Category: Uncategorized

Urubuga rwa Youtube rwafunguwe ku wa 14 Gashyantare 2005 rushinzwe na Steve Chen, Chad Hurley, ndetse na Jawed Karim, abakozi batatu bari basanzwe bakorera ikigo PayPal.

Kuva icyo gihe, rwahaye ikaze Miliyari z'abantu, barwisanzuraho, amashusho akoze mu buhanzi bunyuranye aratambutswa. Nta washidikanya uruhare rwagize mu gutuma umuziki w'Isi yose wibumbira hamwe, abantu baranogerwa.

Mu rwego rwo gukuza imari-shingiro ya Youtube, uru rubuga rwashyizeho uburyo bwo kwishyura abantu barukoresha mu gihe bashyizeho ibintu bikishimirwa cyangwa se bikarebwa n'umubare munini.

Kubona 'Monitization/ Monetize' cyangwa se gutangira kwishyurwa ni ukuba ufite nibura abantu 1000 bakurikira ibikorwa byawe (Subscribers), kandi bareba n'ibizwi nka 'Watch-Time' (amasaha abantu bamara bareba ibikorwa byawe)- Ubundi, ifaranga rigatangira kwisukiranya umunsi ku munsi.

Uru rubuga rucuruza amashusho rwakuye benshi mu bwigunge, ubyutse mu gitondo afite micro na camera itabona neza ararwana no kubona ibyo ashyiraho ngo 'views' zizamuke amafaranga anyuzwe muri Banki Nkuru y'Igihugu amugereho.

Gushaka 'Views' kuri Youtube benshi babiherekeresha inkuru mpimbano, amafoto n'amashusho by'urukozasoni, imitwe y'inkuru itajyanye n'ibyo umuntu yavuze n'ibindi byinshi bikurura benshi babireba binuba ariko bakabireba.

Hari amwe mu mashusho akurwa kuri Youtube bitewe n'ibirego by'abantu, cyangwa se konti zigafungwa. Muri Mata 2021, urubuga rwa Youtube rwafunze konti ya Prophet TB Joshua wo muri Nigeria witabye Imana.

Ni nyuma y'uko arezwe n'Umuryango uharanira uburenganzira bwa muntu watanze amashusho (Video) agaragaza Joshua asenga agira ngo 'akize' abatinganyi (abaryamana bahuje ibitsina).

Guverinoma y'u Rwanda yashyize imbaraga cyane mu kwagura internet igera no mu bice by'icyaro. Minisiteri y’Ikoranabuhanga mw’Itumanaho na Inovasiyo ivuga ko abagerwagaho na murandasi mu Rwanda mu 2011 bari 7% gusa mu gihe mu 2019 bari bageze kuri 52%

Imibare y’iyi Minisiteri kandi igaragaza ko mu 2010 abari batunze telefone ngendanwa bari 33% gusa mu gihe mu 2019 barengaga 80.5%

Ibi byatumye abakoresha Youtube biyongera. Amazina yabo hanze aha arazwi, ku buryo yicara imbere ya Camera ya telefone, agasesengura abantu bagakurikira.

Abakoresha cyane Youtube ubazi nka 'Content Creators' no ku zindi mbuga nkoranyambaga iri zina rirakoreshwa.

Hari n'abandi ariko bagiye bakoresha uyu murongo bavuga ibitajyanye, nko kwamamaza ibikorwa by'urukozasoni, kwivanga muri Politiki n'ibindi bidashimwa na bamwe muri sosiyete. Ibi, ariko Youtube ntibikuraho, kugeza ubwo wowe ubangamiwe, ubandikira utanga ikirego, bagasuzuma.

Mbere iyo wabaga uri gukoresha urubuga rwa Youtube uri mu Rwanda wabonaga ibikorwa binyuranye byo kwamamaza bifata amasegonda make bigatambuka mu byo warimo ureba.

Urugero, uri kureba nka filime, ukabona hajemo 'Publicité' y'ikigo runaka. Uba ufite amahitamo abiri, kureka iyo 'Publicité' ikarangira cyangwa se guhitamo ko uyirenga (Skip).

Iyo warebaga icyo gikorwa cyo kwamamaza wabaga winjirije amafaranga uwo washyizeho ibihangano (umuhanzi, umukinnyi wa filime cyangwa se undi).

Ibi ariko siko bikimeze mu Rwanda. Biri mu mpamvu zituma, uzumva benshi mu bafite imiyoboro ya Youtube, batangira ibiganiro byabo basuhuza abantu batuye muri Leta Zunze Ubumwe za Amerika, Canada n'ahandi kubera ko iyo barebye ibintu byabo bibinjiriza amafaranga.   

Biri no mu mpamvu zituma shene za bamwe zitanditswe mu Rwanda, ndetse benshi mu bafite shene za Youtube, bashyiraho ibiganiro bagendeye ku masaha yo hanze.

Unyujije amasomo kuri shene zizwi cyane mu Rwanda, yaba iz'abahanzi, abakinnyi ba filime zanditswe muri Leta Zunze Ubumwe za Amerika, Kenya n'ahandi. Shene ya Israel Mbonyi yandikishijwe muri Canada, iya James na Daniella yandikishijwe muri Uganda, Christopher yayandikishije muri Amerika, Chriss Eazy yanditswe muri Leta Zunze Ubumwe za Amerika….

Icumbukura ryakozwe na InyaRwanda, ryerekana ko kuva muri Werurwe 2021, amatangazo (Ads) y'abamamaza yafunzwe kuri Youtube mu Rwanda.

Ibi ariko ntaho bihuriye no kuba Youtube idakorera mu Rwanda. Kubera ko iyo ukoresheje VPN (A virtual private network) ugahitamo igihugu ushaka, nk'u Burundi 'Ads' cyangwa amatangazo yamamaza urayabona kandi Youtube ntikorera mu Burundi.

