Category: Uncategorized

Alexis Ngabo Karegeya w'imyaka 28 yavukiye anakurira mu Bigogwe ho mu Karere ka Nyabihu mu Ntara y'Uburengerazuba, ari mu basore bakiri bato bakomeje kugaragaza ubudasa mu gisata cy'Ubukerarugendo.

Kugeza ubu binyuze mu mushinga yatangije wa Visit Bigogwe, abanyarwanda n'abanyamahanga basigaye bagenderera aka gace k'ubukerarugendo bushingiye ku muco.

Ubwo yahabwaga umwanya mu nama ya 7 y’Ihuriro ry’Urubyiruko, Youth Connekt Africa 2024, Ngabo Karegeya yavuze ko ari umushumba w’umunyamwuga kandi utewe ishema na byo. Yavuze ko yumvaga ntako bisa kuvukira no gukurira mu Bigogwe, ariko yabibwira abo bigana bakamuseka bityo atangira kwiyitirira ahandi.

Yakomeje agira ati: “Muri Covid-19, nafashe icyemezo cyo kumenyekanisha aho nkomoka ku Isi hose. Nafunguye konti ya Twitter nyita ‘Ibere rya Bigogwe,’ urutare ruzwi cyane muri Bigogwe.”

Karegeya yavuze ko yahisemo guha umushinga we iri zina kuko ryari risanzwe rizwi, ibyatumye ibikorwa bye bimenyekana vuba kandi mu byuryo bworoshye. Nyuma yo gufunguza konti kuri X yahoze yitwa Twitter, nibwo yatangiye kujya ashyiraho amafoto n’amashusho agaragaza ubwiza bwa Bigogwe.

Yavuze ko binyuze mu byo akora, yahaye akazi urubyiruko rwinshi by’umwihariko urutuye mu gice cy’icyaro, ndetse agatuma buri mushumba wese yumva atewe ishema n’akazi ke. Karegeya yongeyeho ko ibyo akora yiteze ko bizakomeza kugira uruhare runini mu guteza imbere urwego rw’ubukerarugendo mu Rwanda no muri Afurika muri rusange.

Karegeya yatangaje ko we yatangaje ko atangira iki gikorwa yashakaga kumenyekanisha aho akomoka nta gahunda yo kubigira ubucuruzi yari afite. Yavuze ko kuri ubu yabihinduye kompanyi ikomeye y’ubukerarugendo, aho buri munsi yakira abantu baje kuhasura no kuryoherwa n’ibyiza by’umuco Nyarwanda.

Muri Mutarama uyu mwaka, ni bwo kandi sosiyete yatangije Bigogwe Tourism Company Ltd yeguriwe ubutaka bwari mutungo bwite wa Leta kugira ngo ikomeze kubukoresha mu buryo bubyara inyungu.

Uyu musore aherutse gutangaza ko yifuza ko mu myaka itari myinshi byibuze Bigogwe izaba ivugwa nk’uko abantu batekereza Nyungwe, Akagera na Pariki y’Ibirunga.  

Mu 2023 nibwo Guverinoma y'u Rwanda yafashe icyemezo cyo guha ubutaka buri mu mutungo bwite wa Leta, ikigo Ibere rya Bigogwe Tourism Company Ltd, kimaze kwamamara mu guteza imbere ubukerarugendo bushingiye ku nka.

Ni icyemezo cyafashwe n'Inama y'Abaminisitiri yateranye kuri uyu wa Mbere tariki 30 Mutarama mu 2023, iyobowe na Perezida Paul Kagame. 

Ngabo Karegeya wamamaye abikesha ‘Ibere rya Bigogwe,’ yabwiye urubyiruko rwitabiriye ihuriro rya Youth Connekt Africa inkuru y’uko yahinduye umushumba w’umusirimu

Karegeya akunda kugaragaza kenshi urukundo rutangaje akunda inka

Abanyamabanga Nshingwabikorwa basezeye mu kazi ni abo mu mirenge ya Kiziguro, Muhura, Kageyo, Gitoki, Nyagihanga na Remera.

