Webrwanda Backend

Author: webrwanda

  • Umusaruro w’ibikomoka ku buhinzi wazamutseho 5%, uw’umuceri n’ibirayi uragabanuka mu 2019/2020 – #rwanda #RwOT

    Ibi bikubiye mu bushakashatsi NISR yashyize hanze mu Ukuboza 2020, bugamije kwerekana ishusho y’uko urwego rw’ubuhinzi rwawusoje ruhagaze. Bukorwa ku bufatanye n’inzego zose zireberera urwego rw’ubuhinzi.

    Ubu bushakashatsi bubaye ku nshuro ya kabiri bwakozwe hagendewe ku makuru yavuye mu bihembwe byose by’ubuhinzi by’umwaka wa 2019/2020 ni ukuvuga igihembwe cya A (Nzeri-Gashyantare), igihembwe cya B ( Werurwe-Kamena) n’igihembwe cya C kiganzamo ubuhinzi bw’imboga, ibijumba bukorerwa mu gishanga n’ubw’ibirayi bukorerwa mu gace k’ibirunga.

    Ubu bushakashatsi bukubiye muri raporo izwi nka ‘Upgraded Seasonal Agricultural Survey annual report’ bugaragaza ko ingano y’ahakorerwa ubuhinzi mu 2019/2020 yazamutseho 2% ugereranyije n’umwaka wari wabanje.

    Bugaragaza ko u Rwanda rufite ubutaka buhinzeho n’ubushobora guhingwaho bungana na hegitari miliyoni 1,4 ( bingana na 59% by’igihugu cyose) mu gihembwe A muri ubu butaka ubwahinzweho bungana na hegitari miliyoni 1,14, mu gihe mu gihembwe B hahinzwe ubungana na hegitari miliyoni 1,19.

    Mu 2019/2020 ubutaka bwose bwahinzweho ni hegitari miliyoni 1,1 ( 81% by’ubutaka bwose bushobora guhingwaho) ubu buso bw’ubutaka bwahinzweho bwazamutse ku kigero cya 2% ugereranyije n’ubwari bwahinzweho mu 2018/2019.

    Mu mwaka wa 2019/2020 umusaruro w’ibikomoka ku buhinzi muri rusange wazamutseho 5% ugereranyije n’umwaka ushize, nk’umusaruro w’urutoki wazamutseho 12%, uw’amasaka n’ibigori uzamukaho 7% mu gihe uw’imyumbati wazamutseho 8%.

    Impuzandengo y’ingano y’ibihingwa byagiye byera kuri hegitari imwe igaragaza ko mu mwaka ushize kuri hegitari imwe heze toni 1,5 y’ibigori, hera toni imwe y’amasaka, toni 3,9 z’umuceri, toni imwe y’ingano na toni 14,6 z’imyumbati.

    Ubu bushakashatsi bugaragaza kandi ko kuri hegitari imwe heze ibijumba toni 7,1, ibirayi toni 8,2, ibikoro n’amateke toni 6.5, ibitoki byo guteka toni 18,04 wakongeraho n’ibyo kwenga n’iby’imineke umusaruro wabyo byose kuri hegitari ukangana na toni 9,07.

    Muri uyu mwaka ushize kandi u Rwanda kuri hegitari imwe rwejeje ibishyimbo bingana na toni 0,68, ubunyobwa toni 0,45, soya toni 0,49, imboga toni 9,4 n’imbuto toni 4,96.

    Uko umusaruro wa buri gihingwa uhagaze

    Ibigori: Ubushakashatsi bwa NISR bugaragaza ko mu gihembwe cya A cy’umwaka wa 2020, ubuso bwari buhinzeho ibigori bwanganaga na hegitari 2 221 521, bukaba bwarazamutseho 3% ugereranyije n’ubuso byari bihinzeho mu gihembwe nk’iki mu 2019.

    Muri iki gihembwe kandi umusaruro w’ibigori wazamutseho 7% ugera kuri toni 353 999 ugereranyije n’aho wari uhagaze mu gihembwe A cya 2019. Impuzandego y’umusaruro w’ibigori igaragaza ko muri iki gihembwe kuri hegitari imwe heze toni 1,5.

    Mu gihembwe cya B, ubu bushakashatsi bugaragaza ko ubuso bwahinzweho ibigori butahindutse ugereranyije n’igihembwe cya B 2019, gusa umusaruro wo wazamutseho 5% ugera kuri toni 94 634.

