Author: webrwanda

Mu Myaka 31 ubwo Ingabo zari iza RPA zari zimaze guhagarika Jenoside yakorerwaga Abatutsiza zasanze mu isanduku y'igihugu nta n'urutoboye rubarizwamo kuko na Banki Nkuru y'u Rwanda ubutegetsi bwari bwarayisahuye.

Icyo gihe 90% by'ibikorwa byose byakorwaga n'inkunga z'amahanga ariko ubuyobozi bufite intego yo kwigobotora iyo mibereho.

Mu kiganiro n'umunyamakuru Mario Nawfall, Perezida Kagame yasobanuye ko imiryango mpuzamahanga itanga ubufasha ku munzi yifuzaga ko hahoraho inkambi z'impunzi haba mu Burasirazuba bwa Zaire [RDC y'ubu] n'imbere mu gihugu kugira ngo bashobore gukomeza kubona amafaranga yo kuzitunga ariko na bo babyungukiramo.

Leta y'u Rwanda yakoze ibishoboka impunzi zari mu mahanga zirataha n'abari baravuye mu byabo bari imbere mu gihugu basubira iwabo ubundi bacungirwa umutekano, hatangira urugamba rw'iterambere.

Perezida Kagame yavuze ko mu ntangiriro byinshi byakorwaga n'amafaranga y'inkunga kubera ibihe igihugu cyari kivuyemo, ariko u Rwanda rukereka ibihugu ko inkunga biruha zitagomba gukoresha uko bibishaka gusa ahubwo na rwo rugomba kugira uruhare mu kwerekana aho zikoreshwa.

Umunyamakuru yihutiye kubaza niba abona inkunga cyangwa imfashanyo ibihugu bitanga zishobora kuba zishyurwa mu bundi buryo.

Ati 'Mu buryo burambye ni ideni bitewe n'uko [inkunga] zafashwe kandi kuva ku ntangiriro ni ho duhagaze. Twabwiye abantu ko dushima inkunga, ko twari tuzikeneye kandi tukizikeneye ku rwego runaka ariko tuzikeneye kugira ngo twubake ubushobozi, ariko tuzabe tutakizikeneye mu bihe biri imbere. Uwo ni wo murongo wacu, ni byo tuvuga kandi ni byo dukora.'

Yahamije ko iyi ngingo yayiganiriyeho n'abakuru b'ibihugu bitandukanye bya Afurika ariko abenshi bikarangira batabyumva neza

Ati 'Izi mpaka zafashe umwanya mu biganiro twagiye tugira mu myaka myinshi ishize hagati y'abo bakeneye inkunga, ikibazo kuri twe kigakomeza kuba ko tuzikeneye, dushobora kuzifata, dushobora kugaragaza aho tuzikeneye ariko tunakora ku buryo tuzigobotora.'

'Icyo ni ikintu twifitemo, tuganiriza buri wese ushaka gukorana natwe ibikorwa bijyanye n'inkunga ariko ibyo byadukururiye ibibazo byinshi, bamwe batwise abirasi, ko tutitaye ku kababaro k'abandi, abanyagitugu n'andi mazina menshi kubera ibyo gusa.'

Bagutsindagira inkunga ngo bakujyane aho bashaka

Perezida Kagame kayavuze ko bagerageje gusobabura ko ikibazo atari uko inkunga zidakenewe ahubwo yasangaga inkunga zituma umuntu akomeza kumva abandi hari ibyo bamugomba.

Ati 'Kubeshwaho n'abandi biri mu murongo ujya kuba mwiza, ahubwo ikindi ni uko umuntu wese ugutera inkunga anagenzura ubuzima bwawe, ni na yo mpamvu baba bashaka ko ukomeza kwakira inkunga kugira ngo bakomeze bayobore ubuzima bwawe, rimwe na rimwe bakazikoresha nk'igikangisho ngo bakwerekeze aho bashaka, bagakomeza kugukanga ngo nudakora ibi turazihagarika.'

