Author: webrwanda

Mu minsi yashize iki gihugu cyari giherutse gutangaza ko abaturutse mu bihugu nka Africa y’Epfo Tanzania na Repubulika Iharanira Demokarasi ya Congo batemerewe kwinjira muri kiriya gihugu uretse abenegihugu bashaka gutaha.

Ubu hiyongereyeho abaturuka mu Rwanda, u Burundi ndetse na Leta Zunze Ubumwe z’Abarabu.

Ni icyemezo cyatangajwe na Minisitiri ushinzwe ubwikorezi mu Bwongereza, Grant Shapps wabitangaje yifashishije urubuga rwa Twitter.

Ubuyobozi bwa kiriya gihugu buvuga ko iki cyemezo kuri ibi bihugu bitatu gitangira kubahirizwa uyu munsi ku wa Gatanu tariki 29 Mutarama 2021.

Ngo ni icyemezo kigamije gukumira ubwandu bushya bwa COVID-19 bwagaragaye muri Africa y’Epfo.

Minisitiri w’Ubuzima w’u Rwanda, Dr Daniel Ngamije aherutse gutangaza ko ubu bwoko bushya bwa COVID-19 butaragaragara mu Rwanda ariko ko biterwa n’ibipimo bikoreshwa ku buryo mu minsi ya vuba iri imbere hazaba hakoreshwa uburyo bushobora kuba bwatahura buriya bwoko bushya.

U Rwanda ruje mu bihugu bitagomba kwinjira mu Bwongereza mu gihe kuri uyu wa Kane ikigo cy’Ubushakshatsi Lowy Institute cyo muri Australia kirushyize ku mwanya wa gatandatu ku Isi mu kwitwara neza mu guhangana na COVID-19.

Uru rutonde ruyobowe na New Zealand rugaragaza ko ibihugu bifite abaturage bacye ari byo biri imbere mu kwitwara neza mu rugamba rwo guhangana na COVID-19 mu gihe ibihugu bifite abaturage benshi biza inyuma.

UKWEZI.RW

Ku wa Gatatu tariki 27 mu Rwanda Covid-19 yishe abantu babiri, handura 281, hakira 181, abantu 4 941 ni bo bakirwaye. Muri rusange kuva muri Werurwe 2020, Covid-19 imaze kwica abantu 183.

Ikigo Lowy Institute kivuga ko mu gukora ubushakashatsi bwacyo cyashingiye ku bipimo bitandatu birimo ingano yo gupima Virusi ku mubare w’abaturage, imibare y’abandura, imibare y’abapfa, gusesengura amakuru atangwa n’ibindi.

New Zealand ni iya mbere ku rutonde rw’ibihugu 100, ifite amanota (94.4) mu guhashya iki cyorezo kubera gahunda za 'Guma mu Rugo’ no gupima abantu benshi.

Ibihugu bya Vietnam, Taiwan, Thailand, Cyprus (Ibirwa bya Chypre), u Rwanda, Iceland, Australia, Latvia na Sri Lanka biza mu 10 bya mbere mu byakozweho isesengura n’ubushakashatsi n’amanota (77.5).

U Rwanda rufite amanota 80.8%, ikindi gihugu cya Africa kiri hafi ku rutonde ni Togo iri ku mwanya wa 15.

Mu mpera z’Icyumweru gishize Minisiteri y’Ubuzima ifatanyije n’Ikigo cy’Igihugu cy’Ubuzima (RBC) bapimye COVID-19 ibyiciro by’abaturage byatoranyijwe muri Kigali birimo abakuze barengeje imyaka 69, abafite indwara zidakira n’abashobora kuba barahuye n’abanduye Covid-19.

Nyuma Ministeri y’Ubuzima yatangaje ko iki gikorwa gikomereza no ku bandi bantu bashaka kwipimisha ku bushake hirya no hino mu gihugu kugira ngo bamenye uko icyorezo gihagaze.

Kigali iri muri Guma mu Rugo kuva tariki 19 Mutarama 2021, ingamba Leta yavuze ko zizamara iminsi 15, ndetse ingendo zihuza Intara n’izihuza Kigali n’izindi Ntara zarahagaritswe kugira ngo igihugu gihangane no kugabanya ubwandu bushya.