Igikombo ku bahanzi bo mu Rwanda? Igikombo kuri RURA ikusanya imisoro

Umunyamakuru wa Isibo Tv, Niyigaba Clement uzwi nka DC Clement, uri mu bazwi cyane mu bakoresha urubuga rwa Youtube, yabwiye InyaRwanda ko igisubizo cy'iki kibazo kiri mu maboko y'Urwego rw’Igihugu rushinzwe kugenzura imikorere y’inzego zimwe z’imirimo ifitiye Igihugu akamaro (RURA).

Yavuze ko iki kibazo cyabateye igihombo gikomeye, kuko 60% by'abasura shene ye ari Abanyarwanda, kandi ntabyishyurirwa kubera 'Ads' zavanwemo.

Ati 'Byaduteje igihombo gikomeye! Nk'urugero mu bantu basura Youtube yanjye ya DC TV Rwanda, 60% yabo ni Abanyarwanda. Bivuze ko ninjiza Amafaranga ahwanye na 40% y’ayo nakagombye kwinjiza.'

Muhire William  washinze umuyoboro wa Youtube uzwi nka Chitta Magic, yabwiye InyaRwanda ko yatangiye gukoresha Youtube amatangazo yo kwamamaza agaragaramo, ariko igihe cyagerageza abona ko 'Ads' zavuyemo ariko ntiyacika intege.

Yavuze ko atazi neza impamvu yatumye iki kibazo ariko kandi byamuteye igikombo gikomeye. Ati 'Byateye igihombo gikomeye kubera y'uko 'content' dukora aho zirebwa hanini ku Isi ni mu Rwanda, ururimi rw'Ikinyarwanda ubarwayo rugera ku bantu benshi, ariko cyane cyane, mu gihugu cy'u Rwanda, umubare munini w'abatureba niho baherereye.'

William yavuze ko kugira ngo 'Ads' zigaruke mu bikorwa byabo, ariko uko habaho amasezerano hagati y'ubufatanye n'u Rwanda ndetse n'ubuyobozi bwa Youtube.

Ati 'Igikwiye gukorwa, ni uko habaho amasezerano y'ubufatanye hagati y'u Rwanda n'ikigo cya Google, ari nacyo gifite Youtube ndetse na 'AdSense' byakorera mu Rwanda, ndetse 'Ads' zigasubira muri 'Video' ibyo ngibyo bikaba bishobora kungukira aba 'Content-creators' ndetse n'igihugu kikungira(mo) muri iyo misoro'.

Yavuze ko abafite imiyoboro ya Youtube batanga imisoro muri Leta Zunze Ubumwe za Amerika, mu gihe yakabaye yinjira mu Rwanda.

Ati 'Urugero nk'ubu 'Content Creators' dutanga umusoro muri Leta Zunze Ubumwe za Amerika, aho amafaranga yinjiye muri 'content' tuba twakoze 'views' ziba zaturutse muri Amerika. Bivuze ko 'views' zaturutse mu Rwanda, uyu munsi nta n'ifaranga na rimwe ry'abanyarwanda rivamo buri kwezi.'

Akomeza ati 'Turamutse dufite iyo 'access' (ubwo burenganzira), 'content creators' bashobora kubyungukiramo ndetse n'igihugu kikabyungukiramo binyuze mu misoro binyuze no mu kungukira mu kuba 'content' dukora zihugura abantu, zibafasha kwidagadura, ikindi kandi amafaranga duhembwa ni nayo dukoresha hano mu Rwanda, bivuze ngo bigirira inyungu u Rwanda n'Abanyarwanda.'

Iradukunda Emile [Big Man] washinze Umuyoboro wa Youtube wa JB Rwanda, yavuze ko atigeze amenya impamvu ya nyayo 'Ads' zakuwe muri Youtube, ariko atekereza ko byatewe n'uko u Rwanda rudafitanye amasezerano na Youtube ndetse na Google.

Ati 'Kugeza ubu ntabwo ndamenya neza ikibazo cyabiteye gusa mu bivugwa nuko u Rwanda kugeza ubu nta mikoranire rufitanye na Youtube ndetse na Google.'

Big Man atekereza ko ikurwa rya 'Ads' muri Youtube rishobora kuba ryaratewe n'abantu bakoraga inkuru zikocamye.

Akomeza ati 'Ikindi kandi no kuba hari bamwe muri twe bakoreshaga nabi Youtube bakora inkuru mbi z'urukozasoni cyangwa zisebya Igihugu bishoboka kuba byaratumye 'Ads' zifungwa mu Rwanda.'

Yavuze ko ibi byabateye igihombo gikomeye, kuko amafaranga binjizaga yagabanutsemo 4 ugereranyije n'ayo binjizaga mbere.

Ati 'Igihombo byateye ni kinini cyane! Kuko bamwe muri twe batangiye guhomba. Kuko amafaranga dushora hari igihe kuyagaruza bigorana kandi umubare munini udukurikira ari Abanyarwanda batuye mu Rwanda. Ikindi, amafaranga twinjizaga urebye yagabanyutsemo nka 4 ugereranyije n’ayinjiraga mbere zikirimo.'

Uyu musore yagaragaje ko Guverinoma ikwiye kureba uko yagirana imikoranire na Youtube na Google 'Ads' zikagaruka, kandi igatanga umurongo ntarengwa w'ibyo bazajya batambutsa kuri iyi miyoboro yabo ya Youtube.

Ati 'Ni uko badufasha 'Ads' zikagarukamo ahubwo hakabaho umurogo ntarengwa ureba aba 'Content Creators' ku buryo ubirenzeho ahanwa ariko 'Publicity' zikagarukamo, kuko abenshi muri twe usanga shene zacu 60% zikurikirwa n'Abanyarwanda.'

Uwabihagaritse azi impamvu, kandi ari kudutegurira ibintu byiza;

Umukinnyi wa filime akaba n'umunyarwenya, Mugisha Emmanuel wamenye nka Clapton Kibonge, ari mu bafite ibihangano bitambutsa umunsi ku munsi ku rubuga rwa Youtube.