    Ibijumba: Mu gihembwe A cya 2020 ubuso buhinzeho ibijumba bwanganaga na hegitari 89 427, wagereranya n’ubwo byari buhinzeho mu gihembwe nk’iki mu 2019 ugasanga bwagabanutseho 8%, ibi byatumye n’umusaruro wabyo ugabanukaho 6% ugera kuri toni 635,007.

    Mu gihembwe B ubuso buhinzeho ibijumba bwiyongeyeho 4% ugereranyije n’ubwo byari bihinzeho mu gihembwe nk’iki mu mwaka wari wabanje bugera kuri hegitari 84 545, ndetse muri iki gihembwe umusaruro wazamutseho 12% kuko habonetse toni 611 425.

    Imibare y’igihembwe C igaragaza ko ubuso bwari buhinzeho ibijumba bwanganaga na hegitari 5583, bukaba bwarazamutseho 5% ugereranyije n’uko bwanganaga mu gihembwe nk’iki umwaka wari wabanje.

    Kimwe n’ubuso umusaruro w’ibijumba muri iki gihembwe na wo wazamutseho 10%.

    Ibirayi: Imibare y’Igihembwe A cya 2020 igaragaza ko ubuso bwari buhinzeho ibirayi bwazamutseho 4% ugereranyije n’ubwo byari bihinzeho mu 2019 bugera kuri hegitari 51 516, gusa umusaruro wabyo wabonetse muri iki gihembwe wagabanutseho 9% ugereranyije n’uwari wabonetse mu mwaka wari wabanje ugera kuri toni 427 471.

    Imibare yo mu Gihembwe B igaragaza ko ubuso bwari buhinzeho ibirayi bwagabanutse ku kigero cya 11% ugereranyije n’ubwo byari bihinzeho mu gihembwe nk’iki mu 2019. Ubu buso bwageze kuri hegitari 43 950.

    Umusaruro nawo wagabanutseho 17% ugera kuri toni 352 441. Mu Gihembwe C ubuso buhinzeho ibirayi bwarazamutse ku kigero cya 5% ugereranyije n’ubwo byari bihinzeho mu gihembwe nk’iki mu 2019, gusa umusaruro wo wagabanutseho 4% ugera kuri toni 78 609.

    Imyumbati: Imibare y’Igihembwe B igaragaza ko ubuso bwari buhinzeho imyumbati bwanganaga na hegitari 190 447. Ubu buso bwaganutseho 2% ugereranyije n’ubwo yari ihinzeho mu gihembwe nk’iki mu 2019, gusa umusaruro wo wazamutseho 11% ugera kuri toni 578 545.

    Mu Gihembwe cya B ubuso buhinzeho imyumbati bwazamutseho 2% bugera kuri hegitari 192 156, umusaruro nawo wazamutseho 6% ugereranyije n’uko wanganaga mu 2019 ugera kuri toni 701 037.

    Nubwo umusaruro wa byinshi mu bihingwa wazamutse muri uyu mwaka wa 2019/2020, ku muceri, ibirayi n’ibishyimbo ho siko bimeze kuko umuceri wagabanutseho 11%, ibirayi bigabanukaho 12% n’ibishyimbo bigabanukaho 9%.

    Ubu bushakashatsi bugaragaza ko mu 2019/2020 mu Gihembwe A abahinzi 35,2% bakoresheje imbuto y’indobanure, mu Gihembwe cya B ikoreshwa n’abagera kuri 15,6% mu gihe mu Gihembwe C yakoreshejwe n’abagera kuri 30,6%.

    Muri uyu mwaka kandi mu Gihembwe cya A abahinzi 63,6% bakoresheje ifumbire y’imborera, mu Gihembwe B ikoreshwa n’abagera kuri 51,7% mu gihe mu cya C yakoreshejwe n’abahinzi 76,1%.

    Abakoresheje ifumbire mvaruganda mu gihembwe cya A ni 21.2%, abayikoresheje muri B ni 15.3% abayikoresheje muri C ni 64.1%.

