Webrwanda Backend

Author: webrwanda

  • Abanyaburayi bose siko bakurikira buhumyi ibinyoma bya Kongo n'Ububiligi #rwanda #RwOT

    Nyuma y'aho abadepite mu nteko ishinga amategeko y'Umuryango w'Ubumwe bw'Ibihugu by'Uburayi ufatiye umwanzuro ubogamiye ku binyoma bya Kongo n'Ububiligi buhagarariye inyungu za Tshisekedi, hari abibwiraga ko Komisiyo y'uwo muryango nayo izagwa muri ubwo buyobe, igafatira u Rwanda ibihano,nk'uko Ububiligi bwabihirimbanagamo.

    Si uko byagenze, kuko mu nama y'abaministri b'ububanyi n'amahanga mu bihugu bigize uwo muryango banze gukurikiza buhumyi ibyari byasabwe n'abo badepite, ahubwo hanzurwa ko 'ibihano atari byo byihutirwa, kurusha inzira ya dipolomasi, ko imikoranire y'Umuryango w'Ubumwe bw'Ibihugu by'Uburayi n'u Rwanda yakomeza gusuzumwa, ibyemezo bikazafatwa hashingiwe ku buryo ibintu bizaba byifashe[muri Kongo]'.

    Bishyizwemo ingufu na Guverinoma y'Ububiligi, abo badepite(biganjemo abafitanye inyungu zihariye muri Kongo), basabaga gusesa amasezerano Umuryango w'Ubumwe bw'Ibihugu by'Uburayi ufitanye n'uRwanda ku birebana n'ubucuruzi bw'amabuye y'agaciro. Muri iyo nama y'abaminisitiri havuzwe ko 'umwanzuro kuri icyi cyifuzo wakwitongerwa, hakabanza gusuzumwa ibimenyetso bitangwa n'abashakashatsi, ko uRwanda rwifitiye ibirombe bicukurwamo ayo mabuye, ko rero adasahurwa muri Kongo nk'uko bivuvugwa'.

    Kimwe mu bihugu byashyize mu gaciro bikanga kugwa mu kinyoma cya Kongo n'Ububiligi, ni Luxembourg, yari ihagarariwe na Bwana Xavier Bettel, akaba yagaragaje ko munyangire n'amarangamutima ashingiye ku nyungu za bamwe, bidashobora kuzana amahoro muri aka karere.

    Minisitiri w'Ububanyi n'Amahanga w'Ububiligi, Maxime Prévot, unatyaye cyane mu gusabira uRwanda ibihano, yabwiye itangazamakuru ko 'yatunguwe, akanababazwa' n'uko iyo nama itashimangiye ishyirwa mu bikorwa ry'ibihano ku Rwanda kuko kwima agaciro ibyifuzo bw'abadepite bisuzuguje Umuryango w'Ubumwe bw'Ibihugu by'Uburayi.

    Hari abanyapolitiki b'abanyaburayi, nka Senateri Alain Destexhe wo muri Sena y'Ububiligi, bagaya cyane imyitwarire y'Ububiligi mu kibazo cy'amakimbirane ari muri aka Karere k'Ibiyaga Bigari, icyo gihugu cyirengagije ko ari cyo nyirabayazana w'intambara muri aka karere.

    Hari n'abandi basanga, nk'uko hari abasakuza ngo nihubahirizwe ubusugire bwa Kongo, ubusugire bw'uRwanda nabwo bukwiye kwitabwaho, iyo Kongo igasabwa guhagarika imikoranire n'abajenosideri ba FDLR.

    Guverinoma y'uRwanda ntiyahwemye gusobanura ko imfashanyo n'ibikangisho by'ibihano bitarusha agaciro ubuzima bw'Abanyarwanda, ndetse mu cyumweru gishize ruhagarika amasezera y'ubufatanye hagati rwari rufitanye n'Ububiligi.

    Abahanga muri politiki mpuzamahanga bafite impungenge ko ibihano bishobora kuba nko gusuka peteroli mu muriro, kuko byatuma ibintu birushaho kudogera muri aka karere, aho kubonerwa umuti. Bagira bati:'Iyo ibihano biza kuba igisubizo, intambara ya Kongo iba yararangiye kera, kuko nta gihe ibihugu byiyita ibihangange bitafatiye ibihano abantu banyuranye, kenshi banarengana'.

    The post Abanyaburayi bose siko bakurikira buhumyi ibinyoma bya Kongo n'Ububiligi appeared first on RUSHYASHYA.

    Source : https://rushyashya.net/abanyaburayi-bose-siko-bakurikira-buhumyi-ibinyoma-bya-kongo-nububiligi/?utm_source=rss&utm_medium=rss&utm_campaign=abanyaburayi-bose-siko-bakurikira-buhumyi-ibinyoma-bya-kongo-nububiligi

  • BPR Bank yamuritse ikirango gishya cy'isabukuru y'imyaka 50 inafungura ishami ryihariye – #rwanda #RwOT

    Ibikorwa byo gutangira kwizihiza iyo sabukuru byabaye ku itariki 21 Gashyantare 2025 bibera i Kigali ku cyicaro gikuru cya BPR Bank Rwanda Plc, ari na ho hafunguwe iryo shami.

    Ni umuhango witabiriwe n'abayobozi ba banki, abakiliya, abanyamigabane, abakozi bayo n'abandi bafatanyabikorwa.

    Ibyo birori kandi ni intangiriro y'ibikorwa binyuranye bizaranga uyu mwaka byo kwizihiza iyo sabukuru bizibanda ku kwita ku bakiliya ba BPR Bank Plc aho bari hose.

    Umuyobozi Mukuru wa BPR Bank Rwanda Plc, Mutesi Patience, yavuze ko BPR Bank yavutse ari koperative igenda itera imbere ku buryo ubu ifite abakozi barenga 1000 n'abanyamigabane barenga ibihumbi 500.