Uyu mugabo yamamaye muri filime zinyuranye zirimo nka 'Seburikoko', 'Umuturanyi' n'izindi. Mu kiganiro yagiranye na InyaRwanda, Clapton yavuze ko amafaranga twabonagamo 'ntabwo agishimishije'.

Avuga ariko ko abo hanze y'u Rwanda bareba ibikorwa byo mu Rwanda 'nibo badutunze'. Yavuze ko guhagarika 'Ads' muri Youtube mu Rwanda, byatumye hari abakora filime, bakazimurika ariko ntibemere ko zerekanwa mu Rwanda kubera ko nta nyungu babonamo.

Ati 'Twebwe impamvu tuzifungura abantu bakazireba, mu by'ukuri nta nyungu mbona ku muntu uri mu Rwanda iyo arebye ibihangano byanjye. Inyungu mbona, ni inyungu iri inyuma yo kuyireba, ni ugukora abantu bakambona, iya kabiri hari abantu mbasha kwamamariza kubera ko bambona.'

Clapton yumvikanishije ko mu rwego rwo kwishakamo ibisubizo, yatangiye imikoranire n'abantu banyuranye, ku buryo bamamaza ibikorwa bye binyuze muri filime, mu rwego rwo kwirinda igihombo baterwa no kuba 'Ads' zitagaragara mu bihangano byabo.

Ati 'Ubwo nyine nkaba mbona ayo kwishyura abakinnyi […] Ibyo byabayeho ariko ntibyaduciye intege. Ni igihombo gikomeye cyane, ariko twabonye biba, kandi sinzi aho byaturutse, twabonye biba, birashoboka ko ari imikoranire ya Youtube na Guverinoma. Ntekereza ko ababishinzwe bazabikurikirana, kuko barabizi…'

Umukinnyi wa filime Benimana Ramadhan wamamaye nka Bamenya, aherutse kubwira Isango Star ko yatangiye kunyuza ibikorwa bye kuri Youtube mu mafaranga yakira harimo n'ay'Abanyarwanda barebye ibikorwa bye bari mu Rwanda.

Yavuze ko atazi neza ikibazo cyabayeho, kuko buri wese afite uko abivuga. Ati 'Ni ikibazo koko! Nonese niba mukora, igihugu kikaba cyarabakuriyeho mu kuba mwakwinjiza amafaranga, niba ari igihugu cyabikuyeho, niba ari Youtube, sindasobanukirwa neza.'

'Bamenya' yavuze ko inzego zifite aho zihuriye n'ikoranabuhanga ari zo zatanga umucyo kuri iki kibazo. Ati 'Byabayeho, kuko ngitangira 'Bamenya' byariho.  Njyewe kuba mwandeba mwese, muri mu Rwanda nta n'igice cy'atanu ninjiza.'

Uyu musore yavuze ko 83% by'abakurikira filime ye ari Abanyarwanda, bivuze ko amafaranga yinjiza ava muri 17% y'aba-Diaspora baba mu bihugu bitandukanye.

Umunyamabanga wa Leta muri Minisiteri y'Urubyiruko ndetse n'Iterambere ry'Ubuhanzi, Sandrine Umutoni aherutse kuvuga ko umuhanzi wese ushyira ibihangano ku mbuga nkoranyambaga akwiye kungukirwa nabyo.

Yabitangaje ku wa 12 Gashyantare 2024, ubwo yari mu kiganiro n'itangazamakuru ku iserukiramuco 'Kigali Triennial 2024'. Ati 'Twebwe nka Minisiteri turimo turagaragaza ko ibintu byose bijyanye n'ubuhanzi bishobora guteza imbere ubukungu bw'Igihugu […]'    

Umutoni Sandrine yavuze ko Guverinoma idafitanye amasezerano n'imbuga zicuruza ibihangano, ku buryo uwagira icyo ashyira hanze yakungukirwa nacyo.

Ariko avuga ko hari gutekerezwa uko byahabwa umurongo. Ati 'Ubu ukuntu tumeze mu Rwanda ntabwo turagira amasezerano n'izo 'Platform' za Youtube, Universal, Spotify, n'izindi zizaza […] Ni ukuvuga niba umuntu ashyize ikintu kuri Youtube, ese ko mu bindi bihugu umuntu yungukaho amafaranga, twebwe byasaba iki ngo umunyarwanda ushyizeho 'Content' kuri Youtube cyangwa ushatse gushyira igikorwa cye cyangwa indirimbo ye kuri Spotify ni gute azakomeza kwinjiza amafaranga…'

Umunyamabanga wa Leta muri Minisiteri y'Urubyiruko ndetse n'Iterambere ry'Ubuhanzi, Sandrine Umutoni yatangaje ko Guverinoma iri mu nzira yo kugirana amasezerano n'imbuga zicucurizwaho ibihangano

Amategeko agenzura imbuga nkoranyambaga mu Rwanda arakenewe

Mu kiganiro cy'Abanyarwanda baba mu mahanga cyari mu rwego rwo Kwibuka ku nshuro ya 3  Jenoside yakorewe Abatutsi, cyabereye kuri Televiziyo Rwanda, ku Cyumweru tariki 06 Kamena 2021, Minisitiri w’Ububanyi n’Amahanga n’Ubutwererane w’u Rwanda, Dr. Vincent Biruta, yavuze ko itumanaho ryashoboje buri wese kugira ibyo atangaza ntawe ubanje kureba 'niba bikwiye cyangwa byubahirije amategeko'.

Avuga ko imbuga nkoranyambaga zirimo na Youtube, abantu bazikoresha bavuga ibyo bashaka, bigateza ikibazo kuko nta mategeko ahamye abigenga, ashobora kwifashishwa mu kugenzura ibinyuzwaho.

Yavuze ko abashyira amafuti kuri Youtube ari nabo bagira umubare munini w'abafatabugizi babikurikirana umunsi ku munsi.

