Category: Uncategorized

Tuyizere Pierre Claver [Papi Clever] aririmbana n’umugore we Ingabire Dorcas mu itsinda bise Papi Clever & Dorcas rikunzwe bikomeye mu Rwanda ndetse no mu Karere ka Afrika y’Uburasirazuba. Aba bombi bamaranye imyaka 5 babana kuko barushinze mu 2019. Nyuma y’ubukwe bwabo ni bwo batangiye kuririmbana nk’umugabo n’umugore.

Papi Clever yatangiye umuziki mu 2014 nyuma y'imyaka ibiri yari amaze yiga umuziki muri Kigali Music School. Yaririmbye mu makorali arimo Hyssop Choir na Ntora Worship Team. Ingabire Dorcas yaririmbye muri Goshen Choir ya ADEPR Muhoza muri Musanze, magingo aya anatanga umusanzu muri Korali Hoziyana ya ADEPR Nyarugenge.

Papi & Clever na Dorcas bafite umwihariko wo kuririmba indirimbo zo mu gitabo mu buryo bwihariye ndetse bagakora n’izabo bwite, bafite igikundiro cyinshi mu muziki. Bigaragazwa n’ukuntu indirimbo zabo zikunzwe cyane ndetse n’ibitaramo batumirwamo. Bakubutse mu ivugabutumwa muri Amerika, akaba ari nyuma y’amezi macye bataramiye Burayi.

Indirimbo bise “Ameniweka Huru Kweli” iri mu rurimi rw’Igiswahili, yabafunguriye amarembo muri ‘East Africa’ dore ko imaze kurebwa n’abarenga Miliyoni 38 kuri Youtube mu mwaka umwe gusa imazeho. Papi Clever avuga ko iyi ndirimbo bayiririmbye bayikuye mu gitabo cyitwa Nyimbo za wokovu ikaba ari numero ya 40.

Ati “Kuva ntangiye kuyumva hari hashize imyaka irenga 13 nari nkiri umwana muto birumvikana”. Yakomeje asobanura uko inganzo y’iyi ndirimbo yabajemo, avuga ko “Nk’uko twaririmbaga indirimbo zo mu gitabo cy’ikinyarwanda ni na ko twashatse kuririmba iza Swahili ari bwo nayo twaje kuyigeraho turayikora nkuko dusanzwe dukora n’izindi”.

Uyu muramyi yavuze ko batunguwe cyane no gukundwa kw’iyi ndirimbo kugeza ku rwego biriho ubu, ati “Byaradutunguye cyane kuko ntitwabikekaga noneho igakundwa cyane hanze y’u Rwanda. Ni ibintu tutigeze dutekereza mbere turi kuyikora.

Ikiri ku mutima wacu ni ibyishimo byinshi kandi dushimira Imana cyane ko dukomeje kubona ibohora imitima. Benshi bakiriye Yesu benshi basubijwemo imbaraga ku bwayo turabishimira Imana kandi tunashimira abantu badushyigikiye bakayireba kugeza ubu aho igeze”.

Papi Clever na Dorcas bari mu mashimwe yo kwibaruka ubuheture

Tariki 28/08/2020 ni bwo Papi Clever na Dorcas bibarutse imfura yabo y’umukobwa bise Ineza Oaklynn Clever. Nyuma y’umwaka umwe n’amezi 2 bibarutse imfura, Imana yabahaye umukobwa wa kabiri bise Abeza Kylie Clever. Tariki 04 Ukwakira 2024 ni bwo bibarutse ubuheture akaba umwana wabo wa mbere w’umuhungu bise Incungu Jubal Kai Clever.

Mu kiganiro na inyaRwanda, Papi Clever yavuze ko bishimiye cyane umwana wa 3 bibarutse ndetse “ni nk’aho ari ubwa mbere twari tubyaye kuko twaramushakaga cyane kuko nyuma y’abakobwa 2 twumvaga Imana iduhaye n’umuhungu twakwishima cyane. Ni nako byagenze twaranezerewe cyane na n’ubu turacyumva ari nk’inzozi”.

Yagarutse ku mazina bise uyu muhungu wabo [Incungu Jubal Kai Clever], avuga ko izina “Kai” risobanura “Keeper of the keys”, ugenekereje mu Kinyarwanda bikaba bisobanuye umurinzi w’imfunguzo. Yisunze Itangiriro 4:21 mu gusobanura izina Jubal. Haranditse ngo “Murumuna we yitwa Yubalu, aba sekuruza w’abacuranzi n’abavuza imyironge”.

