Author: webrwanda

Guverineri Gatabazi asaba abaturage kuzirika ibisenge birinda ibiza

Ni ubukangurambaga bwatangijwe ku itariki 17 Ukwakira 2020, aho abaturage bakomeje gukangurirwa kuzirika ibisenge by’inzu zabo, batera ibiti kandi bashyira n’imireko ku nzu.

Guverineri w’Intara y’Amajyaruguru Gatabazi JMV, atangiza ubwo bukangurambaga mu Karere ka Musanze na Gakenke, yabwiye abaturage ko bakwiye kwitegura kurwanya ibiza igihe cyose, abibutsa ko kwirinda ibiza ari ukuzirika ibisenge by’inzu bakabikomeza, kandi bagatera n’ibiti bashyira n’imireko ifata amazi ku nzu.

Yagize ati “Kubera ko imvura yatangiye kugwa nabi turabasaba kuzirika ibisenge by’inzu zanyu mu kwirinda ibyo biza, ubuyobozi ni bubafashe kubona ibiti by’imbuto mubitere mwirinde ibiza kandi mubone n’imbuto zibarinda indwara, kandi ntimwibagirwe gushyira imireko ifata amazi ku nzu zanyu”.

Ubwo bukangurambaga bukomeje gukorerwa mu mirenge inyuranye igize uturere dutanu tw’Intara y’Amajyaruguru, aho abayobozi bakomeje gusura ingo bazisaba kwirinda ibiza bazirika ibisenge.

Intara y’Amajyaruguru iza ku isonga mu duce tw’igihugu twibasiwe n’ibiza by’imvura yo muri Mata na Gicurasi 2020, aho ibyo biza byatumye imiryango 4849 iva mu ngo zabo igacumbikirwa.

Muri iyo ntara Leta ikomeje gufatanya n’abaturage mu kubakira abahuye n’ibiza, aho mu miryango 3,403 ikeneye kubakirwa, 353 yamaze kubona inzu, mu gihe inzu 240 zamaze gukingwa.

Inzu 1,274 zimaze gusakarwa, izindi 1519 zimaze kuzamurirwa inkuta, mu gihe inzu 72 ari zo zimaze kubakirwa imisingi, ibibanza 69 bikaba byaramaze gusizwa, mu gihe imiryango 2,880 imaze kubona ibibanza aho izubakirwa, ariko imiryango 529 yo ntirabona ibibanza.

Akarere ka Gakenke ni ko kibasiwe kurusha utundi, aho imiryango 1,748 yasenyewe n’ibiza, hakurikira Akarere ka Rulindo aho inzu 1,136 zasenywe n’ibiza, Gicumbi hasenywa inzu 1,133, mu gihe Akarere ka Musanze ari ko gafite imiryango mike yasenyewe n’ibiza, aho ari inzu 406 Burera hasenyuka inzu 426.

Muri iyo Ntara kandi, mu miryango 4,849 yasenyewe n’ibiza, imiryango 31 icumbikiwe mu mashuri, 57 icumbikiwe mu bigo binyuranye, 67 irakodesherezwa, mu gihe imiryango 1,980 icumbitse mu baturanyi.

Ibiza by’imvura n’umuyaga ukabije byabaye mu ijoro ryo ku itariki 06 rishyira itariki 07 Gicurasi 2020, byibasiye iduce tunyuranye tw’igihugu, aho Akarere ka Gakenke kibasiwe abaturage 23 bahasiga ubuzima.

uruganda rwa SORWAL rwarafunze

Izo nganda ni urwakoraga ibibiriti (SORWAL) rwari rwarafunze imiryango kubera umwenda munini w’imisoro rwari rubereyemo Leta.

Ubwo rwahagarikaga gukora muri 2014, rwatumye ababarirwa mu 125 batakaza akazi, muri Nzeri 2018 rugurwa n’Umunyamalawi Osman Rafik, mu Ugushyingo 2020 hatangazwa ko rugiye gutanga akazi ku bantu 300, ariko na n’ubu ntiruratangira.

