Author: webrwanda

Mbonyunkiza wirukanwe muri Amerika ku wa 4 Werurwe 2025, yaburanishijwe adahari n'Urukiko Gacaca rwa Nyakabanda mu 2007, rumuhamya kugira uruhare muri Jenoside yakorewe Abatusi mu 1994.

Uyu mugabo wari inshuti magara ya Ngirumpatse Mathieu, yanabaye umutangabuhamya mu rubanza rwa Édouard Karemera, Mathieu Ngirumpatse, Joseph Nzirorera rwaburanishirijwe Arusha mu 2005.

Abarokotse Jenoside yakorewe Abatutsi mu Murenge wa Nyakabanda batangaje ko Mbonyunkiza yari umwe mu bayoboye Interahamwe mu Murenge wa Nyakabanda, aho yari afite bariyeri hafi y'ahazwi nka Baoba.

Mbonyunkiza ngo ni umwe mu bashishikarije Interahamwe kwica Abatutsi, ndetse ngo ni we wari ufite urutonde rw'abagombaga kwicwa bose mu Murenge wa Nyakabanda.

Umwe mu barokotse Jenoside yakorewe Abatutsi mu 1994 witabiraga Inkiko Gacaca, yabwiye RBA ko umunsi Mbonyunkiza yagombaga kuburana atigeze ahagera, kuva ubwo ntibongera kumenya aho aherereye, ariko kuba yongeye gufatwa ari ari inkuru nziza kuko ubutabera bugiye gutangwa.

Yagize ati 'Napoleon yari umurwanashyaka wa MRND, ari umwe mu bagize uruhare mu kubaka umutwe w'Interahamwe, yari mu bashishikirije abasore b'Abahutu kwica Abatutsi, yari afite abo akoresha kandi yari afite ijambo kuko yari anafite urutonde rw'abagomba kwicwa bose mu Murenge wa Nyakabanda.'

Umuvugizi w'Ubushinjacyaha Bukuru bw'u Rwanda, Nkusi Faustin yavuze ko Mbonyunkiza agomba kumenyeshwa icyemezo yafatiwe na Gacaca, yabishaka agasubirishamo iburanisha kuko rwabaye adahari.

Yagize ati 'Umuntu waburanishijwe adahari iyo agarutse icyemezo arakimenyeshwa agahabwa uburenganzira bwo kugisubirishamo. Ni iminsi 30 ahabwa kuva uyu munsi yo gusubirashamo icyo cyemezo cya Gacaca kugira ngo atangire izindi nzira z'amategeko.'

Uyu mugabo akigera ku Kibuga cy'Indege cya Kigali yakiriwe n'Ubushinjacyaha Bukuru bw'u Rwanda ahita ajyanwa muri Gereza ya Nyarugenge kugira ngo atangire kurangiza igihano yakatiwe.

Mbonyunkiza yirukanwe muri Amerika nyuma yo kurangiza igihano cy'imyaka 15 yari yarakatiwe kubera icyaha cyo gufata ku ngufu.

Uyu mugabo yirukanywe muri Amerika nyuma yo gufungwa imyaka 15

Yageze i Kigali ahita atabwa muri yombi ngo aryozwe uruhare rwe muri Jenoside yakorewe Abatutsi

Akihagera yahise amenyeshwa ko Inkiko Gacaca zamuhamije uruhare muri Jenoside

Yabigarutseho ku wa 5 Werurwe 2025, ubwo basezereraga abarenga 4900 bagororerwaga mu Kigo Ngororamuco cya Iwawa.

Aba basore bari bamaze imyaka irenga ibiri bagororwa bakanigishwa imyuga izabafasha kwibeshaho mu buzima busanzwe.

Imibare igaragaza ko mu bari mu bigo ngororamuco 23,8 % babigaruwemo kuva ku nshuro ya kabiri kuzamura, abenshi bagatanga impamvu zo kutabona imirimo yatuma bibeshaho badahungabanyije umudendezo wa rubanda.

Minisitiri Dr. Patrice Mugenzi, yatangaje ko abavuye kugororwa bagomba kwakirwa n'imiryango hanyuma bagahuzwa n'amahirwe y'akazi ahaboneka.

