Category: Uncategorized

Kimwe mu bigaragaza agaciro umukino wahawe ni amafaranga abashaka kuwureba kuri Stade bishyura.

Ku mugabane w’Iburayi aho umupira w’amaguru wateye imbere ho usanga abafana bishyura amafaranga agira icyo afasha amakipe yabo ndetse bo abenshi bagura n’amatike y’umwaka wose w’imikino ku buryo buri wese aba aho agomba kwicara kuva ku munsi wa mbere kugeza ku wa nyuma.

Rayon Sports nk’ikipe y’abafana ku mikino yakiriye ikomeye igerageza kubyaza amahirwe umusaruro ubundi ikishyuza amafaranga menshi. Muri 2018 ubwo yari yakiriye Enyimba FC mu mikino Nyafurika, itike ya menshi yari ibihumbi 30 Frw bikaba bwari ubwa mbere bibaye mu Rwanda.

Nyuma y’uko bigaragaye ko bishoboka mu mikino ya CECAFA Kagame Cup ya 2019 yaberaga mu Rwanda nabwo imikino ibiri ya ¼ yarebwaga n'uwishyuye ibihumbi 30 Frw ku bicara mu myanya y'abanyacyubahiro.

Rayon Sports ubwo yari yakiriye Bugesera FC mu Ukwakira 2019 nabwo itike ihenze yashyizwe ku bihumbi 30 Frw abantu bakomeza gukangarana.

Nubwo muri iyo myaka byari bimeze gutyo ariko uko iminsi yagiye ihita abantu barabyakiriye ndetse ahubwo n’amatike agenda agenda kurushaho.

Muri iyo nkuru tugiye kugaruka ku mikino 5 yagize amatike ahenze mu mateka y’umupira w’amaguru y’u Rwanda;

5. Umukino Rayon Sports yakiriyemo APR FC muri 2022

Ubwo ikipe ya Rayon Sports yakiraga APR FC mu mukino ubanza wa 1/2 cy’igikombe cy’Amahoro kuri Stade ya Kigali i Nyamirambo tariki ya 11 Gicurasi 2022, kwinjira kuri uyu mukino ku bicara mu myanya isanzwe, ahadatwikiriye, byari 5000 Frw naho ku bicara ahatwikiriye mu ruhande ari 10,000 Frw.

Abanyacyubahiro (VVIP) bemerewe no guparika imodoka zabo muri Stade bishyuye ibihumbi 50 Frw naho abicara iruhande rwabo (VIP), imodoka zabo zigasigara hanze, bishyuye ibihumbi 20 Frw. Aha bwari bwo bwa mbere itike y’umupira w’amaguru mu Rwanda iguzwe ibihumbi 50 by’amafaranga y’u Rwanda.

4.Umukino APR FC yakiriyemo Rayon Sports muri 2022

Nyuma yuko Rayon Sports hari itike igurishije ibihumbi 50 Frw ku mukino ubanza wa 1/2 cy’igikombe cy’Amahoro, APR FC nayo mu wo kwishyura niko yahise ibigenza.

Kureba uyu mukino byari ukwishyura 10,000Frw ahasanzwe (ariyo macye), 20,000Frw ahatwikiriye, 30,000Frw mu myanya y'icyubahiro (VIP) ndetse na 50,000Frw muri VVIP.

Usibye kuba APR FC yari yishyuje ibihumbi 50 Frw mu myanya y’icyubahiro ariko yari yanishyuje ibihumbi 10 Frw ahasanzwe bikaba ari ubwa mbere byari bibayeho mu mateka y’umupira w’amaguru mu Rwanda.

3. Umukino Rayon Sports yakiriyemo Al Hilal Benghazi

Umukino wo kwishyura w’ijonjora rya Kabiri rya CAF Confederation Cup, ikipe ya Rayon Sports yari yakiriyemo Al Hilal Benghazi yo muri Libya mu mwaka ushize kuri Kigali Pelé Stadium, nawo uza mu mikino yagize amatike ahenze mu Rwanda.

