Author: webrwanda

Mu Isi y'iterambere ryihuse, imyumvire y'uko gutsinda neza mu mashuri ari byo shingiro ry'iterambere ry'ubukungu si ihame ku bantu bose. 

Abahanga mu mashuri benshi bashobora kurangiza nabi mu bijyanye n'ubukungu, mu gihe abandi batagaragaje ubuhanga bugaragara mu ishuri bashobora kuba abakire. 

Iyi nkuru isesengura impamvu zihishe inyuma y'iyi myitwarire. 

Uburyo bwo Kureba Isi: Abanyeshuri b'abahanga bakunze kwigishwa gukurikiza amategeko no gukora ibintu mu buryo busanzwe, bakibanda ku gucunga neza ibyemezo byabo. Iki gikorwa kenshi ntikibategurira guhangana n'ibibazo by'ubuzima cyangwa gufata ibyago bikomeye bikunze kuba ishingiro ry'ubukire. 

Mu gihe abaswa mu ishuri kenshi baba baramenyereye guhangana n'ibibazo byinshi bidasanzwe, bagira ubushobozi bwo gukoresha ubundi buryo budasanzwe mu kwikura mu bibazo. 

Ubushakashatsi bwerekana ko abantu bafite ubushake bwo gufata ibyago bagira amahirwe yo kuba abakire kurenza 40% ugereranyije n’abareberaho cyane amabwiriza y'ishuri.

Guhanga Udushya n'Ubushobozi bwo Gukoresha Ibyo Bafite:

Ubukire ntibushingira ku mashuri gusa, ahubwo bushingira ku guhanga udushya no guhuza ubushobozi umuntu afite n'amahirwe ahari. Mu gihe abanyeshuri b'abahanga bakunze kwibanda ku gukora neza ibyo bigishijwe, abandi bashobora guhuza ubumenyi bucye bafite n'ubuzima busanzwe bagashaka ibisubizo byihariye ku bibazo biriho.

Mu Bushakashatsi bwakozwe muri Amerika, 60% by'abashoramari bakomeye bavuze ko batashoboye kwiga no gukomeza mu mashuri ariko bagize ubushake bwo gushora amafaranga mu bucuruzi. 4% gusa by'abatsinze neza cyane mu mashuri bageze ku rwego rwo hejuru rw'ubukungu mu buzima bwabo.

Ikibazo cy'Ubwenge Bw'Abahanga (The Intelligence Trap): Abahanga cyane mu ishuri rimwe na rimwe bagira icyizere gikabije gishingiye ku bwenge bwabo, bakirinda gukoresha ubundi buryo budasanzwe. 

Ibi byiswe “The Intelligence Trap,” bikaba bivuga kwibeshya ko ubumenyi bw'ishuri buhagije ngo bagere ku bukire. Aha ni ho benshi bagira imbogamizi, mu gihe abandi baswa mu ishuri bigira imyumvire ibafasha kwinjira mu mishinga ishobora kubyara inyungu n'ubwo byaba bikomeye.

 

Ubushobozi bwo Gukorana n'Abandi: Ikintu gikomeye kandi gikunze kwirengagizwa ni ubushobozi bwo gukorana neza n'abandi. Mu gihe abantu benshi batsinze neza mu ishuri bagira imbogamizi zo gushyira mu bikorwa ubumenyi bifashishije amakipe cyangwa se gukorera hamwe, abandi babasha gukora imishinga bahereye ku mibanire yabo n'abandi bantu bafite ingufu. Ibi bikunze kugaragara ku bashoramari n'abahanzi batandukanye.

Ku isi yose, gusa 10% by'abahanga cyane mu ishuri bagira uruhare rukomeye mu guhanga udushya dushyigikira ubukungu bwabo bwite. Abagera kuri 70% by'abacuruzi bakomeye bavuze ko bahuye n'ibibazo bikomeye mu mashuri ariko bakabibyaza umusaruro bigaragaza ubushake bwo gukora ibitandukanye.

