Category: Uncategorized

Ikoranabuhanga rigenda ritera mbere mu Rwanda ku buryo hari benshi baheruka ku muryango wa banki babitsamo bagiye gufunguza konti ubundi serivisi zose zisigaye zigakorerwa kuri telefone igendanwa.

Minisiteri y'Ikoranabuhanga na Inovasiyo itangaza ko ku bufatanye na Leta ya Koreya y'Epfo hashyizweho ibikorwaremezo byafashije kugeza internet yo mu bwoko bwa 4G mu gihugu ku rugero rwa 97%, bivuze ko abaturage bagera kuri 97% baba ahantu hari internet.

Ibi byorohereza abavandimwe n'imiryango iri mu mahanga gusabana mu biganiro ariko bisa nk'aho bari kumwe imbonankubone, abakora ubucuruzi bwo ku ikoranabuhanga, inama n'ibindi bikihuta kubera internet inyaruka yakwirakwijwe hirya no hino mu gihugu.

Mu bushakashatsi Ikigo cy'Igihgu cy'Ibarurishamibare cyakoze ku buryo umurimo uhagaze mu Rwanda, harebwe abatunze telefone n'ubumenyi bafite ku gukoresha ikoranabuhanga.

Imibare yagaragaje ko ingo zo mu Rwanda 85% zirimo nibura umuntu umwe utunze telefone hatitawe ku bwoko, ingo ziyobowe n'abagabo zikagira ubwiganze kuko muri zo 88,5% zirimo telefone mu gihe iziyobowe n'abagore zifite telefone ari 75,9%. Ingo ziri mu Rwanda zirenga miliyoni 3,3.

Ni mu gihe imibare yaherukaga y'ibyavuye mu ibarura rusange rya 2022, yagaragaje ko 78,1% by'ingo zose ari zo zari zirimo nibura umuntu ufite telefone ngendanwa.

Bugaragaza ko ingo zitunze smartphone mu gihugu hose ari 36%. Abantu ku giti cyabo bafite kuva ku myaka 10 kuzamura batunze smartphone ni 20,6%, imibare izamukaho gato iyo urebeye ku bantu bafite imyaka 16 kuzamura bemerewe kujya ku isoko ry'umurimo kuko bagera kuri 24,8%.

Muri rusange abafite telefone ngendanwa ni bo bafite amahirwe yo kubona akazi kuko 61,6% bazifite bafite akazi mu gihe abatazitunze bagafite ari 41,1%.

NISR igaragaza ko Abanyarwanda 53,2% bafite kuva ku myaka 10 kuzamura ari bo batunze telefone ngendanwa hatitawe ku bwoko bwazo, mu gihe abo muri icyo kigero batunze smartphone ari 20,6%.

Imibare igaragaza ko abatunze smartphone biganje mu bice by'imijyi aho bagera kuri 77,1% mu gihe abatuye mu byaro bazitunze ku rugero rwa 45,6%.

Ni mu gihe hashize iminsi hatangijwe hagunda igamije gufasha abantu b'amikoro anyuranye gutunga smartphone zigurwa amafaranga ibihumbi 20 Frw, umuguzi agahabwa gigabytes 30 za internet, agahamagara kandi akohereza ubutumwa bugufi ku mirongo yose ukwezi yishyuye amafaranga 1000 frw.

Ku bijyanye n'ubumenyi mu by'ikoranabuhanga basanze 68,9% bafite ubumenyi mu gukoresha serivisi bakoresheje code zihuta zimenyerewe nka 'USSD Code' cyangwa gukanda akanyenyeri bashaka serivisi zo ku ikoranabuhanga cyangwa gushaka amakuru.

Abagera kuri 27,8% bakoresha porogaramu za mudasobwa, 63,7% bakoresha serivisi zo kwikira no kohereza amafaranga kuri telefone ku mirongo yose, 31,8% bakoresha imbuga nkoranyambaga, 28,8% bashaka serivisi banyuze ku mbuga nk'uru uri gusomaho inkuru, abagera kuri 22,3% bashobora gukoresha serivisi za Irembo, 9,8% bakoresha imbuga zikorerwaho ubucuruzi mu gihe 13,1% bakoresha imbuga zifashishwa mu kwiga hakoreshejwe iya kure.

Abarenga 68,5% bazi gukoresha neza bumwe mu buryo bw'ikoranabuhanga bubafasha gukoresha serivisi no gushaka amakuru, aho abagabo ari 73,2% na ho abagore bakaba 64,3%.

Ibyavuye mu ibarura rusange rya 2022 bigaragaza ko abantu bafite imyaka 10 kuzamura bafite telefoni zigendanwa barenga 4.631.510.

Abanyarwanda bagenda barushaho gukangukira gutunga telefone zigezweho zibafasha gusaba serivisi biboroheye

---

Source : http://igihe.com/amakuru/u-rwanda/article/abigondera-smart-phones-ni-mbarwa-ingo-zitunze-telefone-mu-rwanda-zageze-kuri

Ikipe ya Real Madrid yifuzaga kongera umubare w'imikino itaratsindwa muri shampiyona ikagera kuri 43, ikanganya agahigo na FC Barcelona yakoze hagati ya Mata 2017 na Gicurasi 2018. Gusa izo nzozi zarangiriye kuri Santiago Bernabeu nyuma yo gutsindwa n'abashyitsi mu gice cya kabiri cy'umukino.

