Category: Uncategorized

Yabasuye ku mugoroba wo kuwa Gatanu ubwo iyi kipe yakoraga imyitozo ya nyuma ibanziriza uyu mukino bafitanye na Pyramids FC.

Ambasaderi CG Dan Munyuza yavuze ko ubwo yaganiraga n’abakinnyi yababwiye ko bishimiye kuba bagiye gukinira mu Misiri ndetse ko babashyigikiye.

Ati: “Abakinnyi nababwiraga ko twishimiye ko baje gukinira muri iki gihugu cya Misiri kandi ko tubari inyuma, tubashyigikiye kandi ko intsinzi yabo ari intsinzi y'igihugu cyacu ari intsinzi y'Abanyarwanda, iy'abafana ba APR FC muri rusange”.

Yakomeje avuga ko urebye uko APR FC yakinnye umukino ubanza kubona intsinzi n’uyu munsi bishoboka ndetse anasobanura ko mu Misiri nta Banyarwanda benshi babayo n’abahari bakaba bari kure ya Cairo gusa abahari bose bakaba baraba bari ku mukino.

Ati” Urebye ukuntu umukino w'i Kigali wagenze biduha icyizere ko nibatanga ibyo bafite byose bagakina neza barabona intsinzi. 

Iki gihugu cya Misiri ntabwo kirimo Abanyarwanda benshi ngira ngo twese turi nk’i 142, abenshi ni abanyeshuri bari kure ya Cairo ariko abari hano twese turaba duhari tureba umupira dufana ikipe yacu ya APR FC”.

Yanashimiye abafana ba APR FC baherekeje ikipe. Ati: “Iicya mbere ni ukubashimira ko bagaragarije ikipe yabo urukundo no kugaragaza ko bakunda umukino w'umupira w'amaguru. Icyo nabwira rero abafana baje ndetse n'abataje ni uko ikipe yabo aho yajya gukina hose baba bakwiye gukora iyo bwabaga bakayiherekeza bakayishyigikira kuko iyo abakinnyi bakina bafite n'ababashyigikira bibatera umurava akenshi bikavamo n'intsinzi”.

Ibi byabaye nyuma yuko ejo ari bwo Umugaba Mukuru w'Ingabo z'u Rwanda, akaba n'Umuyobozi w'Icyubahiro w'Ikipe ya APR FC, General Mubarakh Muganga nawe yasabye abakinnyi b'iyi kipe gusezerera FC Pyramids yo mu Misiri bakinjira mu matsinda ya CAF Champions League bahigurira Inkotanyi.

Ikipe ya APR FC irakina na Pyramids FC kuri uyu wa Gatandatu Saa mbili.

Umukino ubanza wabereye muri Stade Amahoro warangiye amakipe yombi anganya igitego 1-1. Bivuze ko kugira ngo ikipe y’Ingabo z’igihugu ikomeze igere mu matsinda isezereye Pyramids FC isabwa nibura kwinjiza igitego kugira ngo ibe yakomeza. 

Ishobora gutsinda 1-0, 2-0, 2-1… cyangwa no kunganya ibitego biri hejuru ya 2 kubera ko CAF igiha agaciro igitego cyatsindiwe hanze.

Ambasaderi w'u Rwanda mu Misiri, CG Dan Munyuza yavuze ko bari inyuma y’ikipe ya APR FC 

Harabura iminsi ibiri gusa Irushanwa Mpuzamahanga rya Tennis ‘Rwanda Open M25’ rigatangira, abakinnyi b’abanyarwanda bakaba biteguye kwitwara neza.

Mu 2023 ni bwo Rwanda Open yari isanzwe ibera mu Rwanda buri mwaka, ikitabirwa n’Abanyarwanda n’abandi bakinnyi bavuye mu Karere, yazamuwe ku rundi rwego itangira kwitabirwa n’ababigize umwuga.

