Author: webrwanda

Inama y’Abaminisitiri yateranye kuri uyu wa 02 Gashyantare 2021 niyo yemeje ko Prof Lyambabaje aba Umuyobozi Mukuru wa Kaminuza y’u Rwanda. Ni nyuma y’uko hari hashize amezi ane Phillip Cotton wayiyoboraga asoje amasezerano ye kuri uyu mwanya agasimburwa by’agateganyo na Dr Musafiri Papias Malimba wigeze kuba Minisitiri w’Uburezi.

Prof Lyambabaje yavutse mu 1960, ni ukuvuga ko afite imyaka 61. Yize muri kaminuza Nkuru y’u Rwanda, asoje ajya kwiga icyiciro cya gatatu cya Kaminuza (Master’s Degree) muri Canada.

Ni umwe mu bahanga mu Rwanda ufite impamyabumenyi y’Ikirenga mu mibare, kuko afitemo Doctorat yakuye muri Kaminuza ya Rennes mu Bufaransa.

Yabaye muri Guverinoma y’u Rwanda ku myanya itandukanye, aho nko mu 1999 yagizwe Umunyamabanga uhoraho muri Minisiteri y’Uburezi. Nyuma y’umwaka umwe, mu 2000 yagizwe Minisitiri w’Ubucuruzi, ubukerarugendo n’inganda hamwe no guteza imbere ishoramari n’amakoperative, umwanya yamazeho imyaka itatu kugera mu 2003.

Ni umwe mu bagize uruhare mu ishyirwaho rya politiki ijyanye n’ubucuruzi ndetse by’umwihariko n’iy’ubukerarugendo bw’u Rwanda.

Yagize kandi uruhare mu bikorwa bigamije kwihuza kw’akarere binyuze mu nama zo ku rwego rwa ba minisitiri yagiye yitabira zirimo iz’Umuryango wa Afurika y’Uburasirazuba na Comesa.

Kuva mu 2014 kugera mu 2015, yari Umushakashatsi muri Kaminuza y’u Rwanda mu ishami ry’Ubuvuzi n’ubuzima rusange.

Magingo aya, Prof Lyambabaje yari asigaye ari Umunyamabanga Nshingwabikorwa wa Komisiyo y’ihuriro rya za Kaminuza zo muri Afurika y’Iburasirazuba.

Usibye kuba ari umuhanga mu mibare, Lyambabaje ni umwe mu bantu bazwiho gukunda imikino by’umwihariko Volleyball yakinnye akanaba umutoza. Magingo aya, yari aracyagaragara akina umukino w’intoki wa Volleyball.

Yakinnye mu Ikipe y’Igihugu ya Volleyball yasohokeye u Rwanda ahantu henshi hatandukanye ku Isi. Uyu mukino w’intoki niwo wamuhesheje bourse yo kujya kwiga mu Bufaransa aho yakuye impamyabumenyi y’ikirenga ya Doctorat anakina Volleyball nk’uwabigize umwuga.

Prof Alexandre Lyambabaje yagizwe Umuyobozi wa Kaminuza y’u Rwanda

Lyambabaje yakiniye Ikipe y’Igihugu ya Volleyball

Itangazo ryashyizwe ku rukuta rwa Twitter rw’Ibiro by’Umukuru w’Igihugu, Village Urugwiro, rivuga ko iyi nama yabaye hifashishijwe ikoranabuhanga.

Ibyumweru bibiri birashize Inama y’Abaminisitiri yo ku wa 18 Mutarama 2021, iteranye ifata ingamba zigamije gukumira ikwirakwira ry’icyorezo cya COVID-19, gikomeje kugaragaza ubukana buri ku rwego rwo hejuru.

Iyo nama ni yo yafatiwemo ingamba zirimo gushyira Umujyi wa Kigali muri gahunda ya guma mu rugo [Lockdown].

Nyuma yo gushyira Kigali muri guma mu rugo, Ikigo cy’Igihugu cy’Ubuzima, RBC, cyahise gitanga uburyo bwo gupima abantu benshi baba abo mu Mujyi wa Kigali no mu turere dutandukanye.

Muri icyo gikorwa cyakozwe hagendewe kuri buri kagari aho nko mu Mujyi wa Kigali hapimwe abagera ku bihumbi 20.

Ku wa 29 Mutarama, RBC yavuze ko abantu bagera ku 15000 ari bo bari bamaze gupimwa, muri bo 629 bangana na 4% basanzwemo ubwandu bwa COVID-19.

Nyuma y’iyo gahunda RBC n’Umujyi wa Kigali bahise batangira gupima abaturage bafite guhera ku myaka 25 kuzamura, ahari hateganyijwe gupimwa abantu 100 muri buri kagari, mu tugari 161 tugize Umujyi wa Kigali.

Kuri uyu wa 2 Gashyantare [nyuma y’iminsi 15], abagize Guverinoma bongeye guterana barebera hamwe uko icyorezo gihagaze nyuma y’izo ngamba zikakaye zashyizweho zigamije gukumira ko cyakomeza guhererekanywa mu baturage.

Mu byitezwe muri iyi nama harimo gusuzumira hamwe imiterere y’icyorezo mu gihugu hose by’umwihariko muri Kigali, umaze ibyumweru bibiri muri guma mu rugo.

Umubare w’abahitanwa na COVID-19 uragenda urushaho kuzamuka, aho kuri ubu ari 198, mu gihe abamaze kuyandura na bo bagera ku 15 459. Ijanisha ku bandura riri kuri 4% mu gihe iry’abakira ari 66, 4%.

Imibare igaragaza ko kuva tariki 18 Mutarama kugeza ku wa 1 Gashyantare 2021, hamaze gufatwa ibipimo 93,289. Muri byo abantu bose bapimwe hagaragayemo abanduye Coronavirus 4,427.