Yavuze ko mu 1998 igihugu cyakiraga inkunga bitewe n'uko ari bwo Jenoside yakorewe Abatutsi yari igihagarikwa, bamwe mu bayobozi b'Abanyaburayi bakagera mu Rwanda, bakerekwa aho inkunga zikenewe, ariko umwe muri bo wari uturutse mu Bwongereza yaganiriye na Perezida Kagame, amubwira ko bishimiye inkunga ari kubabwira batanga ariko nanone igihugu gikeneye kugira uruhare mu kugena ibikibeshaho.

Icyo gihe Perezida Kagame wari ukiri Visi Perezida, yasabye uwo muyobozi ko bemeranya aho inkunga bagiye guha igihugu izakoreshwa aho kwinjira mu gihugu ufite ibikapu by'amafaranga ukanigenera aho ugomba kuyashyira.

Yavuze ko u Bwongereza n'ibindi bihugu bitatu byari inshuti zabwo byemeye iyi imikoranire, bagatanga inkunga zigakoreshwa aho impande zombi zemeranyijweho, hagakorwa igenzura nyuma y'igihe runaka ngo harebwe niba amafaranga yatanzwe ataranyerejwe cyangwa akaba yarakoreshejwe nabi.

Kwanga caguwa byakuye u Rwanda muri AGOA

Perezida Kagame yavuze ko mu gihe yari ayoboye Umuryango wa Afurika y'Iburasirazuba yagaragarije abakuru b'ibihugu byawo ko bifitemo byinshi bihinga ibireti bivamo ipampa, bityo ko bakwiye guca intege imyambaro yambawe iva mu mahanga hagatezwa imbere inganda z'imbere mu bihugu zikora imyenda.

Ati 'Twaremeranyije twemeza ko tugiye guhanika ikiguzi kugira ngo tugabanye abantu bakomeza kutwoherereza imyambaro yambawe natwe tuziyubakire inganda zacu z'imyambaro. Abanyamerika baragiye barababwira bati ntimushobora kureka kugura imyenda ya caguwa yacu.'

Yavuze ko bamwe mu bayobozi bari kumwe bafata umwanzuro bagendeye ku gitutu bamwe barabireka, ndetse n'u Rwanda Amerika irugeraho irubwira ko mu gihe rwakomeza uwo mugambi wo guca caguwa ruzakurwa mu masezerano ya AGOA [African Growth Opportunity Act].

Ati 'Ibihugu byose twari twemeranyije kuri uwo mwanzuro byabivuyemo barakomeza batumiza imyambaro yambawe [caguwa] kugira ngo bakomeze kubona inyungu kuri Amerika. Icyo gihe twasigaye twenyine tutanabizi, ndetse birangira dukuwe muri AGOA'

Kugeza magingo aya ubukungu bw'u Rwanda bumaze imyaka myinshi buzamuka ku muvuduko uri hejuru ya 8%, ndetse ibyo umuturage yinjiza ku mwaka byavuye ku Madorali ya Amerika 111 mu 1994 agera ku 1040$ mu 2023.

Perezida Kagame yagaragaje ko inkunga zigomba kuba zigamije gufasha igihugu kwiyubakira ubushobozi

Ibi Umukuru w'Igihugu yabigarutseho mu kiganiro yagiranye n'umunyamakuru Mario Nawfal, cyatambutse ku rubuga rwe rwa X.

Uyu munyamakuru yabajije Perezida Kagame impamvu ibindi bihugu bya Afurika bitigira ku iterambere ry'u Rwanda, ku buryo nabyo bishobora guhindura imibereho y'ababituye.

Perezida Kagame yavuze ko Afurika ari umugabane ufite amahirwe yo gutera imbere, cyane ko ifite umutungo kamere uhagije, n'andi mahirwe y'iterambere.