Kuri uyu mukino, VVIP byari bihumbi 50 Frw, VIP abaguze mbere ari ibihumbi 25 Frw naho umunsi w'umukino ari ibihumbi 30 Frw, ahatwikiriye itike yari ibihumbi 10 Frw ku baguze mbere naho ku munsi w'umukino ari ibihumbi 15 Frw, ahasanzwe itike ari ibihumbi 5 Frw ku baguze mbere naho ku munsi w'umukino ari ibihumbi 8 Frw.

2. Umukino Rayon Sports yakiriyemo APR FC muri 2022

Umukino wo ku munsi wa 14 wa shampiyona y’icyiciro cya mbere mu Rwanda ikipe ya Rayon Sports yari yakiriyemo APR FC ni wo uza ku mwanya wa 2 mu mikino yagize amatike ahenze mu mateka y’umupira w’amaguru mu Rwanda.

Kuri uyu mukino mu myanya isanzwe, ahadatwikiriye, byari 5000 Frw naho ku ahatwikiriye mu ruhande ari 10,000 Frw.

Abanyacyubahiro (VVIP) bemerewe no guparika imodoka zabo muri Stade bisbyuye ibihumbi 100 Frw naho abicaye iruhande rwabo (VIP), imodoka zabo zikaba zari zasigaye hanze, bishyuye ibihumbi 30 Frw.

Ni ubwa mbere hari hishyujwe ibihumbi 100 by’Amanyarwanda ku mukino w’umupira w’amaguru mu Rwanda.

1. Umukino ikipe ya APR FC igiye kwakiramo Azam FC 

Kuri uyu wa Gatandatu Saa kumi n’ebyiri muri Stade Amahoro ni bwo ikipe ya APR FC iraba yakiriye Azam FC yo muri Tanzania mu mukino wo kwishyura w’ijonjora ry’ibanze rya CAF Champions League.

Mu mateka uyu mukino ni wo uzaba ufite itike ihenze mu Rwanda dore ko hari ahari kwishyurwa ibihumbi 900 by’amafaranga y’u Rwanda.

Ibiciro byo kuwinjiraho bigabanyije mu byiciro bitandatu, aho ahasanzwe hari mu byiciro bibiri, aho hasi ari 1000 Frw, hejuru bikaba 2000 Frw.

VIP ni ibihumbi 10 Frw, VVIP ni ibihumbi 30 Frw. Hari kandi ibyiciro bishya, aho ikitwa 'Executive Seat' ari ibihumbi 100 Frw, mu gihe 'Executive Box' ari ibihumbi 900 Frw ku myanya 12 gusa.

Executive Box ni icyumba cy'Abanyacyubahiro gikunze kuba ari gito kitajyamo abantu benshi kuko bakunze kuba bari hagati ya 4-16, kiba kirimo insakazamashusho ya rutura ndetse n’ibyo kurya no kunywa.

Umukino wa Rayon Sports na APR FC ni wo ukunze kuba uhenze mu Rwanda 

Umukino ikipe ya APR FC izakiramo Azam FC kuwa Gatandatu ni wo uzaba ugize itike ihenze mu mateka y’umupira w’amaguru mu Rwanda 

Ikinyamakuru National Geographic muri Mutarama 2024 cyatangaje inkuru ifite umutwe ugira uti 'Ikiyaga cyo muri Afurika gishobora giturika kandi amamiliyoni y'abantu bari mu kaga.'

Muri iyi nkuru hagaragaramo Philipp Morkel washinze ikigo cyitwa Hydragas Energy gitunganya ingufu za gaz ituruka mu mazi. Uyu ahamya ko ikiyaga cya Kivu kimeze nk'inkono itekewemo amazi ageze ku gipimo kirenga 60% cy'ubushyuhe.