Carlo Ancelotti, umutoza wa Real Madrid, yagize ati: 'Ni ibihe bikomeye byo gutsindwa umukino, cyane cyane nyuma y'imikino myinshi tutaratsindwa.'

Nyuma y'igice cya mbere cyarangiye amakipe yombi anganya ubusa ku busa, Robert Lewandowski yafunguye amazamu ku munota wa 54 atsinda ku mupira mwiza yahawe na Marc Casado. Uyu rutahizamu w'umunya-Pologne yongeye gutungura abafana b'i Madrid ku munota wa 63 atsinda igitego cya kabiri ku mutwe ku mupira wahinduwe na Alejandro Balde.

Lewandowski yari hafi gutsinda igitego cya gatatu muri uyu mukino ariko inshuro imwe umupira ugarurwa n'umutambiko w'izamu, indi awuteye hejuru y'izamu mu mwanya mwiza.

Umukinnyi w'imyaka 17, Lamine Yamal, yatsinze igitego cya gatatu cya FC Barcelona, gihita gituma aba umukinnyi muto kurusha abandi wabashije gutsinda muri El Clasico. Raphinha nawe yatsinze igitego cya kane mu minota ya nyuma, atsinda izamu rya mbere muri El Clasico, agororerwa ishyaka ryinshi yagaragaje.

Ku ruhande rwa Real Madrid, umukino wa mbere wa Kylian Mbappé muri El Clasico ntiwaje kumubera mwiza, kuko yatsinze ibitego bibiri ariko byose byanzwe kubera kurarira, ndetse akabuzwa ikindi na Inaki Pena wari mu izamu rya Barcelona.

Barcelona, yarangije shampiyona y'umwaka ushize iri inyuma ya Real Madrid iyirusha amanota 10, ariko kuri iyi nshuro bahisemo kwishingikiriza abakinnyi bato kugira ngo basubirane ku ruhando rw'ibigwi. Iyi mikorere irimo kubahira cyane kuko ikipe ya Hansi Flick imaze gutsinda imikino 10 muri 11 imaze gukinwa, itsindwa umwe gusa.

Lamine Yamal ni umwe mu bakinnyi bato bahanzwe amaso cyane muri iyi kipe, ariko si we wenyine kuko na Marc Casado na Alejandro Balde, bombi bafite imyaka 21, bitwaye neza bagatanga imipira ivamo ibitego muri uyu mukino. Abakinnyi batandatu babanje mu kibuga mu mukino wa El Clasico bakuriye mu ishuri rya ruhago rya Barcelona, La Masia.

Nubwo Barcelona yishingikirije gukinisha abakiri bato, hari n'abakinnyi b'abahanga bafite uburambe nka Robert Lewandowski. N'ubwo afite imyaka 36, uyu rutahizamu ntaragira intege nke, kuko igitego cye cya kabiri muri uyu mukino cyatumye agira ibitego 14 mu mikino 11 ya La Liga y'uyu mwaka.

Ubu buryo bwo guhuza abakinnyi bakiri bato n'ubunararibonye byagoye cyane Real Madrid, yatsinzwe mu gice cya kabiri ku buryo bugaragara. Abasore ba Hansi Flick banakinnye umukino wo kwugarira neza bakoresheje umurongo muremure inyuma, bituma Real Madrid igwa mu mutego wo kurarira kenshi.

Flick yagize ati: 'Burya kwitwara neza dukinisha ba myugariro imbere cyane. Bisa n'aho ari ibintu biteje ibyago, ariko si ko biri.'

Uyu musaruro mwiza wa FC Barcelona watumye ikomeza kwerekana ko ishobora guhatana ku rwego rwo hejuru muri shampiyona, ndetse inagaragaza ko ikizere gishingiye ku bakinnyi bato kiri kuyifasha.

Source : https://yegob.rw/real-madrid-yanyagiwe-na-barcelona-ishyira-iherezo-ku-nzozi-zo-gukuraho-agahigo-kayo/

Abagore n'Abakobwa bibumbiye muri Koperative ikora Ubuhinzi ikanaboha Agaseke( KOABA/KARAMA), bavuga ko icyumba cy'Umukobwa bubakiwe na ARDE/KUBAHO cyababereye igisubizo ku mwanya bajyaga batakaza mu gihe hagize uhura n'ikibazo cy'imihango. Ni icyumba bavuga ko cyanabafashije kunoza isuku ariko kandi kinafasha uwagira ikibazo cy'umubiri, yumva atameze neza kuba yaryama akaruhuka, akabyuka akomezanya n'abandi akazi kabahuza.

Musenge Alphonsine, umwe mubanyamuryango ba KOABA/KARAMA aganira na intyoza.com ku mumaro w'iki cyumba cy'Umukobwa muri Koperative yagize ati' Iki cyumba cy'Umukobwa cyabaye igisubizo kuritwe, cyane iyo twaje guhurira hano mu mirimo igendanye na Koperative yo Guhinga, Kudoda no Kuboha Agaseke cyangwa se hari indi mpamvu yaduhuje'.

