Category: Uncategorized

RIB kandi yagaragaje ko serivisi y'ibyangombwa itanga ubu bisigaye bisabirwa ku Irembo.

RIB ni rumwe mu nzego za Leta zimaze imyaka zitabira imurikagurisha mpuzamahanga ribera i Gikondo buri mwaka.

Mu imurikagurisha riri kuba ku nshuro ya 27, tariki 30 Nyakanga 2024 Urwego rw'Igihugu rw'Ubugenzacyaha RIB, rwamuritse indege zitagira abapilote zizwi nka 'drones'.

Umuvugizi wa RIB, Dr. Murangira B. Thierry ubwo yasobanuriraga itsinda ry'abayobozi bayobowe na Minisitiri w'Ubucuruzi n'Inganda Prof. Jean Chrysostome Ngabitsinze ibikorwa bya RIB, yagaragaje ko izi drones zifashishwa mu bukangurambaga bugamije kwirinda ibyaha cyane cyane mu bikorwa byangiza ibidukikije ndetse no gukusanya ibimenyetso ahabereye icyaha.

Yavuzeko impamvu bitabira imurikagurisha ari ukugira ngo RIB bagaragarize Abanyarwanda ibikorwa bakora.

Ati “Iri nubwo ryitwa imurikagurisha ariko harimo n'imurikabikorwa, uyu rero aba ari umwanya mwiza wo kwegera abaturage ukabasobanurira byinshi byerekeye uru rwego kuko Expo iganwa n'abantu benshi kandi b'ingeri nyinshi. Incuro zose twaje muri Expo wasangaga abantu bafite amatsiko yo kumenya byinshi byerekeye RIB. RIB ni Urwego ryashyizweho ku bw'ineza y'abaturage, ni ngombwa ko tubegera, na bo bakatwegera, abaturage bakisanga mu rwego. Turasaba abagana Expo kugana Stand yacu, hari amakuru menshi bataha bamenye.”

Mu zindi serivisi abasura 'stand' ya RIB basobanurirwa harimo izo gusaba ibyangombwa bitangwa n'uru rwego binyuze ku rubuga rwa Irembo.

Ibyo byemezo birimo icy'ubudakemwa mu mico no myitwarire (Certificate of Good Conduct), Icyemezo kimenyekanisha ibyabuze cyangwa ibyibwe (Loss/Theft Certifcate), Icyemezo cyo kohereza umurambo w'uwapfuye mu mahanga (Clearance to Transport a deceased person's body abroad), n'Icyemezo cy'iperereza ry'ibyaha (Criminal Investigation Clearance).

RIB ivuga ko ubu buryo bwo gutanga ibyangombwa binyuze ku ikoranabuhanga bugamije kunoza imitangire ya servisi zayo no korohereza abazikeneye ndetse no gukoresha ikoranabuhanga aho bishoboka.

Umuntu ubikeneye asura urubuga www.irembo.gov.rw, akajya ahanditse Urwego rw'Igihugu rushinzwe Ubugenzacyaha (RIB), agakanda ku cyangombwa ashaka, agakurikiza amabwiriza y'ibisabwa mbere yo kwemeza ubusabe bw'icyangombwa ashaka.

Umuvugizi wa RIB Dr. Murangira B Thierry yasobanuriye abasuye stand yabo ko ibyangombwa ubu bitangirwa ku Irembo

RIB yamuritse drone yifashisha mu bukangurambaga no gukusanya ibimenyetso ahabereye ibyaha

Aha yerekanaga uburyo drone ya RIB ikoreshwa

Umuvugizi wa RIB asobanurira abayobozi batandukanye uko bakoresha drones mu gukusanya ibimenyetso ahakorewe icyaha

Mu gihe aho isi igeze usanga abantu benshi baharanira kubyara abana bacye bashoboye kurera, hari n’abandi bisanzuye barabyara cyane. Iyo bigeze no mu isi y’imyidagaduro naho ni uko, hari abifashe kimwe n’uko hari abamaze kubyara abana benshi cyane.