Impamvu nyamukuru yakomotse ku kuba bamaze igihe kinini bamwe muri bo batubahiriza inshingano zabo nk'uko bikwiye.

Aba bayobozi batangiye kwandika amabaruwa yo gusezera kuva ku wa 06-08 Ugushyingo 2024.

Benshi bashinjwaga kwakira amafaranga y'imisanzu y'ubwisungane mu kwivuza y'abaturage aho kuyajyana kuri banki bakayishyirira ku mufuka.

Abandi bagiye bakira amafaranga ya Ejo Heza y'abaturage bakayarya mu gihe harimo n'abagiye bashuka abaturage bahawe inka muri gahunda ya Girinka bakazigurisha bakabagurira inyana ntoya andi mafaranga bakayagabana.

Umuyobozi w'Akarere ka Gatsibo, Gasana Richard, yemereye IGIHE ko koko aba ba gitifu umunani na Sedo bamaze kwandika amabaruwa basezera mu kazi.

Icyakora yabise intwari ngo kuko nibura babonye ko gushyira umuturage ku isonga bibananiye bagahitamo gukuramo akabo karenge.

Ati 'Nibyo koko abagitifu umunani na Sedo bamaze kutwandikira basezera. Twari tumaze iminsi tubakurikirana hari na bo Urwego rw'Ubugenzacyaha, RIB iri gukurikirana. Hari n'abatawe muri yombi nka Sedo bose bakurikiranyweho ibyaha birimo kurya amafaranga y'abaturage ya Mituweli, Ejo Heza hakaba n'abashutse abaturage kugurisha inka za Girinka.'

Yasabye n'abandi bayobozi kwirinda kurya ibigenewe umuturage, ahubwo bagakoresha ubushobozi Leta iba yabahaye mu kwikemurira ibibazo.

Yibukije ko abantu bazajya babirengaho gusezera byonyine bidahagije ahubwo bazajya bakurikirana kugira ngo baryozwe ibyaha baba bakoreye mu kazi.

Akarere ka Gatsibo gafite imirenge 14, utugari 69 n’imidugudu 602

Minisiteri y’Ubutegetsi bw’Igihugu, irasaba buri wese ufite ubumuga kwibaruza. Ni ubutumwa bugira buti “Ufite imbogamizi ku ruhu rwawe?, Ufite imbogamizi mu kubona?, Ufite imbogamizi mu kuvuga, kugenda, kumva, cyangwa mu mitekerereze?.

Ubu Leta y’u Rwanda irimo gukusanya amakuru ku bantu bafite imbogamizi mu buzima – niba utaragerwaho, egera ubuyobozi bw’Akagari bakubwire uko wakwibaruza”.

MINALOC yagize kandi icyo isaba umuntu wese uzi umuryango urimo abafite imbogamizi zo ku ruhu, kubona, kuvuga, kugenda, kumva, cyangwa mu mitekerereze. Iti “Wiceceka, bibutse, bamenyeshe cyangwa se ubwire ubuyobozi bukwegereye”.

Minisiteri y’Ubutegetsi bw’Igihugu ivuga ko agaciro k’iri kusanyamakuru ni uko rigiye gutuma Leta ishyira mu igenamigambi ingamba zikemura ibibazo bibangamiye abafite ubumuga mu Rwanda.

Mugisha Jacques ufite ubumuga bwo kutabona, yahamagariye abantu bose bafite ubumuga kwibaruza. Ati “Nize kaminuza, ubu mfite akazi. Agaciro k’iri kusanyamakuru ni uko rizafasha Leta gushyira mu igenamigambi ingamba zikemura ibibazo abantu bafite ubumuga bahura nabyo mu Rwanda. Baruza uwawe, nanjye naribaruje”.

