Category: Uncategorized

Inzego ubukungu bwubakiyeho mu Rwanda zigenda zihinduka ziva ku mirimo gakondo zerekeza kuri serivisi n'ikoranabuhanga ziganjemo abakiri bato.

Imibare igaragaza ko ibipimo by'akazi k'amasezerano ahoraho ugereranyije n'imirimo yose ari 24.1% naho iby'akazi ka bubyizi bikaba 65.1%.

Imibare yavuye mu bushakashatsi ku murimo mu Rwanda igaragaza ko mu 2023 abagera kuri 90% bakoraga akazi katagira amasezerano, na ho 83.3% bakora akazi katagira amasezerano katajyanye n'ubuhinzi.

Umunyamabanga Mukuru wa Syndicat y'abakora mu mahoteli, utubari na restaurant, Nyiratsinda Flora, yabwiye IGIHE ko mu mwuga bakora usanga umubare munini w'abakozi ari abanyabiraka ku abandi bake bafite amasezerano y'igihe kirekire.

Ati 'Niba ari ikigo cy'abantu 400 b'abakozi usanga nk'abantu 150 ari ari bo bakozi bahoraho, abandi ngo ni abanyabiraka, ukaba umunyabiraka imyaka itanu igashira cyangwa irindwi.'

Nyiratsinda avuga ko ikibabaje ari uko usanga abahura n'iki kibazo ari urubyiruko bari bakwiye guhabwa amasezerano y'akazi bakabasha no gusana inguzanyo zibafasha kwiteza imbere nyamara ntibazihabwe.

Ati 'Bariya bana ko wumva abenshi ari n'urubyiruko bazatera imbere bate bahora muri ibyo? Ntateganyirizwa, nta masezerano y'akazi agira, aranahira mu gikoni akabura ubwivuza. Hari ibigo bibatanga, umwana ahembwa ibihumbi 10 Frw, ako kanya 5000 Frw bikaba ibya nyir'ikigo. Yiriwe yiyuha akuya kuva mu gitondo kugeza nimugoroba ariko amafaranga ye bakaza kuyagabana.'

Muri iyi ngeri abakora nk'abanyabiraka biganjyemo abahereza abakiliya (serveurs), abateka, abatunganya ibyumba ndetse n'abakora amasuku.

Yavuze ko hari abantu bamwe usanga bafite amasezerano y'akazi y'igihe kirekire kubera ko ari abatoni cyangwa hagendewe ku masano, abandi ugasanga bafite amasezerano y'akazi y'amezi abiri, bikamara imyaka n'imyaka.

NISR igaragaza ko abakora akazi katagira amasezerano biganje mu bice by'icyaro ugereranyije no mu mijyi.

Mu gihembwe cya kabiri cya 2024 byagaragaye ko 80% by'abafite akazi mu bice by'icyaro bafite amasezerano y'igihe gito abandi bagakora nka ba nyakabyizi na ho abo mu mijyi bakaba 42.1%.

Nyiratsinda yahamije ko yegereye abahagarariye amahoteli ngo nibura bajye baha amasezerano abakozi bavuga ko ibiraka byabo bidahoraho bityo ko bataha abantu bose amasezerano n'akazi.

Yahamije ko hari banki imwe mu zikorera mu Rwanda yagerageje kubaza icyo bakora kugira ngo abakozi bo mu mahoteli, utubari na restaurants bose bagire uburenganzira ku guhabwa inguzayo.

Ati 'Yarambwiye ngo amasezerano y'akazi yo mu mahoteli ntabwo ari ayo guhabwa inguzanyo kuko abenshi baba bifitiye amezi.'

Imibare igaragaza ko abanyabiraka beshi ari abatize n'abize amashuri abanza n'icyiciro rusange gusa, mu gihe iyi mibare igabanyuka cyane iyo bigeze ku bize amashuri yisumbuye.

Uretse mu rwego rw'amahoteli imyuga myinshi irimo ubuhinzi, ubucukuzi bw'amabuye y'agaciro n'ubwubatsi yiganjemo abakora akazi ka bubyizi.