Yavuze ko ibindi bihugu bya Afurika bishobora no gukora ibirenze ibyo u Rwanda rwakoze mu kwiteza imbere, ibanga rya byose rikaba mu kugira ubuyobozi bwiza.

Umukuru w'Igihugu yagize ati 'Ku bandi, bashatse gukora ibyo twakoze, bashobora no kugera kuri byinshi kurushaho. Icyemezo kigomba gufatwa n'abayobozi. Byose ni politiki [nziza].'

Perezida Kagame yavuze ko Abanyafurika bafite ubushobozi bwo kwiteza imbere nk'uko n'abandi bantu babigenje, ati 'Abantu ni bamwe ahantu hose, iyo ubahaye amahirwe muri buri gice cya Afurika [bayabyaza umusaruro].'

Yashimangiye ko Abanyafurika ari abantu bafite ubwenge bwatuma bateza imbere imibereho yabo, cyane ko banafite umutungo kamere.

Ati 'Afurika iracyari inyuma ugereranyije n'indi migabane, ariko icyatumye abandi batera imbere, ni byo bintu bimwe byatuma Afurika itera imbere. Kuko Afurika ifite umutungo kamere uhagije.'

Icyakora Umukuru w'Igihugu yashimangiye ko imiyoborere mibi ari imbogamizi ikomeye ku iterambere rya Afurika. Kuri iyi ngingo, yafatiye urugero kuri Repubulika Iharanira Demokarasi ya Congo, agaragaza ko iki gihugu gifite ubuso bwa kilometero kare miliyoni 2,3 n'abaturage barenga miliyoni 100, gifite umutungo mwinshi, ariko ko cyirirwa gisabiriza inkunga.

Ati 'Fatira urugero ku gihugu nka RDC. Irakize cyane, cyane. Kubera iki igihugu nka kiriya kigomba gusabiriza? Kubera iki? Ndi kwifashisha ibibazo mu kugusubiza, nkwereka ko birebana na politiki n'imicungire, birebana n'ubunyangamugayo turi kuvugaho.'

Yashimangiye ko mu gihe abayobozi batarumva akamaro ko gukorana n'abaturage babo, bigoye ko batera intambwe mu iterambere.

Ati 'Ese aba bayobozi bumva bakorana n'abaturage babo kugira ngo bungukire muri uwo mutungo kamere bityo bigeze kuri buri wese ku rwego rwo hejuru? Iyo udatekereza gutyo, ntabwo bishoboka.'

Ibi Perezida Kagame yabigarutseho mu kiganiro n'Umunyamakuru Mario Nawfal, cyatambutse ku rubuga rwe rwa X kuri uyu wa 11 Werurwe 2025.

Perezida Kagame yavuze ko yagiye aganira na Perezida Tshisekedi inshuro nyinshi akijya no ku butegetsi, ndetse ko n'ubu yiteguye kuba yaganira na we, ariko ko yabonye ko bigoye kumvikana na we kuko bamara kuvugana, ibyo bumvikanye akava aho yabihinduye.

Yagize ati 'Ntabwo nanga kuganira na we, ariko dukwiye kuba tuvugana ibintu bifitiye inyungu ibihugu byombi, kandi bifite intumbero yo gushaka gukemura ibibazo. Nta kibazo mbifiteho.

'Kumvikana na Tshisekedi ni cyo kintu cya mbere kigoye, ndashaka no kubyerekana, nshaka kumenya umuntu waba warumvikanye na we, waza akambwira ati wowe urabeshya. Nagiye nganira na we, mukemeranya ibintu, yaba agisohoka mu muryango, akaba yabyibagiwe, cyangwa akabihindura, ukumva avuga ngo oya oya, ntabwo ibyo twigeze tubivuga.'

Abajijwe icyo yabwira Perezida Tshisekedi babaye bicaranye ako kanya, Perezida Kagame yagize ati 'Namubwira ngo nakwifuje ko atakabaye ari Perezida wa kiriya gihugu cyiza. Kandi rwose ubutaha ninongera kwicarana na we nzabimwibwirira imbonankubone.'