Ati '…Kandi rero ikindi kibazo kizana nabyo muzarebe abashyira amafuti kuri za Youtube ni nabo bagira ababakurikirana benshi. Usanga aribo bakurikirwa na benshi. Byaba ari ibitutsi, byaba ari ibitavugwa mu ruhame…usanga aribo bakurura abantu benshi.'

Yavuze ko bazakorana n'inzego zitandukanye kugira ngo hashakishwe uko hajyaho amategeko agenderwaho n'imirongo migari mu guhana abakoresha nabi imbuga nkoranyambaga zirimo na Youtube.

Akomeza ati '…Ni ukuzakomeza gukorana n'abandi kugira ngo dushake uburyo hajyamo amategeko agenderwaho, imirongo ntarengwa, ibyemezo bishobora gufatirwa ababikoresha nabi, murabona no kuri za Twitter muri iki gihe bagenda bagerageza ngo uyu nguyu yarengereye, bakamuhagarika igihe kingana iki, ariko ntabwo ari amategeko ariho azwi agenderwaho mu buryo mpuzamahanga.'

 

Umunyamakuru DC Clement yavuze ko RURA ariyo ishobora kubafasha kugirango ‘Ads’ zigarurwe muri Youtube, agaragaza ko yinjiza amafaranga angana 40% gusa, kuko 60% ari abanyarwanda bareba ibyo atambutsa

Muhire William washinze Chitta Magic, yasabye ko Guverinoma igirana imikoranire na Google ndetse na Youtube

Iradukunda Emile [Big man] atekereza ko inkuru mbi zagiye zikorwa zishobora kuba ariyo mvano yo kuba ‘Ads’ zarakuwe ku bareba Youtube mu Rwanda

Clapton Kibonge yavuze ko bakomeje guhanyanyaza kubera ko barebye inyungu bakura muri filime kurusha amafaranga atangwa na Youtube buri kwezi

Umukinnyi wa filime wamamaye nka ‘Bamenya’ yatangaje ko yinjiza 17% buri kwezi, bitewe nuko 83% by’abareba ibikorwa bye ari abo mu Rwanda

Ibyo birori byabereye muri Onomo Hotel aho byitabiriwe n'abafatanyabikorwa batandukanye basanzwe bakorana na Q-sourcing Servtec.

Iki kigo cyashinzwe mu 2009 gifite intumbero yagutse yo gukemura ikibazo cy'abakozi muri Afurika y'Iburasirazuba.

Kuri ubu Q-Sourcing Servtec Rwanda imaze kwaguka mu nzego zitandukanye zirimo gushyira abakozi ku isoko ry'umurimo, gutanga ubujyanama mu bijyanye n'imicungire yabo no kuzamura impano.

Kugeza ubu iki kigo kimaze kugeza ibikorwa byacyo mu bihugu bitandukanye birimo Uganda, Kenya, Tanzania, Sudani y'Epfo n'u Rwanda.

Umuyobozi Mukuru wa Q-Sourcing Servetec Group, Patrick Mbonye, yagaragaje ko bishimira imyaka 15 bamaze bakorera mu Rwanda kandi ko byahinduye byinshi ku iterambere ry'ikigo muri rusange.

Yakomeje ati 'Imyaka 15 ni urugendo ruhamya isezerano ku bakozi bacu n'abakiliya batwizeye. Twabonye byinshi bihinduka mu mitangire y'akazi, bihindura imirimo itandukanye kandi tugira uruhare mu iterambere ry'abatugana. Guha abatugana ibyo bifuza muri iyo myaka yose bigaragaza intangiriro nziza y'urugendo rw'imicungire y'abakozi.'

Mu myaka 15 iki kigo kimaze gikora ntabwo cyatanze amahirwe y'akazi gusa ahubwo cyagize n'uruhare mu bikorwa by'iterambere ry'imibereho myiza y'abaturage.

Ubwo hizihizwaga isabukuru y'imyaka 15, Q-Sourcing Servtec Rwanda yatangije umushinga ugambije gufasha abantu kwitegura guhangana ku isoko ry'umurimo wiswe 'Job Ready Initiative'.

Uwo mushinga uzashyirwa mu bikorwa ku bufatanye n'Ikigo cya Intango Technical Secondary School aho ugamije gufasha abanyeshuri barangije mu mashuri yisumbuye n'amashuri makuru kwitegura guhangana ku isoko ry'umurimo.

Umuyobozi muri Q-Sourcing Servtec Rwanda, Steven Kinuka Baguma, yagaragaje ko n'ubwo banyuze muri byinshi birimo n'imbogamizi ariko babashije gukomeza gutanga serivisi ntagereranwa.

Ati 'Mu gihe twizihiza imyaka 15 y'isabukuru, tuzirikana uko twakomeje gutanga serivisi ntamakemwa. Twahuye na zimwe mu mbogamizi ariko twakomeje gutanga serivisi nziza mu mitangire y'akazi n'imicungire y'abakozi ndetse byagize impinduka nziza ku bo dukorana.'

Umuyobozi Ushinzwe ingamba n'Itumanaho mu Rwego rw'Igihugu rw'Iterambere RDB, Setti Solomon, yashimye uruhare rwa Q-Sourcing Servtec Rwanda ku musanzu wayo ku Rwanda.

Yagize ati 'Uruhare rwa Q-Sourcing Servtec Rwanda mu guhanga imirimo no guharanira ko habaho imikorere inoze byabaye ingenzi mu kubakira ubushobozi ibihumbi by'urubyiruko rw'u Rwanda.

Binyuze mu mbaraga zabo bagize uruhare mu gutuma u Rwanda ruba igihugu cyiza cyo gushoramo imari mu karere.'

Mu gihe Q-Sourcing Servtec Rwanda yizihiza isabukuru y'imyaka 15 imaze ikorera mu Gihugu, ifite intego zo gukomeza urugendo rwo kuba indashyikirwa, guhanga udushya, no gutuma habaho impinduka zigaragara muri sosiyete.