Akomeza agira ati' Mbere ARDE/KUBAHO itaradufasha ngo tugire iki cyumba cy'Umukobwa, twageraga aha wagira ikibazo cyo kujya mu mihango ukabura uko wifata, bikagutera ikibazo ndetse ugashaka uko usubira mu rugo kugira ngo wikorere isuku. Aho batwubakiye iki cyumba bakanadushyiriramo ibikoresho bijyanye n'isuku, iyo uhuye n'ikibazo cy'imihango uraza ukajya mu cyumba cy'Umukobwa ugakaraba, uko wari wiyanduje ukongera ukitunganya neza, ukambara akenda k'Isuku, warangiza kumwe uba ushobora no kuba urwaye nko munda harimo uburiri, igitanda na Matera ukajyaho ukaryama, ukaruhuka noneho mu kandi kanya gatoya waza kumva umerewe neza ukagaruka mu gikorwa wari urimo ukora'.

Icyumba cy'Umukobwa cyatumye badapfusha igihe cyabo ubusa.

Musenge agira ati' Igihe cyacu twarakizigamye kubera icyumba cy'Umukobwa. Urumva igikorwa wagakoze muri cya gihe wagiye mu rugo gushaka uko witunganya, uwo mwanya washoboraga no kugenda ntugaruke bitewe n'urugendo cyangwa se ibyo uhuye nabyo, ariko ubu ubikemurira iruhande rw'ahari igikorwa cyakuzanye, unazirikana ko bagenzi bawe bari mu kazi cyangwa se nawe urimo gutakaza umwanya, ukagira vuba kugira ngo usubire mu gikorwa cyakuzanye, bityo uze gutaha wumva ko utaziye ubusa'.

Yamuragiye Dative, abarizwa muri Koperative KOABA/KARAMA. Avuga ko icyumba cy'Umukobwa cyakemuye byinshi mu bibazo Abagore n'Abakobwa bahuraga nabyo birimo no kuba watungurwa n'imihango kandi waje mu bikorwa biguhuza n'abandi ukabura uko ubyifatamo. Ahamya ko ibyo ngo byabaye amateka nyuma yo kubakirwa iki cyumba.

Ati' Buriya hari ukuntu Abagore n'Abakobwa ujya mu mihango utunguwe. Mbere washoboraga kubura uko wifata ndetse bikagutera kutiyumva neza mu bandi, yemwe wanagenda ushaka kujya kwitunganya ukumva ntutekanye kuko nyine watunguwe, ariko ubu aho kugira ngo uze gutaha bikujojobaho cyangwa bigira bite….,ujya mu cyumba hari amazi n'isabune ukoga, ugafata amavuta ukisiga, ugafata umwenda nyine w'imbere ugafata na Kotegisi ugashyiramo ubundi ukisubirira mu kazi, nta kibazo'.

Akomeza avuga kandi ati' Iki cyumba cyatumye nta mwanda tugira. Iyo utunguwe bahita baguha icyumba ukajyamo kubera ko n'ubundi aba ari icy'Abakobwa, uraza ukajyamo ukabikemura ugataha wumva nta kibazo ufite, nta n'ipfunwe ufite kubera ko uba wumva isuku wayikoze, nta n'uwabimenya'.

Aba bagore n'Abakobwa babarizwa muri iyi Koperative KOABA/KARAMA, bavuga ko iki cyumba nubwo kibafatiye runini nk'abari hamwe muri Koperative, ariko kuko ngo kiri ku muhanda kandi hafi y'isantere y'Ubucuruzi ya Karama, ngo na bagenzi babo bandi bataba muri iyi Koperative hagize utungurirwa ku muhanda n'ikibazo cy'imihango baramufasha agakomeza urugendo cyangwa se ibindi yarimo.

Numukobwa Marie Chantal, umukozi ushinzwe iterambere ry'Abari n'Abategarugori cyane cyane mu kubaka ubushobozi bwabo mu miyoborere mu mushinga ARDE/KUBAHO, avuga ko mu Makoperative yose bakorana nayo mu mushinga wa Tubeho neza hubatswe icyumba cy'Umukobwa.

Avuga ku mpamvu yo kubaka iki cyumba, yagize ati' Koperative usanga akenshi nka 80% zigizwe n'Abagore n'Abakobwa bakiri batoya. Mu rugendo rwabo rwo kwiteza imbere, bagira ibikorwa bahakorera nko; Kudoda, Ububoshyi, Ubuhinzi, Gukora imisatsi n'ibindi bitandukanye bitewe n'icyo Koperative yahisemo. Rero byari imbogamizi ko umwana w'umukobwa cyangwa se Umudamu wagiye mu mihango atitabira ibyo bikorwa cyangwa se akaba yataha bitarangiye, yaba ari mu mahugurwa akaba yagenda ayacikishirije kuko yatunguwe muri bya bihe bye by'Ukwezi. Aho rero niho habonetse icyo gitekerezo cy'uko bakeneye ahantu biyakirira, urwaye akaba yabona aho yirambika ho gakeya. Harimo uburiri akaruhuka iminota mikeya akagaruka muri cya gikorwa cyari cyamuzanye, uwiyanduje akabona aho akarabira, agahindura ka kenda k'imbere, ya suku n'Isukura bigakomeza kwimakazwa ariko kandi bigatuma n'ibijyanye n'ukwezi k'Umukobwa bihinduka ibintu bisanzwe nk'uko bisanzwe koko'.

