Category: Uncategorized

Isenyuka ry’umuryango ni ikibazo rusange mu bice byose by’Isi harimo no muri Afurika. Nubwo uyu mugabane ukunze gushimirwa kubera ubumwe bukomeye ndetse n’indagagaciro, uracyahanganye n’ibibazo bikomeye birimo n’umubare uri hejuru wa gatanya.

Uko imyaka igenda iza indi igataha, umubare w’abatandukana ukomeza kwiyongera. Gatanya ni inzira yemewe isesa ku mugaragaro isezerano ry’abashakanye. Ibi biha uburenganzira bungana impande zombi bwo kongera kuba ingaragu cyangwa kongera gushaka bundi bushya.

Nubwo amakuru ku birebana na gatanya muri Afurika ari macye, ariko raporo iheruka yakozwe na Wisevoter agaragaza bimwe mu bihugu byo kuri uyu mugabane birembejwe n’iki kibazo.

Iyi raporo igaragaza ko Libya iza ku mwanya wa mbere ndetse ikaza ku mwanya wa 18 ku Isi hose. Mu bindi bihugu bigaragara kuri uru rutonde, harimo Egypt, Mauritius, Algeria, Seychelles, Sudani na Afurika y’Epfo  

Raporo y'Urwego rw'Ubucamanza mu Rwanda iherutse gutangazwa igaragaza ko imiryango 2833 ariyo yatse gatanya mu mwaka ushize, ibintu bikomeje gutera benshi kwibaza impamvu imanza nk'izo zikomeje kwiyongera.

Mu manza mbonezamubano zakiriwe n'inkiko mu 2023-2024, zingana na 25,481, iziza ku isonga ni izirebana no gutandukana burundu kw'abashakanye kuko zigize dosiye 2833.

Nubwo bimeze bityo ariko bigaragara ko habayeho igabanyuka ugereranyije n'umwaka wari wabanje kuko wo ibirego byari byinjiye mu nkiko birebana na gatanya byari 3075, bisobanuye ko hagabanyutseho dosiye 242 bigize 7%.

Iyi raporo igaragaza uko ibikorwa by'ubutabera byagenze mu 2023-2024, igaragaza ko mu manza mbonezamubano hatanzwe ibirego 693 byo gihindura ibyemezo by'umutungo naho indishyi zikomoka kutubahiriza masezerano hatanzwe ibirego 692.

Ni mu gihe gusimbura inyandiko ndangamimerere hatanzwe ibirego 646, ihererekanyamutungo ritimukanwa hatangwa ibirego 632, mu gihe ibirego by'amasezerano ari 553.

Itegeko rigenga abantu n'umuryango riheruka kuvugururwa ndetse zimwe mu mpamvu zagaragajwe harimo n'uko gatanya ziyongereye cyane mu myaka itanu ishize kuko nko 2018 imiryango yemerewe gatanya binyuze mu nkiko yari 1311.

Mu 2019, imiryango 8941 yemerewe n'inkiko gutandukana mu gihe mu 2020 inkiko zakiriye ibirego 3213. Raporo y'Ibikorwa by'Ubucamanza ya 2021-2022, igaragaza ko ikibazo cyari kiganje kuruta ibindi mu manza mbonezamubano ari ari ugutandukana burundu kw'abashakanye aho mri uwo mwaka abatandukanye bagera ku 3322.

Bimwe mu bituma abantu basaba gatanya harimo ko umuntu ashobora guhitamo gusezerana n'undi kandi afite gahunda yo kugabana nawe imitungo kuko iyo mwavanze umutungo mugabana mukaringaniza kabone nubwo mwaba mumaranye imyaka ibiri gusa mu gihe ufite ibimenyetso bikwemerera kubona gatanya.

Ibyo byatumye harimo ingingo zivugururwa ku birebana na gatanya cyane ko hari aho byari bimaze kumera nk'intwaro ku bashaka imitungo kuko hari ubwo benshi babaga barasezeranye ivangamutungo risesuye ku buryo nibatandukana bazagabana buri umwe akeguka 50% by'imitungo bari bafite.