    Umusaruro w’umuceri na wo waguye hasi

    Umusaruro w’ibirayi waragabanutse mu gihembwe cya mbere cy’umwaka ushize

    Mu 2019/2020 umusaruro w’ibikomoka ku buhinzi wazamutseho 5%

    source http://igihe.com/amakuru/u-rwanda/article/umusaruro-w-ibikomoka-ku-buhinzi-wazamutseho-5-uw-umuceri-n-ibirayi-uragabanuka

  • Dj Princess Flor yashyize hanze amafoto agaragaza ibibero bye atera abagabo kumwifuza – YEGOB #rwanda #RwOT

    Nyirimbabazi Flora wamamaye ku izina rya Dj Princess Flor akaba ari n' umunyarwandakazi uba mu gihugu cy´Ububiligi ari naho akorera akazi ke ko kuvangavanga imiziki, yashyize hanze amafoto agaragaza ibibero bye maze atera abagabo kumwifuza. Aya mafoto Dj Princess Flor yayashyize hanze abinyujije ku rukuta rwe rwa instagram.

    Nyuma yuko Dj Princess Flor ashyize hanze aya mafoto ye, yayaherekesheje amagambo agira ati : ” Askip on est en 2021! Happy New year… Cheers 🥂🥂🥂#happynewyear2021 “. Abakunzi ba Dj Princess Flor bakibona aya magambo bagize ibintu byinshi bitandukanye batangaza. Byinshi byatangajwe n'abafana ba Dj Princess Flor mwabisoma mukanze hano

    Source : https://yegob.rw/dj-princess-flor-yashyize-hanze-amafoto-agaragaza-ibibero-bye-atera-abagabo-kumwifuza/

  • Akarere ka Gisagara gakomeje kwesa imihigo mu kwegereza abaturage amashanyarazi n'amazi meza – #rwanda #RwOT

    Imibare igaragaza ko mu myaka itanu ishize abaturage bahawe amashanyarazi bavuye kuri 13% by'abari batuye aka Karere bakagera kuri 63,84% ndetse Akarere kanashyize imbaraga mu kongera ingano y'imihanda imurikirwa n'amatara mu gihe cy'ijoro.

    Umuyobozi w'Akarere ka Gisagara, Rutaburingoga Jérôme, avuga ko bavuye kure kuko mu 1994 muri aka Karere nta muturage n'umwe wagiraga amashanyarazi, kugeza n'aho akarere kubatse, hose nta mashanyarazi yaharangwaga. Mu 2010 abayafite nabwo bari bake cyane kuko banganaga na 2.2%, ariko muri 2015 baza kwiyongera bagera kuri 13%.

    Yagize ati 'Twateye intambwe kuko twavuye kuri 13% tugera kuri 63,84% aho amashanyarazi mu gihe cy'imyaka itanu yikubye hafi inshuro eshanu. Kuva 2010 kugeza uyu munsi mu myaka 10 dukubye inshuro hafi 32. Ni ibintu bikomeye cyane umuntu yakwishimira.'

    Amatara yo ku mihanda nayo muri iyi myaka itanu ishize hubatswe ibilometero 22,3, bisanga ibindi umunani byari bihari. Ubwo byose hamwe ni ibilometero 30,3.

    Muri aka Karere kandi hagiye kuzura uruganda rwa nyiramugengeri ruzatangira gutanga amashanyarazi muri Werurwe 2021, rukazatuma amashanyarazi ari mu gihugu hose yiyongeraho 40%.

    Hubatswe imiyoboro y'amashanyarazi itandukanye irimo uwa Mayaga-Hakani-Kibirizi- Nyange ifite ibilometero 92, wahaye amashanyarazi ingo ibihumbi 23. Hari kandi n'uwa Remera-Muganza-Ndora ufite ibilometero 43 wagejeje amashanyarazi ku baturage barenga ibihumbi 16 ndetse n'uwa Higiro-Kigembe-Mukindo w'ibilometero 100 watumye ingo zisaga ibihumbi 40 zibona amashanyarazi.

    Mu myaka itanu ishize abaturage begerejwe amazi meza muri metero zitarenze 500 basaga 12% by'abatuye Akarere, kuko bavuye kuri 61% bagera ku kigero cya 72,5%.

    Bamwe mu baturage bo mu Karere ka Gisagara bavuga ko guhabwa amashanyarazi n'amazi meza ari iterambere kuri bo kuko byabahinduriye imibereho.

    Karamage Frederic wo mu Murenge wa Mamba yagize ati 'Imibereho yacu yarahindutse kuko badutuje mu mudugudu mwiza urimo amashanyarazi n'amazi meza. Ntabwo tukirwara indwara ziterwa n'umwanda kuko dufite amazi meza kandi tuba ahantu hafite isuku.'

    Mukamwiza Immaculee wo mu Murenge wa Kansi na we avuga ko guhabwa amazi meza n'amashanyarazi byabahinduriye ubuzima.