    Yahamije ko uwo musaruro mwiza ubaha imbaraga zo gukomeza gukora byinshi ku buryo mu myaka 50 iri imbere bizeye kuzatanga umusanzu ukomeye mu iterambere ry'Igihugu.

    Ati 'Dushaka gutanga umusanzu uhoraho mu iterambere ry'ubukungu bw'u Rwanda. U Rwanda ni Igihugu kiri gutera intambwe igaragara mu iterambere ry'ubukungu kandi twizeye gukomeza kuba umufatanyabikorwa uhoraho nk'imwe mu mabanki akomeye mu gihugu.'

    Yongeyeho 'Tuzakomeza ishoramari mu buhinzi, inganda, mu gutanga serivise n'ahandi henshi mu rwego rwo kuzamura ubushobozi bw'abantu bacu[…] Tuzakomeza kandi guhanga udushya nka banki kuko kuva BPR yakwihuza na KCB twakoze ishoramari rifatika mu ngeri zinyuranye kandi twagura 'system' ya banki yacu.'

    Umuyobozi w'Inama y'Ubutegetsi ya BPR Bank Rwanda Plc, Rubagumya George, yavuze ko mu myaka itatu ishize ibikorwa bya banki byagutse na serivisi irushaho kunogera abakiliya.

    Ati 'Twubatse ikoranabuhanga ku buryo nta mukiliya waza udukeneyeho serivise tatashobora kumuha.Twishimira kandi ko twafashije Leta y'u Rwanda gushyira amafaranga menshi hamwe mu kubaka Ikibuga cy'Indege cya Bugesera. Ibyo bishimangira ingufu dufite kuko twabashije guhuza amafaranga ya BPR na KCB bituma nta mukiliya tutabasha guha serivisi.'

    Sebera Antoine umaze imyaka irenga 16 ari umukiliya wa BPR Bank Rwanda Plc yavuze ko serivisi zayo zihuta kuko kuva yafunguza konti atigeze ajya mu yindi banki by'umwihariko akishimira uburyo yagiye ahabwa inguzanyo z'igihe gito n'iz'igihe kirekire byihuse bikamufasha gutera imbere.

    Ishami rya 'Platinum' ryafunguwe na BPR Bank, rigenewe abakiliya b'imena mu rwego rwo kubaha serivise zihuse kandi zitangiwe hamwe.

    Bivuze ko abo bakiliya bazajya bakirwa byihariye ku buryo bashobora kubitsa, kubikuza, kwaka inguzanyo n'izindi serivise zose za banki muri iryo shami kandi bagataha bahawe serivise zose bashakaga.

    BPR Bank Rwanda Plc yatangiriye ahitwa i Nkamba mu Burasirazuba bw'u Rwanda mu 1975 ari koperative, ivamo iyahoze ari Banque Populaire du Rwanda arinayo yihuje na KCB Bank Rwanda Plc.

    BPR Bank yamuritse ikirango gishya cy’isabukuru y’imyaka 50 imaze ikorera mu Rwanda

    Abayobozi ba BPR Bank na bamwe mu bafatanyabikorwa

    Hari hateguwe impano zo guha abakiliya

    Abakozi ba BPR Bank bari babukereye

    Ubwo hasobanurwaga imikorere y’ishami rishya ryafunguwe

    Ubuyobozi bwa BPR Bank bwishimiye intambwe imaze guterwa

    Ishami rya Platinum ryafunguwe rizajya ritanga serivisi ku bakiliya b’imena

    Umuyobozi Mukuru wa BPR Bank Rwanda Plc, Mutesi Patience yavuze ko iyo banki izakomeza gushora mu nzego nyinshi zizamura ubukungu bw’abayigana n’ubw’Igihugu muri rusange

    Umuyobozi w'Inama y'Ubutegetsi ya BPR Bank Rwanda Plc, Rubagumya George yavuze ko mu myaka itatu ishize ibikorwa bya banki byagutse na serivisi irushaho kunogera abakiliya

    Amafoto: Cyubahiro Key

    Source : http://igihe.com/amakuru/u-rwanda/article/bpr-bank-yamuritse-ikirango-gishya-cy-isabukuru-y-imyaka-50-inafungura-ishami

  • Forzza Bet yasabanye n'Abanya-Musanze yitegurira gufungura amashami – #rwanda #RwOT

    Ibi byabereye mu gace ka kabiri ka Tour du Rwanda 2025 kavuye i Kigali kagasorezwa i Musanze mu mujyi. Kegukanywe na Brady Gilmore ukinira Israel Premier Tech.

    Iyi sosiyete yitabiriye iri siganwa ku nshuro ya kane, aho ihemba umukinnyi uzamuka kurusha abandi kuri buri gace.

    Mu butumwa Forzza yatangaga ku banya-Musanze, burimo gufungura ishami rishya muri aka karere n'i Burera.

    Muri iri siganwa kandi, iyi sosiyete yazanye ubukangurambaga bwa 'BikorenaForzza', uburyo bushya bwo kwishyiriraho amafaranga yo gukinira ndetse no kwibikuriza ayo watsindiye, byose bigakorwa utarinze kugana cyangwa guhamagara iduka rya Forzza Bet.

    Si ibyo gusa kuko iyi sosiyete iri no kwakira abifuza gukorana nayo, aho bahamagara 6677 bagahabwa iduka ry'ikoranabuhanga.

    Mu kiganiro yagiranye na IGIHE, Umuyobozi Mukuru wa Forzza Bet, Rutayisire Eric, yavuze ko bifuza kugira uruhare mu guhanga imirimo.

    Ati 'Ntibihagije nka sosiyeti y'abanyarwanda gucuruza gusa, ahubwo twifuza kugira uruhare mu guhanga imirimo iwacu mu Rwanda.'

    Yakomeje agira ati 'Muri Forzza kandi twita cyane ku kibazo cya bantu bahindurwa imbata n'imikino y'amahirwe, kandi twiteguye kubafasha kuva muri ibyo bibazo tunakangurira abasigaye gukina mu rugero.'