Umuyobozi w'ishami rya REMA rishinzwe inyigo no kubungabunga ikiyaga cya Kivu, Mudakikwa Eric, yatangaje ko nta kimenyetso kigaragaza ko gaz iri kwiyongera cyane muri iki kiyaga ku buryo haba hari ibyago byo guturika.

Mu kiganiro na New Times, Mudakikwa yagize ati 'Ntabwo gaz iri kwiyongera cyane mu kiyaga cya Kivu kubera ko igihugu gisanzwe kiyikuramo nk'ingamba yo gukumira ibyago byo guturika.'

Iyi nkuru ya National Geographics ivuga ko gukura gaz muri iki kiyaga kugira ngo yifashishwa nk'isoko y'ingufu, bishobora guhungabanya imiterere yacyo, bikaba 'bishobora gutuma giturika byihuse'. Gusa Mudakikwa yagaragaje ko ibi bitazashoboka, kuko bikoranywa ubushishozi.

Yagize ati 'Ntabwo ari ukuri ko gukuramo gaz byatuma ikiyaga cya Kivu giturika. Kuyikuramo birakorwa hatabayemo guhungabanya imiterere y'ikiyaga.'

REMA isobanura ko kuva mu 2018, Guverinoma y'u Rwanda ikurikirana buri munsi imyitwarire y'ikiyaga cya Kivu, kandi ko cyashyizweho sitasiyo zitahura imitingito ituruka ahanini mu kirunga cya Kiragongo.

Muri Gicurasi 2021, Nyiragongo yarutse bitunguranye, iteza imitingito yangije ibikorwa bitandukanye mu burengerazuba bw'u Rwanda no mu burasirazuba bwa Repubulika Iharanira Demokarasi ya Congo.

Icyo gihe byahwihwiswaga ko amahindure aturuka muri Nyiragongo ashobora kugera mu kiyaga cya Kivu, yahura na gaz irimo hakaba habaho iturika ridasanzwe ryakwangiza ubuzima bw'abayituriye.

Mudakikwa yatangaje ko u Rwanda rukomeje gukorana na RDC mu kugenzura imitingito ndetse n'imyitwarire y'ikirunga cya Nyiragongo, mu rwego rwo gukumira ingaruka zabyo ku baturage.

Ati 'Nta byago by'uko haba ikintu gitunguranye kubera ko twifatanyije na RDC, dukurikiranira hafi ibibazo birebana n'imitingito n'iruka rya Nyiragongo.'

Ikiyaga cya Kivu gifite ubuso bwa kilometero kare 2700. Gikoze ku turere two mu Rwanda turimo Rubavu, Rutsiro, Karongi, Nyamasheke na Rusizi.

REMA isobanura ko gaz ikurwa mu kiyaga cya Kivu hagamijwe kugabanya ibyago by’iturika

Kuva ku kabari karaye gashinzwe nimugoroba kugeza kuri kamwe kamamaye, abatanga inzoga n'ibindi abakiliya bakeneye (aba-serveurs) biganjemo abakobwa, bahura n'ibibazo binyuranye

Aba bafite inshingano zo kwita ku mukiliya mu byo ubonesha amaso ariko hari abaganiriye na Flash FM bahamya ko bahohoterwa umunsi ku wundi n'abakiliya babafata nk'indaya cyangwa ibicuruzwa.

Umwe yagize ati 'Iyo uje mu kazi nk'aka abantu bagufata uko utari. Hari abagufata ko uri indaya, hari abumva ko wigurisha, bitandukanye n'uko uri.'

Undi mukobwa yagaragaje ko 'akenshi baza babona ko uri igicuruzwa, bakaza bagukorakora ariko nyine ibyo turabyihanganira.'

Aba bakobwa bavuga ko ibyo bakoreshwa bisa no gucuruzwa kuko mu gihe umukobwa yanze kuryamana n'umukiliya bishobora kumuviramo no kwirukanwa mu kazi, bityo akemera by'amaburakindi.

