myiza kurusha iyindi

    Therese Karugwiza wari uhagarariye UNFPA Rwanda, yavuze ko aya marushanwa amaze kuba inshuro esheshatu amaze gutanga umusaruro

    Umunyamabanga wa Leta muri Minisiteri y'Urubyiruko, Umutoni Sandrine [ibumoso], yibukije aba bahawe ibihembo ko imishinga yabo yitezweho gutanga ibisubizo ku muryango Nyarwanda by'umwihariko urubyiruko

    Umuhanzi Christiane Bukuru (Boukuru) niwe wasusurukije abari bitabiriye ibi birori

    Umushinga 'Mindora' wa Kwizera Rulinda na bagenzi be, ukoresha ikoranabuhanga rya 'application' ishyirwa muri telefone, igafasha uyikoresha kubona amakuru ajyanye n'ubuzima bwo mu mutwe wahembwe

    Umushinga w'isomero wiswe 'Rango Library' rizajya rifasha urubyiruko kubona amakuru arimo n'ay'ubuzima bw'imyororokere wahembwe

    Umuyobozi Mukuru wa Imbuto Foundation Elodie Shami, yavuze ko hari imishinga itatoranyijwe kuko ari mibi, ashimira umuhate wa ba nyirayo

    Umushinga wo gukwirakwiza inyandiko n'ibitabo birimo amakuru ajyanye n'ubuzima bw'imyororokere wiswe 'Nyigisha' nawo wagenewe ibihumbi $10

    Source : http://igihe.com/amakuru/u-rwanda/article/urubyiruko-ruterwa-isoni-no-kugura-udukingirizo-rwatekerejweho-imishinga

  • Ikoranabuhanga ryagaragajwe nk'inkingi yafasha mu kongera urubyiruko rwitabira ubuhinzi n'ubworozi – #rwanda #RwOT

    Ibi byatangarijwe mu marushwanwa ya 'Ayute Africa Challenge' ahatanamo urubyiruko rufite imishinga myiza y'ikoranabuhanga mu buhinzi no guhanga udushya muri Afurika.

    Ni amarushanwa ategurwa n'Umuryango Mpuzamahanga wita ku kurwanya ubukene n'inzara, Heifer International, yabereye mu Rwanda ku nshuro ya mbere kuri uyu wa 11 Kamena 2024.

    Uyu muryango ukorera mu bihugu 19 ku mugabane birimo icyenda byo ku mugabane wa Afurika birimo n'u Rwanda.

    Umunyamabanga wa Leta muri Minisiteri y'Ubuhinzi n'Ubworozi, Rwigamba Eric, yavuze ko kwegereza ibikorwa remezo by'ikoranabuhanga urubyiruko ari byo bifasha mu kuzamura abisanga mu buhinzi n'ubworozi.

    Yagize ati 'Dufatanyije na Minisiteri y'Ikoranabuhanga turimo gushyiraho ibigo by'ikoranabuhanga (ICT Hubs) […] ndetse no kugeza ikoranabuhanga na internet ahantu hose. Urubyiruko iyo uruhaye aho hantu ho gukorera kubera bakunda ikoranabuhanaga bazi no kurikoresha uba ubahaye urubuga bakabasha guhanga udushya twarushaho guteza imbere ubuhinzi n'ubworozi.'

    Rwigamba yavuze ko ariko hari aho igihugu kigeze mu kuzamura umubare w'urubyiruko rukora imishinga y'ikoranabuhanga mu buhinzi n'ubworozi.

    Ati 'Hari ibikorwa ibijyanye no gukoresha ikoranabuhanga ry'imashini zihinga n'izisarura, abazikoresha ni urubyiruko. Mu bijyanye no kuhira kandi dufite urubyiruko rwibumbiye mu makoperative rutanga serivise zo kuhira ku bahinzi n'aborozi bakabishyura. Hari n'abahinga imboga muri greenhouses ndetse n'abakora ubworozi bw'inkoko.'

    Rwigamba yavuze ko ahazaza h'ubuhinzi hari mu biganza by'urubyiruko kandi rushobora gutanga umusanzu ukomeye mu kurwanya ubukene. Gusa yavuze ko ingamba zituma ibyo bigerwaho zitakwishobozwa na Leta gusa ahubwo ko hakenewe ubufatanye bw'inzego harimo imiryango mpuzamahanga ndetse no kutagira icyiciro gihezwa nk'uko mu Rwanda bimeze.