Yagize ati 'Icyakozwe rero ni uko mu ntara zose, mu turere twose, abantu bose basohoka bafite umuryango bajyamo n'ibyo bajya gukora, bahereye ku bumenyi bakuye aha tuzabahuza n'amahirwe y'akazi ari mu turere twabo.'

Nizeyimana Omar uri mu basubijwe mu buzima busanzwe we yahise ahabwa akazi bitewe n'imyitwarire myiza yagaragaje mu myaka yari amaze mu Kigo cya Iwawa.

Ubuyobozi bw'Ikigo cy'Igihugu Gishinzwe Igororamuco bwamuhaye akazi mbere y'abandi bose bari Iwawa nk'umukozi wa leta uhoraho muri iki kigo ndetse bunamwizeza kumubera umuryango.

Nizeyimana yabwiye RBA ati 'Ndishimye cyane, kuba muri aba bantu bose twabanye ari njye bahisemo bagahita bampa akazi, ni ibintu bikomeye cyane kandi nishimiye ko bakomeje kumbera ababyeyi.'

Kuri iyi nshuro ya 24, abarenga 6,400 ni bo basezerewe mu bigo ngororamuco bine bibarizwa mu Rwanda.

Hari n’abize ububaji kandi babikora neza

Minisitiri Dr. Mugenzi yijeje abavuye mu bigo ngororamuco kubahuza n’amahirwe y’akazi

Abarenga 4900 bagororerwaga Iwawa ni bo basubijwe mu buzima busanzwe

Bigishijwe gukora imyuga itandukanye irimo ubudozi

Iyi mpanuka yabereye mu muhanda Rusizi-Nyamasheke, urenze gato isantere ya Kinini mu kagari ka Rwesero Umurenge wa Kagano tariki 5 Werurwe 2025.

Saa kumi n'imwe ubwo abanyeshuri bari bavuye ku ishuri, bageze ahitwa kuri Konsaseri ni bwo iyi kamyo yari ifite umuvuduko mwinshi yagonze uyu munyeshuri.

Abatuye muri aka gace bavuga hakunze kubera impanuka kuko ngo hatashira amezi atatu hatabereye impanuka.

Umuvugizi wa Polisi y'u Rwanda, ishami rishinzwe umutekano wo mu muhanda , SP Emmanuel Kayigi, yavuze ko iyi mpanuka yatewe n'uburangare bw'umushoferi.

Ati “Ntabwo nibura imodoka yamugonze yambuka umuhanda arimo hagati, yagenderaga ku ruhande, iyo umushoferi aza kuba atarangaye ntabwo yari kumugonga, ni uko yasatiriye inkombe z'umuhanda aho uwo mwana yagendaga.'

SP Kayigi yavuze ko icyifuzo cy'abaturage basaba ko aho iyi mpanuka yabereye hashyirwa ibyapa bigaragaza ko ari hafi y'ikigo cy'ishuri, mu rwego rwo gukumira impanuka kigiye gusuzumwa.

Ati “Ntabwo twari tuzi ko hakunze kubera impanuka, ni amakuru muduhaye ariko, abantu basuzuma dufatanyije n'izindi nzego kugira ngo niba ari ibyapa bikenewe aho hantu bihashyirwe impanuka zigabanyuke kuko icyo dukeneye cyane ni umutekano w'abantu.'

Ababonye iyi mpanuka bavuga ko iyi kamyo nyuma yo kugonga uyu mwana yamutwaye mu mapine ibice by'umubiri bigenda bisigara mu nzira.

Muri iyi modoka inzego zibishinzwe zasanzemo urwagwa shoferi na tandiboyi we bagendaga banywa. Umushoferi afungiye kuri Statiyo ya Polisi ya Kagano, na ho umurambo wa nyakwigendera wajyanwe ku Bitaro bya Kibogora.

Mu karere ka Nyamasheke ikamyo yagonze umwana wari uvuye ku ishuri

Yabigarutsho mu nama yiga ku buryo bwo bwo kuzamura imirimo mu rubyiruko yakoranye n'urubyiruko ruhagarariye urundi mu Ntara y'Amajyepfo n'abandi bayobozi, yabereye mu Karere ka Huye ku wa 5 Werurwe 2025.