Kuba bamwe mu byamamare nka Elon Musk umuherwe wa mbere ku Isi yabyara abana benshi ntakibazo kirimo dore ko we abifitiye ubushobozi bwo kubatunga, kimwe n’uko n’abandi nka Akon, Nick Cannon, Eddie Murphy nabo bahagaze neza mu mitungo bityo kuba babyara abana benshi ntibabitindaho.

Dore urutonde rw’ibyamamare 10 bimaze kubyara abana benshi mu 2024:

1. Nick Cannon

Ni umukinnyi wa filime, umuraperi akaba n’umunyarwenya, Nick Cannon, uru mu bakunzwe muri Amerika. Uyu amaze kubyara abana 12 bose gusa yagize ibyago mu 2022 apfusha umwana umwe w’umuhungu wazize kanseri ahita asigarana abana 11. 

Aba bana harimo 2 yabyaranye n’icyamamarekazi Mariah Carey wahoze ari umugore we, naho abandi yababyaye ku bagore 6 batandukanye.

2. Eddie Murphy

Icyamamare muri sinema akaba n’umunyarwenya wubatse izina kuva mu myaka ya kera akina ‘Coming To America’, Eddie Murphy usanzwe ukomoka mu muryango w’abana benshi nawe yabyaye benshi. Kugeza ubu amaze kubyara abana 10 yabyaranye n’abagore babiri.

3. Elon Musk

Umuherwe wa mbere ku Isi, Elon Musk, washinze ikigo cya Space X na Tesla, nawe kuva mu 2002 yatangira kubyara ntiyigeze ahagarara. Kugeza ubu Musk yabyaye abana 10 gusa yapfushijemo umwe asigarana abana 9 yabyaranye n’abagore 4 batandukanye.

4. Akon

Umuhanzi w’icyamamare ukomoka muri Senegal, Akon, nawe ntiyigeze abasha kwifata ku bigendanye no kubyara dore ko ubu amaze kubyara abana 9, yabyaranye n’abagore 3 batandukanye barimo n’umugore we w’isezerano Tomeka Thiam.

5. Mel Gibson

Umukinnyi wa filime Mel Gibson ukomoka muri Australia wamamaye cyane ku Isi abikesha gukina filime ya Yesu, nawe ubu amaze kubyara abana benshi. Gibson afite abana 9 yabyaranye n’abagore 4 batandukanye.

6. Alec Baldwin

Umukinnyi wa filime ukomeye i Hollywood, Alec Baldwin, ukomoka muri Ireland, nawe mu kubyara yageze kure. Kugeza ubu amaze kubyara abana 9 ku bagore babiri.

7. Rod Stewart

Umuhanzi w’icyamamare, Rod Stewart, w’imyaka 69 ufite agahigo ko kuba ari we muhanzi wa mbere mu mateka wagize igitaramo cyitabiriwe n’abantu benshi bangana na miliyari 1, nawe yabyaye abana benshi. Kugeza ubu afite abana 8 yabyaranye n’abagore 5 batandukanye.

8. Kevin Costner

Icyamamare muri Sinema, Kevin Costner, wakunzwe cyane muri filime ‘The Bodyguard’ yakinanye n’icyamamarekazi Whitney Houston. Uyu mugabo amaze kubyara abana 7 ku bagore batatu batandukanye.

9. Robert De Niro

Uyu musaza w’imyaka 80 y’amavuko ni umwe mu bakinnyi ba filime bafite amateka akomeye i Hollywood. De Niro yamamaye muri filime nka ‘The Godfather’, ‘Irishman’ ‘The Devil’s Advocate’ n’izindi. Kugeza ubu amaze kubyara abana 7 ku bagore batatu.

10. Jude Law

Kimwe na Robert De Niro, Jude Law nawe usanzwe ukina filime, amaze kubyara abana 7. Uyu mugabo wamamaye muri filime zirimo ‘Spy’, ‘The Holiday’ n’izindi, aba bana yababyaye n’abagore bane batandukanye.

Mu Rwanda hashize imyaka myinshi abashakanye bahitamo uburyo butatu bwo gucunga umutungo wabo, burimo ivangamutungo rusange, ivangamutungo w'umuhahano, n'ivanguramutungo risesuye.