Ati 'Hari n'uwo ushobora guhakanira ukavuka uti simbishaka bigahita biba intadaro yo kwirukanwa. Nka njye naje ari akazi gusa kanzanye ariko iyo hajemo ikindi kintu gitandukanye n'akazi birambangamira bikanandya ku mutima kubera ko uba unjyanye mu bindi bintu bitanzanye.'

Hari abaturanye n'utubari bavuze ko benetwo bakura abakobwa mu bice by'icyaro bababeshya kubaha akazi ariko hagira abagabo bakenera kuryamana na bo hakishyurwa umukoresha.

Umuhuzabikorwa w'Impuzamiryango Iharanira Uburenganzira bwa Muntu (CLADHO), Evariste Murwanashyaka, yavuze ko ibi bifatwa nk'ubucuruzi bw'abantu imbere mu gihugu, kandi ngo bagiye gukora ubushakashatsi buzabishyira ku mugaragaro.

Ati 'Uburyo bikorwamo abantu bose barabizi ko 90% ni ibintu bibangamiye uburenganzira bwa muntu kandi rimwe na rimwe binaganisha ku icuruzwa ry'abantu. Nibavuga icuruzwa ry'abantu ntibakajye bumva icuruzwa hanze y'igihugu n'imbere mu gihugu hari icuruzwa, tukabonamo ibintu bibangamiye uburenganzira bwa muntu.'

Umunyamabanga Mukuru wa Syndicat y'Abakozi bakora mu mahoteli, restaurant n'utubari, Nyiratsinda Flora, yabwiye IGIHE ko iki kibazo kiri mu tubari twinshi two mu gihugu ndetse ngo na we ubwe hari aho yabonye mu Karere ka Kicukiro utubari dukorerwamo ibikorwa by'ihohoterwa rishingiye ku gitsina.

Ati 'Iyo bibaye ngombwa uwo nyir'akabari ubacuruza iyo bibaye tumutungira agatoki ku nzego za polisi.'

Nyiratsinda yahamije ko bakora ku buryo urwego rwa serivisi runogera abakiliya n'abahakora, bikazanatuma rukomeza gutanga umusaruro ku bukungu bw'igihugu.

Uyu mwanzuro wafashwe nyuma y'ibiganiro byabereye muri uyu mujyi tariki ya 20 n'iya 21 Kanama 2024, byayobowe n'abaminisitiri b'ububanyi n'amahanga b'ibi bihugu bitatu.

Ntabwo itangazo ry'ibyavuye mu myanzuro rirajya hanze, ariko Radio Okapi yatangaje ko ryakozwe ku wa Kane.

Ingingo y'ingenzi ihuza izi ntumwa ni iyo gushakira akarere k'ibiyaga bigari umutekano, cyane cyane Uburasirazuba bwa RDC bumaze imyaka myinshi buhungabanywa n'imitwe yitwaje intwaro.

Mu biganiro bitandukanye byatangiye mu 2022, byagaragaye ko umutwe witwaje intwaro wa FDLR ari imwe mu ntandaro z'umutekano muke mu Burasirazuba bwa RDC n'akarere muri rusange.

Intumwa z'ibi bihugu zanzuye ko tariki ya 29 n'iya 30 Kanama 2024, inzobere mu rwego rw'ubutasi zizahurira i Luanda kugira ngo ziganire ku 'mushinga' wateguwe na Perezida João Lourenço wa Angola ku buryo amahoro n'umutekano byagaruka mu karere.

Nyuma yo guhura kw'izi nzobere z'ibihugu bitatu, byateganyijwe ko tariki ya 9 n'iya 10 Nzeri 2024 ari bwo intumwa z'ibi bihugu ku rwego rw'abaminisitiri zizahurira i Luanda, baganire ku myanzuro yafashwe iganisha akarere ku mahoro n'umutekano.

