Author: webrwanda

Mu bihe nk’ibi isi iri ku muvuduko wihuta, kandi ni ngombwa ko n’abizera bakora bagendeye ku gihe turimo. Nyamara ariko hari ubwo bishobora kugorana ko abakristo bamwe na bamwe bitondera ibyo Imana ivuga , dore ko hari n’abakunze gushidikanya uburyo Imana ivuga. Igikenewe ariko ni uko tumenya ko Imana yifuza kuvugana n’abantu bayo. Muri iyi nyigisho turamenya uburyo bune Imana ivuganiramo natwe:

Ibyanditswe byera byose byahumetswe n’Imana kandi bigira umumaro wo kwigisha umuntu, no kumweza ibyaha bye no kumutunganya, no kumuhanira gukiranuka. Kugira ngo umuntu abe ashyitse ,afite ibimukwiye byose ngo akore imirimo myiza yose. 2Timoteyo 3 : 16-17

Imana ivugana natwe mu ijambo ryayo( Bibiliya)

Bibiliya ni igikoresho nyamukuru cy’Imana ikoresha mukuvugana natwe nk’uko byanditswe muri iki gice cyavuzwe haruguru, ibyanditswe byera byahumetswe n’Imana. Ntabwo twari dukwiye kugira ubukene bwo kumenya icyo Imana ishaka kuri buri umwe muri twe kubera ko ijambo ry’Imana nitwe ribereyeho. Muri iyi minsi abantu benshi ntabwo bari guha agaciro ibyanditswe byera ngo bafate igihe cyo gusoma Bibiliya, nyamara Umwami Imana atwigaragariza biciye mu Ijambo rye haba mu kuduhumuriza, kuduhana, kutumenyesha ibihe, n’ibindi. Turashishikariza abakristo kwiga kandi bakayoborwa n’Ijambo ry’Imana, bagahuza ubuzima babamo umunsi ku munsi n’ibyanditswe muri Bibiliya. Ijambo ry’Imana ni imvugo y’ukuri kandi itavangiwe.

Imana ivuganira natwe mu bihe runaka (Situations)

Kandi tuzi yuko ku bakunda Imana byose bifatinyiriza hamwe kubazanira ibyiza, ari bo bahamagawe nk’uko yabigambiriye. Abaroma 8:38

Imana ivuganira natwe mu bihe tubamo mu buzima bwa buri munsi, mu buryo bw’ibikorwa cyangwa mu mitekerereze yacu. Mu bihe by’uburwayi Imana iyo idukijije, ni uburyo iba ishyikiranye natwe. Tuzi uko bitugendekera cya gihe tuba turi mu bihe by’ubukungu butifashe neza. Iyo rero Imana idusubije nk’amafaranga akaboneka tugakemura ibibazo iba ituvugishije mu buryo bw’ibikorwa. Imana ivugana natwe mu buryo bw’ibikorwa, mu buryo bw’ubutabazi mu biba bitugoye kugira ngo igaragaze ubudahemuka bwayo.

Imana ivugana natwe binyuze mu bantu

Ariko ubwenge buva mu ijuru , irya mbere buraboneye kandi ni ubw’amahoro, n’ubw’ineza, bwemera kugirwa inama , bwuzuye imbabazi n’imbuto nziza, butarobanura ku butoni kandi butagira uburyarya. Yakobo 3: 17

Imana ikoresha abantu ivugana natwe. Yaba abayobozi mu itorero, umubyeyi wawe mu buryo bw’umwuka, umuhanuzi se no mu ndirimbo Imana ivuganiramo natwe hagamijwe kubaka ubugingo bwacu. Imana yatanze ubwenge ku bantu kugira ngo nibayegera by’ukuri ibabwire ibyo ishaka kubwira abantu bayo bityo babigeze ku bandi. Bigaragarira mu buryo bwo kubigisha, kubahugura, kubahumuriza ,kubamenyesha n’ibindi.

NI muri urwo rwego tugomba kumenya ko Imana ishaka ko tuba ibikoresho byayo ku bandi, ni yo mpamvu dusabwa guharanira gushaka ubwenge buva mu ijuru, ubwenge bw’Imana.

Imana ivugana natwe mu buryo budasanzwe

Yesu arabitegereza arababwira ati ' Ibyo ntibishokera abantu, ariko ku Mana byose birashoboka' Matayo 19:26

Ntitugomba kwibagirwa ko n’uyu munsi Imana ivugana natwe mu buryo budasanzwe. Hari inkuru zitabarika muri Bibiliya zigaragaza Imana ivugana n’abantu mu buryo budasanzwe aho Imana yakoresheje inzozi, iyerekwa ndetse n’indogobe nko mu nkuru ya Balamu. Uko Imana yari iri kera n’uyu munsi ni ko iri, kandi buri gihe ihora ishaka kuvugana natwe.

Akenshi Imana ikunze kuvugana n’abantu mu buryo bwihariye biciye mu nzozi, haba mukuburira abantu bayo, mukubahugura no mukubigisha .

Ni ingenzi kwita kuri izi nzira zose Imana ivuganiramo n’bantu bayo haba mu buryo budasanzwe, mu bantu, mu bihe runaka ndetse no mu ijambo ryayo( Bibiliya) kugira ngo tubashe kumva icyo Umwuka abwira amatorerero kugeza ubwo Yesu azagaruka.

Source: bibleoffline.com

[email protected]

Amarira ni ingenzi kuko adufasha kwerekana amarangamutima yacu. Iyo usomye witonze mu butumwa bwiza Pawulo yandikiye Abafilipi, usanga Pawulo yaravuganye amarira menshi avanze n’intimba ababazwa n’abarwanya ubutumwa bwa Kristo, ni byiza rero kurira kuko amarira afite umumaro utangaje mu guhishura uko wiyumva kandi azana impinduka byanze bikunze.