Ni ku nshuro ya kabiri rigiye kuba riri ku ngengabihe ya ITF Word Tennis Tour 'Futures', ku rwego rwa gatatu rw’amarushanwa akomeye ku Isi, aho rizatanga amanota ku rutonde rwa ATP.

Ni irushanwa icyumweru cya mbere kizakinwa tariki ya 23-29 Nzeri mu gihe icya kabiri ari tariki ya 30 Nzeri kugeza 6 Ukwakira 2024, imikino yose izabera muri IPRC Kigali.

Mu kiganiro n’itangazamakuru, perezida w’Ishyirahamwe ry’umukino wa Tennis mu Rwanda, Karenzi Theoneste yavuze ko ubu ibintu byose biri ku murongo biteguye neza.

Ati “Irushanwa turyiteguye neza kandi tumaze kumenyera. Abakinnyi bacu twizeye ko bazahatana ariko nk’uko nabivuze Abanyarwanda bazaze gushyigikira aba bana kuko na bo bagira ishyaka ryo gukina neza.”

Yakomeje avuga ko abakinnyi b’abanyarwanda ikintu babura ari amarushanwa menshi n’aho ubuhanga bw’umukino bwo barabufite.

Ati “Ikintu abakinnyi bacu babura ni ukubona amarushanwa menshi, tekinike zo barazifite, kuzana amarushanwa umuntu akayabegereza bizabafasha.”

Yavuze kandi ko bisaba kwihangana, gusa ngo amarushanwa ya National Championships azajya aba buri kwezi azafasha abakinnyi, bifuza ko bazajya bitabira bafite amanota atari kuri ‘Wild Card’, cyane ko amanota abakinnyi bazabona muri aya marushanwa ni yo ishyirahamwe ry’Umukino wa Tennis rizajya rishingiraho rikora urutonde ngarukakwezi rw’uko abakinnyi bakurikiranye (national ranking).

Ati “Ntabwo umwana yavuka ngo ahite yuzura ingombyi, bizajya bibatera gukora cyane kugira ngo bitware neza.”

“Ikindi ariya manota ya ririya rushanwa rya rizajya riba buri kwezi, azajya ashingirwaho bitewe n’uko urutonde ruhagaze, nta muntu uzajya ahabwa impano ubu ni ukubikorera.”

Ishimwe Claude umwe mu bakinnyi bazahagararira u Rwanda, yavuze ko biteguye neza kandi yizeye ko bazitwara neza.

Ati “Umukinnyi ahora yiteguye nk’umusirikare, turiteguye nta kintu na kimwe bataduhaye, icyo tubizeza ni uko tuzakora uko dushoboye. “

“Bitewe n’amarushanwa aheruka tuvuyemo, yagaragaje ko twiteguye neza kandi tuzitwara neza.”

U Rwanda ruzahagararirwa n’abakinnyi 7. Bari batandatu bahawe ‘Wild Card’ ariko Karenzi Brian yaje kugira amanota amwemerera kwitabira irushanwa bitewe n’uko hari utaraje mu bari imbere, yahise rero asimbuzwa Manishimwe Emmanuel.

Iri rushanwa rikaba rizatwara amafaranga y’u Rwanda ari hagati ya miliyoni 120 n’157, muri yo ibihumbi 25 by’amadorali bizajya mu bihembo.

Karenzi Theoneste, perezida w’Ishyirahamwe ry’umukino wa Tennis yavuze ko ibintu byose biri ku murongo

Abakinnyi bavuze ko bahawe byose bakeneye

Ishimwe Claude yavuze ko biteguye neza

Abanyamakuru bateze amatwi basobanurirwa byinshi kuri iri rushanwa

Uyu mwuka ni ingenzi cyane mu gukonjesha ibintu bitandukanye kuko ugeza ku kigero cya 196°C munsi ya zeru.

Ibi bituma wifashisha mu nganda zitandukanye nko gukonjesha imashini zitandukanye, kubika ibiribwa byangirika, mu buvuzi nko mu kubika no gutwara neza amaraso, intanga n'ibindi.