Ibi byose byerekana ko gutsinda neza mu mashuri atari ishingiro ryonyine ry'iterambere ry'ubuzima. Gufata ibyago, guhanga udushya, no gukorana neza n'abandi ni inkingi z'ingenzi zishobora gutandukanya abashobora kugera ku bukire n'abandi. Ibi ni isomo ku buryo abantu bareba ubumenyi bw’ishuri bugomba guhuza n’ubuzima busanzwe.

  

Src: Forbes, BBC & Insidehighered

Umwanditsi: TUYIHIMITIMA Irene

Bwari ubwa mbere ibi bihembo bitangiwe mu Rwanda. Kandi byari bihataniwe mu byiciro 22, birimo abahanzi baturuka mu bihugu birenga 30. 

U Rwanda nk’Igihugu cyari cyahawe kwakira ibi bihembo, Abahanzi Nyarwanda bahawe umwihariko ndetse bashyirwa mu cyiciro cyabo bonyine. 

Icyo gihe Ariel Wayz, Bruce Melodie, Bwiza, Chriss Eazy ndetse na Kenny Sol bahataniye igikombe mu cyiciro cy’umuhanzi mwiza mu Rwanda (Best Artist-Rwanda).

Umuhango wo gutanga ibi bihembo wabereye muri BK Arena, ku wa 21 Ukwakira 2023, ndetse byarangiye Bruce Melodie ari we wegukanye iki gikombe.

Abategura Trace Awards, bagaragaje ko gushyira icyiciro cy’abahanzi Nyarwanda muri ibi bihembo ari kimwe mu byo bemeranyijeho n’Ikigo cy’Igihugu Gishinzwe Iterambere (RDB), mu rwego rwo guteza imbere abahanzi bo mu Rwanda.

Ni ubwa mbere u Rwanda rwari rushyizwe mu bahatanye. Ibi birori byagombaga kubera mu Rwanda muri uyu mwaka wa 2024, ariko ibiganiro byabaye, byasize bigomba kubera muri Zanzibar, tariki 24-25 Gashyantare 2025.

Icyiciro cy’abahanzi Nyarwanda kizakomeza kuba muri ibi bihembo?

InyaRwanda yabonye amakuru yizewe yemeza ko hari abahanzi bakora umuziki gakondo mu Rwanda, ndetse n’abandi bakora imiziki igezweho bamaze gutumirwa kuzajya kuririmba mu itangwa ry’ibihembo bya Trace Awards muri Zanzibar. 

Abahaye amakuru InyaRwanda bavuze ko batumiwe kuririmba ariko ‘ntitwamenyeshejwe niba icyiciro cy’abahanzi nyarwanda kizakomeza kuba muri ibi bihembo.

Urubuga rwa Internet rwa Trace Awards, rugaragaza ko abategura ibi bihembo bagombaga gutangaza abahanzi bahatanye ibihembo tariki 4 Ukuboza 2024, ariko siko byagenze.

Ariko kandi kuri uru rubuga, bavuga ko amatora yo kuri Internet azatangira tariki 18 Ukuboza 2024.

Berekana kandi ko ibyiciro bihataniwemo ibihembo birimo: Best Male, Best Female, Song of the Year, Best Music Video, Best Newcomer, Best Collaboration, Best DJ, Best Producer, Best Gospel Artist ndetse na Best Live

2023 wari umwaka udasanzwe kuri Trace Awards and Festival, kuko byahuriranye no kwizihiza isabukuru y’imyaka 20 yari ishize ibi bihembo bitangiye gutangwa.

Imbere y’ibihumbi by’abakunda umuziki bagera ku 7 5000, abahanzi b’aba nyafurika barenga 50 bataramiye ku rubyiniro rwa BK Arena, mu birori byarebwe n’abantu basaga Miliyoni 300 mu Isi.

Hari umwe mu bayobozi mu nzego Nkuru z'Igihugu, uherutse kuvuga ko ubuyobozi bwa Trace Awards bwasabye Guverinoma y'u Rwanda kongera kubafasha gutegura ibi bihembo nk'uko babafashije mu 2023, ntibyabyumvikanaho.