Mu itegeko rigenga abantu n'umuryango ryasohotse ku wa 30 Nyakanga 2024, hongerewemo uburyo bwa kane bwo gucunga umutungo aho abashaka gushyingiranwa bazajya bitegurira amasezerano y'uburyo bashaka ko umutungo wabo ucungwa.

Ingingo ya 166 iteganya ko 'Abagiye gushyingiranwa bashobora guhitamo uburyo bw'imicungire y'umutungo bushingiye ku masezerano ategurwa na bo ubwabo iyo itanyuranyije n'amategeko ndemyagihugu n'imyifatire mbonezabupfura y'Abanyarwanda.'

Aya masezerano ategurwa n'abashaka gushyingiranwa agomba kuba akubiyemo uruhare rwa buri wese mu bitunga urugo; uburyo bwo kwita ku bana no kubarera; n'uburyo burambuye umutungo uzacungwamo.

Hagomba kuba harimo kandi inkurikizi z'urupfu ku mutungo wabo; inkurikizi z'ubutane ku bana babo; inkurikizi z'ubutane ku mutungo wabo; inkurikizi ku guhinduka kw'imicungire y'umutungo wabo; ibijyanye n'imirimo idahemberwa yo kwita ku rugo; uburyo bwo kwishyura imyenda yafashwe n'umwe cyangwa bombi mbere na nyuma yo gushyingirwa; n'ibijyanye n'impano, indagano n'izungura.

Iri tegeko kandi riteganya ko inyandiko mpamo y'imicungire y'umutungo w'abashyingiranywe ishingiye ku masezerano ategurwa n'abashaka gushyingiranwa ishyirwaho umukono n'abagiye gushyingiranwa bombi imbere ya noteri.

Nyuma yaho ishyikirizwa umwanditsi w'irangamimerere nibura iminsi irindwi mbere y'umunsi w'ishyingirwa kugira ngo asuzume niba ibiyikubiyemo bitanyuranyije n'amategeko ndemyagihugu n'imyifatire mbonezabupfura y'Abanyarwanda.

Iyo umwanditsi w'irangamimerere asanze iby'ingenzi biranga ubu buryo bituzuye cyangwa binyuranyije n'amategeko ndemyagihugu n'imyifatire mbonezabupfura y'Abanyarwanda, asaba abashaka gushyingiranwa kubyuzuza cyangwa kubikosora mbere y'uko umunsi w'ishyingira ugera.

Abashyingiranwe bashobora guhindura uburyo bwo gucunga umutungo

Ingingo ya 170 y'iri tegeko iteganya ko uburyo bw'imicungire y'umutungo w'abashyingiranywe bushobora guhinduka bisabwe n'umwe mu bashyingiranywe cyangwa bombi.

Icyo gihe abashyingiranywe basabwa kugaragaza ko iryo hinduka risabwe ku nyungu z'urugo cyangwa impinduka zikomeye zabayeho mu mibereho yabo bombi cyangwa y'umwe muri bo.

Ikirego gisaba guhindura uburyo bw'imicungire y'umutungo w'abashyingiranywe gitangwa mu buryo bw'ibirego bisanzwe mu rukiko rubifitiye ububasha rukorera mu ifasi y'aho abashyingiranywe baba.

Iyo urukiko rwanze ku buryo budasubirwaho ikirego, ikindi kirego ntigishobora kongera gutangwa hadashize umwaka umwe ubarwa uhereye igihe icyemezo cy'urukiko cyafatiwe ku buryo budasubirwaho kandi bishingiye gusa ku ngingo nshya.

Gusa uburyo bw'imicungire y'umutungo w'abashyingiranywe buseswa kubera imwe mu mpamvu zirimo ubutane; guhindura uburyo bw'imicungire y'umutungo w'abashyingiranywe cyangwa urupfu rw'umwe mu bashyingiranywe.

Raporo y'Ikigo cy'Igihugu cy'Ibarurishamibare ya 2023 ku mibare y'ingenzi mu buzima n'imibereho by'Abanyarwanda (Rwanda Vital Statistics Report), igaragaza ko imiryango yashyingiranywe mu mategeko ari 57,880, muri yo 97.6% basezeranye ivangamutungo rusange, na ho imiryano 1,182 ingana na 2% yasezeranye ivangamutungo w'umuhahano mu gihe imiryango 212 ingana na 0.4% yasezeranye ivanguramutungo risesuye.