Ingingo 156 y'itegeko rishya iteganya ko iyo habayeho iseswa ry'ivangamutungo rusange biturutse kuri gatanya, abashyingiranywe bagiye gutandukana bataramarana imyaka itanu babana, umucamanza ashobora gutegeka ko batagabana imitungo n'imyenda baringanije.

Iri tegeko byitezwe ko rizagabanya umubare wabasaba gatanya wakomeje gutumbagirwa mu myaka itanu ishize.

Dore ibihugu bigaragaramo gatanya nyinshi muri Afurika mu 2024

  

 

Abazi uyu mwarimu w'imyaka 50 bavuga ko nta burwayi buzwi yagiraga. Bikimara kuba ubuyobozi bw'ishuri bwihutiye guhamagara imbangukiragutabara ihagera yamaze gushiramo umwuka.

Ubuyobozi bwahise bufata icyemezo cyo kohereza umurambo wa nyakwigendera mu Bitaro bya Muhororo kugira ngo ukorerwe isuzuma hamenyekane icyateye urupfu.

Umuyobozi wungirije w'Akarere ka Ngororero ushinzwe imibereho y'abaturage, Mukunduhirwe Benjamine, yabwiye IGIHE ko nk'ubuyobozi bw'akarere basuye iri shuri bagahumuriza abanyeshuri ndetse banakorerayo inteko y'abaturage yatangiwemo ubutumwa bwo gusaba ababyeyi kuba hafi y'abana no gukomeza kubahumuriza.

Ati 'Abanyeshuri muri rusange bameze neza ariko birumvikana ntabwo habura abagira ubwoba. Twasabye abarezi n'ababyeyi gukomeza kuba hafi y'abana no kubahumuriza'.

Visi Meya Mukunduhirwe yavuze ko bataramenya icyateye urupfu kuko batari banabasha kuvugana n'umudamu wa nyakwigendera kugira ngo bamenye niba hari uburwayi budasanzwe yari afite.

Ati 'Iby'ubuzima bimenywa n'abaganga. Umurambo twawohereje ku bitaro ibizamini byo kwa muganga nibyo bizagaragaza icyateye urupfu'.

Umwarimu yituye hasi imbere y'abanyeshuri ahita apfa

Ni igikorwa giteganyijwe ku wa Gatatu tariki 06 Ugushyingo 2024, kikazatangira saa yine z'igitondo kikageza saa kumi z'umugoroba.

Umujyi wa Kigali wavuze ko kubera bidateganyijwe ko uyu muhanda uzafungwa, abawukoresha basabwa korohereza abakozi bazaba bari mu mirimo.

Wasabye ko imihanda ya KN 86 st-KN 87 st-KN 1Rd; KN 2 Ave-KN 82 st-KN 86 st n'uwa KN 87st – KN 93 st-KN 1Rd, yakoreshwa mu rwego rwo kwirinda umuvundo w'ibinyabiziga.

Hatangajwe kandi ko muri uyu muhanda uzaba uri kuvugururwa, abapolisi bashinzwe umutekano wo mu muhanda bazaba bari hafi ngo babafashe.

Aya mavugura agiye gukorwa, ni ukongeraho igisate cy'umuhanda cya gatatu, kizajya kinyuramo bisi gusa.

Mu gihe aya mavugura azaba arangiye, bisi zizajya zisohoka muri Gare yo mu Mujyi [DownTown], zinyure mu gice cy'umuhanda wagenwe, nigera mu masangano y'imihanda [rond-point], ikomereze mu gisata cyagenewe bisi gusa.

Umuvugizi w'Umujyi wa Kigali, Emma Claudine Ntirenganya, yatangarije IGIHE ko mu rwego rwo gukemura kimwe mu bibazo bituma imodoka zitinda mu nzira hari gahunda yo gushyiraho ibisate by'imihanda byagenewe bisi nini gusa.

