Author: webrwanda

Byabereye mu kagari ka Mutongo ku wa 24 Mutarama 2025, ubwo abanyeshuri bo muri iki kigo bari bagiye gufata amafunguro ya saa sita.

Ubwo abo banyeshuri bari bagiye kurya, bumvise ibiryo byabo binukamo ikinini cy'imbeba, ariko habaka hari umunyeshuri wari wabonye mugenzi we waruraga ayo mafunguro hari ibyo ayashyiramo.

Amakuru IGIHE yamenye ni uko byakozwe n'abanyeshuri bashakaga kuroga mugenzi wabo kubera ishyari ry'uko uwo munyeshuri abarusha amanota mu ishuri.

Aba banyeshuri bakimara kumva uwo mwuka udasanzwe mu biryo, babimenyesheje ubuyobozi bw'ishuri na bwo buhita bubimenyesha ubuyobozi bw'Umurenge wa Mururu n'ubw'Akarere ka Rusizi.

Umuyobozi w'agateganyo w'Akarere ka Rusizi, Habimana Alfred, yabwiye IGIHE ko bakimenya amakuru bahise bajya muri iki kigo, bahumuriza abanyeshuri mbere y'uko bataha bakajya mu ngo zabo, kuko ari ishuri ridacumbikira abanyeshuri.

Yongeyeho ati 'Andi makuru Urwego rw'Igihugu rw'Ubugenzacyaha RIB ni rwo rwayatanga rumaze gukora iperereza'.

Meya Habimana yahumurije ababyeyi ababwira ko ubuyobozi buri maso, amenyesha ababyeyi ko nta munyeshuri wariye kuri ibyo biryo,

Ati 'Turashimira abanyeshuri bagize impungenge ko ibyo byo kurya baba babiroze bagatanga amakuru, ariko tunababwira ko bakwemera ko nta gikuba cyacitse ko ahubwo inzego z'ubuyobozi ziri gukora iperereza.'

Abanyeshuri babiri bo muri G.S Saint Dominique Savio bafashwe bagiye kuroga bagenzi babo

Amakuru dukesha Ibiro by'Umukuru w'Igihugu mu Bufaransa, avuga ko Perezida Macron yaganirije aba bakuru b'ibihugu, buri umwe ukwe, ku wa Gatandatu tariki 25 Mutarama 2025.

Perezida Macron yagaragaje impungenge ku bikomeje kubera mu Ntara ya Kivu y'Amajyaruguru, by'umwihariko mu nkengero z'Umujyi wa Goma.

Yasabye ko M23 yahagarika imirwano, hagasubukurwa ibiganiro by'amahoro vuba bishoboka, ndetse yizeza ko yiteguye gutanga ubufasha muri iyi nzira y'amahoro.

Uku kuganira kw'aba bakuru b'ibihugu kubayeho mu gihe M23 ikomeje kwigarurira ibice bitandukanye, ndetse ikaba iheruka guteguza ifatwa ry'Umujyi wa Goma.

Leta ya RDC yatangaje ko idateze kuganira n'uyu mutwe kandi mbere yari yabyemeye, biba intandaro yo gucika intege kw'ibiganiro bya Luanda, kuko gahunda yo gusinya amasezerano y'amahoro yagombaga guhuza Perezida Kagame na Tshisekedi yari iteganyijwe ku wa 15 Ukuboza 2024, yahise isubikwa.

Ingingo y'ibiganiro hagati ya RDC na M23 ni imwe mu zari zigize amasezerano yagombaga gushyirwaho umukono, nyuma y'aho umuhuza agaragaje ko ibibazo by'u Rwanda na RDC bidashobora gukemuka mu gihe uyu mutwe utarashakirwa igisubizo kirambye, kuko buri uko uzajya wubura imirwano bizajya bishinjwa u Rwanda, bityo ugahora ari agatotsi mu mubano w'ibihugu byombi.

Perezida Macron aherutse gutangaza ko ibi biganiro bya Luanda bihuza u Rwanda na RDC bikwiye gukomeza kugira ngo ikibazo cy'umutekano muke mu karere k'Ibiyaga Bigari gishakirwe umuti urambye.

Yabigarutseho mu kiganiro na Perezida João Lourenço wa Angola akaba n'umuhuza w'u Rwanda na RDC, cyabereye i Paris kuri uyu wa 16 Mutarama 2025.

Yabwiye Perezida Lourenço ati 'Gahunda y'amahoro mwatangije ikwiye gukomeza kandi turasaba ko ibiganiro byo ku rwego rwo hejuru bikomeza. U Bufaransa nk'umufatanyabikorwa wa hafi, bushyigikiye ubwo buhuza n'izo ntambwe z'amahoro.'

Perezida Lourenço yatangaje ko nk'umuhuza, ari gukora ibishoboka kugira ngo intambara zimaze imyaka 30 mu Burasirazuba bwa RDC zihagarare ndetse u Rwanda na RDC byongere bibane mu mahoro.