Abakora akazi badafite amasezerano kandi kadafite aho gahuriye n’ubuhinzi bari mu ngeri zitandukanye

Iri shuri ryafunguwe kuri uyu wa Kabiri tariki 22 Ukwakira 2024, rifungurwa mu karere ka Nyarugenge mu mujyi wa Kigali.

Iri shuri ryafunguwe nyuma y'ishyirwaho ry'Itegeko rishya rigenga gutwara abantu n'ibintu ku butaka no mu mazi, aho ingingo yaryo ya 32 ivuga ko umuyobozi w'ikinyabiziga wifuza gukora umurimo wo gutwara abantu cyangwa ibintu, agomba kuba abifitiye impamyabushobozi y'umwuga.

Ingingo ya 163 ivuga ko ukora uwo murimo nta mpamyabushobozi y'umwuga afite, ahanishwa ihazabu yo mu rwego rw'ubutegetsi ya 50.000 Frw.

Umuyobozi wa ATPR, Mwunguzi Théoneste, yavuze ko bahisemo gufungura iryo shuri kugira ngo bubahirize ibyo iryo tegeko risaba, no kurushaho guteza imbere serivisi batanga mu bijyanye no gutwara abagenzi.

Ati 'Iyo turebye dusanga 70% y'abashoferi dufite bose barengeje imyaka 50, bisobanuye ko mu gihe kiri imbere bazajya muri pansiyo. Tugomba gutegura abazabasimbura.'

'Ubushize ubwo hazaga bisi nshya 200, twararebye dusanga ntabwo hari haratekerejwe ko hakenewe abashoferi b'inyongera. Ubundi mu mwuga wacu, imodoka ebyiri ziba zigomba kugira abashoferi batatu. Hari hakenewe abashoferi 300 muri za modoka 200. Twaragerageje dushaka abashoferi hirya no hino ariko byaratugoye.'

Mwunguzi kandi yavuze ko imyitwarire y'abashoferi bamwe na bamwe na yo yakunze kuvugwa ko itari myiza, ahanini bigaterwa n'uko nta mahugurwa bahawe ahagije.

Ati 'Iyo urebye isuku y'umushoferi dufite uyu munsi, iyo urebye amakosa agenda akora, iyo urebye ubujura bubamo natwe bukaduhombya, ibyo twari twaragiye twibagirwa nibyo bije gukemurwa.'

Umuyobozi Ushinzwe imfashanyigisho z'amasomo y'ubumenyingiro mu Kigo cy'Igihugu gishinzwe Imyuga n'Ubumenyingiro (RTB), Rwamasirabo Aimable, yavuze ko iri shuri ryafunguwe baryitezeho byinshi.

Ati 'Iri shuri rigiye guhugura umushoferi ujyanye n'igihe mu bijyanye n'imyifatire. Ubumenyi basanzwe babufite ariko icyaburaga ni imyifatire. Bahura n'abantu benshi, ku buryo imyitwarire yabo ikwiriye kuba myiza kurushaho'.

Muvara Valens, Umushoferi wa City Express uri mu batangiranye n'iri shuri, yavuze ko yishimiye ko mu nteganyanyigisho bazahabwa harimo n'indimi, bikazaborohereza mu kazi.

Mukarugwiza Eugenie, umushoferi umazemo imyaka itanu na we yavuze ko iri shuri aryitezeho kubafasha mu bijyanye n'ubumenyi mu by'ibinyabiziga batwara.

Ati 'Hari nk'umuntu watwaraga nk'ibinyabiziga ugasanga ageze mu nzira imodoka imuzimiyeho ariko ntabashe kwirwanaho, agahamagara umukanishi. Hari byinshi aha tuzabasha kwigiramo nko kuba wabasha gukanika utuntu tworoheje no gutanga serivisi nziza.'

Kugeza ubu mu Rwanda habarizwa abashoferi batwara abagenzi mu buryo bwa rusange basaga igihumbi. Iri shuri ritangiranye abanyeshuri 120 ariko ATPR ivuga ko bazagenda biyongera, dore ko icyiciro kimwe kizajya kimara amezi atatu.