Mu Karere ka EAC u Rwanda ruri ku mwanya wa Mbere kimwe no muri Africa, Uganda ni iya 31 (amanota 59.7), D.R.Congo iri ku mwanya wa 40 (amanota 54.9), Kenya ku mwanya wa 49 (amanota 48.2), Tanzania, n’ u Burundi ntibiri ku rutonde kuko nta mibare bitanga kimwe n’Ubushinwa n’ibindi.

Ibihugu byanyuma birimo Chile ya 90, Ukraine, Oman, Panama, Bolivia, Leta zunze Ubumwe za America ni iya 95 (amanota 17.3) yegeranye na Iran, Colombia, Mexico (Mexique) na Brazil ya nyuma ku mwanya wa 98 (amanota 4.3).

Amakuru avuga ko uyu mugabo bikekwa ko yishe umugore we mu masaha ya saa tanu z’igicuku, ngo akaba yabanje gucuranga radio cyane.

Hategekimana akimara kwica umugore we yagiye kwirega kuri Polisi ya Kimisagara, bagiye kugenzura basanga umurambo w’umugore mu nzu, umugabo bamwambika amapingu bamushyikiriza RIB ya Gatsata.

Kavuna Jeanine ushinzwe amajyambere mu Mudugudu wa Muremera yavuze ko aba bantu babanaga batagaragaza amakimbirane cyane.

Yagize ati: “Ni kumwe abantu baba babana bucece ariko utazi ngo bafitanye ibihe bibazo cyane ko nta gihe kinini bari bamaze mu Mudugudu wacu, natwe urupfu rw’uriya mugore rwadutunguye.”

Kwica umuntu wabigambiriye, amategeko y’u Rwanda ateganya igihano cyo Gufungwa Burundu.

Nice USANASE wahisemo kwitwa Nice Moto nk’amazina akoresha mu ruhando rwa muzika, ni umukobwa ukora umuziki wo kuramya no guhimbaza Imana, akaba ari urugendo yatangiye mu mwaka wa 2016, gusa mbere yaho kugeza n’ubu ni n’umuririmbyi muri korali. Atuye mu mujyi wa Kigali ku Kimihurura, mu mudugudu wa Juru, akaba asengera muri ADEPR ku mudugudu wa Kabare ahazwi nka ‘Kacyiru-Merdien’. Ni umuhanzikazi uvuga ko muri iyi minsi ari gukorera mu mavuta mashya. Ati “Naje mu mavuta mashya”.

UMVA KU INYARWANDA MUSIC INDIRIMBO ‘IGARE’ YA NICE MOTO

Mu muziki amazemo hafi imyaka 5 amaze gukora indirimbo hafi 15. Anafite Album igizwe n’indirimbo 8 ari zo: Amakuru y’umurwa, Iwacu ni heza, Elohim, Igitondo cy’umugisha, Mbere na mbere Imana, Muzaririmba, Shimwa Mana na Ibuye ry’imfatizo. Avuga ko anafite izindi ndirimbo 4 azashyira kuri Album ye ya kabiri, izo akaba ari; Ariho, Nzakenyuruza Abami, Akato k’utwatsi na Igare zakozwe na Producer Martin. Avuga ko yiyise ‘Nice Moto’ bisobanuye ‘Umuriro mwiza’ kuko akora indirimbo zihuta cyane, ibintu agereranya n’umuriro ariko mwiza na cyane ko agamije kuvana benshi mu byaha.

Nice Moto yashyize hanze indirimbo y’Imana yise Igare

Mu kiganiro na InyaRwanda.com, Nice Moto asobanura urugendo rwe mu muziki usingiza Imana yagize ati “Natangiye umuziki mu 2016 ni bwo nasohoye album ya 1, gusa nsanzwe ndi umuririmbyi. Intego yanjye ni ukwamamaza ubwami bw’Imana bukagera kure hashoboka”. Avuga ko indirimbo ye nshya ‘Igare‘ yayanditse ashaka guhumuriza abantu, ati “Nari ngamije guhumuriza abantu ndetse nkababwira ko hari Umwuka utanga ubugingo”.

Ni indirimbo ashyize hanze mu masaha macye ashize, gusa avuga ko yayanditse kera, ndetse ngo aba yarayisohoye mu mezi yashize ariko azitirwa n’indirimbo ‘Igare’ Mico The Best yahise ashyira hanze mu minsi nawe yiteguraga kuyigeza ku bakunzi be. Nice Moto ngo yanze guhita nawe ayisohora ndetse avuga ko yigiriye inama yo kureka kuyishyira hanze ariko Umwuka w’Imana amusaba gushyira hanze indirimbo ye ‘Igare’. Avuga ko yanze gusuzugura Imana, akaba ariyo mpamvu yayishyize hanze.