Iki cyanditswe cyumvikanisha ko uyu muhungu wabo bamwifuriza kuzaba umucuranzi ukomeye. Papi Clever ati “Aya mazina twayahisemo kubera kwifuza icyo umwana wacu yaba cyo. Ntawifuriza umwana we ikibi, twamwatuyeho ibyiza kandi tumwaturiraho gukorera Imana kandi twizeye ko bizaba impamo natwe tuzamufasha kubigeraho”.

Kuba umuziki wa Papi Clever & Dorcas wararenze imbibi z’u Rwanda, barabishimira Imana ndetse bakavuga bibatera kurushaho kunoza imikorere yabo. Ati: “Twishimiye cyane kuba umuziki wacu wararenze imbibi z’u Rwanda, ndetse n’ubutumire ni bwinshi cyane cyane mu bihugu nka Kenya na USA, ikibazo kiba umwanya kuko hari n’ibindi tugomba gukora.”

Aba baramyi bakunzwe mu ndirimbo zirimo “Mwokozi Wetu”, bavuga ko bari kurushaho kunoza neza imikorere n’uburyo basanzwe bakoramo ubuhanzi bwabo “kugira ngo umuziki wacu ujye ku rwego mpuzamahanga dukora mu buryo buri ‘professional’ [bwa kinyamwuga]”.

Papi Clever yahishuye ko kuba umuziki wabo uri komora imitima ya benshi hirya no hino ku Isi, ndetse n’imigisha inyuranye bari kubonesha amaso yabo muri iki gihe, “ni amasezerano yasohoye”. Ati: “Twabibwiwe kenshi n’Imana inyuze mu bahanuzi no kudusanga ubwacu bwite, ariko kandi ni n’umugisha utangaje ndetse n’amahirwe twagiriwe n’Uwiteka”.

Yagarutse ku rugendo rw’ivugabutumwa bakubutsemo muri Leta Zunze Ubumwe za Amerika, avuga ko bari batumiwe mu gitaramo cyabereye muri Leta ya Massachusetts mu mujyi wa Boston muri Nzeri 2024, bakaba baraboneyeho gusura n’andi matorero yo mu zindi Leta zo muri USA.

Ati “Ahandi twasuye ni States ya Oregon, iya Michigan ndetse na Ohio dusurayo amatorero atandukanye yiganjemo Abanyakenya, Abanyarwanda, n’Abanyekongo (Congolese)”. Yavuze ko batunguwe no “kubona ukuntu badufata ndetse n’uko bakunda ibyo dukora, byari ibintu bidasanzwe kuri twe”.

Yatangaje ko bakiriwe neza muri Amerika ndetse banyurwa cyane n’ubuhamya bwinshi bw’ukuntu “indirimbo zacu babana nazo umunsi ku wundi tunabonayo n’abandi bakiriye agakiza kubera zo tubishimira Imana”.

Papi Clever na Dorcas bavuze ko umuziki usingiza Imana bakora bawufatanya no kuboha amahema binyuze mu bushabitsi bwunganira cyane umuziki wabo, burimo ibizwi nka ‘Quincaillerie’ aho bacuruza amatara n’ibindi bikoresho bya ‘Installation’ n’ibijyana nabyo byose.

Aba bahanzi barangamiye kogeza Yesu ku Isi hose, bakora ubu bushabitsi binyuze muri kompanyi bise CLEDO Group. Bati “Dukora Videography, Photography, Branding, Printing, Supplying aho dukora amasoko atandukanye mu gufasha ibigo bitandukanye kubona ibikoresho biboroheye”.

Tariki 14 Mutarama 2023 ni bwo Papi Clever na Dorcas baheruka gukora igitaramo cyabo bwite bise “Yavuze Yego Live Concert”, cyabereye muri Camp Kigali. Nyuma y’umwaka umwe n’amezi 9, bagiye kongera gutaramira abakunzi babo mu gitaramo gikomeye bise “Made In Heaven Concert” kizaba tariki 10 Ugushyingo 2024.

Bavuze ko gutegura iki gitaramo ari iyerekwa ry’Imana. Bati: “Made in Heaven ni igitaramo turi gutegura akaba ari iyerekwa ryaturutse ku Mana bisobanuye ko ibyo dutanga atari ibyacu ahubwo biba byakorewe mw’ijuru bigamije gukiza imitima y’abantu, ijuru rikabiducishamo kugira ngo bigere mu mitima yacu bunatunyuremo bigere ku bandi”.