Minisitiri Dr.Utumatwishima yavuze ko muri gahunda ya NST2 izageza mu 2029, Guverinoma yiyemeje guhanga imirimo ibihumbi 250 buri mwaka, kandi ko bigomba kugirwamo uruhare n'abantu bose.

Yashimangiye ko buri wese ataba rwiyemezamirimo, ariko nanone akwiye kugira icyo aba azi gukora cyamufasha kubaho.

Ati 'Mu myaka itanu iri imbere, kugira ngo imirimo ibashe kuboneka twasanze ari uko tugomba kugira Abanyarwanda benshi bize, bazi iby'ibanze mu bumenyi.'

'Turi gufatanya na MINEDUC, MIFOTRA na MINALOC, uko urubyiruko rwacikirije amashuri, cyane cyane abifuzaga kurangiza ayisumbuye ntirurangize, ngo turebe niba umuntu wese wacikirije ishuri kubera ibibazo bitandukaye, yarangiza ayo masomo mu mwaka umwe mu cyiswe 'Secondary Plus', hanyuma tukamuha n'umwuga wamufasha kujya guhanga umurimo.''

Minisitiri Dr. Utumatwishima yakomeje avuga ko hari n'izindi gahunda zishyigikira iterambere ry'urubyiruko zirimo icyiswe 'Aguka Skilling' aho bafasha urubyiruko gukora imishinga, muri uyu mwaka bakazigisha 1500, maze 100 ba mbere buri wese akazahabwa 3000$ byo gutangiza umushinga.

Hazanashyirwa imbaraga mu guteza imbere gahunda ya Youth Connekt, ku buryo igera kuri benshi bashoboka.

Mineduc igaragaza ko mu mwaka wa 2023 abanyeshuri bataye ishuri bavuye kuri 8,5% mu mwaka wa 2021/2022 bagera kuri 6,8% mu mwaka w'amashuri wa 2022/2023.

Iyi mibare igaragaza ko abanyeshuri bo mu mashuri abanza baritaye bangana na 5.5%, mu gihe abo mu cyiciro rusange [Tronc Commun] bagera ku 10,5%. Abo mu mashuri yisumbuye bataye ishuri bangana na 4,5%.

Minisitiri Dr. Utumatwishima yavuze ko abatarabashije kurangiza amashuri bagiye kwitabwaho

Minisitiri Dr. Utumatwishima yeretswe bimwe mu bikorwa by’urubyiruko

Muri Gashyantare 2025 umunyeshuri w'imyaka 12 wiga mu mwaka wa gatandatu w'amashuri abanza mur ishuri rya GS. Sekera, wagendaga areba imirongo iri mu biganza by'abandi bigana, maze umwe muri bo amubwira ko abonye ari Umututsi kandi ko bazabamwica.

Umuyobozi wa GS Sekera, Ngiyembere Charles, yabwiye IGIHE ko byatumye bongera imbaraga mu itorero ryo mu kigo kugira ngo abana bose barusheho kunga ubumwe.

Ati 'Twatewe ipfunwe n'ibyabaye mu ishuri ryacu, ariko byatumye twongera imbaraga mu itorero ryo ku ishuri, aho buri shuri riba ari isibo.'

Ubukangurambaga bwo kurwanya ingengabiterezo ya Jenoside bwakozwe na RIB mu Karere ka Nyamagabe mu bigo by'amashuri birimo na GS Sekera, Umuyobozi muri RIB Ushinzwe Ubukangurambaga no Gukumira Ibyaha, Ntirenganya Jean Claude, yabwiye abana ko ubumwe bw'Abanyarwanda ari zo mbaraga zabo, abasaba kwirinda ababashora mu bibi.

Ati 'Numvise ko hano hari umwana warebaga abandi mu biganza, areba ko harimo inyuguti ya 'M', kandi ibyo nta mumaro. Ese mbabaze, iyo ugiye kwa muganga ukiza amagara yawe, ujya kureba amazuru y'ukuvura? Twese ntitwaba barebare, ntituzaba ibikara cyangwa inzobe. Ntabwo twese twagira imitwe minini cyangwa mito, amazuru manini cyangwa amato.'

