Category: Uncategorized

Mu kiganiro na InyaRwanda, The Ben yavuze ko icyumweru kirenze ari muri Amerika ariko ko ateganya kugaruka mu cyumweru kiri imbere. Ati 'Maze icyumweru kimwe, ariko ndateganya kugaruka mu cyumweru kiri imbere.' 

The Ben yavuze ko yagiye muri Amerika 'mu rwego rwo gutegura igitaramo cyanjye no kugira ibyo nshyira ku murongo'.

The Ben atangaje ibi mu gihe aherutse gutangira urugendo rwo gushyira hanze indirimbo zigize Album ye azamurikira abafana be mu gitaramo kizabera muri BK Arena, ku wa 1 Mutarama 2025.

Ni igitaramo amaze igihe ashyizeho imbaraga mu gutegura, ndetse yatangiye gutumira bamwe mu bahanzi bazahurira ku rubyiniro mu kuyimurika.

Agiye kumurika iyi Album mu gihe ubundi yatangiye kuyiteguza kuva mu 2021. Aherutse gusohora indirimbo zirimo nka 'Plenty', 'Better' n'izindi yakubiyeho.

Ni igitaramo kidasanzwe kuri we! Kuko azagikora mu ntangiriro z'umwaka wa 2025, ni ukuvuga tariki 1 Mutarama 2025 muri BK Arena mu rwego rwo gufasha Abanyarwanda n'abandi kwinjira neza mu mwaka mushya, no kubifuriza kazawugiriramo ishya n'ihirwe.

Ni igitaramo kandi kidasanzwe kuri we! Kuko azagikora yizihiza umwaka umwe uzaba ushize akoze ubukwe n'umugore we Uwicyeza Pamella witabiriye irushanwa rya Miss Rwanda 2019.

Nta nubwo ari igitaramo gisanzwe kuri we, kuko ashobora kunguka cyangwa se agahomba-Ibi birashingirwa ku kuba ariwe ugomba gushora imari mu itegurwa ry'iki gitaramo, gushaka abafatanyabikorwa, abaterankunga n'abandi- Bivuze ko azabasha kumenya niba yungutse cyangwa se niba yahombye.

Bitandukanye n'ibindi bitaramo yagiye aririmbamo; kuko ijanisha rinini ry'ibitaramo yaririmbyemo yabaga yishyuwe amafaranga ye- Bivuze ko abamutumiye niba barunguka cyangwa se bagahomba, we ntibyamugeraho, kuko yabaga yamaze kubona amafaranga ye mbere y'igihe.

The Ben yumvikanisha ko iki gitaramo yagihuje no kumurika Album ye nshya, kubera ko idasanzwe mu rugendo rwe rw'umuziki, kandi ni nk'urufatiro rw'urugendo rwe mu muziki.

Ati “Ni Album ifite ubusobanuro bukomeye ku buzima bwanjye. Nibaza ko ari no ku muziki nyarwanda, kuko nzanahatangariza ibintu bikomeye cyane. 

Nibaza ko nkeneye abantu bose, ko bahagaruka, tugafatanya, tugashyigikirana ku buryo abatuye Akarere k'Afurika y'Iburasirazuba babona ko hari ibintu bikomeye biri gutegurwa.'    

The Ben birashoboka ko ariwe muhanzi wa mbere wo mu Rwanda ufitanye indirimbo nyinshi na bagenzi be, kuko iyo usubije inyuma amaso usanga arusha indirimbo n'abahanzi bo hambere bamamaye mu mateka. Imibare ya hafi igaragaza ko afite indirimbo zirenga 38 yakoranye n'abandi bahanzi.

Afite indirimbo 'Uzaba uzaba' yakoranye na Roger, 'Sinarinkuzi', 'Sibeza' na 'Thank you my God' yakoranye na Tom Close, 'Karibu sana' na 'Inzu y'ibitabo' yakoranye na Diplomat, 'Impfubyi' yakoranye na Bull Dogg, 'Rahira' yakoranye na Liza Kamikazi;

Lose Control, Ndi uw'ikigali na Jambo yakoranye na Meddy, 'For Real' yakoranye na Igor Mabano, Ngufite k'umutima na Muruturuturu yakoranye n'umuraperi Bushali, 'Kwicuma' yakoranye na Jay Polly na Green P,

'Nkwite nde' yakoranye na Adrien Misigaro, 'Zoubeda' yakoranye na Kamichi, 'Tugumane' yakoranye na Uncle Austin, Ijambo nyamukuru, Ndi uw'ikigali na Africa Mama Land yakoranye n'umuraperi K8 Kavuyo, 'Inkuba Remix' yakoranye na Riderman.