Iki gitaramo kizabera i Rusororo ku Intare Conference Arena, kandi “Kwinjira bizaba ari ubuntu”. Papi Clever na Dorcas bazaba bari kumwe n’abandi baramyi barimo Pastor Lopez wo mu gihugu cy’u Burundi, Chryso Ndasingwa umaze kumenyekana cyane aho akunzwe mu ndirimbo “Wahozeho”, ndetse na True Promises.

Papi Clever ati “Tuzagirana umugisha n’umuntu wese uzabasha kuhagera. Icyo twabasaba ni ukuziyandikisha kuko tuzabashyiriraho uburyo bwo kwiyandikisha. Aho tuzakorera ni hato, uzatinda kwitandikisha hazahita huzura ariko ubutaha buriya tuzakorera ahagutse”.

Papi Clever na Dorcas batumiye abaramyi barimo Chryso Ndasingwa muri ‘Made in Heaven Concert’

Papi Clever na Dorcas ubwo bataramiraga muri Leta ya Oregon muri Leta Zunze Ubumwe za Amerika

Papi Clever na Dorcas bahesheje umugisha abatuye i Boston muri Massachusetts

Papi Clever yatangiye aririmba ari wenyine, nyuma yo kurushinga atangira kuririmbana n’umugore we

Dorcas Ingabire yatangiriye umuziki muri Goshen Choir mbere yo kurushinga

Umwana w’umuhungu baherutse kwibaruka bamwifuriza kuzaba umucuranzi ukomeye

Papi Clever na Dorcas bamaze imyaka 5 babana nk’umugabo n’umugore

REBA INDIRIMBO “AMENIWEKA HURU KWELI” YA PAPI CLEVER & DORCAS FT MERCI PIANIST

Mu cyumweru gishize ni bwo Rwanda Premier League ibinyujije ku mbuga nkoranyambaga zayo yashyize hanze itangazo rivuga ko kubera gahunda z’ikipe y’igihugu y’u Rwanda, Amavubi, isubitse imikino y’umunsi wa gatandatu wa shampiyona ndetse n’umukino w’ikirarane wagombaga kuzahuza ikipe ya Rayon Sports na APR FC.

Nyuma yo gutangaza ibi benshi bagaragaje ko bidakwiye bitewe nuko imikino ya shampiyona igenda isubikwa igihe kirekire kubera ikipe y’igihugu kandi mu bindi bihugu ho usanga ikomeza gukinwa.

Ibi ni byo byatumye kuri uyu wa Kabiri haba inama hagati ya Rwanda Premier League n’abayobozi b’amakipe kugira ngo bige ku birimo uko imikino ya shampiyona yakomeza gukinwa. Iyi nama yemeje ko imikino yo ku munsi wa gatandatu wa shampiyona y’icyiciro cya mbere mu Rwanda yari yasubitswe igomba gukinwa mu mpera z’iki Cyumweru. 

Umukino wa Rayon Sports na APR FC wo ntabwo byemejwe ko uzakinwa ahubwo hubahirijwe icyifuzo cya APR FC aho yanditse isaba ko hakurikizwa uko ingengabihe ikurikirana. Ubwo bivuze ko APR FC izakina na Gasogi United mu gihe Rayon Sports yo izakira Bugesera FC kuri Kigali Pelé Stadium.

U Butaliyani bwafunguye ibigo bibiri muri Albania, ari nabyo bizajya byakira izi mpunzi zigomba kuba ari abagabo gusa kuko abagore, abana, abafite uburwayi, abahohotewe n'abandi bafite intege nke, bazajya bakirirwa mu Butaliyani.

Imiryango ntabwo izajya itandukanywa, bivuze ko mu gihe umugabo ari kumwe n'umuryango we, ibyangombwa bye bizajya bisuzumirwa mu Butaliyani.

Ubwato bw'u Butaliyani bwabanje gutwara abagabo 16 barimo 10 bakomoka muri Bangladesh n'abandi batandatu bakomoka mu Misiri. Ibigo boherejwemo bifite ubushobozi bwo kwakira abimukira 400, ariko mu gihe kiri imbere bizaba bishobora kwakira abimukira 880.

Ni ibigo bizajya bigengwa n'amategeko y'u Butaliyani, ariko umutekano wabyo inyuma urindwe n'inzego z'umutekano za Albania.

Aya masezerano afite igihe cy'imyaka itanu, aho Albania izakira abagabo ibihumbi bitatu mu gihe u Butaliyani buzaba buri gusuzuma ibyangombwa byabo muri rusange. Iki gihugu kizishyura miliyoni 60 z'Amayero.

Iyi gahunda ijya gusa nk'iyo u Bwongereza bwari bwagiranye n'u Rwanda, nayo yari agamije gushaka umuti w'ibibazo by'abimukira binjiraga muri icyo gihugu badafite ibyangombwa, bagahombya Leta akayabo k'amafaranga.