Yagarutse ku nkuru y'umusaza w'Umutaliyani, Tshisekedi yakoreraga mu Bubiligi, atwara Pizza, avuga ko ubwo yumvaga ko yabaye Perezida yifashe impungenge, kuko ngo n'ako kazi yamukoreraga atari umwizerwa muri ko.

Yagize ati 'Sinzi niba warabibonye, hari umuryango w'Abataliyani, urabizi Félix [Tshisekedi] yamaze imyaka myinshi mu Bubiligi atwara taxi, akora n'ibindi byinshi nk'ibyo, na bwo afite imyitwarire mibi, umugabo w'Umutaliyani wari waramuhaye akazi ko gutwara pizza, ubwo yumvaga ko Félix yabaye Perezida yaratangaye ati 'Mana yanjye'…yaravuze ati 'uyu muntu utabashaga no gukora akazi ke ko gutwara pizza neza, yabaye Perezida!'

Tshisekedi afite ingengabitekerezo ya Jenoside

Perezida Kagame kandi yavuze ko impamvu abona Perezida Tshisekedi azarira mu gushaka gukemura ibibazo by'Abatutsi b'Abanye-Congo ari na byo byatumye M23 yubura imirwano, ari uko afite ingengabitekerezo ya jenoside nk'abandi bamubanjirije.

Ati 'Ntekereza ko afite ingengabitekerezo ya Jenoside nk'abandi…navuganye na we nk'inshuro ijana mbere y'ibi bibazo. Twaravuganye n'igihe yabaga perezida, sinitaye k'uko yabaye perezida, ntabwo yigeze atorwa inshuro zombi, inshuro ya mbere yahawe ubutegetsi, inshuro ya kabiri yitangaje nka perezida asaba abantu bose guceceka, biba ari ko bigenda, ariko ibyo ntibindeba.'

Perezida Kagame yavuze ko impamvu abona ibibazo byo muri RDC bikomeza gutwererwa u Rwanda, ndetse bikavugwa ko rufasha M23, ari uko ari Abatutsi b'Abanye-Congo barwanira uburenganzira bwabo, ababivuga bakaba ari abatekerezaga ko bakwiye kuba barabirukanye muri Congo cyangwa bakabica bagashiraho, bikaba bitarabaye kandi u Rwanda rukaba ari rwo rwatumye ibyo bidakunda, ati 'Ni yo mpamvu ibyo tubirenganyirizwa.'

Yavuze ko nubwo bimeze bityo u Rwanda rwifuriza amahoro muri Congo kuko mu gihe ifite amahoro, bivuze amahoro no ku Rwanda, 'kugira ngo dukomeze twubake igihugu cyacu gito, cyazahaye birenze ibikenewe, ntabwo ari twe twashaka ibibazo bishobora kudusubiza mu bihe bisa n'ibyo.'

Perezida Kagame yavuze ko abona ko Tshisekedi atagakwiye kuba ayobora RDC

Kuri uyu wa Kabiri tariki ya 11 Werurwe nibwo hakinwe imikino yo kwishyura ya 1/8 cya UEFA Champions League. Umukino wari utegerejwe na benshi ni uwo Liverpool yari yakiriyemo Paris Saint-Germain kuri Anfield saa Yine z’ijoro.

Uyu mukino watangiye amakipe yombi ahererekanya umupira ku kigero kingana ariko Liverpool ikanyuzamo ikarema uburyo imbere y’izamu binyuze ku barimo Mohamed Salah.

Ku munota wa 12 Paris Saint-Germain yaje gufungura amazamu ku mupira wari uzamukanywe na Bradley Barcola awuhindura imbere y’izamu Ibrahim Konate akora amakosa yitangira umupira Ousmane Dembélé ahita awushyira mu izamu.