'Karara' yakoranye na Neg g the general, 'Ntacyadutanya' na Priscilla, 'Why' na Diamond, 'Can't get enough' na Otile Brown, Sheebah (Binkolera), Butera Knowless (Mbahafi), Rema Namakula (This is Love), B2C (No You No Life),

Ben Kayiranga (Only U), Christo Panda (Ashit), Mucoma (Umutoso), ⁠Babu (GoLo), ⁠Yvan Buravan ndetse na Mike Kayihura (Ihogoza), ⁠Kid Gaju (Kami), Bac T (Ice Cream), Ally Soudy (Umwiza wanjye), 'Imvune z'abahanzi, ⁠Ommy Dempoz (I got you) n'izindi.

InyaRwanda yabonye amakuru avuga ko mu kwitegura igitaramo cye, bamwe mu bahanzi bakoranye indirimbo mu bihe bitandukanye bashobora kuzatumirwa kuririmba.

Ariko kandi andi makuru avuga ko hari abahanzi bakoranye indirimbo kuri Album ye, bashobora kuzaririmba muri iki gitaramo. Biranashoboka cyane, ko hari abahanzi bakoranye mu bihe bitandukanye, bagahurira mu ndirimbo bazitabira iki gitaramo.

Ikindi, ni uko hari amakuru avuga ko hari indirimbo yakoranye n'abahanzi bakomeye mu Rwanda ndetse n'abo mu Karere, bashobora kuzagaragara bwa mbere bayiririmbana imbona nkubone mu gitaramo azakorera muri BK Arena.

Amakuru avuga ko mu gihe cy’amezi ane ari imbere, The Ben azakora uko ashoboye kugirango buri muhanzi bakoranye indirimbo azagaragare mu gitaramo cye.

  

The Ben yatangaje ko yasubiye muri Amerika mu rwego rwo gutegura ibijyanye n'igitaramo cye

 

The Ben yavuze ko tariki 1 Mutarama 2025 azakorera muri BK Arena igitaramo cyo kumurika Album ye nshya

The Ben yagaragaye ahagaze imbere y'inzu izwi nka Trump Tour iherereye mu Mujyi wa Chicago muri Amerika
The Ben asanzwe atuye muri Amerika atuye muri Amerika kuva mu 2010 

KANDA HANO UREBE AMASHUSHO Y'INDIRIMBO YA 'PLENTY' YA THE BEN

“>

Mu ijoro ryo kuri uyu wa Mbere tariki 28 Ukwakira 2024, inkuru nziza yavuye mu mujyi wa Paris itaha muri Manchester City ndetse no mu ikipe y’igihugu ya Espagne.

Iyo nkuru ni iy’uko umukinnyi w’ayo makipe yombi ukina mu kibuga hagati, Rodrigo Hernández Cascante [Rodri] yegukanye igihembo cya Ballon d’Or ahigitse ibikurankota nka Vinicius Junior na Jude Bellingham.

Tariki ya 28 Ukwakira 2024, ni bwo muri Théâtre du Châtelet i Paris hatangiwe ibihembo bitangwa na France Football ku bufatanye n’Impuzamashyirahamwe y’Umupira w’Amaguru ku Mugabane w’u Burayi (UEFA) bigahabwa abakinnyi b’umupira w’amaguru bitwaye neza mu byiciro bitandukanye.

Rodri ni we wegukanye igihembo gikuru kiruta ibindi cyatangwaga ku nshuro ya 67, kikaba ari icya mbere yegukanye mu mateka ye ndetse akaba ari n’umukinnyi wa mbere wa Manchester City ucyegukanye.

Uyu mukinnyi yegukanye iki gihembo nyuma y’uko mu mwaka ushize w’imikino yakinnye imikino 63 agatsindamo ibitego 10, akanatanga imipira 14 yabivuyemo.

Yafashije Manchester City kwegukana igikombe cya shampiyona, igikombe cy’Isi cy’amakipe n’igikombe kiruta ibindi ku Mugabane w’u Burayi anatwarana n’ikipe y’igihugu ya Espagne igikombe cya Euro aho yanabaye umukinnyi w’iri rushanwa.

Rodrigo Hernández Cascante ni muntu ki mu mupira w’amaguru?