Abashyingiranwa mu mategeko bashyiriweho uburyo bwa kane bwo gucunga umutungo

RGB yavuze ko insengero n'imisigiti bitubahirije ibiteganywa n'itegeko ndetse n'amabwiriza agenga imiryango ishingiye ku myemerere bihita bihagarikwa.

Bimwe mu bishingirwaho muri iri genzura, harimo kureba ko urusengero rufite ibyangombwa by'iyandikwa bitangwa na RGB, icyemezo cy'imikoranire n'Akarere mu gihe hafunguwe ishami, kureba niba inyubako y'urusengero yujuje ibisabwa biteganywa n'amategeko agenga imiturire y'aho ruherereye no kureba ko abayobozi bafite impamyabumenyi cyangwa impamyabushobozi mu by'Iyobokamana ku rwego ruhagarariye umuryango no ku rwego rw'umuryango ufite izindi rukuriye.

Nubwo hataratangazwa umubare w'insengero zose zafunzwe hirya no hino mu gihugu, nko mu Karere ka Musanze ubwako izigera ku 185 zimaze gufungwa biturutse kuri ubwo bugenzuzi.

Umukinnyi wa filime Nyambo Jesca wamamaye nka Nyambo yifurije isabukuru nziza y’amavuko inshuti ye Ishimwe Thierry wamamaye nka Titi Brown akaba umwe mu babyinnyi bagezweho hano mu Rwanda, bamaze igihe bavugwa mu rukundo nubwo batabyemera.

Mu butumwa burebure Nyambo yageneye Titi Brown abinyujije ku mbuga nkoranyambaga ze, yamwifurije isabukuru nziza avuga ko ari inshuti y’ubuzima yemeza ko ari umuntu udasanzwe ndetse ko ubushuti bwa bo burushaho gukomera uko imyaka yiyongera.

Ati 'Isabukuru nziza y’amavuko nkoramutima yanjye y’ibihe byose, uyu munsi ndagucyeza nishimira umuntu w’agatangaza uri we. Ubupfura bwawe, ubugwaneza n’ukuntu unshyigikira utizigama bisobanuye Isi kuri njye. Buri uko umwaka uhise ubucuti bwacu buhora bukura bunarushaho gukomera. Uzana urumuri rw’igitangaza mu buzima bwanjye kandi ndagushimira ubutitsa kuba uhari ku bwanjye, ndanagushimira mu buryo bwose bushoboka.'

Muri ubu butubwa Nyambo yabwiye Titi Brown ko ari we aboneraho umutuzo, yemeza ko ari we muntu yitaho kurusha abandi anakomoza ku bigeragezo n’ingorane bacanyemo buri wese akahaba ku bw’undi.

Ati 'Ni wowe mutuzo umfasha gucururuka mu burakari, kandi buri gihe ujye wibuka ko ari wowe muntu nitaho kurusha abandi. Ni ukuri kandi uri akazuba kamurikira iyo nasuherewe kandi nizeye ko tuzahora turi inshuti z’akadasohoka nk’uko bimeze ubu. Sha Besto, ndabizi ko twahuye n’ibigeragezo n’ingorane kandi ko buri wese yagiye ahaba ku bwa mugenzi we. Amagambo ntazigera abasha gusobanura ukuntu wazanye ibyishimo mu buzima bwanjye.'

“Uri umugisha mu buzima bwanjye kandi ni byiza, abatabyumva bo bagufite nibwo babyumva besto ukwiye gukundwa buri munsi.”

Nyambo yasoje ubu butumwa yifuriza Titi Brown isabukuru nziza ndetse ko na mama we ayimwifuriza kandi ko amukunda cyane.

Ati “Isabukuru nziza y’amavuko besto nkunda, na Mama wanjye arakwifuriza isabukuru nziza kandi aragukunda cyane. Uyu munsi uze kukubera udasanzwe nk’uko uri.”