Yabibukije ko Abanyarwanda bose bakomoka kuri Gihanga, bityo ko ubumwe bagomba kubukomeraho.

Ati 'None se ko twese tuvuga ko twabyawe na Gihanga umwe, ubwo dufite ba gihanga bangahe? Ibi bibatanya mubireke; kuko ntawe ubijyana ku isoko ngo bimuheshe amafaranga. Ntibikijyanye n'aho Isi igeze, nimubivemo kuko si byo igihugu kidukeneyemo.'

Abanyeshuri bahawe ibi biganiro bavuze ko bungukiyemo byinshi, kandi biteguye no kubyigisha ababyeyi babo.

Nzagumyansenge Jonas wiga mu mwaka wa kabiri mu mashuri yisumbuye ati “Twigira kumenya, kandi hari ibyo mutubwiye tumenye tugiye kubikurikiza, ndetse ibyo turabibwira abo twasize iwacu.”

GS Sekera yigamo abanyeshuri 1600, bari mu byiciro bine birimo icy'incuke, amashuri abanza, ayisumbuye n'ay'imyuga.

Ubu bukangurambaga buri gukorwa mu bigo 166 byo hirya no hino mu Karere ka Nyamagabe, muri gahunda yo kurwanya ingengabitekerezo ya Jenoside yagaragaye muri GS Sekera, GS Ngororero ndetse na GS Gisanze mu Murenge wa Tare.

GS Sekera yigamo abanyeshuri barenga 1600

Umuyobozi muri RIB Ushinzwe Ubukangurambaga no Gukumira Ibyaha, Ntirenganya Jean Claude, yasabye abanyeshuri kuba umwe

Inzego zitandukanye zari muri ubu bukangurambaga

Ingabire Victoire yinjiye mu Rwanda mu 2010 avuye mu buhungiro mu Buholandi, avuga ko ashaka guhatana mu matora y'umukuru w'igihugu, ariko ageze ku Rwibutso rwa Jenoside rwa Kigali yihutira kubaza aho 'urw'Abahutu ruherereye', amagambo apfobya Jenoside yakorewe Abatutsi mu buryo bweruye.

Usubije amaso inyuma mu mashyamba ya Zaïre [Repubulika Iharanira Demokarasi ya Congo y'ubu], mu mitwe ya politike yahavukiye yari iyobowe n'abasirikare n'abahoze muri Guverinoma yateguye ikanashyira mu bikorwa Jenoside yakorewe Abatutsi bagahungirayo, umusangamo.

Ingabire yayoboye umutwe wa RDR mu 1998 wahindutse ijwi ry'abo avuga ubu ko ari 'abasigaye mu ngabo zatsinzwe n'inyeshyamba zagize uruhare muri Jenoside' babaye mu mitwe itandukanye yitwaje intwaro nka ALIR, FDLR, FLN n'indi.

RDR imaze kuvaho yasimbuwe n'undi mutwe witwa FDU-Inkingi, uhita uyoborwa na Ndereyehe Charles, unakurikiranyweho ibyaha bya Jenoside, aho agereye mu Buholandi asimburwa na Ingabire Victoire Umuhoza.

Mu rubanza rwa Ingabire Victoire mu 2010, umwe mu bamushinjaga witwa Lt Col Nditurende Tharcisse yasobanuye ko bagiranye imishyikirano, Ingabire amusaba kwitandukanya na FDLR bagashinga umutwe w'abasirikare wa FDU-Inkingi, ndetse ko yanamwoherereje itike kuri Western Union, bahurira i Kinshasa mu 2008 na Brazzaville babiganiraho. Mu biganiro byabo, ngo bateguraga ibikorwa by'iterabwoba n'intambara mu Rwanda.

Mu bihe bitandukanye, Ingabire yakunze gutagatifuza iyi mitwe, avuga ko 'FDLR yashinzwe n'impunzi z'Abanyarwanda muri RDC nyuma yo kwirukanwa mu Rwanda muri Jenoside, biyemeje kurwana intambara nk'uburyo bwari kubafasha kongera gufata ubutegetsi.'