MINALOC yatangaije iyi gahunda y’ikusanyamakuru ku bafite ubumuga, irasaba abayobozi mu nzego z’ibanze kubishishikariza abaturage no gukurikirana ko abo bireba bari muri buri fasi babaruwe. Ni ikusanyamakuru riri gukorwa na Leta y’u Rwanda ku bantu bafite ubumuga.

Ibarura Rusange ryakozwe mu 2022 ryagaragaje ko abantu bafite ubumuga mu Rwanda bagera kuri 391.775, bakaba bangana na 3,4% bya Miliyoni 13,24 z’abatuye u Rwanda, muri bo abagore bafite ubumuga ni 216.826 na ho abagabo bakaba 174.949

Ihuriro ry'Imiryango y'abantu bafite ubumuga mu Rwanda (NUDOR) rikunze gusaba ko hashyirwaho uburyo bwihariye bwo gutabara abafite ubumuga.

Perezida wa NUDOR, Dr. Mukarwego Beth, avuga ko ubuzima bw'abantu bafite ubumuga bujya mu kaga cyane cyane mu gihe habaye ibiza cyangwa ibindi bintu bishobora gukomeretsa abantu, agasaba ubuyobozi kubitaho.

Ati 'Abafite ubumuga benshi usanga ubuyobozi buba butanazi aho batuye n'uko babayeho, ugasanga igihe habayeho ibibazo mu Midugudu cyangwa mu Karere nta makuru bafite, ntibashobore gukora ibyo abandi Banyarwanda barimo bakora kugira ngo babashe kwikura muri icyo kibazo bashobora kuba bisanzemo.

Abandi nk'abatumva usanga badafite ubafasha mu buryo bw'ubusemuzi, ugasanga ibintu byose ntibabasha kubimenya, keretse babonye ubibabwira. Usanga rero babura amakuru bakabura n'abantu babafasha.

Urugero nk'ufite ubumuga bw'ingingo ashobora kuba ari mu rugo ariko nta gare afite yakoresha kugira ngo abo mu muryango we bamushyire muri rya gare bamusunike bamujyane aho abandi barimo kujya igihe habaye ibiza, igihe haguye imvura nyinshi, inzu zaguye,…'.

Icyakora hari n’imbogamizi yagiye ishyirwa mu majwi kenshi yo kuba hari abafite ubumuga batazwi, aho byagiye bigaragara ko hari imiryango ihisha abana bavukanye ubumuga, bagakura batazi uko ishuri rimera, bikaba byanagorana kubamenya mu gihe cyo kubafasha.

Minisiteri y’Ubutegetsi bw’Igihugu ivuga ko agaciro k’iri kusanyamakuru ku bantu bafite ubumuga, ni uko rigiye gutuma Leta ishyira mu igenamigambi ingamba zikemura ibibazo bibangamiye abafite ubumuga mu Rwanda.

Mu ntangiriro za 2024, Ministeri y'Ubutgetsi bw'Igihugu yatangaje ko hamaze kubakwa uburyo buzifashishwa habarurwa abo bantu. Yavuze ko abafite ubumuga bari gushyirwa mu byiciro, n'ibyo ubumuga butuma atageraho nk'inzitizi bimutera nyuma ubwo buryo bukazahuzwa n'ubundi busanzwe Buhari bwa Imibereho System.

Yavuze ko bizabafasha kumenya abafite ubumuga bose, ibyiciro barimo n’inzitizi bafite. Ati 'Tujye tureba tuvuge duti uyu muntu ufite ubumuga, turebe umutungo afite, ibyo yinjiza, ibibazo afite, n'ibisubizo byashoboka. Ibisubizo bishobora kuva mu nyunganirangingo, mu burezi aho nk'umwana aba akeneye umwihariko mu kwiga bijyanye n'ubumuga afite n'ibindi.'

Minisiteri y'Ubutegetsi bw'Igihugu iherutse gutangariza Inteko Ishinga Amategeko ko gutinda kubarura abafite ubumuga mu Rwanda byatewe n'ingengo y'imari itarabonekeye igihe ariko, ikibazo kikaba kiri gukurikiranwa. Kuri ubu rero kubarura abafite ubumuga birarimbanyije.