Umuyobozi wa OneSight EssilorLuxottica Foundation mu Rwanda, Vincent Tuzinde, yagaragaje ko bamaze imyaka umunani bakorana n'iki kigo kandi ko cyabafashije kwisanga ku isoko ry'u Rwanda, kubona abakozi beza n'izindi serivisi zijyanye n'imicungire y'abakozi.

Q-Sourcing Servtec Rwanda yashimangiye ko izakomeza kuba ikiraro gihuza abantu bafite impano n'amahirwe y'akazi mu Rwanda no mu mahanga.

Urugendo rwa Q-Sourcing rwatangiye mu 2006, hamwe n'icyerekezo cyo kuziba icyuho hagati y'impano n'amahirwe muri Afurika y'Uburasirazuba.

Iki kigo cyatangiriye muri Uganda mu 2006, kigera mu Rwanda mu 2009, Sudani y'Epfo mu 2011, na Kenya mu 2013.

Muri 2017, cyatangije ishami ry'amahugurwa ryitwa 'The Assessment and Skilling Centre [TASC], nyuma kigeza ibikorwa byacyo muri Tanzania.

Hamwe n'iryo terambere Q-Sourcing yaje kwihuza na Servtec International Group, kugira ngo ibikorwa byayo binagezwe hanze ya Afurika y'Uburasirazuba bigere kure ku Isi.

Mu 2024, iki kigo cyakoze ishoramari rikomeye muri 'Flip Africa', intambwe yacynjije mu murongo wo guhanga isoko rishya. Icyatangiye nk'ikigo ngishwanama cyoroheje cyateye imbere bigaragara, bitewe n'ubwitange bw'abakozi n'icyizere kiva mu bakiliya bacyo.

---

Mu bworozi u Rwanda rwifuza ntibikigezweho gutemera inka urubingo gusa, ukarenzaho umucaca wabona amabondo yegutse ukicinya icyara ngo wagabuye, nyamara wabaye nka wa mubyeyi ugabura ibijumba gusa mu minsi mike umwana akaba yageze mu mutuku w'imirire mibi.

Nubwo bivangwa n'ibindi ariko kugeza ku kigero cya 70% Soya n'ibigori ni byo bigize igaburo ryuzuye ry'amatungo kuva ku nkoko kugera ku nka.

Mu 2015 ni bwo ikigo gitunganya ibiryo by'amatungo cyitwa Gorilla Feeds cyatangiye gukora ibyo biryo byuje intungamubiri cyane ko ubworozi bugezweho bwari butangiye gufata indi ntera, gifite imashini nto itunganya toni eshanu mu isaha.

Mu 2019 u Rwanda rwifatanyije n'Ikigo cy'Ababiligi cyita ku Iterambere kizwi nka Enabel, batangiza umushinga wiswe PRISM wo gufasha mu guteza imbere uruherekane nyongeragaciro rw'amatungo magufi n'ibiyatunga.

Muri uyu mushinga watangizanyijwe miliyoni 15,5 z'Amayero (miliyari 22 Frw y'ubu), wagombaga kwita ku bworozi bw'inkoko, ingurube, ariko ugashingira ku gushyigikira abari muri ubwo bucuruzi.

Bijyanye n'uko ubu bworozi bwari bukomeje kwitabirwa byabaye ngombwa ko ibiryo by'ayo matungo bikenerwa cyane ndetse rimwe na rimwe ibiciro byabyo bikazamuka kuko ibyinshi byatumizwaga hanze.

Mu gukemura icyo kibazo PRISM yafashije inganda zibitunganya ngo zitunganye umusaruro utubutse ugererere ku borozi ku gihe ariko bakanabona ibyujuje ubuziranenge.

Ni na ko byagenze kuri Gorilla Feeds yahawe na Enabel ibihumbi 600 by'Amayero, bakazishyura ½ cy'iyo nguzanyo ndetse na yo ikazafasha abandi.

Hatangiye imirimo yo kwagura uru ruganda ndetse rwimukira mu cyanya cy'inganda kiri i Masoro ruvuye i Rubilizi mu Karere ka Kicukiro.

Abayobozi barwo bafashe amafaranga bari bafite bongeranyaho n'aya Enabel bubaka uruganda rwuzuye rutwaye miliyoni 2,7$ (arenga miliyari 3,5 Frw)

Ibi birumvikana ko n'ingano yagombaga kwikuba kuko ubu ruzakuba gatatu ibiryo rwatunganyaga bikagera kuri toni 15 ku isaha.

Ni toni z'imvange z'ibiribwa bikunze kuboneka nk'ingano, ibigori, soya, ibihwagari mbese ubwoko bugera kuri 20, ibigori na soya bikiharira 70% ari na byo biboneka mu Rwanda cyane.

Uru ruganda ni na ko rugurira umusaruro abaturage kuko uyu munsi rukorana n'amakoperative ahinga ibigori na soya agera ku 130 yo mu gihugu hose.

Umuyobozi wa Gorilla Feeds, Kivuye Janvier ati 'Impamvu yatumye twongera ubushobozi ni uko abashaka ibiryo by'amatungo bakomeje kuba benshi, uwasabye nka toni imwe tukamubwira ko aba atwaye ibilo nka 200 gusa.'

Kivuye avuga iyi mashini nshya, izafasha abo bakenera ibyo biryo kubona ibyo bashaka binakureho ibihombo bagiraga mbere 'kuko niba umuntu yazanaga imodoka azi ko atwara toni imwe akabona ibilo nka 200, ni igihombo mu bijyanye n'ubwikorezi.'

Gorilla Feeds yanubatse ibigega bibiri binini bifasha kuhunika toni 3000 z'ibigori na soya ku bigega byombi.

Ni uruganda rwifashisha ikoranabuhanga rigezweho, aho ikamyo izana imyaka, ikayisuka mu mashini iyirobanura hakavamo imyanda.