Minisitiri w’Ububanyi n’Amahanga n’Ubutwererane, Ambasaderi Olivier Nduhungirehe, yayoboye intumwa za Guverinoma y’u Rwanda muri ibi biganiro

Minisitiri w’Ububanyi n’Amahanga wa RDC, Thérèse Kayikwamba Wagner, yahagarariye guverinoma y’igihugu cyabo

Minisitiri w’Ububanyi n’Amahanga wa Angola, Ambasaderi Téte António, yari umuhuza w’impande zombi

Iki gitaramo cyatangiye ku isaha ya saa moya abacyitabiriye basusurukijwe n'abanyarwenya barimo Dudu, Muhinde, Pilate, Clement, Pilote, Gakuba Family, Rumi, n'abandi.

Mu nkuru z'urwenya zagarutsweho muri iki gitaramo inyinshi zagarutse kuri The Ben na Kwizera Emelyne bari kuvugwa cyane muri iyi minsi nyuma yo guhurira i Musanze bakagaragara mu mashusho ataravuzweho rumwe.

Abanyarwenya barimo Rumi, Pilate, Rumi bagarutse ku mashusho ya The Ben na Emelyne bagaragaza uburyo uyu muhanzi yari yishimiye gukora mu rukenyerero rw'uyu mukobwa aho bamwe bavuga ko yakorakoye uyu mukobwa.

Uwitwa Dudu yagize ati 'Ni ubwa mbere nari mbonye The Ben yishimye bigeze kuri ruriya rwengo (akabivuga yerekana uko intoki ze zari zimeze), ubu ikibabaje nsigaye njya guhobera umukobwa namukora mu rukenyerero akikanga.'

Muhinde yagarutse kuri Rusine agaragaza uko yari ameze umunsi atera ivi asaba umukunzi we kuzamubera umugore. Aha yagize ati “Rusine ntazababeshye ngo yateye ivi yaritera ate iriya nda yabyemeye, ubwo se ari we n’umugore we ni nde utwite.”

Clapton Kibonge na Zaba Missedcall bahamagawe ku rubyiniro basusurutsa abitabiriye iki gitaramo mu rwenya rwagarutse kuri Zabba bamubaza uko urugendo rwe rwo kujya i Dubai rwagenze.

Ingoma ndundi zatunguranye muri iki gitaramo!

Ubwo iki gitaramo cyari kigeze hagati, Himbaza Club yatunguranye yinjirana umurishyo w'ingoma ndundi mu mbyino n'indirimbo zatunguye benshi. Zimwe mu ndirimbo binjiranye zirimo: “Ab’iwacu muraho”, “Sinagenda ntashimye”, n'izindi.

Nyuma yo kwakira umuhanzi Kidum mu gace ka Meet Me Tonight iki gitaramo cyasojwe n'umunyarwenya Pilate wakoze agashya azana n'ikipe y'abasore benshi bamuherekeje abagereranya n'ikipe y'umupira w'amaguru.

Aba basore mu rwenya bakoze bagarutse ku bantu batandukanye barimo Inkindi Aisha  bavuga uburyo aherutse kwita abantu bamwe ‘amagweja’ ndetse na ‘kasuk’u bagaruka ku mubyibuho we, n'abandi.

Himbaza Club yigaragaje muri iki gitaramo, ni itsinda ry'abasore b'abakaraza n’ababyinnyi b'abanyempano bakomoka mu Burundi ariko bakaba bakorera ibikorwa byabo mu Rwanda guhera mu 2015.

Aba basore bafite umwihariko wo gutaramira abantu bikoreye ingoma zipima ibiro 50 ku mutwe, babyina, basimbuka ku rwego rutangaza buri wese kandi banaririmba.

Aba basore bizera ko impano zose zitangwa n'Imana kandi Imana yifuza ko izo mpano yashyize mu bantu bayo ibona bari kuzikoresha nk'uko bikwiye. Abakaraza bihuje n'ababyinnyi bakora icyiswe 'Club Himbaza' izwiho gutanga ibyishimo bisendereye.