Numukobwa, Avuga ko ibikorwa bakora nka ARDE/KUBAHO bigamije kuzana impinduka nziza mu mibereho y'Abaturage ya buri munsi. Ku bijyanye n'icyumba cy'Umukobwa, ahamya ko gifasha cyane Abagore n'Abakobwa kuko ntawe ucikanwa n'ibikorwa bya Koperative, ntawe ucikanwa n'Amahugurwa kandi ngo iyo umuntu ameze neza n'ibyo akora abikora atuje kandi atekanye bigatanga Umusaruro.

Munyaneza Théogène

Source : https://www.intyoza.com/2024/10/28/kamonyi-arde-kubaho-icyumba-cyumukobwa-cyabafashije-gukoresha-igihe-neza-batekanye/

Uwitwa Uwase Jacky uzwi cyane mu uruganda rw'imyidagaduro uzwi ku izina rya Jacky yaterewe ivi n'umusore witwa Steve Mutabaruka usanzwe akora ibijyanye no gutegura ubwiza bw'abagore.

Iki gikorwa cyabaye kuri uyu wa karindwi taliki ya 27 Ukwakira mu 2024 cyibera muri hotel Keza, ibinyamakuru byinshi byari bihari ariko ntibyigeze bitangaza umunsi w'ubukwe bwaba bombi jacky na Steve.

Ibyamamare byari biri muri iki gikorwa cyo gutera ivi harimo: DC Clement, Atan, Kasuku( Jay Squeeser), Kamaro, Green P, Rujama, Fex Man, Kamarade nabandi,…

Abaterankunga bari muri iki kirori:

-Jay Squeeser(Kasuku) doreko we anivugira yuko yabyaye Jacky muri batisimu.

-Rujama Phones

Uko Byari bimeze

The post Jacky yaterewe ivi appeared first on KASUKUMEDIA.COM.

Source : https://kasukumedia.com/jacky-yaterewe-ivi/

Ni inyubako yiswe Kivu Intare Arena, yuzuye itwaye asaga miliyari 5.7 Frw.

Abanyamuryango ba FPR Inkotanyi muri ako karere, bishimiye kuba iyo nyubako yuzuye, bagaragaza ko igiye guteza imbere akarere.

Nzafashwanimana James aganira na RBA yagize ati 'Aha nigeze kuhanyura kera ari ahantu h'ikigunda hatari heza ariko uburyo hameze uyu munsi biranyereka ko imbere ari heza.'

Ikimpaye Rosette na we yavuze ko kuzura kw'iyi nyubako ari ibyiza mu bindi nyuma y'amatora ya Perezida, aho Umukandida wa FPR Inkotanyi yatsinze.

Ati 'Icyo twishimira ni uko twatoye neza umukandida wacu aratsinda. Turi kwishimira intsinzi ya Perezida Paul Kagame.'

Chairman wa FPR Inkotanyi mu ntara y'Iburengerazuba, Dushimimana Lambert yavuze ko hejuru ya serivisi nziza zizatangirwa muri iyi nyubako, banayitezeho gutanga imirimo.

Ati 'Hari abantu bazaboneramo imirimo […] Ntitwagiraga ibyumba by'inama bihagije aha i Rubavu. Harimo abazakenera gukoresha iminsi mikuru ariko twe turareva za nama zagutse mpuzamahanga.'

Iyi nyubako yagenewe kwakira inama mpuzamahanga, ibitaramo n'ibirori. Ifite kandi, ibiro byo gukoreramo, restaurant n'igikoni.

Kivu Intare Arena, imicungire yayo iri mu maboko ya Intare Investment Company.

Kivu Intare Arena, yuzuye itwaye miliyari 5.7 Frw

Iyi nyubako ifite icyumba cyakwakira inama Mpuzamahanga

---

Source : http://igihe.com/amakuru/u-rwanda/article/i-rubavu-hatashywe-kivu-intare-arena-izajya-yakira-inama-mpuzamahanga

Gahunda ya NST1 iteganyijwe kurangirana n'umwaka wa 2024, ntabwo isize igejeje ikoranabuhanga mu mashuri yose mu Rwanda, ari nayo mpamvu Minisiteri y'Uburezi yashyizeho politiki y'imyaka itanu muri NST2 igamije gushimangira ibyakozwe muri NST1.

Kuwa Kabiri tariki 22 Ukwakira 2024, Minisiteri y'Uburezi, Urugaga Nyarwanda rw'Abikorera ndetse n'Abahanga udushya, barahuye mu kwiga kuri iyi politiki ndetse n'uburyo izashyirwa mu bikorwa.

Bagaragaje ko icyuho kinini ari ibikoresho by'ikoranabuhanga bidahagije mu mashuri.

Umuyobozi Ushinzwe Ikoranabuhanga mu Rugaga rw'Abikorera, Alex Ntale, yavuze ko bashaka kuganira uburyo ba rwiyemezamirimo bafatanya na Leta kugira ngo bazibe icyuho kiri mu ikoranabuhanga ry'uburezi.