Nyuma bimwe bikayoborwa mu bubiko mu bushyuhe bwagenwe ibindi bikayoborwa mu mashini ibitunganya bikorewe munsi y'ubutaka.

Munsi y'ubutaka nko muri metero 45 z'ubujyakuzimu harimo imiyoboro igaburira imashini na bwa bubiko bunini byose bigakorwa kugira ngo hakorwe byinshi ariko bitwaye ahantu hato.

Kivuye yerekana ko uru ruganda rwazanye impinduka nyinshi kuko umworozi abona ibiryo bitakayutse 'kuko ibyavaga hanze byazaga byenda no kurangiza igihe byagenewe kuba bitarakoreshwa.'

Ati 'Ugasanga no ku mipaka biratinze ariko umworozi ubu atumiza ibiryo mu masaha abiri akaba abibonye. Ikindi ni ubuziranenge bwuzuye bw'ibiryo kurusha ibyazaga. Ubu ugura ibiryo ukamenya uko amatungo yawe azatanga umusaruro bitari ibyo kuraguza umutwe.'

Abishimangiza ko niba umworozi yakoreshaga ibiryo biri aho bitujuje ubuziranenge bikamusaba ko itungo nk'inkoko itangira kumuha umusaruro mu minsi 60, uyu munsi 'ikaba 28, urumva inyungu ibonekeye mu minsi waboneyeho umusaruro.'

Uru ruganda rukora ibiryo by'amatungo atandukanye haba inkoko, inka, ingurube n'andi.

Na byo bikorwa mu byiciro kuko nko ku nkoko hari iby'imishwi ikivuka, iy'iminsi 21, inkoko y'amezi abiri, ane, atanu n'atandatu gusubiza hejuru.

Icyakora impuzandengo y'ibyo biryo iri hagati ya 550 Frw na 580 Frw ku kilo, Kivuye akavuga uyu munsi uru ruganda ruhamye ndetse mu mezi ari imbere bateganya no kwagura bakagera byibuze kuri toni 30 Frw ku isaha.

Ni na ko bizagenda mu gutanga akazi kuko uyu munsi abakozi 60 bakoreshaga baziyongera bakagera byibuze kuri 140 bose b'Abanyarwanda.

Ku bijyanye no kubura kw'ibiryo by'amatungo Kivuye yijeje ko bitazabaho kuko uretse ziriya toni 3000 z'ibigori na soya bibikwa muri biriya bigega, hari n'ubundi bubiko bugera kuri toni 8000 buhoraho byibuze bushobora kumara amezi ane nta musaruro uza.

---

PRISM ni umushinga watangijwe mu 2019 na Guverinoma yafatanyijemo n'Ikigo cy'u Bubiligi gishinzwe Iterambere, Enabel ari na cyo cyawuteye inkunga ya miliyoni 15,5 z'Amayero, ugomba kumara imyaka itanu.

Wakorewe mu turere 10 turimo Rwamagana, Bugesera, Gicumbi, Musanze, Rubavu, Rusizi, Gisagara, Muhanga, Nyamagabe na Rulindo.

Hakozwe ibikorwa bitandukanye bijyanye no guteza imbere uruhererekane nyongeragaciro rw'ubworozi bw'ayo matungo kuva ku biryo arya, kuvuzwa, guterwa intanga n'ibindi.

Ikibazo cy'ibiryo by'amatungo cyari cyarabaye agatereranzamba ni cyo cyahereweho kuko soya n'ibigori ari byo bigize 70% by'ibiba bigize indyo yuzuye y'amatungo, habanje guhugurwa abahinzi b'ibyo bihingwa kugira ngo bibanze biboneke.

Nko mu 2021 aba bahinzi batangira guhugurwa u Rwanda rwari rugeze kuri toni 1,7 kuri hegitari yahinzweho ibigori, uyu munsi bikaba bigeze kuri toni 3,2 kuri hegitari.

Ni mu gihe kuri soya bwo yavuye ku bilo 600 kuri hegitari, uyu umusaruro ugera kuri toni 1,3 mu turere twakorerwagamo.

Ibyo byajyanye no kubaka ibigega bitanu bihunikwamo toni ibihumbi 10 by'umusaruro w'ibigori, bikozwe na Enabel mu nkunga yateyemo leta, kugira ngo umusaruro uhunikwa ufashwe mu bihe by'ibibazo.

Umuyobozi Mukuru Wungirije muri MINAGRI Ushinzwe Iterambere ry'Ubworozi mu Kigo gishinzwe Iterambere ry'Ubuhinzi n'Ubworozi, RAB, Dr Solange Uwituze yavuze ko uyu munsi bari kuganira na Enabel ngo barebe ko bafatanya no kubaka ibigega bya soya.

Ati 'Ibi bigega by'ibigori byatumye mu Karere ka Nyagatare honyine guhunika umusaruro byiyongera aho byavuye kuri toni 8000 z'ibigori bigera kuri toni ibihumbi 18. Turi kuganira na Enabel ngo turebe ko n'ibigega bya soya byakubakwa.'

Uyu mushinga kandi wari ugamije kuzamura umusaruro w'inkoko n'ingurube aho aborozi bato bahuguwe. Aborozi 205 b'inkoko na bo bahuguye abagera ku 12.300.

Hahuguwe kandi abantu 95 ku bworozi bw'ingurube na bo bahugura abandi 5700.

Dr Uwituze ati 'Uyu munsi akabenzi kabaye akabenzi. Kurya ingurube ntibikiri igisebo ndetse no kurya inkoko n'amagi yazo ntabwo bikiri iby'abakire.'

Guhugura aborozi byajyanye no gutegura abavuzi b'amatungo hahugurwa abagera kuri 60 bahabwa n'uburyo bw'imikorere nka za moto n'ibikoresho by'ibanze bifasha kuvura ayo matungo.