Muri Kigali Convention Centre hari kubera Inama y'Ihuriro ry'Urubyiruko muri Afurika, Youth Connekt Africa 2024 yatangirijwemo icyiciro cya mbere cya gahunda yo gutera inkunga imishinga y'ikoranabuhanga mu rwego rw'ubuzima, ibizwi nka Timbuktoo HealthTech Hub.

Ni igikorwa cyatangijwe na Perezida Paul Kagame mu gitondo cyo kuri uyu wa Gatandatu. Perezida Kagame yabwiye urubyiruko ko rushyigikiwe bityo rugomba gukora iyo bwabaga kugira ngo rutange impinduka zikenewe muri Afurika kugira ngo igere aho yifuza kugana.

Umukuru w’Igihugu yagize ati: 'Nafashe umwanya ngo nze mbabwire ko turi kumwe, dushaka gukorana namwe. Turabashimira kandi hari byinshi muri twe, dushobora gufungura tukagenda, tukagera aho dushaka kugera.'

Perezida Kagame yagaragarije urubyiruko ko ibyo Umugabane wa Afurika wahoze wifuza kugeraho ari ko bikimeze muri iki gihe ndetse ko ari aharwo kugira ngo inzozi za Afurika zibe impamo.

Ati: 'Ibyo bizagerwaho, kandi ni muri iki cyumba, mu kindi cyumba aho abanyempano bato ba Afurika bahagarariwe neza. Reka tubigire impamo nk'uko twagize Timbuktoo impamo kandi n'ibindi byinshi bizakurikiraho.'

Perezida Kagame yashimye abafatanyabikorwa barimo UNDP batekereje Gahunda ya Timbuktoo by'umwihariko kuri ubu hakaba hatangijwe icyiciro cya mbere cya Timbuktoo HealthTech Hub.

Yavuze ko abakiri bato baba bafite ibitekerezo byiza n'imishinga yavamo ibintu bikomeye ariko bakenera ubujyanama kugira ngo ibyo bitekerezo bihabwe umurongo cyangwa binozwe.

Ati: 'Uzi ko iyo ukiri muto, uba wumva wakora icyo ari cyo cyose, ushobora kurira umusozi bakubwira gusimbuka, utekereza ko wabikora. Twabinyuzemo ariko uko ukura, utangira kwiyumvisha ibi bintu, ugatangira kwitondera ibyo ukora n'aho ujya.'

Yakomeje avuga ko urubyiruko rwa Afurika rugize umubare munini w'abatuye umugabane ko igihe kigeze ngo uburyo bwo gukora ibintu buhinduke ndetse rushyirwe imbere mu bikorwa by'iterambere ry’Umugabane.

Ati: 'Kandi turashoboye niba atari na cyane kurenza ibikenewe kurusha undi muntu uwo ari we wese ahandi hantu. Rero kuki tutakoresha ibi, ubu bushobozi? Ntabwo bikwiye kuguma mu mvugo gusa kuko ubwo twinjiraga muri iki Kinyejana, baravugaga ngo ni ikinyejana cya Afurika! Ariko ni ikihe kitari icyacu? Kuri iyi nshuro, ntabwo bigiye kuducaho gutyo gusa.'

Perezida Kagame yibukije urubyiruko ko rushyigikiwe bityo rukwiye kuba umusemburo w’impinduka zikenewe muri Afurika

Uyu mukobwa wari uherutse gusoza amasomo y'icyiciro cya Gatatu cya Kaminuza 'Master's' muri Kaminuza ya African Leadership Universtiy [ALU], yasezweho bwa nyuma mu muhango wabaye kuri uyu wa Gatandatu tariki 9 Ugushyingo 2024, wabereye ku rusengero rwa Light Church.