Ku itariki 22 Kamena 1996 ni bwo Rodrigo Hernández Cascante yabonye izuba, aribonera mu gace ka Madrid mu gihugu cya Espagne. Nyuma yo kuvukira muri Madrid ndetse agakurira mu buzima bwiza, yakuze akunda gukina umupira w’amaguru.

Mu mwaka wa 2006 ni bwo yatangiye urugendo rwo kuwukina arutangirira muri Rayo Majadahonda, ishuri ryigishaga umupira w’amaguru riherereye mu Burasirazuba bwa Madrid.

Mu 2007, abatozaga Athletico Madrid y’abana babonye ubuhanga budasanzwe bwa Rodrigo Hernández Cascante wakiniraga Rayo Majadahonda, bahitamo kumujyana muri Atletico Madrid gukomeza kwiga umupira w’amaguru.

Kuva mu 2007 kugeza mu 2013, Rodri yari akiri muri Atletico Madrid y’abato, gusa mu 2013 yerekeza muri Villarreal yari imuguze nk’umukinnyi muto ariko ishaka kumuha ubumenyi buke igahita imuzamura mu ikipe nkuru.

Kuva mu 2015 Rodri yatangiye kwifashishwa muri Villarreal y’akabiri bato n’iya mbere gusa ikipe ya Kabiri yaretse kuyikinira mu 2016 aho yari asigaye akinira ikipe nkuru gusa. Muri Villarreal ya Kabiri, Rodri yayikiniye imikino 39, atsindamo igitego kimwe.

Villarreal ya mbere Rodri yayikiniye kugeza mu 2018 aho Atletico Madrid yari imaze kubona ko yibeshye mu kurekura uyu mukinnyi, maze yongera kumugura. Rodrigo Hernández Cascante yavuye muri Villarreal ya mbere ayikiniye imikino 63, atsinze igitego kimwe.

Nyuma yo gusubira muri Atletico Madrid mu 2018, ntabwo Rodrigo Hernández Cascante yayirambyemo kuko mu mwaka wa 2019 Pep Guardiola utoza Manchester City yari yamaze kumutera imboni nuko asaba Manchester City kumugura.

Kuva mu 2019 kugeza ubu Rodrigo Hernández Cascante akinira Manchester City aho amaze kuyikinira imikino 174 akaba yarayitsindiye ibitego 22.

Uretse amakipe atandukanye Rodri yakiniye, yanakiniye ikipe y’igihugu ya Espagne haba mu batarengeje imyaka 16 yakinyemo imikino 2, mu batarengeje imyaka 19 akinamo imikino 8, mu batarengeje imyaka 21 akimano imikino 6 atsinda igitego kimwe.

Mu ikipe y’igihugu ya Espanye nkuru, Rodrigo Hernández Cascante kuva mu 2018 amaze kuyikinira imikino 57, ayitsindira igitego kimwe.

Ibyo kwishimira mu buzima bwa Rodri Hernandez mu mupira w’amaguru.

Mu ijoro ryo kuri uyu wa Mbere itariki 28 Ukwakira 2024 ni bwo Rodrigo Hernández Cascante yinjiye mu bakinnyi batwaye Ballon d’Or abigeraho ahigitse abakinnyi nka Jude Bellingham na Vinicius Junior bahabwaga amahirwe.

Rodrigo Hernández Cascante mu mateka ye amaze kwitabira imikino ya Euro inshuro ebyiri ariko muri izo imwe yarayegukanye, ikaba iri mu byagize uruhare ngo yegukane Ballon d’Or.

Inshuro imwe ni yo Rodrigo Hernández Cascante yitabiriye igikombe cy’Isi cy’amakipe asanzwe ari kumwe na Manchester City nuko arayitwara. Mu nshuro 6 yitabiriye imikino ya UEFA Champions League, inshuro imwe yarayegukanye.

Mu myaka itanu amaze akinira Manchester City, Rodrigo Hernández Cascante yatwaranye nayo English Premier League inshuro Enye, muri izo Enye yatowe nk’umukinnyi mwiza muri English Premier League inshuro Ebyiri.

Rodrigo Hernández Cascante yegukanye UEFA Super Cup inshuro ebyiri, imwe yari muri Manchester City, indi ari muri Atletico Madrid.

Mu bwana bwe kandi Rodrigo Hernández Cascante yafashije Espagne kwegukana Euro y’abatarengeje imyaka 15, ndetse n’iyabatarengeje imyaka 19. Mu 2024 yafashije Espagne gutwara Euro mu ikipe nkuru.