    Forzza Bet ni izina ry'ubucuruzi bwa Sosiyete ya Baron Sports Gaming Ltd, yanditse kandi ikorera mu Rwanda. Intego zayo ni ugutanga serivisi zinoze, kandi ikaba ishishikajwe no guteza imbere uruganda rw'imikino n'imyidagaduro mu Rwanda.

    Ukeneye ibindi bisobanuro uhamagara umurongo wa telefoni utishyurwa 6677 cyangwa se ukabandikira ku mbuga nkoranyambaga zabo, (X, Facebook, Instagram @Forzzagamingrwanda na WhatsApp: 0795307588).

    Forzza Bet yasabanye n’Abanya-Musanze igiye gufungurira ishami

    Vinzent Dorn wa Bike Aid, yahembwe na Forzza nk’uwahize abandi kuzamuka mu gace ka kabiri kasorejwe i Musanze

    Forzza Bet yitabiriye Tour du Rwanda ku nshuro ya kane

    Source : http://igihe.com/amakuru/u-rwanda/article/forzza-bet-yasabanye-n-abanya-musanze-yitegurira-gufungura-amashami

  • Imitwe ya politike 11 ikorera mu Rwanda yamaganye umuryango mpuzamahanga ushyigikiye abajenosideri – #rwanda #RwOT

    Byatangarijwe mu biganiro byahuje abayobozi b'imitwe ya politike yemewe mu Rwanda, kuri uyu wa 25 Gashyantare 2025.

    Imitwe ya politike irimo RPR Inkotanyi, PL, PSD, UDPR, PDI, PPC, PDC, PCR, PSP, PS Imberakuri na DGPR-Green Party, yatangaje ko yamaganye imyitwarire y'amahanga mu ntambara yo mu Burasirazuba bwa RDC, kuko abenshi bagendera mu kigare bakirengagiza amateka n'inkomoko y'ikibazo nyamara ari bo bafite uruhare rukomeye rutuma kirushaho kuremera.

    Itangazo ryashyizwe ahagaragara rigaragaza ko bamaganye umugambi wa Perezida Felix Tshisekedi, SAMIRDC, ingabo z'u Burundi, FDLR, Wazalendo n'abacanshuro b'Abanyaburayi bagamije gutera u Rwana no guhirika ubutegetsi bwarwo.

    Visi Perezida wa mbere w'Ishyaka riharanira ukwishyira ukizana, PL, Théogène Munyangeyo, yavuze ko amahanga yibasira u Rwanda ashaka gusubukura jenoside.

    Ati 'Ejobundi tubyumvise ko bashaka gusubukura umugambi wo mu 1994 wa Jenoside yakorewe Abatutsi, yari yaragiye igaragara no mu bindi byiciro mu 1959, mu kindi gihe birukana umwami banamwica ukageza ejobundi, aho ni ho bigana. Ni isubukura rya Jenoside.'

    Uyu munyapolitike yahamije ko Abanyarwanda bakwiye gushyira imbaraga mu kwiyubaka no kwigira kuko ari bwo bazakomeza kubaho ntawe bateze amaboko.

    Ati 'Tugomba kwicara nk'Abanyarwanda, wa murunga wacu wa Gihanga wahanze u Rwanda dushyire hamwe[…]dushimira Umugaba w'Ikirenga ubwirinzi yashyizeho n'abaturebera muri ubwo buryo n'ingabo z'igihugu kuko ubwo bwirinzi iyo bubayeho mwumvise ibitero amagana byabaye mu Kinigi na hehe, twige uko twitwara, uko twiyubaka nk'Abanyarwanda n'uko twiyubaka nk'ingabo kugira ngo tuzabashe kubaho kuko abo turirira ni bo baduca umutwe.'

    Perezida w'Ishyaka PPC, Dr. Mukabaramba Alvera, yashimangiye ko 80% by'ibibazo byose byugarije akarere bigirwamo uruhare n'amahanga.

    Ati 'Hari ukuri abantu batazi. Ni abo mu Rwanda ariko na bariya badutererana badutuka, baduciraho iteka badushyiriraho ibihano hari ukuri birengagiza hari n'uko batazi. Tugomba kuvuga ukuri, abo dushoboye guhura na bo bose…bagomba kumenya ukuri kw'ibibera mu Burasirazuba bwa RDC.'

    'Tugomba kwamagana umuryango mpuzamahanga kuko 80% ni wo ufite ukubomo [mu kibazo cya Congo] ni wo ufitemo imbaraga ariko tugomba no kwamagana n'abandi duhereye kuri RDC, ibintu byarayinaniye, ubuyobozi bubi, ikareba ku byayinaniye ikareka kubyomeka ku Rwanda.'

    FDLR ikiri muri RDC nta mahoro nyakuri azagerwaho

    Umunyamabanga Mukuru wa FPR Inkotanyi, Wellars Gasamagera, yavuze ko ikibazo cy'intambara muri RDC gikomoka ku mateka, ivanguramoko n'ibibazo by'ubuyobozi budashoboye kuyobora igihugu cyabo, byose bireba RDC aho kwegekwa ku Rwanda kuko ntaho ruhuriye na byo.

    Ati 'Kugira ngo bayobye uburari babijyana mu mutungo, babijyana mu busugire bw'igihugu. N'abasakuza n'abavuza induru bose ni ibyo bitwaza. Biragaruka ku muryango mpuzamahanga ugomba gusobanurirwa, ariko hari ikintu gikomeye tutagomba kwibagirwa, kwamagana umugambi wo guhirika ubuyobozi bw'u Rwanda bwashyizweho n'abaturage barwo.'

    Raporo zitandukanye zagaragaje ko ingabo za FARDC zikorana n'abarwanyi b'umutwe w'iterabwoba wa FDLR, ndetse bamaze no kwinjizwa mu ngabo z'igihugu banafatanya umugambi wo gushaka gutera u Rwanda.