---

Virusi ya Marburg yagaragaye mu Rwanda ku wa ku wa 27 Nzeri 2024. Kugeza ku wa 14 Ukwakira 2024 hari hamaze kwandura abantu 62, abakiri kwitabwaho ari 21 abitabye Imana ari 15 mu gihe abakize ari 26.

Ni indwara yaciye igikuba bijyanye n'ububi bwayo, aho n'ibihugu nka Amerika byari byatangiye kubuza abaturage babyo kujya mu Rwanda n'abahari bagakorera mu rugo kugira ngo batandura.

Ku rundi ruhande ariko abagenderera u Rwanda bagaragaje ko batakanzwe n'iyo ndwara bijyanye n'ingamba u Rwanda rugerageza gushyiraho ingamba zikarishye zo guhangana na yo.

Umwe mu baturutse mu Buyapani witwa Yuki Yamamoto waganiriye na RBA yagaragaje ko yaje gusura u Rwanda bijyanye n'uko yumvaga ab'iwabo baruvuga neza agaterwa imbaraga kandi n'uko yumvaga ko u Rwanda rwafashe ingamba zikaze mu kwirinda Marburg.

Ati 'Byatumye nta mpamvu yatuma ntasubukura urugendo nari mfite rwo kuza gusura Urwibutso rwa Jenoside yakorewe Abatutsi.'

Ibyo bihamywa kandi na mugenzi we wo mu Butaliyani witwa Gianluca D'Addese wagize ati 'Numva ntekanye. Nta gihe nigeze numva mfite ubwoba kuko mu Rwanda ni ahantu heza muri Afurika, hamwe waza ugatembera uri wenyine nta kibazo ufite.”

Umuyobozi w'Ishyirahamwe ry'Abatanga serivisi z'amatike y'indege mu bihugu 13 bya Afurika, Nicanor Sabula agaraga ko mu minsi itatu amaze mu Rwanda yiboneye uburyo u Rwanda rutekanye ndetse rwubahiriza amategeko kugira ngo iyo ndwara idakwirakwira henshi.

Ati 'Ndifuza kubwira Abanyafurika n'abo mu bindi bihugu byo hanze yayo ko Kigali itekanye mu gusurwa ndetse turi hano ngo tubigaragaze.'

Uretse abanyamahanga kandi bagaragaza uburyo Marburg itagomba gukoma mu nkokora abashaka gusura u Rwanda, Abanyarwanda barimo na rwiyemezamirimo witwa Uwimana Judith na we barabihamya.

Uwimana ufite ikigo gitanga serivisi zo gutembereza ba mukerarugendo cya Judith Safaris, agaragaza ko umubare w'abo bakira ukomeje kuzamuka, ibigaragaza uburyo iyo ndwara itakagombye gutuma abantu basubika gahunda zabo.

Ati 'Dufite abava muri Amerika, mu bice bitandukanye bya Afurika, abava mu Burayi. Uyu munsi hari abo nakiriye, ubu hari abo ndakira n'ejo barahari yewe uku kwezi kose nzabakira.'

Mugenzi we Dorothy Gashaija uyobora hotel Ndaru Luxury Suites, agaragaza ko buri munsi boherereza abakiliya babo amakuru ajyanye n'uko igihugu kiri kwitwara mu guhashya iyo ndwara, ibigira uruhare mu kongera umubare bakira.

Ati 'Tubaha buri munsi amakuru yavuye muri Minisiteri y'Ubuzima, ubona nta kibazo bariteguye kuza. Dufite abantu benshi babitse imyanya yabo hano bemeje ko bazaza. Hari abaje ejo, hari n'abari kuza. Nta mpungenge dufite ko Marburg yadukoma mu nkokora.'

Mu gihe u Rwanda ruri gukora umunsi ku wundi ngo iyo ndwara iranduke, Umuyobozi Mukuru w'Ikigo Nyafurika gishinzwe Kurwanya indwara (Africa CDC), Dr. Jean Kaseya na we aherutse kuvuga ko Marburg igiye gucika mu Rwanda, bijyanye n'uburyo iri kugenzurwa, aho imibare y'abakira yiyongera abapfa bakagabanyuka.

Mu minsi ishize kandi Ishami ry'Umuryango w'Abibumbye ryita ku Buzima, OMS, ryatangaje ko bitari ngombwa gushyiraho ingamba zikumira ingendo cyangwa zigabanya ibikorwa by'ubucuruzi hagati y'u Rwanda n'ibindi bihugu, kubera ko ibyorezo bya Marburg na Mpox byabashije gukumirwa ku buryo bitakwirakwiriye mu gihugu.