    Kugeza ubu mu Rwanda habarirwa urubyiruko rurenga ibihumbi 12 rukora ibikorwa by'ubuhinzi n'ubworozi rukoramo imishinga irenga 1,300. Ni mu gihe imibare ya gahunda y'igihugu ya kane yo kuvugurura ubuhinzi (PSTA 4) 2018-24 igaragaza ko ubuhinzi bugize kimwe cya gatatu cy'ubukungu bw'u Rwanda.

    Igaragaza kandi ko butanga hafi kimwe cya kabiri cy'ibicuruzwa byoherezwa mu mahanga, kandi butanga akazi ku bantu bajya kungana na bibiri bya gatatu by'abaturage bose bageze igihe cyo gukora.

    Rwigamba Eric yavuze ko ahazaza h'ubuhinzi hari mu biganza by'urubyiruko kandi bushobora gutanga umusanzu ukomeye mu kurwanya ubukene

    Aya marushanwa yari yitabiriwe n’abaturutse ku migabane itandukanye

    Source : http://igihe.com/amakuru/u-rwanda/article/ikoranabuhanga-ryagaragajwe-nk-inkingi-yafasha-mu-kongera-urubyiruko-rwitabira

  • Umuyobozi Mukuru wa Kaminuza ya UTB yitabye Imana – #rwanda #RwOT

    Kuri uyu wa kabiri, nibwo umuyobozi wa UTB wungirije ushinzwe amasomo yashyize hanze itangazo ry'uko uwari Umuyobozi Mukuru wayo yitabye Imana kuwa 10 Kamena 2024.

    Prof. Simon yakoze imirimo itandukanye, nk'aho yabaye Umuyobozi wungirije muri kaminuza y'ubuvuzi ya Fins muri Uganda, aba umushakashatsi n'inzobere mu gutegura imishinga.

    Yahuguye abashakashatsi n'abasesenguzi ndetse akora ubushakashatsi bwinshi mu nzego zitandukanye muri Siyansi mbonezamubano na politiki n'indi mirimo itandukanye.

    Uyu mugabo ukomoka mu gihugu cya Canada yitabye Imana amaze imyaka ibiri muri Kaminuza ya UTB yagiyemo mu mwaka wa 2022.

    Umuyobozi Mukuru wa Kaminuza ya UTB, Prof. Dr. Simon Wiehler, yitabye Imana

    Source : http://igihe.com/amakuru/u-rwanda/article/umuyobozi-mukuru-wa-kaminuza-ya-utb-yitabye-imana

  • Amakuru atunguranye ari kuvugwa muri APR FC mbere y’uko yesurana na Rayon Sports – YEGOB #rwanda #RwOT

    Amakuru mashya ari kuvugwa muri Nyamukandagiramukibuga aremeza ko yasinyishije umutoza mushya wo muri Serbia Darko Nović imyaka ibiri .

    Aya makuru yagiye hanze nyuma yuko iyi kipe yanditse kuri X ko abafana bakitegura kwakira umutoza mushya.

    Novic akaba afite imyaka 52, aho yatoje amakipe arimo ES Sétif, US Monastir n'Ikipe y'Igihugu ya Libya.

    APR FC ikaba iheruka gutandukana na Thierry Froger ku mpera z'umwaka w'imikino.

    Source : https://yegob.rw/amakuru-atunguranye-ari-kuvugwa-muri-apr-fc-mbere-yuko-yesurana-na-rayon-sports/

  • Ububiligi: Nkunduwimye( Bomboko) uherutse guhamwa n'ibyaha bya Jenoside yakatiwe imyaka 25 y'Igifungo #rwanda #RwOT

    Urukiko rwa rubanda (Cour d'Assises) rw'I Buruseli mu Bubiligi kuri uyu wa 10 Kamena 2024 rwahanishije Umunyarwanda Nkunduwimye Emmanuel uzwi ku izina rya Bomboko imyaka 25 y'igifungo nyuma yo kumuhamya ibyaha bya Jenoside yakorewe Abatutsi, Ibyaha byibasiye inyokomuntu hamwe n'ibyo gufata Abagore ku ngufu muri Jenoside.

    Nkuko byagiye bigenda mu minsi y'uru rubanza rwari rumaze amezi asaga abiri, Bomboko nta gihe na kimwe yigeze yemerera urukiko ko ibyo ashinjwa ari ukuri. Yakomeje avuga ko ari umwere, ko abeshyerwa, ko ahubwo yarokoye Abatutsi, ko kandi mu buzima bwe nta rwango yigeze abagirira.