    Gasamagera yavuze ko mu gihe iki gihugu cyaba kititandukanyije na FDLR bizagorana kugera ku mahoro nyakuri.

    Ati 'Biranajyana n'uko ubutegetsi bwa RDC bugomba kwitandukanya na FDLR. Igihe cyose igihari ntabwo amahoro nyayo azaboneka. Amahoro tuvuga akwiye gucishwa mu biganiro bigirwamo uruhare n'imiryango y'akarere, ibikorwa n'ibihugu. Ibiganiro ni bwo buryo bwonyine bwo kurangiza iriya ntambara.'

    Uyu munyapolitike yamaganye ibihugu bikomeza gukangisha ibihano ku Rwanda avuga ko 'Ibihano nta kibazo na kimwe bikemura ahubwo bituma Congo irushaho kwinangira ahubwo aho kugira ngo ikemure ikibazo nyakuri bigatu n'imbaraga zirimo gushyirwa mu gushakisha amahoro zitagerwaho kubera iyo myitwarire ya Congo yo kwiruka inyuma y'abo ishaka ko baduha ibihano.'

    Muhakwa Valens na we wo mu Ishyaka PSD yavuze ko ibihugu byemeje ko Jenoside idakwiye kongera kuba ukundi bishobora kwisanga mu mutego wo gufatanya n'abayikoze.

    Ati 'Niba harasinywe amasezerano mpuzamahanga yo kurwanya Jenoside uyu munsi amahanga akaba ari yo ari gufasha abakoze Jenoside yakorewe Abatutsi, dumva ari umutego ukomeye bashobora kugwa, bityo tubibutse ko badakwiriye kongera kugwa muri uwo mutego kuko nk'uko bigaragara ingabo za MONUSCO zifatanya na FDLR kurwanya M23 bafite uburenganzira barwanira ndetse n'ingengabitekerezo ya Jenoside iri kugenda ikwirakwizwa muri aka karere amahanga ntagire icyo abikoraho.'

    Iyi mitwe ya Politike yasabye Perezida Felix Tshisekedi guharika 'ubufatanye bwose n'umutwe wa FDLR ugizwe n'abakoze Jenoside yakorewe Abatutsi mu Rwanda mu 1994, ndetse ukaba umutwe wubakiye ku ngengabitekerezo ya jenoside.'

    Biyemeje gushyigikira ubuyobozi bw'u Rwanda

    Abasabira u Rwanda ibihano bakwirakwiza ibinyoma ko u Rwanda rwohereje ingabo muri RDC, ariko rwo rwabihakanye kenshi rugaragaza ibimenyetso bifatika, icyakora ruvuga ko rutazavanaho ubwirinzi bwashyizwe ku mipaka iruhuza na Repubulika Iharanira Demokarasi ya Congo.

    Aba banyapolitike bose bagaragaje ko bashyigikiye ingamba igihugu cyafashe zo kwirindira umutekano.

    Gasamagera ati 'Ndasaba ko dushyigikira twivuye inyuma Perezida wacu ku bikorwa byose arimo gukora kugira ngo ibi bibazo tubisohokemo tubirekere ba nyirabyo niba badashaka ko tubafasha ariko ntibigire ingaruka ku gihugu cyacu byaba mu bukungu, mu mibereho myiza cyangwa politike, tumushyigikire mu byo akora uyu munsi.'

    Dr. Mukabaramba yavuze ko iki gihe ari cyo Abanyarwanda bakwiriye kugaragariza Perezida Kagame ko bari kumwe na we.

    Ati 'Abantu bose badutererana muri iyi ntambara na bo tugomba kubamagana, nkaba ngira ngo tuvuge ko dushyigikiye ubuyobozi bwacu, perezida wacu atari we bagomba gusiga ibyondo, turi kumwe na we.'

    Perezida w'Ishyaka UDPR, Pie Nizeyimana, yashimangiye ko mu gihe ibikorwa byo kwigira byaba bidashyizwemo ingufu, ari bwo amahanga azajya akomeza gukangiza igihugu ibihano.

    Ati 'Nitutigira ni bwo bazadukangisha za mpano, za nkunga z'amahanga. Ni gute nk'imitwe ya politike dusigasira ubukungu bwacu?'

    Nizeyimana yavuze ko abafite imitwe ya politike y'inshuti mu mahanga bakwiye kujya bayiganiriza kugira ngo nijya no ku butegetsi izabe ifite amakuru nyakuri y'inkomoko y'ibibazo byugarije u Burasirazuba bwa RDC.

    U Rwanda rugaragaza ko rushyigikiye inzira y'ibiganiro yashyizweho n'inzego za Afurika, by'umwihariko ibiganiro bya Nairobi na Luanda byahujwe kuko ari byo bizavamo umuti urambye w'ikibazo.

    Abayoobozi b’imitwe ya politike yemewe mu Rwanda bamaganye amahanga ashyigikiye abajenosideri

    Biyemeje gushyigikira ubuyobozi bw’u Rwanda mu rugamba rwo kumvisha amahanga intandaro y’ikibazo

    Source : http://igihe.com/amakuru/u-rwanda/article/imitwe-ya-politike-11-ikorera-mu-rwanda-yamaganye-umuryango-mpuzamahanga

  • Igisubizo cy'u Rwanda ku cyemezo cy'u Bwongereza cyo kubogamira ku ruhande rwa RDC – #rwanda #RwOT

    MINAFFET yatangaje ko bitumvikana gutekereza ko u Rwanda rushobora gushyira abaturage barwo mu kaga no kudebeka ku mutekano warwo, igaragaza ko izo ngamba ntacyo zafasha Congo mu bibazo irimo ndetse nta n'uruhare zatanga mu kugera ku gisubizo kirambye cy'ibibazo by'umutekano wo mu Burasirazuba bwa RDC.