Umuyobozi Mukuru wa OMS, Dr. Tedros Adhanom Ghebreyesus, yavuze ko “Hashingiwe ku isuzuma ryakozwe kuri Mpox na Marburg, OMS iratanga inama z'uko ingamba zo gukumira ingendo n'ubucuruzi zidakenewe.”

Yavuze ko icyihutirwa ari ubukangurambaga ndetse no gukorana n'inzego z'ubuzima mu rwego rwo kurushaho guhangana n'iki cyorezo muri rusange.

---

Icyemezo gihagarika ibikorwa byo gushyingura mu irimbi rya Nyamirambo cyasohotse ku wa 14 Ukwakira 2024.

Ibaruwa yanditswe n'Umurenge wa Nyamirambo igaragaza ko inama bagiriwe n'itsinda ry'Akarere ka Nyarugenge rishinzwe ubutaka 'batugaragarije ko ubutaka bwo gushyinguraho buza n'ubwarangiye iyo ikaba ari yo mpamvu musigaye mushyingura mu mbago z'umuhanda.'

Iri tangazo ritegeka ko ibikorwa byo gushyingura muri iri rimbi bihita bihagarara, babirengaho bagahanwa.

Umuyobozi wa sosiyete RIP Company Ltd icunga iri rimbi, Charles Uwimbabazi yabwiye IGIHE ko icyemezo cyafashwe n'Umurenge wa Nyamirambo kitari gikwiye kuko mu nama baherukaga gukora bari basanze ikibazo cy'irimbi kizasuzumwa ku wa 30 Ukwakira.

Ati 'Hari aho batweretse tugomba kugeza kuko hariya hahari kugeza mu 2017 […] umuhanda waruzuye, ahanyura amazi haruzuye nta kibazo numva cyagombye kuba gihari ariko icyo si cyo kibazo, ikibazo gihari ni icy'umuturage ngo wahubatse inzu udashaka kujya asohoka areba imva'

Uwimbabazi avuga ko ubutaka busigaye mu kibanza cy'irimbi ari buto ariko ngo bwari butari bwuzura, gusa akemeza ko na bo babizi ko irimbi ryari risigaje igigihe gito.

Umuvugizi w'Umujyi wa Kigali Emma Claudine Ntirenganya yabyiye IGIHE ko irimbi rya Nyamirambo ryuzuye abahegereye bashaka gushyingura bakaba basabwa gushaka ahandi habegereye mu marimba atandukanye ari muri uyu mujyi.

Ati 'Rwiyemezamirimo ashobora gukora ibintu bitabaho. Ubwo niba Umurenge ubona ko huzuye buriya huzuye.'

Ntirenganya yahamije ko ibyavuzwe ko hari inyubako yahubatswe yaba ari yo nyirabayazana yo kwihutira gufunga irimbi ari urwitwazo kuko 'irimbi rya Nyamirambo ryaruzuye.'

Umujyi wa Kigali uvuga ko hari gutekerezwa uburyo bwo gushyingura bwarushaho kunozwa birimo no gushishikariza abantu gutwika imibiri, ndetse no kuba hakubakwa inzu nini zishyingurwamo nk'uko bikorwa hanze.

Ntirenganya ati 'Turabitekereza byaba ari ibyo byo gutwika imibiri, haba ari ibyo gutangira kubaka inzu nini zo gushyinguramo dukurikije uko tubibona no mu bindi bihugu byateye imbere, ni imishinga myinshi tugenda dutekerezaho kuko Kigali iri kwaguka cyane ariko ibyo twatekereza byose n'ubundi bigomba kujyana no kugenda umuntu abiganiriza Abanyarwanda kugira ngo bagende bahindura imyumvire bashobore kubikora.'

Kugeza ubu itegeko rigena ibyo gutwika imibiri rimaze imyaka risohotse ariko Abanyarwanda bakomeye ku muco wo gushyingura no mu mva yubakiye.

Mu Rwanda habarurwa amarimbi arenga 1450 agikoreshwa n'andi yuzuye ubu afunzwe, ategereje ko imyaka 20 igenwa n'itegeko igera kugira ngo ubwo butaka bukorerweho ibindi bikorwa.

---

Aya mateka, yagiye ahindurwa n'ivuka ry'abaherwe banyuranye b'abirabura, ibyashimangiye ko umuryango mugari w'abirabura ndetse n'uwa Afurika byumwihariko ushobora kubungabunga ubutunzi bwawo.