Hari n’uruganda GABI rwatunganyaga ibiryo, cyane cyane ibishyimbo, rukabigurisha bihiye. Rwakoreshaga abakozi 98. Umukiriya w’ingenzi warwo yari Urwego rw’Igihugu rw’amagereza. Bivugwa ko uru rwego rwambuye GABI amafaranga abarirwa muri miliyoni 500 maze irahomba.

Uruganda rundi ni urwatunganyaga impu rwitwa ‘New Rucep’. Rwakuraga ubwoya n’inkuru ku mpu, hanyuma rukazohereza hanze y’u Rwanda gutunganyirizwayo. Rwakoreshaga abakozi babarirwa muri 35.

Rwafunze imiryango muri 2017 rutegetswe n’ubuyobozi kubanza gushaka ukuntu rwakuraho umunuko waturukaga ku mazi arusohokamo, winubirwaga n’abaturage, nk’uko bivugwa na Michel Campion, umwe mu barushinze.

Campion avuga ko babonye uburyo bwo kugabanya uwo munuko nyuma y’umwaka, nta mafaranga bagifite yo kongera gutangira. Icyakora imashini zifashishwaga ziracyari nzima kuko banyuzamo bakazicana.

Ku kibazo cyo kumenya ikizakorwa kugira ngo izi nganda zongere gukora, bityo zitange akazi ku bantu batari bakeya, Guverineri w’Intara y’Amajyepfo agira ati “Ubuyobozi bw’intara biraduhangayikishije kandi twabifasheho umurongo wo kureba ukuntu inganda zakoraga n’ibindi bikorwa byari bifitiye akamaro abaturage bitagikora uyu munsi byakongera gukora”.

Ku bijyanye n’uruganda GABI by’umwihariko, Guverineri Kayitesi avuga ko ku bufatanye na MINICOM, RDB n’izindi nzego nkuru z’igihugu, hari gushakwa ukuntu rwakongera gukora vuba.

Guverineri Kayitesi avuga ko ubuyobozi bw’intara buri gushaka uko inganda zahoze i Huye zongera gukora

Ati “Iki kibazo cyigeze no kuganirwaho n’Inama y’Abaminisitiri, ndetse gifatirwa imyanzuro. Twizera rero tudashidikanya ko urwo ruganda ruzongera rugakora mu gihe cya vuba, rugafata umusaruro w’abaturage, n’abari bahafite akazi bakagasubirana, kandi n’abaturage bakabasha kubona umusaruro w’ibishyimbo utunganyije kandi neza”.

Naho ku bijyanye n’uruganda Sorwal, Umuyobozi w’Akarere ka Huye, Ange Sebutege, avuga ko akunze kuvugana na Osman Rafik waruguze, kandi ko yamubwiye ko ari hafi kuzaza gutangira.

New Rucep yo, Michel Campion yabonye abashaka kuyikodesha bakayitunganyirizamo impu, ariko yisanga atabasha gufata iki cyemezo wenyine kandi abo barufatanyije ari Abarundi. Icyakora ngo aho bazabonekera bazafata icyemezo yizeye ko kizaba ari ingirakamaro.

Abaturage bavuga ko imbuto zihenze kuko batabonaga ingemwe ngo baziterere

Umushinga wo gutera amashyamba no kubungabunga urusobe rw’ibinyabuzima mu gice cy’Amayaga (FLS Mayaga), ni wo ugiye guha ingemwe abo baturage bazitere bityo mu gihe kiri imbere bazajye babona imbuto zo kurya barwanye imirire mibi ndetse basagurire n’isoko.

Bamwe mu baturage baganiriye na Kigali Today, bavuga ko badaheruka kurya imbuto kuko ntazo bihingira ndetse n’aho ziri zihenze, bigatuma bazireka nk’uko bisobanurwa na Nyirahabimana Josée wo mu Murenge wa Muyira, hamwe mu ho uwo mushinga uzakorera.