    Ati 'Amazi meza yaradufashije cyane kuko twari tuyakeneye none bayaduhaye hafi ku buryo umwana ayavoma hafi akabona uko ajya ku ishuri. Mu ngo zacu turangwa n'usuku muri byose. Amashanyarazi atuma tuba ahabona kandi abana basubiramo amasomo nimugoroba nta kibazo.'

    Mu dusanteri dutandukanye two mu mirenge igize Akarere ka Gisagara hakorerwa ibikorwa bitandukanye bikenera amashanyarazi ku buryo nta washidikanya ko kuyahageza byatumye benshi bihangira imirimo irimo gusudira, kwandikisha imashini, gufotoza impapuro, serivise z'Irembo n'ibindi.

    Kugeza ubu Akarere ka Gisagara gafite ingo 88,201 ziri mu mirenge 13 ikagize n'utugari 59 naho imidugudu ikaba 514.

    Ingo zimaze guhabwa amashanyarazi zose ni 56,307 harimo izahawe akomoka ku miyoboro migari 45,101 zingana na 51,13% by'ingo ziri muri Gisagara. Hari kandi izahawe amashanyarazi akomoka ku mirasire y'izuba, zingana na 11,206 (12,7%).

    Imiyoboro igeza amashanyarazi ku baturage imaze kugera henshi mu Karere ka Gisagara

    Abatujwe mu midugudu bagahabwa amazi n’amashanyarazi bavuga ko byabahinduriye ubuzima

    Abacururiza mu dusanteri twahawe amashanyarazi bavuga ko bazarushaho kwihangira imirimo

    Mu dusanteri twa Gisagara hari kugaragara impinduka bitewe n’amashanyarazi yahagejejwe

    Mu baturage bahawe amashanyarazi harimo n’abakoresha ay’imirasire y’izuba

    Rutaburingoga Jérôme uyobora Akarere ka Gisagara avuga ko kavuye kure kuko mu 1994 nta mashanyarazi na macye yaharangwaga

    Source : http://igihe.com/amakuru/u-rwanda/article/akarere-ka-gisagara-gakomeje-kwesa-imihigo-mu-kwegereza-abaturage-amashanyarazi

  • Gasogi United yashimiye umutoza Casa Mbungo batandukanye, Jimmy Mulisa ari mu muryango winjiramo #rwanda #RwOT

    Gasogi United yashimiye uwari umutoza mukuru wayo, Casa Mbungo, ni nyuma yo kwemeza ko bamaze gutandukana aho agiye kwerekeza muri Kenya mu ikipe ya Bandari FC.

    Muri Nyakanga 2020, nibwo Casa Mbungo yagizwe umutoza wa Gasogi United, tariki ya 1 Mutarama 2020, ibinyamakuru byo muri Kenya bikaba byaratangiye kwandika ko uyu mutoza yamaze kumvikana na Bandari FC yo muri Kenya.

    Ku munsi w’ejo ibinyujije ku rukuta rwayo rwa Twitter, Gasogi United yemeje ko yamaze gutandukana n’uyu mutoza bamushimira uko babanye ndetse bamwifuriza amahirwe ahandi yerekeje.

    Bagize ati“Ikipe ya Gasogi United turashima umusanzu w’uwari umutoza wacu Casa Mbungo Andre. Tukwifurije ishya n’ihirwe aho uzajya hose.”

    Nyuma yigenda ry’uyu mutoza, amakuru avuga ko iyi kipe igomba kumusimbuza uwahoze ari umutoza wa APR FC ubu akaba nta kazi yari afite, Jimmy Mulisa.

    Gasogi Unite yifurije Casa Mbungo amahirwe ku mirimo mishya agiye kujyamo

    Jimmy Mulisa niwe ushobora kurangizwa Gasogi United

    Source : http://isimbi.rw/siporo/article/gasogi-united-yashimiye-umutoza-casa-mbungo-batandukanye-jimmy-mulisa-ari-mu-muryango-winjiramo

  • Rubavu : Umugabo ufite ubumuga bwo kutabona yafunzwe nyuma y’uko umugore we ucuruza kanyanga atorotse #rwanda #RwOT

    Uyu mugore witwa Mutuyimana Vestine, kuri ubu yamaze gutoroka nyuma y’uko polisi ije kumushakisha imukekaho ko akora ubucuruzi bwa Kanyanga ndetse akaba asanzwe ari umugore wa Munyanshoza.