Umuyobozi wa ATPR, Mwunguzi yavuze ko iri shuri baryitezeho gukemura ibibazo byakundaga kugaragara mu byo gutwara abagenzi

Iri shuri ryafunguwe rizatangirana n’abanyeshuri 120

Bamwe mu bashoferi bagiye gutangirana n’iri shuri

ATPR ivuga ko ishaka guhugura umushoferi ujyanye n’igihe

Uyu munyamakuru wakoreye ibinyamakuru birimo Radio Rwanda, Televiziyo Rwanda na TV5 Monde, bivugwa ko yitabye Imana tariki 20 Ukwakira 2024 ubwo yari yaje mu Rwanda, azize indwara z'umutima.

Radiyo Ijwi rya Amerika yatangaje ko Mateso yari yaje mu Rwanda kwizihiza isabukuru ye y'imyaka 70.

Martin Mateso yari atuye mu Bufaransa aho yageze muri Mata 1994.

Ntamuhanga Ningi Emmanuel wakoranye na Mateso, yigeze kuvuga ko Mateso yakundwaga cyane kuri Radio Rwanda kubera uburyo yavugaga neza Igifaransa.

Ni umwe mu bakoze umwuga w'itangazamakuru ari n'umuhanzi, aho azwi ku ndirimbo zakunzwe zirimo 'Bibiyana', 'Amagorwa yo mu rugo', n'izindi.

Mateso yakoreye ibinyamakuru bitandukanye

Iyo mpanuka yabereye mu Kirombe kiri mu Kagari ka Kigabiro mu Mudugudu wa Kanyinya mu isambu isanzwe ari iy'umuturage itaragenewe ubucukuzi.

Abaturage bari hafi y'aho ibyo bayebereye babwiye BTN ko aho bacukuraga hari harimo abantu bane, babiri babasha kurokoka ariko abandi babiri barimo umugore ubyaye rimwe n'umwana w'imyaka 14 bahasiga ubuzima.

Umwe yagize ati 'Bapfuye nabi kuko ni nk'umusozi wabagwiriye nta wigeze ataka na mba. Hashize imyaka nk'ibiri hapfiriye abandi basore babiri kandi uriya mubyeyi cyishe yasize akana gatoya'.

Abo baturage bavuga ko nta sosiyete izwi ikorera ubucukuzi muri ako gace ku buryo abajya bahagirira impanuka bagapfa nta muntu bijya bibazwa.

Basaba ubuyobozi ko bwahagurukira icyo kibazo bukagiha umurongo ku buryo abaturage batakomeza kuhaburira ubuzima.

Umunyamabanga Nshingwabikorwa w'Umurenge wa Remera, Urujeni Consolée, yavuze ko nyiri iyo sambu ari gushakishwa kuko iryo bara rikimara kuba yaketse ko ari bukurikiranwe agahita ahunga.

Ibyo ngo byatewe n'uko yari azi neza ko mu isambu ye hakorerwaga ubucukuzi butemewe n'amategako kandi nta n'uburenganzira afite bwo gutanga impushya z'ubucukuzi.

Urujeni yongeyeho ko nta sosiyete yigeze yegera ubuyobzoi isaba kuhakorera ubucukuzi ngo yimwe ibya ngombwa bityo ko nta baturage bakwiye kuba bajya gushakamo amabuye y'agaciro.

Imirambo y'abitabye Imana yabashije gutabururwa ihita ijyanwa mu Bitaro bya Kiziguro.

Mu Karere ka Gatsibo ikirombe cyahitanye abantu babiri

Muri Gahunda ya Kabiri yo Kwihutisha Iterambere (NST2), Guverinoma yihaye intego yo kuzamura ubukungu bw'Igihugu ku kigero cya 9,3% buri mwaka.