Nice Moto araganira cyane! Nta rungu wagira muri kumwe

Twamubajije niba indirimbo ‘Igare’ ya Mico The Best ayizi, adutangariza ko ayizi rwose kuko anayumvana abantu benshi cyane barimo n’abakristo. Yabajijwe niba indirimbo ye ‘Igare’ abantu batazayitiranya n’indirimbo ‘Igare’ ya Mico The Best yamamaye mu gihugu, abihakana yivuye inyuma. Ati “Yego ndayizi, nari nyifite nshaka kuyisohora ariko iya Mico irayibanziriza noneho mba nyiretse nsohora iyitwa “Akato k’utwatsi” ariko Umwuka akomeza kubimpatira rero ndayisohora. Oya ntabwo bazayitiranya”.

UMVA HANO INDIRIMBO ‘IGARE’ YA MICO THE BEST

Nice Moto ushimira Issa Noel Karinijabo wamufashije cyane mu muziki we avuga ko arimo gutegurira abakunzi be amashusho y’indirimbo ye ‘Igare‘ n’ibindi byinshi byiza Umwuka azamuha akaba yiteguye kuzabigeza ku bakunzi be. Ubwo twari twamusuye iwe mu rugo ku Kimihurua, Nice Moto yabajijwe na Shema Aime Patrick wa InyaRwanda.com niba mu mashusho y’iyi ndirimbo ye ‘Igare‘ azakoresha igare abantu bazi na cyane ko ku ifoto yamamaza iyi ndirimbo ye, agaragara ari ku igare, asubiza ko ashobora kuzakoresha igare risanzwe cyangwa ‘igare ry’Umwuka’.

Yadutangarije ko akunda cyane Butera Knowless na Niyo Bosco, anaduhishurira agahinda yatewe n’umuntu yirinze kuvuga izina rye wamubeshye ko azamuhuza na Producer Clement kuko ngo yumvise ijwi rye akarikunda cyane, akamusaba ko yazabahuza akamukorera. Avuga ko iryo joro abwiwe ayo magambo, yararanye ibyishimo byinshi ndetse ngo ntiyasinziriye kuko byari kumufasha guhura na Knowless Butera no gukorerwa indirimbo n’umu Producer yubaha cyane. Yakomeje gutegereza ko azahuzwa na Knowless amaso ahera mu kirere bimutera agahinda kenshi.

Mu ndirimbo ‘Igare’ ya Nice Moto humvikanamo aya magambo “Oya nta gare ririho, nkuzaniye amakuru mashya, ndasibanga urupfu, ndareba ahazaza heza hawe, ndahanurira ubwanjye n’ubwawe. Ba bana ba Baramu bari hehe ko mbona akabo kashobotse ndumva ijwi ry’Uwitek rimbwira ngo dore uributswe, amasengesho yawe yose ni ukuri yaributswe, ibiganza byariho iminyururu ikimenyimenyi ubu bipfumbase Bibiliya, wampinduriye amateka rwose biragaragara. Aburahamu yizeye isoko y’ubuzima Imana aba umuntu udasanzwe, ndakwizeye, nkwikomejeho sinzakurekura”.

Twamubajije igare yaririmbye iryo ari ryo na cyane agaragara ku igare abantu bagendaho, akaba ari naryo na Mico The Best yifashishije mu ndirimbo ye ‘Igare’, maze Nice Moto adusubiza agira ati “Mwibuke ko hari abantu bagiye ku igare bagiye mu ijuru, ibyo singiye kubivugaho, ndabizi ko babizi ko hari igare ryazamutse rijyana abantu mu ijuru.” Yavuganye agahinda ko abakristo n’abantu bose muri rusange bamaze kwibagirwa igare ry’Umwuka wera. Yasabye abantu kumva indirimbo ye ‘Igare’ kuko bazarushaho kuyisobanukirwa neza ntibayitiranye n’iya Mico.