Ati 'Turimo gushaka ibisubizo bitandukanye bikemura uburyo bisi zizajya zigenda mu masaha y'umuvundo. Icyo nikimara kuboneka bizajya mu buryo. Reka duhere ku kirebana no guharira bisi igisate cyazo, bizatuma bisi zikomeza kugenda nta kibazo.'

'Ntabwo bizahita bitangira muri Kigali yose birumvikana, hari aho tuzatangirira, ni kuvuga ngo tuzaherahariya Downtown tugana i Remera […] Ibyo bizagenda bijya n'ahandi ariko aho ni ho tuzatangirira nk'igerageza kugira ngo turebe uko bizagenda.'

Emma Claudine yakomeje agira ati 'Ubu twatangiye gutunganya hariya umuhanda munsi ya Downtown kuko hariya ni ho bisi zisohokera, kubera ko hari ibisate bibiri turimo kuhatunganya kugira ngo habe igisate cya gatatu kigenewe bisi.'

'Izajya isohoka Downtown ize yinjire mu gisate cyayo nta yindi iri kukigenderamo, ize yinjire mu masangano y'imihanda, hazaba hashushanyijwe mu buryo imodoka z'abantu ku giti cyabo zigendera uruhande rumwe bisi na yo igasigara mu ruhande rwayo.'

📌Itangazo: Kuri uyu wa Gatatu tariki 06 Ugushyingo 2024, hateganyijwe imirimo yo gushyira kaburimbo ku gisate cy’iburyo cy’umuhanda uhereye ahahoze Gereza Nkuru ya #Kigali kugera mu masangano y’imihanda yo mu Mujyi rwagati. #KigaliYacu pic.twitter.com/zWshtjVWAQ

— City of Kigali (@CityofKigali) November 5, 2024

Rihanna Robyn Fenty umuhanzikazi wubatse izina ku rwego mpuzamahanga, akaba asigaye yibereye mu bikorwa by’ubucuruzi, yamaze kugaragaza amarangamutima ye ku munsi w’amatora ya Perezida wa Leta Zunze Ubumwe z’Amerika.

Uyu muhanzikazi mu mashusho yashyize ku mbuga nkoranyambaga ze yamwerekanaga yicaye mu modoka igenda buhoro, yashyizeho amagambo y’urwenya agira ati: ‘Ndikugerageza kujya gutora nkoresheje Passport y’umuhungu wanjye”.

Rihanna kandi yongeyeho ati: ”Mutore kuko njyewe bitankundira”. Aya magambo y’uko atemerewe gutora yayakoresheje inshuro ebyiri yerekana uburemere bw’uko atari bubashe guhitamo hagati ya Kamala Harris na Donald Trump. 

Ibi yabyanditse mu rwego rwo gukangurira abafana be kujya gutora mu mwanya we ndetse anabwira abiyandikishije gutora gusa bakaba badashaka kujya gutora umunsi wageze.

Impamvu Rihanna atemerewe gutora ni uko adafite ubwenegihugu bw’Amerika, dore ko kuva yagera muri Amerika atigeze na rimwe yaka ubwenegihugu ndetse mu mwaka wa 2016 yavuze ko ari ‘Umwimukira udashaka kuba umunyamerika’. 

Ibi yabitangaje ubwo yasohoraga indirimbo yise ‘American Oxygen’ ivuganira abimukira batuye muri Amerika. Iki gihe yavuze ko atifuza kuba Umunyamerika ahubwo ko naramuka ahabyariye abana be ari bo bazaba bafite ubwenegihugu.

Rihanna utemerewe gutora kuko adafite ubwenegihugu bw’Amerika, yasabye abafana be kumutorera

Uyu musore agifatwa yemeye ko yari yahawe ibihumbi 50 Frw n'undi muntu benda gusa kugira ngo amukorere iki kizami kuko cyari cyaramunaniye.