Uyu muyobozi wo ku rwego rwa Minisitiri, yavuze ko ku nshuro ya mbere hari ibyo bafashije abategura Trace Awards 'mu rwego rwo korohereza abashoramari' ariko ko 'batakomeza kubafasha kugeza no ku mafaranga yo gutegura ibi bihembo'.

Urutonde rw'abegukanye ibihembo bya Trace Awards mu 2023:

1.Album y'umwaka: Love Damini- Burna Boy (Nigeria)

2.Indirimbo y'umwaka: Calm down – Rema (Nigeria)

3.Video nziza: Baddie -Yemi Alade (Nigeria)

4.Best Male: Davido (Nigeria)

5.Best Female: Viviane Chidid (Senegal)

6.Indirimbo yahuriweho: Unavailable – Davido (Nigeria) ft Musa Keys (Afrika y'Epfo)

7.Umuhanzi mushya: Roseline Layo (Côte d'Ivoire)

8.DJ: Michael Brun (Haiti)

9.Producer mwiza : Tam Sir (Côte d'Ivoire)

10.Umuhanzi w'indirimbo z'imana : KS Bloom (Côte d'Ivoire)

11.Best live: Fally Ipupa (DRC)

12.Umubyinnyi: Robot Boli (Afrika y'Epfo)

13.Umuhanzi wa Afurika ivuga Icyongereza (Best artist Africa anglophone): Asake (Nigeria)

14.Umuhanzi wa Afurika ivuga Igifaransa (Best artist Africa francophone): Didi B (Côte d'Ivoire)

15.Umuhanzi wa Afurika ivuga Igiportugal (Best artist Africa lusophone): Gerilson Insrael (Angola)

16.Umuhanzi wo mu Rwanda: Bruce Melody

17.Umuhanzi wa Afrika y'Iburasirazuba: Diamond Platnumz (Tanzania)

18.Umuhanzi wa France n'u Bubiligi: TayC (France)

19.Umuhanzi wo mu Bwongereza: Central Cee

20.Umuhanzi wo mu birwa bya Carraibe: Rutshelle Guillaume (Haiti)

21.Umuhanzi wo mu birwa by'inyanja y'u Buhinde: Goulam (Comoros)

22.Umuhanzi wo muri Bresil: Ludmilla

23.Umuhanzi wa Afurika y'amajyaruguru: Dystinct (Morocco)

Bruce Melodie niwe wegukanye igikombe cya 'Best Artist- Rwanda' muri Trace Awards yaereye mu Rwanda mu 2023  

Ibihembo bya Trace Awards bizabera muri Zanzibar, ku wa 24-26 Gashyantare 2025 

REBA HANO IBYARANZE IBIRORI BYA TRACE AWARDS MU 2023

“>

Kwishakamo ibisubizo birema impinduka nziza biri mu byibandwaho n'iri ruhiro, aho abagore batekereza imigambi yabafasha mu iterambere ry'aho batuye biri mu byibandwaho kandi bigashimirwa mu ruhame, hagamijwe kurwanya ibibazo bitandukanye bikigaragara mu Karere ka Gisagara.

Mbakundente Valentine uyobora Inama y'Igihugu y'Abagore(CNF) mu Murenge wa Mukindo, yavuze ko abagore bari mu buyobozi muri uyu murenge, batekereje uko bakwishakamo ibisubizo binateza imbere aho batuye, maze bakora umushinga wo kugura imodoka izajya ibatwara imizigo y'imyaka isanzwe iboneka muri iki gice.

Ati 'Ni umuhigo twihaye abagore b'abayobozi kuva ku mudugudu kugera ku rwego rw'Umurenge, aho turi gukusanya amafaranga, tukazagura imodoka itwara imizigo. Tuzafata ubwizigame bwacu, tubwongereho inguzanyo, tuyigure. Twabonye ko twishyize hamwe nta kitashoboka.''

Mbakundente, avuga ko ubusanzwe bafite itsinda nk'abagore, rikora ubuhinzi, bakeza imyaka irimo ibishyimbo n'ibigori, bakeneraga kugurisha bakagorwa no kuyigeza ku isoko ndetse n'ubaguriye akaba yabahenda.