Nice Moto yababajwe cyane no kubeshywa guhura na Knowless Butera

UMVA HANO INDIRIMBO NSHYA ‘IGARE’ YA NICE MOTO

REBA HANO IKIGANIRO KIRYOSHYE TWAGIRANYE NA NICE MOTO

INTERVIEWER: Shema Aime Patrick – InyaRwanda.com

Mc Tino amaze iminsi araritse inshuti ze, abafana, abavandimwe n'abandi ko yitegura gutangira imirimo mishya. Uyu munsi yakoze ikiganiro asezera abafana be kuri Radio n'abanyamakuru bakoranye.

Benshi bavuze ko yabaryohereje mu biganiro by'imiziki yumvikanyemo, abandi bavuga ko bazamukumbura. Bamwe mu banyamakuru baje bamusanga kuri Royal Fm, bamushimiye umuhate yagaragaje n'uburyo yagiye abatinyura mu kazi kabo ka buri munsi.

Ejo ku wa Gatanu tariki 29 Mutarama 2021, Mc Tino azakora ikiganiro cye cya nyuma kuri iyi Radio. Ni ikiganiro yahaye umwihariko w'umuziki yifashishije Dj . Ndetse yavuze ko azakora iki kiganiro agacyesha.

Ku gicamunsi cy'uyu wa kane tariki 28 Mutarama 2021, Mc Tino yabwiye INYARWANDA ko yasezeye kuri Royal Fm kubera ko yabonye akazi kuri Radio Country Fm ikorera mu Karere ka Rusizi yumvikanira ku murongo wa 91.3 Fm.

Uyu muhanzi wakunzwe mu ndirimbo zitandukanye yavuze ko yamaze gusezera ku buyobozi bwe, abanyamakuru bakoranaga umunsi ku munsi n'abandi. Ndetse ko bamushimiye umusanzu we, uko yababaniye n'ibindi byinshi bisize urwibutso kuri bo.

Mc Tino yari amaze umwaka umwe n'iminsi 10 akorera kuri Royal Fm, dore ko yatangiye kuhakora ku wa 19 Mutarama 2020. Uyu mwaka umwe waje wiyongera ku myaka itatu yahakoze mbere y'uko yerekeza kuri KFM. Bivuze ko akoreye Royal Fm imyaka ine.

Tino wamuritse Album 'Umurima' yabwiye INYARWANDA ko ubuyobozi bwa Royal Fm bwamushimiye umusanzu we kandi ko biteguye kongera kumwakira igihe cyose yagarukira.

Umuhazi akaba n’umunyamakuru Mc Tino yatangaje ko yamaze gusezera kuri Royal Fm

Uyu muhanzi wakoraga ikiganiro 'Friday Night Live with Mc Tino' n'ibindi, ati 'Ikintu nshimira Royal Fm ni nk'umuryango. Nasezeye na boss ubwe (Jackie) arambwira ati 'turababaye ariko reka tuguhe umugisha'. Arambwira ati 'nibyanga uzagaruke, urumva icyo kintu.'

'Ni abantu twuzuzanyaga, ni Radio iguha uburenganzira bwawe kandi yita ku bakozi bayo. Ikindi nshimira Royal Fm ni uko aho dukorera ari heza cyane. Abatumirwa benshi banyurwa n'ahantu tubakirira. Ndashimira buri wese.'

Tino yashimye abantu bamukunze kuva atangiye urugendo rw'itangazamakuru abasaba kuzakomeza kubana nawe kuri Radio nshya yerekejeho y'i Rusizi.

Kuri Radio Country Fm y'i Rusizi, Mc Tino afite akazi karimo gutegura porogaramu za Radio, kwigisha no guhugura abanyamakuru, kubereka uko buri kimwe cyose gikorwa n'ibindi byinshi bikarishya umunyamakuru nyawe.

Mc Tino azajyana n'umunyamakuru uzwi ku izina rya Kadada ukorera Isango Star.

Tino yavuze ko Radio Country Fm yerekejeho ari iy'urubyiruko ifite studio nziza n'ibikoresho bigezweho ibanjirijwe na Royal Fm ndetse na Kiss Fm. Yavuze ko afite intego yo guhindura imyidagaduro mu Mujyi wa Rusizi kandi ukaba umujyi w'Ubukerarugendo.

Ati 'Tugiye guhindura amakuru, imyidagaduro, siporo n'ibindi. Ku buryo Rusizi iba Umujyi w'imyidagaduro.'