    Ubusanzwe uyu muryango wari utuye mu Mudugudu wa Rwamikungu, Akagari ka Nyamikoni mu Murenge wa Kanzenze mu Karere ka Rubavu.

    Abaturage baganiriye na UKWEZI bavuga ko inzego z’umutekano zaje ku wa 30 Ukuboza 2020, zamenyeshejwe ko mu rugo rwa Munyanshoza na Mutuyimana hacururizwa kanyanga zahagera zigasanga Mutuyimana yamaze gutoroka zigahita zitwara umugabo we ufite ubumuga bwo kutabona.

    Umwe muri aba baturage utarifuje ko amazina ye atangazwa yagize ati 'Abapolice baje bagera mwa Mparigwa bari gucuruza kanyanga babuze umugore we batwara Mparigwa ufite ubumuga bwo kutabona amaranye imyaka 7 kandi kanyanga icuruza umugorewe.'

    Kuri ubu abana b’uyu muryango uko ari batandatu bari mu nzu bonyine nyuma y’uko Se ubabyara atawe muri yombi naho nyina akaba yaratorotse.

    Abaturanyi baka basaba ko bakorerwa ubuvugizi kugirango uyu Munyanshoza (Mparigwa) afungurwe kuko ibikorerwa munzu iwe atabizi cyane ko abana n’ubumuga bwo kutabona umugorewe akaba ariwe ukurikiranwa.

    Mutuyimana usanzwe acuruza ikoyobyabwenge cya kanyanga, kuri ubu uri mu bwihisho ariko akaba akibasha kwitaba telefone yaganiriye na UKWEZI.

    Yavuze ko umugabo we yabanje kujya inama n’umugabo we bakemeranya ko yemera gufungwa nk’aho ariwe ucuruza ibi biyobyabwenge ariko yagera kuri polisi agahindura ibyo bemeranyije akavuga ko atariwe ubicuruza ahubwo ari umugore.

    Yakomeje agira ati 'Mabuso yaramuriye yemeza ko arinjye ubucuruza, twari turi kumwe twembi, njyewe ngezemo bankatira nk’imyaka umunani cyangwa 10. Niyo mpamvu natorotse kuko we baramurekura ndabizi.'

    Mutuyimana yemera ko acuruza kanyanga ariko akavuga ko byakorwaga mu izina ry’umuryango kuko amafaranga yakuragamo yayifashishaga mu gukemura ibibazo byo mu rugo birimo no kwishyurira abana mituweri.

    Umunyamabanga Nshingwabikorwa w’Umurenge wa Kanzenze Nyiransengiyumva Monica avuga ko icyo kibazo cy’uwo muryanga atarakimenya ariko agiye kugikurikirana.

    Source : http://www.ukwezi.rw/mu-rwanda/2/article/Rubavu-Umugabo-ufite-ubumuga-bwo-kutabona-yafunzwe-nyuma-y-uko-umugore-we-ucuruza-kanyanga-atorotse

  • Cristiano Ronaldo yasinye amasezerano mashya y’ubuzima bwe bwose,azakuramo akayabo. – YEGOB #rwanda #RwOT

    Cristiano Ronaldo yatangiye ibihe byiza by'ubukungu nyuma yo gusinyana amasezerano mashya n'uruganda rwa Nike ku kayabo ka miliyari imwe y'amadorali y'amanyamerika.

    Nubwo muri Juventus Cristiano atagize ibihe byiza mu mwaka ushize kuva atabarabashije gutwara igikombe cya Shampiyona, kuri ubu ari mu bihe byiza ,aho yasinye kuzajya yamamaza ibicuruzwa by'uruganda rwa Nike ubuzima bwe bwose aho . Aya masezerano arenze kure ayo Adidas yagiranye na Lionel Messi ufatwa nka mukeba we .

    Cristiano yahize Messi ajya mu gatebo kamwe na Lebron James na Michael Jordan. 

    Muri ubu buryo, Cristiano Ronaldo atangiye umwaka mushya arenza umutungo Lionel Messi mu bukungu bwe.Usibye kuba afite umutungo urenga miliyoni 450 z'amadolari, afite amasezerano y'ubuzima bwe bwose ahuza n'abakinnyi nka Lebron James cyangwa Michael Jordan. Gusa ikintu Cristiano Ronaldo yabuze ni ukubona ikindi gikombe hamwe muri Juventus.