Akomeza avuga ko izajya itwara ibyabo ariko ikarenzaho n'iby'abandi baturanyi bo muri ako gace.

Ati 'Ibyo tweza twe ubwacu tuguriraho n'ibindi, tukabisubiza byuriye. Iyo twakeneraga kubigurisha twakodeshaga imodoka ibigeza aho twabonye isoko bikaduhenda, ariko nitubona iyacu izajya idutwaza inatwaze abo ku ruhande nabo bayishaka bayishyure, ndetse inafasha abacuruza mu maduka yo mu gace k'iwacu bajyaga barangura bakabura imodoka zibatwaza.''

Yongeraho ko ibi byose babikora bagamije kwiteza imbere no kurema ubwuzuzanye buhamye mu muryango, aho n'umugore agomba kugira icyo yinjiza mu rugo, ntahore asaba umugabo we.

Kampororo Jeanne d'Arc uyobora CNF Mu Ntara y'Amajyepfo, avuga ko uruhare rw'umugore mu iterambere rugomba kumvikana hose haba mu burezi, mu mibereho, mu bukungu n'ahandi, kuko nawe ashoboye kandi iterambere rye rigera ku muryango wose ukabaho neza.

Umuyobozi w'Akarere ka Gisagara, Rutabiringoga Jerome, yavuze ko umugore ari byose kuko abyarira u Rwanda ingabo, abakozi n'abandi bose b'ingirakamaro, bityo ko no mu bindi bikorwa byose yagaragaramo kuko ashoboye.

Ati 'Umugore icyo ashaka n'Imana iba igishaka. Ibi bijyanye n'inshingano bafite no mu rugo nka Mutima w'Urugo, ariko ubu bimaze kurenga umuryango, binajya ku gihugu n'akarere by'umwihariko, aho bakora ibikorwa byinshi aho batuye mu midugudu, bari mu matsinda y'iterambere, ntaho bahejwe mu bikorwa byose.'

Ibikorwa by'Abagore mu Karere ka Gisagara bisanzwe biza imbere, mu Ntara y'Amajyepfo, dore ko baherutse gushimirwa nka Ba Mutima w'Urugo bahize abandi muri iyi Ntara bakanabiherwa igikombe.

Iri tsinda ryo kwizigama rya Mukindo rigizwe n'abagore 64, babarizwa mu nzego z'ubuyobozi muri Mukindo, ariko bakaba barahaye ikaze n'undi wese ushaka kubashyigikira muri iyi ntego yabo.

Biteganijwe ko bazakusanya imisanzu iherekejwe n'inguzanyo, kugira ngo bagere kuri kiguzi cyayo kiri hafi ya miliyoni 20Frw, ubu mu gihe gito gishize batangiye uyu mushinga, hamaze gukusanywa hafi miliyoni 2 Frw z'imisanzu.

Ihuriro ry’abagore b’abayobozi muri Gisagara basanzwe bagira ibikorwa biteza imbere akarere, bizwi nk’ibya ‘Mutima w’Urugo’

Mbakundente Valentine(ufashe igihembo) yavuze ko bahisemo kwishakamo ibisubizo bizateza imbere aho batuye

Gisagara niyo yabaye iya mbere mu mwaka wa 2023-2024 mu mihigo ya Mutima w’Urugo mu Ntara y’Amajyepfo

Ni ibyaha yakoze abinyujije mu gitabo yasohoye tariki ya 30 Ukwakira 2019, gifite umutwe ugira uti 'Rwanda, la vérité sur l'Opération Turquoise: Quand les archives parlent'.

Mu kiganiro yagiranye na RBA, umunyamategeko Richard Gisagara wanaburanye urwo rubanza yagaragaje ko icyo cyemezo gishimishije, bijyanye n'uko bari bamaze imyaka 12 basaba ko no mu Bufaransa hahanwa icyaha cyo guhakana no gupfobya Jenoside yakorewe Abatutsi mu 1994.