Kugira ngo iyo ntego igerweho, hazongerwa umusaruro mu nzego zose z'ubukungu; aho hazakorwa ku buryo ubuhinzi buziyongera ku kigero cyo hejuru ya 6%, naho inganda na serivisi bikaziyongera hejuru ya 10% buri mwaka.

Biteganyijwe ko umusaruro w'ubuhinzi uzongerwa ku kigero cya 50% ku buryo u Rwanda ruzihaza mu biribwa, mu bihingwa by'ingenzi byatoranyijwe, ndetse rugasagurira amasoko.

Hazabaho kwihaza ku bikomoka ku matungo, hongerwe umubare w'inganda zitunganya umusaruro ukomoka ku buhinzi; habungabungwe ubwiza bw'umusaruro w'ubuhinzi n'ubworozi, ndetse hongerwe ingano y'ifumbire mvaruganda n'izindi nyongeramusaruro ku kigero cyo hejuru.

Ibyo bizajyana no gukomeza gahunda yagezweho yo kwihaza mu gutubura imbuto zihingwa imbere mu Gihugu.

Guverinoma igaragaza ko izo ntego zizagerwaho hongerwa ingano y'umusaruro w'ibihingwa by'ingenzi byatoranyijwe, birimo ibigori, ibishyimbo, ibirayi, umuceri, imyumbati, ingano, n'ibitoki.

Biteganyijwe ko Igihugu kizihaza mu bihingwa nk'ibigori, ibirayi n'ibishyimbo kuburyo hatazakenerwa kubitumiza mu mahanga.

Uko kwiyongera k' umusaruro kuzagerwaho binyuze mu kongera ingano y'ifumbire mvaruganda mu Gihugu, kuyigereza ku gihe ku bahinzi, no kongera ingano yayo ikava ku biro 70 kuri hegitare ikagera ku biro 94,6 kuri hegitari. Ngo ibyo bizakorwa inajyanishwa n'imiterere y'ubutaka.

Muri NST2, Guverinoma iteganya ko hirya no hino mu Gihugu hazongerwa, hanashyirweho ibyanya byihariye bikorerwaho ubuhinzi bwa kijyambere (Agri Hub and Food Basket Sites).

Bimwe muri ibyo byanya bizaba birimo imishinga minini y'ubuhinzi n'ubworozi, imeze nk'ukorerwa mu cyanya cyatunganyijwe uzwi nka Gabiro Agribusiness Hub, n'uwa 'Gako Beef' uzatunganya inyama zoherezwa mu mahanga.

Biteganyijwe ko kugeza mu 2029 hazanongerwa ubuso bw'ubutaka buriho amaterasi y'indinganire, buve kuri hegitari 142,000 bugere kuri hegitari zisaga 160,000.

Ubuso bwuhirwa hakoreshejwe imirasire y'Izuba buzikuba hafi kabiri

Guverinoma kandi ivuga ko hazongerwa ubuso bw'ubutaka bwuhirwa, aho buzava kuri hegitari 71,000 bukagera kuri hegitari zisaga 130,000.

Mu kiganiro aherutse kugirana na The New Times, Umuyobozi w'ishami rishinzwe kuhira no gufata neza ubutaka mu Kigo cy'Igihugu gishinzwe guteza imbere Ubuhinzi n'Ubworozi, RAB, Hitayezu Jerome, yavuze ko u Rwanda ruteganya kongera ubuso bwuhirwa hakoreshejwe imirasire y'Izuba, bukava kuri hegitari 646 buriho ubu bukagera kuri hegitari 1,146 mu 2029.

Ati 'Dufite intego y'uko mu 2029 tuzaba twarongeyeho hegitari 500 zuhirwa hakoreshejwe ingufu z'imirasire y'Izuba.'

Hitayezu yasobanuye ko mu 2024-2025 hazongerwaho hegitari 60, izigera ku 100 zongerweho mu 2025-206 n'izindi nkazo mu 2026-2027, naho mu 2027-2028 na 2028-2029 hazajya hongerwaho 120 buri mwaka.