Usanga nubwo Afurika ifite umutungo kamere mwinshi, ubukungu bwinshi bw'uyu mugabane ntibutera imbere bitewe n'ibikorwa remezo bidahagije, imiyoborere mibi no gushingira ku mari yo hanze.

Mu rwego rwo gushyigikira imishinga Nyafurika n'iy'abirabura, abaherwe b'abirabura usanga bagira uruhare runini mu kuyitera inkunga.

Urutonde Forbes yashyize ahagaragara tariki 10 Ukwakira 2024, rugaragaza ko David Steward, washinze ikigo cya World Wide Technology (WWT), yahagurukije umunya-Nigeria Aliko Dangote ku mwanya w'umwirabura ukize kurusha abandi ku isi.

Kuri uru rutonde, haragaraho abandi baherwe nka Oprah Winfrey umaze imyaka myinshi aza mu b’imbere, Robert Smith, umuraperi Jay-Z, Michael Jordan n’abandi.

Ikinyamakuru Forbes cyashyize ahagaragara urutonde rw'Abirabura bakize kurusha abandi ku Isi, aho Oprah Winfrey ari we mugore wenyine ukomeje kugaragara kuri uru rutonde.

Ni mu gihe Aliko Dangote wo muri Nigeria atakiri ku mwanya wa mbere kuko yawukuweho n'Umunyamerika, David Steward utunze Miliyari 11.4 z'amadolari, akaba yaje ku mwanya wa 206 ku isi.

Dore abairabura 10 bayoboye abandi mu butunzi ku Isi mu 2024:

1.     David Steward

David Steward ni we muherwe uza ku mwanya wa mbere mu birabura bakize cyane ku Isi. Uyu mukambwe w’imyaka 73 y’amavuko, ni we nyiri ikigo cya World Wide Technology kiri mu bikomeye muri Amerika.

Ku rutonde rw’abatunze agatubutse ku Isi, Forbes yamushyize ku mwanya wa 206, hamwe n’umutungo ungana na Miliyari 11.4 z’amadolari.

2.     Aliko Dangote

Uyu Munya-Nigeria nubwo yavuye ku mwanya wa mbere nk'Umwirabura ukize kurusha abandi ku Isi, ariko akomeza kuba Umunyafurika uza mu baherwe b’imbere. Afite inganda za sima mu bihugu nka Nigeria, Zambia, Senegal, Tanzania and Afurika y'Epfo.

Dangote w’imyaka 67 y’mavuko, niwe mwirabura wa Kabiri ukize cyane ku Isi mu 2024, akaza ku mwanya wa 211 mu baherwe bose b’Isi, akaba atunze Miliyari 11.3 z’Amadolari.

3.     Robert F. Smith

Robert Fredrick Smith uza ku mwanya wa Gatatu mu birabura batunze za Miliyari z’madolari ku Isi, ni umunyamerika w’umuherwe wamenyekanye cyane mu bikorwa by’ubucuruzi n’iby’ubugiraneza.

Ni uwa 224 mu baherwe b’Isi, akaba atunze Miliyari 108 z’Amadolari. Ni we washinze ndetse akaba ari n’Umuyobozi Mukuru w’Ikigo cya Vista Equity Partners.

4.     Mike Adenuga

Uyu mugabo utunze Miliyari 6.7 z’amadolari, afite sosiyeti ya Telecom n'uruganda rutunganya peteroli. 

Adenuga yahawe igihembo cy'umunya-Nigeria wabashije kugurisha peteroli nyinshi mu myaka wa 1990.

Kuri ubu afite uruganda rwa Conoil Producing Company rutunganya peteroli. Ku munsi rubona utugunguru turenga 100.000.

Kuri we intego ye ni ukuzamura sosiyeti y'itumanaho rizakoreshwa muri Afurika mu itumanaho rya za telefoni (Globacom) aho kuri ubu iyo sosiyeti mu itumanaho rya telefone zigendanywa rikoresha n'abantu barenga miliyoni 15 muri Nigeria.

5.     Abdulsamad Rabiu

Umunyemari Rabiu ukomoka muri Nigeria washoye muri kompanyi za sima ndetse n’iz’isukari, atunze Miliyari 4.8 z’amadolari mu 2024, akaba ari ku rutonde rw’abirabura bakize cyane ku Isi.

6.     Michael Jordan

Nyuma yo kugurisha imigabane ye yose mu ikipe ya Charlotte Hornets, Michael Jordan yabaye umuntu wa mbere utunze amafaranga menshi mu mateka y’abakinnyi bakina cyangwa bakinnye Basketball aho abarirwa umutungo ungana na miliyari 3.5 $ mu 2024. 