Nyuma yo gutsindwa ikipe ya Liverpool yatangiye urugendo rwo gushaka uko yakwishyura abarimo Trent Alexander Arnold barekura amashoti yakure gusa ba myugariro ba Paris Saint-Germain bakihagararaho.

Igice cya kabiri cyaje ikipe ya Liverpool igerageza gushaka uko yakwishyura ndetse hari aho yari yabonye igitego gitsinzwe na Dominic Szoboszlai gusa umusifuzi yerekana ko hari habayemo kurarira.

Ikipe ya Liverpool yakomeje kwatsa umuriro kuri Paris Saint-Germain abarimo Luis Diaz barekura amashoti ariko Gianluigi Donnarumma bakaba ibamba.

Amakipe yombi yaje gukora impinduka mu kibuga aho ku ruhande rwa Paris Saint-Germain havuyemo Bradley Barcola hajyamo Desire Doué naho ku ruhande rwa Liverpool havamo Diogo Jota na Trent Alexander Arnold wagize ikibazo cy’imvune hajyamo Darwin Nunez na Jarell Quansah.

Iminota 90 y’umukino yarangiye Paris Saint-Germain itsinze 1-0 bituma hitabazwa iminota 30 y’inyongera bitewe nuko umukino ubanza Liverpool nayo yari yaratsinze 1-0.

Iminota 30 y’inyongera yarangiye rubuze gica bituma hitabazwa penariti. Kuri penariti Paris Saint-Germain yatsinze 4 naho Liverpool yinjiza imwe, ihita ikomeza muri 1/4 aho izahura n’izava hagati ya Aston Villa na Club Brugge.

Indi mikino yakinwe FC Barcelona yatsinze Benfica 3-1 ihita ikomeza ku kinyuranyo cy’ibitego 4-1, FC Bayern Munich itsinda Bayer Leverkusen 2-0 iyisezerera ku kinyuranyo cy’ibitego 5-0 naho Inter Milan itsinda Feyenoord 2-1 ihita iyesezerera ku kinyuranyo cy’ibitego 4-1.

Liverpool yasezerewe, iri mu makipe yahabwaga amahirwe menshi yo kuzatwara Champions League y’uyu mwaka na cyane ko yari yasoje imikino y’amatsinda ariyo ihiga izindi zose n’amanota 21.

PSG yabonye itike naho Liverpool isezererwa muri Champions League yari ifitemo ijambo

Iyo umuntu afite agasanduku k'iposita, abandi bantu cyangwa ibigo bashobora kumwoherereza amabaruwa, bikajya bibikwa muri ako gasanduku kugeza agiyeyo kubifata. 

Buri gasanduku kaba gafite nomero yihariye kandi kakagira urufunguzo rwako, kugira ngo ubutumwa bubikwemo Kandi hbube bwizewe.

Uyu munsi, ikoreshwa ry'agasanduku k'iposita ryaragabanutse cyane ugereranyije n'imyaka yashize. Abantu benshi bahitamo gukoresha ikoranabuhanga (emails, WhatsApp, SMS) aho kohereza amabaruwa ku mpapuro. 

Muri rusange, mu bihugu bikiri mu nzira y'amajyambere nka Afurika, ikoreshwa ry'agasanduku k'iposita riri munsi ya 20% by'abantu bose, cyane cyane mu mijyi. 

Mu Rwanda, ibigo bikomeye cyangwa abantu bafite ibyo bakenera kwakira byanditse ku mpapuro zemewe n'amategeko bifashisha ubu buryo.

Agasanduku k'iposita katangiriye mu Bwongereza mu kinyejana cya 19, aho katangijwe ku mugaragaro mu mwaka wa 1852. 

Kaje gukwirakwira no mu bindi bihugu birimo ibya Afurika mu gihe cy'ubukoloni. Mu Rwanda, serivisi zi posita zatangiye gukoreshwa mu myaka ya 1920, ubwo Ababiligi bashyiragaho uburyo bwo gutwara ubutumwa, hanyuma agasanduku k'iposita kakaza kwiyongera mu myaka yakurikiyeho.