Uretse kuba imikoreshereze y'ingufu z'imirasire mu kuhira yoroshye kurusha imikoreshereze y'izindi ngufu, binagabanya imyuka ihumanya ikirere bigafasha mu kubungabunga ibidukikije.

Guverinoma iteganya ko hazakorwa ubukangurambaga buzatuma abahinzi n'abikorera bayoboka ubwo buryo bwo kuhira hifashishijwe ingufu z'imirasire, bakabikora ku giti cyabo bidasabye nkunganire ya Leta.

Ibyo ngo bizunganira ingufu Guverinoma ishyize muri iyo gahunda zo gutanga nkunganire ku bakeneye gukoresha bene ubwo buryo bwo kuhira.

Kugeza ubu uturere dukorerwamo ibikorwa byo kuhira hifashishijwe imirasire y'Izuba turimo Bugesera, Kayonza, Rwamagana, Nyagatare, Ngoma, na Ruhango.

Kuhira hakoreshejwe imirasire y’Izuba bizoroshya kuhira mu gihugu hose kandi bigabanye imyuka ihumanya ikirere.

Ni mu buryo bwo gukuraho, icyari cyarafashwe nk'umuco aho umuturage yajyaga gushaka serivisi ari bumare umwanya aho agiye kuyishaka, yakenera ubwiherero bikamusaba kujya kubushaka ahandi kandi ari busabwe kubwishyura.

Nk'uwitwa Niyonshuti Jean Claude yabwiye RBA ko yagiye ku kigo cy'imari giherereye mu Karere ka Nyarugenge ahazwi nka Nyabugogo, akubwe yoherezwa ahandi yagombaga kwishyura ibintu agaragaza ko bitari bikwiriye mu mujyi nk'uwa Kigali.

Ati 'Nabwiye umusekirite ko nshaka ubwiherero, arambwira ati nta buhari, ahubwo sohoka ujye kubushaka aho buri, urishyura 100 Frw nta kibazo urongera ugaruke utangire gushaka serivisi washakaga.'

Mukaneza Jeanne d'Arc agaragaza ko hari igihombo kuko bisa nko kudahabwa serivisi zuzuye, aho uba wagiye gushaka serivisi ushobora no kwishyura hanyuma, ukishyuzwa n'iyo kwagakwiriye guhererwa ubuntu.

Habimana Flodouard ati 'Ni igihombo, ushobora gufata moto ukajya kubanza gushaka ubwiherero kandi urabwishyura. Uhomba igihe ugahomba n'amafaranga. Bibaye byiza babitekerezaho.'

Umuyobozi Mukuru ushinzwe Itumanaho mu Mujyi wa Kigali, Ntirenganya Emma Claudine, yavuze ko kudatanga ubwiherero bitagakwiriye ndetse ubikorewe akwiriye gutanga amakuru bagakurikiranwa.

Ati 'Abantu bose bafite serivisi zituma abantu babagana ari benshi bose basabwa kugira ubwiherero. Ni inshingano zo kubugira kandi no gukora ku buryo busa neza umunsi wose. Tugenda tubasura tubibutsa ko ari inshingano zabo.'

Mu igenzura ryakozwe hagaragaye ko umubare munini w'ibigo bitagira ubwiherero rusange ari ibikorera mu nyubako zubatswe kera zitari zigenewe kwakira abantu benshi, icyakora bagasabwa ko bagomba gushaka uburyo bazishyiramo, ubonye bitakozwe agatanga amakuru.

Umunsi ku wundi Umujyi wa Kigali uganwa n'abantu benshi bashaka serivisi, na cyane ko utuwe n'abarenga miliyoni 1.7 bavuye ku barenga gato ibihumbi 400 bari bawutuye mu 2000, bakiyongeraho abava mu ntara baje kuwushakamo amaramuko na serivisi.

Ibyo ni byo bituma uyu mujyi ukaza ibijyanye n'isuku n'aho kwiherera, abawugana bagahabwa serivisi mu buryo bunoze.