Nyambo na Titi Brown bamaze igihe bavugwa mu rukundo gusa nta nimwe urerura ngo ahamye aya makuru kuko bavuga ko ari inshuti magara (Best friend/Besto).

Nyambo yifurije isabukuru nziza Titi Brown

Nyambo na Titi Brown bamaze igihe bavugwa mu rukundo

Sulaiman RUKUNDO / ISIMBI.RW

Ni bimwe mu bikubiye mu butumwa yatangiye mu birori byo kwizihiza uwo munsi wateguwe na UN Women ku bufatanye n'Ishami ry'Umuryango w'Abibumbye ryita ku buhinzi (FAO), bibera muri Kigali Convention Centre ku wa 31 Nyakanga 2024.

Mu ijambo rye, Umuyobozi wa UN Women mu Rwanda, Jennet Kem, yakomoje ku kuba hakwiye gukomeza kwimakazwa uburinganire mu rwego rw'ubuhinzi mu Rwanda, ndetse abagore baburimo bakanagira uburenganzira ku butaka kuko byanabafasha mu birimo kwagura ibyo bakora bakanongera umusaruro ubikomokaho, dore ko ari bo benshi bakora ubuhinzi.

Ibi kandi byashimangiwe n'Umuyobozi Mukuru w'Ikigo cy'Igihugu gishinzwe Ubutaka, Marie Grace Nishimwe, wavuze ko mu mategeko y'u Rwanda, abagabo n'abagore bafite uburenganzira bungana ku butaka, ariko ugasanga imyumvire ku mikoreshereze yabwo igisiga umugore inyuma kuko bidakunze kubaho ko agira uruhare runini mu guhitamo icyo bukoreshwa.

Ati ''Abagore bafite uburenganzira ku butaka ukurikije icyo amategeko y'u Rwanda ateganya ndetse no kwandika ubutaka byabayeho byabahaye uburenganzira bari ku byangombwa by'ubutaka. Ariko ku rundi ruhande, kubukoresha, ni gute ubwo butaka babufitiye uburenganzira noneho bakagira uruhare mu gufata icyemezo mu buryo bukoreshwa byaba ari ukubugurisha?''

''[…] usanga ahanini aho ahenshi hatari hagerwa, akaba ari ho hagaragara ko amategeko ahari, ariko hari imyumvire igomba gukurikira amategeko, hari imyumvire igomba guhinduka.''

Muri ibi birori kandi, abahagarariye UN Women, FAO, n'izindi nzego zirimo Minisiteri y'Ubuhinzi n'Ubworozi (MINAGRI), bagaragaje ko mu gihe umubare munini w'abagore bakora ubuhinzi mu Rwanda batize, kubashyiriraho porogaramu zibafasha gukora ubuhinzi buvuguruye butari ubw'amaramuko gusa ari wo musingi wo kubuteza imbere bakanasagurira amasoko.

Namahoro Olive wo muri Koperative Duterintambwe y'abahinzi bo mu Karere ka Rwamagana, yatanze ubuhamya bw'uko mbere bitashobokaga ko umugabo we Dusengimana Alphonse amwemerera guhinga imboga mu butaka bwabo, ariko nyuma yo guhabwa amahugurwa n'ibigo nka FAO ku bijyanye n'ubuhinzi buteye imbere, umugabo we aza guhindura intekerezo aranamufasha kuko yabonye byunguka.

Ati ''Twagiraga imbogamizi ahanini ku bagore ku bijyanye n'ubutaka. Birazwi ko abagabo akenshi ari bo babaga bafite ijambo rinini ku muryango cyangwa ku mitungo y'umuryango, kugira ngo ubwire umugabo uti 'Wenda ziriya 'Ares' 30 ndumva nazihingaho wenda imiteja, kugira ngo abyumve byabaga bigoye'.''

''[…] ariko nyuma yo gufata amahugurwa ku buhinzi n'aho natangiriye mvuga nti 'Ibi bintu uwabikoraho gake gake ko umugabo azajya abona ko hari inyungu bibyara aho wenda ntazagera aho akanshyigikira?''