Ati 'Hari ibyo Leta ifite ba rwiyemezamirimo badafite, kandi hari n'ibyo abaterankunga bafite baba bashaka kugeza mu baturage ariko hari umurongo na politiki bigomba kunyuramo kugira ngo bibagereho. Iyi politiki iradufasha twese twisangemo buri wese azi inshingano ze'.

Ntale yakomeje avuga ko icyuho kiri mu burezi mu ikoranabuhanga, ari ibikoresho bidahagije by'umwihariko mu mashuri yo mu byaro. Yavuze ko iyi politiki y'imyaka itanu aricyo bazibandaho ndetse no guha ubumenyi ababyeyi mu bijyanye n'ikoranabuhanga kugira ngo bajye babona uko bafasha abana babo.

Yagize ati 'Hari amashuri ataragira ubushobozi buhagije ngo buri munyeshuri abe yagira mudasobwa ye. Mu gihe ubushobozi butaraboneka, ni ukwiga ku ngamba twakoresha kugira ngo ibikoresho bihari bisaranganywe ku buryo byafasha iterambere ry'ikoranabuhanga mu burezi kuzamuka.'

'Kugira ngo uteze imbere ikoranabuhanga kandi hari igihe uba ukeneye ababyeyi nabo ngo bige ikoranabuhanga kugira ngo bazafashe abana babo mu gihe bari gusubira mo amasomo yabo mu rugo.'

Umuyobozi w'ikoranabuhanga muri Minisiteri y'Uburezi, Rwigamba Bella, yagarutse kuri bimwe mu bizibandwaho muri iyi politiki, avuga ko Leta izafatanya na ba rwiyemezamirimo ndetse n'abahanga udushya kugira ngo bashyire mu bikorwa iyi politiki izafasha kuziba icyuho kiri mu burezi kugira ngo burusheho gutezwa imbere binyuze mu ikoranabuhanga.

Yagize ati 'Iyi politiki nishyirwa mu bikorwa, bimwe mu byo tuzibandaho ni ugufasha abarimu kuba abahanga mu guhanga ibyo bakwigisha mu mashuri. Yego hari ibisanzwe bihari ariko biba byiza hari n'ibindi dukuye ahandi, kandi twizeye ko bizaba ingirakamaro ku banyeshuri bacu.'

Yakomeje avuga ko bazafatanya na ba rwiyemezamirimo kugira ngo iyi politiki ishyirwe mu bikorwa kandi ko ari ibintu bitagomba gutinda mu gihe iyi politiki izaba yemejwe.

Iyi Politiki niyemezwa nibwo Leta izegera ba rwiyemezamirimo, abahanga udushya bo mu bigo bitandukanye kugira ngo ishyirwe mu bikorwa.

Haracyari icyuho cy’ibikoresho mu burezi

Rwigamba Bella, Umuyobozi w’ikoranabuhanga muri Mineduc

Ntale Alex yagaragaje ko hari icyuho cy’ibikoresho mu burezi bw’ikoranabuhanga

---

Source : http://igihe.com/amakuru/u-rwanda/article/hagaragajwe-icyuho-cy-ibikoresho-gikoma-mu-nkokora-uburezi-bw-ikoranabuhanga

Urwo rugendo rwakozwe kuri iki Cyumweru tariki 27 Ukwakira 2024, aho abanyamuryango ba Rotary Club Rwanda n'abafatanyabikorwa bayo bahagurutse kuri Stade Amahoro, berekeza kuri Tennis Club i Nyarutarama.

Urwo rugendo kandi rwanitabiriwe na Dr. Kayondo King ukuriye Komisiyo yashyizweho na Leta ishinzwe kurwanya imbasa ndetse na Dr. Langa Nelia wari uhagarariye Ishami ry'Umuryango w'Abibumbye ryita ku Buzima (OMS).

Dr. Muderevu Alex ukuriye Komisiyo yo Kurwanya imbasa muri Rotary Club Rwanda akanaba umuganga, yavuze ko indwara y'imbasa mu Rwanda koko yacitse ariko ko kuyirwanya byo bitahagaze.

Ati 'Nubwo imbasa itakiri mu Rwanda kuva mu 1993, tugamije kugaragaza ko tugomba guhora turi maso kuko hari ibindi bihugu ikigaragaramo. Tugomba rero gukora ubu bukangurambaga kugira ngo abantu burusheho kuyirinda kuko ibindi bihugu turagendererana'.

Yavuze ko ubusanzwe imbasa yandurira mu kanwa biturutse ku byo umuntu ariye cyangwa anyoye birimo virusi iyitera, aho abibasirwa cyane ari abana bari munsi y'imyaka itanu n'abandi badafite ubudahangarwa buhagije.

Iyo umuntu amaze kuyandura akenshi isiga amaboko cyangwa amaguru bidakora ari byo bibyara ubumuga.

Dr. Mudelevu yasabye abantu gukomeza umuco wo kugira isuku kuko ari bwo buryo bwo kuyirinda ndetse no gukingiza abana bose kuko inkingo zihari zihagije nk'umuti wo gukomeza gukumira ko iyo ndwara.