Umujyi wa Kigali wasabye abafite inyubako zihuriramo n’abantu benshi bashaka serivisi gushyiraho ubwiherero bw’ubuntu

Karere ugisoza amashuri yisumbuye kuko yayasoje muri Kamena 2024, avuga ko ibikorwa bye byashibutse mu mafaranga ibihumbi 50Frw yahembwe n'ababyeyi be mu 2022 ashimirwa kwitwara neza mu bizamini bya Leta bisoza icyiciro rusange cy'amashuri yisumbuye.

Aganira na IGIHE, ubwo twamusangaga mu imurika ry'ibikorwa by'umugore wo mu cyaro ubwo hizihizwaga Umunsi Mpuzamahanga w'Umugore wo mu Cyaro, yavuze ko yatangiye yorora inkoko z'amagi nkeya ariko bigenda bikura ku buryo ubu ageze aho yorora izigera ku 2000, ndetse yongeyemo n'ubundi bwoko bw'iz'imishwi agurusha abaturage bajya kuzorora.

Mbere yo gusoza amashuri imirimo yayifashwagamo n'ababyeyi be, aho arangirije ahita abishyiraho umutima wose ku buryo abona bizamuteza imbere cyane.

Ati 'Narangije amashuri yisumbuye muri uyu mwaka, mbasha kwegera ibikorwa byanjye, nongeramo n'inkoko nkuza imishwi nkayiha abaturage bakajya kwiyororera.'

Yabonye umuvuno wo guhangana n'ikiguzi cy'ibiryo by'inkoko, ahinga igihingwa cyitwa Azolla cyongera intungamubiri mu biryo

Karere wize amasomo y'Ubugenge, Ubutabire n'Ibinyabuzima(PCB) mu mushuri yisumbuye, yabonye ko ikiguzi cy'ibiryo by'inkoko kigenda kizamuka ndetse inkoko zigacuranwa n'abantu aho nazo zikenera kurya indagara, ibigori na soya, yatekereje icyo yakora ngo ahangane n'icyo kibazo.

Mu mwaka wa 2023, yaje gukora ubushakashatsi kuri murandasi maze abona icyatsi cyitwa 'Azolla' gihingwa mu mazi, nyuma kikanikwa kikavamo ifu ivangwa n'ibiryo by'inkoko mu mwanya w'indagara na soya, maze agitumiza muri Tanzaniya.

Ati “Ibi nabikoze ngamije gutanga umusanzu mu kurwanya imirire mibi, kuko kuvuga ko ugaburiye inkoko ibiryo birimo indagara na soya ngo izatanga amagi, bisa nk'aho ntacyo uramiye kuko n'ubundi ibyo iba iriye byari ibiryo byakariya abantu. Iki gitekerezo cy'ibiryo bya Azolla kwari ugukuraho ihingana ry'amatungo n'abantu bahuriraho ku biryo,''

'Ubu sinkigorwa n'ibiryo by'inkoko mu gihe abandi borozi bakigorwa n'igiciro cy'ibiryo by'inkoko kigeze hafi kuri 700Frw ku kilo ku nkoko z'amagi na 800Frw ku z'inyama, kandi zitanga amagi meza arimo umuhondo uhagije, n'imishwi ikura neza nta kibazo.''

Yakomeje avuga ko abibonamo n'ikindi gisubizo cyo kurengera ibidukikije kuko Azolla ifumbirwa n'imyanda nk'ibishishwa by'imineke, iby'ibirayi n'ibindi bisigazwa by'ibiribwa, bikaba bikuyeho umwanda ndetse binagize undi mumaro wo gukora ibiryo.

Karere Ibyiza Winner, ugitegereje amanota y'ibizimani bisoza amashuri yisumbuye ngo azabone uko yerekeza muri Kaminuza, avuga ko ubu nta kibazo yagira ngo ananirwe ku kikemurira, adasabye ababyeyi be, aho byibura abasha kwihemba ibihumbi 350 ku kwezi.

Agira inama urubyiruko bagenzi be gutekereza kure bagashaka ikintu cyose cyabyara ifaranga aho kugira ngo bahore batekereza ko byose bazabikemurirwa n'ababyeyi.