Ikoreshwa ry’Iposita rigenda rigabanyuka kubera ikoranabuhanga ryihuse nka email na telefoni bimaze korohera abantu gutumanaho. 

Gutegereza ubutumwa mu gasanduku biratinda kurusha email cyangwa ubutumwa bugufi. Abantu benshi ntibazi akamaro ko gutunga agasanduku k'iposita, cyane cyane abatuye imijyi. 

Hari n'aho serivisi zi Posita zitagifite imbaraga cyangwa ubushobozi bwo gutanga serivisi ku rwego rwo hejuru.

Gafite umumaro munini harimo nko kubika ubutumwa bwanditse bufite agaciro nk'amasezerano, inyandiko z'amategeko, cyangwa izindi mpapuro z'ingenzi. 

Ni uburyo bwizewe bwo kohereza no kwakira impapuro zidashobora guca mu ikoranabuhanga (nk'inyandiko zemewe n'inkiko, ibyemezo bikomeye n'utundi dusanduku).

Ibigo bikomeye bikoresha agasanduku k'iposita kugira ngo byizerwe mu buryo bw'inyandiko n'amategeko n’ubwo ubu buryo bwatangiye gukoreshwa cyera ubu bukaba butagifite imbaraga nkambereUbu hari ibikoresho cyangwa ibintu byoherezwa biva cyangwa bijya hanze, bikoherezwa hakoreshejwe servisi z’Iposita bikanyura muri ako gasanduku gusa ubu buryo burimo kugera geza gushyirwamo ikoranabuhanga rigezweho

Ubwiyongere bw'abagore mu myanya y'ubuyobozi bukomeye bujyanye neza n’intego y’Umunsi Mpuzamahanga w'Abagore (International Women’s Day – IWD) wizihizwa buri mwaka tariki 8 Werurwe, washyizweho mu rwego rwo guharanira uburinganire n'iterambere ry'abagore mu gufata ibyemezo.

Insanganyamatsiko y’uyu mwaka wa 2025 y'Umunsi Mpuzamahanga w'Abagore ijyanye n'uburyo abagore b'Abanyafurika bakomeje kugera ku myanya y'ubuyobozi mu rwego rwo gukomeza gukuraho inzitizi mu butegetsi no kuvugurura isura ya politiki ku mugabane.

Mu bihe bya vuba aha, amateka mashya yaranditswe muri Afurika y'Amajyepfo ubwo Netumbo Nandi-Ndaitwah yatorwaga nka Perezida wa mbere w'umugore wa Namibia. Nanone, muri Ghana, Prof Jane Naana Opoku-Agyemang yabaye Visi Perezida wa mbere w'umugore, yinjira mu ruhando rw'ibihugu by’Afurika bishyigikira ubuyobozi bw'abagore.

Afurika yagiye igira abagore batandukanye bagera ku myanya y'ubuyobozi bw'ikirenga, aho bagiye baba ba Perezida, ba Minisitiri w'Intebe cyangwa se abakuru b'igihugu b'agateganyo, binyuze mu matora, gusimbura ababanje cyangwa se guhabwa inshingano by'igihe gito.

Nubwo abo bagore bahuye n'imbogamizi zikomeye zirimo ivangura rishingiye ku gitsina, ubunyangamugayo bwabo bwashyizwe mu majwi, ndetse no kurwanya guhatirwa kuva mu myanya, byarangiye baciriye inzira abagore benshi bumvaga ari inzozi zidashoboka kuba bayobora.

Dore bamwe mu bagore bagizwe ba Perezida muri Afurika:

1. Ameenah Gurib-Fakim — Mauritius (Kamena 2015 — Werurwe 2018)

Ameenah Gurib-Fakim yabaye Perezida wa Mauritius mu 2015 nyuma y’uko Kailash Purryag yeguye. Yashyizwe kuri uyu mwanya n’Inteko Ishinga Amategeko ariko nyuma yaje kwegura kubera impamvu zijyanye n'ubukungu.