Perezida Macron yaganiriye na Perezida Kagame na Tshisekedi

Umuhanzi w’indirimbo zo kuramya no guhimbaza Imana Goodluck Gozbert, yagaragaye mu mashusho atwika imodoka ya Mercedes Benz yahawe na Nabii Geor Davie, umuyobozi w’Itorero Ngurumo ya Upako. Ni imodoka yahawe mu mwaka wa 2021, ariko kuva icyo gihe, ibikorwa bye bya muzika byatangiye gucumbagira.

Iyi nkuru yatumye abantu benshi bibaza byinshi, bamwe bakibaza niba hariho isano hagati yo gushyira mu muriro iyo modoka no gusubira inyuma kwe mu muziki. Abandi bavugaga ko bishobora kuba ikimenyetso cy’impinduka zikomeye mu buzima bwe, mu gihe abandi batekereza ko hari ibindi bibazo byihishe inyuma y’iki gikorwa.

Goodluck Gozbert uzwi mu ndirimbo “Hauwezi kushindana” kugeza ubu impamvu itangazwa yamuteye gutwika iyi modoka, yavuze ko iyi mpano yakiriye yasanze itari mu murongo w’Imana. Ibi byatumye benshi bibaza niba akeka ko iyi mpano yaba irimo ibyatumye adakomeza gutera imbere mu bikorwa bye bya muzika.

Aya makuru ajyanye n’iki gikorwa yatumye abantu batandukanye bashaka bavuga menshi kuri iki gikorwa yakoze, harimo na bamwe mu bakora mu mategeko bakomeje kuvuga ko ibyo yakoze bigize icyaha.

Basobanura ko gutwika umutungo waba ari uwawe cyangwa uw’abandi bihanishwa igihano cyo gufungwa imyaka itari mike muri Tanzania. Bikaba bivugwa ko uhamwe n’iki cyaha afungwa hagati y’imyaka 5-10.

Iki gikorwa cyatangaje benshi, bamwe bibaza ukuntu impano umuntu uwo ariwe wese yahawe ayifata neza ariko uyu muhanzi ukora umuziki wo kuramya no guhimbaza Imana akaba yayishyize mu muriro, igikorwa cyagawe na benshi. 

Goodluck Gozbert, umuhanzi w’indirimbo zo kuramya no guhimbaza Imana yatwitse imodoka yahawemo impano

Nabii Geor Davie, umuyobozi w’Itorero Ngurumo ya Upako wahaye impano y’imodoka Goodluck Gozbert muri 2021

Ihohoterwa rikorerwa abagore n'abana ni kimwe mu byaha bihangayikishije mu bihugu byo mu Karere ka Afurika y'Iburasirazuba.

EAPCCO igiye gukorera Inama y'Inteko Rusange mu Rwanda yatekereje ku buryo bwo gukomeza guhangana n'icyo kibazo binyuze mu kongerera ubumenyi bamwe mu bafite aho bahuriye no kugenza ibyaha.

Muri urwo rwego hateguwe amahugurwa y'iminsi ibiri ku bapolisi bo mu bihugu 14 bigize EAPCCO n'abandi bafite aho bahuriye no kugenza ibyaha.

Ni amahugurwa yitabiriwe n'abantu 50 aho ku ruhande rw'u Rwanda harimo n'abakora mu nzego zitandukanye zirimo Polisi y'u Rwanda, Urwego rw'Ubugenzacyaha, Ubushinjacyaha, Urwego rw'u Rwanda rushinzwe Igorora ndetse n'izindi zifite aho zihuriye no gukumira ibyaha.

Umunyamabanga Mukuru w'Urwego rw'Igihugu rw'Ubugenzacyaha RIB, Col Jeannot Ruhunga, yashimangiye ko ibihugu byo mu Karere bikwiye gusenyera umugozi umwe mu guharanira ko ibyo byaha by'ihohoterwa bihagarara burundu.

Ati 'Twese hamwe, dufite imbaraga zo guhindura ibintu no kubaka sosiyete itanga umutekano, icyubahiro n'uburenganzira kuri buri wese.'

Yongeyeho ati 'Mu bihe by'ihohoterwa rikorerwa abagore n'abana, ubuyobozi ntibukwiye gutanga gusa ubumenyi n'ibikoresho bikenewe kugira ngo rihashywe, ahubwo hagomba no kubaho umuhate n'ubukangurambaga bukenewe mu gufasha abarikorewe kugera ku nzira y'ubutabera. Iyo ni yo mpamvu hashyirwaho gahunda zitandukanye zo kubungura ubumenyi bufatanyije n'abafatanyabikorwa.'

Col Jeannot Ruhunga yashimangiye ko abagore mu nzego zitandukanye bashobora kugira uruhare mu guhangana n'ihohoterwa rikorerwa abana n'abagore.

Yavuze ko ayo mahugurwa ari umwanya wo gusangira ibitekerezo, ubunararibonye n'ingamba zikwiye gushyirwaho hagamijwe kurwanya ibirebana n'ihohoterwa rikorerwa abagore n'abana.

Ati 'Twese hamwe, turashaka kubaka uburyo bushingiye ku gufasha abahohotewe, bwumva, kandi bushingiye ku mahame y'ubutabera n'amahoro. Ndashishikariza abitabiriye amahugurwa gukurikirana inyigisho muhabwa kandi mukagira uruhare mu gutanga ibitekerezo.'