Mu bworozi bw'u Rwanda uwo mwuka wifashishwa mu kubika neza intanga ziterwa inka kuko ziba zikeneye kugenda mu bukonje bwinshi kugira ngo zitangirika.

Uruganda rushya ruzubakwa mu Karere ka Kayonza rukazatwara agera kuri miliyari y'Amafaranga y'u Rwanda.

Umuyobozi Mukuru Wungirije Ushinzwe Iterambere ry'Ubworozi mu Kigo gishinzwe Iterambere ry'Ubuhinzi n'Ubworozi, RAB, Dr. Solange Uwituze yabwiye IGIHE ko urwo ruganda ruzaba rufite ubushobozi bwo gukora uwo mwuka uwo mwuka (liquid Nitrogen) ungana na litiro 2000 ku isaha.

Ati 'Ni uruganda ruzubakwa i Kayonza. Tuzatwara agera kuri miliyari 1 Frw. Ubusanzwe uwo mwuka twawukuraga mu nganda ebyiri dufite zirimo urwa Rubona (ruherereye i Huye) n'urwa Rubilizi ruhereye mu Mujyi wa Kigali.'

Izo nganda zindi na zo zifite ubushobozi bwo gutunganya litiro 2000 za liquid nitrogen mu isaha ukifashishwa mu kubika no kugeza intanga zitangwa n'ibimasa by'icyororo biba kuri Sitatiyo ya RAB ya Songa mu Karere ka Huye.

Iyo sitasiyo iherereye mu Murenge wa Kinazi yaganewe hegitari 393 zagenewe kororeraho ibimasa bitanga intanga z'icyororo,

Ni umushinga uzafasha abo mu Burasirazuba basanzwe bazwiho gukora ubworozi bwagutse kubonera intanga hafi, bakongera umusaruro.

Ni mu gihe kuko abo borozi garagaza ko bagihura n'ibibazo birimo kutazibonera igihe, kuzitera ntizifate n'ibindi bituma bayoboka ibyo gukoresha imfizi zisanzwe.

Umwe mu bororera mu Karere ka Nyagatare witwa Bindebe William yagize ati 'Kenshi ntabwo zifata. Nkanjye nateresheje intanga inka enye zose ntizafata. Kandi nishyuye amafaranga. Binyobeye rero nzirekera imfizi.'

Mugenzi we witwa Muyango Peter na we wororera i Nyagatare yavuze ko izo ntanga zabikwaga nabi, abazitera na bo ntibaboneke bikaba ikibazo.

Ati 'Uhamagara veterineri inka yarinze ugasanga yagiye guterera undi mworozi, akakugeraho inka yarindutse kuko aba akeneye guhembwa akayitera inka ntifate. Tubonye intanga zibikwa hafi na byo byadufasha.'

Guverinoma y'u Rwanda yafashe icyemezo cyo gukoresha ikoranabuhanga mu buhinzi n'ubworozi mu buryo butaziguye. Nko mu bworozi, aborora ingurube uyu munsi bafashwa kubona intanga z'ayo matungo mu gihe gito cyane hifashishijwe drones.

Abajijwe niba iryo koranabuhanga ritafasha no mu kugeza intanga z'inka ku borozi bikozwe vuba, Dr Uwituze yavuze ko bigoye cyane bijyanye n'uko intanga z'inka zikenera ubukonje bwinshi kurusha iz'ingurube.

Ati '[Kuzitwara hifashishijwe drones] biragoye. Impamvu ni uko intanga z'ingurube zitwarwa kuri 17oC ari yo mpamvu byoroshye kuzitwara muri drones. Naho intanga z'inka zitwarwa mu bukonje bwinshi cyane (-196 oC). Ni na yo mpamvu bigoye kuzitwara muri drones.'