2. Ellen Johnson Sirleaf — Liberia (Mutarama 2006 — Mutarama 2018)

Ellen Johnson Sirleaf yaciye agahigo aba umugore wa mbere watowe nka Perezida muri Liberia. Yatsinze amatora ya 2005 n’aya 2011 muri Liberia, ayobora manda ebyiri. Mu 2016, yabaye umugore wa mbere wayoboye ECOWAS (Umuryango w’Ubukungu bw’Ibihugu by’Afurika y'Iburengerazuba).

3. Netumbo Nandi-Ndaitwah — Namibia (Ukuboza 2024 – Kugeza ubu)

Netumbo Nandi-Ndaitwah niwe Perezida wa mbere w'umugore muri Namibia nyuma yo gutsinda amatora ya 2024. Yigeze kuba Visi Perezida, ndetse aba n’umwe mu bayobozi b’icyubahiro mu ishyaka riri ku butegetsi rya SWAPO.

4. Catherine Samba-Panza — Centrafrique (Mutarama 2014 — Werurwe 2016)

Catherine Samba-Panza yabaye Perezida w'agateganyo wa Repubulika ya Centrafrique mu 2014, aba umugore wa mbere ubashije kwicara kuri iyo ntebe. Yafashe ubuyobozi nyuma y’uko Perezida Michel Djotodia yeguye kubera igitutu cy'abayobozi bo mu karere.

5. Sylvie Kiningi — U Burundi (Ukwakira 1993 — Gashyantare 1994)

Sylvie Kiningi yabaye umugore wa mbere wagiye ku buyobozi bukuru bw'igihugu muri Afurika ubwo yabaga Perezida w'agateganyo w'u Burundi, nyuma y'urupfu rwa Perezida Melchior Ndadaye. Yari asanzwe ari Minisitiri w'Intebe nyuma aza kuyobora igihugu mu gihe cy’inzibacyuho.

6. Ivy Matsepe-Casaburri — Afurika y'Epfo (2005, 2008)

Ivy Matsepe-Casaburri yabaye Perezida w'Agateganyo wa Afurika y'Epfo mu 2008, ubwo Perezida na Visi Perezida bari hanze y'igihugu. Yongeye no kuba umuyobozi w'agateganyo mu masaha 14 nyuma y'iyegura rya Thabo Mbeki, mbere y’uko Kgalema Motlanthe atorerwa uwo mwanya. Ivy yaje kwitaba Imana ku ya 6 Mata 2009 ubwo yayoboraga nka Minisitiri w’Itumanaho muri iki gihugu.

7. Joyce Banda — Malawi (Mata 2012 — Gicurasi 2014)

Joyce Banda yabaye Perezida wa mbere w'umugore wa Malawi nyuma y'urupfu rutunguranye rwa Perezida Bingu wa Mutharika. Mu 2014, ikinyamakuru Forbes cyamushyize ku mwanya wa mbere nk'umugore ufite imbaraga zihambaye muri Afurika, no ku mwanya wa 40 ku rwego rw'isi.

8. Sahle-Work Zewde — Ethiopia (Ukwakira 2018 — Ukwakira 2024)

Sahle-Work Zewde niwe Perezida wa mbere w'umugore wayoboye Ethiopia mu 2018, nyuma yo gutorwa n'Inteko Ishinga Amategeko. Mbere yo kuba Perezida, yari intumwa idasanzwe y'Umunyamabanga Mukuru w'Umuryango w'Abibumbye muri Afurika yunze Ubumwe.

9. Rose Francine Rogombé — Gabon (2009)

Rose Francine Rogombé yayoboye Gabon by'agateganyo nyuma y'urupfu rwa Perezida Omar Bongo mu 2009. Yashyikirije ubuyobozi Perezida mushya, Ali Bongo, ku ya 16 Ukwakira 2009, yitaba Imana ku ya 10 Mata 2015.