Uyu musore yatawe muri yombi kuri uyu wa Mbere tariki ya 4 Ugushyingo 2024. Yafatiwe kuri site ya Kirehe isanzwe ikorerwaho ikizamini cy'uruhushya rw'agateganyo rw'ikoranabuhanga, iherereye mu Mudugudu wa Rugerero mu Kagari ka Nyabikokora mu Murenge wa Kirehe.

Umuvugizi wa Polisi y'u Rwanda mu Ntara y'Iburasirazuba, SP Twizeyimana, yabwiye IGIHE ko kugira ngo uyu musore afatwe byaturutse ku mupolisi warebye neza Indangamuntu yari yitwaje akabona ifoto iriho itandukanye n'uko we asa.

Ati 'Ejo ahagana saa Tanu n'Igice nibwo umusore w'imyaka 18 yaje gukora ikizamini cya Provisoire aranagitsinda. Nyuma yajyanye Indangamuntu kugira ngo yandikishe amanota ye, Umupolisi yitegereza neza iyo Ndangamuntu abona ni iy'umuntu ukuze ufite imyaka 32 abona ntabwo isura isa neza neza nk'uwo musore wari ukiri muto niko guhita bamufata atangira kubazwa neza.'

SP Twizeyimana yakomeje avuga ko uwo musore yageze aho abwiza ukuri Polisi, ababwira ko uwo muntu yari yaje gukorera ikizami yari yamwemereye ibihumbi 50 Frw, mu gihe yabasha kumukorera ikizamini cya Provisoire akagitsinda.

Yavuze ko bahise bamushyikiriza RIB kugira ngo ikore iperereza inamushyikirize ubushinjacyaha.

Ati 'Abantu bakwiriye gushyira imbaraga nyinshi mu kwiga amategeko y'umuhanda kuruta gushaka gukoresha amanyanga mu kubona ibyangombwa byo gutwara ibinyabiziga. Nibamenye ko wakoresha umwanya wawe neza ukabona uruhushya rwa burundu kuruta kwishora mu byaha byo gushaka kurubona mu buryo bunyuranyijwe n'amategeko, uzajya abirengaho rero azajya afatwa anashyikirizwe inkiko.'

SP Twizeyimana yagiriye inama buri wese wifuza guca muri iyi nzira ko bitazamuhira ngo kuko Polisi iri maso kandi itazemera abashaka kubona impushya zo gutwara ibinyabiziga ari uko bariganyije, avuga ko ari naho hashobora guturuka impanuka za hato na hato.

Kuri ubu uyu musore afungiye kuri sitasiyo ya RIB ya Kirehe.

Izi mpanuka zabaye mu ijoro ryakeye tariki ya 4 Ugushyingo 2024. Iya mbere yabereye mu Mudugudu wa Kavura mu Kagari ka Nyarusange mu Murenge wa Muhazi mu Karere ka Rwamagana.

Iyi mpanuka yatewe n'imodoka y'ikamyo yavaga mu gihugu cya Tanzania yagonganye n'umuturage wambukaga umuhanda wagendaga n'amaguru.

Umuvugizi wa Polisi y'u Rwanda mu Ntara y'Iburasirazuba, SP Twizeyimana Hamduni, yabwiye IGIHE ko iyi mpanuka yatewe n'ikamyo yavaga muri Tanzania yari ifite umuvuduko mwinshi.

Ati ' Iyo kamyo yagonze umugabo uri mu kigero cy'imyaka 30 ahita yitaba Imana kugeza ubu imyitondoro ye ntabwo iramenyekana, umurambo wahise ujyanwa ku bitaro bya Rwamagana.'

Indi mpanuka yabaye ni iyabereye mu Karere ka Nyagatare mu Murenge wa Nyagatare mu Kagari ka Gakirage mu Mudugudu wa Kibuga I, aho umumotari uri mu kigero cy'imyaka 30 yahise ahasiga ubuzima.