Ibi byatumye abaturage bajya kuvuza amatungo yabo bava kuri 564 bagera ku 8774 muri utwo turere PRISM ikoreramo.

Uyu musaruro wakomeje gutera imbere aho umuvuzi w'amatungo yavuze ku matungo 23 yasuzumaga mu cyumweru agera kuri 58, impuzandengo y'ingurube zapfaga iva kuri 7,5% igera kuri 5,8% mu gihe ku nkoko imibare yavuye ku 9,4% igera kuri 7,4%.

Muri icyo gihe kandi amatungo yabazwe ngo avurwe yavuye ku 23.759 agera ku 285.128, igiciro abavuzi b'amatungo bacaga kigabanyukaho 32%.

Aba bavuzi b'amatungo kandi na bo babyungukiyemo kuko ibyo bikorwa byatumye bihangira imirimo yinjiza hagati y'ibihumbi 350 Frw na 1.444.992 ku kwezi.

Mu guhangana n'ikibazo cy'ibura z'intanga z'ingurube zigezweho, muri uyu mushinga hubatswe ibigo birindwi mu gihugu cyose bitera intanga z'ingurube.

Havuyemo icya leta gitera intanga cy'i Muhanga, ibindi byose ni iby'abikorera.

Mu gushimangira icyo gikorwa haguzwe amasekurume y'ingurube 32 n'iz'ingore 20 zigezweho kugira ngo hatangwe intanga z'ingube zimeze neza.

Dr Uwituze ati “Intanga z'ingurube zitandukanye n'iz'inka. [Iz'ingurube] zibikika kuri dogere 17oC ariko zikamara igihe gito kigera ku minsi irindwi gusa. Twashatse uburyo twazibona tukanazigeza aho zisabwa vuba ari yo mpamvu twasinyanye amasezerano na Zipline mu gukoresha drones muri icyo gikorwa.”

Ibyo bigo ubu bitanga doze z'intanga 1120 ku cyumweru ndetse mu mpera za 2023 hakozwe doze 21.247 mu gihe izingana n'ibihumbi 13.750 zagejejwe ku borozi hifashishijwe drone za Zipline, umuturage akazihabwa nta mafaranga yishyuye.

Ikoranabuhanga ryo gutera intanga ryafashije mu kubyaza utugurube twinshi aho nko kuva mu 2021 ingurube 19.860 zatewe intanga habyagurwa utugurube 158.880 tw'icyororo kigezweho zifite amaraso meza.

Muri uyu mushinga kandi abatekinisiye 365 bahuguwe ku bijyanye n'uko batera intanga hifashishikwe ikoranabuhanga rya AI (Artificial Insemination) ku buryo bashobora gutera izingana na 18.250 buri kwezi.

Ibigo 10 by'abikorera birimo bine byorora inkoko, bibiri byorora ingurube na bine bikora ibiryo by'amatungo byafashijwe kubona ibikoresho by'ikoranabuhanga bibafasha.

Abandi bantu 399 barimo abagabo 310 n'abagore 89, bahawe inguzanyo ya miliyari 10,38 Frw yunganiwe ku nyungu ya 8%, inyungu bagombaga kwishyura banki bishyurirwa miliyari 2,1 Frw.

Ni amafaranga yunganiye imishinga 193 y'ubworozi bw'ingurube, 192 y'ubw'inkoko na 14 y'imishinga itunganya ibiryo by'amatungo.

Uyu mushinga wakoze mu nguni zose aho wanigishije aborozi n'abandi ba rwiyemeza mirimo gushaka ibisubizo bya kabiri mu gihe ibya birimo nko korora amasazi y'inigwahabiri akunganirana na soya n'ibigori kubera intungamubiri nyinshi afite, bigatuma n'igiciro cy'ibiryo by'amatungo kigabanyuka.

---

Mu butumwa Diane yanyujije ku rubuga nkoranyambaga rwa X kuri uyu wa 11 Kamena 2024, yagize ati 'Ibyo umubyeyi wacu atangaza mu biganiro ni ibitekerezo bye bwite. Yaba njye, cyangwa basaza banjye, ntaho duhuriye na byo.'

Ni nyuma y'aho Adeline uvuga ko atari mu Rwanda muri iyi minsi, atangarije kuri umwe mu miyoboro ya YouTube y'abarwanya Leta y'u Rwanda inkuru y'urupfu rw'umugabo we, Assinapol, yo mu 2015.

Polisi y'u Rwanda yasobanuye ko imodoka ya Mercedes Benz yarimo Assinapol yagonzwe n'ikamyo i Gacuriro mu Karere ka Gasabo, mu ijoro rya tariki ya 3 rishyira iya 4 Gashyantare 2015, gusa Adeline muri iki kiganiro yatangaje ko yiboneye ko ibimenyetso bigaragaza ko yishwe na Leta.

Yagize ati “Ku itariki ya 4/2/2015 ni ho bishe umutware wanjye Rwigara Assinapol, yicirwa mu maso yanjye n'uyu mwana wanjye Anne Rwigara Uwamahoro, yicwa n'ubutegetsi buriho bwa FPR Inkotanyi. Icyo kizahora kivugwa iteka ryose kuko ni ibyo nahagazeho.'

Adeline yatangaje ko umukobwa we, Anne Rwigara, wapfiriye muri Leta Zunze Ubumwe za Amerika mu Ukuboza 2023, yari afite amakuru menshi ku rupfu rwa se.

Icyakora benshi bakomeje kwibaza ibijyanye n'uku gusubiranamo hagati y'uyu muryango, ubusanzwe wahoze ugaragaza guhuza ku ngingo zitandukanye.

Icyo kwibaza ni ukumenya impamvu abantu bakwizera amagambo ya Adeline Rwigara mu gihe n'abana be ubwabo batamwizera. Niba avuga ibyo umuryango we wamagana, ni gute atekereza ko abandi Banyarwanda bamwizera?