Rodrigo Hernández Cascante ni we wegukanye Ballon d’Or mu bagabo

Rodri yegukanye igihembo cya Ballon d’Or ku nshuro ye ya Mbere

Aitana Bonmati ni we wegukanye Ballon d’Or ya 2024 mu bagore 

Lamine Yamal yegukanye igihembo cy’umukinnyi ukiri muto 

Harry Kane yahawe igihembo cy’umukinnyi watsinze ibitego byinshi mu mwaka ushize w’imikino 

Uko umwaka utashye imibare y'abinjira ku isoko ry'umurimo igenda yiyongera kandi si bibi ku iterambere ry'igihugu, ndetse n'imibare y'abakeneye akazi by'umwihariko mu myanya Leta ishyira ku isoko bagenda barushaho kwiyongera.

Imibare igaragaraza ko mu mwaka ushize, imyanya ikeneye abakozi mu bigo bya Leta byose yari 2790 ariko abanyuze ku ikoranabuhanga ryifashishwa basaba akazi bari 577.994. Aba barimo abarenga ibihumbi 382 bujuje ibyangombwa ariko abakoze ibizamini ni ibihumbi 91 gusa.

Perezida w'Agateganyo w'Inama y'Abakomiseri muri Komisiyo y'Igihugu Ishinzwe Abakozi ba Leta, Barnabé Muhire Sebagabo, yabwiye Inteko Ishinga Amategeko ko mu igenzura bakoze ku bigo 68 muri 87 byatanze raporo, nyuma y'amapiganwa y'akazi basanze 68% batubahiriza igihe cyagenwe cyo gushaka abakozi.

Iteka rya Perezida ryo mu 2020 ritegeka ko 'Gushaka abakozi ntibirenza iminsi 30 y'akazi uhereye ku munsi gutangaza umwanya w'umurimo ushakirwa umukozi byarangiriyeho hakuwemo iminsi y'ubujurire.'

Mu bigo 6% habayeho kwemerera abantu gupiganirwa imyanya badafite impamyabumenyi isabwa ku mwanya upiganirwa na ho 2% bashyize mu myanya abakandida batagaragaje impamyabumenyi.

Ati 'Abatsinze batujuje ibisabwa tubakura mu myanya kandi nta kindi twakora kitari icyo kuko urumva nyine ntabwo aba yujuje ibisabwa. Haba habayeho kudakora neza, nta n'ubwo twanatinya no kuvuga ko rimwe na rimwe haba habaye ibintu umuntu yakwita nka ruswa kuko hari aho byabaye dusabira abakozi ko bahabwa ibihano.'

Mu bitaro basanze harimo abahawe akazi batapiganiwe

Sebagabo yavuze ko mu bugenzuzi bakoze mu bitaro bya Leta, basanze harimo imyanya 45 itarimo abakozi nyamara bagombye kuba barashyizwemo bagatanga serivisi.

Ati 'Ku nzego zimwe na zimwe abantu batinda gushyira abakozi mu myanya kandi baratsinze ibizamini, ni ugukomeza kubakangurira no gukora ubukangurambaga bakajya bashyira abakozi mu myanya hakiri kare kuko baba banabasabye babakeneye.'

Banasanzemo kandi abakozi 10 badafite impamyabumenyi zisabwa ku mwanya bakoramo, mu gihe abandi batandatu bari mu kazi ariko badafite 'Equivalence' z'impamyabumenyi.

Ati 'Nta mpamvu n'imwe yatuma ushinzwe abakozi n'umuyoboye n'umuyobozi w'ikigo bashyira umuntu mu mwanya atujuje ibisabwa. Ntiyakagombye no gukora ikizamini atujuje ibisabwa, ntiyakagombye no kujya ku rutonde rw'abemerewe gukora ikizamini atujuje ibisabwa'

'Iyo dukoze igenzura dusaba ko bayivamo, nta kundi byangenda kuko baba barayigiyemo mu buryo butemewe n'amategeko.'

Hanagaragaye abakozi bane bashyizwe mu myanya mu bitaro bya Leta batarayipiganiwe, mu gihe hari n'ahasanzwe abakozi batanu bafite amazina atandukanye n'ari ku byangombwa byabo.

Komisiyo ishinzwe Abakozi ba Leta igaragaza ko umuyobozi bigaragaye ko yagize uruhare mu kwica amategeko asabirwa ibihano ndetse byaba bigize icyaha akabiryozwa.