Urubanza rwaciwe tariki ya 12 Ukuboza 2013, rwasize Ingabire Victoire ahamijwe icyaha cy'ubugambanyi n'icyaha cyo gupfobya Jenoside yakorewe Abatutsi no kwamamaza nkana ibihuha akatirwa gufungwa imyaka 15.

Gusa mu 2018 yahawe imbabazi n'Umukuru w'Igihugu, ariko nyuma yagiye ahakana ko ntazo yasabye nyamara inyandiko yazisabiyeho zigaragara.

Uyu mugore wasabye imbabazi byari byitezwe ko avuye muri gereza ari mushya ariko ibikorwa n'imvugo ze bikomeza kuba nk'ibya kera.

Minisitiri Dr. Bizimana Jean-Damascène ubwo yari mu nama nyunguranabitekerezo yateguwe n'Inteko Ishinga Amategeko ku miterere y'ingengabitekerezo ya Jenoside mu karere, ingaruka zayo n'ingamba zo kuyirwanya, yabaye ku wa 5 Werurwe 2025, yatangaje ko Ingabire Victoire wabaye muri FDLR atigeze ahinduka.

Ati 'RDR imaze kuvaho yasimbuwe n'icyitwaga FDU Inkingi, iyoborwa na Ndereyehe nyuma ajya mu Buholandi asimburwa na Ingabire Victoire Umuhoza, ava muri FDU-Inkingi ashinga rya rindi rye ryitwa Dalfa-Umurinzi. Gutandukanya rero Ingabire wa Dalfa na Ingabire wa FDLR na RDR, nta tandukanyirizo rigihari mu byukuri.'

Ingabire ugendera kuri politike ya FDLR y'ivangura rishingiye ku moko n'ingengabitekerezo ya Jenoside, tariki 11 Gicurasi 2019 yafatiwe mu nama yo gushakisha abayoboke no kubashishikariza kujya mu mutwe w'iterabwoba ugizwe n'ubwoko bumwe gusa.

Iyi nama yabereye mu Karere ka Kirehe yari yitiriwe amahugurwa, ariko umwe mu bayitabiriye wanatanze amakuru, yavuze ko Ingabire yabasabye kumushakira abandi bantu binjira mu ishyaka rye ariko abaha gasopo ko nta mututsi ashaka.

Abo yashakaga cyane, ngo bari 'urubyiruko rw'Abahutu' rutagira akazi. Abatanze amakuru bavuze ko yasabaga umwirondoro wa buri munyamuryango mushya bandika.

Mu Ugushyingo 2019 yahinduye izina ry'ishyaka rya FDU-Inkingi aryita DALFA Umurinzi, ariko ibikorwa bikomeza kuba byabindi.

Ku wa 4 Ugushyingo 2019, mu Kinigi hagabwe ibitero byahitanye inzirakarengane 14 bigizwemo uruhare n'Ihuriro ry'imitwe yibumbiye muri P5 yari irimo na FDU Inkingi. Icyo gihe, Ingabire yari akiri Umuyobozi wa FDU-Inkingi.

Ingabire wiyita umunyapolitike utavuga rumwe n'ubutegetsi n'impirimbanyi ya demokarasi n'uburenganzira bwa muntu, muri Werurwe 2024, Umuvugizi wa Guverinoma y'u Rwanda, Yolande Makolo, abinyujije kuri X yagaragaje atari umunyapolitike utavuga rumwe n'ubutegetsi ahubwo ari umunyabyaha wanze guhinduka.

Ati 'Victoire Ingabire ntabwo ari umunyapolitike utavuga rumwe n'ubutegetsi, nta nubwo ari n'impirimbanyi ya Demokarasi. Ni umunyabyaha uticuza wahamwe n'umugambi wo guhirika Guverinoma abinyujije mu nzira z'imyivumbagatanyo no kugerageza kubiba amacakubiri mu Rwanda. Hashimwe ubutabera bw'u Rwanda bwongeye gushimangira iyubahirizwa ry'amategeko.'