Mu 2019, iri tsinda ryabashije kugera ku musozo w'amarushanwa ya East Africa's Got Talent yabereye i Nairobi muri Kenya. Aba basore kandi, bigaragaje cyane mu gitaramo 'Ibisingizo bya Nyiribiremwa' Josh Ishimwe yakoreye muri Camp Kigali ku ya 20 Kanama 2023.

Imyiyereko y’ingoma ndundi yaciye ibintu muri iki gitaramo cy’urwenya cya Gen-Z Comedy, bishimirwa na benshi

Abanyarwenya bagerageje gutera urwenya bisunze ingingo zinyuranye batembagaza benshi

Himbaza Club yatunguranye muri iki gitaramo mu rwego rwo guha ikaze Kidum wamamaye mu Burundi

Umunyarwenya Dudu yisunze ibivugwa cyane muri iki gihe, atembagaza benshi

Umunyarwenya Clement ugezweho muri iki gihe, yongeye kwemeza benshi

Rusine witegura kurushinga, ndetse na The Ben wagarutsweho kubera gukurura ‘ishanga’ babaye igitaramo muri Gen-Z Comedy

Ku wa Kane ni bwo Umujyi wa Kigali Umujyi wa Kigali ubinyujije ku rukuta rwayo rwa X wasubije umuntu wari uwubajije niba ukennye ku buryo ikibazo cya moteri yatsa amatara yo muri Kigali Pelé Stadium wananiwe kugikemura.

Umujyi wa Kigali wamusubije wandika uti: “Iki kibazo ntabwo cyananiranye, kirimo gushakirwa umuti urambye. Uyu munsi moteri dufite muri Kigali Pelé Stadium ntabwo ibasha gucana amatara yose ngo ikibuga kibone bikwiriye ku buryo haba imikino ya ninjoro. Icyakora, mu gihe abagiye gukina bafite ubushobozi bwo kuzana moteri iyunganira, bemererwa gukina ninjoro.'

Mu gukemura ikibazo ku buryo burambye, hatumijwe moteri ifite ubushobozi busabwa. Izagera mu Rwanda mu mezi atatu ari imbere”.

Mu ijoro ryo kuri uyu wa Gatanu n’ubundi Perezida Kagame yifashishije urubuga rwa X yasubije Umujyi wa Kagali yandika ko ibi bitari bikwiye kuba byarabaye. Yanditse ati: “Ibi ni ibintu bitagakwiye kuba byarabayeho na mbere hose'.

Ibi byabaye nyuma y’uko Umujyi wa Kigali ufite mu biganza Kigali Pelé Stadium umenyesheje Ishyirahamwe ry'Umupira w'Amaguru mu Rwanda, FERWAFA, ko imikino ya nijoro idashobora gukinirwa kuri iyo stade kuko ikibazo cya moteri kitarakemuka.

Ni na byo byatumye umukino wagombaga kuhabera saa kumi n’ebyiri zo kuri uyu wa Gatanu Rayon Sports yagombaga kwakiramo Amagaju FC uhita wimurwa ushyirwa Saa Cyenda.

Ntabwo ari ubwa mbere iki kibazo cy’amatara yo muri Kigali Pelé Stadium kivuzweho kuko no mu mwaka ushize w’imikino byagiye bigaragara ko moteri iyatsa ifite ikibazo kuko yatangaga urumuri rucye.

Ubwo Kigali Pelé Stadium yatahagwa ku mugaragaro, Perezida Kagame na Gianni Infatino wa FIFA ni bo bayifunguye ku mugaragaro 

Ni mu mikino ya kamarampaka ya UEFA Conference League yakinwe ku mugoroba wo kuri uyu wa Kane. Ikipe ya FC Kryvbas Kryvyi Rih yo muri shampiyona y’icyikiciro cya mbere muri Ukraine inakinamo kapiteni w’Amavubi, Bizimana Djihad yari yakiriye Real Betis ikina shampiyona y’icyikiro cya mbere muri Espagne kuri Kosice Football Arena.