Gusaba akazi hifashishijwe ikoranabuhanga biracyarimo ibihato

Sebagabo yagaragaje ko mu uburyo bw'ikoranabuhanga bukoreshwa mu gushaka abakozi [e-recruitment] hari ibibazo bimwe budakemura kuko hari aho bisaba ushinzwe abakozi kubanza gusuzuma neza niba ibyangombwa byashyizwemo byose ari iby'ukuri.

Ibi byatumye mu mwaka ushize abantu 195.191 bangana na 33% bari basabye akazi batemererwa kujya gukora ikizamini kubera ko bari batanze ibyangombwa bituzuye ariko byavumbuwe n'ubusesenguzi bukorwa n'abashinzwe abakozi baba bagomba kumenya neza niba uwasabye gupiganira umwanya yashyizemo ibyangombwa koko bijyanye n'ibyasabwe.

Ati 'Ibintu bijyanye no gushaka abakozi bakoresheje ikoranabuhanga, ibibazo birimo ni uko nta buryo ishobora kumenya dipolome ko ari yo. […] Irasa n'aho ikorwa mu bice bibiri, igice cyo kwakira amadosiye ariko akongera akagenzurwa n'abashinzwe abakozi kugira ngo barebe ko yujuje ibyangombwa.'

Ibisabwa abashaka akazi muri Leta bikwiye kuvugururwa

Komisiyo Ishinzwe abakozi ba Leta igaragaza ko hari bimwe mu byo basaba ko umuntu aba yujuje kugira ngo apiganirwe akazi ka Leta usanga byarashyizweho hagati ya 2003 na 2010, ku buryo bikumira bamwe bize amasomo agezweho mu Rwanda no mu karere.

Sebagabo ati 'Ibisabwa ku myanya byashyizweho kera ntibyavuguruwe ku buryo byari bikwiye kuvugururwa ndetse twanasabye ko inzego za Leta zigomba gusubira mu bisabwa ushaka gupiganira akazi kuko ubu abantu babaye abanyamwuga bihagije.'

'Hari nk'abantu batujuririye ko batabonye imyanya twanabisuzuma koko urebye amasomo yize, ugasanga icyo baba baramuhoye ni uko bitanditse mu bisabwa banditse ariko iyo usomye ibyo yize ugasanga bifitanye isano n'ibyo agiye gukoramo.'

Mu mwaka 2023/2024 Komisiyo Ishinzwe Abakozi ba Leta yakiriye ubujurire 9.857, muri bwo 9,500 buhwanye na 96.37% bujyanye no gushaka no gushyira abakozi mu myanya naho ubujurire 357 buhwanye na 3.62% ni ubushingiye ku micungire y'abakozi. Imibare igaragaza ko 27.1% basanze bufite ishingiro.

Ibigo bimwe byemerera abadafite ibyangombwa gupiganira akazi bikanakabaha

Mu bikorwa bitandukanye byakozwe birimo n'ubukangurambaga bwakozwe hirya no hino mu gihugu, abanyamurango ba Rotary Club Rwanda bagaragaje ko bagishikamye ku ntego yo kurandura imbasa ku Isi.

Rugera Jeannette wigeze kuba Umuyobozi wungirije Guverineri wa Rotary Club mu Karere ka 9150, yatangaje ko urugamba rwo gukomeza gukumira imbasa mu Rwanda barufatanyamo n'abanyamuryango barenga 400 ba Rotary Clubs 12 na Rotaract Clubs eshanu ziri mu gihugu hose.

Ati 'Club zacu zunze ubumwe muri uru rugamba kandi ubukangurambaga buracyakomeje kubera ko ingaruka z'iki cyorezo ntizigarukira ku mipaka y'igihugu.'

Muri uyu mwaka wahariwe gukomeza kurwanya imbasa, hakozwe ibikorwa byo gukingira abana mu Murenge wa Gihara mu Karere ka Kamonyi.

Gukingira imbasa ni ingenzi cyane kugira ngo igihugu gikomeze kwizera ko cyayiranduye burundu. Ku wa 27 Ukwakira 2024 abanyamuryango ba Rotary Club Rwanda bakoze urugendo rugamije gukangurira ababyeyi gukingiza abana no kwishimira ko Isi imaze kurandurwaho imbasa ku ijanisha rya 99,99%.

Mu kiganiro n'abanyamakuru kuri uyu wa 28 Ukwakira 2024, Dr. Muderevu Alexis ukuriye Komisiyo yo Kurwanya imbasa muri Rotary Club Rwanda akaba n'umuganga, yasabye abaturarwanda gukomeza kuba maso birinda imbasa no gukora ku buryo nta mwana uvuka ngo ntahabwe urukingo.