    Nkunduwimye, yagiye yumvikana kenshi mu rukiko avuga ko ibyo ashinjwa ari ibinyoma, ko ahubwo nawe mu gihe cya Jenoside yashoboraga kwicwa bitewe n'uko yari afite umugore uvindimwe na Majyambere Silas wari warahunze igihugu mbere y'uko Jenoside yakorewe Abatutsi mu Rwanda iba.

    Uretse Bomboko wagiye agaragariza urukiko ko arengana, ko abeshyerwa ku byaha yashinjwaga, hari na bamwe mu bagaragaye mu rukiko barimo n'abo mu muryango we barubwiye ko yari umuntu mwiza.

    Mu guhanisha Bomboko igifungo cy'imyaka 25, Urukiko rwavuze ko impamvu ari uko ngo yitwaye neza mu myaka amaze muri iki Gihugu, ntabyo yangije. Rwavuze kandi ko ngo kubera imyaka afite nayo biri mu mpamvu zatumye agabanyirizwa.

    Nkunduwimye Emmanuel (Bomboko) w'Imyaka 65 y'amavuko ni Umunyarwanda ufite ubwenegihugu bw'Ububiligi ari naho atuye. Urubanza rwe rwatangiye kuburanishwa i Buruseli tariki ya 08 Mata 2024.

    Ubwo urukiko rwasomaga mu ruhame ibyaha rwahamije Bomboko, rwahise rutegeka Polisi guhita imuta muri yombi, bitandukanye na mbere ubwo yajyaga aza mu rukiko avuye iwe ndetse aherekejwe na benshi bo mu muryango we. Uwo munsi asomerwa ibyaha rumuhamije, abamuherekeje batashye bonyine asigara mu maboko atari aye.

    Uwo munsi kandi, Umunyamakuru Grace Ingabire woherejwe n'Umuryango w'Abanyamakuru baharanira Amahoro( Pax Press) gukurikirana iby'uru rubanza, yavuze ko mu bigaragara Bomboko nta gahunda yo gufatwa yiyumvagamo bitewe n'ukuntu yagaragaraga mu rukiko, uko yari yaje yambaye(umweru hejuru) bigaragara ko asa n'uwiteguye ko ari butsinde agataha, ibitaramuhiriye kuko yahise atabwa muri yombi.

    Bomboko, Ibyaha yahamijwe bivugwa ko yabikoreye mu mujyi wa Kigali ahazwi nko mu Gakinjiro. Mu gihe cya Jenoside na mbere yaho hari muri Segiteri Cyahafi. Byavuzwe mu rukiko ko ahari igaraje ryitwaga AMGAR ariho Abatutsi bicirwaga bakajugunywa mu byobo byari inyuma y'iryo garaje abandi bakahabicira.

    Munyaneza Théogène

    Source : https://www.intyoza.com/2024/06/11/ububiligi-nkunduwimye-bomboko-uherutse-guhamwa-nibyaha-bya-jenoside-yakatiwe-imyaka-25-yigifungo/

  • Amavubi yakubise Lesotho mu ngusho asubirana… – #rwanda #RwOT

    Ni mu mukino wo ku munsi wa 4 mu itsinda C wabaye kuri uyu wa Kabiri taliki ya 11 Kamena Saa Kumi n’ebyiri ubera kuri Moses Mabidha Stadium.

    Ikipe y’igihugu y’u Rwanda, Amavubi, yatangiye umukino ubona ihererekanya neza ndetse n’abakinnyi barimo Kwizera Jojea na Mugisha Gilbert bakagerageza kurekurira amashoti inyuma y’urubuga rw’amahina gusa imipira ikanyura hejuru y’izamu kure.

    Ku munota wa 13 Mugisha Gilbert yabonye uburyo bwashoboraga kuvamo igitego ku mupira yarabonye gusa awuhereje Nshuti Innocent birangira awutakaje.

    Ikipe y’igihugu ya Lesotho nayo yakomeje gukina icungura ku kubona imipira ngo iyirukankane. Ku munota wa 19 iyi kipe y’igihugu yabonye kufura nziza ku ikosa Manzi Thierry yarakoreye Sera Motebang ndetse nahabwa ikarita y’umuhondo maze iterwa na na Thabang Malane gusa ayita hejuru y’izamu kure cyane .

    Ikipe y’igihugu ya Lesotho yatangiye kubona amahirwe menshi imbere y’izamu ugereranyije b’Amavubi gusa ntibayabyaze umusaruro.