Hariho benshi bagenda ukundi, abo nababwiye kenshi, na none ndababwira ndira yuko ari abanzi b’umusaraba wa Kristo. Amaherezo yabo ni ukurimbuka, Imana yabo ni inda, biratana ibiteye isoni byabo bahoza umutima ku by’isi (Abafilipi 3:18-19).

Ese amarira avuga iki?

Amarira ashobora kuvuga (Aha ndavuga amarira nyayo, atari amahimbano). Amarira ashobora kukubwira ibyo ukunda, ibyo wicuza, ibyo wifuza, ibyo wabuze, amarira kandi akubwira igikomeretsa umutima wawe.

Kubura amarira (nyakuri) nabyo biravuga. Amaso yumye cyangwa atagira amarira ashobora kwerekana kubura urukundo, kubura kwicuza, cyangwa kwifuza. Bishobora kandi kwerekana kunanirwa gushima ibikwiye gushimwa, na none byerekana umutima utajya umenekera Imana.

Mubyukuri birakwiye kwita ku marira yacu cyangwa ku kubura kwayo, kuko amarira avuga ikintu cy’ingenzi ku buzima bwacu nk’uko Pawulo byamugendekeye amarira ye yasubanuraga ibintu bitandukanye.

Uburakari buvanze n’intimba

Ese amarira ya Pawulo atubwira iki? Abantu bari barihinduye abanzi b’ubutumwa bwiza bakomerekeje umutima wa Pawulo.

Pawulo yarize amarira menshi kandi yarizwaga n’abantu bigometse ku Mana bakarwanya ubutumwa bwayo, ibi yabigaragaje mu gice cya 3:2-3 (Abafilipi) aho yagize ati:”Mwirinde za mbwa, mwirinde za nkozi z’ibibi, mwirinde n’abakeba gukeba kubi, kuko twebwe turi abakebwe gukebwa kwiza, abasenga mu buryo bw’Umwuka w’Imana, tukishimira Kristo Yesu ntitwiringire iby’umubiri…”

Pawulo ntiyababaye gusa, nk’uko umurongo wa 18 ubigaragaza, ahubwo yashenguwe umutima kubera bene wabo b’Abayahudi bari baranze Mesiya wabo, Pawulo yarijijwe n’ abiyita abakristo banze ubutumwa bwiza maze bihindura abanzi b’ umusaraba wa Kristo '(Abafilipi 3:18). Yarize amarira nyayo kubwo “kurimbuka” bagombaga guhura nako mugihe bananiwe kwihana (Abafilipi 3:19).

Amarira ya Pawulo yerekanaga gushira amanga:

Pawulo yerekanye ubushizi bw’amanga budasanzwe mu kurengera ubutumwa bwiza. Gukomereka umutima bitewe n’abamurwanya. Uru ruvange rwo gukomereka umutima no gushira amanga bigaragaza umutima wuzuye urukundo no kwicisha bugufi.

Pawulo yakundaga Kristo ku rwego rwo hejuru nk’uko yabigaragaje (Abafilipi 3:2, 3:18). Mu gice cya 3:8 yashimangiye urukundo akunda Yesu ati: “Ndetse n’ibintu byose mbitekereza ko ari igihombo kubw’ubutunzi butagira akagero, aribwo kumenya Kristo Yesu. Ku bw’uwo nahombye ibyanjye byose, ndetse mbitekereza ko ari amase kugira ngo ndonke Kristo”.

Ikindi kandi Pawulo yakundaga abera ba Kristo cyane, nk’uko tubibona mu butumwa bwiza yandikiye Abafilipi 1:7-8 “Kandi birankwiriye ko mbatekereza ntyo mwese, kuko mu ngoyi zanjye no mu mpaka ngira kurwanira ubutumwa bwiza mpamya ko ari ubw’ukuri mbahoza ku mutima nibuka ko musangiye nanjye ubuntu bw’Imana.”

Umutima wuje urukundo rwinshi no kwicisha bugufi wagombaga gusenyuka mugihe abantu banze icyateye Pawulo umunezero nk’uwo n’ubwo bamurwanyaga byimazeyo kandi bakangiza umurimo we.

Pawulo yagaragaje umutima wiyoroheje. Yavuze ashize amanga igihe byari bikenewe. Ariko kandi ubutwari bwe bwerekezaga ku bandi bafite imitima ikomeye, itizera, yavuganye ubutwari buvuye ku mutima. Yababwiye arira, Mubyukuri buri wese akwiye kwifuza kugira urukundo nk’urwo no kwicisha bugufi.

Source: desiringGod.org

[email protected]

Mu ijoro ryo ku wa 30 Nzeri nibwo byamenyekanye ko abantu bataramenyekana bateye urugo rw’umuturage witwa Bizimana Jean Bosco wo mu Karere ka Gicumbi, binjira mu nzu yararagamo abana babiri b’abakobwa, umwe w’imyaka 17 n’undi ufite imyaka 20, barabasambanya babafatiyeho ibyuma bari bitwaje.

Mu butumwa yanyujije kuri Twitter, Polisi y’u Rwanda yatangaje ko yafashe abasore babiri bakekwaho ubwo bugizi bwa nabi.

Yagize iti “Twafashe Niyomugisha Issa na Ufitinema Jacques bakekwaho guhohotera abakobwa babiri bo mu karere ka Gicumbi, mu Murenge wa Byumba. Abafashwe bafungiye kuri Sitasiyo ya Polisi ya Byumba mu gihe iperereza ririmo gukorwa n’urwego rubishinzwe.”