Uyu mukino warangiye Real Betis iyitsinze ibitego 2-0 bya Ezequiel Avilla ku munota wa 13 ndetse na Rodri ku munota wa 62 ku mupira yahawe n’ubundi na Ezequiel Avilla.

Kuri uyu mukino Bizimana Djihad yari yabanje mu kibuga ndetse anakina iminota yose y’umukino. Biteganyijwe ko FC Kryvbas Kryvyi Rih izakina umukino wo kwishyura na Real Betis ku wa Kane w’icyumweru gitaha taliki ya 29 Kanama 2024 nabwo yayitsinda igahita isezerera muri UEFA Conference League.

Ku rundi ruhande ikipe ya Omonoia FC yo muri Cyprus yari yakiriye Zira FK yo muri Azerbaijan ikinamo myugariro w’ikipe y’igihugu y’u Rwanda, Amavubi Mutsinzi Ange.

Uyu mukino warangiye iyo Zira FK inyagiwe ibitego 6-0 bya Khammas ku munota wa 13, Semedo ku munota wa 34 kuri penariti ndetse no kuwa 70, Stępiński ku munota wa 45+1 no ku wa 54 ndetse na Ewandro ku munota wa 60.

Kuri uyu mukino banyagirirwagamo, Mutsinzi Ange yari yabanje mu kibuga ndetse anarangiza iminota yose y’umukino. 

Biteganyijwe ko Zira FK izakira Omonia FC mu mukino wo kwishyura kuwa Kane w’icyumweru gitaha. Ubwo bivuze ko isabwa kuyitsinda nibura ibitego biri hejuru ya 7-0.

Bizimana Djihad n’ikipe ye ntabwo byabakundiye

Ikipe ya Mutsinzi Ange yakubiswe ibitego 2-0

Amakipe akinamo abanyarwanda Mutsinzi Ange Jimmy na Bizimana Djihad ntabwo yahiriwe n’umukino ubanza w’ijonjora rya nyuma rya UEFA Conference League aho yaraye atsinzwe.

Zira FK ya Mutsinzi Ange Jimmy ni yo yahuye n’uruva gusenya rukomeye aho yanyagiriwe muri Cyprus 6-0.

Iyi kipe yo muri Azerbaijan yari yasuye Athletic Club Omonia Nicosia gusa ntabwo urugendo rwaje kuba rwiza kuko igitego cya Khammas ku munota wa 13, bibiri bya Stępiński ku munota wa 45+1 na 54, kimwe cya Ewandro ku munota wa 60 na bibiri bya Semedo ku munota wa 34 na 70 byatumye bagira inzozi mbi.

Mutsinzi Ange Jimmy akaba yari mu kibuga akina iminota yose 90, bisa n’aho bavuyemo batageze ku matsinda ya Conference League kuko ubu basabwa kuzatsinda ku kinyuranyo cy’ibitego 7 mu mukino wo kwishyura uteganyijwe tariki 29 Kanama 2024 ibintu bisa n’aho bidashoboka.

Ku rundi ruhande, Kryvbas FC yo muri Ukraine ya Bizimana Djihad yari yasezerewe muri Europa League, yari yagiye gushakishiriza muri Conference League na yo ntabwo byagenze neza.

Yari yakiriye Real Betis yo muri Espagne, yaje kubatsindira mu rugo ibitego 2-0, ni umukino Bizimana Djihad yakinnye iminota yose 90.

Ni ibitego bya Ávila ku munota wa 13 na Sánchez ku munota wa 62 bakaba basabwa kuzabyishyura tariki ya 29 Kanama 2024 mu mukino uzabera muri Espagne.

Bizimana Djihad na Kryvbas FC ntabwo byagenze neza

Zira FK na Mutsinzi Ange banyagiriwe muri Cyprus

Nubwo ikipe y’igihugu y’abagore yatsinzwe umukino usoza itsinda D mu ijonjora ry’ibanze mu gushaka itike y’igikombe cy’Isi cya Basketball ni yo yazamutse iyoboye iri tsinda.