Cherissa wari usanzwe ari umukozi wa Banki ya Kigali, yitabye Imana ku wa 3 Ugushyingo 2024, yari afite imyaka 23, kuko yavutse ku wa 26 Ukwakira 2001.

Umubyeyi (Nyina) wa Cherissa, yavuze ko yagowe no kwakira urupfu rw’umukobwa we ‘uko bwari ubwa mbere mpfushije umwana’ ku buryo yagowe n’uburyo yagombaga kwifatamo. 

Ati “Ni ibintu utamenyera, ngo uvuge ngo ubutaha nzabikora gutya. Ni ubwa mbere nari mpfushije. Cherissa yarapfuye biba bishya. Nkababwira nti ese mukoreho? Bati Oya! Ibintu byose bati Oya!

Yavuze ko urupfu rw’umukobwa we rwamuhaye ishusho y’uko buri wese akwiye kubaho yiteguye. Mu muhango wo kuzirikana ubuzima bw’umukobwa we, uyu mubyeyi yashimye buri wese wamutabaye mu bihe nk’ibi biruhije umutima kuva mu ijoro rya tariki 3 Ukwakira 2024 yabura umukobwa we.

Avuga ati “Urupfu ruteye ubwoba. Nahoze nganirira ababyeyi mbabwira nti mujye musenga mutwikirize abantu banyu amaraso y’Imana…Nabasengera ngo rubace hirya mwese.”

“Mwese ndabashimira. Abaririmbyi mwatumaze irungu. Urupfu ntirutwihererane. Turi bande bo kubona abantu nkamwe, aboroheje n’abakomeye!.”

Yavuze ko umukobwa we yitabye Imana hagati saa cyenda na saa kumi zo ku Cyumweru tariki 3 Ugushyingo 2024, ariko inkuru y’incamugongo yayimenye ahagana saa mbili z’ijoro ryo ku Cyumweru tariki 3 Ugushyingo 2024. Ati “Kuva bibaye kugeza uyu munsi ndabona abantu badutabaye, mwumve ngo ndabashimiye.”

Perezida wa Healing Worship Ministry yahoze yitwa Healing Worship Team, Muhoza Budete Kibonke aherutse kubwira InyaRwanda ko imyaka itanu yari ishize Cherissa ari umuririmbyi wa Healing Worship Ministry, kandi bakoranye ibintu byinshi, kandi ko igihe kinini yagihariye amasomo ye no kuririmba muri korali nk'umuririmbyi washakaga kwiyegereza Kristo.

Ati “Yari umuririmbyi mwiza ushaka kumenya Imana, ariko akazitirwa n’amashuri cyane. Ndumva mu minsi ishize ari nabwo yasoje amashuri. Ariko mu by’ukuri tubabajwe n’urupfu rwe rutunguranye.”

Kibonke yavuze ko Cherissa yinjiye muri Healing Worship Ministry ‘kubera ko umuryango we wasengeraga muri Power of Prayer, twabanaga mu itorero’.

Ati “Yaje nk’umwana w’umubyeyi mu itorero, kimwe n’abandi babyeyi bose twasenganaga, bifuza ko abana babo baza mu murimo. Nawe ni ubwo buryo yajemo.” 

Uwanjye Tona Cherrissa witabye Imana ku wa 3 Ugushyingo 2024, yasezeweho bwa nyuma kuri uyu wa Gatandatu tariki 9 Ugushyingo 2024

Ubwo umurambo wa Uwanjye Tona Cherrissa wari ugejejwe kuri ‘Light Church’ i Rusororo

Inshuti, abavandimwe, abo mu miryango n’abandi batabaye umuryango Uwanjye Cherrissa Tona 

Miss Muyango Claudine [Uri iburyo] yatabaye Umunyana Shanitah uri mu gahinda ko kubura umuvandimwe 

Kanda hano ubashe kureba amafoto menshi yaranze umuhango wo gusezera kuri Uwanjye Cherrisa Tona Uwanjye 

AMAFOTO: Murenzi Dieudonne- InyaRwanda

Ni igikorwa cyatangijwe na Perezida Paul Kagame mu gitondo cyo kuri uyu wa Gatandatu tariki 9 Ugushyingo 2024 mu Inama y'Ihuriro ry'Urubyiruko muri Afurika, Youth Connekt Africa 2024. 