SP Twizeyimana ati ' Iyi mpanuka yabaye ahagana saa Moya z'ijoro, umusore w'imyaka 30 yari atwaye moto aza kugonga igare ryari ritwawe n'umusore w'imyaka 20. Uwo mumotari rero yahise yitaba Imana mu gihe umunyonzi we yakomeretse cyane. Iyi mpanuka twavuga ko yatewe no kudahana intera hagati y'abari mu muhanda kuko bose bajyaga mu cyerekezo kimwe.'

SP Twizeyimana yasabye abakoresha umuhanda kubahiriza amategeko y'umuhanda bakirinda umuvuduko, bakamenya guhana intera mu gihe bari mu muhanda, kwirinda kuvugira kuri telefone mu gihe batwaye ibinyabiziga,kwirinda ibisindisha n'ibindi bibi byose byabateza impanuka.

Yavuze ko imirambo ya ba nyakwigendera yajyanywe mu bitaro bya Rwamagana na Nyagatare mu gihe barindiriye ko ikorerwa isuzumwa.

Kubaka imihanda ni kimwe mu byihutisha iterambere n'ubuhahirane hagati y'abaturage batuye uturere tunyuranye kuko babasha kugeza umusaruro w'ibyo bejeje ku masoko.

Abatuye mu Karere ka Ruhango babwiye RBA ko umuhanda Ruhango-Gitwe-Buhanda wangiritse cyane nyamara uramutse ukozwe byatuma ibikorwa by'iterambere bakora birushaho kugenda neza.

Umwe muri bo yagize ati 'Tubonye umuhanda ibintu byose byazamuka, byagenda neza cyane.'

Undi w'umugore yavuze ko umuhanda wasenywe n'amazi 'noneho waba uri mu modoka umurwayi we kugira ngo agere nk'i Kabgayi ni ukuri ni nk'aho agerayo yapfuye kubera ko igenda yiterura yitura hasi, moto igenda igusimbiza.'

Aba bose bahamya ko hari n'abantu bajya gusura abavandimwe n'inshuti muri aka gace bikarangira baraye mu nzira imodoka zabapfiriyeho.

Umuyobozi w'Akarere ka Ruhango, Habarurema Valens yatangaje ko inyigo z'imihanda ihuje uturere dutandukanye ziri gukorwa ku buryo nirangira bizaba igisubizo ku bayikoresha.

Ati 'Hari umuhanda ugiye gutangira gukorwa, ni umuhanda wo ku rwego rw'igihugu tuwufatanya n'ubuyobozi bukuru bw'igihugu ariko umuhanda wa Karongi ukaza Buhanda-Ruhango, ukaza i Gitwe ukajya i Nyanza ukagaruka na hano mu Ruhango mu Mujyi, uwo muhanda inyigo yenda kurangira, uratangira mu gihe kitari kinini.'

Meya Habarurema avuga ko bafite icyizere nubwo amafaranga atari yava mu turere dutandukanye unyuramo.

Yanavuze ko umuhanda uhuza Ruhango na Muhanga urimo ibinogo byinshi, agahamya ko igikeneye kwitabwaho ari ikiraro kinini cyane kirimo.

Ati 'Hari ikiraro kinini cyane cyatwara nka miliyoni 300 Frw kiri hagati y'uturere twa Ruhango na Muhanga ahitwa i Mpanda. Icyo twavuga ni uko kirimo gutegurwa kubakwa, tuzagifatanya nab wo nubwo kigendwa ariko harimo impungenge rero uturere twombi tuzacyubaka kandi inyigo yaratangiye rero abaturage bihangane gato.'

Yahamije ko mu ngengo y'imari ivuguruye izatangira gukoreshwa muri Mutarama 2025 hari ibishobora gutangira gukorwa kuri iki kiraro.

Muri Rusange Ruhango izwiho ubuhinzi bw'imyumbati n'ibindi bihingwa byitezweho kuzagira uruhare mu gufasha igihugu kwihaza mu biribwa no gusagurira amasoko kugeza mu 2029.

Abakoresha umuhanda Ruhango-Gitwe-Buhanda bagaragaza ko amazi yawangije cyane ku buryo ukwiye gushyirwamo kaburimbo