10. Samia Suluhu Hassan — Tanzania (2021 – Kugeza ubu)

Samia Suluhu Hassan ni Perezida wa Tanzania kuva mu 2021, akaba ari we mugore wa mbere wayoboye iki gihugu. Yarahiriye uyu mwanya nyuma y'urupfu rwa Perezida John Magufuli muri Werurwe 2021.

11. Agnès Monique Ohsan Bellepeau — Mauritius (2012, 2015)

Agnès Monique Ohsan Bellepeau yayoboye Mauritius by'agateganyo inshuro ebyiri: mu 2012, ubwo Sir Anerood Jugnauth yeguraga, no mu 2015 nyuma y'iyegura ku butegetsi rya Kailash Purryag.

Icyerekezo cy'abagore mu miyoborere

Nubwo abagore bahura n'imbogamizi nyinshi mu gutorwa no kuyobora, aba bagore 11 bagaragaje ko bishoboka. Baciye mu nzira igoranye ariko ni urugero rukomeye ku babyeyi, abakobwa n'abagore bo muri Afurika bose, ruhamya ko imiyoborere itagenewe igitsina kimwe.

Uko ibihe bigenda byihuta, biragaragara ko Afurika iri mu rugendo rwo gutanga amahirwe angana kuri bose, kandi abagore barimo gukomeza kwerekana ko bashoboye kuyobora neza kimwe n’abagabo.

 

Abatawe muri yombi bari mu bamaze iminsi bahamagara abaturage kuri telefone bakababwira inkuru zibakura umutima n'inkuru zibizeza ibitangaza ariko byose bakabikora bagamije kumbambura.

Aba uko ari 11 bafatiwe mu Mudugudu wa Kamanora, Akagari ka Kanoga, Umurenge wa Nyakarenzo ku wa 9 Werurwe 2025.

Umuvugizi wa Polisi y'u Rwanda mu Ntara y'Iburengerazuba, SP Karekezi Twizere Bonavanture yabwiye IGIHE ko aba bantu bafatiwe mu bikorwa by'uburiganya bakoraga bifashishije SIM card na telefone.

Ati 'Ibikorwa by'uburiganya nk'ibi bihanishwa ibihano bikomeye kandi bigira ingaruka mbi ku bukungu bw'igihugu n'imibereho y'abaturage. Ntabwo polisi izihanganira na rimwe abishora mu bikorwa bihungabanya umutekano w'abaturage n'ubukungu. Ibikorwa byo guhiga no gufata abantu bose bagira uruhare mu buriganya nk'ubu bizakomeza, kugira ngo umutekano w'abaturage n'ubukungu bw'igihugu bikomeze gusigasirwa.'

SP Karekezi yasabye abaturage kurushaho kugira amakenga no kujya bihutira gutanga amakuru igihe hari uwo bakenetseho ubutekamutwe kugira ngo inzego zibishinzwe zimufashe kubikurkirana.

Abafashwe bose bafungiye kuri sitasiyo ya Polisi ya Kamembe, aho bategereje ko dosiye zabo zitunganywa n'Urwego rw'Igihugu rushinzwe Ubugenzacyaha (RIB).

Mu Rwanda umuntu wese wiyitirira uwo atariwe cyangwa agakoresha ibikangisho agira ngo yizeze icyiza cyangwa atinyishe ko hari ikizaba kibi, akabikora agamije kwambura undi imari ye yose cyangwa igice cyayo aba akoze icyaha cy'ubwambuzi bushukana.

Iyo abihamijwe n'urukiko ahanishwa igifungo kuva ku myaka itatu kugeza ku myaka itanu n'ihazabu iri hagati ya miliyoni 3 Frw na miliyoni 5 Frw.

Bafatanywe telefone bakoreshaga bashuka abantu ngo babambure utwabo

Abatawe muri yombi barimo abakobwa batanu