Ubuyobozi bwa EAPCCO bwagaragaje ko abapolisi n'inzego ziri ku isonga mu gukumira no kugenza ibyaha bakwiye gushyira imbaraga mu kurwanya ibyaha by'ihohoterwa rikorerwa abagore n'abana.

Umuyobozi ushinzwe Amasomo mu Ishuri Rikuru rya Polisi muri Kenya, CP Gatiti, yagaragaje ko ihohoterwa rikorerwa abana n'abagore mu gihugu cye biri ku kigero cyo hejuru nubwo hashyizweho ingamba zigamije kubikumira.

Yemeje ko ayo mahugurwa agiye kubafasha mu kurebera hamwe ingamba zinyuranye zishobora kwifashishwa mu guhangana naryo.

Ati 'Turi abanyamuryango ba EAPCCO, iyo twahuye nka gutya twunguka byinshi. Nk'ubu u Rwanda rufite ikigo cya Isange One Stop center aho twigira ku mikorere myiza ya cyo. Niteze ko twunguka imikorere myiza, tugiye kungurana ibitekerezo no kurebera hamwe izindi ngamba dushobora kwifashisha zatanga umusaruro kuri iki kibazo.'

SP Daniel Uwimana yagaragaje ko Polisi y'u Rwanda ihora yiteguye guhangana n'ibyaha bitandukanye kandi ko yiyemeje guhangana n'icyaha cy'ihohoterwa rishingiye ku gitsina rikorerwa abagore n'abana.

Abapolisi basabwe gushyira umuhate mu guhashya ibyaha bifitanye isano n’ihohoterwa

Umunyamabanga Mukuru wa RIB, Col Jeannot Ruhunga, yasabye abapolisi kugira uruhare mu gukumira ibyaha by’ihohoterwa rikorerwa abagore n’abana

Ubuyobozi bwa EAPCCO bwashimangiye ko imikoranire yashyira iherezo kuri ibi byaha

Abapolisi bakuru basabwe kugira uruhare mu guhangana n’ihohoterwa rikomeje gukorerwa abagore n’abana

Amahugurwa y’iminsi ibiri agiye gutangirwa mu kigo cy’icyitegererezo cya Polisi y’u Rwanda ku kurwanya ihohoterwa

Abitabiriye amahugurwa basabwe kubyaza umusaruro ubumenyi bahabwa

Abagore basabwe kugira uruhare mu bikorwa byo gukumira ihohoterwa ribakorerwa n’irikorerwa abana

Ni imirwano yabereye mu Mujyi wa Sake uherereye muri Teritwari ya Masisi no mu bice byegereye Umujyi wa Goma muri Teritwari ya Nyiragongo kuva ku wa 23 Mutarama 2025.

SANDF mu itangazo rigenewe abanyamakuru yashyize hanze ku wa 25 Mutarama 2025, yatangaje ko muri abo basirikare icyenda bayo bishwe, barindwi bapfuye bari mu ngabo za SADC boherejwe muri RDC gufasha ubutegetsi bwa Kinshasa kurwanya M23.

Ni mu gihe abandi babiri bari mu butumwa bw'amahoro bw'Umuryango w'Abibumbye muri Repubulika Iharanira Demokarasi ya Congo (MONUSCO).

Igisirikare cya Afurika y'Epfo cyatangaje kandi ko hari abandi basirikare bacyo bakomeretse mu buryo bworoheje n'ubukomeye.

Mu itangazo bakomeje bati 'Abishwe bari bari kugira uruhare mu mirwano yo kubuza umutwe wa M23 kwinjira mu Mujyi wa Goma kuko wari wo mugambi wayo ndetse basubijweyo n'ingabo za Afurika y'Epfo.'

Nyuma y'imirwano ikomeye iri kubera mu Mujyi wa Sake, SANDF yigambye ko yo n'ihuriro ry'ingabo za RDC bagerageje kubuza M23 kwinjira mu Mujyi wa Goma ufatwa nk'Umurwa Mukuru w'Intara ya Kivu y'Amajyaruguru.

Iki gisirikare cyatangaje ko kiri kugerageza kumenyesha abo mu miryango y'abapfuye amakuru y'ababo, kigaragaza ko abayobozi b'ingabo muri Afurika y'Epfo bihanganishije imiryango y'ababuze ababo.

Uretse abishwe ku wa 24 Mutarama 2024 byatangajwe ko abasirikare batatu ba MONUSCO bakomerekeye mu mirwano y'ihuriro ry'ingabo z'iki gihugu n'umutwe witwaje intwaro wa M23 mu mujyi wa Sake.

Kuri uyu wa 25 Mutarama 2025 M23 n'Ihuriro ry'ingabo za Repubulika Iharanira Demokarasi ya Congo byiriwe mu mirwano mu Mujyi wa Sake na Mweso muri Teritwari ya Masisi.

Kugeza ubu Umutwe wa M23 wahaye ingabo za Repubulika Iharanira Demokarasi ya Congo ziri mu Mujyi wa Goma mu Ntara ya Kivu y'Amajyaruguru, amasaha 48 yo kuba zarambitse intwaro hasi.

Ni amasaha abarwa guhera kuri uyu wa 25 Mutarama 2025 ubwo Umuvugizi w'uyu mutwe mu rwego rwa politiki, Lawrence Kanyuka, yasohoraga itangazo ritanga iki gihe ntarengwa.