    Source : https://yegob.rw/cristiano-ronaldo-yasinye-amasezerano-mashya-yubuzima-bwe-bwoseazakuramo-akayabo/

  • Dore amakosa dukora twese iyo turimo koza amenyo n'uburyo bwo kuyakosora – YEGOB #rwanda #RwOT

    Ku buroso wogesha amenyo ndetse no mu kanwa ni hamwe mu hantu habarurwa mikorobe nyinshi; zigera kuri miliyari 10. Koza amenyo neza niwo muti wo guhangana n'izi mikorobe zose.

    Uburoso ukoresha woza amenyo, bushobora kuba indiri ya mikorobe iryaguye; guhera kuri bagiteri, virusi ndetse n'imiyege. Izi bagiteri zose nizo zitera amenyo yawe kwangirika, kuva amaraso ku ishinya, no kuzana indi myanda ku menyo.

    Reba hano amakosa akunze gukorwa mu koza amenyo, urebe niba hari ayo ukora n'uburyo ushobora kuyakosora

    Amakosa 7 akorwa mu koza amenyo

    1. Gukoresha uburoso bw'amenyo bukomeye

    Mu maguriro atandukanye habonekamo amoko atandukanye menshi y'uburoso bw'amenyo; gusa yose siko ari meza gukoresha ku menyo yawe.

    Igihe ugura uburoso bw'amenyo ni ngombwa guhitamo ubworohereye, kuko ubukomeye bushobora kwangiza ishinya yawe.

    Ikindi ugomba kwitaho n'ingano yabwo; uburinganiye nibwo bwoza mu kanwa uko bikwiye. Ukirinda uburoso bunini cyane.

    Mu gihe ugiye kugura uburoso ni ngombwa kureba ko bwanditseho SOFT.

    1. Kudahindurira uburoso ku gihe

    Hari umuntu ushobora gusanga amaranye uburoso umwaka wose!

    Iri ni ikosa rikomeye cyane, kuko uko ukoresha uburoso igihe kirekire niko byangiza byinshi ku menyo no mu kanwa hawe.

    Ntugomba kumarana byibuze uburoso amezi 3, ukihutira kubuhindura igihe warwaye inkorora, mu muhogo cg se ufite ibicurane bikomeye.

    1. Kutoza amenyo igihe gikwiye

    Abantu benshi ntiboza igihe gikwiriye amenyo; agashyira umuti woza amenyo ku buroso, nyuma y'amasegonda 30 akaba ararangije kuyoza.

    Iki si igihe gihagije ngo ube ukoze isuku ihagije mu kanwa hawe.

    Ugomba koza amenyo byibuze iminota 2
    Koza amenyo 2 ku munsi, kandi ukoza byibuze iminota 2

    Inama zitangwa n'abaganga b'amenyo; ni ngombwa koza amenyo byibuze iminota 2 kandi ukabikora 2 ku munsi.

    1. Kwibagirwa koza ururimi

    Nkuko twatangiye tubivuga mu kanwa haba mikorobe zingana na miliyari 2!

    Uburoso bwagenewe koza n'ururimi buba buteye gutya

    Birumvikana ko izi mikorobe ziba ziri mu kanwa hose, utibagiwe no ku rurimi.

    Mu gihe woza amenyo ukibagirwa koza ururimi; nibyo usanga bitera amenyo yawe kubora no kunuka mu kanwa kenshi.

    Niba urangije koza amenyo ntugomba kwibagirwa no gucisha ku rurimi, hari uburoso bwabigenewe, usanga bufite agace inyuma kagenewe koza neza ururimi, uzabushake.

    1. Kurya isukari n'ibiryohera byinshi

    Si wowe wenyine ukunda isukari, na bagiteri ziyikunda birushijeho!

    Bagiteri zifashisha isukari cyane mu kororoka no gukora acide. Iyi aside niyo yibasira amenyo ikayatera kumungwa no gucukuka.

    Ni ngombwa kwirinda isukari nyinshi, no kurya ibiryohereye cyane, kugira ngo urinde amenyo yawe kwangirika.

    Mu gihe udashobora koza amenyo nyuma yo kurya ibiryohereye bitandukanye, ushobora kurya nka pome, cg se ukunyuguza amazi mu kanwa kugira ngo ugabanye iyi sukari. Gusa inama nziza, ni uguhita woza amenyo nyuma yo kunywa cg kurya ibiryohera.