Ati 'Tugomba kuba maso twirinda ko iki cyorezo cyakongera kugaragara. Nk'uko mubizi hari impamvu nyinshi zishobora gutuma cyongera kubyutsa umutwe harimo n'urujya n'uruza w'abantu bava mu bihugu iyi ndwara ikigaragaramo bashobora kuyikwirakwiza mu bandi. Icyo gihe igihugu gisabwa guhora cyiteguye ko abinjira bose bagomba guhabwa urukingo nk'uburyo bukomatanyije bwo kurandura burundu iki cyorezo.'

Ku rwego mpuzamahanga imbasa ntigifatwa nk'icyorezo kibangamiye ubuzima bwa muntu kuko ingamba zo kukirwanya zihamye.

Abafatanyabikorwa mpuzamahanga ba Rotary mu kurwanya imbasa harimo Bill & Melinda Gates Foundation, UNICEF, CDC n'Ishami ry'Umuryango w'Abibumbye ryita ku Buzima, (OMS).

Imibare ya OMS igaragaza ko imbasa yaranduwe ku rwego rw'Isi ku rugero rwa 99,9%, hasigaye ibihugu bya Afghanistan na Pakistan n'agace gato ko muri Gaza.

Umukozi muri Porogaramu yiswe 'Expanded Programme on Immunization (EPI)' yo gutanga inkingo ku bana benshi, Dr Muhayimpundu Marie Aimée, yatangaje ko gukingira ari bwo buryo bwonyine bwo kwirinda ko iyi ndwara yakongera kugaruka.

Ati 'Gukingira buracyari uburyo bwizewe bwo kwirinda. Birakenewe ko gukingira no gusuzuma bikomeza. Twabonye ko imbasa rimwe na rimwe ishobora kongera kugaruka, rero hatabayeho ibikorwa bihoraho ibintu birahinduka.'

Masterjerb Paul Birungi wigeze kuba Perezida wa Rotary Club Virunga mu 2004-2005, yavuze ko uretse no gukora ubukangurambaga bwo kurwanya imbasa, banafasha abo yagizeho ingaruka barimo abafite ubumuga.

Ati 'Mu gihe nari Perezida wa Rotary Club Virunga, twatanze amagare 550 y'abafite ubumuga mu gihugu hose mu bigo byose bya Gatagara ndetse dushyiraho ikigo (mu Bitaro bya Gisirikare i Kanombe) gikora insimburangingo ku bazikeneye.'

'Turi guharanira ko nta wuhezwa aho abantu bamugajwe n'imbasa bashobora kwibeshaho, tubakangurira gukora imyitozo ngororamubiri no kubafasha binyuze muri gahunda mpuzamahanga zigenewe aafite ubumuga.'

Ibikorwa bya Rotary Club Rwanda kandi bigera no mu burezi no gukuza umuco wo gusoma binyuze mu masomero ndetse Rotary Club Kigali Virunga yagize uruhare mu kubaka Isomero Rusange rya Kigali.

Ku munsi wahariwe kurwanya imbasa ku Isi, wizihizwa ku wa 24 Ukwakira, bazirikanye Dr. Jonas Salk wakoze urukingo rwa mbere rw'imbasa.

Rugera Jeannette wigeze kuba Umuyobozi wungirije Guverineri wa Rotary Club mu Karere ka 9150 yatangaje ko bashyize hamwe mu kurwanya imbasa

Dr. Muderevu Alexis ukuriye Komisiyo yo Kurwanya imbasa muri Rotary Club Rwanda yasabye abaturage kuba maso no gukingiza abana

Dr Muhayimpundu Marie Aimée yatangaje ko gukingira ari bwo buryo bwonyine bwo kwirinda ko iyi ndwara

Masterjerb Paul Birungi, wigeze kuba Perezida wa Rotary Club Virunga mu 2004-2005 yavuze bafasha abo imbasa yateye ubumuga

Ni gahunda bwihaye yo kumanuka mu midugudu inshuro eshatu mu cyumweru, bakarebera hamwe bimwe mu bibazo bikibangamiye abaturage hagamijwe guca burundu isiragizwa ryabo.

Umuyobozi w'Akarere ka Musanze, Nsengimana Claudien, yavuze ko iyi gahunda bayihaye ngo bakemure ibibazo bikibangamiye abaturage kandi ko itanga umusaruro kuko mu bibazo bakira, ibirenga 80% birakemurwa.