Igisirikare cya Afurika y'Epfo, SANDF cyatangaje ko abasirikare bacyo icyenda baguye mu mirwano ihuje M23 n'ingabo za RDC

Ni igikorwa cyabaye kuri uyu wa Gatandatu tariki ya 25 Mutarama 2025, kibera muri Kaminuza y'Abalayiki b'Abadiventisiti b'Umunsi wa Karindwi, UNILAK, yatangijwe bigizwemo uruhare rukomeye na we.

Pasiteri Ezra Mpyisi yitabye Imana afite imyaka 102 ku wa 27 Mutarama 2024.

Yavukiye mu Mataba mu 1922, akurira ahitwa i Gitwe ari naho yakoreye mbere yo kujya mu buhungiro mu bihugu bitandukanye birimo u Burundi, Mozambique, RDC na Kenya.

Pasiteri Mpyisi yari mu Banyarwanda babitse amateka yo hambere ku Ngoma z'Abami dore ko yabanye cyane n'umuryango w'Umwami Rudahigwa, akaba n'Umujyanama wa Kigeli V Ndahindurwa watanze mu mpera za 2016.

Uyu musaza yakundaga kuvuga ko ari 'Umunyarwanda wuzuye utari ikibyarirano'.

Abitabiriye igitaramo cyo kwizihiza ubuzima bwa Pasiteri Ezra Mpyisi bakurikiye ikibwirizwa uyu mukambwe yari yaratanze akiri muzima kigaruka ku gukurikira Imana, kumenya inzira y'ukuri ndetse no kwizera Yesu Kristo.

Mudidi Emmanuel wabaye Minisitiri w'Uburezi kuva mu 1999 kugeza 2001, akanaba n'umudepite mu Nteko Ishinga Amategeko y'u Rwanda uri mu batanze ubuhamya kuri Mpyisi, yavuze ko yamenyanye na nyakwigendera mu 1970 ubwo bahuriraga i Nairobi muri Kenya.

Yavuze ko yamubereye umubyeyi muri ibyo bihe kuko yakunze kumugira inama kandi yabonye ari umugabo ufite ubwenge n'ubumenyi ndetse agakunda Imana.

Yemeje ko ibikorwa bye bizakomeza kuzirikanwa kuko byigaragaza.

Ati “Ni umusaza tutazibagirwa kandi imbuto ze ziragaragara. Ni umubyeyi wadukundaga cyane.”

Mudidi yavuze uko Mpyisi yakunze kugenda mu nzego zitandukanye z'ubuyobozi zirimo na Minisiteri y'Uburezi asaba ko Kaminuza ya UNILAK yakemerwa nk'imwe mu zigenga zatangiye mbere mu Rwanda.

Yashimangiye ko uruhare yagize rwerekanye inyota yari afite y'uko Abanyarwanda bagira ubumenyi. Yemeje ko amuzi nk'umuntu ukunda Imana kandi wihebeye gusoma Bibiliya.

Kaminuza ya UNILAK yashimye umusanzu ukomeye Pasiteri Ezra Mpyisi yagize mu ishingwa ryayo ndetse n'uburyo yakomeje kuyiba hafi no kuyiragiza Imana.

Umuyobozi Mukuru wa UNILAK, Dr. Ngamije Jean, yasobanuye uko Pasiteri Ezra Mpyisi yagize uruhare rukomeye mu buzima bw'iyi kaminuza bityo ko ikaba igiye gushyiraho igice cy'isomero cyihariye, kizashyirwamo ibitabo Mpyisi yayihaye mu bihe bitandukanye.

Umuhungu wa Ezra Mpyisi, Gérard Mpyisi, yagaragaje ko mu gukomeza kuzirikana ibikorwa bya Se, hashinzwe umuryango wa Ezra Mpyisi Bible and Education Foundation ukora ibikorwa birimo gutanga Bibiliya, Ishuri rya Bibiliya ufite n'ikigega kizafasha abana bo mu miryango itishoboye bakiga.

Gérard Mpyisi yavuze ko bifuza gufasha abana b'amikoro make kwiga by'umwihariko abiga mu mashuri y'Imyuga n'Ubumenyingiro TVET.

Ati 'Turashaka gushyiraho ikigega cy'uburezi. Ubu murabizi hano mu Rwanda Leta ifite ibyo ikora kandi ikora neza, NGOs nazo ziragerageza ariko turacyafite abana benshi baturuka mu miryango itishoboye kandi badashobora kwiga. Turashaka gushyiraho icyo kigega ngo tuzajye tubona amafaranga yo gufasha abo bana kugira ngo bashobore kujya kwiga.'

Yongeyeho ati 'Turashaka kwibanda cyane cyane ku bana bajya kwiga imyuga muri TVET. Mwese murabizi ko umwana unyuze muri ayo mashuri avamo afite ikintu ashobora gukora n'intoki ze, aba yize umwuga. Bene abo ni bo banabona n'akazi mu buryo bworoshye.'

Umuryango wa Ezra Mpyisi watangaje ko nyuma y'urupfu rwe, wakomeje gahunda yari afite yo gutanga Bibiliya aho hakoreshejwe arenga miliyoni 9 Frw.