Timbuktoo ni umushinga w'Ishami ry'Umuryango w'Abibumbye rishinzwe Iterambere, UNDP, ugamije guteza imbere ibikorwa by'ishoramari muri Afurika aho kugeza ubu ufite icyicaro i Kigali mu Rwanda.

Binyuze muri iyi gahunda abafite imishinga n'ibigo biri gutangira mu rwego rw'ikoranabuhanga mu buzima bagera kuri 957 batanze imishinga yabo hatoranywamo 40, ari na bo bagiye gutangirana n'icyiciro cya mbere cyayo.

Timbuktoo Health Tech Hub ni gahunda ifite ahantu hazajya hatyarizwa abafite imishinga n'ibigo bigitangira ariko bikoresha ikoranabuhanga mu rwego rw'ubuzima, aho bazajya bamara amezi atandatu, i Kigali, bafashwa kunoza imishinga, kwigishwa uko bayiteza imbere ndetse bakanaterwa inkunga ibafasha kuyishyira mu bikorwa.

Ni imwe muri gahunda 10 ziri muri gahunda ya Timbuktoo, ikaba yitezweho kuzatuma ibigo bigitangira mu rwego rw'ubuzima bibasha kugira ikoranabuhanga rizakemura ibibazo bikiri muri uru rwego ku Mugabane wa Afurika.

Imishinga izajya iterwa inkunga binyuze muri Timbuktoo HealthTech Hub yitezweho guhanga ibishya bizahindura urwego rw'ubuzima, kugeza serivisi z'ubuvuzi muri Afurika no kongera amahirwe y'ibigo cyangwa imishinga igitangira mu guhanga ibishya mu rwego rw'ubuzima.

Muri Mutarama 2024, u Rwanda rwatangaje ko ruzatanga miliyoni 3 z’Amadorali ya Amerika muri iki Kigega cy'Umushinga wa Timbuktoo cyashyiriweho gutera inkunga ishoramari ku Mugabane wa Afurika (Africa Innovation Fund).

Icyo gihe Perezida Kagame yari yitabiriye Inama Mpuzamahanga yiga ku bukungu bw’Isi, aho yatanze ikiganiro cyatangirijwemo iyi gahunda ya ‘Timbuktoo’. Ni ikiganiro yahuriyemo n'abarimo Perezida wa Ghana, Nana Akufo-Addo n’Umuyobozi wa UNDP, Achim Steiner.

Umuyobozi w'Ishami ry'Umuryango w'Abibumbye ryita ku Iterambere (UNDP) ku rwego rwa Afurika, Ahunna Eziakonwa, yavuze ko gahunda ya Timbuktoo itakiri mu magambo gusa ahubwo yatangiye gushyirwa mu bikorwa. 

Ati: 'Kandi ndabizi ko iki gihugu ari ibikorwa. Twagombaga gukora ibishoboka ngo u Rwanda nirusinya kuri gahunda ya Timbuktoo, ubwo bizaba bivuze ibikorwa. Kandi ndashimira 40 [abahanze imishinga] muri hano.'

Ahunna Eziakonwa yavuze ko imishinga 40 yatoranyijwe muri gahunda ya Timbuktoo HealthTech Hub ifite inkuru zitangaje kandi yose itanga icyizere cyo gukemura ibibazo byugarije Umugabane wa Afurika by'umwihariko mu rwego rw'ubuzima.

Yagize ati: 'Ibyo turi kuvuga hano birenze guhanga imirimo, ndashaka ko buri wese yumva, akenshi iyo tuvuze kwihangira imirimo cyangwa kuba rwiyemezamirimo, tuba tuvuga iterambere. Kandi tugiye gushyira iherezo ku bukene dufatanyije n'iri tsinda ry'abantu.'