Uyu muyobozi yasobanuye ko gushyira ubwo bukonje bwinshi cyane mu dupfunyika dutwarwa na drones bigoye, icyakora yemeza ko bakibikorera ubushakashatsi ku bufatanye na Zipline Rwanda, ikigo gifite izo ndege zitwara.

Gutera intanga hifashishijwe uburyo bugezweho ni bimwe mu byo aborozi bagirwa inama mu kongera umukamo no kwirinda indwara imfizi isanzwe ishobora kuba ifite ikayanduza inka.

Imibare ya Minisiteri y'Ubuhinzi n'Ubworozi igaragaza ko mu mwaka w'ingengo y'imari wa 2023/2024 inka 109.209 zatewe intanga hifashishijwe uburyo bugezweho.

Mu myaka irindwi ishize u Rwanda rwakomeje gukora uko rushoboye mu guteza imbere ubuhinzi n'ubworozi byatumye umukamo ugera kuri litiro z'amata zingana na miliyari.

Uwo musaruro w'amata wari uvuye kuri litiro miliyoni 776, bituma n'amakusanyirizo y'amata na yo yiyongera agera ku 134 avuye kuri 56 yabarurwaga mu 2017.

Byagizwemo urihare kandi no guteza imbere gahunda zitandukanye zituma inka ziyongera ariko zikaba zimwe zitanga umusaruro, kuko nko mu Muri Kame 2023, mu Rwanda hari inka 1,644,692 habariwemo n'izatanzwe muri gahunda ya Girinka.

Gutera inka intanga hifashishijwe uburyo bugezweho byongera umukamo bikarinda inka kugira indwara za hato na hato

Yabaye ku mugoroba wo kuri uyu wa Gatanu tariki 20 Nzeri 2024. Ni siporo yitabiriye n'abaturage aka Karere n'abo mu bindi bice bihegerereye. Aba bahanzi basabanye n'aba baturage binyuze muri iyi soporo, mbere y'uko babataramira kuri uyu wa Gatandatu tariki 21 Nzeri 2024.

Ni igitaramo kizabera ku kibuga cya Paruwasi ya Kibungo guhera saa munani z'amanywa. Mu ijambo rye, Umuyobozi w'Akarere ka Ngoma, Niyonagira Nathalie, yasabye abitabiriye iyi siporo kuzitabira igitaramo cya MTN Iwacu Muzika Festival.

Yibukije kandi abaturage kwitabira gahunda za Leta no gukora cyane bakikura mu bukene by’umwihariko yasabye urubyiruko kwirinda ibiyobyabwenge.

Aba bahanzi bagiye gutaramira mu Karere ka Ngoma, nyuma yo gutanga ibyishimo mu Karere ka Musanze, Gicumbi ndetse no muri Nyagatare. Bamwe muri aba bahanzi, ni ubwa mbere bari kuririmbira muri utu turere, kandi bagaragaza ko biri mu bikomeza urugendo rwabo.

Ibi bitaramo biri kuririmbamo abahanzi barindwi barimo: Bruce Melodie, Bwiza, Chriss Eazy, Kenny Sol, Bushali, Ruti Joel na Danny Nanone. Muri uyu mwaka bazataramira mu turere umunani, ni mu gihe umwaka ushize bageze mu turere tune.

Umuyobozi wa EAP Mushyoma Joseph, aherutse kubwira itangazamakuru ko bagabanyije umubare w'abahanzi baririmba muri ibi bitaramo, kubera ubusabe bw'abahanzi n'abafana, kuko uko babaga benshi batabonaga umwanya uhagije wo gutaramira abakunzi babo.

Ati 'Kugabanyuka ku mubare w'abahanzi ni ukugerageza kongera igihe umuhanzi amara ku rubyiniro, ubushize bamaraga iminota 15 ariko ubu turashaka kubaha hagati ya 25 na 30, ku buryo umuturage ataramirwa n'umuhanzi mu buryo bwuzuye akabona ibyo yamuteguriye byose.' 