Gérard Mpyisi yavuze ko Bibiliya zatanzwe ku bantu bo mu matorero n'amadini atandukanye kuko harimo n'izahawe Abayisilamu.

Yongeye gusaba abantu n'imiryango itandukanye gukomeza kubashyigikira muri icyo gikorwa.

Biteganyijwe ko muri Gashyantare 2025 hazatangizwa ishuri rya Bibiliya rizajya rikorera muri UNILAK buri wa Gatandatu kandi hifuzwa ko mu gihe ryaba ryagaragaje umusaruro, Umuryango wa Ezra Mpyisi wazakomeza gukorana na Kaminuza hakaba hashyiramo ishami rya Tewologiya.

Umuhungu wa Ezra Mpyisi, Gérard Mpyisi, yagaragaje ko bifuza gushinga ikigega cyita ku bana batishoboye bakabasha kwiga

Inshuti n’abavandimwe bongeye kwibutswa amateka ya Mpyisi abakora ku mutima

Umuryango wa Ezra Mpyisi wagaragaje ko ugiye gutangiza ishuri rya Bibiliya

Umuyobozi Mukuru wa UNILAK, Dr Ngamije Jean, yasobanuye uko Pasiteri Ezra Mpyisi yagize uruhare rukomeye mu buzima bwa Kaminuza

Monique yavuze ko Ezra Mpyisi yari umuntu w’umunyakuri, ukundi Imana ndetse n’ijambo ryayo

Mudidi Emmanuel wabaye Minisitiri w'Uburezi, yavuze ibigwi Ezra Mpyisi bamenyanye mu 1970

Ababyeyi bakuze bitabiriye iki gikorwa

Abitabiriye icyo gikorwa bongeye kuzirikana ibigwi n’amateka bya Ezra Mpyisi

Korari yafashije muri iki gikorwa

Abitabiriye igikorwa cyo kumwibuka bakurikiye kimwe mu byigisho yasize atanze

Inshuti z’Umuryango wa Pasiteri Ezra Mpyisi zitabiriye iki gikorwa

Umuhungu wa Ezra Mpyisi, Gérard Mpyisi

Mudidi Emmanuel akurikiye icyigisho cya Ezra Mpyisi

Amafoto: Kwizera Remy Moses

Watangiye kugaragaza impinduka mu baturage ku buryo hari n'abo uri guhindurira ubuzima mu buryo bugaragara.

Uyu mushinga wa CDAT ugamije guteza imbere ubuhinzi n'ubworozi bugamije ubucuruzi, no kugabanya ibibubangamira. Watangiye gushyirwa mu bikorwa muri Mutarama 2023.

Umuyobozi w'umushinga CDAT, Ernest Uzaribara, yavuze ko bahisemo gukorera mu turere 14 dufite imisozi ikikije ibishanga 37 bari gutunganya kugira ngo banafashe ababituriye kubona akazi ngo biteze imbere.

Yavuze ko kuri ubu uyu mushinga umaze gutunganya amaterasi ari ku buso bwa hegitari 9000 mu gihe bateganya gutunganya ibihumbi 11 mu gihugu hose.

Ubuzima bw'abahawe akazi mu gutunganya amaterasi bwatangiye guhinduka nk'uko Tuyishime Theogene utuye mu Karere ka Kayonza mu Murenge wa Murundi mu Kagari ka Ryamanyoni abishimangira.

Yavuze ko amafaranga yahembwe mu gukora amaterasi yayakuyemo inzu, anaguramo inka y'ibihumbi 300 Frw n'inyana y'ibihumbi 400 Frw ku buryo izi nka ebyiri zimuha ifumbire ituma umusaruro we wiyongera.

Uwimana Marie utuye mu Mudugudu wa Nyahinda mu Kagari ka Tyazo mu Murenge wa Muhanga, yavuze ko mbere batari bakorerwa amaterasi mu mirima yabo, hari ahantu habi cyane bahingagamo ntibyere, yavuze ko kuri ubu yejeje imyumbati n'ibishyimbo binatuma agura amabati ava mu kuba mu nzu y'amategura.

Ati 'Nta kintu cyaheraga hari ku gasi nta taka ryari rihari. Baraje rero barahamena bahakora amaterasi meza. Ubu dusigaye tuhahinga tukeza ku buryo amafaranga ahavuye twanayaguze inka. Nkanjye iterasi rimwe nsigaye ndisaruramo ibihumbi 50 Frw kuko baduhaye ifumbire y'imborera, ishwagara ubundi ugahingamo.'

Nyirakanani Valentine utuye mu Mudugudu wa Rwabagenzi mu Kagari ka Nyamirama we yavuze ko amafaranga ahembwa arimo ayo yizigamira muri Ejo Heza andi akayakoresha yiteza imbere.

Ati 'Amafaranga nahembwe naguzemo ingurube iheruka kubyara abana batandatu, banampaye inka. Ikindi ni uko umwana wanjye namujyanye kwiga imyuga. Murihirira mu mafaranga nkura hano.'