Minisitiri Dr. Bizimana yahamije ko Ingabire Victoire wamaze imyaka myinshi mu mitwe yamunzwe n’ingengabitekerezo ya Jenoside atigeze ahinduka

Ingabire aheruka gusaba ihanagurabusembwa ariko aryimwa kubera ko atubahirije ibyo amategeko asaba

Yafatiwe mu Murenge wa Kamembe, ahakorera imashini yimurwa y'Ishami rya Polisi rishinzwe kugenzura ubuziranenge bw'ibinyabiziga mu rwego rwo kwegereza iyi serivisi abakoresha ibinyabiziga muri Rusizi n'utundi turere bihana imbibi, ubwo yari aje gusuzumisha imodoka ye yo mu bwoko bwa Toyota Land Cruiser.

Umuvugizi wa Polisi mu Ntara y'Iburengerazuba; SP Bonaventure Twizere Karekezi, yavuze ko aho gukoresha amakosa imodoka ye yari yarezwe yahisemo gushaka gutanga ruswa ngo ahabwe icyemezo cy'uko yujuje ibisabwa, ari nabyo byatumye afatwa.

Ati 'Ku wa Mbere w'iki cyumweru tari ya 3 Werurwe, nibwo uriya mushoferi yazanye imodoka ye kugira ngo ikorerwe isuzuma ry'ubuziranenge, ntiyabasha gutsinda ikizamini kuko basanze ifite amakosa agomba gukosorwa arimo kudakora neza kwa bimwe mu bice byayo birimo; feri yo guhagarara umwanya munini (frein à main) n'ibyuma biyobora (steering apparatus).'

Yakomeje avuga ko 'Aho kugira ngo akoreshe imodoka amakosa bayisanganye akosorwe, mu gitondo cyo kuri uyu wa Gatatu, nibwo yagarutse, yegera umupolisi ukorera kuri iriya mashini yimurwa yifashishwa mu gusuzuma ibinyabiziga, ashaka kumupfumbatiza ibihumbi 50Frw bigizwe n'inote 10 z'ibihumbi bitanu, nawe abimenyesha abamukuriye, ahita atabwa muri yombi.'

Ingingo ya 143 mu Itegeko rya Perezida no 85/01 ryo ku wa 02/09/2002 rishyiraho amabwiriza rusange agenga imihanda n'uburyo bwo kuyigendamo ivuga ko ibinyabiziga bitujuje ibisabwa bidahabwa icyemezo kibyemerera gushyirwa mu mihanda nyabagendwa. Hagomba gukorwa irindi genzurwa ryemeza ko amakosa yakosowe mbere yo guhabwa icyemezo.

SP Karekezi yibukije abatunze ibinyabiziga n'abashoferi ko mu gihe bagiye kubikoreshereza isuzuma bagasanga bitujuje ubuziranenge; ari umwanya mwiza wo kubikoresha, bakabishyira ku rwego rwo kuba bitateza akaga ku buzima; bwaba ubwabo bwite ndetse n'ubw'abandi bakoresha umuhanda, biturutse ku mpanuka zaterwa n'amakosa ya mekaniki.

Yasobanuye kandi ko nta zindi ngendo bagomba gukoresha ibyo binyabiziga mu gihe byarezwe amakosa, uretse kwerekeza mu igaraje no kugaruka gusuzumisha ko ayo makosa yamaze gukosorwa, aho guhitamo gutanga ruswa ngo bakingirwe ikibaba, bibakururira ibyago bikomeye birimo n'igihano cy'igifungo.

Uwafashwe yashyikirijwe Urwego rw'igihugu rw'Ubugenzacyaha (RIB) kuri sitasiyo ya Kamembe kugira ngo iperereza rikomeze ku cyaha akurikiranyweho.

Ingingo ya 4 y'Itegeko no 54/2018 ryo kuwa 13/08/2018 rirwanya ruswa, ivuga ko umuntu wese uhamijwe n'urukiko gusaba, gutanga cyangwa kwakira, mu buryo ubwo ari bwo bwose, indonke iyo ari yo yose, ahanishwa igifungo kirenze imyaka 5 ariko kitarenze imyaka 7 n'ihazabu y'amafaranga y'u Rwanda yikubye inshuro kuva kuri 3 kugeza kuri 5 z'agaciro k'indonke yatse cyangwa yakiriye.

Uyu mugabo yafatiwe i Rusizi agerageza guha Umupolisi ruswa