Yongeraho ati 'N'abahanzi ubwabo bajyaga batubwira ngo dutangira gushyuha mugahita mudukuraho. Twagiye twumva ibitekerezo by'abitabiriye ibitaramo bakavuga ngo abahanzi muduha benshi cyane twatangira gukunda umuhanzi mukamukuraho niyo mpamvu twagabanyijeho gato kugira ngo twongere iminota y'abahanzi.'

Abahanzi bitabiriye MTN Iwacu Muzika Festival ndetse n'abayobozi bakoze siporo

Amagana y'abaturage yakoranye siporo n'abarimo Bruce Melodie, Danny Nanone, Chriss Eazy na Bwiza 

Abayobozi mu nzego zinyuranye mu Karere ka Ngoma bitabiriye siporo y'umugoroba 

Kenny Sol ari kumwe na Bruce Melodie muri siporo yabereye mu Karere ka Ngoma

Inzego z'umutekano zafashije abahanzi n'abaturage bo mu Mujyi wa Kibungo gukora siporo mu ituze

Abayobozi basabye abaturage kuzitabira igitaramo cya MTN Iwacu Muzika Festival

Umuhanzikazi Kenny Sol [Uri hagati] uherutse gukorana indirimbo na Dj Neptune

Umuhanzikazi Bwiza [Uri hagati] ari muri siporo rusange n’abaturage bo mu bice bitandukanye mu Mujyi wa Kibungo

Umukunzi wa Rayon Sports, Habiyakare Saïdi yabwiye umuyobozi wa Gasogi United Kakooza Nkuriza Charles [KNC] ko bashaka kumutsinda agahurwa umupira w’amaguru.

Ni nyuma y’uko KNC atangaje amagambo akomeye kuri Rayon Sports avuga ko ku wa Gatandatu ari ubukwe bazacyura umugore wa bo, avuga ko bamwe mu bahoze bayobora iyi kipe bari barahunze ariko igihangange Gasogi kibagaruye cyane ko bakusanyije amafaranga yo gufasha kwitegura uyu mukino.

Ni umukino w’umunsi wa 4 wa shampiyona y’icyiciro cya mbere mu Rwanda umwaka w’imikino wa 2024-25 Gasogi United izakiramo Rayon Sports ejo saa 19h00′ kuri Stade Amahoro.

Mu kiganiro City Sports, Habiyakare Saïdi usanzwe uba muri Amerika, yamubwiye ko agasozi ka Gasogi kadafite ikipe yahangana na Rayon Sports.

Ati “Nk’uko nabikubwiye ko nkwemera nka perezida wagerageza kuba waryoshya ibirori ariko uri umuperezida utagira ikipe, na we urabizi ko ako gasozi ka Gasogi katagira ikipe yahangara ikipe y’ikigugu nka Rayon Sports, urimo uripima mu bidakunda.”

“Nabikubwiye inshuro nyinshi reka mbigusubiriremo, iyo twahagurutse ntushobora kudutsinda, narabikubwiye cya gihe turi muri Fine FM utangaza ko nyuma yo ku wa Mbere tuzabonana, ku wa Mbere urahunga, uvuza induru ahantu hose uca ibikuba ngo wibwe.”

Yavuze ko na shampiyona y’umwaka ushize ijya gutangira nabwo yabivuze ariko nabwo baramutsinda, akaba atumva ahantu uyu munsi akura imbaraga zo kuvuga ko bazatsinda.

Yavuze ko Gasogi United atari ikipe ihatanira shampiyona ahubwo ari ikipe iza gufasha izindi muri shampiyona.

Ati “Ntabwo wakigereranya n’ikipe y’ikigugu, ikipe ya we ni akana, izo ni ikipe ziza gufasha izindi muri shampiyona, ntabwo ari ikipe iza gukinira shampiyona.”

Yakomeje avuga ko bagiye kumutsinda bagatuma ahurwa umupira w’amaguru akaba yanasesa Gasogi United.