Umuyobozi w'Akarere ka Nyanza, Ntazinda Erasme, yavuze ko uyu mushinga umaze gutanga akazi ku baturage 5324 muri aka Karere, aho bamaze gukora amaterasi kuri hegitari zirenga 570.

Ntazinda yavuze ko abaturage benshi biteje imbere mu buryo bugaragara aho bizigamiye muri Ejo Heza, bigurira amatungo magufi n'ibindi bihindura imibereho yabo.

Umushinga wa CDAT biteganyijwe ko uzarangira mu 2027, mu bice by'ingenzi by'uyu mushinga harimo gutunganya ibishanga ku buso bungana na hegitari ibihumbi 18, gutunganya imisozi ikikije ibyo bishanga kuri hegitari ibihumbi 11.

Bafasha abantu kubona inguzanyo z'ubuhinzi n'ubworozi ku nyungu ya 8%, gufasha abaturage kongera ubwishingizi bw'amatungo n'ibihingwa, kubona inyunganizi ku ishoramari mu buhinzi n'ubworozi n'ibindi.

Umuyobozi w'umushinga CDAT, Ernest Uzaribara, avuga ko hegitari 9000 zimaze gucibwaho amaterasi bigizwemo uruhare n’uwo mushinga

Abaturage bahawe akazi mu gukora amaterasi aho bahembwa buri minsi icumi

Hegitari 9000 zimaze gucibwaho amaterasi mu bice bitandukanye by’igihugu

Tuyishime Theogene yishimira ko amafaranga yahembwe yabashije kuyubakamo inzu

Abaturage bishimira ko basigaye beza ibishyimbo ku bwinshi, ibitarabagaho mbere

Nyirakanani Valentine yishimira ko bucura bwe amurihirira imyuga mu mafaranga akura mu gukora amaterasi

Kuri uyu wa Gatandatu tariki ya 25 Mutarama 2025, mu turere twose twa Kigali, abaturage bazindukiye mu muganda rusange usoza ukwezi. Ni na ko byagenze no mu tundi turere tw'Igihugu. 

Umuganda wabereye muri Kicukiro, witabiriwe Minisitiri w’Ubutegetsi bw’Igihugu Patrice Mugenzi; Umuyobozi w’Umujyi wa Kigali, Dusengiyumva Samuel, n’itsinda ry’abashyitsi baturutse muri Zimbabwe bari mu rugendo shuri mu Rwanda. 

Uyu muganda kandi witabiriwe n'abarimo umunyarwenya Chipukeezy, ndetse na Fally Merci utegura ibitaramo bya Gen-z Comedy na bagenzi be. 

Mu butumwa yanyujije ku rubuga rwa Instagram, Chipukeezy yavuze ko yishimiye guhura na Meya Samuel, kandi ko yiteguye kubyaza umusaruro urugendo rw'ibiganiro bagiranye.

Uyu musore aherutse gutanga ibyishimo mu gitaramo cya Gen-z Comedy cyabaye ku wa Kane tariki 23 Mutarama 2025, muri Camp Kigali.

Umuganda wo kuri uyu wa Gatandatu, wibanze ku gutunganya umuhanda Rebero – Gihuke ukomeza Ayabaraya, hashyirwamo 'Laterite' ndetse n’inzira z’amazi.

Mu butumwa yagejeje ku bitabiriye umuganda rusange, Umuyobozi w’Umujyi wa Kigali, Samuel yashimiye abaturage bitabiriye umuganda n’abashyitsi baje baturutse mu gihugu cya Zimbabwe.

Yasabye abaturage: Kwimakaza gahunda ya “Isuku Hose” haba aho batuye, ku mubiri ndetse n’ahahurira abantu benshi; kubungabunga umutekano buri wese akaba ijisho rya mugenzi we no kubungabunga ibiti byatewe bigakura neza no gutera ibindi bahereye aho batuye.

Mu ijambo rye, Minisitiri w’Ubutegetsi bw’Igihugu Patrice Mugenzi yashimiye abaturage bitabiriye umuganda wo kuri uyu wa Gatandatu.

Yabashishikarije gukomeza gushyigikira gahunda za Leta zo kwishakamo ibisubizo, gusigasira ibyagezweho no gukomeza gutanga amakuru muri sisitemu “Imibereho”.

Yabasabye kandi gukomeza kubungabunga ibishanga no kubahiriza amategeko abigenga, birinda ibikorwa byangiza ibishanga nko kumenamo igitaka n’indi myanda, ndetse no kuhakorera ibindi bikorwa bitemewe.

Yasoje abibutsa ko mu Rwanda hashize ukwezi hari ibikorwa byahariwe kuzirikana Intwari z’Igihugu mu gihe twitegura kwizihiza Umunsi Mukuru w’Intwari z’Igihugu wizihizwa tariki ya 1 Gashyantare buri mwaka.

Insanganyamatsiko iragira iti: “Ubutwari n’ubumwe bw’Abanyarwanda, inkingi z’iterambere”. Yabasabye gukomeza kurangwa n’ibikorwa by’ubutwari.