    Ku wa 25 Gashyantare 2025 ni bwo u Bwongereza bwasohoye itangazo rikubiyemo ingingo zirandukanye ariko zishinja u Rwanda kugira uruhare mu ntambara ihuje umutwe wa M23 uharanira uburenganzira Abanye-Congo bimwe n'igihugu cyabo n'ihuriro ry'ingabo za RDC.

    Ni mu itangazo ryashyizwe hanze n'Ibiro bya Guverinoma y'u Bwongereza bishinzwe Ububanyi n'Amahanga, Commonwealth n'Iterambere, FCDO.

    U Bwongereza bukomeza buvuga ko bugiye gufata ingamba zitandukanye zirimo guhagarika kohereza abayobozi bakuru babwo mu nama zitandukanye zibera mu Rwanda no guhagarika ibijyanye no guteza imbere ubucuruzi hagati yabwo n'u Rwanda.

    Izo ngamba kandi zirimo guhagarika inkunga mu bijyanye n'ubukungu u Bwongereza bwahaga u Rwanda, gukorana n'abandi bafatanyabikorwa barwo mu kurebera hamwe ibindi bihano bishya byafatirwa u Rwanda no guhagarika ubufatanye mu bya gisirikare hagati y'u Bwongereza n'u Rwanda.

    Mu itangazo FCDO yakomeje iti 'U Rwanda rushobora kugira impungenge ku mutekano warwo ariko ntabwo byakwihanganirwa kuzikemura hifashishijwe ingamba za gisirikare. Igisubizo rukumbi gishoboka mu guhosha amakimbirane ni igishingiye ku ngamba za politiki. Turasaba RDC kugirana ibiganiro bidaheza n'umutwe wa M23.'

    Minisiteri y'Ububanyi n'Amahanga y'u Rwanda yatangaje ko izo ngamba zafashwe n'ab'i Londres mu guhosha intambara yo mu burasirazuba bwa RDC ari uburyo bweruye bwo kubogamira ku ruhande rumwe, ndetse ari ibintu byo kwicuza.

    Iyi minisiteri yagaragaje ko bitangaje kubona bitekerezwa ko u Rwanda rwashyira ituze ry'abaturage barwo mu kaga ndetse rukaba rwanadebeka ku mutekano warwo.

    Iti 'Izo ngamba nta kintu zafasha RDC ndetse nta n'uruhare zatanga mu kugera ku gisubizo kirambye ku bibazo by'umutekano muke biri kubera mu Burasirazuba bwa Congo, hisunzwe uburyo bwa politiki.'

    Yatangaje ko Guverinoma ya Congo ari yo ifite byinshi byo gusubiza kurusha urundi ruhande urwo ari rwo rwose rwaba urw'imbere muri iki gihugu cyangwa mu Karere. MINAFFET igaragaza ko nubwo bimeze bityo Kinshasa ikomeza kwitarutsa ibikorwa bibisha byayo ku mpamvu zigaragarira buri wese.

    Minisiteri y'Ububanyi n'Amahanga y'u Rwanda yakomeje ivuga ko uko gukomeza kutaryoza Guverinoma ya RDC ibikorwa byayo ikatajemo birimo kugirira nabi no gutera abaturage bayo, no gutera ibisasu ku bice bituyemo Abanyamulenge bo mu Ntara ya Kivu y'Amajyepfo, bituma Kinshasa ikomeza gukomera ku ngingo yo kwifashisha ingamba za gisirikare, bigatuma intambara ikomeza gufata indi ntera n'abaturage bakabizahariramo.

    Iti 'U Rwanda ruzakomeza kwishingikiriza no gukaza ingamba zarwo z'umutekano nubwo RDC n'umuryango mpuzamahanga bikomeje kutazemera cyangwa ngo bibe byazitanga. Ibi bibazo by'umutekano muke bigaragara ko bikomeje kungura mu buryo buziguye cyangwa butaziguye, umubare munini w'abafite aho bahuriye n'intambara.'

    Hagaragajwe kandi ko u Rwanda rurajwe ishinga mu gukorana n'ibihugu bitandukanye ku ngingo yo kwimakaza inzira y'ibiganiro iyobowe n'Abanyafurika ndetse Igihugu kikanahamagarira umuryango mpuzamahanga kuyishyigikira na cyane ko ari yo izageza ku gisubizo kirambye.

    Inshuro nyinshi u Rwanda rwakunze kugaragaza ko umutekano warwo ugeramiwe bigizwemo uruhare n'imvugo za Perezida wa RDC, Félix Tshisekedi, wakunze kuvuga ko azatera u Rwanda agakuraho ubutegetsi buriho.

    Ibyo kandi uyu Mukuru w'Igihugu yabifatanyije no gutera inkunga abajenosideri bo muri FDLR anabinjiza mu gisirikare cy'igihugu cye, ku mugambi wo kubafasha kugaruka kurangiza umugambi wabo wa Jenoside.

    Mu minsi ishize ubwo umutwe wa M23 wigarurigaga Umujyi wa Goma, hagaragajwe uburyo RDC yari yarawutundiyemo ibikoresho bya gisirikare bihambaye ku buryo bugaragarira buri wese ko ibyo bikoresho bitari ibyo kurwanya M23, umutwe muto ugizwe n'Abanye-Congo baharanira uburenganzira bwayo.

    Icyakoze ibihugu bimwe ndetse byagize uruhare mu gukurura ayo makimbirane cyangwa biyungukiramo mu buryo bumwe cyangwa ubundi, byakomeje kwirengagiza impungenge z'u Rwanda ahubwo bigakomeza kurwegekaho ibibazo bya RDC bikwiriye gukemurwa n'abayobozi b'icyo gihugu.

    Minisitiri w’Ububanyi n’Amahanga, Olivier Nduhungirehe

    Source : http://igihe.com/amakuru/u-rwanda/article/u-rwanda-rwasubije-u-bwongereza-bwifuza-ko-rushyira-abaturage-barwo-mu-kaga

  • Polisi yafunze abakekwaho gutera amabuye imodoka y'abafana ba APR FC – YEGOB #rwanda #RwOT

    Polisi y'u Rwanda mu Ntara y'Amajyepfo yemeje ko yataye muri yombi abasore babiri bakekwaho gutera amabuye imodoka yari itwaye abafana ba APR FC, ikameneka ikirahure kimwe.