Ati 'Ni inzira ndende twanyuzemo kuva mu 2013 kugeza mu 2015 ubwo urukiko rushinzwe kurengera itegeko nshinga rwategekaga u Bufaransa gushyiraho itegeko, kugeza mu 2017 ubwo ryashyirwagaho. Icyakora kuva ubwo kugeza uyu munsi nta muntu wari wagahamijwe icyaha. Ubu rero icyaha cyafashe aba mbere barimo Charles Onana na Damien Serieyx wakosoye iki gitabo cye.'

Me Gisagara yavuze ko icyo cyemezo cy'urwo rukiko rwo mu Bufaransa gikwiriye kubera urugero n'abandi bagize iki gihugu kiyobowe na Emmanuel Macron indiri y'abapfobya bakanahakana Jenoside yakorewe Abatutsi.

Mu iburana rya Charles Onana, uyu munya-Cameroun w'Umufaransa yari yaherekejwe n'abantu cyane cyane bafite aho bahuriye no gupfobya no guhakana Jenoside yakorewe Abatutsi, Me Gisagara akavuga ko no kuri iyi nshuro ari ko byari binameze mu gusoma urubanza.

Ati 'Bari benshi cyane. Bari buzuye no hanze. Bari batangiye kongera kugerageza gukora imyigaragambyo, ariko abapolisi baba hafi hirindwa ko bateza akavuyo. Mu cyumba na bwo bari benshi cyane. Icyemezo kimaze gutangazwa ntabwo babyishimiye, bagiye hanze batuka u Bufaransa n'u Rwanda ariko abapolisi baba hafi.'

Me Gisagara yagaragaje ku mategeko ahana abarengera cyangwa bakoresha nabi uburenganzira bwo gutanga ibitekerezo, iyo uhamijwe ibyaha ari ubwa mbere bimubayeho, igihano kiba kidakakaye, igikomeye bikaba icyasha ku wagikoze kuko hari byinshi abura.

Ati 'Nta muntu wongera kuguha ijambo, ntuca kuri za televiziyo zizwi zikomeye, ntiwongera gutanga ibiganiro mbwiraruhamwe.'

Charles Onana yahanishijwe gutanga ihazabu ya 8400 by'Amayero, akaba afite iminsi 120 yo kuba yayatanze, yayirenza agafungwa iminsi 120 bikaba uko no kuri mugenzi we, Damien Serieyx wahanishijwe ihazabu ya 5000 by'Amayero.

Me Gisagara ati 'Icya ngombwa ni uko Charles Onana yahamijwe icyaha cyo gupfobya no guhakana Jenoside yakorewe Abatutsi, na we bikazamugiraho ingaruka mu byo yakoraga na cyane ko nta kandi kazi yari afite uretse gutangaza ibisebya u Rwanda cyangwa bihakana Jenoside yakorewe Abatutsi.'

Onana na Serieyx kandi bategetswe guha indishyi y'ibihumbi 11 by'Amayero imiryango itandukanye yatanze ikirego, arimo 1000 bazaha IBUKA France, 2000 azahabwa LICRA, 2000 azahabwa CRF, 2000 bazaha CPCR, 2000 bazaha Survie, 1000 bazaha FIDH na 1000 bazaha LDH.

Icyakora Charles Onana yagaragaje ko azajurira nubwo atahise abikora ku mugaragaro, Me Gisagara akavuga ko icyari ingenzi kwari ukumuhamya ibyo yakoze, icyemezo kizabaha uburyo bwo gukumira ko uyu mugabo yakomeza gukora mu nkovu u Rwanda.

Muri rusange ibiciro mu mijyi byiyongereyeho 5% ugereranyije n'Ugushyingo 2023, ni mu gihe ibiciro mu byaro byiyongereyeho 2.4% ugereranyije n'Ugushyingo 2023.

NISR yatangaje ko mu kwezi k'Ugushyingo 2024, mu mijyi ibiciro byiyongereye bitewe ahanini n'ibiciro by'ibiribwa n'ibinyobwa bidasembuye byiyongereyeho 2.1%, ibiciro by'amazu, amazi, amashanyarazi, gaz n'ibindi bicanwa byiyongereyeho 4.4% n'ibiciro by'ibijyanye n'ubwikorezi byiyongereyeho 15.6%.