    Ku munota wa 43 ikipe y’igihugu y’u Rwanda, Amavubi yafunguye amazamu ku gitego cya Jojea Kwizera ahawe umupira na Fitina Ombolenga ku kazi keza Kari kamaze gukorwa na Bizimana Djihad.

    Igice cya mbere cyarangiye Amavubi ayoboye n’igitego 1-0. Mu gice cya kabiri umutoza w’kipe y’igihugu ya Lesotho,Leslie Notsi yaje akora impinduka mu kibuga akuramo Thabao Lesaonana na Tsepang Sefali hajyamo Tumelo Khutlang na Tlotliso Phatsisi.

    Lesotho yakomeje gukina ishaka uko yakwishyura ikabona uburyo imbere y’izamu gusa n’abakinnyi b’Amavubi barangajwe imbere na Nshuti Innocent bakabona amahirwe gusa ntibayabyaze umusaruro.

    Frank Spittler nawe yaje gukora impinduka mu kibuga akuramo Jojea Kwizera ashyiramo Samuel Gueulette.

    Ku munota wa 71 Amavubi yabonye kufura nziza yashoboraga kugira icyo ibyara ku ikosa Motlomelo Mkwanazi yarakoreye Imanishimwe Emmanuel Manguende gusa itewe na Muhire Kevin ntiyagira icyo itanga.

    Ku munota wa 78 ikipe y’igihugu ya Lesotho yashoboraga kubona igitego cyo kwishyura ku mupira waruvuye muri koroneri maze Rethabile arekura ishoti gusa Ntwari Fiacre aratabara arikuramo.

    Umukino warangiye Amavubi atsinze igitego 1-0 ahita yongera kuyobora itsinda n’amanota 7.

    Abakinnyi 11 b’Amavubi babanje mu kibuga 

    Abakinnyi b’Amavubi bishimira igitego cya Jojea Kwizera 

    Source : https://inyarwanda.com/inkuru/143930/amavubi-yakubise-lesotho-mu-ngusho-asubirana-ku-mwanya-wicyubahiro-143930.html

  • Uri amaraso yanjye! Ibikubiye mu ndirimbo Pla… – #rwanda #RwOT

    Iyi ndirimbo yagiye hanze ku mugoroba wo kuri uyu wa Gatatu tariki 11 Kamena 2024, bigaragara ko yanditswe bigizwemo uruhare na Ishimwe Karake Clement washinze Kina Music, ni mu gihe Yuhi yagize uruhare rukomeye mu ikorwa n'ifatwa ry'amashusho y'iyi ndirimbo.

    Platini yari amaze iminsi yifashisha imbuga nkoranyambaga ze, agaragaza ko iyi ndirimbo irenze igihangano, ahubwo ni impano yavuye ku mutima we. Yagaragaje ko Producer Davydenko, ari we muntu wa mbere bunguranye ibitekerezo ku ikorwa ry'iyi ndirimbo.

    Ni indirimbo ashyize hanze mu gihe aherutse gukora igitaramo gikomeye yise 'Baba Experience' cyabereye muri Kigali Conference and Exhition Village ahazwi nka Camp Kigali, muri Gashyantare 2024. 

    Iyi ndirimbo yanditse mu buryo bw'umubyeyi wishimiye uburyo umwana we agenda akura, ibyo amwifuriza, amuragiza Imana n'ibindi binyuranye.

    Platini abara inkuru y’umunezero yagize ubwo umwana we w’umuhungu yavukaga, akavuga ko akunda umwana we, kandi basa mu mico n’imyifatire.

    Ati 'Bari bakubwira ko dusa mu mico no mu myifatire? Turi bene Kanyarwanda, dore turangwa n'indero, ndagukunda cyane […] Mu marira no mu byishimo, nzaba mpari, ntumpamagara nzitabe […]

    Avuga ko akunda umwana we yaba ku manywa cyangwa se bwije. Yizeza umwana ko yaba mu marira n’ibyishimo azaba ari kumwe. Ati 'Isi ntizagushuke mwana wanjye uzahora undi mutima.'

    Platini avuga ko umwana we amwuzuza ibyishimo kandi ‘uri amaraso yanjye bujya ‘ akarenzaho ko amukunda. 

    Yavuze ko ahorana isengesho risabira umwana we kuzabaho amahoro, kandi amusaba kuzabana na bose amahoro. Ati “Uramenye uzirinde umugayo, uzagire neza wigendere, iyo neza uzayisanga imbere.”