Ejo ni bwo hakinwaga umunsi wa nyuma w’amatsinda mu ijonjora ry’ibanze mu gushaka itike y’igikombe cy’Isi cya Basketball mu bagore rimaze iminsi ribera mu Rwanda.

Mu itsinda D u Rwanda rurimo ni rwo rwazamutse ruyoboye nubwo rwaraye rutsinzwe n’Ubwami bw’Abongereza amanota 75-61 mu mukino warebwe na Perezida Kagame na Madame Jeannette Kagame.

Abakobwa b’u Rwanda ntabwo batangiye neza kuko agace ka mbere bagatsinzwe amanota 16-10, aka kabiri bagatsindwa 29-13, aka gatatu na ko bagatakaza ku manota 22-16 mu gihe aka nyuma ari ko batsinze amanota 22-8.

Undi mukino wo muri iri tsinda, Argentine yatsinze Lebanon amanota 60-49.

Mu itsinda C, Senegal yatsinze Philippines amanota 87-62 mu gihe Hungary yatsinze Brazil amanota 87-66.

Imikino ya 1/2 izaba ku munsi w’ejo ku wa Gatandatu, Senegal yazamutse ari iya mbere mu itsinda C ikaba izahura n’Ubwami bw’Abongereza bwabaye aba kabiri mu itsinda D.

U Rwanda rwa mbere mu itsinda D, muri 1/2 ruzahura na Hungary ya kabiri mu itsinda C.

U Rwanda rwatsinzwe n’Ubwami bw’Abongereza

Perezida Kagame na Madame Jeannette Kagame barebye uyu mukino

Perezida Kagame yanenze Umujyi wa Kigali uvuga ko moteri ihari idacana amatara yose ya Kigali Pelé Stadium ko ari ibintu bitagakwiye kuba byarabaye.

Ni nyuma y’uko kuva mu mpera z’umwaka w’imikino ushize Umujyi wa Kigali watangaje ko nta mikino yahabera ni njoro kubera ko amatara afite urumuri rudahagije.

Rayon Sports uyu munsi yagombaga kuhakirira Amagaju saa 18h00′, yongeye gushimangira ko nta mukino wahabera kubera ikibazo cy’amatara uyu mukino ukaba wazanywe saa 18h00′.

Ni ibintu byakuruye impaka nyinshi cyane ku mbuga nkoranyambaga bitewe n’iyi baruwa Umujyi wa Kigali wari wandikiye FERWAFA.

Umujyi wa Kigali wongeye gushyura umucyo kuri iki kibazo maze ugira uti “Iki kibazo ntabwo cyananiranye, kirimo gushakirwa umuti urambye.Uyu munsi moteri dufite muri Kigali Pelé Stadium ntabwo ibasha gucana amatara yose ngo ikibuga kibone bikwiriye ku buryo haba imikino ya ninjoro. Icyakora, mu gihe abagiye gukina bafite ubushobozi bwo kuzana moteri iyunganira, bemererwa gukina ninjoro.'

Aha ni ho Perezida Kagame yaje akanenga Umujyi wa Kigali avuga ko iki kibazo kitagakwiye kuba cyarabaye.

Ati “Ibi ni ibintu bitagakwiye kuba byarabayeho na mbere hose'.

Umujyi wa Kigali uvuga ko watumijeho indi moteri ifite ubushobozi ikaba izagera mu Rwanda mu mezi 3 ari imbere.

This should NOT have happened in the first place!!!

— Paul Kagame (@PaulKagame) August 22, 2024

Amatara ya Kigali Pelé Stadium ubu ntabwo acana yaka neza

Umukino uheruka kuhabera ntabwo urumuri rwari ruhagije

Perezida Kagame yanenze Umujyi wa Kigali