Umuhuzabikorwa w’Amashami ya Loni mu Rwanda, Dr Ozonnia Ojielo, yavuze ko gahunda ya Timbuktoo HealthTech Hub yitezweho gukemura ibibazo byugarije Umugabane wa Afurika mu rwego rw'ubuzima kandi ari iby'agaciro kuba itangirijwe mu Rwanda kuko hari ingero z'ibindi byagiye bihakorerwa bigashoboka.

Ati: 'Nk'uko Youth Connekt yakuze ikava kuri gahunda y'u Rwanda ikaba igeze kuri rwego rwa Afurika, ni ko twizeye ko n’iyi gahunda izaguka. Kuba imishinga isaga 900 yaraje guhiganwa muri Timbuktoo HealthTech Hub, byerekana ubushake urubyiruko rwa Afurika rufite mu gukemura ibibazo byugarije uyu mugabane mu rwego rw'ubuzima.'

Umunyamabanga Nshingwabikorwa wa Timbuktoo Africa Innovation Foundation, Natalie Jabangwe, yavuze ko Timbuktoo HealthTech Hub yitezweho kuba igisubizo ku mishinga y'urubyiruko ihomba igitangira kubera kubura ubushobozi n'ubumenyi bwo kuyiteza imbere no kuyibyaza umusaruro.

Ati: 'N'ubwo dufite urubyiruko rufite impano kandi rufite ibitekerezo byo guhanga ibishya, tuzi ko hari 80% by'imishinga ihomba igitangira muri Afurika. Binyuze muri Timbuktoo HealthTech Hub tuzajya dufata imishinga n'ibitekerezo by'urubyiruko, byagurwe kugira ngo bikemure ibibazo byugarije urwego rw'ubuzima muri Afurika.'

Natalie Jabangwe yabwiye ba rwiyemezamirimo b'urubyiruko n'abafite ibitekerezo byabyara imishinga muri Afurika ko kugira ngo bagere ku ntego bizabasaba kubikorera, kudacika intege no guhozaho.

Ati: 'Kugira ngo ugere ku ntsinzi bizagufata amasaha menshi yo gukora ibintu. Icyo nabizeza ni uko Timbuktoo HealthTech Hub ari mwe yashyiriweho. Icyerekezo cya Timbuktoo ni kinini, ifite gahunda yo gushora miliyari y'Amadorali ya Amerika mu gutanga igishoro ku bacuruzi, ba rwiyemezamirimo n'abandi bazahindura ubuzima bw'abaturage barenga miliyoni 100, bikanahanga imirimo irenga miliyoni 10. Mbijeje ko ibi atari impanuka ahubwo byatekerejwe ku bw'impamvu.'

Umunyamabanga Uhoraho muri Minisiteri y'Ikoranabuhanga na Inovasiyo, Yves Iradukunda, yabwiye urubyiruko rwa Afurika guhorana inyota yo guhanga ibishya no kuguma ku ntego zarwo. Hari mu kiganiro yahuriyemo n'Umuyobozi w'Ishami ry'Umuryango w'Abibumbye ryita ku Buzima mu Rwanda, Dr Brian Chirombo, ahagarukwaga ku bibazo gahunda ya Timbuktoo HealthTech Hub izakemura muri Afurika.

Yagize ati: 'Ntuzacike intege kandi ntukemere ibintu binyuranye n'inzozi zawe. Twe muri Minisiteri y'Ikoranabuhanga na Inovasiyo dukunda abahanga ibishya, ni yo mpamvu uyu mushinga wa Timbuktoo HealthTech Hub dushishikariza urubyiruko kuwakirana yombi no kuzana imishinga yarwo ngo ihabwe inkunga.'