    1. Koza amenyo mu buryo bubi

    Ntugomba koza amenyo utya

    Benshi boza amenyo bameze nk'abagenda bazengurutsa cg bajya hirya no hino. Iri ni ikosa rikomeye kuko uretse kutoza amenyo neza, binatera ishinya kwangirika kenshi.

    Inama zitangwa n'abahanga mu by'amenyo ni ukoza umanura uzamura, kandi ukagera mu kanwa hose. Yaba inyuma ndetse n'imbere ku menyo, ndetse naho uhekenyera. Kandi ntugomba gukoresha ingufu cyane.

    Uburyo bukwiye bwo koza amenyo

    1. Kutogesha amenyo neza kwa muganga

    Kubera ubwinshi bwa mikorobe ziboneka mu kanwa, uzasanga bigoye uko waba woza kose, kugira mu kanwa hasa neza; hatarangwa imyanda ku menyo. Niyo mpamvu ari ingenzi cyane kugana ivuriro ryita ku menyo ukisuzumisha niba mu kanwa hawe hasa neza uko bikwiye, ukanahogesha neza.

    SRC:UMUTIHEALTH

    Source : https://yegob.rw/dore-amakosa-dukora-twese-iyo-turimo-koza-amenyo-nuburyo-bwo-kuyakosora/

  • Inyungu ku bitabiriye Expo 2020 yaragabanyutse kubera ingaruka za Covid-19 – #rwanda #RwOT

    Ibi ngo byatumye Imurikagurisha ry’uyu mwaka ritagira icyashara nk’icyari gisanzwe, ndetse abacuruzi babishingira kuba hari ibikorwa bimwe na bimwe byakumiriwe kandi byari muri bimwe byatumaga babona ababagana, hakiyongeraho no kuba isaha ya saa kumi n’ebyiri yari yashyizweho yo kuba bamaze gufunga ibikorwa byabo yarabakomye mu nkokora igakumira bamwe mu bakiriya babagana.

    Kalisa Umri ni Umunyarwanda witabiriye Imurikagurisha rya 2020, aho yamurikaga ibijyanye n’imitako, yavuze ko amasaha yari yagenwe yo guhagarika ibikorwa yakumiriye ababagana kuko igihe ababagana bagakwiye kuza bava mu kazi basangaga imiryango ifunze.

    Yagize ati ”Amasaha abakiriya bakabaye baza bagahaha cyangwa bakareba n’ibyo bicuruzwa ni bwo bataha mu ngo zabo”.

    Yongeyeho ati ”Mu by’ukuri iyi ni yo Expo itaragenze neza ugereranyije n’izindi zabanje. Abacuruza mu buryo bwo kwishyura ikibanza cyo gukoreramo (Stand) barahombye cyane kuko niba wenda barateganyaga gukuramo nka miliyoni 10 Frw, ugakuramo nk’ebyiri, ikibanza waragikodesheje nka miliyoni zirindwi, urumva ni ikibazo gikomeye”.

    Manirareba Theophile ukorera Ikigo gicuruza telefoni cya TECHNO nawe yavuze ko kuba barafungaga saa kumi n’ebyiri byatumye abitabira bagabanuka.

    Ati ”Muri rusange ubwitabire bwabaye buke ariko kugeza ubu ababashije kuza barebye ibyo dukora bamwe baranahaha. Ntabwo byagenze neza nk’umwaka wari wabanje, ariko ntabwo twavuga ko byagenze nabi ugereranyije n’ibihe twari turimo”.

    Yongeyeho ko kuba hari bimwe mu bikorwa by’imyidagaduro byakururaga abaryitabira byakumiriwe, biri mu byatumye rititabirwa uko bikwiriye.

    Ati ”Abantu benshi bakunda imyidagaduro, tujya ahantu ari byo tugiye kureba kenshi, urumva kuba imyidagaduro itari irimo cyangwa imikino y’abana byatumye wa mubare wazaga, ukajya n’ahandi kureba abaje kumurika, uwo mubare ntabwo waje nk’uko byari byitezwe”.

    N’ubwo aba bacuruzi bagaragaza imbogamizi zitandukanye, bishimira imbaraga zashyizwe mu gukumira ikwirakwira ry’icyorezo cya Coronavrus.

    Umuvugizi w’Urugaga rw’abikorera mu Rwanda PSF, Ntagengerwa Theoneste, we ntiyemeranya n’abavuga ko bahuye n’igihombo ku buryo babishyira ku rugaga rw’abikorera, akavuga ko hari bamwe batahombye ndetse ko hari bamwe batangiye kugura imyanya y’imurikagurisha ry’umwaka utaha.