    Ibi byabaye mu ijoro ryo ku Cyumweru, tariki ya 23 Gashyantare 2025, ubwo abafana ba APR FC bavaga i Huye berekeza i Kigali nyuma y'umukino ikipe yabo yatsinzwemo na Mukura VS igitego 1-0. Ibi byabereye mu Karere ka Nyanza, mu Murenge wa Busasamana, Akagari ka Kibinja, aho imodoka yabo yatewe amabuye.

    Umuvugizi wa Polisi mu Ntara y'Amajyepfo, SP Emmanuel Habiyaremye, yavuze ko hafashwe abasore babiri bafite imyaka 18 na 16 bakekwaho kugira uruhare muri ubwo bugizi bwa nabi. Abo basore bafungiye kuri Sitasiyo ya Polisi ya Busasamana mu gihe iperereza rigikomeje. Yanasabye abantu kwirinda ibikorwa nk'ibi kuko inzego z'umutekano ziteguye gukumira uwashaka gukora icyaha.

    Umwe mu bafana wari muri iyo modoka yavuze ko bageze muri Nyanza bagasanga urubyiruko rwinshi ruhagaze mu muhanda, rukabatera amabuye aho abaturage batabafashije ahubwo bakabavugiriza induru. Yakomeje avuga ko umwe mu bafana yakomeretse bikomeye naho undi akomeretswa byoroheje. Polisi yahise ihagera ikabuza ko habaho imirwano ndetse inaherekeza iyo modoka kugira ngo abafana babashe gusohoka amahoro mu Karere ka Nyanza.

    Source : https://yegob.rw/polisi-yafunze-abakekwaho-gutera-amabuye-imodoka-yabafana-ba-apr-fc/

  • Nyuma yo gusuzumwa na muganga, Rayon Sports imaze gutangariza abakunzi bayo amezi rutahizamu wayo, Fall Ngagne agiye kumara adakina – YEGOB #rwanda #RwOT

    Rayon Sports yemeje ko rutahizamu wayo, Umunya-Senegal Fall Ngagne, atazongera gukina muri iyi shampiyona ya 2024-2025 nyuma yo kugira imvune ikomeye ku ivi ry'iburyo. Uyu mukinnyi wakinnye imikino 14 muri shampiyona y'uyu mwaka, akaba ayoboye abatsinze ibitego byinshi (13), yagiriye iyi mvune mu mukino Rayon Sports yakinnye na Amagaju FC ku wa Gatandatu ushize.

    Fall Ngagne yagiye kwivuza aho yahuye n'umuganga w'inzobere mu kuvura amagufa (Orthopedist), maze asanga imitsi izwi nka cruciate ligaments (ligaments croisés) zacitse. Biteganyijwe ko azabagwa ku wa Gatandatu, nyuma yaho akaba agomba kumara hagati y'amezi atandatu n'amezi icyenda adakina.

    Iyi mvune ni igihombo gikomeye kuri Fall Ngagne ubwe ndetse no kuri Rayon Sports, kuko yari umwe mu bakinnyi bayifashaga cyane mu gutsinda ibitego. Uyu mukinnyi yiyongereye kuri Muhire Kevin, na we udashobora gukinira iyi kipe kubera imvune, ibintu bishobora kugira ingaruka ku mikinire ya Rayon Sports mu mikino isigaye ya shampiyona.

    Source : https://yegob.rw/nyuma-yo-gusuzumwa-na-muganga-rayon-sports-imaze-gutangariza-abakunzi-bayo-amezi-rutahizamu-wayo-fall-ngagne-agiye-kumara-adakina/

  • Ubwishingizi bw'umutungo mu byo Prime Insurance yimakaje muri Tour du Rwanda 2025 – #rwanda #RwOT

    Aha, niho ikigo gifite uburambe mu gutanga serivisi z'ubwishingizi, Prime Insurance Ltd, kizira.

    Muri iki gihe cya Tour du Rwanda 2025 iki kigo kitabiriye ku nshuro ya munani, mu byo gishyize imbere harimo gusobanura no gutanga ubwishingizi bw'imitungo itimukanwa, ubw'ubuvuzi n'ubw'ibinyabiziga.

    Umuyobozi ushinzwe Ubucuruzi muri Prime Insurance, Mike Byusa, yavuze ko banyuze muri iri siganwa mpuzamahanga ry'amagare, bari gusobanurira abaturarwanda kumenya agaciro ko kugira ubwishingizi bw'umutungo utimukanwa.

    Ati 'Kenshi abantu ntabwo baha agaciro ubwishingizi bw'umutungo by'umwihariko utimukanwa kandi nyamara dukora buri munsi ngo ejo hacu hazaza hazabe heza. Ubwo wakwibaza uko bizagenda umunsi ibyago byaje.'

    Yakomeje agaragaza ko uretse ubwo, hari n'ubw'ubuvuzi bufasha kwivuriza mu mahanga.

    Ati 'Dufite n'ubwishingizi bw'ubuvuzi, bugufasha kwivuriza mu bihugu byo mu karere, mu Buhinde ndetse na Turikiya.'

    Muri Tour du Rwanda 2025, Prime Insurance yitiriwe agace ka kabiri kiswe 'Ntakibazo na Prime (*177#)'. Aka gace kavuye i Kigali kagasorezwa i Musanze, kegukanywe na Brady Gilmore wa Israel Premier Tech.

    Uretse ibyo kandi, iyi sosiyete yimakaje ikoranabuhanga yavuguruye gahunda yayo, aho umukiriya yisabira serivisi akanze *177#.

    Umukiliya mushya ashobora kwisabira ubwishingizi bwose ashaka, bitabaye ngombwa ko afata umwanya, ajya ku ishami rimwegereye.