Uhereye ibumoso: Fally Merxi utegura ibitaramo bya Gen-Z Comedy, Umuyobozi w'Umujyi wa Kigali, Dusengiyumva Samuel ndetse n'Umunyarwenya Chipukeezy
Umunyarwenya Chipukeezy yatangaje ko yishimiye ibiganiro yagiranye na Meya Samuel

 

Umunyarwenya Chipukeezy yahawe umwanya aganiriza abaturage bo muri Kicukiro bitabiriye umuganda kuri uyu wa Gatandatu 

Umuyobozi w'Umujyi wa Kigali, Dusengiyumva yashimiye abaturage bitabiriye umuganda n’abashyitsi baje baturutse mu gihugu cya Zimbabwe

Minisitiri w’Ubutegetsi bw’Igihugu Patrice Mugenzi yashishikarije abaturage gukomeza gushyigikira gahunda za Leta zo kwishakamo ibisubizo  

Ambasaderi wa Zimbabwe mu Rwanda, Prof. Charity Manyeruke yashimye umubano mwiza uri hagati y'ibihugu byombi waharuwe na Perezida Paul Kagame na Perezida Emmerson Mnangagwa 

Fally Merci utegura ibitaramo bya Gen-Z Comedy aganira n’umunyarwenya Chipukeezy yatumiye i Kigali

Aba basore bamaze igihe bitegura iki gitaramo, ndetse biteguye gutaramira abakunzi babo kuri uyu wa Gatandatu tariki ya 25 Mutarama 2025, mu gitaramo kibera muri Kigali Conference and Exhibition Village ahazwi nka Camp Kigali. 

Amakuru avuga ko iri torero ryari ryashyize ku isoko amatike ari hagati ya 3500 na 4000, aho bataramira mu ihema rinini rya Camp Kigali risanzwe ryakira abantu benshi. 

Iri torero ryaciye agahigo kuko nta rindi torero mu Rwanda ryigeze ribasha kugurisha amatike agashira yose mbere y'amasaha macye y'igitaramo.

Mu butumwa banyujije ku rubuga rwa Instagram, bagaragaje ko bakozwe ku mutima no kuba abantu barabashyigikiye cyane, kugeza ubwo amatike y'igitaramo cyabo ashize ku isoko.

Umuyobozi w'iri torero, Cyogere yabwiye InyaRwanda ko bahisemo kwita iki gitaramo 'Indirirarugamba' bashingiye ku mutwe w'ingabo wabayeho wari uw'abana bato batozwaga kuba ingabo, nyuma bagasaba kujya ku rugamba.

Ati 'U Rwanda rwaje guterwa, abana bumvise inkuru ko batewe basaba kujya gutabara kandi bari bakiri mu itorero, babisabana umwete n'agahinda ko batewe, bo bagahezwa kandi baraje mu itorero ngo bazige gutsinda umwanzi.'

Yavuze ko bahisemo ririya zina mu kumvikanisha icyerekezo cyabo n'ishyaka ryabo, bityo ibyinshi mu gusobanura neza iri zina bizagaragara mu gitaramo.

Akomeza ati 'Aho bihurira n'ishyaka ry'intore n'uko tutabanje gutegereza nk'itorero rikivuka ngo tugwize uburambe n'imbaraga ahubwo tukarebera ku cyizere n'ubuhanga bw'abadutoza tugashaka gutangira umwaka tutitaye kubyabaye tukifuza gutangira umwaka dutaramira Abanyarwanda kuko tuba twifuza gukesha umwaka dutangiye dutura Abanyarwanda umuco wabo.'

Cyogere yavuze ko muri rusange, intego ya mbere y'iki gitaramo 'ni ukumurika itorero ishyaka ry'intore' bashinze' kandi, kinagamije gufasha Abanyarwanda gutangira umwaka neza. Ati 'Tubifata nko kweza umwaka dukoresheje umuco wacu mwiza.'

Yungamo ati 'Ni igitaramo kigamije kugaragaza ko intore bakunze zitaretse umuco no guhamiriza ahubwo zigeze, ndetse n'igitaramo tuzabamurikiramo noneho ko tugiye gutangira kwigisha abana b'Abanyarwanda nk'uko twabisabwe kenshi.”

Cyogere yumvikanishije ko gutandukana na bagenzi babo bari kumwe mu Itorero Ibihame by'Imana, bari bagamije 'gukomeza gukundisha umuco Abanyarwanda b'ingeri zose ndetse nanone ko abawukora nabo byabagirira umumaro urenze uwo bibafitiye ubu ngubu haba mu mikoro, ubumenyi no kumenyekanisha umuco wacu wa Kinyarwanda dushingiye ko ubu ngubu abatoza dufite gihe bigeze batoza nk'ubu'.

Cyogere yavuze ko muri iri torero ubu bafite abatoza barimo MNC (Mukuru wa Massamba Intore), Burigo Olivier n'umukondo Gatore.    

Itorero Ishyaka ry'Intore ryatangaje ko amatike y'igitaramo cyabo yashize ku isoko 

Ishyaka ry'intore bamaze iminsi bagaragaza ko biteguye gutanga ibyishimo muri iki gitaramo 'Indirirarugamba'

Cyogere yatangaje ko bateguye iki gitaramo mu rwego rwo kumurika ku mugaragaro itorero Ishyaka ry'Intore batangije 

Umuhanzi mu muziki gakondo, Ruti Joel ari mu bagize igitekerezo cyo gutangiza iri torero, ndetse ari mu bayobozi bakuru 

Bamwe mu babyinnyi bakomeye muri iri torero, bumvikanishije ko barajwe ishinga no guteza imbere umuco w'u Rwanda

Kuva tariki 23 Mutarama 2025 muri Gurupoma ya Kibumba, Teritwari ya Nyiragongo, hongeye kubera imirwano ikomeye ihanganishije M23 n'Ihuriro ry'Ingabo za Repubulika Iharanira Demokarasi ya Congo.