Ikindi kiri kwibazwa ni ukumenya niba uyu mubyeyi atarimo gukoresha urupfu rw'umugabo we mu nyungu ze bwite. Ibi bishingira kuri iki nyine cy'uko avuga ibihuha by'amakuru y'umugabo we, wenda ibi bihuha bikaba bifite intego yo kumufasha kugera ku zindi nyungu, dore ko yivugiye ko atakiba mu Rwanda.

Nubwo tutabihamya, ariko nanone twagiye tubona abantu benshi bahitamo kubeshya kugira ngo babone ibyangombwa byo gutura mu bihugu by'u Burayi, rimwe na rimwe ugasanga babibonye kubera ayo makuru atari yo batanze.

Uretse kubona ibyangombwa, kubeshyera u Rwanda bitunze benshi badakora iyo mu Burayi, ari nayo mpamvu tutatungurwa mu gihe n'uyu mubyeyi yaba agamije kwerekana ko yarenganye, akifuza kugirirwa impuhwe n'abazungu bakamutunga yiyicariye, kabone nubwo byasaba kubeshyera igihugu cye.

Gusa ikidashidikanywaho ni uko ubuziranenge bw'amakuru yatanze bukemangwa, kuko iyo buza kuba ari ukuri, abana be bari gufata iya mbere mu kumushyigikira.

---

Ndagijimana Eric uzwi nka X Dealer wari wasabiwe n’Ubushinjacyaha gufungwa imyaka ibiri kubera ikirego yarezwemo na The Ben kubera kumwiba telefoni, yagizwe umwere.

Mu gitondo cyo kuri uyu wa Gatatu tariki 12 Kamena 2024, ni bwo umucamanza yasomye imyanzuro y’uru rubanza rwo X Dealer yaburanaga nyuma yo kuregwa na The Ben wamushinjaga kumwiba telefoni.

Ni urubanza rwatangiye tariki ya 5 Ukwakira 2023 aho ari urubanza rushamikiye ku bitaramo The Ben yakoreye i Bujumbura mu mpera za 2023.

Muri ibyo bitaramo byabereye i Burundi, The Ben yabuze telefone ye yo mu bwoko bwa iPhone. Ubushinjacyaha bwagaragaje ko iyo telefone yibwe na X Dealer waburanye ahakana ibyo aregwa.

Mu iburana, X Dealer yavuze ko atumva uko yari bubikore nyamara hari hari abashinzwe umutekano w’uyu muhanzi, agasaba ko hakwitabazwa camera z’umutekano.

Yavuze kandi ko ntaho yari bunyure Uwicyeza Pamella wari waherekeje umugabo we The Ben.

Nyuma yo kubisesengura byose, Urukiko rwasanze nta bimenyetso bifatika ubushinjacyaha bwatanze, birangira X Dealer agizwe umwere. Urukiko rwatangaje ko hagize uwifuza kujujurira iki cyemezo afite iminsi 30.

APR FC yaciye amarenga ko yamaze gutandukana na myugariro Omborenga Fitina, ni nyuma y’uko yaje gusiba amafoto ye kuri Instagram bari bashyizeho bishimira uruhare abakinnyi ba yo bagize ku ntsinzi y’Amavubi, bakoresha aya Mugisha Gilbert gusa.

Amavubi yaraye atsinze Lesotho 1-0 mu mukino w’umunsi wa 4 w’Itsinda C mu gushaka itike y’Igikombe cy’Isi cya 2026.

Iki gitego cyatsinzwe na Jojea Kwizera ku mupira mwiza yari ahawe na Omborenga Fitina. Nyuma y’uyu mukino APR FC ibinyujije ku rukuta rwa yo rwa Instagram, yashyizemo amafoto ya Mugisha Gilbert na Omborenga Fitina (kuko ni bo bakinnyi ba APR FC bakinnye) maze aherekezwa n’amagambo agira ati 'mwakoze neza kipe y’igihugu Amavubi Stars ku ntsinzi mwakuye kuri Lesotho.'

Nyuma y’umwanya muto amafoto ya Omborenga yaje gukurwamo maze bagumishaho aya Mugisha Gilbert gusa ndetse n’ubutumwa buguma ari bwa bundi.

Ibi byongereye urujijo ku bakunzi ba APR FC ku byari bimaze iminsi bivugwa ko Omborenga, APR FC itazamwongerera amasezerano agomba gutandukana n’iyi kipe ni mu gihe bo babona ko agishoboye atagakwiye kuyivamo.

Kugeza ubu APR FC ntabwo iremeza koko niba izatandukana na Omborenga cyangwa n’abandi basoje amasezerano izabarekura cyane ko n’abo izongerera amasezerano itarabavuga.

View this post on Instagram

A post shared by APR FOOTBALL CLUB (@aprfcofficial)

Dushimimana Olivier [Muzungu] wifuzwaga na Police FC yamaze kuyitera umugongo yumvikana na APR FC.

Uyu mukinnyi ukina ku ruhande asatira, yagize umwaka mwiza muri Bugesera FC akaba yifuzwaga bikomeye na Police FC ndetse n’ibiganiro bikaba byarageze kure.

Gusa amakuru ISIMBI yamenye ni uko yamaze kwanga kwerekeza muri Police FC ahitamo kwerekeza muri APR FC aho bivugwa ko yatanzweho miliyoni 12 z’amafaranga y’u Rwanda.

Uyu mukinnyi akaba yiyongereye ku bandi nka Mugiraneza Frodouard, Ishimwe Jean Rene, Byiringiro Gilbert bivugwa ko bamaze kurangizanya na APR FC.

Iyi kipe kandi bivugwa ko ibiganiro bigeze kure na Tuyisenge Arsene usoje amasezerano muri Rayon Sports, gusa uyu mukinnyi na we ngo ntabwo akozwa ibyo kongera amasezerano muri iyi kipe kuko ibiganiro bigeze kure n’Ikipe y’Ingabo z’Igihugu.