    Iyi serivisi ifasha umukiliya kubona abafatanyabikorwa bayo muri serivisi zijyanye n'ubuzima n'imodoka (Pharmacie n'ibitaro)

    Si ibyo gusa kuko ushobora no kumenyekanisha impanuka ukoresheje ubwo buryo bityo ugatabarwa byihuse.

    Hari kandi ubwishingizi bw'ingendo bwo mu mahanga bukoresheje indege (Travel Insurance) aho wishingirwa mu gihe ugize ikibazo mu mahanga nko kurwara, gutakaza ibyawe by'agaciro(luggage) cyangwa gukerererwa biturutse ku ndege aho ufashwa gushakirwa icumbi mu gihe utegereje indege.

    Muri Tour du Rwanda, Prime Insurance Ltd ihemba umukinnyi mwiza muto kuri buri gace.

    Kugeza ubu, Prime Insurance itanga ubwishingizi bw'igihe gito busaga mirongo ine bukubiyemo ubw'ibinyabiziga by'ubwoko bwose, ubw'inkongi z'umuriro, ububungabunga umutungo, ubw'imizigo, ubw'impanuka zonona umubiri, ubw'imirimo ijyanye n'inyubako z'ingeri, ubw'ingendo zo mu kirere, ubwo kwivuza, n'ubundi butandukanye.

    Prime Insurance yashinzwe mu 1995, icyo gihe yitwaga COGEAR Ltd. Ni ikigo cy'ubwishingizi rusange cyemewe na Banki Nkuru y'u Rwanda ndetse kikaba cyaranahawe ikirangantego cy'ubuziranenge muri serivisi (ISO 900-2015) gitangwa n'Ikigo Gishinzwe Ubuziranenge (RSB).

    Kuva icyo gihe kugeza ubu gifite amashami arenga 60 mu gihugu n'aba-agent basaga 80, hagamijwe kwegereza Abanyarwanda serivisi zinoze kandi zihuse. Mu gihe kandi hari ukeneye serivisi atarinze kubageraho akoresha umurongo utishyurwa (1320).

    Umuyobozi ushinzwe Ubucuruzi muri Prime Insurance, Mike Byusa, yambika umwambaro Adria Pericas wabaye umukinnyi muto mwiza

    Adria Pericas wa UAZ wabaye umukinnyi muto mwiza yahembwe na Prime Insurance

    Brady Gilmore wa Israel Premier Tech yahize abandi agera i Musanze ari uwa mbere

    Muri iyi Tour du Rwanda, Prime Insurance yimakaje ubwishingizi bw'umutungo

    Prime Insurance igendera isobanurira abitabiriye Tour du Rwanda serivisi zayo

    Prime Insurance yitabiriye Tour du Rwanda ku nshuro ya munani

    Prime Insurance ikorera muri MIC mu mujyi rwagati

    Amafoto: Shumbusho Djasiri

    Source : http://igihe.com/amakuru/u-rwanda/article/ubwishingizi-bw-umutungo-mu-byo-prime-insurance-yimakaje-muri-tour-du-rwanda

  • INES-Ruhengeri yatangije ikigo cyo guharanira uburenganzira bwa muntu n'iterambere rirambye – #rwanda #RwOT

    Ni ikigo cyatangijwe ku wa 24 Gashyantare 2025, muri INES-Ruhengeri, kikazafasha abantu gusobanukirwa uburenganzira bwabo no kubukoresha neza bibaganisha ku iterambere rirambye.

    Ni igitekerezo cyazanwe bwa mbere n'umwarimu wigisha amategeko, Dr Nfor Nyambi, ku bufatanye na INES-Ruhengeri.

    Uyu mwarimu avuga ko yatekereje gushinga iki kigo nyuma yo kubona ibigo nk'ibi bikora neza muri kaminuza zitandukanye muri Afurika, cyane cyane muri Kaminuza ya Pretoria.

    Yavuze ko mu Rwanda usibye ibigo bihari muri Kaminuza y'u Rwanda, hari icyuho mu zindi kaminuza.

    Ni muri urwo rwego INES-Ruhengeri yafashe iya mbere mu gutangiza CHRIS, hagamijwe guteza imbere uburenganzira bwa muntu n'iterambere rirambye.

    Dr. Nfor Nyambi wagizwe n'Umuyobozi Mukuru wa CHRIS, yasobanuye ko iki kigo kigamije guteza imbere uburenganzira bwa muntu binyuze mu nkingi enye z'ingenzi zirimo kwigisha no kwiga, ubushakashatsi, ubuvugizi no gufatanya n'imiryango y'abaturage.

    Ati 'Uburenganzira bwa muntu ni inshingano ya buri wese. CHRIS izagira uruhare mu kumvikanisha uburenganzira bwa muntu no gufasha abaturage kumenya uburenganzira bwabo.'

    CHRIS igizwe n'abanyeshuri biga amategeko muri INES-Ruhengeri, izabafasha mu gukora ubushakashatsi bushingiye ku bimenyetso bifatika, gutanga amahugurwa, ndetse inakorane n'inzego zitandukanye mu rwego rwo kurengera uburenganzira bwa muntu.

    Initezweho kuzagira uruhare rukomeye mu guteza imbere imibereho myiza y'abaturage, gukorana na leta mu igenamigambi rijyanye n'amategeko yo kurengera no gusigasira uburenganzira bwa muntu.

    Umuyobozi Mukuru wa Komisiyo y'Uburenganzira bwa Muntu, Umurungi Providence yavuze ko ari igikorwa gishimishije kandi bashyigikiye kuko babitezeho umusanzu ukomeye mu gukomeza guteza imbere ibikorwa biharanira uburenganzira bwa muntu.

    Ati 'Ni urubyiruko rw'abanyeshuri bakiri ku ntebe y'ishuri, ni bo banyamategeko b'ejo hazaza, ni bo bazadufasha mu muryango nyarwanda mu bijyanye no kwigisha no kumvikanisha ibijyanye n'uburenganzira bwa muntu.'