Ku ruhande rw'u Rwanda, ibi bice byo muri RDC bihana imbibi n'Umudugudu wa Kambonye, Akagari ka Rusura, Umurenge wa Busasamana mu Karere ka Rubavu.

Iyo uri muri iki gice cy'u Rwanda uba witegeye ikirunga cya Nyiragongo ari na cyo iyi teritwari yakomoyeho izina. Uba ureba ibice bya Gurupoma ya Kibumba bimaze igihe mu maboko ya M23, ndetse n'ibiri muri Gurupoma ya Kibati igenzurwa na FARDC n'imitwe irimo FDLR.

Aha ni naho habarizwa uduce twa Kilimanyoka na Kanyamahoro twabaye isibaniro mu mirwano ihanganishije impande zombi, aho usanga M23 ihanganye na FARDC bari ku dusozi duteganye.

Iyo ukigera muri uyu Mudugudu wa Kambonye uri mu ntera nto uvuye muri ibi bice byo muri RDC, usanganirwa n'urusaku rw'imbunda ziremereye, bikaba bibi kurushaho mu ijoro, kuko ho uba ubona n'ibishashi by'umuriro.

Ku baturage bo muri aka gace bo iby'iyi mirwano n'urusaku byahindutse ubuzima busanzwe! Usanga abana bari mu ishuri badahungabanywa na rwo. Mu gihe rwambikanye hakurya, bo baba bicururiza abandi bahinga.

Ku rundi ruhande, ab'amatsiko menshi bo bafite ahirengeye bahagarara kugira ngo bakurikirane iby'iyi mirwano.

Ubwo IGIHE yageraga muri aka gace, yasanze umubare munini w'abaturage bagiye kwihera amaso iby'iyi mirwano yongeye kubura.

Harerimana Léonidas ni umwe mu baturage twahasanze.

Yavuze ko mu bituma batagira ubwoba ari uko bizeye umutekano w'u Rwanda, nubwo baba bitegeye ahabera imirwano.

Ati “Duhana imbibi n'igihugu cya Congo cy'abaturanyi, twegeranye n'aho imirwano ibera nta kilometero n'igice ihari. Kuko dufite abana n'imiryango iyo tubyumvise twumva ari ibintu byaduhungabanya kuko twumva urusaku, rimwe na rimwe tukabona n'ibishashi, ariko tuba dufite icyizere ko bitakwambuka imbibi ngo bize kuduhungabanyiriza umutekano.'

Nubwo ku wa Gatanu hari habaye imirwano ikomeye yavuye mu masaha y'igitondo kugeza nimugoroba, ari na ko humvikana urusaku rw'ibisasu, Nziyandemye Bernadette, avuga ko nta bwoba yigeze agira kuko yabifashe nk'ibintu bisanzwe.

Ati 'Impamvu bidakunze kuduhangayikisha cyane ni ibintu bisanzwe, dusa n'ababimenyeye. Abana na bo barabimenyeye kubera ko kumva isasu rivugiye na hano bidashobora gutuma bashiduka, baramenyereye.'

Ni ingingo ahuriyeho na Uwiduhaye Claudine, uvuga ko uru rusaku rw'amasasu rutababuza kurya no kuryama. Icyakora ngo babaye bahagaritse kujya muri RDC, nubwo ashimangira ko 'azasubirayo [amasasu] nahosha'.

Ubwo IGIHE yasuraga aka gace ku wa 24 Mutarama 2025, umutwe wa M23 n'ihuriro ry'ingabo za Repubulika Iharanira Demokarasi ya Congo byahanganiye muri Gurupoma ya Kibumba, Teritwari ya Nyiragongo.

Iyi mirwano yabereye mu gice cya Kilimanyoka na Kanyamahoro, aho ihuriro ry'ingabo za Leta ya RDC zigizwe n'abasirikare b'iki gihugu (FARDC), umutwe w'iterabwoba wa FDLR n'imitwe ya Wazalendo ryari ryashinze ibirindiro.

Abatuye mu bice byegereye ahari kubera imirwano bahungiye mu Mujyi wa Goma uri mu ntera y'ibilometero 23, bitewe n'urusaku rw'imbunda ziremereye bumvise.

Iyo uri muri aka gace, uba witegeye Teritwari ya Nyiragongo muri RDC

Usanga mu bitegeye ahabera iyi mirwano harimo n’abana bato

Abaturage bo muri uyu Murenge wa Busasamana bamenyereye urusaku rw’amasasu

Usanga abaturage bahagaze ahirengeye, bakurikiranye imirwano ya M23 na FARDC

Usanga bamwe bibereye mu mirimo yabo nubwo hakurya haba humvikana urusaku rw’imbunda ziremereye