Karere Ibyiza Winner w’imyaka 19, ahamya ko azakomeza kwitangira ubworozi mu ntego yo kurwanya imirire mibi

Yamurikiye abitabiriye uyu munsi uburyo ahingamo icyatsi cyuje intungamubiri cyitwa ‘Azolla’ gihingwa mu mazi nko mu mabasi, ibidamu,… nyuma akabyumisha, akabisya bikavamo ibiryo by’inkoko

Ni akazi akora agakunze cyane kuko yanagatangiye mbere yo gusoza amashuri yisumbuye

Karere ubu yinjiza ibihumbi 350Frw ku kwezi yamaze guhemba abakozi n’ibindi byose.

Azolla nyuma yo kumishwa, ngo igaburirwe inkoko. Ni icyaatsi cyuje intungamubiri(proteines) ku rwego rw’indagara cyangwa soya bisanzwe bihabwa inkoko.

Ku Munsi Mpuzamahanga w’Umugore wo mu Cyaro yamurikiye abarimo Minisitiri wa MIGEPROF ibyo akorera iwabo mu cyaro cya Nyamagabe bikamuteza imbere.

Ahari irimbi mbere harangwaga n'imisaraba myinshi ishinze mu runyuranyurane rw'indabyo ariko uko iterambere rirushaho kwihuta ubu harangwa n'urwererane rw'amakaro yubatse neza ateyemo ifoto n'amazina y'uhashyinguye.

Ingingo ya gatanu y'Itegeko rigena imitunganyirize n'imikoreshereze y'amarimbi ivuga ko umurambo ushyingurwa mu mva yihariye kandi buri mva igomba kugira uburebure butarengeje metero ebyiri n'igice (2,5m), ubugari butarengeje santimetero mirongo inani (80cm) n'ubujyakuzimu butari munsi ya metero ebyiri (2m).

Ishimangira ko ababishatse bafite uburenganzira bwo gushyingura imirambo y'ababo irenze umwe mu mva imwe, ku buryo bagerekeranya amasanduku. Gusa isanduku yo hejuru igomba kuba iri nibura muri metero ebyiri (2m) z'ubujyakuzimu.

Iri tegeko kandi risaba ko hagati y'imva n'indi hagomba kuba hari nibura santimetero mirongo itanu (50 cm) mu mpande zombi.

Umuyobozi w'ishami rishinzwe imitunganyirize n'imikoreshereze y'ubutaka mu Kigo cy'Iguhgu gishinzwe ubutaka Rutagengwa Alexis, aherutse gutangaza ko abantu benshi bahitamo gushyingura mu mva zidasanzwe ndetse bagasa n'abiyongeza ubutaka ku buryo ikibanza umuntu umwe ashyingurwamo kiba cyenda kwikuba kabiri.

Ati 'Aho hagiriyemo ba rwiyemezamirimo badufasha gucunga amarimbi bagiye bashyiramo ubundi buryo aho irimbi baryubakira bakoresheje ibikoresho by'ubwubatsi, bagashyiramo amatafari ahiye, sima, beton bakamwubakira rwose ukabona ko umuntu afashe ikibanza, bagashyiraho amakaro bagakora isuku ya ya makaro, ibyo kubikora byahise bikuba kabiri imva mbere umuntu yajyaga akoresha.'

'Kuko kuyubakira bisaba ko abantu babona aho bahagarara bakubaka, mbere itegeko ryateganyaga ko ubugari bw'imari ari santimetero 80, ubu bisigaye ari metero imwe n'igice kugira ngo abubaka hano bubake bakikize hose babone n'aho bashyira ya matafari na sima.'

Nk'ubu mu irimbi rya Rusororo ryatangiye mu 2011 biteganyijwe ko rizamara imyaka 20 rikagera mu 2030 ariko mu 2022 ryahise ryuzura ku buryo bongeyeho ubundi butaka kubera ko hahise himakazwa ibyo gushyira amakaro ku mva ubuso bw'aho umuntu ashyingurwa buriyongera, imyaka ryari kumara rikoreshwa iragabanyuka.