Ati “Muri uyu Murenge wa Muyira aho wabona ibiti by’imbuto ni hake cyane kuko tutabona ingemwe ndetse n’aho ziboneka bigasaba kuzigura kandi nta mafaranga umuntu aba afite. Nk’ubu ndimo gukorera igihumbi ku munsi, sinabona rero amafaranga 500 ngo ngure avoka yo gutera ngire n’ayo mpahishiriza abana, mpitamo kuzireka”.

Ati “Icyakora ubu turishimye cyane kuko uyu mushinga ugiye kuduha ingemwe, uyu mwaka nkumva nanjye nzatera ibiti bizajya biduha imbuto, turwanye imirire mibi mu bana bacu”.

Semana na we ati “Nkanjye maze imyaka isaga ibiri nta rubuto ndiye kuko zihenda, hano nk’ipapayi imwe nto igura 200 na ho avoka ikagura 100, ayo mafaranga ni menshi ku buryo ntazigura ndetse n’abana ntazo barya. Gusa uyu mushinga nabonye ufite pepiniyeri kandi ngo bazaduha ingemwe nta kiguzi, ni ibyo kwishimira kuko ikibazo twagiraga gikemutse”.

Muri uwo murenge ibiti by’imbuto ziribwa ni bike cyane kandi birashaje ku buryo nka avoka zitacyera, ndetse n’ibiti bisanzwe by’ishyamba ni mbarwa.

Umuyobozi w’Akarere ka Nyanza, Ntazinda Erasme, avuga ko ingemwe zihabwa abaturage zikunze kuba nke ariko ko na bo bagombye kuzigurira ku bikorera bazifite.

Uwo mushinga ugiye guha abaturage ingemwe z’imbuto zinyuranye

Ati “Ku by’ingemwe z’imbuto ziribwa, hari izo twituburira duha abaturage, n’ubu dufite ibihumbi 12, gusa ntizakwira abazishaka bose. Ariko hari n’abazitunganya mu rwego rw’ubucururuzi ku buryo uzishaka yakwigurira, kuko iyo ibiti bikuze byera imbuto abantu bakazirya ariko kandi bifata ubutaka”.

Ati “Ndasaba rero abantu ko baha agaciro ibiti by’imbuto ziribwa, bakamenya akamaro kazo mu mirire y’abana n’iy’abakuru bityo bakajya kuzigura ku bazicuruza kuko henshi zihari”.

Umuhuzabikorwa w’uwo mushinga wo kurengera ibidukikije mu Mayaga, Nkurunziza Philbert, ahumuriza abaturage bo mu Murenge wa Muyira n’ab’ahandi ukorera ko hateganyijwe ibiti byinshi by’imbuto ziribwa bizahabwa abaturage.

Nkurunziza Philibert, Umuhuzabikorwa w’umushinga wo kurengera ibidukikije mu Mayaga

Ati “Muri uyu mushinga uzakorerwa mu Mayaga ugamije kuzamura imibereho y’abahatuye, ntitwari kuwukora tudatekereje ku mbuto ziribwa. Ni yo mpamvu muri uno mwaka wonyine w’ingengo y’imari wa 2020-2021, tuzaha abaturage bo mu turere umushinga ukoreramo, ingemwe ibihumbi 64, ariko buri mwaka tuzagenda tubaha izindi ngemwe kuko duteganya ko imbuto bazeza zazabinjiriza amafaranga kuko twifuza ko zazanacuruzwa hanze”.

Avuga kandi ko mu gice cy’Amayaga hera cyane avoka, imyembe, amacunga ndetse na mandarine kuko biberanye n’ubutaka bwaho, akaba ari byo bazaha ahanini abaturage.

Uwo mushinga uterwa inkunga n’Ishami ry’Umuryango w’Abibumbye ryita ku Iterambere (UNDP), n’Ikigo mpuzamahanga cy’ibidukikije (GEF), ugashyirwa mu bikorwa na REMA ndetse n’Ikigo cy’Igihugu cy’Amashyamaba (RFA).