Karema Carole wari uhagarariye Guverineri w'Akarere ka Rotary 9150 u Rwanda rurimo, yavuze ko uwo muryango utewe ishema no kurwanya imbasa ku Isi no mu Rwanda by'umwihariko.

Yagize ati 'Kuva mu myaka 35 ishize Rotary International ku Isi twinjiye mu rugamba rwo kurwanya indwara y'imbasa. Turi abanyamuryango barenga miliyoni 400 kandi buri umwe atanga 25$ yo kurwanya imbasa buri mwaka'.

Yavuze ko ayo mafaranga Rotary Club ikusanya akurwamo ahabwa Leta akagurwa urukingo rw'imbasa, andi agakoreshwa mu bukangurambaga ahantu hatandukanye bwo kuyirinda.

Yongeyeho ko ibihugu 10 biri mu Karere u Rwanda rurimo muri Rotary kuri ubu biri gukusanya 60.000$ yo kurushaho guhangana n'indwara y'imbasa.

Karema kandi yashimye ubufatanye Leta y'u Rwanda, Rotary Club n'abandi bafatanyabikorwa barimo OMS na UNICEF bafitanye mu guhashya imbasa mu gihugu.

Guverineri wungirije w'Akarere ka Rotary 9150 mu Rwanda, Suman Alla, yavuze ko Umuryango Rotary International wiyemeje kurwanya imbasa nk'imwe mu ndwara zishobora kwangiza ubuzima bw'umuntu aho bamaze gutangamo agera kuri miliyari 2.1 z'amadolari ku Isi yose kuva mu myaka 35 ishize.

Yongeyeho ko kandi Rotary International yafashije mu kuvuza imbasa abantu barenga miiliyoni 3.1, kandi ubukangurambaga bwo kuyirandura burundu ku Isi burakomeje.

Kugira ngo hemezwe ko imbasa yarandutse mu gihugu runaka, habarwa nibura imyaka itatu yikurikiranya nta bwandu bushya bugaragara.

Ku Isi muri rusange imbasa igaragara muri Pakistan na Afghanistan mu gihe ahandi nko muri Afurika ho ibihugu byinshi byayiranduye ariko hakaba hari ibindi bike idaheruka kugaragaramo ariko bitaremezwa ko yaharandutse burundu.

Urugendo rwari rugamije ubukangurambaga ku kurwanya imbasa

Urugendo rwanitabiriwe n’abafatanyabikorwa ba Rotary Club Rwanda

Uru rugendo rwabereye mu Mujyi wa Kigali

Dr. Muderevu Alex ukuriye Komisiyo yo Kurwanya imbasa muri Rotary Club Rwanda akanaba umuganga, yavuze ko indwara y'imbasa mu Rwanda koko yacitse ariko ko kuyirwanya byo bitahagaze

Guverineri wungirije w'Akarere ka Rotary 9150 mu Rwanda, Suman Alla, yavuze ko Umuryango Rotary International wiyemeje kurwanya imbasa nk'imwe mu ndwara zishobora kwangiza ubuzima bw’umuntu ku Isi

Karema Carole wari uhagarariye Guverineri w'Akarere ka Rotary 9150 u Rwanda rurimo, yavuze ko uwo muryango utewe ishema no kurwanya imbasa ku Isi no mu Rwanda by'umwihariko

Amafoto: Nzayisingiza Fidèle}}

---

Source : http://igihe.com/amakuru/u-rwanda/article/rotary-club-rwanda-yakoze-ubukangurambaga-ku-kurandura-imbasa

Ni igikorwa cyakozwe kuri uyu wa Gatandatu tariki 26 Ukwakira 2024, Shyaka afatanyije na bagenzi be bakoresha uru rubuga batandukanye.

Ubwisungane mu kwivuza bwatanzwe bufite agaciro ka miliyoni 2,4 Frw.

Nyuma yo gukora iki gikorwa, Jean De Nkurunziza uyobora umurenge wa Rugarika, yavuze ko babyishimiye.

Ati 'Ni igikorwa twakiriye neza. Baje gukorera mu murenge wacu, twakoranye ibikorwa bitandukanye birimo umuganda no kurandura imirire mibi twahinze imboga ndetse tunaha indyo yuzuye abana tubaha n'amata. Twabyakiriye neza kubona urubyiruko rukora ibi bikorwa.'

Yakomeje avuga ko bari basanzwe abandi bafatanyabikorwa babatera inkunga y'ubwisungane, ariko akaba ari ubwa mbere babonye inkunga y'amafaranga menshi.

Shyaka Noella wakusanyije inkunga yahawe aba baturage 800, yavuze ko iki gikorwa yagitangiye mu 2023, agamije gutanga umusanzu muri sosiyete.

Ati 'Nifuzaga ko twakoresha imbuga nkoranyambaga mu buryo buboneye kandi bwiza. Hari ibyo nzimarisha hari n'ibyo zinyungura ariko nashakaga ko hari umumaro byamarira sosiyete ndimo.'

Umwaka ushize Shyaka yari yakusanyije inkunga y'ubwisungane bwatanzwe mu karere ka Bugesera ku bantu 430.