Mu gihe cy'umwaka umwe Tino yari amaze kuri Royal Fm yakoze ibiganiro bitandukanye byibanda ku muziki yakira abatumirwa barimo abo mu nzego zikomeye z'Igihugu, abahanzi, abamamaza ibikorwa byabo n'abandi benshi.

MC Tino yamenyekanye mu itsinda rya TBB, ashinguramo ikirenge atangira gukora umuziki ku giti cye. Aherutse gusohora indirimbo ‘Titiza’ yaje ikurikira izirimo 'Njyewe nawe', 'My Love' yahuriyemo na Javada, 'Umurima' yitiriye alubumu ye nshya n'izindi nyinshi.

Mc Tino yavuze ko yerekeje kuri Radio Country Fm ikorera i Rusizi yashinzwe n’umuhanzi Noopja wamamaye mu ndirimbo ‘Murabeho’

Mc Tino yavuze ko afite intego yo guhindura imyidagaduro mu Mujyi wa Rusizi no gukarishya abanyamakuru ba Radio Country Fm

KANDA HANO WUMVE INDIRIMBO ‘TITIZA’ Y’UMUHANZI MC TINO

Umuhanzi bijya bibaho akibagirana ariko ibihangano bye ntibizima na gato, bihora bigaruka mu mitima ya benshi imyaka ikaza indi igataha. Ese aba bahanzikazi tuvuze haruguru ubibukira kuki? Iyo umuntu avuze izina Miss Shanel cyangwa Miss Jojo ni iki wumva vuba kuri bo?. Aba bombi ubundi mu mwaka wa 2007 nibwo batangiye kwatsa umuriro mu myidagaduro, nibo bahanzikazi bari bahiriwe cyane na muzika mu gihe cyabo.

Umuhanzikazi Nirere Ruth, wamamaye cyane ku kazina ka Miss Shanel, iyo umuvuze benshi bumva cyane ijambo 'Ndarota', nibyo koko 'Ndarota' yari indirimbo yabaye Virusi mu bakunzi ba muzika kugeza magingo aya. Abakurikira muzika bawukurikiranye kuva nyuma ya 2000-2015 bazi neza, Miss Shanel na Miss Jojo.

Miss Shanel indirimbo ze 3 zageze kure zirimo; 'Ndarota', “Nkukunda Byahebuje', na 'Nakuta' naho Miss Jojo azwi cyane mu ndirimbo nka 'Mbwira', “Siwezi Enda”, n’izindi.

Nirere Ruth ubu ubana n’umugabo mu Bufaransa yakanyujijeho

Aba bahanzikazi bari bafite amajwi meza cyane mu miririmbire ku buryo bahagaritse muzika benshi birababaza, burya umuhanzi ntapfa kurekura muzika burundu kuko umwe muri aba wakumva ashyize hanze indirimbo kuko  abahanga bavuga ko 'agatoki kakombye inkono gahora karegarega'. Tutanirengagije ko Miss Shanel ubwo aheruka mu Rwanda mu mwaka wa 2019 yavugaga ko afite imishinga myinshi ya muzika, ibisobanuye ko we atawuhagaritse.

Ibituma baba inkumburwa muri muzika Nyarwanda nk'abari bayoboye igitsinagore mu muziki nyarwanda

Miss Jojo yarakundwaga cyane mu ijwi rye

Aba bombi barahatanye dore ko bamaze imyaka irenga 10 bakora muzika, bagerageje kwagura muzika Nyarwanda mu bihugu bituranye n'u Rwanda, nka Miss Shanel yakoranye indirimbo n'umuhanzi witwa Wyre wari ukunzwe muri Kenya, aza no gukorana na Mesach Semakula uzwi cyane muri Uganda, mu gihe Miss Jojo yagerageje gukorana indirimbo n'abanzi barimo, Michael Ross wa Uganda, uwitwa DNG ukomoka muri Kenya tutibagiwe na Kidumu Kibido Kibuganizo w'umurundi w'icyamamare.

Bibukirwa kandi ku bitaramo n'amarushanwa bitabiriye, Salax Awards igitangira, Miss Shanel yarayitabiriye muri 2009, mugenzi we Miss Jojo yitabiriye Salax Awards muri 2010 yaje no kuyegukana. Mbere gato muri 2008, hari amarushanwa yitwaga, Pear Of Africa Awards, bombi barayitabiriye ariko Miss Shanel ntiyahiriwe nayo  inshuro 3 zose yayitabiriye mu gihe mugenzi we Miss Jojo iri rushanwa rya Pear Of Africa yaryegukanye muri 2008.