    Mu mashusho y’iyi ndirimbo, Platini agaragara ari kumwe n’uyu mwana mu bihe bitandukanye, bakina igisoro, amufasha gusoma igitabo n’ibindi binyuranye biranga urukundo rw'umubyeyi ku mwana we. 

    Muri  Nyakanga 2021, nibwo Platini yibarutse imfura ye na Ingabire Olivia. Aba bombi bakoze ubukwe tariki 27 Werurwe 2021, mu birori byabereye kuri Landmark Hotel i Kagugu mu Mujyi wa Kigali. 

    Platini yigeze kuvuga ko yamenyanye na Olivia, bahuriye mu bukwe mu mwaka wa 2019.

    Platini yasohoye amashusho y'indirimbo yise 'Ku mutima' yakoreye umuhungu we

    Platini yifashishije imfura ye mu mashusho y'iyi ndirimbo, asaba Imana kuzamurinda

    Platini yavuze ko iyi ndirimbo irenze igihangano, ahubwo ni impano idasanzwe mu buzima bwe 


    Platini n’umugore we barushinze muri Werurwe 2021 mu birori byari binogeye ijisho

    KANDA HANO UREBE AMASHUSHO Y'INDIRIMBO 'KU MUTIMA' YA PLATINI

    “>

    Source : https://inyarwanda.com/inkuru/143929/uri-amaraso-yanjye-ibikubiye-mu-ndirimbo-platini-p-yakoreye-umuhungu-we-video-143929.html

  • Urwishigishiye ararusoma: Amaganya ya Habimana Hamada wa CNRD-FLN aragaragaza ubujyahabi bishoyemo #rwanda #RwOT

    Mu gusobanura impamvu bamaze imyaka 8 yuzuye mu mashyamba ya Kongo n'uBurundi batagera ku mugambi wabo wo guhirika ubutegetsi mu Rwanda no kugarira ingoma y'abajenosideri, 'Jenerali' Habimana Hamada utegeka inyeshyamba za CNRD-FLN, kuri uyu wa mbere yashyize ku mbuga nkoranyambaga ijambo ryuzuyemo kwiheba, kubera ubujyahabi bwo kubundabunda mu bihuru, batazi niba bari burenze umunsi.

    Habimana Hamada aterura avuga ko muri CNRD-FLN havutsemo udutsiko tw'amacakubiri(we yise 'utudumbidumbi') ngo dushingiye ku nda nini, irondakoko n'irondakarere.

    Ibyo rero ngo byaciye intege abarwanyi, abatarazize akagambane no gusubiranamo hagati yabo, ngo bagwa mu bitero byo guhungabanya umutekano mu Rwanda.

    Habimana Hamada kandi yahishuye ko hari bagenzi be bafashwe mpiri, ubu ngo bakaba bafungiye mu magereza hirya no hino.

    Gutakaza 'Morale' kandi nk'uko umukuru wabo yabivuze, ngo byatumye abatari bake bahoze mu nyeshyamba za CNRD-FLN bahitamo kwishyikiriza 'umwanzi'( aha ni u Rwanda yavugaga), abandi bata bagenzi babo mu bihuru, bahungira hirya no hino mu bihugu by'Afrika ndetse n'Uburayi. ' Jenerali' Hamada ati: 'Gutahiriza umugozi umwe kwacu biracyari kure nk'ukwezi'.

    Ikindi umukuru w'izi nkorabusa yagarutseho ni ugushimira ibihugu byabahaye byose ngo bagere ku ntego, ariko barinanirwa kubera kutagira impamvu barwanira, ubugwari n'amacakubiri.

    Nubwo ateruye ngo avuge amazina y'ibyo bihugu, abarwanyi n'abayobozi ba CNRD-FLN bafatiwe ku rugamba bivugiye ko uyu mutwe ukorera muri Kivu y'Amajyepfo muri Kongo, no mu Burundi, cyane cyane mu ishyamba rya Kibira, rihana imbibi n'u Rwanda.

    Twibutse ko uyu mutwe ugizwe n'abiyomoye kuri FDLR, maze muri Gicurasi 2016 wiyita CNRD- Ubwiyunge, uhita unayoborwa na Irategeka Wilson waje kwicwa mu mwaka wa 2020.

    Hari amakuru yavuze ko Wilson Irategeka yishwe n'ingabo za Kongo, ariko hakaba n'ayemeza ko ahubwo yaguye mu gico yatezwe na bagenzi be bo muri CNRD, bapfa imyanya, ibisabano n'ibisahurano.