Jean De Nkurunziza uyobora umurenge wa Rugarika, yashimiye Shyaka Noella ku bw’igikorwa yatekereje cyiza

Uru rubyiruko rwatanze inkunga ya Miliyoni zirenga ebyiri z’amanyarwanda

Ni ku nshuro ya kabiri igikorwa nk’iki kibayeho

Uru rubyiruko rwabanje gukorana umuganda n’abaturage

Aba basore n’inkumi babanje gukora umuganda

Jean De Nkurunziza uyobora umurenge wa Rugarika, yavuze ko babyishimiye cyane ndetse akaba yakozwe ku mutima n'urubyiruko rufite imitekerereze yo kubaka u Rwanda

Noella Shyaka (wambaye ikote ry’umweru) ni we wateguye iki gikorwa

Aba basore n’inkumi babanje gukora umuganda

---

Source : http://igihe.com/amakuru/u-rwanda/article/urubyiruko-rukoresha-urubuga-rwa-x-rwatanze-mituweli-ya-miliyoni-2-frw-ku

Ingabire Victoire Umuhoza(IVU)ni umwe muri ba bangamwabo bashimishwa no kuvuga nabi uRwanda mu mahanga,.batazi ko abo banyamahanga babafata nk'inkunguzi yambika ubusasa umubyeyi mu ruhame.

Uretse ko ibyo ashinja u Rwanda ari n'ibihimbano cyangwa amakabyankuru, ubundi umwana ufite uburere bw'ibanze yirinda gutaramana nyina. N'iyo umubyeyi we yaba aroga, umwana muzima amugayira mu muryango atarinze kumuha rubanda.

Kwandagaza umubyeyi birushaho kuba ubupfamutima iyo abo umuregera ntacyo bamukoraho, cyane cyane iyo wowe urega n'abo uregera, mwese mutabuze inenge.

Ko hari imbuga nyinshi IVU yanengeramo ibitagenda neza bigakosorwa,( nk'Inama y'Igihugu y'Umushyikirano, ibiganiro n'abayobozi bakuru barimo na Perezida wa Repubulika, n'andi mahuriro adaheza abaturage) kuvuza induru kuri za BBC na VOA byahindura iki?

Nk'uko yabyivugiye kuri wa muzindaro we' Imbarutso ya demokarasi' ucengeza amatwara y'isebanya, mu cyumweru gishize Ingabire yihereranye itsinda ry'abaturage bo muri Australia, maze si ugusiga ibyondo uRwanda n'ubuyobozi bwarwo yiva inyuma.

Mu birego bye, IVU avuga ko mu Rwanda nta burenganzira bwa muntu na mba, kuko abantu bicwa, bakarigiswa, bagafungirwa ubusa, mbese wumvise amagambo ye wagirango uRwanda ni nko mu ishyamba aho inyamanswa nini yica into nta nkurikizi!

Nta muntu wigeze avuga ko uRwanda ari paradizo, kandi n'abo aruregera ntibaba mu ijuru. Ariko kwirengagiza intambwe yatewe muri iyi myaka 30 ishize mu kubaka igihugu kigendera ku mategeko, bisaba nyine kuba uri IVU cyangwa undi wese wiyemeje guhoza uRwanda ku nkenke, yitwaje intwaro ya' byacitse'.

Abo baturage bo muri Australia IVU aregera uRwanda se, ni impumyi cyangwa injiji zitazi uburyo uRwanda rwahanganye ndetse n'ubu rugihanganye n'ingaruka za Jenoside yakorewe Abatutsi, zirimo kubaka ubutabera buhamye, guhindura imyumvire y'abaturage bakamenya kubaha ubuzima bw'abandi, kwigisha kubaha uwo mudasangiye ibitekerezo, n'ibindi byashoboraga kugorana iyo hataba ubuyobozi butajenjetse?

Abo baturage ba Australia nibashaka kumenya itandukaniro hagati y'uRwanda rwa none n'urwo hambere, baganire n'abasirikari b'igihugu cyabo bari muri MINUAR mu Rwanda, mbere no mu gihe cya Jenoside yakorewe Abatutsi. Bazababwira uko Leta yafashe icyemezo cyo gutsemba igice kimwe cy'abaturage.

Abo basirikari bari mu butumwa 'bw'amahoro', nibaba abanyakuri bazabwira abo baturage uburyo batereranye Abatutsi bicwaga, bigasaba ubutwari bwa FPR- Inkotanyi ngo iyo Jenoside ihagarare.

Abo bahagaritse Jenoside ubu bakaba barwana no gusana uRwanda, nibo IVU yirirwa aharabika. Nibo aregera abaturage ba Australia, igihugu cyareberaga ubwo Interamwe (ZIRIMO NA NYINA WA Ingabire), zatsembaga Abatutsi basaga miliyoni mu mezi atatu gusa.

Niba abo baturage bashaka kumenya akarengane k'Abanyarwanda, katari ako IVU aremarema, nibabaze Leta yabo impamvu ibungabunga abajenosideri aho kubashyikiriza inkiko, kandi yarahawe ibimenyetso simusiga bibahamya ibyaha. Abo ni nka Froduald Rukeshangabo, Céléstin Munyaburanga, Amiel Nubaha, Théogène Rukundo, n' abandi bidegembya muri Australia kandi ari inkoramaraso.