Irindi rimbi biheruka kwemezwa ko ryuzuye ni irya nyamiramo, rwiyemezamirimo uricunga akavuga ko muri Nzeri 2024 ryari risigaranye aho gushyingura hangana na metero kare 300.

Amategeko ateganya ko kugira ngo imva isanzwe ishyinguwemo yongere ishyingurwemo indi mirambo, bitegereza imyaka 10, na ho mu mva zidasanzwe bitegereza imyaka makumyabiri 20 uhereye ku gihe cya nyuma imva yashyinguriwemo.

Rutagengwa ati 'Amarimbi dufite ataragiye akoresha ubu buryo bwa beton iyo ugiyeyo usanga harabaye ishyamba ryiza cyane, harameze ibindi bimera byiza cyane uyu munsi hakoreshejwe ibindi. Bubatsemo, baciyemo ibibanza bubatsemo ibikorwa remezo bikomeye n'ibindi bikoreshwa ibindi kubera ko ibyo bintu bitigeze bihajya ndetse twasanze gushyiraho ibi bintu bya sima bituma irimbi riba ahantu hateye ubwoba kuko ntabwo ari ahantu wisanzura.'

Hari kwigwa ku buryo bushya bwo gushyingura

Amarimbi yubakiye n'amakaro cyangwa amennyeho beton n'andi yubakishije ibikoresho biramba ntabwo asaza mu myaka igenwa n'amategeko ndetse abangamira ibidukikije.

Ibi kandi binajyana n'uko ikiguzi cyo gushyingura cyagiye kizamuka kuko hari aho imva igeza kuri miliyoni 1 Frw, hakiyongeraho ikiguzi cy'isanduku, kugeza umuramo ku irimbi n'umuhangowo gukaraba.

I Nyagatare imva ihenze ni ibihumbi 400 Frw, hakaba iy'ibihumbi 250 Frw, abandi bagafata iz'ibihumbi 220 Frw, iz'ibihumbi 25 Frw iya make cyane ikaba iya ibihumbi 15 Frw.

Rutagengwa yavuze ko hari umushinga w'itegeko uri kwigwaho ugamije kunoza uburyo bwo gushyingura butangiza ibidukikije.

Ati 'Hari uburyo twabonye mu bihugu byateye imbere aho irimbi za metero ebyiri twavugaga ziba zitangiza ibidukikije, ni ukuvuga umuntu ni isanduku ibora yashyizwemo ashyirwa mu gitaka kuko na Bibiliya irabivuga ko aho twavuye ari ho tugomba gusubira. […]Ahubwo hejuru haterweho indabo n'ubusitani nibashaka haterwe ibiti cyangwa ibyo biti ari byo bitandukana ariko habe ari ubusitani bucunzwe.'

Yahamije ko abashinzwe gucunga amarimbi basigarana akazi ko gukora utuyira twiza, gutunganya indabo n'ubusitani bitandukanye no guhora uhanagura amakaro yasaza ukongeraho andi.

Ati 'Twari twavuze ngo dushobora gushyiraho akantu kangana na santimetero 15 ku mutwe w'imva. Imva isanzwe ikagira 100% nta kintu na kimwe kigiyeho hakamera ibyatsi n'ibiti ariko ku mva idasanzwe hakajyaho ibyatsi n'ibiti ariko hongerweho akantu gato g kujyaho izina rye n'ifoto.'

Mu bindi biteganyijwe gushyirwamo imbaraga ni uguhindura imyumvire y'abaturage bakayoboka gahunda yo gutwika imirambo, cyangwa kubaka inyubako zo gushyinguramo zaba izo mu kuzimu cyangwa izo hejuru zishobora gushyingurwamo abantu benshi icyarimwe.

Magingo aya mu Rwanda hari amarimbi arenga 1450, ari ku buso bubarirwa muri hegitari ibihumbi 15.

Hari gutekerezwa uburyo amarimbi atazajya yubakirwa n’amakaro cyangwa sima hagamijwe kurengera ibidukikije