Ni mu gihe ibyatumye ibiciro byiyongera mu byaro birimo ibiciro by'ibinyobwa
bisembuye n'itabi byiyongereyeho 14.1%, ibiciro by'amazu, amazi, amashanyarazi, gazi n'ibindi bicanwa byiyongereyeho 5.5% n'ibiciro by'ibijyanye n'ubwikorezi byiyongereyeho 20.6%.

Muri rusange ibiciro bikomatanyirije hamwe mu mujyi no mu cyaro byazamutse ku kigero cya 3,4% ugereranyije n'Ugushyingo 2023.

Bimwe mu byatumye ibiciro byiyongera mu kwezi k'Ugushyingo 2024, ni ibiciro by'ibinyobwa bisembuye n'itabi byiyongereyeho 11.6%, ibiciro by'amazu, amazi, amashanyarazi, gazi n'ibindi bicanwa byiyongereyeho 5% n'ibiciro by'ibijyanye n'ubwikorezi byiyongereyeho 16.7%.

Iyi raporo kandi igaragaza ko igiciro ku bikorerwa imbere mu gihugu cyazamutse ku kigero cya 5% ugereranyije n'umwaka ushize, kikaba cyarazamutseho 0.3% ugereranyije n'ukwezi kwabanje. Igiciro ku bituruka hanze cyo kiyongereye ku kigero cya 5.1% ugereranyije na 2023.

Ibiciro ku masoko mu Rwanda byazamutseho 5% mu Ugushyingo 2024

Ni umuhango wabereye i Vatican ku wa Gatandatu tariki 7 Ukuboza 2024.

Wabaye nyuma y'aho ku itariki ya 4 Ukuboza, Ambasaderi Ngago yakiriwe na Musenyeri Javier Domingo Fernández González, Umuyobozi Mukuru Ushinzwe Protocole i Vatican, wamusobanuriye uburyo igikorwa cyo gutanga izo mpapuro gikorwa.

Kuwa 5 Ukuboza 2024, Ambasaderi Ngago yanagiranye ibiganiro na Musenyeri Roberto Campisi, Umuyobozi Mukuru Ushinzwe Ibikorwa by'Imikoranire n'Ibihugu na Vatican.

Bagarutse kuri gahunda zigamije kurushaho guteza imbere ubufatanye n'ubutwererane.

Mu ruzinduko yagiriye i Vatican, Ambasaderi Ngango yagiranye kandi ibiganiro na Musenyeri Miroslaw Stanislaw Wachowski, Umunyamabanga wa Vatican Wungirije Ushinzwe ububanyi n'amahanga.

Ibiganiro byabo byagarutse ku gushimangira ubufatanye hagati y'u Rwanda na Kiliziya, cyane cyane mu nzego z'uburezi, ubuvuzi n'imibereho myiza y'abaturage.

Umubano hagati y'u Rwanda na Vatican watangiye mu mu 1964 ndetse kuri ubu Kiliziya Gatolika mu Rwanda iri mu bafatanyabikorwa ba mbere mu bikorwa by'iterambere, binyuze mu miryango y'abihayimana ndetse n'imiryango itegamiye kuri Leta ikorana na Kiliziya Gatolika.

Biteganyijwe ko nyuma yo gutanga impapuro zimwemerera guhagararira u Rwanda i Vatican, i Liechtenstein ndetse no mu Busuwisi, Ambasaderi James Ngango azashyikiriza Abakuru b'Ibihugu bya Slovenia na Otriche impapuro zimuha ububasha bwo guhagararira u Rwanda muri ibyo bihugu byombi mu gihe cya vuba.

Amb. James Ngango yashyikirije Papa Francis impapuro zimwemerera guhagararira u Rwanda i Vatican

Amb.Ngango yiyemeje gukomeza guteza imbere umubano mwiza hagati y’u Rwanda na Vatican

[email protected]

Maurice Toroitich wahawe inshingano nshya muri iyi banki, si mushya mu by'amabanki kuko amaze hafi imyaka irenga 30 ateza imbere urwo rwego muri Afurika y'Uburasirazuba.