Aho gutega amatwi no guha agaciro ibipapirano bya IVU, iryo tsinda ry'abaturage bo muri Australia rizabanze ribaze Leta yabo impamvu ihonyora abaturage b'abasangwabutaka (aborigènes), ntibagire uburenganzira ku butaka, ku burezi, ku mirimo n'ibindi bakabaye bemererwa n'amategeko.

Imibare ya Amnesty International, nyamara ubundi ikunze kubogamira ku bihugu by'abazungu, yerekana ko muri Australia umubare munini uri mu magereza ari abo basangwabutaka, ndetse hejuru ya 200 bakaba biyahura buri mwaka kubera ubuzima bubi cyane.

Ingabire Victoire kandi ngo yishimiye ihagarikwa ryo kohereza mu Rwanda abimukira bari mu Bwongereza mu buryo butemewe n'amategeko, ngo kuko mu Rwanda nta burenganzira bwa muntu buhari! Ibyo kandi yabibwiraga abo muri Australia, mu gihe igihugu cyabo gishinjwa guhutaza abimukira, kibafungira mu magereza ya Nauru, Manus, Woomera, Perth n'ayandi mabi bitavugwa. Kubwa IVU izo mfungwa zirimo n'abana, ziriho neza kurusha impunzi n'abimukira baba mu Rwanda!

Ingabire Victoire rero, menya ko gusebya uRwanda nawe ubwawe nta gaciro. Abo banyamahanga bazakureka urogotwe kuko 'usenya urwe umutiza umuhoro', ariko iyo bageze hirya baraguseka kuko nta muntu muzima wambika ubusa umubyeyi we mu ruhame.

The post Ingabire Victoire, kwandagaza igihugu cyawe mu mahanga ni nko kwambika ubusa nyoko mu ruhame appeared first on RUSHYASHYA.

Source : https://rushyashya.net/ingabire-victoire-kwandagaza-igihugu-cyawe-mu-mahanga-ni-nko-kwambika-ubusa-nyoko-mu-ruhame/?utm_source=rss&utm_medium=rss&utm_campaign=ingabire-victoire-kwandagaza-igihugu-cyawe-mu-mahanga-ni-nko-kwambika-ubusa-nyoko-mu-ruhame

Ikipe y'igihugu ya Djibouti yatsinze Amavubi y'u Rwanda igitego kimwe ku busa cyatsinzwe ubwo hari ku munota wa 79, ni igitego cyatsinzwe na Gabriel Dadzie.

Uyu mukino wabereye kuri Sitade Amahoro wakinwe mu rwego rwo gushaka itike y'igikombe cya Afurika cy'abakinnyi bakina imbere mu gihugu.

Ikipe y'u Rwanda yabanjemo ni ikipe yari amasura mashya ugereranyije n'abari bitezwe ko babanzamo kuko nko mu gice gisatira umutoza Frank yari yahisemo gukoresha Iyabivuze Osee.

Umutoza w'Amavubi, Frank Spittler Torsten, yahisemo gukoresha Niyongira Patience, Nshimiyimana Yunussu, Ruboneka Bosco, Iyabivuze Osee, Niyibizi Ramadhan, Muhire Kevin (c), Omborenga Fitina, Niyigena Clement, Dushimimana Olivier, Niyomugabo Claude na Tuyisenge Arsene.

Abasimbura ni Muhawenayo Gad, Christian Ishimwe, Gilbert, Ndayishimiye Didier, Ngabonziza Pacifique, Mugisha Gilbert na Hirwa Jean de Dieu.

Abakinnyi bane ni bo bongerewe mu Ikipe y'Igihugu 'Amavubi' izakina na Djibouti umukino wo kwishyura ku wa Kane, mu ijonjora rya mbere ryo gushaka itike ya CHAN 2024.

Abo ni Nizeyimana Mubarakh (Marines FC), Niyonkuru Sadjat (Etincelles FC), Twizerimana Onesme (Vision FC) na Kanamugire Roger (Rayon Sports).

Ikipe ya Djibouti yakiriye umukino ubanza mu Rwanda kuko mu gihugu cyabo batemerewe kwakira imikino mpuzamahanga kuko ibibuga byabo bitujuje ibisabwa.

Biteganyijwe ko umukino wo kwishyura uzakinwa kuwa kane tariki ya 21 Ukwakira 2024 ukazabera kuri Sitade Amahoro, uyu ukazakirwa n'u Rwanda.

The post Djibouti yatsinze u Rwanda 1-0 hashakwa itike ya CHAN 2025, Amavubi ahita yongeramo abandi bakinnyi bane appeared first on RUSHYASHYA.

Source : https://rushyashya.net/djibouti-yatsinze-u-rwanda-1-0-hashakwa-itike-ya-chan-2025-amavubi-ahita-yongeramo-abandi-bakinnyi-bane/?utm_source=rss&utm_medium=rss&utm_campaign=djibouti-yatsinze-u-rwanda-1-0-hashakwa-itike-ya-chan-2025-amavubi-ahita-yongeramo-abandi-bakinnyi-bane