Miss Jojo na Miss Shanel, impano zabo zarayingayinganaga, benshi baracyabakumbura mu muzika nyarwanda. Bagiye kandi bafata indege kenshi berekeza i mahanga gukora ibitaramo kuko nka Miss Shanel yakoze ibitaramo 2 ku mugabane w'u Burayi, gusa na mugenzi we Miss Jojo yataramiye muri Amerika kenshi no mu Bubiligi.

Abakunzi babo muri muzika, basa nk’aho bamaze kubibagirwa kuko imyaka isaga 7 irihiritse batavugwa cyane mu ruhando rw'imyidagaduro, ariko uko iminsi igenda iza indi igataha, muzika yunguka abandi basimbura abari barababanjirije.

Ubu twavuga ko n’ubwo Miss Jojo na Miss Shanel bazibukiriye muzika, Marina, Queen Cha na Butera Knowless babasimbuye mu kibuga cy'imyidagaduro ku ruhande rw'igitsina gore kandi nabo bahagaze neza cyane. Hari abahanzikazi benshi bakomeje kunga ikirenge mu cyabo bazamura muzika Nyarwanda. 

Indwara zititabwaho uko bikwiye zizwi nka NTDs (Neglected Tropical Diseases) ni uruhurirane rw'izigera kuri 13 zibasira cyane ibihugu muri rusange ibihugu biri mu nzira y'amajyambere, byiganjemo ibyo ku Mugabane wa Afurika, cyane cyane ibyo Munsi y'Ubutayu bwa Sahara u Rwanda ruherereyemo.

Mu Rwanda, indwara zititabwaho uko bikwiye zibangamiye ubuzima bw'abaturage, zigizwe n'inzoka zo mu nda (runwa, mugugunnyi, munyunyuzi, …), bilariziyoze, amavunja, imidido (bamwe bayita ibitimbo), shishikara (bamwe bita uruheri), Trachoma (Uburwayi bw'amaso bushobora kuvamo ubuhumyi), ibisazi by'imbwa (kurumwa n'imbwa) n'ubumara bw'inzoka (kurumwa n'inzoka).

Indwara zizahaza abazirwaye ndetse hari n'abo zihitana; ziri mu cyiciro cy'izamaze gucika ahandi hose ku Isi, ariko ziracyazahaza abantu barenga miliyari 1,7 batuye mu bihugu bikennye. Ibi bituma izi ndwara zititabwaho, bityo zigakomeza kuguma mu gice kimwe cy'Isi kandi bimaze kugaragara ko zarandurwa burundu ku Isi yose.

Iyi niyo mpamvu Ishami ry'Umuryango w'Abibumbye ryita ku Buzima, OMS, ryateranyije inama igamije kwemerezamo gahunda y'imyaka 10 (2021-2030) igamije kugabanya cyangwa kurandura izo ndwara burundu.

Izo ntego zivuga ko buri gihugu mu bikigaragaramo izo ndwara kigomba kuba cyaranduye imwe muri zo mu myaka 10 iri imbere, bityo ubukana bwazo muri rusange bugahashywa ku rwego rwo hejuru.

Perezida Kagame yashimye OMS yashyizeho iyi gahunda, avuga ko izo ndwara zitera ibibazo bikomeye birimo ubumuga bw'umubiri n'ubwo mu mutwe, bityo ko zikwiye kurandurwa mu buryo bwose bushoboka.

Yagize ati “Izo ndwara zirababaza kandi zitera ubumuga bw'igihe kirekire. Zituma kandi abana badakura neza, yaba mu mitekerereze no ku mubiri. Niyo mpamvu umuryango mpuzamahanga ukwiye gushyira mu bikorwa iyi gahunda, kugira ngo tugere ku ntego z'iterambere rirambye.”

Perezida Kagame kandi yavuze ko kimwe mu byashoboje u Rwanda guhangana no kurandura zimwe muri izi ndwara ari uko ubuvuzi bwazo bwashyizwe muri serivisi z'ubuzima zitangwa kugera ku rwego rwo hasi.