Yagize ati “Komite nyobozi y'Akarere, abakozi b'Akarere , inzego z'umutekano twese turamanuka tukegera abaturage bacu, tukabatega amatwi, tukumva ibibazo bafite kandi mu by'ukuri umusaruro uragenda uboneka kuko ibibazo byinshi tuvayo bikemutse n'ibidakemukira aho bihabwa umurongo. Ni gahunda twihaye kandi iri gutanda umusaruro.”

Bamwe mu baturage bakemuriwe ibibazo muri iyi gahunda, bavuga ko bashimishijwe cyane n'uburyo ubuyobozi bwabakemuriye ibibazo byabo babasanze aho batuye, bakifuza ko iyi gahunda yahoraho kuko mbere basiragizwaga mu nzira bahora bajya kureba abayobozi.

Nirere Françoise yagize ati “Ni byiza kuba abayobozi bo ku rwego rw'Akarere baje hano ku murenge kumva ibibazo by'akarengane dufite, kuko hari igihe uba ufite ikibazo umurenge warakinaniwe bikaba ngombwa ko ujya ku karere kandi no kubona amatike akugeza mu mujyi biba bigoye, iyi gahunda turayishimiye ni nziza cyane.”

Akarere ka Musanze kashyize imbaraga muri gahunda yo kwegera abaturage mu buryo bwihariye, babasanga aho batuye kugira ngo abe ariho hakemurirwa ibibazo byabo, babarinda gusiragira kuko batakaza byinshi n'umwanya wo gukora ngo biteze imbere.

Umuyobozi w’Akarere ka Musanze wungirije ushinzwe imari ubukungu n’Iterambere, Uwanyirigira Clarisse nawe mu rindi tsinda riri kumva ibibazo bigakemurwa

Umuyobozi w’Akarere ka Musanze Nsengimana Claudien ari mu nteko y’abaturage bari gukemura ibibazo byabo aho basigaye babasanga aho batuye

Visi Meya Kayiranga Theobald ari gufatanya n’izindi nzego mu gukemura ibibazo by’abaturage

Icyemezo cyashingiye ku busabe bw'umushinjacyaha, wagaragaje ko hashingiwe ku miterere y'urubanza n'ibivugirwamo, byaba byiza urubanza rukomereje mu muhezo.

Yagaragaje kandi ko hari impungenge zo kuba uwahohotewe nubwo yahishwe imyirondoro, ashobora kumenyekana mu gihe cyo gutanga ibimenyetso.

Urukiko rwabajije Bishop Harerimana icyo avuga ku kuba urubanza rwe rwakomereza mu muhezo, yemeza ko nta kibazo.

Ati “Nta kibazo kuba rwakomereza mu muhezo.”

Urukiko rwahise rufata icyemezo ko urubanza rukomereza mu muhezo abari mu cyumba cy'iburanisha batari ababuranyi bategekwa gusohoka.

Urubanza rwari rwitabiriwe n'abantu benshi barimo abo mu Itorero Zeraphat Holy Church ndetse n'abo mu miryango y'abaregwa.

Bishop Harerimana n'umugore we bakekwaho ibyaha bitatu birimo kwihesha ikintu cy'undi hakoreshejwe uburiganya, gukangisha gusebanya no gukwirakwiza amafoto y'imikoreshereze y'ibitsina.

Urubanza rwa Bishop Harerimana n’umugore we rwashyizwe mu muhezo

Ni amakuru yamenyekanye mu gitondo cyo ku wa 27 Ukwakira 2024, ubwo uyu Mfituwampaye yabyukaga agasanga inka ye yacitse umurizo iri kuvirirana.

Umunyamabanga Nshingwabikorwa w'Umurenge wa Ruhango, Kayitare Wellars, yemereye IGIHE iby'aya makuru, avuga ko babimenye ubwo umuturage yabatabazaga.

Ati 'Umuturage yarabyutse asanga inka ye yatemwe umurizo, ariko abibona atinze kuko yabonaga inka nta kibazo ifite. Yabibonye agiye kuyikukira. Ubwo inzego twahise tubimenya tujyayo duherekejwe n'inzego z'iperereza ngo zirebe uko byagenze, none ubu dutegereje icyo iperereza zigaragaza.''

Gitifu Kayitare yakomeje avuga ko kubera ko iyi nka yari yavuye amaraso cyane yanacitse intege, babonye itakomeza kubaho yahise igurishwa barayibaga, ubuyobozi bukaba bwarahise bwiyemeza kuzashumbusha uyu muturage indi nka kugira ngo akomeze yorore.