Uyu munyabigwi mu mateka y’umukino w’amaboko wa Basketball yatwaye ibikombe byinshi n’imidali birimo n’ibihembo bya ‘MVP’ yegukanye inshuro eshanu aho bihabwa umukinnyi wa mbere w’umuhanga muri NBA, akaba yarabihawe ubwo yakiniraga ikipe ya Chicago-Bulls. 

7.     Oprah Winfrey

Ni umunyamakuru ukomeye muri Leta Zunze Ubumwe za Amerika. Ni icyamamare mu itangazamakuru, aho ibiganiro bye byamenyekanye cyane ndetse bigakundwa ku rwego rw’Isi.

Ni we mugore ukize ku Isi mu bari n'abategarugori bo muri Afurika. Yashinze ishuri muri Afurika y'Epfo yise “Oprah Winfrey Leadership Academy.”

Ni we mugore umwe rukumbi uza mu birabura 10 ba mbere batunze agatubutse, akaba aza ku mwanya w’1172 ku Isi.

8.     Patrice Motsepe

Patrice Motsepe akomoka muri Afurika y'Epfo, akaba afite uruganda mu bucukuzi bw'amabuye y'agaciro. Yize iby'ubucamanza muri Kaminuza ya Witwatersrand, aba uwa mbere washyizeho ihuriro ry'abavoka b'abanyafurika i Johannesburg bise “Bowman Gilfillan”. Yashinze kandi sosiyeti y'ubwubatsi.

Afite imigabane myinshi muri sosiyeti y'ubucukuzi bw'amabuye y'agaciro African Rainbow Minerals (ARM) sosiyeti yo muri Afurika y'Epfo ikize ku mabuye ya platine, nickel,chrome, fer, manganèse, charbon, cuivre na zahabu. Anafite kandi ikigo cy'abakinnyi b'umupira w'amaguru. Atunze Miliyari 3 z’Amadolari, akaba aza ku mwanya w’1149 mu batunze agatubutse ku isi.

9.     Jay-Z

Shawn Carter [Jay-Z] amaze imyaka irenga 20 ashakisha ubuzima ijoro n’amanywa. Ni umugabo wagize uruhare runini mu guhindura uko abantu babona injyana ya Hip Hop ku Isi, abera kandi icyitegererezo benshi bashakaga gutera imbere.

Muri 2019, Forbes yatangaje ko ari we muraperi wa mbere ufite umutungo ubarirwa muri miliyari y’amadolari.  Jay-Z yakuriye mu buzima butoroshye, ndetse mu myaka ye y’ubuto yigeze no gucuruzaho ibiyobyabwenge.

Ku myaka 13 y’amavuko, nibwo yatangiye gutekereza kuzaba umuherwe ariko adatekereza ko Rap ariyo izabimugezaho. 

Uyu munsi, Jay-Z w’imyaka 54 atunze umutungo ubarirwa muri miliyari 2.5 z’amadolari, akaba aza ku mwanya wa 9 mu baherwe b’abirabura, aho ku rutonde rw’abatunze agatubutse ku Isi yashyizwe ku mwanya wa 1363.

10. Strive Masiyiwa

Umunya-Zimbabwe Strive Masiyiwa, ni we muherwe w’umwirabura uza ku mwanya wa 10, akaba atunze angana na Miliyari 1.8 y’amadolari. Yashinze kandi ayobora kompanyi ihuriyemo ibigo binyuranye by’ikoranyabuhanga ya Econet Global and Cassava Technologies.

Ku Isi, Strive w’imyaka 63 y’amavuko aza ku mwanya w’1848.

Batangaje ko iki gitaramo cy'indirimbo z'umwimerere kizaba ku wa 22 Ukuboza 2024 muri BK Arena. Ni naho mu 2023 cyabereye, icyo gihe cyahuje ibihumbi by'abantu barimo n'abayobozi mu nzego Nkuru z'Igihugu, bafatanya kuramya no guhimbaza Imana.

Ni kimwe mu bitaramo biba bitegerejwe buri mwaka! Ahanini biturutse ku buhanga n'ubushobozi abaririmbyi b'iyi korali bagaragaza buri mwaka mu gitaramo.

Chorale de Kigali ifatwa nka nimero ya mbere mu zikora umuziki muri Kiliziya Gatolika ku buryo hari ababa biteze iki gitaramo cyabo buri mwaka.

Uyu mwaka ntibisanzwe!