    Ati ’’Nkurikije n’abo twaganiriye n’uburyo byagenze, ntawavuga ko hari abahombye bavuga ko bava mu bucuruzi kuko n’ubwo mu minsi ya mbere hari abavugaga ko nta bantu barimo bacuruza, nk’ubu ugeze mu masaha ya nyuma hari ibyo usanga byashizeho [kuko] byaguzwe“.

    Yakomeje agira ati ”Abagize ibibazo ni abari mu myidagaduro n’ibyo kunywa, ariko na bo twagiye dukorana bose twaraganiriye ntawe ufite ikibazo cyo kuba yarahombye ngo PSF yaramuhombeje. Ashobora kuba yarungutse make ariko ntabwo yahombye”.

    Imurikagurisha rya 2020 ryitabiriwe n’abamurika bagera kuri 382, barimo 73 baturutse mu mahanga, rikaba ryarabaga ku nshuro ya 23. Ryasojwe tariki 31 Ukuboza 2020 nyuma y’ibyumweru bitatu ryari rimaze riba.

    Abitabiriye ibikorwa bya Expo 2020 bavuga ko icyashara cyari hasi ugereranyije n’imyaka yabanje

    source http://igihe.com/amakuru/u-rwanda/article/abitabiriye-expo-2020-barataka-ibihombo

  • Uwaririmbye “You’ll Never Walk Alone” ya Liverpool yapfuye #Rwanda #RwOT via @kigalitoday #rwanda #RwOT

    Ku rubuga rwa Twitter rw’ikipe ya Liverpool bagize bati “Dufite agahinda kenshi kubera inkuru y’urupfu rwa Gerry Marsden, amagambo ye tuzahora tuyibuka.”

    Gerry wavukiye i Liverpool, yaririmbaga mu itsinda ryitwa Gerry and the Pacemakers ryaje kuririmba iyi ndiririmbo ya You’ll never walk alone yari yaranditswe na Rogers na Hammerstein mu 1945.

    You’ll never walk alone bisobanura ntuzigera ugenda wenyine mu kinyarwanda ya Gerry yakunzwe n’abafana b’umupira w’amaguru cyane cyane ab’ikipe ya Liverpool ikaza kuba nk’ikirango.

    Si ikipe ya Liverpool yakunze gukoresha iyi ndirimbo gusa kuko andi makipe nka Celtic, Feyenoord na Dortmund bagiye bakoresha iyi ndirimbo.

    Iyi kandi yari yarayisubiyemo muri 2020 ayiririmbira abaganga b’Abongereza bavuraga abarwayi muri iki gihe cya Covid-19.

    source https://www.kigalitoday.com/imyidagaduro/muzika/Uwaririmbye-You-ll-Never-Walk-Alone-ya-Liverpool-yapfuye

  • Miss Mutesi Jolly yavuze indirimbo 10 zamunyuze muri 2020 #rwanda #RwOT

    Nyampinga w’u Rwanda 2016, Mutesi Jolly yatangaje indirimbo 10 zamufashije bituma asoza umwaka wa 2020 neza.

    Mu ndirimbo zamushimishije muri 2020, ni indirimbo zose z’abahanzi nyarwanda nta n’imwe y’inyamahanga irimo.

    Yifashishije urukuta rwe rwa Twitter, yagaragaje izi ndirimbo, akaba ari indirimbo n’ubundi zisanzwe zikunzwe, zaririmbwe n’abahanzi b’ibyamamare nyarwanda.

    Ni urutonde rugaragaraho abahanzi nka The Ben, Bruce Melodie, Meddy, Riderman, Knowless n’abandi.

    Indirimbo 10 z’abahanzi nyarwanda zakunzwe na Miss Mutesi Jolly

    1:katerina by @BruceMelodie
    2:vazi by @TheBen250
    3:my love by @tomclosetweets
    4:mambata by @RidermanRiderzo
    5:nyigisha by @Knowless1butera
    6:Zoli by @nel_ngabo7:nahawe ijambo by vestine and Dorcas
    8:Dusuma by @Meddyonly ft @OtileBrown
    9:umusaza by bulldog
    10:imbaraga by @charlynanina_rw

    Miss Mutesi Jolly yaryohewe n’indirimbo nyarwanda

    Source : http://isimbi.rw/imyidagaduro/miss-mutesi-jolly-yavuze-indirimbo-10-zamunyuze-muri-2020