Muri iyo minsi 14, abantu 2,909 bari basanzwe bafite Coronavirus barayikize ndetse bapimwe bigaragara ko nta bimenyetso byayo bagifite. Ni mu gihe abishwe nayo ari 56.

Muri rusange kuva muri Werurwe 2020, ubwo umurwayi wa mbere wa Coronavirus yagaragaraga ku butaka bw’u Rwanda, hamaze gufatwa ibipimo 890,156, aho abasanganywe iki cyorezo bamaze kugera ku 15,459.

Abamaze gukira iki cyorezo ni 10,272 naho abakirwaye kuri ubu ni 4,989 mu gihe abo kimaze guhitana ari 198.

Minisiteri y’Ubuzima mu Rwanda igaragaza ko hari abandi barwayi 18 barembye cyane.

Perezida Paul Kagame yayoboye Inama y’Abaminisitiri yitezweho ingamba nshya kuri COVID-19

Iyi nama yitezweho gutanga icyerekezo gishya niba Umujyi wa Kigali uvanwa muri Guma mu rugo cyangwa ukagumishwamo

Amafoto: Village Urugwiro

Umurenge wa Muhima

Ni igikorwa bakoze ku Munsi w’Intwari z’u Rwanda tariki 01 Gashyantare 2021, ku bufatanye bw’umuryango w’Abacitse ku icumu rya Jenoside ku rwego rw’umurenge wa Muhima, nk’uko n’ubusanzwe babigenza mu bindi bikorwa byo kubunganira mu gihe bafite ibibazo by’ubuzima bugoye kubera ingaruka za Jenoside yakorewe Abatutsi.

Nizeyimana Olivier De Maurice uhagarariye IBUKA mu murenge wa Muhima aganira na Kigali Today, yavuze ko icyo gikorwa bagitekereje nyuma yo gusanga hari bagenzi babo bashobora kuba barahuye n’ingaruka zikomeye z’ubuzima muri iyi minsi Umujyi wa Kigali umaze muri gahunda ya Guma mu rugo kubera Covid-19.

Agira ati “Abacitse ku icumu rya Jenoside urabizi ko baba batuye ahantu hatandukanye, ku buryo mu bihe bya Guma mu rugo bigoye kumenya uko bose babayeho, ruriya rubuga rwa WhatsApp duhuriyeho rwadufashije guhanahana amakuru tumenya uko buri muntu abayeho”.

Ati “Urabizi ko n’ubusanzwe hari abacitse ku icumu baba bafite imibereho igoye, hari abahabwa inkunga y’ingoboka ya FARG ariko hari n’abatayibona. Muri iyi minsi rero hari abo byahumiye ku mirari, tuza gusanga tugomba kwishakamo ubushobozi ababishoboye batanga uko bifite tubasha gukusanya amafaranga y’u Rwanda hafi ibihumbi 300.”

Nyuma yo kwishakamo ubwo bushobozi, bashyizeho komite igizwe n’abantu batatu bakoranye n’abahagarariye IBUKA ku rwego rw’Akagari, babafasha kumenya abakeneye inkunga cyane kurusha abandi, hanyuma bakora urutonde rw’abantu 18 babagabanya iyo nkunga.

Mu bagejejweho iyo ngoboka harimo umubyeyi w’abana batatu witwa Mukarukaka Belancille wari usanzwe akora ubucuruzi bwo kwirwanaho wenyine, ngo abashe gutunga abana aho ari mu icumbi ry’umugiraneza mu Nyakabanda.

Ni nyuma y’uko umuntu wari waramutije inzu byabaye ngombwa ko ayikenera ngo ayibikemo ibikoresho byo kubaka.

Mukarukaka aganira na Kigali Today yagize ati “Icyo nshima cyane ni uko tugira abavandimwe bajya badutekerezaho, kuko inkunga baduhaye yatumye tumanura Imbabura”.

Ati “Iminsi 14 ni myinshi cyane, urabizi ko n’ijoro rimwe bavuga ko ribaga imbyeyi, rero baradufashije cyane ubu naguriye abana akawunga n’ibishyimbo. Ni ukuri agafu baduhaye kazabe nk’aka wa mukecuru wo muri Bibiliya wagize ati igiseke cyanyu ntikikaburemo ifu”.

Undi wahawe kuri iyo ngoboka ni umusaza witwa Uwayisaba Jean Baptiste wamugajwe na Jenoside yakorewe Abatutsi, we by’umwihariko asanzwe ari mu mibereho itamworoheye na buhoro kubera uburwayi bunyuranye bumusaba guhora kwa muganga kandi aba wenyine, ariko nawe byibuze arashima Imana ko yakoreye mu bavandimwe bakabasha kumuzirikana muri ibi bihe bitamworoheye.

Uwayisaba agira ati “Baramfashije cyane kuko nta kintu na kimwe nari mfite, ariko nahise nguramo udukara n’utuntu two kurya Rwose barankoreye cyane kandi bazakomeze bajye batuvuganira nkatwe tutava mu nzu, njyewe mfite tije mu kaguru”.

Abacitse ku icumu rya Jenoside bo mu murenge wa Muhima, no mu buzima busanzwe bagira ibikorwa byo gufatana mu mugongo kimwe no mu bihe byo kwibuka.

Nizeyimana yabwiye Kigali Today ko bafite umushinga munini barimo gutegura wo gutunganya filime mbarankuru (documentaire) kuri Jenoside yakorewe Abatutsi mu murenge wa Muhima, igikorwa avuga ko kizabasaba ubushobozi bwo mu rwego rwo hejuru.