Ati “ubu rero tugiye kuguhuza umupira, buri uko uhuye na Rayon Sports iyo kipe ya we urayisesa, usezera muri shampiyona cyangwa ukayisesa, ku wa Mbere noneho ushobora kuyisesa burundu butazagaruka kuko ibyo uzabonesha amaso ya we, tugiye kuhuza umupira w’amaguru.”

Yunzemo ati “twari twakuretse ni wowe ubizanye, tegereza ku wa Mbere uzaba uhari, ntuzayisese cyangwa ngo wirukane abakinnyi, uzihangane ube umusiporutifu.”

Yavuze ko intsinzi yose bazayibona batazabazwa uko yaje igomba kuba ari intsinzi.

Ati “ujya kugura inyama muri busheri (butchery) ntabaza uko inka yabazwe, natwe intsinzi yose ni intsinzi ntitubazwa uko yabonetse. Ntuzampunge ndashaka ko uzansobanurira uburyo ndi ibandi.”

Bagiye guhura Gasogi United iyoboye urutonde n’amanota 7 mu gihe Rayon Sports ari 11 n’amanota 2.

Saïdi yavuze ko bazangisha KNC umupira

KNC na we yahize gutsinda Rayon Sports

Ni umukoro abo baforomo bihaye kuri uyu wa 20 Nzeri 2024 ubwo basozaga amahugurwa y'iminsi atanu bahererwaga na RIB i Kigali Kicaro cya Polisi y'Igihugu.

Abo baforomo bavuze ko bajyaga bakira abakorewe ihohoterwa muri rusange nk'abandi barwayi bose ariko ko bungutse ubumenyi buzatuma babafasha mu buryo bw'umwihariko buborohereza kubona ubutabera.

Nsanzimana Aloys ukorera ku Bitaro bya Butaro mu Karere ka Burera yagaragaje ibyo yungukiye mu mahugurwa n'uko agiye kujya afasha abahohotewe.

Ati 'Ntabwo twari tuzi ko nk'abaforomo twemerewe gufata ibimenyetso, twumvaga ari iby'abadogiteri cyangwa abaganga gusa. Ikindi cyatugoraga ni uburyo bwo gufata ibyo bimenyetso kandi twumvaga ko abahohotewe bagomba kwakirwa n'abakozi ba 'Isange One Stop Center' gusa, ariko ibyo byose twihaweho ubumenyi'.

Yakomeje ati 'Hari nk'igihe twakiraga abahohotwe tukabakira nk'abandi barwayi nyuma tukabohereza kuri Isange. Hari igihe bageragayo bakaba bategereza cyangwa haba ari nijoro bakazagaruka bukeye rimwe na rimwe ibyo bimenyetso byanasibanganye kandi twakabaye twabafashije tukibakira'.

Nsanzimana yongeyeho ko ubumenyi bungutse buzatuma abasha kwakira buri muntu wahohotewe akanabasha kumufasha kubungabunga ibimenyetso nta na kimwe kirangirika.

Undi muforomokazi witabiriye ayo mahugurwa na we yagaragaje uburyo bwihariye agiye kujya yakiramo abahohotewe.

Yagize ati 'Hari nk'igihe twakiraga umuntu afite igikomere yahohotewe tukihutira kumupfuka no kucyoza bya bimenyetso bigasibangana. Tuzajya tubanza kwita ku kumuvura ariko tunakusanya ibyo bimenyetso kuko nyuma y'ibikorwa byo kwa muganga aba azakenera ubutabera kandi bukenera ibyo bimenyetso'.

Umunyamabanga Mukuru Wungirije wa RIB, Kamarampaka Consolée yavuze ko abo baforomo bafite uruhare rukomeye rwo gufasha abahohotewe gusubira mu buzima busanzwe.