Gahunda ya Timbuktoo yitezweho gufasha Umugabane wa Afurika kwigobotora ibibazo bikomeje kwibasira urwego rw'ubuzima birimo ibyatangiranye n'Icyorezo cya Covid-19.

Perezida Kagame yatangije gahunda igamije gutera inkunga imishinga y’ikoranabuhanga mu rwego rw’ubuzima

Ni gahunda yitezweho gufasha Afurika kwigobotora bimwe mu bibazo byugarije urwego rw’ubuzima kuri uyu Mugabane 

Ikibazo cy'ubuke bw'amacumbi mu mashami yose ya Kaminuza y'u Rwanda gikunze kugaragazwa n'abanyeshuri, ndetse abenshi muri bo bikodeshereza hanze y'ishuri.

Nubwo icyo kiba kimwe mu bisubizo, usanga kidatanga umuti urambye ku banyeshuri kuko hari abavuga ko bagorwa no kwigondera ibiciro by'amazu yo mu bice bitandukanye bigamo ahari amashami ya Kaminuza y'u Rwanda.

Muri Koleji y'Ubumenyi n'Ikoranabuhanga iherereye mu Karere ka Nyarugenge, ahahoze hazwi nka KIST, haherutse kuzura amacumbi yagenewe abakobwa, afite ubushobozi bwo kwakira abagera kuri 900.

Umwe mu bayabamo, Mutoniwase Laetitia, yavuze ko bashimishijwe no kubona aya macumbi mu gihe Mukafuraha Betty ushinzwe imibereho y'abakobwa bayabamo, yabwiye Televiziyo Rwanda ko yahinduye byinshi kuko yujuje ibisabwa bifasha abanyeshuri kwiga neza.

Ati 'Iyo babaga bicumbikira, bari mu za 'Ghetto', bashobora guhura n'imbogamizi zituma badatsinda neza kuko bashoboraga kubura amafaranga yo kwishyura.'

Nyandwi Alex na we wiga muri Kaminuza y'u Rwanda, yashimangiye ko ubuzima buba bugoye ku banyeshuri biga bicumbira bitewe n'ibiciro by'amazu bakodesha.

Ati 'Inzu zirahenze hano hanze, iya make usanga ari nk'ibihumbi 40 Frw, kandi wagereranya na buruse umuntu abona, ukabona ko ayo mafaranga ntabwo ahagije ku buryo yagutunga, ukiga neza.'

Umuyobozi Wungirije wa Kaminuza y'u Rwanda, Prof. Kayihura Muganga Didas, yavuze ko gukemura iki kibazo cy'amacumbi bisaba abafatanyabikorwa batandukanye, ariko nka Kaminuza ubwayo ifite gahunda yo gukuba gatatu umubare w'abanyeshuri icumbikira mu myaka itanu iri imbere.

Ati 'Nka Kaminuza muri rusange, twifuza ko mu myaka itanu iri imbere tuba tuvuye kuri iyo 20% tugeze kuri 60%. Ibyo ni ibyifuzo ariko nitugira amahirwe bigahuza n'ubushobozi, icyo tuzakigeraho ariko kugeza ubu ni uko tumeze muri mashami atandukanye.'

Umunyeshuri wiga acumbikirwa muri Kaminuza, yishyura ibihumbi 50 Frw ku mwaka mu gihe uwiga yicumbikira yishyura hagati y'ibihumbi 15 Frw n'ibihumbi 25 Frw buri kwezi ku biga mu Ntara.

Ku banyeshuri biga mu Mujyi wa Kigali, bishyura hagati y'ibihumbi 30 Frw n'ibihumbi 40 Frw ku kwezi.

Ikibazo cy’ubuke bw’amacumbi kimaze igihe mu mashami atandukanye ya Kaminuza y’u Rwanda

Umuyobozi Wungirije wa Kaminuza y’u Rwanda, Prof. Kayihura Muganga Didas, yavuze ko bifuza ko mu myaka itanu iri imbere baba bageze ku rwego rwo gucumbikira abanyeshuri 60%