Namahoro yatangiye ahinga imboga zirimo inyanya na 'concombres', abikorera ku butaka buto. Kugira ngo umugabo we wakoraga ubwubatsi ave ku izima amwemerere gukorera ubwo buhinzi ku butaka bunini, byatewe n'uko umwana wabo ku ishuri bamwirukanye habuze amafaranga ibihumbi 98 Frw yo kumwishyurira bagatumiza Se ngo yishyure akabura amafaranga, Namahoro aza kuyishyura kuko yari afite ayo yizigamiye yakuye muri ubwo buhinzi.

Nyuma Namahoro yanahawe amahugurwa ku gukora ifumbire y'imborera, umushinga wabahuguye ubasezeranya ko nyuma uzayikora neza bazajya bayimugurira. Namahoro yaje kuyikora neza iragurwa, ihabwa abahinzi, akuramo ibihumbi 800 Frw. Ibi byatumye umugabo we Dusengimana Alphonse amufasha bayoboka iy'ubuhinzi buvuguruye, ndetse mu buhamya bwe yakomoje ku kuba abagore bari mu buhinzi mu Rwanda bashoboye bityo ko badakwiye gusigazwa inyuma cyangwa ngo bimwe uburenganzira ku butaka.

Umuyobozi Mukuru wa FAO mu Rwanda, Coumba Dieng Sow, na we yashimye aho u Rwanda rugeze mu gutuma abagore bagira uburenganzira ku butaka, akomoza ku kuba n'ibindi bihugu bya Afurika bikwiye kurwigiraho kuko hadatejwe imbere ubuhinzi bukorerwa kuri uyu mugabane wazakomeza kudindira mu iterambere.

Raporo y' Urwego rw'Igihugu Rushinzwe Kugenzura Iyubahirizwa ry'Ihame ry'Uburinganire n'Ubwuzuzanye bw'Abagabo n'Abagore mu Iterambere ry'Igihugu (GMO), yasohotse muri Werurwe 2024, igaragaza ko abagore ari bo bafite ubutaka bwinshi kurusha abagabo ariko ko butabyazwa umusaruro uhagije.

Ibibanza by'ubutaka byari byanditswe ku bagore gusa byari 2.183.761, mu gihe ibyanditswe ku bagabo byari 1.305.790.

Nubwo bimeze gutyo, imyumvire ku mikoreshereze yabwo iracyari hasi ku buryo usanga nk'umugore uri mu buhinzi adashobora gufata umwanzuro wo gutanga ubutaka bwe nk'ingwate muri banki ngo ahabwe inguzanyo yo kongera umusaruro we, kuba yabugurisha cyangwa akaba yanafata imyanzuro y'ibibuhingwaho, kuko bamwe bizera ko iyo ari imyanzuro ifatwa n'abagabo.

Ibyo bigaragazwa n'inzitizi ku iterambere ry'umugore ufite ubutaka, cyane cyane uri mu rwego rw'ubuhinzi kuko atabasha gukora ubuteye imbere.

Haganiriwe ku bikibereye imbogamizi abagore bakora ubuhinzi mu Rwanda, birimo kuba bamwe batagira uburenganzira ku mikoreshereze y’ubutaka

Ibi birori byanabaye umwanya mwiza wo kungurana ibitekerezo

Namahoro Olive n'umugabo we, Dusengimana Alphonse batanze ubuhamya bw'uko bafatanyije bagatezwa imbere n'ubuhinzi, umugore ari we ubaye imbarutso

Umuyobozi wa UN Women mu Rwanda, Jennet Kem, yashimye intambwe u Rwanda rwateye mu gushyiraho amategeko aha abagore uburenganzira ku butaka

Ambasaderi w'u Buholandi mu Rwanda, Joan Jacobje Jantina Wiegman, yavuze ko abagore bashoboye, bityo ko batagomba kwamburwa uburengazira ubwo ari bwo bwose

Abitabiriye ibi birori bakomoje cyane ku kuba abagore bakwiye kugira uburenganzira ku butaka, na bo bagafata imyanzuro y’uko bukoreshwa

Amafoto: Ingabire Nicole

Ubwishingizi bw'ubuzima ni kimwe mu by'ibanze abantu bakenera kugira ngo bakomeze kubaho batekanye.