    Aho uwo mutwe wihurije na MRCD ya Paul Rusesabagina, byahindutse CNRD-FLN, ubu ikaba itegekwa na Habimana Hamada.

    Nk'uko' Jenerali' Hamada abivuga rero, CNRD-FLN koko yahuye n'akaga gakomeye, cyane cyane ubwo abarwanyi n'abategetsi bayo bicwaga nk'udushwiriri, abandi amagana bagafatwa, barimo abavugizi bayo, Callixte Nsabimana''Sankara' na Cap. Herman Nsengimana.

    Aba bo kimwe na bagenzi babo benshi, bagize amahirwe yo kuba ubu batekanye mu Rwanda, aho gukomeza kubundabunda no gufumbira amashyamba ya Kongo n'u Burundi, babizi ko batazanagera ku mugambi wabo mubisha.

    The post Urwishigishiye ararusoma: Amaganya ya Habimana Hamada wa CNRD-FLN aragaragaza ubujyahabi bishoyemo appeared first on RUSHYASHYA.

    Source : https://rushyashya.net/urwishigishiye-ararusoma-amaganya-ya-habimana-hamada-wa-cnrd-fln-aragaragaza-ubujyahabi-bishoyemo/?utm_source=rss&utm_medium=rss&utm_campaign=urwishigishiye-ararusoma-amaganya-ya-habimana-hamada-wa-cnrd-fln-aragaragaza-ubujyahabi-bishoyemo

  • Kwizera Jojea yimanye u Rwanda, Amavubi yisubiza umwanya wa mbere (AMAFOTO) #rwanda #RwOT

    Igitego kimwe rukumbi cya Kwizera Jojea wakinaga umukino we wa kabiri mu ikipe ya kabiri, cyafashije Amavubi kweguakna intsinzi imbere ya Lesotho maze ihita yisubiza umwanya wa Mbere

    Amavubi yakinaga na Lesotho mu mukino w’umunsi wa 4 w’itsinda C mu gushaka itike y’igikombe cy’Isi cya 2026.

    Mu minota 15 ya mbere y’umukino wabonaga Amavubi arimo arusha Lesotho ariko nta mahirwe afatika bararema.

    Lesotho yaje kugaruka mu mukino irakina ndetse ishyira igitutu ku Mavubi ariko umunyezamu n’ubwugarizi bwari buyobowe na Mutsinzi Ange na Manzi Thierry babyitwaramo neza.

    Amavubi yaje kubona amahirwe ariko Nshuti Innocent umupira we bawukuramo, yakurikiwe n’umupira wa Kevin wanyuze inyuma y’izamu.

    Ku munota wa 45, Amavubi yazamutse neza, maze Djihad Bizimana acomekera umupira mwiza Omborenga Fitina warebye uko Kwizera Jojea yari ahagaze amushyirira ku kirenge na we ahita ashyira mu rushundura. Amakipe yagiye kuruhuka ari 1-0.

    Amavubi yatangiye neza igice cya kabiri n’ubundi isatira binyuze kuri Jojea Kwizera wari wagoye Lesotho.

    Ku munota wa 60, umutoza Frank Spittler yatunguranye akuramo Jojea Kwizera nubwo benshi babonaga arimo akina neza, yahise azanamo Samuel Gueulette.

    Muri iyi minota na Lesotho yageraje gusatira ariko ibura aho imenera kuko mu bwugarizi bari bahagaze neza.

    Ku munota wa 85, kubera imvune Mangwende yahaye umwanya Niyomugabo Claude.

    Umukino waje kurangira ari kimwe ku busa maze Amavubi yisubiza umwanya wa mbere.

    Nyuma yo gutsinda uyu mukino Amavubi yafashe umwanya wa mbere n’amanota 7 inganya na Afurika y’Epfo ya kabiri na Benin ya 3, Lesotho ya 4 ifite 5, Nigeria ifite 3, Zimbabwe 2.

    11 Lesotho yabanje mu kibuga

    11 Lesotho yabanje mu kibuga

    Omborenga Fitina yagize umukino mwiza

    Mugisha Gilbert yagerageje amahirwe atandukanye

    Muhire Kevin yagize umukino mwiza

    Jojea Kwizera watsinze igitego cya mbere cy’Amavubi

    Bishimira igitego cya Jojea Kwizera

    Source : http://isimbi.rw/siporo/article/kwizera-jojea-yimanye-u-rwanda-amavubi-yisubiza-umwanya-wa-mbere-amafoto