    Umuyeshuri uyoboye urugaga rw'abiga amategeko muri INES-Ruhengeri, Tim Nkurunziza, yavuze ko CHRIS izabafasha mu gukora ubushakashatsi banarusheho kumenya uburyo bwiza bwo guharanira uburenganzira bwa muntu.

    Abarimu n'abanyeshuri bagize ishami ry'amategeko muri INES-Ruhengeri, ni bo bagize umubare munini w'abanyamuryango ba CHRIS.

    CHRIS ifite komite ngishwanama igizwe n'inzobere mu burenganzira bwa muntu zitandukanye, haba izo muri Afurika no ku rwego mpuzamahanga.

    Muri abo harimo Prof. Antoinette Elia, impuguke mu by'uburenganzira bwa muntu ukomoka muri Espagne, na Me Felix Nkongo Agbobala, umwe mu banyamategeko bazwi cyane muri Cameroun mu bijyanye n'uburenganzira bwa muntu n'abandi.

    Muri INES-Ruhengeri hatangijwe ikigo gishinzwe guharanira uburenganzira bwa muntu

    Michel Ndayambaje waturutse muri ActionAid Rwanda na we yari yitabiriye igikorwa cyo gutangiza ikigo cyo ku burenganzira bwa muntu muri INES-Ruhengeri

    Muri INES-Ruhengeri gatangijwe ikigo cyo guharanira uburenganzira bwa muntu n'iterambere rirambye

    Impuguke mu kurengera uburenganzira bwa muntu zasangije ubunararibonye abanyeshuri bo muri INES-Ruhengeri

    Umuyobozi Mukuru wa CHRIS, Dr Nfor Nyambi avuga ko yatekereje gushinga iki cyibanda ku burenganzira bwa muntu nyuma yo kubona ibigo nk'ibi bitanga umusaruro muri kaminuza zitandukanye muri Afurika

    Umuyobozi Mukuru wa INES-Ruhengeri, Padiri Dr Baribeshya Jean Bosco, yavuze ko ikigo batangije kije gufasha abanyeshuri gusobanukirwa iby’uburenganzira bwa muntu mu buryo bwisumbuye

    Umuyobozi Mukuru wa GER-Rwanda, Innocent Musore na we yari yaje kwifatanya n’urubyiruko rwo muri INES-Ruhengeri

    Umuyobozi Mukuru wa Komisiyo y'Uburenganzira bwa Muntu, Umurungi Providence aganiriza abitabiriye

    Source : http://igihe.com/amakuru/u-rwanda/article/ines-ruhengeri-yatangije-ikigo-cyo-guharanira-uburenganzira-bwa-muntu-n

  • Abashoferi ba bisi bagiye kujya bapimwa ibiyobyawenge – #rwanda #RwOT

    Ibi byatangajwe ku wa 25 Gashyantare 2025, n'Umuvugizi wa Polisi y'u Rwanda, ACP Boniface Rutikanga, mu kiganiro yagiranye na RBA, cyareberaga hamwe igitera ubwiyongere bw'impanuka zo mu muhanda n'ingamba zifatwa mu kuzirinda.

    ACP Rutikanga yavuze ko iyi gahunda iziyongera ku buryo bwari busanzwe buriho bwo gupima ibisindisha.

    Yavuze ko uzafatwa yanyoye ibiyobyabwenge cyangwa yarigeze kubifata, ashobora kwamburwa uburenganzira bwo gutwara abagenzi.

    Yagize ati 'Nta n'integuza, ubu turashaka uburyo abashoferi bapimwa, si inzoga gusa, n'ibindi biyobyabwenge kuko ni yo waba warabinyoye mu myaka itatu ishize uyu munsi biragaragara. Niba hari umuntu uziko abifata, ni ikibazo, kuko uwo bizagaragaraho bizamuhenda kugaruka mu muhanda.'

    Yakomeje agira 'Turi gupanga indi gahunda y'uburyo twakurikirana abashoferi batatubona, ntibizabatangaze ndi umugenzi muri bisi kandi ndi n'umupolisi.'

    ACP Rutikanga yavuze ko bazakomeza gushyiraho uburyo bwo kugenzura imyitwarire y'abashoferi itamenyerewe bijyanye no gukorana na ba nyiri sosiyete zitwara abantu n'Urwego Ngenzuramikorere, RURA.

    Mu minsi ishize mu Rwanda hakunze kugaragara impanuka ku byinshi ndetse zigahitana abantu. Iherutse guhitana benshi ni iyabaye ku wa 11 Gashyantare 2025, ibereye mu Murenge wa Rusiga Akarere ka Rulindo, igahitana abantu 20 abandi benshi bagakomereka.

    Yari iya bisi nini ya sosiyete International Express, yavaga mu Mujyi wa Kigali yerekeza mu Mujyi wa Musanze, bivugwa ko yari itwaye abagera kuri 52.

    Impanuka zo mu muhanda ni ikibazo gihangayikishije Isi yose bitewe n'uko ziri mu biza ku isonga mu guhitana ubuzima bw'abantu benshi ku Isi, aho buri mwaka abarenga miliyoni bahitanwa na zo, abandi zikabakomeretsa.

    Kuva muri Mutarama kugeza mu Ukuboza 2024, mu Rwanda habaye impanuka zo mu muhanda zisaga 9000 zirimo izahitanye ubuzima bw'abantu 350.

    Umuvugizi wa Polisi y'u Rwanda, ACP Boniface Rutikanga, hagiye gutangira gupima abashoferi b'imodoka zitwara abagenzi ibiyobyabwenge, mu gukaza ingamba zo gukumira impanuka zo mu muhanda

    Source : http://igihe.com/amakuru/u-rwanda/article/abashoferi-ba-bisi-bagiye-kujya-bapimwa-ibiyobyawenge