Yongeyeho ko ari ingenzi cyane ku Mugabane wa Afurika kwishakamo ubushobozi bwatuma uhangana n'izi ndwara.

Yakomeje ati “Ishoramari rikozwe mu buzima ni igishoro cyiza. Niyo mpamvu nshaka kugaragaza akamaro ko kwishakamo igishoro cyo gutera inkunga serivise z'ubuzima, cyane cyane muri Afurika.''

Umukuru w'Igihugu yavuze ko nk'Umugabane wa Afurika, ari na wo wibasiwe cyane n'indwara zo mu cyiciro cy'izitabwaho uko bikwiye, uri gukora ibishoboka byose kugira ngo wishakemo amikoro agomba gutera inkunga serivisi z'ubuzima.

Yagize ati “Kwishakamo amikoro ashorwa mu rwego rw'ubuzima ni ngombwa ku Muryango wa Afurika Yunze Ubumwe, kandi iterambere riri kugaragara muri buri gihugu buri mwaka.”

Perezida Kagame akuriye ibikorwa by'Umuryango wa Afurika Yunze Ubumwe bigamije gufasha ibihugu bigize uyu mugabane kwishakamo ubushobozi bwatuma ufasha kwiyishyurira ikiguzi cya serivisi z'ubuzima muri rusange, dore ko uru rwego ari rumwe mu rushingiye ku nkunga zituruka hanze y'umugabane kandi ari urwego rw'ingenzi cyane mu buzima bw'ibihugu.

Perezida Kagame yavuze ko ishoramari ryo mu rwego rw’ubuzima ari ingenzi cyane mu kurandura indwara zititabwaho uko bikwiye

Kuri uyu wa Kane nibwo u Bwongereza bwatangaje iki cyemezo cyo kongera ibihugu bitatu ku rutonde rw'ibindi bisanzwe, abaturage babyo bakumiriwe kwinjira muri icyo gihugu.

U Bwongereza bwatangaje ko iki cyemezo kigomba gutangira gukurikizwa ku wa Gatanu saa Saba z'amanywa.

Bisobanuye ko abantu binjiye cyangwa banyuze muri ibi bihugu batazemererwa kwinjira mu Bwongereza, usibye abenegihugu b'iki gihugu na Irlande.

Abagenzi bagomba kugaragaza icyangombwa cy'uko bipimishije kandi badafite ubwandu bwa Coronavirus, cyangwa bagahanishwa ama-Pound 500.

Mu Ugushyingo 2020, nibwo u Bwongereza bwaherukaga gutangaza urutonde rw'ibihugu birimo n'u Rwanda aho abagenzi babiturutsemo bari bemerewe kujya muri iki gihugu.

U Bwongereza bwafashe izi ngamba mu gihe ku wa 26 Mutarama 2021, bwabaye igihugu cya mbere ku Mugabane w'u Burayi aho abishwe na Coronavirus barenze ibihumbi 100.

Muri iki gihugu kandi abaturage bari mu cyiciro cya gatatu cya guma mu rugo, aho kuri ubu icyorezo gifite ubukana bwinshi.

Kuva umurwayi wa mbere wa Coronavirus agaragaye mu Bwongereza, hamaze kuboneka abarwayi 3 743 734; abayikize ni 1 673 936 mu gihe 103 126 yabahitanye.

Abagenzi bava mu Rwanda bakumiriwe kwinjira mu Bwongereza mu gihe rwashyizwe ku mwanya wa Gatandatu ku Isi mu guhangana n'icyorezo cya COVID19, ruba igihugu kimwe rukumbi cya Afurika kije mu bihugu 10 bya mbere.

Uru rutonde rwakozwe hagendewe ku bushakashatsi bwakozwe n'Ikigo 'Lowy Institute' cyo muri Australia. Mu kubukora cyibanze ku makuru atangazwa n'inzego zishinzwe ubuzima mu bihugu umunsi ku munsi agaragaza umubare w'abapimwe COVID-19, abanduye, abakize, abapfuye n'abakirwaye.

Ibihugu birimo u Bushinwa, Tanzania n'u Burundi ntabwo bigaragara ku rutonde rw'ibihugu kuko nta makuru bitanga ku bijyanye n'imiterere ya Coronavirus umunsi ku munsi.

Abagenzi baturutse mu bihugu bitandukanye birimo n’u Rwanda bakumiriwe kwinjira mu Bwongereza