Ati 'Amasomo mwahawe azazibe icyuho cy'ibimenyetso bitafatwaga cyangwa bigafatwa ntibibungabungwe bikaba byatakara. Mwasobanukiwe ingaruka zo kudakora izo nshingano neza. Si mwe mwenyine ariko na mwe mufite uruhare mu gutuma hatangwa ubutabera bunoze'.

'Abahohotewe baba bakomerekejwe ku mubiri cyangwa mu marangamutima bihebye bakeneye uwabahumuriza kandi ni mwe mubakira mbere. Iyo umuganga akwakiriye neza aba yatangiye kukuvura neza, rero ni mwe ba mbere mufite izo nshingano'.

Kamarampaka yibukije abo baforomo kandi ko muri bo hadakwiye kugira ukurikiranwaho kurangarana uwahohotewe kuko ibyo ari n'icyaha gihanwa n'amategeko kandi bakaba basobanukiwe bihagije inshingano bafite mu gufasha uwahohotewe kubona ubutabera.

Visi Perezida akanaba uhagarariye Umuryango Haguruka mu buryo bw'amategeko, Munyankindi Monique yavuze ko biteze umusaruro w'ayo mahugurwa mu kugabanuka kw'ibimenyetso bitakara byajyaga bituma ubutabera budatangwa kubera kubura ibifatika bushingiraho kandi icyaha cyo cyarakozwe.

Umwe mu bakozi ba RIB batanze amahugurwa asobanura uko yagenze

Umuryango Haguruka wateye inkunga ayo mahaugurwa n’Ikigo cy’Igihugui gishinzwe Ubuzima byari bihagarariwe

Umunyamabanga Mukuru Wungirije wa RIB, Kamarampaka Consolée yavuze ko abo baforomo bafite uruhare rukomeye rwo gufasha abahohotewe gusubira mu buzima busanzwe

Nsanzimana Aloys ukorera ku Bitaro bya Butaro mu Karere ka Burera yavuze ko nk’umuforomo yamenye ko afite inshingano yo kuvura uwahohotewe ariko no kumufasha kuzabona ubutabera

Abahuguwe babawe impamyabumenyi

Abaforomo bahawe amahugurwa ni ikiciro cya kabiri gihuguwe

Iyi raporo igaragaza ko ikigero cy'ubushomeri muri rusage kitahindutse cyane mu gihembwe cya kabiri cya 2024 ugereranyije n'umwaka wari wabanje kuko cyavuye kuri 15% kigera kuri 16.8%.

Ubushomeri kandi bwakomeje kuba bwinshi mu rubyiruko bugera kuri 20.5% mu gihe ku bakuru bugeze kuri 14.1%.

Imibare yerekana ko urubyiruko rufite imyaka iri hagati ya 16 na 30 rufite imirimo rwari rugeze kuri 59.4% mu gihembwe cya kabiri cya 2024 ruvuye kuri 54.7% mu gihembwe nk'icyo mu 2023.

Mu bafite imyaka iri hagati ya 31 na 54 abafite akazi biyongereyeho 1% bagera kuri 76.1% mu gihe abafite imyaka 55 kuzamura bo biyongereyeho 2.4% bituma bagera kuri 36.2%.

Bigaragara ko ubwiyongere bw'imirimo bwiganje mu nganda, abakoresha imashini n'abateranya inganda ku ijanisha rya 37.5%, abafite ubumenyi mu buhinzi, amashyamba n'uburobyi biyongereye kuri 32.1%, mu gihe mu rwego rwa serivisi no mu bucuruzi biyongereyeho 17.4%

Muri rusange amasaha abantu bamara bakora mu cyumweru yagabanyutseho iminota 24 muri iki gihembwe ugereranyije n'icya kabiri cya 2023, na ho amasaha abagore bakora yagabanyutseho isaha yose mu gihe ayo abagabo bakora atahindutse.

Imibare igaragaza ko urubyiruko rw'u Rwanda rwari 3.495.825 mu 2023, ariko abagera kuri miliyoni 1,4 ntibari bari mu mashuri, mu kazi cyangwa mu mahugurwa mu 2023.