Uretse kuyica umurizo bakawutwara, nyir'uguro avuga ko na kindi cyangijwe ariko kandi hakibazwa icyo bari bagambiriye kindi abakoze ibi, ari naho ahera asaba ubuyobozi ko hakorwa iperereza ryimbitse, kugira ngo hamenyekana abakoze aya mahano.

Ubu bugizi bwa nabi bwabereye mu murenge wa Ruhango

Byabereye mu Mudugudu wa Kabwenge, Akagari ka Kigarama, Umurenge wa Gishyita mu Karere ka Karongi ku wa 28 Ukwakira 2024.

Umunyamabanga Nshingwabikorwa w'Umurenge wa Gishyita, Songa Rwandekwe yabwiye IGIHE ko saa tanu z'amanywa aribwo bahamagawe n'umugabo w'imyaka 33, avuga ko ageze mu rugo agasanga umugore we amanitse mu mugozi yapfuye.

Ati “Uyu mugabo ni umuhinzi ariko afite n'ahantu arara izamu. Twajyanyeyo n'izindi nzego dusanga uwo mugore amanitse mu kiziriko kizirika amatungo yapfuye, hafatwa umwanzuro ko umurambo ujyanwa ku Bitaro bya Mugonero gukorerwa isuzuma mbere y'uko ushyingurwa”.

Iperereza ry'ibanze ryagaragaje ko uyu mugore nta muntu uzwi bari bafitanye ikibazo cy'amakimbirane.

Gitifu Songa yasabye abaturage ko uwaba afite ikibazo akwiye kwegera bagenzi be, inshuti z'umuryango cyangwa ubuyobozi bumwegereye akakibaganiriza aho kugira ngo afate umwanzuro wo kwiyambura ubuzima.

Urupfu rw’uyu mugore rwabereye mu karere ka Karongi

Ni umushinga w'itegeko wagejejwe ku mutwe w'Abadepite kuri uyu wa 28 Ukwakira 2024.

Zimwe mu mpinduka zigaragara muri iri itegeko ngenga rigena imikorere ya Sena harimo kuba ryarahujwe n'itegeko ngenga rigena imikorere y'Umutwe w'Abadepite ku ngingo zimwe, hanavugururwa inshingano za Komisiyo, hitabwa ku bigize amahame remezo, bigahuzwa n'inshingano za komisiyo.

Visi Perezida wa Sena, ushinzwe amategeko no kugenzura ibikorwa bya Guverinoma, Senateri Nyirahabimana Solina, yatangaje ko kuvugurura itegeko ngenga bizafasha kunoza imikorere ya Sena.

Ati 'Ivugurura ry'iri tegeko ngenga rizadufasha kurushaho kunoza imikorere yacu ari ku bijyanye no gushyira mu bikorwa inshingano za sena by'umwihariko ijyanye no kugenzura iyubahirizwa ry'amahame remezo.'

Yahamije ko komisiyo izajya igenzura amahame remezo ajyanye n'inshingano zayo bitandukanye n'uko byari bimeze mbere.

Ati 'Biteganyijwe ko buri komisiyo izajya igenzura amahame remezo yose afite aho ahuriye n'inshingano zayo bikaba bitandukanye n'uko byari bimeze uyu munsi aho usanga buri komisiyo ifite by'umwihariko ihame remezo ishinze.'

Biteganyijwe ko Komisiyo zishobora gukora inama zifashishije ikoranabuhanga ariko bibanje kwemezwa na Biro ya Sena ndetse ku bw'inyungu z'akazi, Biro ya Sena ishobora guhindurira Umusenateri Komisiyo igihe icyo aricyo cyose.

Uko byari bisanzwe umusenateri yashoboraga guhindurirwa komisiyo nyuma y'imyaka ibiri n'igice. Ni mu gihe Umusenateri weguye yandikira Perezida wa Sena akaba ari we ubimenyesha izindi nzego.

Sena y'u Rwanda igizwe n'Abasenateri 26 barimo abagore 53% mu gihe abagabo ari 47%.

Uyu mushinga uzasuzumwa n'inama y'abaperezida kuko ari yo ibifitiye ububasha.

Visi Perezida wa Sena, Senateri Solina Nyirahabimana yavuze ko amavugurura azanoza imikorere ya Sena

Senateri Nyirasafari na we yari mu bagiye gusobanura ishingiro ry’umushinga w’itegeko ngenga rigena imikorere ya Sena

Abadepite 73 bose batoye ishingiro ry’umushinga, imfabusa ziba ebyri

Amafoto: Kwizera Remy Moïse