Umukozi mu ishami ry'ubucuruzi rya SONARWA Life Assurance Ltd, Mugisha Brian yabwiye IGIHE ko kuva iki kigo cyatangira cyihaye intego yo kwegera abakiliya, no kubaha serivisi zijyanye n'ibyo bifuza mu mibereho yabo.

Ati 'Iyo tubateze amatwi tumenya ibyo bari gucamo bigatuma dutegura serivisi zishingiye ku byo bifuza. Ibyo ni bimwe mu byo twasanze bikenewe ku isoko ry'u Rwanda.'

Yavuze ko igihe cyose bahora batekereza ibyatuma Abanyarwanda bagira ubuzima butekanye, ndetse n'igihe bagize ibyago byo kubura ababo bakabona ubagoboka.

Ati 'Kuva mu mwaka ushize kugeza uyu munsi twasohoye serivisi nshya z'ubwishingizi bw'ubuzima ebyiri, harimo 'Hamwe Nawe', akaba ari ubwishingizi bufasha mu gutabara igihe abantu bagize ibyago hakaba n'ubundi bwitwa 'Ishema ry'Umuryango' itanga ubwishingizi bukomatanyije ku muryango.'

Yasobanuye ko ari ubwishingizi umuntu afata bugatanga amahoro asesuye kuko umuntu umwe mu bagize umuryango ubufashe aba ashinganishije abawugize bose kandi akabufata ku giti cye bidasabye ko bigirwamo uruhare n'umukoresha we.

Muri ubu bwishingizi bwiswe 'Ishema ry'Umuryango' harimo ubwizigame bw'amafaranga bushobora kugoboka umuntu mu gihe ahuye n'ikibazo runaka, hakabamo no kwiteganyiriza ku bizazane bishobora kugwirira umuryango.

Yagarutse kandi kubwishingizi bwiswe 'Hamwe Nawe' agira ati 'Ni ubwishingizi budahenze, bujyanye n'ubushobozi bw'Abanyarwanda bingeri zose, kandi intego yacu ni uko buri munyarwanda abaho afite ubuzima bushinganye yaba mu gihe akiri muzima ndetse no mu gihe ibyago bije bidateguje SONARWA Life ikahamubera. Ubu bwishingizi ni ingenzi kuko bufasha gufata mugongo uwabufashe mugihe agwiririwe n'ibyago bitateganyijwe.'

Yavuze ko hano muri expo2024 abantu bari kwitabira gusobanuza ubwishingizi bw'ubuzima cyane ndetse harimo n'abahita babugura, agahamya ko bazakomeza ibi bikorwa byo kwegera abanyarwanda aho bari hose.

Mu bundi bwishingizi SONARWA Life itanga harimo ubw'abantu ku giti cyabo harimo ubwishingizi bw'amashuli y'abana ndetse n'ubwishingizi bw'izabukuru. Harimo kandi ubwishingizi bw'ubuzima buhabwa ibigo binini, burimo ubwishingizi bukomatanyije bw'abakozi b'ikigo, bugamije gushinganisha ubuzima bw'abakozi ku byago bitandukanye bidateguza. Hakiyongeraho n'ubwishingizi bwo kuzigamira abakozi kubw'izabukuru n'amasaziro meza igihe basoje akazi kabo. Ubu bwoko bw'ubwishingizi usanga ababuhabwa n'abakoresha babo, bibatera gutanga umusaruro urushijeho mu kazi, ndetse bigatuma bishimira akazi bakora kubwo kumva ubuzima bwabo bushinganye, kandi butekanye.

SONARWA Life Assurance Ltd ikomeje guhanga izindi serivisi nshya z'ubwishingizi bw'ubuzima zifasha abanyarwanda kubaho neza bashinganye, ikaba yihariye isoko ry' ubwishingizi bw'ubuzima buhabwa ibigo binini ku kigero cyo hejuru ya 70% ndetse n'abantu kugiti cyabo bishimira serivisi nshya bagenda batangiza zishingiye kubyifuzo by'abakiliya.

Mugisha Brian, Umukozi mu ishami ry'ubucuruzi rya SONARWA Life Assurance Ltd yavuze ko bishimiye kwegera abakiliya aho bari