Urubyiruko rufite imirimo rwariyongereye mu gihembwe cya kabiri cya 2024

Babitangaje mu gikorwa cyo gutangiza ku mugaragararo imirimo yo gutunganya icyo gishanga, cyabereye mu Murenge wa Mamba,Mu Karere ka Gisagara gitangijwe na Guverineri w'Intara y'Amajyepfo Kayitesi Alice.

Butera Viateur, umwe mu bahinzi ufite imirima muri icyo gishanga, yavuze ko bahuraga n'ibibazo by'umwuzure watumaga umuceri urengerwa, bagahora bikanga igihombo, bigatuma bahinga isizeni(season) imwe gusa, akizera ko kugitunganya bigiye gutuma umusaruro wiyongera.

Ati 'Iyo imvura yagwaga yangizaga ibyo twabaga twarahinze, ariko ubwo kigiye gutunganywa bizadufasha. Twakoreraga mu gihombo,amafaranga twashoragamo ntitwayabonaga.'

Mugenzi we Mazimpaka Anastase, yavuze ko bahuraga n'ikibazo cyo kurumbya kandi bakoze ariko ubu bagiye kujya barya,ndetse byiyongereho no guhinga isizeni nyinshi, ibizatuma bahorana ibiribwa.

Yagize ati 'Mudushimirire Kagame. Ubu tugiye kurya, twahingaga tukarumbya kubera isuri yarengeraga ibihingwa. Gutunganya iki gishanga bizadufasha, umusaruro wacu wiyongere n'ahari harirunze umucanga tuhahinge.'

Guverineri w'Intara y'Amajyepfo, Kayitesi Alice, yavuze ko gahunda yo gutunganya ibishanga mu Ntara ikomeje kugira ngo umusaruro abaturage bakura mu buhinzi wiyongere.

Ati 'I musozi iwacu ni hato ku buryo tugomba no gushyira imbaraga mu kubyaza umusaruro ibishanga. Uretse iki gishanga cya Nyiramageni, hari n'ibindi bigiye gutunganywa n'umushinga CDAT ku bufatanye na RAB, muri Ruhango, Nyanza na Gisagara. Harimo ibizatangira muri uyu mwaka, hari ibikiri mu nyigo,ariko muri rusange, turashaka ko mu myaka itanu iri imbere bizaba bitunganyije.'

Igishanga cya Nyiramageni gikora ku mirenge ya Mamba na Gikonko yo mu karere ka Gisagara n'Umurenge wa Ntyazo, mu karere ka Nyanza.

Ikindi cyiza, ni uko imisozi igikikije nayo izarwanywaho isuri, ibizatuma umutekano w'ibihingwa birimo wiyongera abahinzi bagaca ukubiri n'ibiza by'imvura.

Biteganyijwe ko hazatunganywa ubuso bwa hegitari 600 mu gishanga no ku nkengero zacyo, bikazatwara asaga miliyari 16Frw.

Kizajya gihingwamo umuceri naho mu nkengero zacyo hahingwemo ibigori, soya, ibishyimbo n'imboga, kikaba gihingwamo n'abaturage basaga 1200.

Imirimo yo gutunganya inkengero z’igishanga yatangiye

Guverineri w’Intara y’Amajyepfo, Kayitesi Alice, arasobanurirwa iby’ingenzi bizaranga uyu mushinga

Abaturage biteze byinshi kuri uyu mushinga birimo no kuzahabwamo imirimo mu gihe cyo gutunganya igishanga cya Nyiramageni.

Guverineri w’Intara y’Amajyepfo, Kayitesi Alice, ubwo yatangizaga ku mugaragaro imirimo yo gutunganya igishanga cya Nyiramageni izatwara miliyari 16Frw.

Iki gishanga cya Nyiramageni cyari cyarapfuye cyane, kugihingamo bisa nko kwigerezaho