Yibukirwa ku muhate yagaragaje ubwo yari Umuyobozi Mukuru wa KCB Bank Rwanda, aho yari ishyiga ry'inyuma mu kwagura isoko ry'iyo banki bikaba uko no kuri BPR Bank Rwanda yabereye umuyobozi.

Umuyobozi Mukuru w'Inama y'Ubutegetsi ya NCBA Bank Rwanda, Dr. Benjamin Rugangazi, yashimangiye ko Maurice wanabaye Umuyobozi Mukuru w'Inama y'Ubutegetsi y'Ihuriro ry'Amabanki mu Rwanda, ubuhanga n'ubunararibonye bwe byivugira, ko nta gushidikanya buzagira uruhare rukomeye mu iterambere rya banki yahawe kuyobora.

Ati 'Aje mu bihe byiza, aho turi gushyira imbaraga nyinshi mu guteza imbere banki twagura ibikorwa ari na ko twongera umubare w'ibigo binini dukorana. Bijyanye n'ubuhanga afite, twizeye iterambere ritaziguye rya banki ndetse no kurushaho kunoza serivisi zihabwa abakiliya n'abafatanyabikorwa.'

Maurice ufite impamyabumenyi zitandukanye zimugira n'umubaruramari w'umwuga nka CPA, yize muri Kaminuza ya Nairobi aho yakuye impamyabumenyi y'icyiciro cya kabiri cya kaminuza mu by'ubucuruzi n'indi y'icyiciro cya gatatu yakuye muri Kaminuza ya Strathmore na yo iherereye i Nairobi muri Kenya.

Agaragaza uburyo yakiriye inshingano nshya, Maurice yavuze ko yishimiye kuza kubakira ku bikorwa bikomeye byakozwe n'abamubanjirije mu gukomeza guteza imbere NCBA Bank Rwanda na cyane ko iri mu kindi cyiciro cy'iterambere.

Ati 'Muri NCBA tugiye kwimakaza umuco wo gukorana bya hafi ariko dukorera hamwe mu gukomeza guteza imbere urwego rw'imari mu Rwanda. Bizanakorwa kandi binyuze mu gufatanya n'abafatanyabikorwa batandukanye bari mu gihugu.'

NCBA Bank Rwanda Maurice yahawe kuyobora ni kimwe mu bigo bya NCBA Group gitanga serivisi zaguye z'imari ku bigo binini, ibito n'ibiciriritse n'abakiliya ku giti cyabo, ikagira amashami 115 mu Rwanda, Uganda, Tanzania no muri Côte d'Ivoire.

Ubwo bushobozi butuma NCBA Group iha serivisi abarenga miliyoni 60, ikaba imwe muri banki za mbere muri Afurika zifite abakiliya benshi.

Abakiliya ba NCBA Bank Rwanda bafashwa n'abakozi b'amashami ane yo mu Mujyi wa Kigali n'andi ari mu turere twa Musanze, Nyagatare na Kayonza, ndetse mu minsi iri imbere NCBA Bank Rwanda irateganya gufungura amashami mu turere twa Rubavu na Rusizi.

Binyuze mu bufatanye iyi banki ifitanye na MTN Mobile Money Rwanda Ltd kuri gahunda yo kwizigamira no gutanga inguzanyo ya “MoKash”, banki yabashije kubona abakiliya barenga miliyoni 4,7 aho hamaze gutangwa inguzanyo miliyoni 13 zifite agaciro ka miliyari 386 Frw.

MoKash kandi ikomeje urugendo rwayo rwo kwimakaza serivisi z'imari zidaheza aho ubu abari n'abategarugori miliyoni ebyiri bayikoresha bikaba uko no kuri miliyoni 2,5 z'urubyiruko.

Maurice Toroitich ni we Muyobozi Mukuru mushya wa NCBA Bank Rwanda

Nicholas Musyoka wari Umuyobozi Mukuru w’Agateganyo wa NCBA Bank Rwanda yahererekanyije ububasha ka Maurice Toroitich wahawe kuyobora iyi banki

Ubuyobozi bwa NCBA Group bwakiriye Maurice Toroitich nk’umuyobozi mushya wa NCBA Bank Rwanda