Mu kiganiro cyihariye na InyaRwanda, Perezida wa Chorale de Kigali, Bwana Jean Claude Hodari yavuze ko kuri iyi nshuro ya 12 biteguye kuzatanga ibyishimo bisendereye mu gitaramo cyabo, ahanini binyuze mu ndirimbo zubakiye ku mwimwerere, bashingiye ku kuba mu 2023 hari abagaragaje ko batanyuzwe.

Yavuze ati 'Kuri iyi nshuro iki gitaramo kirimo ubushyuhe bwinshi kuruta ubushize kuko ubushize hari abatarishimiye umwanya munini twageneye igihangano cya 'Haendel' cyari 'Classic Music'. N'ubundi 'Classical Music' izazamo, ariko n'indirimbo zihimbaza mu mico inyuranye no mu ndirimbo abantu bazi zizaba nyinshi.'

Hodari Jean Claude yasobanuye ko mu gutegura iki gitaramo kuri iyi nshuro na none bubakiye ku bitekerezo by'abantu, bagamije kujyanisha n'ibyifuzo byabo kandi barabyubahirije.

Akomeza ati 'Igitaramo muri rusange kandi cyubakiye ku bitekerezo no ku ndirimbo twahawe n'abakunzi bacu binyuze ku mbuga nkoranyambaga dukoresha. Ari amazina y'indirimbo, ari n'uburyo bwo kuryoshya igitaramo, barabitubwiye kandi twarabyemeje.'

Iki gitaramo cyamaze kuba umuco, kuko buri mwaka bagikora mu rwego rwo gufasha Abakristu kwizihiza Umunsi wa Mukuru wa Noheli no gusoza neza umwaka uba urangiye no kuzatangira umushya mu mahoro no mu munezero.

Buri mwaka Chorale de Kigali ishaka umwihariko igenera abakunzi bayo, ugereranyije n'imyaka yabanje. Bigakorwa mu rwego rwo gukomeza gushimisha abakunzi bayo.

Kuva mu 2013, Chorale de Kigali ikora igitaramo nk'iki. Imibare igaragaza abantu barenga ibihumbi 20 bitabira iki gitaramo. Kandi gitegurwa mu rwego rwo gukundisha Abanyarwanda umuziki uhimbanywe kandi ukaririmbanwa ubuhanga.

Mu bihe bitandukanye igitaramo nk'iki cyabereye ahantu hatandukanye harimo na Kigali Conference and Exhibition Village ahazwi nka Camp Kigali, kandi ibihumbi by'abantu byagiye byitabira, bagataha banyuzwe n'ubuhanga bw'abaririmbyi bagize iyi korali.

Nko mu 2019, iki gitaramo cyabereye muri Camp Kigali, biba ngombwa ko hari abantu basubirayo kubera ko imyanya yari yateguwe yari yuzuye.

Hodari Jean Claude yigeze kuvuga ko amafaranga bakoresha mu gutegura iki gitaramo ahindagurika ahanini bitewe n'aho igitaramo cyabereye, ibyuma bakoresheje, imitako n'ibindi.

Ariko kandi avuga ko imibare ya hafi, igaragaza ko nibura mu gutegura bakoresha Miliyoni 60 Frw. Ati 'Biragoye kuvuga ngo ni angahe, ariko ni amafaranga atari munsi ya Miliyoni nka 60 Frw iyo ubaze neza. Twakwifuza byinshi birenga ibyo, kuko hari ibyo tugenda tureka kugira ngo bitaba menshi, ariko gutegura igitaramo byonyine bidutwara amafaranga arenze ayo ngayo…'

Chorale de Kigali yatangaje ko ku nshuro ya 12 igiye gukora igitaramo 'Christmas Carols Concert' kizaba ku wa 22 Ukuboza 2024 muri BK Arena

Chorale de Kigali yatangaje ko kuri iyi nshuro mu gutegura iki gitaramo bashingiye ku bitekerezo by'abakunzi b'umuziki wabo

Chorale de Kigali yavuze ko biyemeje kugendera ku bitaragenze neza mu 2023, bategura igitaramo cyo muri uyu mwaka

Perezida wa Chorale de Kigali, Bwana Hodari Jean Claude yatangaje ko kuri iyi nshuro iki gitaramo kizaba cyihariye mu bakunzi bayo

Umwanditsi wa 'Musekeweya', Rukundo Charles Lwanga ari mu baririmbyi ba Chorale de Kigali

KANDA HANO UREBE AMASHUSHO Y'INDIRIMBO 'UEFA CHAMPIONS’ LEAGUE’ YASUBIWEMO NA CHORALE DEKIGALI

“>